Hegaa mala hanotan, issi uri hara machchiyo ekkidi he ooratta aqo deˈoy higgiyan erettidabadan qoppikko, gubaaˈee koyro aqo deˈoy attidabadan xeellees. Hegaadan kuuyiyo gaasuwaa akeekanawu, machcho yeddidi haranniyo ekkiyoogaa xeelliyaagan Yesuusi yootidobaa ane beˈoos.

Maatiyoosa 19:9n odettidaagaadan, machcho yeddana danddayiyo mexi issi gaasuwaa Yesuusi odiis. I hagaadan giis: “Ba machchiyo shaaramuxennan de7ishin yeddidi, haranno ekkiya ooninne shaaramuxees.” Yesuusi yootidobaappe nuuni (1) machcho yeddanaadan Geeshsha Maxaafay yootiyo mexi issi gaasoy shaaramuxiyoogaa gidiyoogaa, qassi (2) Geeshsha Maxaafay yootiyo he maaraappe kareera machcho yeddidi haranno ekkiya uri wodiraa laammiyoogaa akeekoos. *

Yesuusi issi uri shaaramuxidi ba machchiyo yeddikko, haranniyo ekkanawu Geeshsha Maxaafaa maaran danddayees gaanawu koyidee? Hegaadan gidennan aggana danddayees. Azinay shaaramuxikko, naaqettida machchiyaa awu atto gaanawu woy agganawu kuuyawusu. Machchiyaa atto geennan ixxada, paraman shaahettanawu kuuyikko, qassi hegee higgiyan kuuyettikko, eti naaˈˈaykka haraa ekkanawu woy gelanawu danddayoosona.

SHin naaqettida machchiyaa ba aqo deˈoy laalettennaadan wozanappe koyada, atto gaanawu koyiyoogaa ba azinawu yootana danddayawusu. SHin shaaramuxida azinay machchiyaa atto gaanawu koyiyoogaa odishin ixxidi, higgiyan shaahettikko shin? Machchiyaa awu atto gaanawunne eta aqo deˈoy laalettennaadan koyiyo gishshawu, Geeshsha Maxaafaa maaran I haranniyo ekkanawu danddayenna. I ixxis giidi, Geeshsha Maxaafaa maaraa kanttidi haranniyo ekkikko, haranttuwaa shaaramuxees; qassi hegee gubaaˈe cimati zaarettidi pirdda konttiyan xeelliyo allaalle.—1 Qor. 5:1, 2; 6:9, 10.

Issi uri Geeshsha Maxaafaa maaraa kanttidi hara maccaasaa ekkikko, gubaaˈee koyro aqo deˈuwaanne ooratta aqo deˈuwaa waati xeellii? Geeshsha Maxaafaa maaran koyro aqo deˈoy haˈˈikka deˈees gaana danddayettii? Naaqettida aqo laggiyaa awu haˈˈi atto gaanawu woy agganawu danddayay? Ooratta aqo deˈoy shin shaaramuxa aqo deˈodan xeelettii?

Kase, naaqettida aqo laggiyaa paxa deˈiyaaba, azina gelabeennabanne wodiraa laammibeennaba gidikko, ooratta aqo deˈuwaa shaaramuxa aqo deˈodan xeelloos. Gidoppe attin, machcho yeddidi haranniyo ekkiyoogaabaa yootido wode Yesuusi naaqettida aqo laggiyaabaa denttidobi baawa. SHin, I Geeshsha Maxaafaa maaraappe kareera machchiyo yeddidi haranniyo ekkiyaagee shaaramuxiyoogaa yootiis. Hegaa mala hanotan, machchiyo yeddidi haranniyo ekkiya uraa hanotay wodiraa laammiyoogaa gidiyoogaanne hegan koyro aqo deˈoy attiyoogaa Yesuusi yootiis.

Issi uri machchiyo yeddidi haranniyo ekkin aqo deˈoy laalettikko, naaqettida aqo laggiyaa ba koyro azinawu atto gaanawu woy agganawu danddayukku. Yaatiyo gishshawu, A ba koyro azinawu  atto gaanawu woy agganawu koshshiya koshshennaakko qoppaydda ba wodiyaa wurssana koshshenna. Qassi naaqettida aqo laggiyaa hayqqin aggin, azina gelin aggin woy shaaramuxin aggin, gubaaˈee ooratta aqo deˈuwaa xeelliyo ogee laamettanaadan oottenna. *

Qommoora beˈido leemisuwan, azinay shaaramuxiyoogee eti paraman shaahettanaadan oottees. Azinay shaaramuxennan deˈiiddi, paraman shaahettidi hara maccaasaa ekkikko shin? Woy azinay shaaramuxennan deˈiiddi, paraman shaahetti simmidi shaaramuxikkonne machchiyaa atto gaanawu koyishin hara maccaasaa ekkikko shin? Ha ubba hanotankka, paraman shaahettidi hara maccaasaa ekkikko, hegee wodiraa laammiyoogaa gidiyo gishshawu, koyro aqo deˈoy attees. Qassi ooratta aqo deˈoy higgiyan erettidaagaa gidees. Hidaare 15, 1979, Inggilizetto Wochchiyo Keelan, sinttaa 32n odettidaagaadan, “he izaawu haˈˈi haranno ekkido gishshawu, O aggidi ba koyro machcheekko simmana danddayenna; I shaaramuxidi hara maccaasaa ekkido gishshawunne paraman shaahettido gishshawu koyro aqo deˈoy attiichchiis.”

Haˈˈi akeekido ha ooratta qofay, aqo deˈuwaa geeshshatettaa woy shaaramuxiyoogee deexo nagara gidiyoogaa laafettidi xeellanaadan oottenna. Geeshsha Maxaafaa maaraa kanttidi ba machchiyo yeddi simmidi, Geeshsha Maxaafaa maaran laˈa gidennan deˈiiddi, hara maccaasaa ekkiya uraa hanotay wodiraa laammiyoogaa gidiyo gishshawu, cimati pirdda konttee eqqanaadan oottana koshshees. (Ooratta machchiyaa Kiristtaane gidikko, akka shaaramuxido gishshawu, ibaakka pirdda konttee xeellees.) Ooratta aqo deˈoy wodiraa laammidobadan xeelettana xaykkonne, kase he izaawu oottido iitabaa gaasuwan hara asay yiillotiyoogaa woy he izaawaa toochchiyoogaa agganaashin daro layttawu gubaaˈiyan dumma maatan I oottana danddayenna. Qassi I ammanettennan aggidoogaa gaasuwan qohettida koyro machchiyaa haˈˈi deˈiyo hanotaanne I aggidi biido guutta naatu hanotaakka gubaaˈe cimati qoppana bessees.—Mil. 2:14-16.

Geeshsha Maxaafaa maaraa kanttidi machchiyo yeddidi haranniyo ekkiyoogee gattiyo daafaa akeekidi, Kiristtaaneti aqo deˈuwaa geeshsha oottidi xeelliyoogan Yihoowa leemisuwaa kaalloosona.—Era. 5:4, 5; Ibr. 13:4.