Ha sugad nga sitwasyon, huhunahunaon han kongregasyon nga an nauna nga pag-asawa natapos na han nag-asawa utro an lalaki ngan legal an bag-o nga pag-asawa. Para masabtan an mga rason hini, hisgotan naton an ginsiring ni Jesus mahitungod ha pagdiborsyo ngan pag-asawa utro.

Ha Mateo 19:9, iginsaysay ni Jesus an amo la nga Kasuratanhon nga basihan ha pagtapos han pag-asawa. Nagsiring hiya: “An bisan hin-o nga nakikigdiborsyo ha iya asawa, labot la kon seksuwal nga imoralidad an hinungdan, ngan nag-aasawa hin iba nag-aadulteryo.” Ha ginsiring ni Jesus, aton nahibaroan nga (1) an seksuwal nga imoralidad an amo la nga Kasuratanhon nga basihan ha pagtapos han pag-asawa pinaagi hin diborsyo ngan (2) an lalaki nga nakikigdiborsyo ha iya asawa nga waray hiton Kasuratanhon nga basihan ngan nag-aasawa hin iba nag-aadulteryo. *

An ginsiring ba ni Jesus nagpapasabot nga an lalaki nga nakabuhat hin seksuwal nga imoralidad ngan nakigdiborsyo ha iya asawa gintatagan hin kagawasan han Kasuratan nga mag-asawa utro? Diri awtomatiko nga sugad hito. Kon nag-adulteryo an bana, an inosente nga padis magdidesisyon kon papasayloon ba niya an iya bana o diri. Kon diri niya hiya pasayloon ngan magdiborsyo hira, hira nga duha may kagawasan na ha pag-asawa utro kon tapos na an proseso han pagdiborsyo.

Ha luyo nga bahin, bangin karuyag han inosente nga padis nga matipigan an ira pag-asawa salit ginsumatan niya an iya bana nga andam hiya magpasaylo ha iya. Pero ano man kon diri karawaton han nag-adulteryo nga bana an pagpasaylo han iya asawa ngan maglugaring la pakigdiborsyo? Tungod kay an asawa andam magpasaylo ha iya ngan igpadayon an pag-asawa, an bana diri gintatagan hin kagawasan han Kasuratan nga mag-asawa utro. Kon magpirit la gihap hiya pag-asawa hin iba bisan kon waray hiya kagawasan ha pagbuhat hito, nag-aadulteryo hiya utro, salit aasikasuhon hiya utro hin hudisyal nga komite.—1 Cor. 5:1, 2; 6:9, 10.

Kon an lalaki nag-asawa utro nga waray man hiya kagawasan ha pagbuhat hito, ano an panhunahuna han kongregasyon ha nauna nga pag-asawa ngan ha bag-o nga pag-asawa? Nagpapadayon la ba gihapon an nauna nga pag-asawa sumala ha Biblia? Puydi pa ba magdesisyon an inosente nga padis nga pasayloon o diri pasayloon an iya bana hadto? Huhunahunaon ba nga pag-adulteryo an bag-o nga pag-asawa?

Han naglabay, ginhuhunahuna han kongregasyon nga pag-adulteryo an bag-o nga pag-asawa kon an inosente nga padis buhi pa, waray asawa, ngan waray makabuhat hin seksuwal nga imoralidad. Pero waray unabiha ni Jesus an inosente nga padis han ginhisgotan niya an pagdiborsyo ngan pag-asawa utro. Lugod, iginsaysay niya nga  an lalaki nga nakigdiborsyo nga waray Kasuratanhon nga basihan ngan nag-asawa hin iba, nag-aadulteryo. Ha sugad nga kahimtang, an pakigdiborsyo ngan pag-asawa utro, nga sumala kan Jesus katugbang hin pag-adulteryo, nagtatapos han nauna nga pag-asawa.

Kon an pag-asawa natapos tungod han pagdiborsyo ngan pag-asawa utro, diri na posible para ha inosente nga padis an pagpasaylo o diri pagpasaylo. Salit diri hiya mabubug-atan ha paghimo hin makuri nga desisyon kon papasayloon ba niya an iya bana hadto o diri. Dugang pa, mamatay man, mag-asawa utro, o makabuhat hin seksuwal nga imoralidad an inosente nga padis, diri magbabag-o an panhunahuna han kongregasyon ha bag-o nga pag-asawa. *

Ha ehemplo nga ginhisgotan na, an bana nag-adulteryo, nga nagresulta hin pagdiborsyo. Ano man kon an bana waray mag-adulteryo pero nakigdiborsyo ngan nag-asawa utro? O ano man kon an bana waray makabuhat hin seksuwal nga imoralidad antes han pagdiborsyo kondi ginbuhat niya ito katapos han pagdiborsyo ngan nag-asawa utro bisan kon an iya asawa andam magpasaylo ha iya? Hini ngatanan nga ehemplo, an pakigdiborsyo ngan pag-asawa utro, nga matatawag nga pag-adulteryo, nagtatapos han nauna nga pag-asawa. An bag-o nga pag-asawa matatawag nga legal nga relasyon. Sugad han ginsiring ha Nobyembre 15, 1979 nga isyu han The Watchtower, pahina 32, “yana nag-asawa na hiya utro, salit diri puydi basta tapuson na la niya ito ngan bumalik ha iya una nga asawa; an una nga pag-asawa natapos pinaagi han pagdiborsyo, pag-adulteryo ngan pag-asawa utro.”

Ini nga pagbag-o ha aton pagsabot diri nangangahulogan nga para ha mga Kristiano, an pag-asawa diri na sagrado o nga an pag-adulteryo diri seryoso nga sala. An lalaki nga nakikigdiborsyo ha iya asawa nga waray Kasuratanhon nga basihan ngan nag-aasawa hin iba, bisan kon sumala ha Kasuratan waray hiya kagawasan ha pagbuhat hito, aasikasuhon hin hudisyal nga komite tungod han pag-adulteryo. (Kon Kristiano an bag-o nga asawa, aasikasuhon liwat hiya hin hudisyal nga komite tungod han pag-adulteryo.) Bisan kon an bag-o nga pag-asawa diri huhunahunaon nga pag-adulteryo, an lalaki diri magigin kwalipikado ha espesyal nga mga pribilehiyo han pag-alagad ha kongregasyon ha sulod hin damu ka tuig, ngan huhulaton nga mapara an maraot nga reputasyon o kaarawdan nga resulta han iya sala. Ikukonsiderar liwat han mga tigurang an presente nga sitwasyon han una nga asawa nga bangin ginlimbongan ngan han minor de edad nga mga anak nga bangin gin-abandona han salaan nga padis.—​Mal. 2:14-16.

Tungod han seryoso nga mga resulta han diri Kasuratanhon nga pakigdiborsyo ngan pag-asawa utro, maaramon para ha mga Kristiano nga subaron hi Jehova ngan hunahunaon nga sagrado an kahikayan han pag-asawa.—​Ecles. 5:4, 5; Heb. 13:4.