1. Bani onivahile nvaho wa ologa?

 OLOGA nvaho onivahile Mulugu wehu wokwela. Mmalile ottanddiwa mulobwana woroma Adamu, wahiroma ologa na Babi waye wa wirimu vina wandowavi enjedhedhaga dhologa dhaye modhela wita mazu maswa. Adamu ohilabihedha ewodhelo eji mudhidhi wavahiye dhinama mazina. (Wita 2:19) Karoma otananela wagalala okaniliye mulogeliye dila yoroma na muttu mukwaye—mwadhiye wokoddela, Eva!—Wita 2:22, 23.

2. Attu anlabihedha dhavi nvaho wa ologa?

² Vamaromo-vene nvaho obu wa ologa wahilabihedhiwa bure. Satana Ddiabo wahimuzivalela Eva, ottambi obu ohitatamula ottega vina ohiligana. (Wita 3:1-4) Adamu wahilabihedha bure ologa modhela ompwatteliha Eva—vina Yehova—dhovonya dhaye. (Wita 3:12) Kayini mmaleliye ompa mbalaye Abel wahimuzivalela Yehova. (Wita 4:9) Vasogorhova, mudhuli wa Kayini onkuweliwa Lamek wahiba jibo yaloga sabwa ya obure waliwo nsaka nttile. (Wita 4:23, 24) Dhilobodha dhili dhavi masaka abano? Dila dhina asogorheli a politika anologaga mazu abure vamuttittini s’okana manyazo. Masaka abano enorutxa wona obe ofwanya vidiyu muhinlogiwa mazu onyakuwa. Anyaskola anowiwa mazu abure agakala oskola, anamalaba anowiwa vina mazu abure agakala mmabasani. Mokubanyiha-mwene, mukalelo obu wologa ononiha wi attu anodhowavi alabihedhaga bure ewodhelo yologa.

3. Txini enfwanyelihu okalela txenjewa, vina elobo gani enasekeserhihu mwari mwa nsunzo ntti?

³ Nigahikale txenjewa, ninele olemela wiwa mazu ohifwanyelela ofiyedha iyo oroma ologa mazu akakene. Ebaribari wi iyo ninga Akristu, ninofuna venjene omwagalaliha Yehova  vina kaninfuna ologaga na mukalelo ninga obwene. Iyo ninfuna nilogege na mukalelo wofwanyelela wi—nimuttittimihena Mulugu wehu. Mwari mwa nsunzo ntti ninele wona mukalelo onawodhe iyo okosa ejuwene (1) mmabasani olaleya, (2) mmatugumanoni vina (3) nigalogaga siku na siku. Mbwenye nihinatti ninfuna niziwe sabwaya enzuzumela Yehova dhologa dhehu.

4. Mowiwanana na Malakiya 3:16, sabwaya jani Yehova agatanalaga dhologa dhehu?

⁴ Kengesa Malakiya 3:16. Weyo onoziwa sabwaya enlebela Yehova ‘munivuruni naye’ mazina a abale anoniha na mulogelo wawa wi anomova vina anotanaalela nzina naye? Dhologa dhehu dhinoniha ejile eli mmirimani mwehu. Nona Yezu baloga dhahi: “Mulomo onloga esile dhidhalile mmurimani.” (Mt. 12:34) Munuwelo wa omukwela wehu Yehova onooneya na esile dhinsakulihu ologa. Yehova onfuna wi abale animukwela akane egumi yowagalaliha velaboni ya vati.

5. (a) Dhologa dhehu dhimpatta dhavi omwebedha wehu Yehova? (b) Mowiwanana na foto vina mazu anfwanyeya mutxiddo txini enfwanyela iyo wubuwela nigalogaga?

⁵ Mulogelo wehu onodha omuttukulela Yehova orumela webedha wehu obe nne. (Tia. 1:26) Abale ahinimukwela Yehova anologa na owali, na obure vina na ovittukulela. (2 Tim. 3:1-5) Mbwenye iyo kaninfuna okala ninga abuwene. Ninfuna nikose muli mwetemwene wi nimwagalalihe Yehova. Mbwenye kinakwana omwagalaliha Yehova nilabihedhaga mazu apama nigakala na abali mmulogoni vina mmabasani a olaleya oku nigakala vatakulu na anamudhi ehu nilabihedhaga mazu ottiyana.—1 Ped. 3:7.

6. Mazu a Kimberly adhilena yopurelamo gani?

⁶ Nigalabihedha pama ologa ninele wawoniha attu ena wi ninimulabela Yehova. Dhahene panawodhihu wakamihedha attu wona ottiyana oliwo wa ‘muttu onimulabela Mulugu na oddule ohinimulabela.’ (Mal. 3:18) Jijuwene epadduwile na murogora onkuweliwa Kimberly. * Iyene wahittomeliwa okosa  mabasa oskola na mukwaye onsunziyena, venevo mukwaye wahinonelamo wi Kimberly wali wottiyana na akwaye ena a oskola. Iyene wali muttu wapama, kawaba attu ena vina kaloga mazu oputtula. Omamalelowa mukwaye wa Kimberly wahirumela omusunza Bibilia. Karoma otanalela mukalelo onagalala Yehova nigalogaga mazu apama anattukulela attu osunza ebaribari!

7. Txini enfwanyela iyo notene okosa na nvaho wa ologa?

⁷ Iyo notene ninofuna wi dhologa dhehu dhimuttittimihege Yehova vina dhattukulelege abali ehu okala ofiyedheya na iyo. Ninele wona mikalelo dhinanikamihedhe odhowavi nikalaga ‘tagiha ya ologa.’

8. Yotagiha gani enittiyedhi Yezu ya olabihedha ologa mmabasani olaleya?

⁸ Ologe na opama vina nriho masiki ogaligiwa. Yezu bali mmabasani olaleya velaboni ya vati, wamagedhiwa wi wanttabwiha oja na ongwa, wali musogoreli wa adomonyo kariha siku na Sabuddu vina wahifiyedha omagedhiwa wi kariha nzina na Mulugu. (Mt. 11:19; 26:65; Lk. 11:15; Jo. 9:16) Masiki dhawene, Yezu kakulile na mazu obure. Dhahene ninga Yezu, nigalogeliwa mazu onyimula kaniyelihe mazu akene. (1 Ped. 2:21-23) Enoziweya wi kahiye yovevuwa okosa ejiwene. (Tia. 3:2) Mbwenye txini enanikamihedhe?

9. Txini enanikamihedhe wang’anela dhologa dhehu mmabasani olaleya?

⁹ Ogalogeliwa mazu onyimula mmabasani olaleya kusilidhiwe. Mbali onkuweliwa Sam ologile dhahi, “Enzuzumela miyo jowi mwanamuralaya onofwanyela oziwa ebaribari vina onodhaga otxinja mukalelo waye.” Masaka mena mwanamurala onosilidheyaga na iyo sabwani nifiyile mudhidhi ohiliye pama. Niganfwanya muttu bali dhawene mmabasani olaleya nikose ejile enkosaga murogora Lucia. Nikose nlobelo momaguva nimukumbirhaga Yehova wi anikamihedhe okala okurumuwa vina nihiloge elobo-txilobo egadhile omunyimula.

10. Mowiwanana na 1 Timóteo 4:13, yogana yehu jivi?

¹⁰ Wunuwihe ewodhelo yawo ya osunziha. Timotéo wanda akosaga pama mabasa olaleya, masiki dhawene yanfuneya odhowavi onuwihaga ewodhelo yaye ya osunziha. (Kengesa 1 Timóteo 4:13.) Iyo ninawodhe dhavi wunuwiha ewodhelo yehu ya osunziha mmabasani olaleya? Ninofwanyela ovisasanyedha deretu nigadhowaga mmabasani olaleya, vina iyo nihikana dhipano dhinjene dhinanikamihedhe mpaddi obuwene. Weyo onele osunza venjene na brochura Ovilibihedhe Wengesa na Osunziha vina na epaddi “Ovilibihedhe Mmabasani a Olaleya” enda mu Mabasa na Yeddelo—Yehu ya Okristu. Weyo onopurelamo pama  dhipano esi wi wunuwihe ewodhelo yawo ya osunziha? Iyo nigavisasanyedha deretu, ninele okala ofwaseyene vina ninele ologa na ovikuluvela.

11. Abali ena awodhile dhavi wunuwiha ewodhelo ya osunziha mmabasani olaleya?

¹¹ Iyo vina ninele owodha wunuwiha ewodhelo yehu ya osunziha nigafwara dhotagiha dha abali ena a mmulogoni. Jijuwene enkosa Sam ologiwe omaromo. Iyene wanfwaseyela wawang’ana abali anwodha osunziha pama vina wansaza yotagiha yawa. Murogora dhahi onkuweliwa Talia ohisunza venjene na yotagiha ya abali enjene ankosa madiskursu pama. Iyene ohisunza mukalelo wowanonihedhamo vina wakula mavuzo ankosa attu dila dhinjene mmabasani olaleya.

12. Elobo gani enarutxa attu ena?

¹² Iyo ninele woniha wi ninokosa mpaddi wehu nigakala mmatugumanoni nigebaga na abali vina nigavahaga dhowakula dholibiha. (Masal. 22:22) Ena anorutxiwa wiba vina  ovaha dhowakula mmatugumanoni. Akala ejo enowupadduwela, weyo onele wagalala oganonelamo yakamihedhile attu ena okwaranya wova wanani.

13. Txini enokamihedhe wiba na ottaba ogakala mmatugumanoni?

¹³ Wibe na ottaba. Nigebaga jibo dha Omwene, efunelo yehu ja omuttittimiha Yehova. Murogora onkuweliwa Sara ononelamo wi iyene kanwodha wiba pama. Mbwenye iyene, onofuna omuttittimiha Yehova ebaga jibo. Elobo enimukamihedha Sara joroma osasanyedha jibodha dhinfuna wibiwa omatugumanoni agakala vatakulu, dhahene ninga munsasanyedhiliye dhipaddi dhina dha matugumano. Mudhidhi onibiye jibodha vatakulu onotamela ozinddiyela wiwanana wa jiboya na dhipaddi dhina dha matugumano. Iyene ohiloga: “Miyo ddinzuzumela mazuya ottiya mukalelo onibimi.”

14. Akala wa muttu wa manyazo txini enawukamihedhe ovaha dhowakula mmatugumanoni?

¹⁴ Ovilibihedhe ovaha dhowakula mmatugumanoni. Ebaribari wi eji enokalaga yorutxa mwa attu ena. Talia ologiwe omaromo bela dhahi: “Attu ena kannonelamo enddittukulela ologa na ofwaseya, mbwenye eji empadduwa sabwa yawi miyo ddinogurumela ddigalogaga vari va attu enjene. Nona ovaha yowakula mmatugumanoni enodirutxa vaddiddi.” Masiki dhawene, Talia kanttiya ovaha dhowakula mmatugumanoni. Agasasanyedhaga matugumano, iyene onononelamo wi yowakula yoroma ya ddima enofwanyela okala yokiva vina enakula makaniya a ddimaya. Iyene ohiloga: “Eji entapulela wi yowakula yaga enofwanyela okala yokiva mbwenye enawakula  nivuzona sabwani jijuwene enfuna nameddiha wa matugumanoya.”

15. Txini enfwanyela iyo wubuwela nigafunaga ovaha dhowakula mmatugumanoni?

¹⁵ Masiki abale ahili attu owova obe a manyazo, masaka mena anodhaga ohivaha dhowakula omatugumanoni. Sabwaya jani? Murogora dhahi onkuweliwa Juliet ohiloga dhahi: “Miyo ddinofiyedhaga ohivaha yowakula, ddinkosela ejuwene sabwa ya wubuwela wi yowakulaya jovevuwa vina kinakwana.” Akala weyo onubuwela dhahene kudduwale wi Yehova kanukumbirha ovaha yowakula yamakamaka vaddiddi. * Iyene onowagalala aganonaga nivilibihedhaga ovaha dhowakula mmatugumanoni mpaka apale vanwodhelihu masiki nigagurumelaga.

16. Mazu gani anfwanyela orabela Mukristu?

¹⁶ Kulogege ‘mazu ovadda.’ (Ef. 4:31) Ninga mulogilihu vamaromo, Mukristu kanfwanyela ologaga mazu abure. Mbwenye ahikalawo mazu mena onyimula ahinfwanyela ologiwa na Mukristu. Motagiha, iyo ninofwanyela okala txenjewa, kanikosege dholaddaniha dhabure nigaalogaga attu a yeddelo yina, nlogo nina vina elabo yina. Ottiya ejo, kaninfwanyelela ologaga mazu anakumula attu ena. Mbali dhahi ohiloga: “Miyo ddanloga mazu oliga onimi wi ddinovega vina kavali makani, mbwenye ologa ebaribari annanyimula attu ena. Mwa ovira wa mudhidhi, mwadhaga onoddikamihedha venjene. Dila dhotene dhinlogimi mazu ohifwanyelela iyene onoddipottotxa wi addikamihedhe wona mukalelo emunyimulile mazu aga obe anyimulile attu ena.”

17. Mowiwanana na Éfeso 4:29, ninawodhe dhavi walibiha attu ena?

¹⁷ Ologe na mukalelo onalibiha attu ena. Ottiya wasisigula obe wapambiha wilege watamalela. (Kengesa Éfeso 4:29.) Ana Izrayel ahikana sabwa dhinjene dhigattukuleli okala attu otamalela mbwenye ottiya ejo anveda elobo-txilobo wila arogele. Muttu agakana elemelelo yorogela elobo, attu amwaddamelile anoroma okosa yakakene. Txino weyo onowubuwela nipadduwo na anamarheza kuni adhilena miselu dhokubanyiha sabwa ya elabo yopikireliwa, venevo ‘ana Izrayel otene ahiroma omusadduwela Mizé.’ (Oleb. 13:31–14:4) Mwa mpaddi mwina, matamalo ahikana ewodhelo yowawagalaliha attu. Motagiha, matamalo akelile mwana Jefte na amarho akwaye ahimulibiha wi awodhe wakwaniha mabasa aye. (Anam. 11:40) Sara, ologiwe  omaromo, ohiloga dhahi: “Nigatamalelaga attu ena ninowattukulela wona wi anokweliwa na Yehova vina na abali ena.” Nona kapura mudhidhi wi watamalelege attu ena na murima wotene.

18. Mowiwanana na Masalmo 15:1, 2, sabwaya jani enfwanyela iyo ologa ebaribari nanda ejo eniwanana na okosa eni?

¹⁸ Ologege ebaribari. Iyo kaninawodhe omwagalaliha Yehova nigahilogege ebaribari. Sabwani iyene onowidda ottambi oli wetene. (Gano 6:16, 17) Mokubanyiha attu enjene masaka abano anubuwela wi ottambi kahiye elobo yabure sabwani attu otene anologa ottambi. (Kengesa Masalmo 15:1, 2.) Mbwenye iyo ninoziwa ejile enubuwela Yehova sabwa ya ottambi. Txibarene iyo kaninfwanyela ologa ottambi vina ninofwanyela orabela ohilogaga ebaribari eli yotene [meias verdades] sabwani okosa ejo enowapupurutxa attu.

19. Makani gani anfwanyeliwe okalela txenjewa?

¹⁹ Orabele waloga attu bure. (Gano 25:23; 2 Tes. 3:11) Juliet, ologiwe omaromo onotapulelamo eniwamo iyene agamwiwa muttu alogaga bure attu ena. Iyene ohiloga: “Omwiwa muttu amulogaga bure muttu mwina enoddikubanyiha venjene, eji enoddittukulela ohimukuluvela muttuya onimwiwa miyo alogaga bure attu ena sabwani kaddinziwa akala muttuya kanaddiloge bure agakala na attu ena.” Nona ogazinddiyela wi makani anloga nyuwo, muroma omuloga bure muttu mwina muttiye makaniya mwite mena analoginyu dhilobo dhapama.—Kol. 4:6.

20. Nigane okosa eni?

²⁰ Iyo nili mwilaboni muli attu andowavi alabihedhaga bure ewodhelo ya ologa nona enofuneya ovilibihedha venjene wi nilogege na mukalelo onimwagalaliha Yehova. Kudduwale, ewodhelo ya ologa nvaho wa Yehova nanda iyene onotanala mukalelo onlabihedhihu nvaho obu. Nikuluvele wi iyene onele oniruriha nigalabihedha pama ewodhelo ya ologa nigakala mmabasani olaleya, mmatugumanoni vina nigalogaga siku na siku. Elabo eji yabure egagoma enele okala yovevuwa omuttittimiha Yehova na dhologa dhehu. (Jud. 15) Nijedhaga ofiya wa siku ntto, ogane omwagalaliha Yehova na ‘mazu a mwano mwawo.’—Masal. 19:14.