1. ¿Kʼaiba diasi dayi bedʼea bʼaira?

 JEOWABA dayirã diasi nemita dayirã bedʼeapanamarẽã. Jeowaba Adán parãsidera aramaʉ̃ta Adánʼra bedʼea jʉ̃drʉsi Daizezeʉ̃me. Tẽãne Adánbara bedʼeata audre kʼawua wãsi. Adánbara Jeowaba iya nebia diadara zokʼasi nedʉwʉrʉra trʉ̃ diaita (Gén. 2:19). Adewara iyira mejãcha sobiasi awuru ẽbẽraʉ̃me bedʼeaside, yi kima Evaʉ̃me (Gén. 2:22, 23).

2. ¿Sãwũã aña zokʼa zebʉda dayi bedʼeabʉra nããrabemaba akʉza idi ewadedebemaba?

² Mamina dayi bedʼeabʉra ewari jõmaʉ̃nẽ bia zokʼada ẽ. Naʉ̃ra berabarisi Diaruba Evata sewasideba, maʉ̃ kʼarea ẽbẽrarã jõmaʉ̃ta nemitia omiara (Gén. 3:1-4). Adewara Adánbida aña zokʼasi dayi bedʼeabʉra iya jaraside Eva akʉza Jeowa kʼarea iya nemitia osita (Gén. 3:12). Caínbida bia zokʼa ẽ basi dayi bedʼeabʉra, Abel beada tẽã sewa nebʉraba jaraside (Gén. 4:9). Maʉ̃ tẽã Lamécʼba trãbita trãsi, maʉ̃ trãbidera jarabasi iyi ewaride kʼãrẽ nemitia opanana ʉ̃rʉ (Gén. 4:23, 24). ¿Idi ewaridera ẽbẽrarãra sãwũãpanʉ? Idi ewadera politikorãra mitia bedʼeabʉ akʉza awuru ʉ̃rʉ imitia jarabʉ. Idi ewadera zare pelikula ũduita imitia bedʼeabʉ ẽãta, adewara warrarabara imitia bedʼeabʉta ũrĩbʉ kolegiode akʉza zõrãrãbida ãyi trajabʉmae. Idi dayirãba ũrĩpanʉne ẽbẽrarã mejãchaʉba imita bedʼeapanʉta, naʉ̃ba ũdubibʉ naʉ̃ drʉade wuabʉrʉ nemitia owãnata.

3. ¿Kʼãrẽne jʉra kʼawua baibara dayirãra? ¿Kʼãrẽta kʼawuadai naʉ̃ artikulodera?

³ Idi ewade bedʼea mitiata mejãcha jarapanʉ baera, dayirãta jʉra kʼawuapanʉ ẽ bʉrʉ dayirãsida imitia bedʼea jʉ̃drʉseabʉ. Mamina dayirãra kristianora baera sobiabikĩrãpanʉ  Jeowata, maʉ̃ kʼarea bia zokʼakĩrãbʉ dayi bedʼeabʉta. Naʉ̃ artikulodera kʼawuayi sãwũã bia zokʼadaibarata dayi bedʼeabʉra Daizeze Bedʼea jaradia wãbʉrʉde, kongregasione ãba yi jʉrebʉde akʉza ewariza wuabemabawara bedʼeabʉde. Mamina, nããra akʉdayi kʼãrẽa Jeowaba akʉbʉta dayi sãwũã bedʼeabʉra.

4. Malaquías 3:16 jarabʉdebara, ¿Jeowabara kʼãrẽa akʉbʉ dayirã sãwũã bedʼeabʉra?

⁴ (Akʉra Malaquías 3:16). Naʉ̃ testodera jarabʉ Jeowabara iyi librode bʉsita ẽbẽrarã trʉ̃ta, iyi wawia ũdubibʉta akʉza iyi trʉ̃ ʉ̃rʉ bia krĩchapanʉta. Dayirã sãwũã bedʼeabʉdeba ũdubibʉ dayi sode sãwũã krĩchabʉta. Jesuba jarasi: «Sode nʉmʉ kʼãrẽta jarabʉ ibara» (Mat. 12:34). Dayirã aba abakaʉba krĩchabʉ sãwũã bedʼeaira, naʉ̃ba ũdubibʉ kʼãrẽaba kãgabʉta Jeowara. Akʉza Jeowabara kãgabʉ iyi kãgapanʉra ewari jõmaʉ̃nẽ bʼaita ẽjʉ̃ã biade.

5. (1) Dayirãta imitia bedʼeapanʉbʉrʉ, ¿kʼãrẽta berabari? (2) Potode ũdubibʉdera, ¿kʼãrẽta krĩchaseabʉ dayi sãwũã bedʼeabʉ ʉ̃rʉ?

⁵ Dayirãra nekʼãrẽ mejãcha opanʉ Jeowaba zokʼabʉ oita, mamina dayirãta bia bedʼea ẽ bʉrʉ, iya bia akʉ ẽ bayi dayirãba opanʉra iyi kʼarea (Sant. 1:26). Adewara yi ẽbẽra Daizeze kãga ẽãra imitia bedʼeapanʉ akʉza iyi sãwũã bedʼeabʉdeba ũdubibʉ iyira yãrã ʉ̃ta krĩchabʉta (2 Tim. 3:1-5). Dayirãra ãyi kĩrãkʼa bakĩrãpanʉ ẽ, awuarabʉrʉ Jeowaʼa sobiabikĩrãbʉ dayirã sãwũã bedʼeabʉdeba. Mamina, ¿dayirãbara sobiabika Jeowara kongregasione ãba yi jurebʉrʉde ibia bedʼeabʉbʉrʉ akʉza Daizeze bedʼea jaradiabʉrʉde, mamina imitia bedʼeabʉbʉrʉ dayirã mebẽrã? (1 Ped. 3:7).

6. ¿Kʼãrẽta ũdusi Kimberlyʼba iyi sãwũã bedʼeabʉra bia zokʼasi baera?

⁶ Dayirãba bia zokʼabʉbʉrʉ dayi sãwũã bedʼeabʉta ũdubipanʉ Jeowa ode bʉta, mawũã kʼarebapanʉ awuru ẽbẽrarãbara akʉdamarẽã awuarapanʉta «Daizeze ode panʉrata akʉza iyi ode panʉ ẽãta» (Mal. 3:18). Naʉ̃ta mawũã berabarisi  mebẽã aba yi trʉ̃ Kimberly *. Ewari aba Kimberlyʼra iyi neũdukʼawua kolegiodebemaʉ̃me tareata oibarabasi, maʉ̃ne iyi neũdukʼawuaba ũdusi Kimberlyʼra awuarabasita, iyira bedʼea mitia jara ẽ baera akʉza awurusida imitia jara ẽ baera akʉza awuruʼa ibiade bedʼeabasi baera. Maʉ̃ kʼarea tẽã iya Daizeze Bedʼeata kʼawua jʉ̃drʉsi, Jeowara kʼãrẽaba sobiabʉ dayirã sãwũã bedʼeabʉdeba iyi ʉ̃rʉ kʼawakĩrãbibʉ baera.

7. ¿Kʼãrẽta obʉ dayi ibia bedʼeabʉbara?

⁷ Ibia bedʼeabʉbara Jeowa ʉ̃rʉ ibia bedʼeabibʉ, adewara dayirã mebẽrã kʼawa babibʉ. Atia kʼawuadayi kʼãrẽta odaibarata dayi sãwũã bedʼeabʉra wuabemaraita yiza bia bʼaita.

8. ¿Kʼãrẽ yizata diasi Jesubara sãwũã bedʼeai ʉ̃rʉ Daizeze Bedʼea jaradiabʉrʉde?

⁸ Ibia bedʼeara awuruba imitia jarabʉrʉde. Jesu nama egoroeda zesidera, ẽbẽrarã mejãchaʉba krĩchapanasi Jesura nekomiabasita, itua domiabasita, sabado ewari wawia ũdubi ẽ basita akʉza Daizezesida wawia ũdubi ẽ basi (Mat. 11:19; 26:65; Luc. 11:15; Juan 9:16). Mawũãsidu Jesubara kĩrʉpanʉ ẽ basi iyi mawũã jarapanʉra. Mawũẽra dayirãʼa awuru ẽbẽraba imitia jarapanʉnera, Jesude kĩrãkʼa odaibara, iyabaʉ imitia jarada ẽ baibara (1 Ped. 2:21-23). Mamina zare ibia bedʼeaita awuru ẽbẽraba daya imita bedʼeabʉrʉdera (Sant. 3:2). Mawũẽra, ¿kʼãrẽba kʼarebaseabʉ ibia bedʼeaita?

9. ¿Kʼãrẽba kʼarebaseabʉ dayirãba Dazieze Bedʼea jaradia wãbʉrʉde imitia panʉ ẽ baita?

⁹ Bʉa Daizeze Bedʼea ʉ̃rʉ jaradia wãne ẽbẽra abaʉba bʉʼa kĩrʉra daucha kĩrʉpanʉrãra, awuarabʉrʉ ibiade panʉra. Mebẽã aba yi trʉ̃ Samʼba jarabʉ: «Mʉ̃a krĩchabʉ maʉ̃ ẽbẽrabara mejãchade Daizeze ʉ̃rʉ kʼawuaita nesidabʉta akʉza iya obʉra idubʉseabʉta». Edaʉde dayirãba Daizeze Bedʼea ẽbẽrarã jaradia wãbʉrʉdera ãyira kĩrʉbʉ aya bedʼea zroma erbʉ kʼarea. Dayirãba ũdudara ẽbẽra abaʉta kĩrʉbʉta oseapanʉ mebẽã Luciaʼba oda kĩrãkʼa, naena Jeowa wiña yiwidʼiseabʉ, iya widita dayirã aduʼa babimarẽã akʉza ẽbẽrarã daucha imitia panʉ ẽ baita.

10. 1 Timoteo 4:13ba jarabʉdebara, ¿kʼãrẽta odaibara nejaradiabari bia bʼaita?

¹⁰ Nejaradiabari bia bara. Timoteora nejaradiabari biabasimina wãbasi audre biʼia kʼawuaita, mawũã nejaradiabari bia bʼaita (akʉra 1 Timoteo 4:13). ¿Sãwũã nejaradiabari bia baseapanʉ? Nãã jaradia wãi nãã estudiaibara, idi ewadera dayirãba maʉ̃ oira kʼareba mejãcha erpanʉ. Bari jaraita, erpanʉ karta Zarea ora bia  leita akʉza jaradiaita akʉza Karta nekʼawuabaride ũduyi «Yiza sãwũã bedʼea kʼawuaita». ¿Bʉara zokʼabʉka naʉ̃ra kartarãra? Naʉ̃ estudiabʉbʉrʉ pera ẽ bayi akʉza aduʼa bedʼeayi.

11. ¿Kʼãrẽta opanʉ ʉ̃kʉrʉ mebẽrãbara nejaradiabari bia bʼaita?

¹¹ Nejaradiabari bia baseabʉ mebẽrã kongregasionebemaba sãwũã jaradiabʉ akʉbʉdeba. Parrapo 9de bedʼeasida mebẽã Sam ʉ̃rʉ, iya abaʉba naʉ̃ta widisi: «¿Kʼãrẽa awuru mebẽrãbara biʼia jaradia kʼawuabʉ? ¿Sãwũã opanʉ?». Iyara kĩrãkita akʉbasi mebẽrã biʼia jaradiapanʉraba sãwũã opanʉta, mawũã iyabida ãyide kĩrãkʼa oita akʉza awuru mebẽã yi trʉ̃ Taliaʼba jarabʉ sãwũã ãba yi jʉrepanʉne mebẽã abaʉba diskurso diabʉba biʼia jaradiabʉta bedʼea aba iya jaradia wãbʉrʉde widipanʉta, mawũã iyabida biʼia panʉita.

12. ¿Ʉ̃kʉrʉ mebẽrãra kʼãrẽ oita perabʉ ãba yi jʉrebʉrʉde?

¹² Ãba yi jʉrebʉrʉdera dayirã jõmaʉ̃ba kʼarebaseapanʉ trãpanʉne akʉza biʼia estudiabʉde ãba yi jʉrebʉrʉde biʼia panʉita (Sal. 22:22). Ʉ̃kʉrʉra mejãcha perabʉ ãba yi jʉrebʉrʉde trãita akʉza juwa ʉ̃ta waita, ¿bʉra mawũã sentibarika? Mawũã sentibʉbʉrʉ widiseabʉ awuru mebẽã iyabaʉ bʉ kĩrãkʼa berabaridata kʼãrẽba kʼarebasita iyi pera ẽ baita juwa waita akʉza trãita.

13. ¿Kʼãrẽba kʼarebaseabʉ sobiade trãita ãba yi jʉrebʉrʉde?

¹³ Sobiade trãnadrʉ. Dayirãra ãba yi jʉrebʉrʉde trãbʉrʉdera audre yibia Jeowa ʉ̃rʉ ibia bedʼeaita. Mebẽã aba yi trʉ̃ Saraʼba krĩchabasi iyira bia trã ẽãta, mawũãsidu Jeowaʼa sobiabikĩrãbasi iyi trãbʉdeba, maʉ̃ kʼarea ãba yi jʉrebarima wãi naena deda iyi doba trãbʉ, mawũã ãba yi jʉrebarimae biʼia trãita. Adewara iyi dedabʉde bia akʉbʉ trãbide eda jarabʉra kʼãrẽne abarika obʉta ãba yi jʉrebarimae jara ũrĩbidamae. Iya jarabʉ: «Naʉ̃ba mʉ̃ra kʼarebabʉ krĩcha ẽ baita mʉ̃ sãwũã trãbʉta, awuarabʉrʉ krĩchaita yi trãbiba kʼãrẽ bedʼea jarabʉta».

14. ¿Kʼãrẽba kʼarebaseabʉ ãba yi jʉrebʉrʉde juwa ʉ̃ta wua kʼãrãpe bedʼeaita?

¹⁴ Badua juwa ʉ̃ta wuabara panʉita. Ʉ̃kʉrʉitara maʉ̃ oira jipa zare. Parrapo 11de mebẽã yi trʉ̃ta Talia ʉ̃rʉ bedʼeasida akʉza iya jarabʉ: «Mʉ̃itara awurura kĩrãbita bedʼeaira jipa zare, mamina mʉ̃ bedʼeabʉrʉdera aduʼa bedʼea baera wuabemarabara ũdu ẽ mʉ̃ perabʉra. Maʉ̃ kʼarea ãba yi jʉrebʉrʉde juwa ʉ̃ta wuape bedʼeaira zare mʉ̃itara». Mawũãsidu iyira juwa ʉ̃ta wuabʉ bedʼeaita, mamina, ¿kʼãrẽba kʼarebabʉ iya maʉ̃ oira? Iyira  ãba yi jʉrebarima wãi nãã estudiabʉde, kʼawuabʉ kʉtʉa jaraibarata nãã panʉbʉrʉdera. Iya jarabʉ: «Mʉ̃a kʼawuabʉ mʉ̃a panʉbʉrʉde kutua jarara naʉ̃ra bigachuta bedʼea neẽ, kʼawua bʉ baera yi jaradiabʉbara mawũã panʉmarẽã kãgabʉta».

15. ¿Kʼãrẽta kĩrãbeibara dayirãba?

¹⁵ Edaʉde ʉ̃kʉrʉ mebẽrãra pera ẽ bedʼeaita awurura, mamina ãya juwa ʉ̃ta wua ẽ panʉita ãba yi jʉrebʉrʉde ¿kʼãrẽa? Mebẽã aba yi trʉ̃ Julietʼba jarabʉ: «Mʉ̃ra juwa ʉ̃ta wua ẽ krĩchabʉ baera mʉ̃a jaraira biode bigabʉ ẽãta». Dayirãba mawũã krĩchapanʉbʉrʉ kĩrãbeibara Jeowabara akʉbʉta juwa ʉ̃ta wuabʉrʉde. * Dayirãba jaraseabʉta jarabʉrʉtrʉ, iyara bia akʉbʉ baera dayirãra zarea obʉrʉde juwa ʉ̃ta waita.

16. ¿Kʼãrẽta jarada ẽ baibara?

¹⁶ Yãrãta imita jararãra  (Efes. 4:31). Dayirã jõmaʉ̃ba kʼawuapanʉ kristianorabara bedʼea kayiruara jarabe ẽãta, mamina jura kʼawua baibara imitia bedʼea ẽ baita. Bari jaraita, jara ẽ baibara ẽbẽrarã awuru pʉwʉrʉdebemara audre yibiata wuabema pʉwʉrʉira akʉza jara ẽ baibara ẽbẽra kulturata audre yibiata awuru kulturaira, adewara mitia bedʼea ẽ awurura sopʉa sentibita. Mebẽã abaʉba jarabʉ: «Mʉ̃a edaʉde ijaramiane yãrã ʉ̃rʉ mitia bedʼeabasi, mamina wãrĩnubaira mʉ̃a jarabʉbara sopʉabibasi awururata. Poaga dããraba mʉ̃ kimaba kʼareba zebʉrʉta, mʉ̃a awurura sopʉa sentibibʉrʉde akʉza iyi sopʉa sentibibʉrʉde daiʉ̃me akʉpanʉne, iya mʉ̃a jarabʉ kʼãrẽ mʉ̃a jaradaba awurura sopʉa sentibisita».

17. Efesios 4:29ba jarabʉdebara, ¿sãwũã bedʼea jaraseapanʉ wuabemara kʼarebaita?

¹⁷ Jarada bedʼea wuabemara kʼarebaita. Wuabemara ʉ̃rʉ imita bedʼeai kaʉde jʉrʉda wuabemaraba kʼãrẽ bia obʉta (akʉra Efesios 4:29). Israelitaraba nebia mejãcha erpanasi ãyi sobia bʼaita, mawũãsidu jarapanasi ãyira ne waebʉta. Ẽbẽra abaʉba mawũã krĩchabʉbʉrʉ wuabemarabida abarika krĩchabiseabʉ. Kĩrãbedadrʉ mia ordamiara 10 panʉraba bedʼeata aña jarasida, maʉ̃ba israelitarabida abarika aña krĩchasida ãyi kĩrãkʼa, maʉ̃ba mitia bedʼea jʉ̃drʉsida Moisés ʉ̃rʉ (Núm. 13:31–14:4). Mamina dayirãba jaradara mebẽrãba nekʼãrẽ bia erpanʉta, naʉ̃ba kʼarebaseabʉ ãyi sobiapanamarẽã, bari jaraita, kĩrãbedadrʉ Jefté kauta, iyi templo eda wãbasidera iyitara zarebasibaibara, mamina iyi neũdukʼawuaraba iyi ʉ̃rʉ ibia bedʼeabʉdaba kʼarebasi iyi bia sentita (Juec.  11:40). Parrapo 13 mebẽã yi trʉ̃ta Sara ʉ̃rʉ bedʼeasida akʉza iya jarabʉ: «Dayirãba jaradara mebẽrãba kʼãrẽ nebiata erbʉta, naʉ̃ba kʼarebayi ãyabida kʼawuaita Jeowaba kãgabʉta akʉza sentibiseabʉ ãyisida Jeowaba organizasione panʉta». Mawũẽra mebẽã abaʉba nebiata osibʉrʉ jʉrʉdaibara iya jara ũrĩbita iya kʼãrẽ nebiata odata.

18. Salmo 15:1, 2ba jarabʉdebara, ¿kʼãrẽa soiduba wãrĩnuta jaraibara, adewara kʼãrẽta oibara maʉ̃ oita?

¹⁸ Soiduba wãrĩnuta jarada. Dayirãba soiduba wãrĩnuta jarada ẽ bʉrʉ sobiabida ẽ bayi Jeowata. Iyara jipa jʉra baera sewa nebʉra obʉra (Prov. 6:16, 17). Idi ewade ẽbẽra mejãchaʉta sewa nebʉrʉ jaraira kʼãrẽ ẽ mina dayirãra Jeowa kĩrãkʼa krĩchapanʉ (akʉra Salmo 15:1, 2). Dayirãbara sewidata jara ẽ baibara akʉza jʉra kʼawuabaibara daya jarabʉba awurura aña krĩchabi ẽ baita, mawũã ẽ bʉrʉ jõma jara ẽ baita wuabemaraba wãrĩnuta kʼawuada ẽ marẽã.

19. ¿Kʼãrẽne jʉra kʼawuabaibara dayirãra?

¹⁹ Bedʼeata orãra (Prov. 25:23; 2 Tes. 3:11). Parrapo 14de bedʼeasida mebẽã Juliet ʉ̃rʉ, iya akʉza jarabʉ: «Mebẽã abaʉba mʉ̃a awuara ʉ̃rʉ sewidata jarabʉbʉrʉ mʉ̃a krĩchaseabʉ wua iyi ʉ̃rʉ ĩjã ẽ baita, naʉ̃ mebẽãba mʉa kʼawua awuru ʉ̃rʉ bedʼeabʉbʉrʉ abarika mʉ̃ ʉ̃rʉbida awurura jaraseabʉ akʉza naʉ̃ba mʉ̃ra bia sentibi ẽ bayi». Maʉ̃ kʼarea ẽbẽra abaʉta awuru ʉ̃rʉ bedʼeaitadogobʉrʉ, jʉrʉra kʼãrẽ nebia ʉ̃rʉ bedʼeaita (Col. 4:6).

20. ¿Kʼãrẽta okĩrãpanʉ dayirã bedʼeabʉdeba?

²⁰ Dayirãra ẽbẽrarã imitia bedʼeapanʉrabawarabʉ baera zarea odaibara dayirãba jarabʉba Jeowa sobiabita. Bedʼeaira Jeowaba diada, maʉ̃ kʼarea iya akʉbʉ dayirãba sãwũã zokʼabʉta naʉ̃ta. Kĩrãbedadrʉ, dayirãba zarea opanʉbʉrʉ biʼia bedʼeaita ãba yi jʉrebʉrʉde, Daizeze Bedʼea jaradia wãbʉrʉde akʉza ewariza bedʼeabʉde Jeowaba nebia diaita. Jeowaba ẽbẽra kayiruara makenabʉrʉdera zare ẽ bayi bedʼea bia jaraira (Jud. 15). Maʉ̃ ewari zeyedara zarea odaibara dayirã sãwũã bedʼeabʉdeba Jeowaʼa sobiabidaita (Sal. 19:14).