1. Sama meke u poi taki?

 A TAKI di u poi taki, a wan kado di Gadu gi u. Di Gadu meke a fosi man Adan, a be poi taki anga en Dda di de a hemel. Te a be e taki, a be poi meke nyun wowtu tu. Neen meke a be poi gi den meti nen (Gen. 2:19). Adan be musu piisii di a taki anga wan taa libisama enke enseefi fu a fosi leisi. A sama ya a be en uman Efa.​—Gen. 2:22, 23.

2. Fa libisama e koboloiki a kado di Gadu gi den?

² Libisama á be koboloiki a kado di Gadu gi den fu taki a wan bun fasi. Saatan Didibii koboloiki a taki di a be poi taki fu koli Efa. Na a sani ya meke tide na a dei, libisama abi sondu (Gen. 3:1-4). Di Adan gi Yehofa anga Efa a fowtu fu a sondu di a du, a á koboloiki a taki di a be poi taki a wan bun fasi (Gen. 3:12). Kain lei di Yehofa kon taki anga en baka di a kii en baala Abel (Gen. 4:9). Bakaten, wan bakapikin fu Kain den e kai Lamek be sikiifi wan toli di be e soi fa den sama fu a ten fi en be ogii (Gen. 4:23, 24). Fa sama e taki aini a ten ya? Son yuu den politiki fesiman seefi e kosi, sen nai kisi den gi den sani di den e taki. Sama e kosi aini gaanse fu den felon di de nownow. Den pikin di e go a sikoo anga den sama di e go a wooko e yee fa sama e kosi taawan. A fasi fa sama e taki, e soi taki ná pikin ogii a goontapu ogii nownow.

3. Anga san u mu luku bun? San wi o luku aini a artikel ya?

 ³ Efu wi á luku bun, te wi e yee a fasi fa den sama fu a goontapu ya e taki, u sa bigin taki enke den. U wani du sani di o meke Yehofa piisii, neen meke u nai taki sani di á bun. Ma dati wawan á sai, u mu meke moiti tu fu taki sani di Gadu lobi. Aini a artikel ya, wi o luku fa u sa du a sani ya (1) aini a peleikiwooko, (2) a den komakandaa, anga (3) te wi e taki anga taawan. Meke u luku fosi saide Yehofa e poti pakisei a den sani di wi e taki.

4. Enke fa Maleyaki 3:16 e soi, da saide Yehofa e poti pakisei a den sani di wi e taki?

⁴ Leisi Maleyaki 3:16. I sabi saide Yehofa ‘meke sama sikiifi wan buku fu membee den sama di e lesipeki en, anga den sama di e pakisei a nen fi en’? Bika den sani di wi e taki e soi sama a u tuutuu. Yesesi be taki: ‘A san de a wan sama ati, a dati ai taki’ (Mat. 12:34). Den sani di wi e taki e soi efu u lobi Yehofa tuutuu. Yehofa wani den sama di lobi en piisii fu teego a goontapu.

5. (a) Fa den sani di wi e taki sa abi kaakiti na a dini di wi e dini Yehofa? (b) Enke fa a fowtow e soi, da san u mu holi a pakisei te wi e taki?

⁵ Den sani di wi e taki sa meke Yehofa piisii anga a dini di wi e dini en, ma den sa meke a á piisii anga san wi e du gi en tu (Yak. 1:26). Son wan fu den sama di nai dini Gadu e taki goofu anga taawan. A fasi fa son wan fu den e taki e soi tu taki den abi heimembee (2 Tim. 3:1-5). Wi á wani de enke den sama ya. U wani Yehofa piisii anga den sani di wi e taki. Ma meke u taki wi e taki switi anga den baala anga sisa efuso den sama di wi e miti a peleikiwooko, da wi e taki goofu anga den sama aini wi osufamii. Fa Yehofa be o fii?​—1 Peit. 3:7.

6. Sowtu wini Kimberly fende fu di a be e taki switi anga taawan?

⁶ Te wi e luku bun san wi e taki, den sama di e aliki wi o gafa Yehofa. Den ‘o si kiin sama e dini Gadu anga sama nai  dini en’ (Male. 3:18). Na a sani ya wan sisa den e kai Kimberly be kon si. b A be mu wooko makandaa anga wan taa meisyo a sikoo. Di den be e wooko makandaa, a taa meisyo si taki Kimberly á be de enke den taa pikin. A á be e taki sama sani. A á be e kosi. A be e taki switi anga sama. A fasi fa Kimberly be e taki be meke a meisyo ya wani sabi moo, neen meke a bigin sutudeli Beibel. Yehofa e piisii te a si taki a fasi fa wi e taki, e meke sama wani leli sabi en.

7. Fa i wani koboloiki a kado di Gadu gi i?

⁷ Ala u wani taki sani di o meke sama gafa Yehofa. U wani taki sani tu di o yeepi u fu wi anga den baala anga sisa fu u toon moo bun mati. Neen meke wi o luku san i sa du fu taki a wan fasi di o meke ‘sama si taki den sa waka ai baka’.

8. Fa u sa waka a Yesesi baka, te u luku a fasi fa a be e taki anga sama?

⁸ Taki a wan switifasi te sama e taki sani fu meke yu ati boon. Di Yesesi be de a goontapu, sama be kai en wan sopiman, wan giiliman, wan bakaman fu Didibii, wan sama di á be e holi Sabadei, anga wan sama di be e kosi Gadu (Mat. 11:19; 26:65; Luk. 11:15; Yoh. 9:16). Ma noiti Yesesi taki goofu anga den sama ya. Leti enke Yesesi, useefi á mu taki goofu anga sama winsi den e kosi u (1 Peit. 2:21-23). Ma a sani ya á makiliki (Yak. 3:2). San o yeepi u?

9. San o yeepi u fu holi useefi te u de aini a peleikiwooko?

⁹ Te wan sama taki goofu anga yu aini a peleikiwooko, meke moiti fi yu ati á boon neen. Wan baala den e kai Sam taki: ‘Mi e holi a pakisei taki a sama mu yee a bun nyunsu winsi san e pasa. Mi e holi a pakisei tu taki a sama sa kengi.’ Son sama ati e boon fu di wi á kon na a bun yuu. Te u si taki wan sama ati boon a u, u sa puubei fu du san wan sisa den e kai Lucia e du. Ai begi Yehofa, da ai akisi en fu a yeepi en fu a á piki a sama te ai taki goofu anga en.

10. Enke fa 1 Timotiyesi 4:13 e soi, da san u mu meke moiti fu du?

¹⁰ Meke moiti fu toon wan moo bun leliman. Timotiyesi a be wan bun leliman. Ma toku a be mu tan meke moiti fu du a sani ya moo bun. (Leisi 1 Timotiyesi 4:13.) Fa u sa toon wan moo bun leliman? U mu e seeka bun. A omen wookosani wi abi di sa yeepi u fu gi leli moo bun. Yu o  fende wini te yu e wooko anga den sani di sikiifi aini a bolosilo di den e kai ‘Meke moiti fu toon wan bun leisiman anga leliman’. I sa wooko anga den sani di yu e leli a den komakandaa na a pisi di den e kai ‘Meke moiti fu toon wan moo bun peleikiman’. Yu e wooko anga den sani ya? Efu wi e seeka bun, u ná o go e senuwe so moo. Sama o si taki wi e biibi den sani di wi e taki tu.

11. San yeepi son Kelesten fu toon wan moo bun leliman?

¹¹ Te wi e poti pakisei a den sani di taawan aini a kemeente e du, a sani ya sa yeepi u fu toon wan moo bun leliman. Sam, a baala di u be taki fi en kaba, be wani sabi saide son baala anga sisa be sabi gi leli bun. Neen meke a be e poti pakisei na a fasi fa den be e leli sama, da a be e meke moiti fu waka a den baka. Wan sisa den e kai Talia be e aliki bun te son baala di be sabi gi leli be e holi lezing. A sani ya yeepi en fu sabi fa fu piki den akisi di sama lobi poti gi en aini a peleikiwooko.

12. San e taanga gi son sama fu du?

¹² Na ala sama e fende wini te wi e singi anga te wi e seeka fu gi piki a den komakandaa (Ps. 22:22). Ai taanga gi son sama fu singi efuso fu gi piki te den de a komakandaa. A sani ya e taanga gi i? Efu a so a de, yu o fende wini te i sabi san yeepi son sama di be e feele fu du den sani ya.

13. San o yeepi i fu singi anga i hii ati te i de a komakandaa?

¹³ Singi anga i hii ati. A fu di u wani gafa Yehofa meke wi e singi a den komakandaa. Wan sisa den e kai Sara e si enke en tongo á moin. Ma toku a wani singi gafa Yehofa. Neen meke te ai seeka enseefi gi den komakandaa, ai luku den singi tu. Ai meke moiti fu si fa den sani di wi o leli na a komakandaa e kai anga den singi. Sara taki: ‘Te mi e du a sani ya, mi e moo poti pakisei a san a singi e taki. Ai yeepi mi fu mi á poti pakisei na a fasi fa mi e singi.’

14. San o yeepi i fu gi piki a komakandaa winsi sen e kisi i?

¹⁴ I mu e gi piki ala yuu. A sani ya e taanga gi son sama fu du. Talia, a sisa di u be taki fi en kaba taki: ‘Ná pikin senuwe mi e senuwe te mi mu taki a peesi pe omen sama de. Ma sama nai sabi taki a so senuwe e naki mi, bika mi tongo nai dansi te mi e taki.’ Winsi fa Talia e senuwe, toku ai gi piki a komakandaa. Te ai  seeka enseefi, ai holi a pakisei taki te yu o gi a fosi piki, i mu taki san de aini a paragraaf. A piki á mu langa tu. Talia taki: ‘Winsi a piki fu mi satu a ná abi toobi, bika a dati a baala di e holi a paati wani yee. Mi ná abi fu taki gaan kofaliki sani tu.’

15. San u mu holi a pakisei te wi e gi piki a komakandaa?

¹⁵ Son sama nai wani gi piki a komakandaa winsi den a ná sen sama. Saide? Wan sisa den e kai Juliet taki: ‘Son yuu mi nai wani gi piki a komakandaa, bika mi e fii enke den piki fu mi á bun sai.’ Ma i mu holi a pakisei taki Yehofa wani i du san i poi gi en. c Ai piisii te ai si taki wi e meke moiti fu gi piki a komakandaa winsi sen e kisi u son yuu.

16. Anga san u mu luku bun?

¹⁶ Yu á mu e ‘kosi’ (Efe. 4:31). Enke fa u be taki kaba, da wan tuutuu Kelesten á mu e kosi. Ma toku u mu luku bun anga a fasi fa wi e taki. Son sani di wi e taki sa de enke a kosi wi e kosi. U mu luku bun fu u nai taki sani di á bun fu sama fu taa nasi, taa lo, efuso taa kondee. Boiti dati, wi á mu e taki sani fu hati taawan. Wan baala taki: ‘A ná ala yuu mi be e holi taawan a pakisei te mi be e meke kalapu anga den. Mi be e si enke a ná ogii mi e taki, ma a saanti mi be e saanti den. Den sani ya be musu e hati den. Ma te mi be taki goofu anga mi uman efuso wan taa sama, a be e wakiti te mi anga en wawan be de da a be e taki anga mi.’

17. Enke fa Efeisesama 4:29 e soi, da fa u sa gi taawan taanga-sikin?

¹⁷ I mu e taki sani di e gi taawan taanga-sikin. I mu e gafa taawan, pe fi yu e kuutu den efuso e taki den sani. (Leisi Efeisesama 4:29.) A omen sani Gadu be du gi den Islayelisama. Ma pe fu den be gi en daa, na ala yuu den be e kuutu. Efu u gwenti kuutu fu sani, taawan sa teke a manii ya tu. Pakisei san be pasa di den twalufu man be kibii go luku a paamisi kondee. Tin fu den be e kuutu di den be daai kon baka. A sani ya be meke ‘ala den Islayelisama bigin ligei anga Mosesi anga Aron’ (Num. 13:31–14:4). Ma te u lobi gafa taawan, a sani ya e meke den piisii. Ai meke useefi piisii tu. A umanpikin fu Yefta be musu e fii bun te den mati fi en be e gafa en fu a sani di a be du. A sani ya be musu yeepi en fu du a sani di a be paamisi en dda  (Kuut. 11:40). Sara, a sisa di u be taki fi en kaba taki: ‘Te wi e gafa taawan, den e fii taki Yehofa lobi den. Den e fii bun fu de aini a olikanisâsi fi en tu.’ Neen meke na ala yuu i mu e suku okasi fu gafa i baala anga sisa.

18. Enke fa Psalm 15:1, 2 e soi, da saide wi á mu e lei? San a wan taa sani di wi á mu du?

¹⁸ I mu e taki a tuu ala yuu. Yehofa ná o piisii anga wi efu wi e lei. Ai buuse sama di e lei (Odo 6:16, 17). Omen sama aini a ten ya nai si en enke wan gaan sani te sama e lei. Ma wi e meke moiti fu wi á du en, bika Yehofa á lobi en. (Leisi Psalm 15:1, 2.) A tuu taki wi e meke moiti fu wi á lei, ma wi á mu e du sani tu fu meke sama biibi wan sani di u sabi taki a ná tuu.

19. Anga sowtu sani u mu luku bun?

¹⁹ Ná taki sama sani (Odo 25:23; 2 Tes. 3:11). Juliet di u be taki fi en kaba taki te sama e taki taawan sani, a sani ya nai tyai bun bakapisi. A taki: ‘Te wan sama e taki sama sani mi e fii booko-saka. Mi nai fitoow sama di e taki sama sani. Bika efi yu e taki taawan sani, i sa taki mi sani tu.’ Efi i de a wan peesi neen den bigin taki sama sani, daai a taki da i bigin taki sani di o gi taawan taanga-sikin.​—Kol. 4:6.

20. San i de kabakaba fu du?

²⁰ Aini a goontapu ya, sama ná abi toobi anga san den e taki. Neen meke u mu meke moiti fu wi e taki sani di Yehofa lobi. Holi a pakisei taki a taki di u poi taki a wan kado di Yehofa gi u. Neen meke ai poti pakisei na a fasi fa wi e taki. Te wi e taki sani di o meke sama gafa Yehofa te u de aini a peleikiwooko, te u de a komakandaa anga te wi e taki anga taawan, a o belesi u. Te Yehofa o poli a ogii goontapu ya, a ná o taanga gi u moo fu taki sani di e gi Yehofa gaandi (Yud. 15). Ma fosi a ten de doo, u mu meke Yehofa piisii te ai yee ‘den taki di e komoto aini u mofu’.​—Ps. 19:14.