Rogo ngbatungapai wa gure, dungurati rengbe ka bi gu rogatise ni amangihe mbata nga si ima digo, na kini bi gu vovo rogatise ni namangihe wa gupai du kina kuti ndiko. Tipa ka rugatise na ndu agu apai ani ada ti ni kuti digisopai wa gure, ani makianga agu apai Yesu apehe tipa mbutise na ki mangi rogatise berewe.

Ringbisihe kuti Matayo 19:9, Yesu aima sakapai tipa gu bangisa ndupai rengbe ka digiso rogatise. Ko aya: ‘Gu ni ka he diani tipa kura pai angia nga pa bäri ya, ki di kura ri, ni namanga bäri.’ Ani nawirika gupai ti afugo Yesu nga (1) wasiwasi kodaba nga gu yangara ndupai ringbisihe kuti Baibiri rengbe ka sa gupai nga boro digisi gani rogatise rogo mbutise yo, na (2) gu kumba nambu diani zanga ndupai rogo Ziazia Kekeapai yo na ki mangi rogatise na kura boro berewe, ni namanga bäri. *

Ya mo afugo Yesu nayugo gupai nga gu kumba namanga wasiwasi kodaba na ki mbu diani, ni na ranirii ka manga rogatise berewe na kura boro ringbisihe kuti Ziazia Kekeapai? Anga wo duhe te. Ho kumbakudee amanga bäri ni, diako nga boro wenesa du rengbe ka manga diaberã singia ri naida ka mbupai fuko watadu ri aidanga ka mbupai te. Ka singia ri ima mbuko, na agu ambakadapai du tipa mbutise ki ima nyasa, i dunduko ue du na ranirii ka manga rogatise na kura aboro berewe.

Ono tie, gu badiarogatise nga boro wenesa ima rengba kadu na nyemu ka nye kindi na kumbari na ri ima rengba ka pe gupai fu kumbari nga ri na nyemu ka mbupai fuko. Na ginipai tigaha ka mangi ka si du nga, gu kumbakudee mangi bäri re ká ga diako mbupai na ki mangi agu ambakadapai du tipa mbutise? Bambiko ri kindi na nyemu ka mbupai fuko na gayo rogatise kini ndu kindi kumbatayo, ringbisihe kuti Ziazia Kekeapai, ko adunga na ranirii ka manga rogatise na kura boro te. Ka si dunga ko ima diaberã tipa ka manga rogatise na kura boro si ki vura du nga ko na ranirii ka mangaha wo te, gure nga ko ima manga bäri berewe. Sidu tie, agu abaakumba nga ga dungurati yo ima rengba ka manga rondo sarangbanga berewe tipa ka sungo na ko tipa gako gbegberẽ mangapai.​—1 Kor. 5:1, 2; 6:9, 10.

Ho daha ni nga gu kumbakudee adunga na ranirii ringbisihe kuti Ziazia Kekeapai ya, mangi rogatise na kura boro, waigu dungurati abi gu rogatise ko amangihe mbata na gu vovo ho ko namangihe? Ringbisihe kuti Ziazia Kekeapai, ya mo gu rogatise ko amangihe mbata kindi? Ya mo gu badiarogatise nga boro wenesa re rengbe ka diaberã singia ka mbupai fu kuru kumbari watadu ka ká ko? Ringbisihe kuti dungurati, ya mo i rengbe ka bi gi rogatise nga pabäri?

Mbata kusayo, dungurati anaabi gi rogatise re nga si angia pabäri, ho si anidu ni nga gu badiarogatise nga boro wenesa re kindi ni ungani, ni ata manganga rogatise na kura boro te, na ni amanganga wasiwasi kodaba a te. Ono tie, Yesu aafuranga tipa gu badiarogatise nangia boro wenesa ho ko aasakapai ni tipa mbutise na ki mangi rogatise berewe na kura boro te. Kuba gure, ko asakirogo gupai yo nga, gu kumba nambu diani  zanga ndupai rogo Ziazia Kekeapai yo na tifuo gure, ni ki mangi rogatise na kura boro berewe, ni mangi bäri. Rogo ngbatunga pai wa gure, gu boro mangi mbutise na ki mangi rogatise berewe na kura boro, nga gu Yesu aya tipaha si ziazia wa ka i ya boro mangi kina bäri, si ima digiso gu kuru rogatise naadu mbata.

Ho kumba ambu diako ni na ki mangi rogatise na kura boro berewe, gene ho berewe be kuru diako nga boro wenesa tipa ri mbupai fuko watadu ka ká ko te. Si du tie, si aidanga berewe ri mangi gu nyanyakipa diaberã nga ka mbupai fu kuru kumbari watadu ka ká te. Berewe a, ka si vura dunga gu badiarogatise nga boro wenesa kpi, watadu mangi rogatise berewe, watadu mangi wasiwasi kodaba, gipai re aˈarianga gu bipai du dungurati na ni tipa vovo rogatise te. *

Wa ani ni wisigihe rogo gu kpiapai du kuari re, kumbakudee amangi bäri si ki sa gupai nga mbutise mangi. Ginipai rengbe ka manga ka si dunga kumbakudee ata manganga bäri te, ono ni mbu diani na ki mangi rogatise na kura boro berewe? Watadu na ka si dunga kumbakudee ata manganga wasiwasi kodaba mbata fu mbutise te ono ni ki mangi bäri tingbafuo mbutise na ni ki mangi rogatise na gu boro re, si ki vura du nga kuru diani na kina nyemu ka mbupai fu ni vurũ? Rogo agi akpiapai yo re dunduko, mbutise na ki mangi rogatise na kura boro berewe nga bäri na si nadigiso gu kuru rogatise nadu mbata. Vovo rogatise nga vovo kodatise ku rogo pabakure yo. A wa i apehe rogo gu Ngbaõbambu Sinziri nangia ga Ngbangba 15, 1979, kpe. 32, “awere ni ima rimo ku rogo vovo rogatise, ni arengbanga ka digisoho gbua na ki karaga tini berewe fuo kuru diani te, gu kuru rogatise nadu mbata aima digo rogo mbutise yo, bäri, na ki mangi rogatise na kura boro berewe.”

Gi vovo giarogopai yo re ayugongo gupai nga si naida Kristano naaberã gupai nga rogatise berewe ni ziazia ha te, watadu kaa bihe nga bäri berewe nga kere ingapai te. Ho kumba ambu diani ni zanga ndupai rogo Ziazia Kekeapai yo na tifuo gure, ni ki mangi rogatise na kura boro zanga ndupai ho rogo Ziazia Kekeapai nayugo gupai nga ni na ranirii tipa ka mangaha wo, abaakumba ima rengba ka manga rondo nga ga sarangbanga tipa ni bambiko ni ima manga bäri. (Ka si dunga gani vovo badiarogatise nga Kristano, si nika ida aida a i mangi rondo nga ga sarangbanga tipa ka sungo na ni tipa bäri.) Wa vura duhe nga aboro abingo gi vovo rogatise re ni pabäri te, gu kumba re arẽnga tipa kparakpara amomu rogo dungurati tipa dungu agarã te da kina ho ka ngbadu aboro zere ni kuti ni tipa gu gbegberẽpai ni amangihe kusayo re watadu ka i mbu gu bipai nga si arẽnga i fu irisa fu ni te. Mbata fu abaakumba fu ai momu fu ni nga ga sunge, si nika ida i berẽpa agu apai du tipa gu kuru diani ni amangipai na ni nipa biriki re na gu rukutu agude ni ambuyo na gani kuru badiarogatise re.​—Mara. 2:14-16.

Ni bipa gu kere sangbana apai rengbe ka kura mbiko gu mbutise na ki mangi rogatise berewe adunga kuti Ziazia Kekeapai ya, si nipa tatamana aKristano wiriki Yekova na kini bi rogatise ni ziaziaha.​—Batu. 5:4, 5; Eb. 13:4.