For this kind situation, congregation go see the old marriage as something wey don end when the man marry another person, and they go see the new marriage as something wey agree with law. To understand wetin make us talk this one, make we discuss the thing wey Jesus talk, about divorce and to marry again.

As e dey for Matthew 19:9, Jesus talk the only reason for Bible wey fit make person end e marriage. E talk say: “Any man wey divorce e wife except say the wife commit sex wey no clean, and marry another woman, don commit adultery.” From the thing wey Jesus talk, we learn say (1) na only when husband or wife put hand for sex wey no clean, marriage fit end or divorce fit happen, and (2) if man end e marriage with e wife and marry another woman and no be because of the reason wey Bible give, the man don commit adultery. *

The thing wey Jesus talk about man wey sleep with another person and end e marriage with e wife, mean say Bible support say the man dey free to marry again? No, no be wetin e really mean. When man go sleep with another person, the wife fit decide whether e go forgive the husband or e no go forgive. If the woman no gree forgive and decide to end the marriage, the two of them dey free to marry another person after they don succeed to end the marriage according to government law.

But, e fit dey possible say the wife really want continue with the marriage and show say e want forgive e husband. But what if the husband wey sleep with another woman no gree continue with the marriage even after the wife don forgive, and e decide to end the marriage by e self according to government law? Because the wife dey ready to forgive the husband and continue with the marriage, Bible no support say the husband dey free to marry another person. If the husband decide to marry another person even as Bible no support say e fit do-am, this one mean say e don put hand for sex wey God hate again. And this one mean say the elders go judge e matter again.—1 Cor. 5:1, 2; 6:9, 10.

When man wey Bible no support say e dey free to marry another person marry again, how congregation suppose see the old marriage and the new marriage? Bible support say make the old marriage still continue? The woman fit still decide to forgive or no forgive the former husband? The congregation go see the new marriage like say the husband and the new wife de put hand for sex wey no clean?

Before-before, congregation de see the new marriage like say the husband and the new wife de put hand for sex wey no clean, as long as say the former wife still dey alive, e never marry, and e no sleep with another person. But Jesus no talk about the wife when e talk about divorce and to marry again. But instead, e explain say any man wey divorce e wife for reason wey Bible no support  and marry another person, the man don put hand for sex wey no clean. For this kind situation, as the man divorce the woman and marry another person, Jesus talk say na the same thing with adultery, and that one don end the old marriage.

When man end e marriage with e wife and marry another person, e no dey possible for the former wife to forgive or no forgive the man again. This one mean say, the woman no need to bother e self to decide whether e go forgive e former husband or e no go forgive. Another thing be say, whether the former wife die after, e marry again, or e put hand for sex wey God hate after, this one no de affect the way the congregation de see the new marriage. *

For the example wey we talk about for up, the husband sleep with another person and this one end the marriage. But what if the husband no sleep with another person, but e divorce e wife and marry another person? Or what if the husband no sleep with another person before e divorce e wife, but e come sleep with another person after e don divorce e wife and marry another person even as the wife dey ready to forgive and continue the marriage with-am? For all this examples wey we don talk about, as the marriage end and the husband marry another person, this one mean say e don put hand for sex wey no clean, and this one don end the old marriage. Government law support the new marriage. The Watchtower of November 15, 1979, page 32 talk say: “Now the man don start new marriage and so e no go fit just end-am and go back to e former wife. The old marriage don end because the man divorce the woman, e sleep with another person, and marry another person.”

This our new understanding no mean say Christians go begin de think say marriage no dey holy again, or say when husband or wife go sleep with another person say this one no be serious sin again. If man no follow wetin Bible talk to divorce e wife and marry another person even when e no dey free to marry again, elders go judge this man because e don put hand for sex wey no clean. (If the new wife na Christian, the elders go still judge-am as person wey put hand for sex wey no clean.) Even though say we no go see the new marriage like say the husband and wife de put hand for sex wey no clean, the man no go fit qualify to get special work for congregation for many years, and people go don stop to feel bad about the bad thing wey e do or they stop to feel say na person wey they no go fit respect. Before the man go fit qualify to get any special work for congregation, the elders go think about the condition of the former wife wey e don treat bad, and any small pikin wey e fit don abandon.—Mal. 2:14-16.

When person no follow wetin Bible talk about divorce and to marry again, this one de cause serious problem. Because of this one, e really dey good make Christians see marriage as something wey really dey holy, the same way Jehovah de see-am.—Eccl. 5:4, 5; Heb. 13:4.