1. ?Hu i mekem se yumi naf blong toktok?

 FASIN blong toktok i wan presen we Jehova i givim long yumi. Afta we Jehova i wokem Adam, Adam i naf blong toktok wetem Papa blong hem long heven. Mo tu, hem i wokem sam niufala wod blong hem i save tokbaot moa samting. Adam i yusum gud presen ya blong putum nem blong ol animol. (Jen. 2:19) !Mo hem i glad tumas blong toktok faswan taem wetem wan narafala man, hemia naesfala waef blong hem Iv!—Jen. 2:22, 23.

2. ?Olsem wanem fasin blong toktok i kam nogud long taem bifo mo tede?

² Be smoltaem afta, fasin ya blong toktok i jenis i kam nogud. Setan we i Devel, i giaman long Iv mo hemia i mekem se sin i kamaot mo ol man oli no moa stretgud. (Jen. 3:1-4) Adam tu i no yusum gud presen ya taem hem i blemem Iv mo Jehova from mastik blong hem. (Jen. 3:12) Ken i giaman long Jehova afta we hem i kilim ded brata blong hem Ebel. (Jen. 4:9) Biaen, wan laen blong Ken, hemia Lamek, i raetem wan poem we i soemaot se ol man long taem ya oli gat raf fasin. (Jen. 4:23, 24) ?Be olsem wanem tede? Samtaem ol lida blong politik oli no sem blong talem ol rabis tok. Mo bighaf blong ol muvi oli fulap wetem ol rabis tok. Ol studen oli harem ol rabis tok long skul, mo ol bigman tu oli harem long ples blong wok. From we ol rabis tok oli stap kam plante tede, hemia i soem se wol ya i stap kam moa nogud.

3. ?Yumi mas lukaot gud long wanem mo bambae yumi tokbaot wanem long stadi ya?

³ Sipos yumi no lukaot gud, maet yumi tu yumi save stat blong yusum ol rabis tok we yumi harem oltaem. I tru, yumi ol  Kristin yumi wantem mekem Jehova i glad, taswe yumi neva mas yusum ol rabis tok. Yumi wantem yusum presen ya long wan gudfala rod blong presem God blong yumi. Long stadi ya, bambae yumi tokbaot olsem wanem yumi save mekem samting ya long (1) wok blong prij, (2) long kongregesen, mo (3) mo taem yumi storian wetem ol narafala. Be fastaem bambae yumi tokbaot from wanem Jehova i intres long ol toktok blong yumi.

4. Folem Malakae 3:16, ?from wanem Jehova i stap lesin long yumi?

⁴ Ridim Malakae 3:16. ?Yu save wan risen from wanem Jehova i raetemdaon long “buk blong rimemba,” nem blong ol man we toktok blong olgeta i soemaot se oli fraet mo tingting dip long nem blong hem? Ol toktok blong yumi oli soemaot samting we i stap long hat blong yumi. Jisas i talem se: “Taem man i tok, hem i stap talemaot ol samting we hat blong hem i fulap long hem.” (Mat. 12:34) Samting we yumi jusum blong tokbaot i soemaot sipos yumi lavem Jehova o nogat. Mo Jehova i wantem se olgeta we oli lavem hem oli enjoem laef olwe long niufala wol.

5. (1) ?Olsem wanem wosip blong yumi i joen wetem ol toktok blong yumi? (2) Folem pija, ?yumi mas lukaot gud long wanem?

⁵ Fasin blong yumi blong toktok i save soemaot sipos Jehova bambae i akseptem wosip blong yumi o nogat. (Jem. 1:26) Sam man we oli no lavem God, oli tok kros, oli no toktok kaen, mo oli tok flas. (2 Tim. 3:1-5) Yumi no wantem kam olsem ol man ya. Yumi wantem se ol toktok blong yumi oli mekem Jehova i glad. ?Be yu ting se Jehova bambae i glad sipos yumi toktok kaen taem yumi stap long ol miting o wok blong prij, be yumi no toktok kaen taem yumi stap wetem famle blong yumi?—1 Pita 3:7.

6. ?Wanem gudfala samting i kamaot taem Kimberly i yusumgud presen ya blong toktok?

⁶ Taem yumi yusumgud presen ya blong toktok, yumi stap soemaot long ol narafala se yumi stap wosip Jehova. Yumi stap halpem ol narafala blong oli luksave olsem wanem “man we i stap wok blong God i defren  long man we i no stap wok blong hem.” (Mal. 3:18) Hemia nao samting we i hapen long wan sista nem blong hem Kimberly. b Oli jusum hem blong wok wetem wan gel long klas blong hem, blong mekem wan projek blong skul. Afta we tufala i wok tugeta, gel ya i makem se Kimberly i defren long ol narafala studen. Hem i no stap tok nogud long saed blong ol narafala, i toktok kaen, mo i no tok swea. Gel ya i sapraes tumas, mo biaen hem i agri blong stadi Baebol wetem Kimberly. !I sua se Jehova i glad taem yumi yusumgud presen ya blong toktok, blong pulum ol man i kam long trutok!

7. ?Yu gat strong tingting blong mekem wanem wetem presen ya we God i givim long yu?

⁷ Yumi evriwan i wantem yusum fasin blong toktok blong ona long Jehova mo blong kam klosap long ol brata mo sista. Taswe, naoia bambae yumi luk sam rod we yumi save folem blong “soemaot gudfala eksampol long ol toktok” blong yumi.

8. ?Jisas i soem wanem eksampol long fasin blong toktok long wok blong prij?

⁸ Toktok kaen mo soem respek taem man i kros long yu. Taem Jisas i stap prij, ol man oli stap talem ol giaman tok se hem i man blong kakae tumas, i man blong drong, i wok wetem ol Devel, i no kipim Sabat, mo i no respektem God. (Mat. 11:19; 26:65; Luk 11:15; Jon 9:16) Nating se i olsem, Jisas i no tok kros long ol man ya. Olsem Jisas, yumi no mas tok kros long ol man we oli no toktok kaen long yumi. (1 Pita 2:21-23) Be i no isi blong mekem samting ya. (Jem. 3:2) Taswe, ?wanem i save halpem yumi?

9. ?Wanem i save halpem yumi blong lukaot gud long toktok blong yumi long wok blong prij?

⁹ Taem wan man i no toktok kaen long yu long wok blong prij, yu no mas kwik blong harem nogud. Wan brata nem blong hem Sam i talem se: “Mi tingbaot moa se man ya i nid blong harem trutok, mo se hem i save jenis.” Samtaem man blong haos i kros from maet yumi kam long wan taem we i no stret long hem. Sipos yumi mitim wan man we i tok kros long yumi, yumi save mekem samting we sista Lucia i mekem. Yumi save mekem wan sot prea, askem Jehova blong i halpem yumi blong stap kwaet, mo blong yumi no talem wan tok we i no kaen o we i no soem respek.

10. Folem 1 Timoti 4:13, ?yumi mas kamgud moa long wanem?

¹⁰ Kam gud moa long fasin blong yu blong tij. Timoti i gat gudhan blong prij, be yet, hem i nidim blong kam gud moa long fasin blong tij. (Ridim 1 Timoti 4:13.) ?Olsem wanem yumi save kam wan gudfala tija long wok blong prij?  Yumi mas rere gud. Yumi glad tumas se yumi gat plante gudfala tul we oli save halpem yumi blong kam ol gudfala tija. Yu save faenem sam gudfala infomesen long buklet ya Kam Gud Moa Blong Rid Mo Tij mo long haf ya “Kamgud Moa Long Wok Blong Prij” we i stap long Kristin Wok Mo Laef Miting Wokbuk. ?Yu yu stap yusumgud ol tul ya? Taem yumi rere gud, bambae yumi gat strong tingting mo yumi no fraet blong toktok.

11. ?Sam Kristin oli mekem wanem blong oli kam ol gudfala tija?

¹¹ Yumi save kam ol gudfala tija tu taem yumi lanem samting long ol narafala long kongregesen. Brata ya Sam we yumi tokbaot hem finis, i traem blong makem samting we i mekem se sam brata o sista oli ol gudfala man blong tij. Hem i lukluk gud fasin blong olgeta blong tij mo i traem blong mekem olsem olgeta. Wan sista nem blong hem Talia, i makem gud olsem wanem ol elda oli eksplenem samting taem oli givim pablik tok. Mo hemia i halpem hem blong eksplenem mo tokbaot ol topik we plante taem ol man oli askem long wok blong prij.

12. ?Samfala oli faenem i had blong mekem wanem?

¹² Yumi evriwan i save tekpat long ol miting taem yumi joen blong singsing tugeta mo givim ol gudfala ansa. (Sam 22:22) Samfala oli faenem i had blong singsing o givim wan ansa long taem blong ol miting. ?Yu tu yu faenem i had blong mekem olsem? Sipos yes, traem luk samting we i halpem ol narafala blong oli no fraet, mo maet hemia bambae i halpem yu tu.

13. ?Wanem i save halpem yu blong singsing wetem fulhat?

¹³ Singsing wetem fulhat. Impoten risen from wanem yumi singsing long ol miting, hemia blong presem Jehova. Wan sista nem blong hem Sara i ting se hem i no save singsing gud. Be yet, hem i wantem presem Jehova taem hem i singsing. Taswe hem i rerem ol singsing tu, taem hem i rerem ol miting blong hem. Hem i praktis long ol singsing mo hem i traem blong luk olsem wanem ol singsing ya oli joen wetem ol haf blong miting. Hem i talem se: “Hemia i halpem mi blong tingbaot moa ol toktok blong singsing ya i bitim we mi wari se mi singsing gud o nogat.”

14. Sipos yu stap fraet, ?wanem i save halpem yu blong givim ansa long ol miting?

¹⁴ Ansa oltaem long ol miting. Hemia wan samting we i had tumas long samfala. Talia we yumi tokbaot hem i finis i talem se: “Mi mi fraet blong toktok taem i gat plante man, be i had blong ol narafala oli luksave from we voes blong mi i kwaet nomo. Taswe blong givim ansa hemia i had tumas long mi.” Nating se Talia i fraet, be hemia i no stopem  hem blong i givim ansa long ol miting. Taem hem i rerem miting blong hem, oltaem hem i tingbaot se faswan ansa i mas sot mo i ansa stret long kwestin. Hem i talem se: “Hemia i min se i oraet nomo sipos ansa blong mi i sot, i simpol, mo i go stret long poen, from hemia nao kaen ansa we brata we i lidim stadi i wantem.”

15. ?Yumi mas tingbaot wanem long saed blong ol ansa blong yumi?

¹⁵ Samtaem ol Kristin tu we oli no fraet o sem, oli no stap givim ansa. ?From wanem? Wan sista nem blong hem Juliet i talem se: “Samtaem mi no wantem ansa from mi fraet se ansa blong mi i sot tumas, mo i no dip.” Be yumi mas tingbaot se Jehova i wantem we yumi givim eni ansa we yumi naf blong givim. c Hem i glad bigwan taem yumi mekem bes blong yumi blong ansa long ol miting, nating se samtaem yumi fraet.

16. ?Yumi mas lukaot gud blong no mekem wanem?

¹⁶ Yumi no mas talem “ol rabis tok.” (Efes. 4:31) Olsem we yumi tokbaot finis, ol Kristin oli neva mas talem ol rabis tok. Samtaem yumi talem ol rabis tok be yumi no luksave, taswe yumi mas lukaot gud. Eksampol, yumi mas lukaot blong no talem ol nogud samting long saed blong ol man blong narafala kantri, laen, o kalja. Mo tu, yumi mas lukaot blong no talem ol tok we i save spolem filing blong ol narafala. Wan brata i talem se: “Samtaem mi ting se mi stap talem ol fani tok nomo, be rili se i spolem filing blong narafala. Long ol yia we i pas, waef blong mi i halpem mi blong luksave se samtaem, mi talem ol samting we i no kaen mo i spolem filing blong hem mo ol narafala.”

17. Folem Efesas 4:29, ?Olsem wanem yumi save mekem ol narafala oli kam strong moa?

¹⁷ Talem ol tok we i mekem narafala i kam strong moa. Yumi mas kwik blong talem tangkiu, i bitim we yumi tok nogud o komplen. (Ridim Efesas 4:29.) Ol man Isrel oli gat plante samting blong talem tangkiu from, be plante taem oli komplen. Taem yumi gat fasin ya blong komplen, yumi save pulum ol narafala tu blong mekem sem mak. Maet yu tingbaot nogud ripot we ol ten spae oli talem, we i pulum ‘olgeta laen blong Isrel blong komplen agens long Moses.’ (Nam. 13:31–14:4) Be taem yumi talem gudfala toktok long ol narafala, hemia i halpem evriwan blong oli glad. Yumi sua se ol gudfala toktok we ol fren blong gel blong Jeftaha oli talem long hem, oli enkarejem hem blong i gohed blong mekem wok blong hem. (Jaj. 11:40) Sara we yumi tokbaot hem finis, i talem se:  “Taem yumi talem ol gudfala toktok long ol narafala, hemia i mekem oli harem save se Jehova mo ol narafala long kongregesen oli lavem olgeta.” Taswe, i gud yumi lukaot rod blong talem ol gudfala toktok long ol brata sista blong yumi.

18. Folem Ol Sam 15:1, 2, ?from wanem yumi mas tok tru, mo hemia i minim wanem tu?

¹⁸ Tok Tru. Yumi no save mekem Jehova i glad sipos yumi no tok tru. Jehova i no laekem nating eni kaen fasin blong giaman. (Prov. 6:16, 17) Nating se plante man tede oli ting se i oraet nomo blong giaman, be yumi no mekem from we Jehova i talem se i rong. (Ridim Ol Sam 15:1, 2.) I tru, yumi mas lukaot gud blong no giaman, be hemia i minim tu se yumi no mas givim rong tingting long ol narafala se yumi stap giaman.

19. ?Wanem wan narafala samting we yumi mas lukaot gud long hem?

¹⁹ No gosip o tokbaot nogud narafala. (Prov. 25:23; 2 Tes. 3:11) Juliet we yumi tokbaot hem finis, i tokbaot olsem wanem fasin blong gosip i spolem hem. Hem i talem se: “Taem mi lesin long narafala we i stap gosip, hemia i mekem mi mi harem nogud, mo mi no moa trastem hem. Hu i save, maet bambae hem i save tokbaot mi tu long ol narafala.” Sipos yu stap storian wetem narafala mo yu luksave se storian ya i stap kam moa nogud, i gud yu jenisim storian mo tokbaot wan gudfala samting.—Kol. 4:6.

20. ?Yu yu gat strong tingting blong mekem wanem?

²⁰ From we yumi laef long wan wol we plante man oli talem ol rabis tok, yumi mas wok had blong meksua se ol toktok blong yumi oli mekem Jehova i glad. Tingbaot se fasin blong toktok i wan presen we i kam long Jehova, mo hem i wantem se yumi yusum gud. Bambae hem i blesem traehad blong yumi sipos yumi yusum presen ya blong presem hem long wok blong prij, long ol miting, mo taem yumi storian wetem ol narafala. Taem Jehova i spolem rabis wol ya, bambae i moa isi blong yumi ona long Jehova wetem ol toktok blong yumi. (Jud 15) Be go kasem taem ya, i gud yumi gat strong tingting blong yusum “ol tok long maot blong yumi” blong mekem Jehova i glad.—Sam 19:14.