1. Hoo gi wi di gif fi taak?

 JEHOAVA, wi lovin Gaad, da di wan weh gi wi di wandaful gif fi taak. Az soon az Gaad mi mek di fers man, Adam, hihn kuda mi yooz werdz fi taak tu ih hevnli Faada. Adam kuda mi aalso mek op nyoo werdz, ahn dat mi help ahn fi yooz wahn lata difrent werdz wen ih taak. Adam mi yooz da gif fi naym di animal dehn. (Gen. 2:19) Ahn jos imajin how eksaitid Adam mosi mi feel wen ih mi geh fi taak tu wahn nada hyooman, ih byootiful waif, Eev, fi di fers taim!—Gen. 2:22, 23.

2. How peepl eena di paas ahn nowadayz shoa dat dehn noh yooz di gif fi taak eena di prapa way?

² Noh tu lang afta, Saytan di Devl neva yooz ih gif fi taak eena di prapa way. Hihn mi lai tu Eev, ahn sayka da lai hyoomanz inherit sin an imperfekshan. (Gen. 3:1-4) Adam neva yooz ih gif fi taak eena di prapa way eeda. Hihn mi blaym Eev, an eevn Jehoava, fi fi hihn oan mistayk dehn. (Gen. 3:12) Afta Kayn mi kil ih breda Aybl, hihn mi lai tu Jehoava. (Gen. 4:9) Laytaraan, Laymek, hoo da wan a Kayn disendant, mi rait wahn poawem weh taak bowt di vailens weh mi-di hapm eena fi hihn taim. (Gen. 4:23, 24) How peepl stan tudeh? Sohntaim, eevn peepl weh tek di leed eena palitiks noh shaym fi yooz bad langwij wen dehn di taak eena poblik. Ahn nowadayz, ih haad fi fain moovi weh noh gat een bad langwij. Pikni weh goh da skool hyaa doti langwij rait da dehn skool, ahn peepl weh goh da werk hyaa dehndeh sayhn ting rait wehpaat dehn werk. Di fak dat bad langwij soh kaman tudeh shoa how bad di werl stan.

3. Weh wi need fi bee kyaaful bowt, ahn weh wi wahn diskos eena dis aatikl?

 ³ If wi noh kyaaful, wi ku geh soh yoostu hyaa bad langwij dat wi staat tu yooz it tu. Af koars, az Kristyanz, wi waahn mek Jehoava hapi, soh wi wuda neva waahn yooz bad langwij. Wee waahn yooz di gif fi taak eena wahn gud way; wi waahn prayz Jehoava. Eena dis aatikl, wi wahn si how wi ku du dat eena (1) di minischri, (2) da wi kangrigayshan meetin dehn, ahn (3) eena wi evriday kanvasayshanz. Bot fers, mek wi kansida wai Jehoava kay bowt how wi yooz wi gif fi taak.

4. Akaadn tu Malachi 3:16, wai Jehoava kay bowt how wi yooz wi gif fi taak?

⁴ Reed Malachi 3:16. * Wai yu tink dat Jehoava ga wahn ‘buk weh mi geh rait op fronta hihnʼ wid sohn naym a peepl weh shoa bai di way dehn taak dat dehn fyaa hihn ahn meditayt pahn fi hihn naym? Weh wi seh shoa weh deh eena wi haat. Jeezas mi seh: “Kaaz wateva ful op wahn persn haat, dat da weh ih wahn taak bowt.” (Mach. 12:34) Weh wi chooz fi taak bowt shoa humoch wi lov Jehoava. Ahn Jehoava waahn evribadi weh lov hihn fi injai evalastin laif eena di nyoo werl.

5. (a) Weh wi wership ga fi du wid di way how wi taak? (b) Laik weh wi si eena di picha, weh wi need fi bee kyaaful bowt wen wi taak?

⁵ Di way how wi taak ku shoa weda er nat Jehoava wahn aksep wi wership. (Jay. 1:26) Sohn peepl weh noh lov Jehoava taak eena wahn way weh shoa dat dehn beks, dat dehn noh kain, ahn dat dehn prowd. (2 Tim. 3:1-5) Fi shoar wi noh waahn bee laik dehndeh kaina peepl. Wi waahn bee redi fi pleez Jehoava wid di way how wi taak. Bot yu tink Jehoava wahn bee hapi wid wi if wi taak eena wahn kain way da wi meetin dehn er eena di minischri bot wi taak eena wahn rof  way tu wi famili membaz wen nobadi di si wi?—1 Peet. 3:7.

6. Weh gud mi hapm wen Sista Kimberly mi yooz ih gif fi taak eena di prapa way?

⁶ Wen wi yooz wi gif fi taak eena di prapa way, wi mek adaz noa dat wi serv Jehoava. Wi help adaz weh deh rong wi “fi si di difrens bitween sombadi weh di serv Gaad ahn sombadi weh noh di serv ahn.” (Mal. 3:18) Dat da weh mi hapm tu Sista Kimberly. * Shee mi geh asain fi werk lang wid wan a ih klaasmayt fi du wahn proajek fi skool. Afta dehn mi werk tugeda, ih klaasmayt mi noatis dat Kimberly mi difrent fahn ada styoodents. Shee neva taak bad bowt adaz bihain dehn bak, ih mi taak eena wahn kain way, an ih neva yooz bad langwij. Kimberly klaasmayt mi sopraiz fi si how Kimberly mi bihayv, ahn laytaraan shee mi agree fi stodi di Baibl wid Kimberly. Jehoava reeli hapi wen wi yooz wi gif fi taak eena wahn way weh mek peepl waahn laan bowt hihn!

7. How yoo waahn yooz yu gif fi taak?

⁷ Aala wi waahn taak eena wahn way weh bring aana tu Jehoava ahn weh bring wi kloasa tu wi bradaz ahn sistaz. Mek wi luk pahn sohn gud wayz how wi ku kantinyu bee wahn gud egzampl “bai di way how [wi] taak.”

8. Weh egzampl Jeezas mi set fi wi eena di way how hihn mi taak eena di minischri?

⁸ Taak eena wahn kain way ahn shoa rispek eevn wen adaz mek yu geh beks. Wen Jeezas mi deh pahn ert, peepl mi seh dat hihn da-mi wahn jronkad, ih eet tu moch, ih mi werk fi di Devl, ih neva kip di Sabat, an ih neva ga no rispek fi Gaad. (Mach. 11:19; 26:65; Look 11:15; Jan 9:16) Bot stil yet, Jeezas neva geh beks an ih neva ansa bak eena wahn bad way. Wen adaz taak tu wi eena wahn bad way, wi waahn fala Jeezas egzampl ahn noh ansa dehn bak eena wahn bad way eeda. (1 Peet. 2:21-23) Af koars, ih noh aalwayz eezi fi bee kain wen adaz taak tu wi eena wahn bad way. (Jay. 3:2) Weh ku help wi?

9. How wi ku kanchroal weh wi seh wen sohnbadi taak tu wi eena wahn way weh noh kain eena di minischri?

⁹ Wen yu di preech ahn sohnbadi taak tu yu eena wahn way weh noh kain, chrai noh geh beks. Wahn brada weh naym Sam seh: “Ai chrai tink humoch di persn need fi laan bowt Gaad ahn dat ih ku chaynj.” Sohntaim di persn weh wi taak tu mait bee beks bikaaz wi vizit dehn da wahn bad taim. Wen wi taak tu sohnbadi weh beks, wi ku du weh Sista Lucia du. Wi ku seh wahn shaat pryaa, ahn wi ku aks Jehoava  fi help wi taak eena wahn way weh kain ahn weh shoa rispek.

10. Akaadn tu 1 Timoti 4:13, weh shuda bee wi goal?

¹⁰ Bee wahn beta teecha. Timoti mi ga wahn lata ekspeeryens az wahn preecha, bot ih mi stil need fi du beta eena di way ih teech. (Reed 1 Timoti 4:13.) How wi ku bee beta teechaz eena di minischri? Wi need fi pripyaa gud. Wi tankful dat wi ga wahn lata toolz fi help wi bee wahn beta teecha. Yu ku fain infamayshan weh ku help yu eena di broashoar weh naym Laan fi Reed ahn Teech Beta ahn di “Werk Haad fi Du Beta Eena di Minischri” sekshan a Wi Kristyan Laif ahn Minischri Meetin Werkbuk. Yoo di yooz dehndeh poblikayshanz? Wen wi pripyaa gud, wi noh wahn feel tu nervos ahn wi wahn ga kanfidens wen wi taak.

11. Weh help sohn Kristyanz fi bee beta teechaz?

¹¹ Wahn neks ting weh ku help wi bee beta teechaz da wen wi laan fahn adaz eena di kangrigayshan. Sam, weh wi mi menshan erliya, mi aks ihself da weh help sohn bradaz ahn sistaz fi bee gud teechaz. Hihn lisn gud tu di way dehn teech an ih chrai kapi weh dehn du. Wahn sista weh naym Talia lisn gud tu bradaz weh ga lata ekspeeryens di giv taak. Dat help shee fi eksplayn difrent tapik weh peepl aalwayz aks bowt eena di minischri.

12. Weh sohn peepl fain haad fi du da di meetin dehn?

¹² Wi ku aal tek paat da di meetinz wen wi sing tugeda ahn wen wi pripyaa gud fi gi koments. (Ps. 22:22) Sohn peepl fain it haad fi sing er fi gi koments da di meetinz. Dat da how yoo feel? If dat da di kays, ada peepl ekspeeryens wahn help yu fi stap feel frayd fi sing er fi gi koments da di meetinz.

13. Weh ku help yu sing wid aala yu haat da di meetin dehn?

¹³ Sing wid aala yu haat. Wen wi sing wi Kingdom sang dehn, wi goal da fi prayz Jehoava wid aala wi haat. Wahn sista weh naym Sara noh feel laik shee ku sing gud. Bot shee stil sing bikaaz ih waahn prayz Jehoava. Soh wen shee pripyaa fi meetinz, ih praktis di sang dehn tu. Wen shee praktis di sang dehn, ih chrai fi si weh di sang ga fi du wid weh dehn wahn taak bowt da di meetin. Sara seh: “Dis help mi fi foakos moa pahn di werdz weh deh eena di sang dan pahn how gud Ah sing.”

14. If yoo da wahn shai persn, weh ku help yu fi gi koments da di meetin dehn?

¹⁴ Koment regyula. Dis noh eezi fi sohn peepl. Talia, weh wi menshan erliya, seh: “Ah geh reeli nervos wen Ah haftu taak fronta ada peepl, an Ah wori bowt weh dehn wahn tink bowt mi. Ada peepl noh  noatis bikaaz mi vais yoozhwali kaam. Bot Ah geh reeli nervos, ahn dat mek it haad fi mek Ah gi wahn koment.” Eevn soh, Talia stil koment da di meetin dehn. Wen shee pripyaa fi di meetin, ih rimain ihself dat di fers koment pahn wahn tapik shuda bee shaat ahn tu di point. Shee seh: “Dat meenz dat ih aarait if Ah gi wahn ansa weh shaat ahn tu di point, bikaaz dat da di kaina ansa weh di brada weh di kandok di luk fa eniway.”

15. Weh wi shuda memba bowt di koment dehn weh wi giv da di meetin dehn?

¹⁵ Eevn Kristyanz weh noh shai mait noh waahn koment. Wai? Wahn sista weh naym Juliet seh: “Sohntaim Ah hoal bak fahn koment bikaaz Ah feel laik mi koment tu playn an ih noh gud inof.” Bot wi need fi memba dat Jehoava waahn wi gi di bes koments weh wi kud. * Hihn reeli apreeshiayt it wen wi du wi bes fi prayz ahn da wi kangrigayshan meetin dehn eevn doa sohntaim wi mait feel frayd.

16. Eena weh way wi noh fi taak?

¹⁶ Noh taak eena wahn way weh insolt adaz. (Ifee. 4:31) Laik weh wi menshan erliya, Kristyanz shuda neva yooz bad langwij. Bot wi ku en op di insolt adaz widowt wi eevn riyalaiz it, ahn soh wi need fi bee kyaaful. Fi egzampl, wi haftu bee kyaaful fi noh taak bad bowt peepl weh kohn fahn difrent kolcha, rays, er konchri. Ahn wi wuda neva waahn hert adaz wid di tingz weh wi seh. Wahn brada seh: “Sohntaim Ah seh tingz weh Ai mi tink foni an inosent, bot reeli dehn neva kain ahn dehn mi hert di ada persn feelinz. Mi waif reeli help mi wahn lat, bikaaz wen wi deh eena praivit, shee wuda tel mi if Ah mi seh sohnting weh mi song rood er weh mi hert shee an adaz.”

17. Akaadn tu Ifeezhanz 4:29, how wi ku schrentn adaz?

¹⁷ Taak eena wahn way weh schrentn adaz. Noh bee kwik fi kritisaiz er komplayn bowt adaz. Insteda dat, unu fi bee redi fi komen dehn. (Reed Ifeezhanz 4:29.) Di Izrelait dehn mi ga lata tingz fi bee tankful fa, bot dehn mi kip di komplayn. Wen wi kip di komplayn, wi ku mek ada peepl staat tu komplayn tu. Memba dat wen di ten spai mi bring wahn bad ripoat, aala di Izrelait dehn mi staat grombl bowt Moaziz. (Num. 13:31–14:4) Pahn di ada han, wen wi komen adaz wi help evribadi fi feel hapiya. Wi ku bee shoar dat di komendayshan weh Jefta daata mi geh fan  ih frenz mi giv ahn di inkorijment weh ih mi need fi kantinyu eena ih asainment. (Judg. 11:40) Sara, weh wi menshan erliya, seh: “Wen wi komen adaz, wi help dehn fi feel Jehoava lov ahn wi help dehn fi noa dat di bradaz ahn sistaz eena di kangrigayshan lov dehn tu.” Soh aalwayz luk fi wayz fi komen yu bradaz ahn sistaz.

18. Akaadn tu Psalm 15:1, 2, wai wi shuda taak di chroot, ahn weh aal dat inklood?

¹⁸ Taak di chroot. Wi noh wahn mek Jehoava hapi if wi noh tel di chroot. Hihn hayt eni kaina lai. (Prov. 6:16, 17) Eevn doa wahn lata peepl tudeh tink dat ih naamal fi lai, wee noa dat Jehoava seh ih rang ahn dat da wai wi noh du it. (Reed Psalm 15:1, 2.) * Af koars, wi noh waahn tel lai, bot wi aalso noh waahn hoal bak sohn infamayshan weh wuda giv adaz di rang aidyaa ahn mek dehn bileev sohnting els.

19. Wat els wi need fi bee kyaaful bowt?

¹⁹ Noh gasip. (Prov. 25:23; 2 Tes. 3:11) Juliet, weh wi menshan erliya, eksplayn how gasip afek shee. Shee seh: “Ih diskorij mi wen sohnbadi gasip, an ih mek Ah looz chros eena di persn weh di gasip. If da persn ku gasip bowt sohnbadi els, how Ai ku noa dat ih noh di gasip bowt mee tu?” If yoo deh eena wahn kanvasayshan ahn yu noatis dat ih di ton intu gasip, chaynj di tapik ahn taak bowt sohnting pazitiv.—Kol. 4:6.

20. Weh yoo mek op yu main fi du?

²⁰ Sins wi liv eena wahn werl weh lata peepl noh kay bowt weh dehn seh, wi haftu werk haad fi mek shoar dat weh wi seh aalwayz pleez Jehoava. Memba dat Jehoava da di wan weh gi wi di gif fi taak, ahn hihn waahn wi yooz it eena di prapa way. Jehoava wahn bles wi wen wi chrai taak eena wahn way weh bring prayz tu ahn eena di minischri, da wi meetinz, an eena wi evriday kanvasayshanz. Wen Jehoava dischrai dis wikid werl, ih wahn bee eeziya fi bring prayz tu ahn wid di tingz weh wi seh. (Jood 15) Now, mek op yu main fi mek Jehoava hapi wid di ‘tingz weh yu seh.ʼ—Ps. 19:14.