1. O saka sasowal ita a inaneng mikicowaay a ira hani?

 O SAKA sasowal ita a inaneng o mikitiniay i kakarayan Wama a sapakaolah. Maharek misangaˈ to saka cecay a tamdaw ci Ataman, ngaˈayto masasowal to kakarayan Wama. Ngaˈayay ci Atam misangaˈ to faelohay a sowal, micowat to adihayay a sowal. Misaka dademakan ningra konini a inaneng pangangan to polong a pinaˈorip. (Satapangan 2:19) Haratengen hena, tiya sakinacecay ningra malacafay to roma tamdaw, masasowal toya makapahay a fafahi ningra ci Ifa i, hakowaay ko kalipahak ningra hani!—Satapangan 2:22, 23.

2. Itini nolitengan ato anini, o saka sasowal a inaneng samaanay makasimaan no tamdaw misaka dademak?

² O saka sasowal a inaneng kahnayay makasimaan no tamdaw misaka dademak. Milipalawan ni Akoma Satan ci Ifa, o mangah ningra mikayatay to sakararaw no tamdaw, malo cowato ko malefotay. (Satapangan 3:1-4) Ikor mararaw ci Atam milolohay ci Ifaan, mangalef paconohay to ˈinorong ci Yihofaan. (Satapangan 3:12) Ikor no patayen ni Kain ko safa ci Apil i, misamangahay ci Yihofaan. (Satapangan 4:9) O teloc ni Kain ci Lamik mitiliday to cecay ˈOlic, o lalakaw paihkalay to tada mariˈangay ko tamdaw itiya. (Satapangan 4:23, 24) Anini samaanay ko pakayraan hani? Marariday maˈaraw ita ko ˈaˈideman no mirikecay itini ka ˈalomanan a kitiraan patelas sanay somowal to cikaditay a sowal. Ano itinito i picudadan ato katayalan, o kaemangay ato matoˈasay a tamdaw marariday tahatengil to cikaditay a sowal no tao. Roma i, pasangaray mahela ko cowa ka cikadit ko sowal a ika. Onini a pakayraan mitadtaday, onini a hekal nohatini malingaday ko kapelal.

3. (1) Wa minaˈon kita to maanan hani? (2) Onini a lalakaw mamilengo to maanan?

³ Ano eca ka pinaˈon i, o mamananam to kita to cikaditay a sasowalen, telocto mamisatapangto ko niyah a somowal. Malo Krisciyang, makalimay kita sapakahemekaw ci Yihofaan, tatodong nonini cowa ko piliyas aca ita somowal to cikaditay a sowal, saka dademakenho ko saka sasowal a inaneng pakahemek Cingranan. Onini a lalakaw mamilengo, itini kita ilaenoay a pakayraan samaan misaka dademak to saka sasowal a inaneng: (1) Mitosil i, (2) masaˈopo i, (3) masasowal to cerid a romiˈad i. Salakat maminengneng kita, ci Yihofa hano misaaretengay minengneng to sasowalen ita.

4. Mikitini Malaki 3:16, hano misaaretengay ci Yihofa minengneng to sasowalen ita?

⁴ ˈOsien ko Malaki 3:16. O sasowalen no cecay tamdaw ano paihkalay cingra to ‘mikangodoay ci Yihofaan, miharatengay to ngangan Ningra a tamdaw,’ o tatiliden ni Yihofa ko ngangan Ningra i ‘piharatengan a cudad.’ Miharateng kiso hano mihaen ko demak ni Yihofa hani? Sanay ci Yis: ‘Ano masamaanay ko falocoˈ noya tamdaw i, hatiraay ko masadakay i ngoyos ningra.’ (Matay 12:34) O mihadakan ita a sowal patalahkalay to nafalocoˈan a harateng no mita, paihkal to hakowaay ko kaolah ita ci Yihofaan, makalimay ci Yihofa to maolahay Cingranan a tamdaw tahadaˈoc maˈorip i faelohay a hekal.

5. (1) O sasowalen ato pidoko ita iraay ko maanan a kalaliting? (2) Nengnengen ko coka, ano makalimay kita maolah ci Yihofa to sasowalen ita, cowa ko mamidemak to maanan hani?

⁵ Sasinanoten ita ko sasowalen no niyah, mihaen ngaˈ cadaen ni Yihofa ko pidoko ita. (Yakop 1:26) O roma cowa kafanaˈ to Kawas a tamdaw misatakaraway cowa kangodo ko sasowalen, misamsamay to tamdaw. (2 Timoti 3:1-5) Maedeng caay ka ciharateng kita malecad cangranan. Makalimay kita maemin maolah ci Yihofa to sasowalen ita, kawra itini saˈopo anca mitosil i ano sidaˈit ko sasowalen ita, itini i lomaˈ mariˈang ko sowal to paro no lomaˈ, wa maolah ci Yihofa kitaanan han?—1 Pitiro 3:7.

6. Ci Cinpoli ngaˈay ko pisaka dademak to saka sasowal a inaneng, pairaay to maanan a ngaˈayay minaroˈan?

⁶ Ano ngaˈay ko pisaka dademak ita to saka sasowal a inaneng, paihkalay koni to soˈlinay kita midoko ci Yihofaan, wa ngaˈayho padama to itihiay a tamdaw mihapinang ‘o midokoay to Kawas a tamdaw ato cowa pidoko to Kawas a tamdaw iraay ko maanan a kasasiromaan.’ (Malaki 3:18) Nengnengen ko nalifetan no fafahiyan salikaka ci Cinpoli. b Itini i Kawcong cingra i, kinacecayay mamalacafay to cecay cafay micudad milahci to cecay a demak. Onini a cafay micudad mahapinangay to cowa ka lecad ci Cinpoli to romaroma micudaday, cowa ka iaikor no tao somowal to tatiihay a sowal, cowa ka somowal to cikaditay a sowal, sahtoay o tawlikay a sowal ko misowalan ningra. Matemeray ko falocoˈ nonini a cafay micudad, ikor misatapangay malacafay ci Cinpolian minanam to Fangcalay Cudad. O sasowalen ita ano ngaˈay misolot to tamdaw a mafanaˈ to soˈlinay a kimad, madeng o lalipahak ci Yihofa!

7. Harateng iso sasamaan misaka dademak to sapafeli ni Yihofa tisowanan a saka sasowal a inaneng?

⁷ Makalimay kita ngaˈay paˈodingar ci Yihofaan ko sasowalen no niyah, matongalho ko kangaˈay no kalalaˈed no niyah ato salikaka. Dotoc wa minengneng kita, iraay ko maanan ciepocay a pakayraan ngaˈay padama kitaanan padadotoc itini sasowalen malo ngaˈayay a taˈarawan.

8. Itini i pitosilan ci Yis i, samaanay patireng to ngaˈayay a taˈarawan i sasowalen?

⁸ Soˈlin caka ngodo ko sowal no tao, o sasidaˈit ko sowal ita, mikangodo to tao. Itiniho i fafekang no sera mitosil ci Yis i, sowal no tao cingranan o halikaenay haliepahay, mikapotay ci Akomaan, cowa pidofdof to Paselaˈan Romiˈad, mangalef o pakaditay to Kawas cingra sanay ko sowal. Kawra, cowa ka tano mariˈangay ko pipacaˈof ni Yis. (Matay 11:19; 26:65; Luka 11:15; Yohani 9:16) Papasayra kita ci Yisan a minanam, soˈlin caka ngodo ko sowal no tao, cowa kangaˈay kita tano mariˈangay ko sapacaˈof. (1 Pitiro 2:21-23) Manaokaniw, sapiˈimeraw to niyah cowa ko madoloay. (Yakop 3:2) Samaan ko demak ngaˈ madangar konini hani?

9. Itini pitosilan i, sasamaan kita a midemak ngaˈ padotoc a miˈimer to sasowalen?

⁹ Ano caka ngodo ko cilomaˈay i, hamaan pakidem ko harateng to tatiihay a sasowalen no cilomaˈay. Sowal no salikaka ci Samo: “Sasongilaˈen ako miharateng to misaaliay ko cilomaˈay pakatengil to soˈlinay kimad, miharatengho to ngangaˈay mafalic cangra.” Ano latekay maketeray ko cilomaˈay, samanen o pilisoˈan ita a toki cowa ka tatodong. O cecay fafahiyan salikaka ci Losiya sanay ko sowal, ano malitemoh ko maketeray a cilomaˈay i, misakamotoˈay cingra a mitolon, micangacang to sapadama ni Yihofa rihaday ko falocoˈ, eca ka somowal to tatiihay tengilen a sowal. Ngaˈayay nanamen ita ko nano demak ningra.

10. Mikitini 1 Timoti 4:13, o papatireng kita to manan a patosokan?

¹⁰ Pacakaten ko inaneng no niyah a pasifanaˈ. Ci Timoti o kadofahay ko nalifetan a mitosilay, kawra misaaliayho cingra to papadotoc a macakat. (ˈOsien ko 1 Timoti 4:13.) Sasamaan kita misalof to inaneng no niyah a mitosil hani? O mamisongilaˈ kita a misaday. Itini tonini a pakayraan, adihayay ko mihadakan no likakawa no Kawas ciepocay a lalosidan. Tinakoen, ngaˈayay nengnengen iso ko “Sarocoden Miasip ato Pasifanaˈ” a cudad, ato “Rayray no Saˈopo” itini “Misaday to Mitosilay” a lalakaw. Misongilaˈay kiso misaka dademak tonini a lalakaw han? Ano ngaˈay ko pisaday ita, cowato ko mamarawraw, ano somowal i, wa matongal ko pakasoˈlinay.

11. O romaroma a Krisciyang samaanay a pacakat to inaneng a pasifanaˈ?

¹¹ Sapacakataw to inaneng a pasifanaˈ, ngaˈayay hapinangen ita ko i lalomaˈay no kasakopang a salikaka, mikitira cangranan a minanam. Masowalay i fafekang ci Samo marariday miharateng, o romaroma a salikaka hano ngaˈay ko inaneng a pasifanaˈ. Minanaman ningra ko pakayraan nangra, ikor misaka dademakan itini i pitosilan. Ci Taliya fafahiyan salikaka sanay ko sowal, mikimad ko kadofahay ko nalifetan a mikimaday to pakapapotalay a kimad i, misongilaˈay cingra a mitengil, minanam cangranan samaan a mitadtad to kalimlaan ato padama to tamdaw misaharaterateng, mihaen itini i pitosilan i, mafanaˈayto cingra sasamaan pacaˈof to salicay no tao.

12. Harateng no roma tamdaw pasangaray samaan ko pidemak?

¹² Kita o kahacecay tamdaw wa ngaˈay itini i saˈopo tawlik a mirienang, cecay a pakayraan i, malacafay taˈangay ko ngiha a romadiw to sapahemek a radiw, ato mihadak to misadayan a sapacaˈof. (ˈOlic 22:22) Kawra harateng no roma tamdaw itini kaˈalomanan a kitiraan romadiw anca pacaˈof cowa ko madoloay, mahaenay kiso han? Ano mahaenay i, nengnengen ko romaroma salikaka samaanay miremo to marawraway a falocoˈ, wa taˈangay ko sapadama tisowanan.

13. Samaan ko demak iso ano romadiw to sapahemek a radiw i, ngaˈay misamacay ko falocoˈ?

¹³ Ano romadiw to sapahemek a radiw i, samacayen ko falocoˈ. Romadiw kita to radiw no Hongti Kitakit sakakaay a patosokan papakahemek ci Yihofaan. Ci Sara fafahiyan salikaka cowa kangaˈay tengilen ko radiw no niyah sanay miharateng, kawra makalimay cingra sapakayniaw i radiw pakahemek ci Yihofaan, mihaenay i, misongilaˈay cingra itini i lomaˈ mihatatanam a romadiw, malecad pakayni i roma a kamok no saˈopo misaˈicel a misaday. Itini pihatatanam i, misongilaˈay cingra miharateng to lalakaw no radiw iraay ko manan kalaliting to lalangian no saˈopo, sowal ningra: “Padamaay konini takowanan misinanot to lalakaw no radiw, ao cowa ko ngiha no takolaw ako.”

14. Ano hinangodoay kiso i, haratengen ko maanan mamadoloto pacaˈof itini i saˈopo?

¹⁴ Ka picerid pacaˈof. Soˈlinen ko sowal, sapihaenaw to demak pasangaran nanay ko piharateng no roma tamdaw. Masowalay i fafekang ci Taliya sanay: “Matalaway kako i ˈaˈayaw no tao a somowal, kawra ano somowal kako i cowa ka mirmir ko ngiha, cowa ka hapinang no tao. Pakaynien takowanan, itini i saˈopo pacaˈof tada pasangarayto.” Kawra cowa ka sawad sa ci Taliya a pacaˈof. Ano misaday cingra to saˈopo i, miharatengay, o saka cecay pacaˈof to salicay a tamdaw kantangen ko caˈof. Sanay cingra: “Cipinangay kako, soˈlin kantangay ko caˈof ako to kalimlaan ngaˈayayto, samanen o hatiniay a caˈof ko kaolahan no misikayay a tamdaw.”

15. Ano pacaˈof i haharatengen ko maanan hani?

¹⁵ O romaroma salikaka soˈlin cowa ko hinangodoay ko pinangan a tamdaw, kawra nolatekay cowa ka timolo pacaˈof to salicay. Misamanay hani? Ci Culiye fafahiyan salikaka sanay: “Nolatekay cisasaay kako a pakamay, samanen kantangay ko caˈof ako cowa kangaˈay sanay kako miharateng.” Kawra haratengen, makalimay ci Yihofa to pisaˈicel ita a midemak, mihadak to sangaˈayay a sapacaˈof no niyah ngaˈayayto. c Soˈlin marawraw kita, kamayanho misaˈicel a pacaˈof, manengneng ni Yihofa madeng o mamahemek Cingra!

16. O laliyasen ita ko masamaanay a sasowalen?

¹⁶ Aka somowal to ‘midokaˈay to tamdaw a sowal.’ (Ifiso 4:31) Masowalay i fafekang, cowa kangaˈay ko Krisciyang somowal to cikaditay a sowal. Kawra, o mamihadak kita to midokaˈay to tamdaw a sowal alatek, kawra cowa ka hapinang no niyah. O mahaenay a sowal o laliyasen ita. Tinakoen, cowa kangaˈay somowal kita to misakahmaway to roma serangawan a finacadan anca roma kitakit a tamdaw. Roma i, caay ka ciharateng kita tano milokesay a sowal midokaˈ to tao. Sowal no cecay faˈinayan salikaka: “Latekay malikafay a matawa kako to tao, o halama aca konini, awaay ko tatiihay saan miharateng, kawra tada madokaˈay ko mitengilay a tamdaw. Adihayay mihecaan, taˈangayay ko sapadama no fafahi ako takowanan, ano somowal kako to cowa pikangodo a sowal, midokaˈ cingranan ato roma tamdaw i, itiniay cingra i tekedan a kitiraan mihadak to raraw ako.”

17. Mikitini Ifiso 4:29, samaan ko pidemak ita ngaˈ ngaˈay macada no tao ko sapakalalok hani?

¹⁷ O pakalalokay to tamdaw ko hasowal. Mameten ita ko toki pakahemek to roma a tamdaw, hamaan mararid milikaf anca ngaliwngiw. (ˈOsien ko Ifiso 4:29.) Adihayay ko aakoˈiden no Israil tamdaw a demak, kawra marariday cangra ngaliwngiw, o hatiniay a harateng madoloay a midapdap. Maharatengayho iso alatek, minokay koya mamoetepay a misolapay no Israil somowalay to adihayay masofaway a sowal, telocto ‘polong no Israil tamdaw ngaliwngiway ci Mosian.’ (Saˈosi 13:31–14:4) O roma pakayraan i, pakalalokay to falocoˈ no tamdaw ko pakahemekay. Mahecad to fafahiyan a wawa ni Yifta samanen micadaayto sapakahemek no widang, mansa milifokay to sapakalalok, ngaˈay padadotoc kiˈimer i saaroˈan. (Kakitaan 11:40) Masowalay i fafekangay ci Sara sanay: “Ano pakahemek kita to tao i, mamatinako no tao ko olah ni Yihofa, itini i likakawa no Kawas mamahela nangra ko hapinokayan.” Mihaenay kakilimen ita ko toki mikifalocoˈ a pakahemek to roma a tamdaw.

18. Mikitini ˈOlic 15:1, 2, hano o soˈliˈlinay ko hasowal ita? O manan ko tatodong no soˈliˈlinay ko hasowal hani?

¹⁸ O soˈliˈlinay ko hasowal. Ano misamangah kita, cowa ko papakahemek ci Yihofaan, ˈintehay Cingra to polong a mangah. (Taneng 6:16, 17) Soˈlin o matatodongay ko misamangahay saan ko harateng no ˈalomanay tamdaw, kawra cowa kangaˈay kita misamangah, samanen o mararaway konini sanay ci Yihofa. (ˈOsien ko ˈOlic 15:1, 2.) Manaokaniw cowa kangaˈay kita misamangah, kawra cowa kangaˈay kita padeteng a mihimed to soˈlinay a demak miolat to tao.

19. Mamiliyasho kita to maanan a tatiihay a sasowalen hani?

¹⁹ Hamaan miyakayak to sanay sanay a sowal. (Taneng 25:23; 2 Tisalonika 3:11) Masowalay i fafekang ci Coliye sanay, miyakayakay a sowal pakayra cingranan tatiihay ko pifiyor, mitadtaday cingra: “Matengil ko sanay sanay a sowal masofaway ko harateng ako, caayto pakasoˈlin kako to somowalay to sanay sanay ko sowal a tamdaw, mana mafanaˈ kako to sasomowal cingra i lalikor ako to tatiihay a sowal hokira!” Ano mahapinang iso ko ˈalomanay masasowalay i, misatapang somowal to sanay sanay a sowal, tanamen a mifalic ko misowalan a demak, o tawlikay a demak ko sowalen.—Kolosay 4:6.

20. Mamisetek kiso to falocoˈ samaan ko pidemak?

²⁰ O kaˈoripan ita a hekal matomesay to masakenaay tatiihay a sowal. O mamisaˈicel kita ngaˈ eca kalecad to ˈalomanay tamdaw, ngaˈay pakahemek ci Yihofaan. Haharatengen o sakasasowal a inaneng ita o mikitiniay ci Yihofaan a sapakaolah, ciharatengay Cingra samaan ko pisakadademak ita tonini a inaneng. Itini kita pitosilan, saˈopo ato cerid kasasowal misaˈicel somowal to tawlikay a sowal, o papalemeden Ningra kita. Ikor no malaˈafo konini ciraraway a hekal, wa madoloto kita tano sasowalen a pakahemek ci Yihofaan. (Yuta 15) Itini ˈayaw nonini, mamisetek kita to falocoˈ tano kihcod ‘mahadakay i ngoyos a sowal’ no niyah pakahemek ci Yihofaan.—ˈOlic 19:14.