Te ’u Fehu’i ’a Te Kau Lautohi
Kapau ʼe mavete he tagata mo tona ʼohoana kae mole hona tupuʼaga Fakatohi-tapu pea toe ʼohoana mo he tahi age, kotea te manatu ʼa te kokelekasio ʼo ʼuhiga mo tona ʼohoana ʼuluaki pea mo tana toe ʼohoana?
Ka hoko he aluʼaga feia, ʼe tonu ke mahino ki te kokelekasio, kua gata tona ʼohoana ʼuluaki ʼi te temi pe ʼae neʼe toe ʼohoana ai te tagata mo he tahi fafine. Pea kua fakamoʼoni leva tana toe ʼohoana. He koʼe ʼe tou fakamoʼoni ki ai? Tou toe vakaʼi pe kotea ʼae neʼe ui e Sesu ʼo ʼuhiga mo he tahi ʼe mavete pea toe ʼohoana.
Neʼe fakaha fakahagatonu e Sesu ia te manatu ʼa te ʼAtua, ʼo ʼuhiga mo te tupuʼaga pe ʼe tahi ʼe feala ke fakagata ai te nofo ʼohoana: “Kapau ʼe mavete he tagata mo tona ʼohoana kae neʼe mole fai e te fafine he ʼu felaveʼi fakasino heʼe ʼaoga, ʼe tono anai mo kapau ʼe toe ʼohoana.” (Mat. 19:9) Kotea ʼe tou mahino ʼi te ʼu palalau ʼa Sesu? 1) ko te tupuʼaga pe ʼe tahi ʼe feala ke mavete ai he taumatuʼa, ʼe ko te ʼu felaveʼi fakasino heʼe ʼaoga pea 2) kapau ʼe fia mavete he tagata a mo tona ʼohoana, kae mole hona tupuʼaga Fakatohi-tapu, pea ʼe toe ʼohoana mo he tahi age fafine, ʼe tono ia.
Kae neʼe ui koa e Sesu ka fai e he tagata he ʼu felaveʼi fakasino heʼe ʼaoga pea mo mavete mo tona ʼohoana, kua ʼateaina koa mai tona ʼohoana ʼo feala ai ke toe ʼohoana mo he tahi fafine? ʼE fakalogo te faʼahi ʼaia kia ia ʼae neʼe nofo agatonu. Kapau neʼe hala ki tuʼa ia te tagata, ʼe ko te fafine ʼae ʼe ina toʼo anai te tonu pe ʼe ina fakamolemole peʼe kailoa ki tona ʼohoana. Kapau ʼe mole fakamolemole te fafine ki tona ʼohona, ʼo iku ai ki te veteki e te lao tonā ʼohoana, kua nā ʼateaina leva ke nā toe ʼohoana mo he tahi age.
Kae ʼe feala pe ki te fafine, ʼae neʼe nofo agatonu, ke ina fakamolemole pea mo hoko atu pe tana fia maʼuli mo tona ʼohoana. Kae ʼe feafeaʼi leva mo kapau ʼe mole loto ki ai te tagata, ʼo ina veteki tonā ʼohoana ʼi te lao, kae neʼe mole ʼio ki ai te fafine? ʼE mole fakagafua e te Tohi-Tapu ke toe ʼohoana mo he tahi fafine, koteʼuhi neʼe kua fakamolemole e te fafine pea mo lotolelei ke toe hoko atu tanā maʼuli fakatahi. Kae kapau ʼe manatu pe ia ke toe ʼohoana mo he tahi fafine, logo la ʼe mole fakagafua e te Tohi-Tapu ke toe ʼohoana, ko tana tono tuʼa lua ʼaia. Koia ʼe tonu leva ke toe fai e te kau tagata ʼafea he komite faifakamau ʼo ʼuhiga mo te faʼahi ʼaia.—1 Ko. 5:1, 2; 6:9, 10.
Kapau ʼe toe ʼohoana he tagata kae ʼe mole fakagafua ʼi te Tohi-Tapu, kotea ʼae ʼe tonu ke mahino ki ai te kokelekasio ʼo ʼuhiga mo tona ʼohoana ʼuluaki pea mo tana toe ʼohoana? Kapau ʼe tou mulimuli ki te Tohi-Tapu, ʼe kei fakamoʼoni koa tona ʼohoana ʼuluaki? ʼE kei feala koa ki te fafine ʼae neʼe nofo agatonu ke ina fakamolemole peʼe kailoa, ki tona ʼohoana ʼae kua toe ʼohoana? ʼE tonu koa ke manatu te kokelekasio ko tanā nofo ʼohoana ʼe ko he tono ia?
Ki muʼa atu, neʼe tou mahino, ka mavete he tagata mo tona ʼohoana kae mole hona tupuʼaga Fakatohi-tapu, pea toe ʼohoana mo he tahi age fafine, ʼe nā maʼuli feʼauʼaki, mo kapau ʼe kei maʼuli pe tona ʼuluaki ʼohoana ʼae neʼe nofo agatonu, pe neʼe heʼeki toe ʼohoana mo he tahi tagata, pe neʼe heʼeki ina fai he felaveʼi fakasino heʼe ʼaoga. Kae ʼi te temi ʼae neʼe palalau ai ia Sesu ki te mavete pea
mo te toe ʼohoana, neʼe mole palalau ia ʼo ʼuhiga mo ia ʼae neʼe nofo agatonu. Neʼe ina fakamahino pe ia, ka mavete he tahi mo tona ʼohoana kae mole hona tupuʼaga Fakatohi-tapu pea toe ʼohoana mo he tahi age, ʼe tono ia. Koia ka mavete he tahi mo tona ʼohoana pea toe ʼohoana mo he tahi age (neʼe ui e Sesu ʼe ko he tono ia), kua veteki ʼosi tonā ʼuluaki ʼohoana.“Kapau ʼe mavete he tagata mo tona ʼohoana kaʼe neʼe mole fai e te fafine he ʼu felaveʼi fakasino heʼe ʼaoga, ʼe tono anai mo kapau ʼe toe ʼohoana.”—Mat. 19:9
Koia ka mavete he tahi mo tona ʼohoana pea toe ʼohoana mo he tahi age, kua veteki ʼosi tonā ʼuluaki ʼohoana, koia ʼe mole kei feala kia ia ʼae neʼe nofo agatonu ke ina fakamolemole peʼe kailoa ki tona ʼuluaki ʼohoana. ʼE mole kei ʼaoga ke ina toʼo te tonu maʼuhiga ʼaia. Koia ʼe mole tonu leva ki te kokelekasio ke natou talitali ke hoki mate ia ia ʼae neʼe nofo agatonu, peʼe ke toe ʼohoana, peʼe ke ina fai he felaveʼi fakasino heʼe ʼaoga, pea hoki feala leva ke natou ui kua veteki ʼosi tonā ʼuluaki ʼohoana. b
ʼI te ʼaluʼaga ʼaeni neʼe tou vakaʼi, neʼe ko te tagata ʼae neʼe tono pea mo mavete mo tona ʼohoana. Kae ʼe feafeaʼi leva mo kapau ʼe mavete te tagata kae neʼe heʼeki tono, pea toe ʼohoana leva ia? Peʼe feafeaʼi la mo kapau neʼe heʼeki ina fai he felaveʼi fakasino heʼe ʼaoga ʼi muʼa ʼo tana mavete, kae neʼe tono leva ki ʼamuli pea toe ʼohoana, logo la neʼe lotolelei pe tona a (ʼohoana) ke ina fakamolemole ki ai? ʼI te ʼu aluʼaga fuli ʼaia, ko te mavete pea mo te toe ʼohoana (ʼae ko he tono) kua ina veteki ʼosi te ʼuluaki ʼohoana. Ko tana toe ʼohoana ʼe kua fakamoʼoni ia ʼi te lao. Ohage ko tona ui ʼi Te Tule Leʼo ʼo te ʼaho 15 ʼo Fepualio 1980 (Fakafalani), ʼi te pasina 31 mo te 32, “ʼi te temi leva ʼae kua toe ʼohoana ai te tagata, ʼe mole kei feala ke toe liliu ki tona ʼuluaki ʼohoana. Kua veteki tonā ʼohoana ʼuluaki ʼuhi ko te mavete, mo te tono pea mo te toe ʼohoana ʼa te tagata.”
Ko te fakamahino foʼou ʼaeni ʼe mole ina fetogi te ʼuhiga taputapu ʼo te nofo ʼohoana, pea ʼe mole ina meʼa noaʼi te mamafa ʼo te tono. Kapau ʼe mavete he tagata mo tona ʼohoana kae mole hona tupuʼaga Fakatohi-tapu, pea toe ʼohoana mo he tahi fafine kae ʼe mole fakagafua e te Tohi-Tapu, ʼe tonu anai ke fai he komite faifakamau ʼuhi ko tana tono. (Pea kapau ko tona lua ʼohoana ʼe ko he Fakamoʼoni ʼa Sehova, ʼe toe fai pe anai he komite faifakamau ʼuhi ko tana tono.) ʼE moʼoni ʼi te temi ʼae neʼe toe ʼohoana ai te tagata, neʼe tono ia. Kae ʼe mole fakaʼuhiga leva ʼe nā maʼuli feʼauʼaki. Kae ʼe mole foaki anai kia ia he ʼu gaue maʼuhiga ʼi te kokelekasio lolotoga ni taʼu. ʼE tonu anai ke tokagaʼi te manatu ʼo te ʼu tehina mo tuagaʼane, ʼuhi ko te aga ʼae neʼe ina fai, pe ʼe kei natou manatu ʼe mole tuha ke foaki age he ʼu gaue maʼuhiga ʼi te kokelekasio. ʼI muʼa ʼo te toe foaki age he ʼu gaue maʼuhiga, ʼe tonu anai ki te kau tagata ʼafeā ke natou vakavakaʼi te aluʼaga ʼo tona ʼuluaki ʼohoana, he neʼe lagi ina fai he ʼu aga fakakaka ki ai, pea mo fakafisi ki te taupau ʼo ʼana fanau kae neʼe kei natou liliki.—Mala. 2:14-16.
ʼE mahino lelei te kau Kilisitiano ki te ʼu nunuʼa kovi ʼo te mavete pea mo te toe ʼohoana ʼae ʼe fakafehagai ki te Tohi-Tapu. Koia ʼe natou faiga malohi ke natou maʼu te manatu pea mo te sio ʼa Sehova pea mo fakamaʼuhiga te nofo ʼohoana, ko he fakatuʼutuʼu ʼe taputapu.—Ekl. 5:4, 5; Hep. 13:4.
a Ke mahino gafua te alatike ʼaeni, ʼe tou palalau anai ki te tagata ko ia ʼae neʼe tono, pea ko te fafine ʼae neʼe nofo agatonu. Kae ohage ko tona fakaha ia Maleko 10:11, 12, ko te ʼu palalau ʼae neʼe fai e Sesu, ʼe fakahagahaga ki te hahaʼi tagata ʼo toe feia pe mo te hahaʼi fafine.
b Ko te fakamahino foʼou ʼaeni ʼe ina fetogi te fakamahino ʼafeā. Ki muʼa atu neʼe tou ui, ka toe ʼohoana he tahi, ʼe tono ia mo kapau ʼe kei maʼuli pe tona ʼohoana ʼae neʼe nofo agatonu, pe neʼe heʼeki toe ʼohoana, pe neʼe heʼeki ina fai he felaveʼi fakasino heʼe ʼaoga.