1. Kinsay nagpaposible nga makasulti ta?

 MAHIGUGMAON gyod ang Diyos kay gipaposible niya nga makasulti ta. Dihang gilalang ang unang tawo, si Adan, makagamit dayon siyag mga pulong sa pagpakig-estorya sa iyang langitnong Amahan. Puwede pa gyod siyang makahimog bag-ong mga pulong. Gihimo nâ ni Adan dihang ginganlan niya ang tanang hayop. (Gen. 2:19) Ug seguradong nalipay kaayo siya dihang naa na siyay naestorya nga laing tawo​—ang iyang guwapang asawa, si Eva!​—Gen. 2:22, 23.

2. Unsay nagpakita nga dili maayo ang sinultihan sa daghang tawo sa una ug karon?

² Pero wala madugay, kini nga regalo sa Diyos wala na gamita sa saktong paagi. Si Satanas nga Yawa namakak kang Eva, ug tungod ana ang tawo nakasala ug nahimong dili perpekto. (Gen. 3:1-4) Wala pod gamita ni Adan ang iyang dila sa maayong paagi kay iyang gibasol si Eva​—ug bisan si Jehova​—sa iyang kaugalingong kasaypanan. (Gen. 3:12) Si Cain namakak kang Jehova human niya patya ang iyang igsoon nga si Abel. (Gen. 4:9) Sa ulahi, ang kaliwat ni Cain nga si Lamek naghimog balak nga nagpakita nga bayolente kaayo ang mga tawo sa iyang panahon. (Gen. 4:23, 24) Komosta karon? Nakita nato nga sayonsayonon ra sa mga politiko ang pagpamalikas diha sa publiko. Ug lisod kaayong mangitag salida nga walay sagol nga daotang sinultihan. Ang mga estudyante makadungog ug pamalikas sa eskuwelahan, ug kadtong nanarbaho makadungog pod ana sa ilang trabahoan. Ang di maayong sinultihan komon kaayo karon, ug timailhan ni kon unsa na ka daotan ang kalibotan.

3. Angay tang magbantay sa unsa, ug unsay atong hisgotan niining artikuloha?

 ³ Kon dili ta magbantay, basig maanad na kaayo tang makadungog ug daotang sinultihan ug masundog na nato ni. Siyempre kay Kristohanon man ta, gusto natong mapalipay si Jehova, mao nga dili lang ta basta molikay sa daotang sinultihan. Gusto pod natong gamiton kining nindot nga regalo ni Jehova sa maayong paagi​—ang pagdayeg sa atong Diyos. Niining artikuloha, atong hisgotan kon unsaon nato nâ paghimo (1) sa ministeryo, (2) sa tigom, ug (3) sa pagpakig-estorya sa uban. Pero hisgotan una nato kon nganong importante kang Jehova ang atong sinultihan.

4. Base sa Malaquias 3:16, nganong importante kang Jehova ang atong sinultihan?

⁴ Basaha ang Malaquias 3:16. Unsa kahay rason nga isulat ni Jehova sa iyang “basahon sa handomanan” ang ngalan sa mga tawo kansang sinultihan nagpakita nga sila nahadlok niya ug namalandong sa iyang ngalan? Ang atong sinultihan nagpaila kon unsay naa sa atong kasingkasing. Si Jesus miingon: “Gikan sa kadagaya sa kasingkasing ang baba mosulti.” (Mat. 12:34) Ang atong ginasulti nagpakita kon unsa ka dako ang atong gugma kang Jehova. Ug gusto ni Jehova nga kadtong nahigugma niya malipayong magpuyo sa bag-ong kalibotan hangtod sa hangtod.

5. (a) Unsay koneksiyon sa atong pagsimba ug sa atong sinultihan? (b) Base sa makita sa hulagway, unsay angay natong bantayan bahin sa atong sinultihan?

⁵ Ang atong sinultihan dakog epekto kon dawaton ba ni Jehova ang atong pagsimba. (Sant. 1:26) Ang ubang tawo nga wala mahigugma sa Diyos mosulti nga pinasingka o sakit, o kaha manghambog. (2 Tim. 3:1-5) Di gyod nato gustong mosundog nila. Naningkamot ta nga malipay si Jehova sa atong sinultihan. Pero malipay kaha si Jehova kon buotan ta manulti sa tigom o sa ministeryo, pero sakit ta manulti sa atong pamilya kon naa ta sa balay?​—1 Ped. 3:7.

6. Unsay resulta sa maayong sinultihan ni Kimberly?

 ⁶ Kon maayo tag sinultihan, mapakita nato sa uban nga nagsimba ta kang Jehova. Matabangan nato sila nga klarong makita ang kalainan “tali sa nag-alagad sa Diyos ug sa wala mag-alagad kaniya.” (Mal. 3:18) Mao nay nahitabo sa sister nga si Kimberly. * Siya ug ang usa niya ka classmate sa high school nagkauban sa usa ka project. Namatikdan sa iyang classmate nga lahi siya sa uban. Si Kimberly buotag sinultihan, dili manglibak, ug dili mamalikas. Ang iyang classmate nainteres, ug sa ulahi nagpa-Bible study. Malipay gyod si Jehova dihang ang mga tawo mainteres sa kamatuoran tungod sa atong sinultihan!

7. Unsay gusto nimong himoon bahin sa imong sinultihan?

⁷ Gusto nato nga ang atong sinultihan makapasidungog kang Jehova ug makapasuod nato sa mga igsoon. Busa atong hisgotan ang pipila ka praktikal nga paagi nga padayon tang makapakitag maayong ehemplo diha sa atong sinultihan.

8. Unsang ehemplo ang gipakita ni Jesus kon bahin sa iyang sinultihan diha sa ministeryo?

⁸ Dihang sultihag sakit, sulti sa buotan ug matinahorong paagi. Panahon sa ministeryo ni Jesus, sayop siyang giakusahan nga palainom, hangol kaayog pagkaon, alagad sa Yawa, wala magtuman sa Igpapahulay, ug nagpasipala pa gani sa Diyos. (Mat. 11:19; 26:65; Luc. 11:15; Juan 9:16) Pero wala mobalos si Jesus ug sakit nga mga pulong. Parehas kang Jesus, dili gyod ta mobalos bisag sultihan tag sakit. (1 Ped. 2:21-23) Siyempre, dili nâ sayon. (Sant. 3:2) Unsay makatabang?

9. Unsay makatabang aron dili ta makasultig sakit dihang magsangyaw ta?

⁹ Kon sakit ug sinultihan ang tagbalay, paningkamoti nga dili magpokus sa iyang reaksiyon. Ang brader nga si Sam miingon, “Hunahunaon nako nga ang tagbalay kinahanglang makadungog sa kamatuoran ug posible siyang magbag-o.” Usahay masuko ang tagbalay kay wrong timing lang gyod ang atong pag-abot. Kon masuko ang atong kaestorya, puwede natong sundogon ang sister nga si Lucia. Moampo ta sa mubo nga tabangan ta ni Jehova nga magpabiling kalmado ug dili makasultig sakit.

10. Base sa 1 Timoteo 4:13, unsay paningkamotan natong himoon?

¹⁰ Paningkamoti nga mouswag ang imong paagi sa pagtudlo. Si Timoteo eksperyensiyado na sa pagsangyaw, pero kinahanglan gihapon niyang pauswagon ang iyang paagi sa pagtudlo. (Basaha ang 1 Timoteo 4:13.) Unsay atong himoon aron mouswag ang atong  paagi sa pagtudlo diha sa ministeryo? Kinahanglang mangandam ta pag-ayo. Makapalipay nga naay daghang gitagana nga makatabang nato nga mouswag. Makatabang nimo ang brosyur nga Mahimong Hanas sa Pagbasa ug Pagpanudlo ug ang seksiyon nga “Magmaepektibo sa Ministeryo” diha sa Atong Kristohanong Kinabuhi ug Ministeryo​—Workbook sa Tigom. Gipahimuslan ba nimo nig maayo? Kon mangandam ta pag-ayo, dili kaayo ta kulbaan dihang mosangyaw ta.

11. Unsay gihimo sa ubang igsoon aron mouswag ang ilang paagi sa pagtudlo?

¹¹ Mouswag pod ang atong paagi sa pagtudlo kon mokat-on ta sa uban diha sa kongregasyon. Si Sam, nga gihisgotan ganina, mamalandong kon nganong maayong motudlo ang ubang igsoon. Iyang obserbahan ang ilang mga paagi ug maningkamot siya nga sundogon kana. Ang sister nga si Talia maniid pag-ayo kon unsaon paghatag sa eksperyensiyadong mga mamumulong ang ilang mga pakigpulong publiko, maong nakakat-on siya sa pagtubag sa komon nga mga pangutana sa mga tawo sa ministeryo.

12. Sa unsa nalisdan ang ubang igsoon?

¹² Kitang tanan makaamot sa kalamposan sa atong mga tigom pinaagi sa pagkantag kusog ug paghatag ug maayong pagkaandam nga mga komento. (Sal. 22:22) Pero para sa ubang igsoon, lisod ang pagkanta ug pagkomento diha sa tigom. Mao ba nay imong gibati? Kon mao, makatabang kon imong mahibaloan ang gihimo sa uban.

13. Unsa tingali makatabang nga kinasingkasing kang makakanta sa tigom?

¹³ Kanta nga kinasingkasing. Gusto natong dayegon si Jehova. Mao nâ ang pinakaimportanteng rason kon nganong manganta ta sa tigom. Para sa sister nga si Sara, dili kaayo siya nindot ug tingog. Pero gusto niyang dayegon si Jehova pinaagi sa pagkanta. Busa dihang mangandam siya para sa tigom, apilon niya ang mga kanta. Iyang praktison ang mga kanta ug pamalandongon kon unsay koneksiyon ani sa hisgotan sa tigom. Siya miingon, “Nakatabang ni nako nga mas magpokus sa mensahe sa kanta imbes sa akong kinantahan.”

14. Kon maulawon ka, unsay makatabang aron makakomento ka sa tigom?

¹⁴ Pagkomento pirme. Para sa uban, dili ni sayon. “Kulbaan kaayo kong mosulti kon daghag tawo, pero dili ra ni mamatikdan sa uban kay kalmado man kog tingog,” miingon si Talia, nga gihisgotan ganina. “Maong malisdan kaayo ko sa pagkomento.” Pero wala nâ makapugong niya. Dihang  mangandam siya sa tigom, iyang hinumdoman nga ang unang tubag sa pangutana angayng mubo ug direkta sa punto. Siya miingon: “OK ra kon ang akong tubag mubo, simple, ug direkta sa punto kay mao nay gidahom sa nagdumala.”

15. Unsay angay natong hinumdoman bahin sa pagkomento?

¹⁵ Bisan ang mga igsoon nga dili maulawon usahay magduhaduha sa pagkomento. Ngano? Ang sister nga si Juliet miingon, “Usahay magduhaduha ko sa pagkomento kay ang akong komento morag simple ra kaayo ug dili nindot.” Pero hinumdomi nga gusto ni Jehova nga mohatag ta ug pinakamaayong komento nga atong maarangan. * Malipay kaayo siya kon determinado ta nga dayegon siya sa tigom ug dili magpapugong sa atong kahadlok.

16. Unsa nga sinultihan ang angay natong likayan?

¹⁶ Likayi ang tanang klase sa “sakit nga sinultihan.” (Efe. 4:31) Sa ato nang nahisgotan, ang mga Kristohanon dili gyod angayng mamalikas. Pero naay sakit nga sinultihan nga dili daling mamatikdan, ug angay pod tang magbantay ana. Pananglitan, angay tang mag-amping nga dili makasultig negatibo bahin sa mga tawo nga lahig kultura, tribo, o nasyonalidad. Likayan pod nato nga mobungat ug mga pulong nga mainsulto ug masakitan ang uban. Ang usa ka brader miingon: “Usahay naa koy masulti nga abi nakog OK ra ug kataw-anan pero ang tinuod naa diay nasakitan. Sa daghang katuigan, dako kaayong tabang ang akong asawa kay sekretoon ko niyag sulti kon naa koy mabungat nga makapasakit niya ug sa uban.”

17. Base sa Efeso 4:29, unsaon nato pagdasig ang uban?

¹⁷ Paningkamoti nga makapadasig ang imong sinultihan. Maayo gyod kon abtik kang mohatag ug komendasyon imbes manaway o moreklamo. (Basaha ang Efeso 4:29.) Ang mga Israelinhon daghag rason nga magpasalamat, pero pirme silang moreklamo. Kini nga kinaiya makatakod. Tingali mahinumdom ka nga tungod sa dili maayong report sa 10 ka espiya, “ang tanang Israelinhon nagbagulbol batok kang Moises.” (Num. 13:31–14:4) Pero kon mohatag tag komendasyon, malipay ang uban. Segurado nga ang komendasyon nga nadawat sa anak ni Jepte gikan sa iyang mga amiga nakadasig pag-ayo niya nga magpabilin sa iyang asaynment. (Maghu. 11:40) Si  Sara, nga gihisgotan ganina, miingon, “Dihang mohatag tag komendasyon, atong gipabati sa uban nga gipangga sila ni Jehova ug sa mga igsoon.” Busa pangitag kahigayonan nga makahatag kag kinasingkasing nga komendasyon.

18. Base sa Salmo 15:1, 2, nganong angay tang mosultig tinuod, ug unsay apil ana?

¹⁸ Sultig tinuod. Dili nato mapalipay si Jehova kon mamakak ta. Gidumtan niya ang tanang klase sa pagpamakak. (Prov. 6:16, 17) Bisag daghan karon ang naghunahuna nga normal rang mamakak, atong gisunod ang panghunahuna ni Jehova. (Basaha ang Salmo 15:1, 2.) Siyempre dili ta mamakak, pero likayan pod nato ang tinuyong paghatag ug kulang nga impormasyon nga maoy hinungdan nga masayop ang uban sa ilang konklusyon.

19. Unsa pay angay natong bantayan?

¹⁹ Likayi ang pagpanabi. (Prov. 25:23; 2 Tes. 3:11) Kon bahin sa dili maayong epekto sa tabi, si Juliet nga gihisgotan ganina miingon: “Dili gyod makapadasig ang pagpaminaw ug tabi, ug tungod ani mawad-an kog pagsalig sa tawo nga manabi. Kay unsaon nako pagseguro nga dili ko niya ipanabi sa uban?” Kon mamatikdan nimo nga tabi na ang inyong giestoryahan, paningkamoti nga lahion ang inyong estorya.​—Col. 4:6.

20. Unsay determinado nimong himoon bahin sa imong sinultihan?

²⁰ Kay gilibotan tag mga tawo nga dili maayog sinultihan, kinahanglang paningkamotan nato nga ang atong sinultihan makapalipay kang Jehova. Hinumdomi nga regalo gyod gikan kang Jehova nga makasulti ta, ug importante niya kon giunsa nato ni paggamit. Panalanginan ta niya kon mosulti ta sa paagi nga madayeg siya diha sa ministeryo, sa tigom, ug sa atong pagpakig-estorya sa uban. Dihang laglagon na kining daotang kalibotan, mas sayon na nga pasidunggan si Jehova pinaagi sa atong sinultihan. (Jud. 15) Sa pagkakaron, hinaot nga mahimo kang determinado nga mapalipay si Jehova pinaagi sa “mga pulong sa [imong] baba.”​—Sal. 19:14.