1. O cei e solia vei keda na isolisoli ni vosa?

 NA NODA rawa ni vosa e iloloma talei ni noda Kalou dauloloma. Na gauna ga e buli kina na imatai ni tamata o Atama, sa rawa ni veivosaki kei na Tamada vakalomalagi. E rawa tale ga ni vakalevutaka na nona vosa ni bulia eso tale na vosa vou. E vakayagataka na isolisoli qori o Atama me vakayacana na manumanu kece. (Vkte. 2:19) Sa na marau mada ga ena gauna e vosa kina ena imatai ni gauna vua e dua tale na tamata, qori na watina totoka o Ivi!—Vkte. 2:22, 23.

2. E vakatanitaki vakacava na isolisoli ni vosa ena gauna makawa vaka kina nikua?

² Oti ga vakalailai sa vakatanitaki na isolisoli ni vosa. O Setani na Tevoro e lasutaki Ivi, na lasu qori e vakavuna meda valavala ca qai sega ni bula uasivi. (Vkte. 3:1-4) O Atama tale ga e vakatanitaka na isolisoli ni vosa ni beitaki Ivi, e beitaki Jiova mada ga ena cala e cakava. (Vkte. 3:12) O Keni e lasutaki Jiova ni vakamatei tacina oti, o Epeli. (Vkte. 4:9) Dua na gauna e muri na kawa i Keni o Lemeki e bulia e dua na serekali me vakavotuya na itovo voravora ena gauna ya. (Vkte. 4:23, 24) Ia vakacava o ira na tamata nikua? Eda raica nira vakayagataka tu ga e matanalevu na veiliutaki vakapolitiki na vosavosa ca. Dredre tale ga me kunei e dua na iyaloyalo e sega kina na vosavosa ca. Era rogoca tale ga na gonevuli mai koronivuli na vosa ca, vaka kina o ira na uabula ena nodra valenicakacaka. Ka ni rarawa ni vakaraitaka na vosavosa ca na torosobu ni ivakatagedegede ni itovo kei na vosa ena vuravura qo.

3. Na cava meda qarauna? Cava eda na veivosakitaka ena ulutaga qo?

 ³ Ke da sega ni qaqarauni eda rawa ni rogoca e veigauna na vosavosa ca meda lai tekivu vakayagataka kina. Ia nida lotu vaKarisito eda via vakamarautaki Jiova, okati kina noda qarauna meda kua ni dau vosavosa ca. Eda via vakayagataka na isolisoli ni vosa ena sala donu, ya meda vakacaucautaka kina na noda Kalou. Ena ulutaga qo, eda na veivosakitaka na noda cakava qori (1) ena cakacaka vakaitalatala, (2) ena soqoni ni ivavakoso, kei na (3) noda veivosaki kei ira eso tale ena veisiga. Ia meda raica mada qo na vuna e bibi kina vei Jiova na ivakarau ni noda vosa.

4. Me vaka e tukuni ena Malakai 3:16, na cava e bibi kina vei Jiova na noda ivakarau ni vosa?

⁴ Wilika Malakai 3:16. O bau vakasamataka na vuna e vola kina o Jiova ena nona “ivola ni ivakananumi” na yacadra o ira na vakaraitaka ena nodra vosa nira dokai koya ra qai vakananuma na yacana? Na ka eda tukuna e vakaraitaka vinaka na ka e tiko e lomada. E kaya kina o Jisu: “Ni na cavuta ga na gusumudou na ka e sinai tu e lomamudou.” (Maciu 12:34) Na ka eda digia meda talanoataka e vakaraitaka na levu ni noda lomani Jiova. O Jiova tale ga e vinakata vei ira na lomani koya mera marautaka na bula tawamudu ena vuravura vou.

5. (a) E veisemati vakacava noda sokalou kei na ka eda kaya? (b) Me vaka e laurai tiko ena iyaloyalo, na cava meda nanuma tiko nida vosa?

⁵ Na ivakarau ni noda vosa ena vakatau kina na nona vakadonuya o Jiova na noda sokalou. (Jeme. 1:26) Eso era sega ni lomana na Kalou e dau kaukaua nodra vosa, sega ni veinanumi qai dokadoka. (2 Tim. 3:1-5) Eda sega sara ga ni via vakataki ira qori. Ia eda via vakamarautaki Jiova ga ena ivakarau ni noda vosa. Vakacava ena marau o Jiova nida vosa  vakayalovinaka tiko ga ena noda soqoni vaKarisito se na cakacaka vakaitalatala, da qai vosa vakaukaua vei ira na lewe ni noda vuvale ni sega ni dua e raici keda se rogoci keda tiko?—1 Pita 3:7.

6. E yaga vakacava na nona dau vosavosa vinaka o Keleni?

⁶ Nida vakayagataka vinaka na isolisoli ni vosa, eda vakatakilai keda nida sokaloutaki Jiova. Eda vukei ira kina na tiko wavoliti keda mera raica ni duidui “o koya e qarava na Kalou kei koya e sega ni qaravi koya.” (Mala. 3:18) E vakadinadinataka qori e dua na tacida yalewa o Keleni. * E lesi me cakacaka vata kei na dua na nona lewe ni kalasi ena dua na ka ni nodrau vuli. Ni rau sa cakacaka vata oti, e raica ni duatani sara vei ira na vo ni gonevuli. E sega ni dau veivakalewai, e dau vosavosa vinaka, qai sega ni dau vosa ca. E qoroqoro sara ga na nona itokani qori qai vinakata me vuli iVolatabu. E marau sara ga o Jiova nira taleitaka na ka dina eso tale ena ivakarau ni noda vosa!

7. Na cava e uqeti mo cakava ena isolisoli ni vosa?

⁷ Eda vinakata kece meda vosa ena sala e dokai kina o Jiova, meda volekati ira tale ga na tacida vakayalo. Meda raica sara mada qo eso na sala eda rawa kina ni “ivakaraitaki” vinaka tiko ga ena “vosa.”

8. Na ivakaraitaki cava e biuta vei keda o Jisu ni dau vosa ena cakacaka vakaitalatala?

⁸ Vosa ena yalovinaka kei na veidokai ni o vakacudrui. Donuya nona cakacaka vakaitalatala o Jisu, e beitaki ni daumateni, daukana, italai ni Tevoro, e beca na Siga ni Vakacecegu, e tukuni mada ga ni vosabeca na Kalou. (Maciu 11:19; 26:65; Luke 11:15; Joni 9:16) Ia e sega ni sauma ena vosa kaukaua se cudruvi ira. Me vakataki Jisu mada ga meda kua ni sauma nona vosa kaukaua vei keda e dua. (1 Pita 2:21-23) Ia e sega ni ka rawarawa meda dau lewai keda matau ena ituvaki va qori. (Jeme. 3:2) Na cava e rawa ni vukei keda?

9. Na cava e rawa ni vukei keda meda lewa matau na noda vosa ena cakacaka vakaitalatala?

⁹ Kua ni cudru ke vosa kaukaua mai o itaukeinivale. E kaya e dua na tacida tagane o Samu: “Au kauaitaka ga ni bibi me rogoca o itaukeinivale na ka dina kei na nona rawa ni veisau.” Eso na gauna era dau cudru ga nida lako tu yani ena gauna cala. Ni dua e cudruvi keda mai eda rawa ni muria na ka e cakava na tacida yalewa o Lusia. Eda rawa ni masu vakalekaleka vei Jiova meda kerea nona veivuke meda lewai keda vinaka, meda kua ni tukuna e dua na ka ena cudru kei na veibeci.

10. Me vaka e tukuni ena 1 Timoci 4:13, na cava me noda isausau?

 ¹⁰ Mo maqosa ena veivakavulici. O Timoci e dua na lotu vaKarisito matua, ia se vinakati tiko ga me vakavinakataka na nona veika vakayalo. (Wilika 1 Timoci 4:13.) Eda rawa vakacava ni maqosa ena veivakavulici ena cakacaka vakaitalatala? Meda vakavakarau vinaka. Eda kalougata ni levu tu na ivukevuke eda rawa ni vakayagataka meda maqosa kina ena veivakavulici. O rawa ni vakayagataka na brochure Mo Gumatua ena Wilivola kei na Veivakavulici vaka kina na ulutaga “Gumatua ena Cakacaka Vakaitalatala” e tiko ena iVola ni Soqoni—Noda Bula vaKarisito kei na Cakacaka Vakaitalatala. Vakacava o sa vakayagataka vinaka tiko na ivukevuke qo? Nida vakavakarau vinaka eda na sega ni rere, eda na nuidei tale ga vakalevu nida vosa.

11. Era maqosa vakacava ena veivakavulici eso na lotu vaKarisito?

¹¹ Eda rawa tale ga ni maqosa ena veivakavulici nida vuli vei ira eso na tacida ena ivavakoso. Kena ivakaraitaki, e vakasamataka o Samu, sa tukuni oti mai, se ra maqosa vakacava ena veivakavulici eso na lotu vaKarisito. E dau vakarogoca na iwalewale era vakayagataka qai saga me vakatotomuria. E dua na tacida yalewa o Tulia e dau vakarogoci ira na kenadau ena vosa nira vunau ena ivavakoso. E vulica kina na sala me vosa se me vakamacala ena so na ulutaga era dau taroga na itaukeinivale ena cakacaka vakaitalatala.

12. Na cava e dau dredre mera cakava eso?

¹² Eda rawa ni vakaitavi kece ena ivavakoso nida lagasere kei na noda dau vakamacala vinaka. (Same 22:22) E dau dredre vei ira eso mera lagasere se vakamacala ena soqoni. Vakacava o iko? O na via kila sara ga na ka era cakava eso mera kua kina ni rere.

13. Na cava o rawa ni cakava mo lagasere kina mai vu ni lomamu ena soqoni?

¹³ Lagasere mai vu ni lomamu. Nida lagasere ena soqoni, e noda inaki vakatabakidua me vakacaucautaki o Jiova. E kaya e dua na tacida yalewa o Sera ni sega ni rogo vinaka na domona. Ia e dau via lagasere me vakacaucautaki Jiova. E raica ni yaga vakalevu me vakavakarau vinaka mai vale me vaka ga nona vakarautaka na itavi tale eso ena soqoni. E vakatovotovo ena nona saga me kila na qaqanisere kei na kena veisemati ena ulutaga ena veivosakitaki. E kaya: “E yaga sara ga qori meu vakabibitaka ga na vosa, sega ni noqu rawa ni lagasere.”

14. Ke o rere, na cava mo cakava mo dau vakamacala ena soqoni?

 ¹⁴ Vakamacala wasoma. Qo e dau dredre sara ga vei ira eso. E kaya o Tulia sa tukuni oti mai: “Au dau rere meu vakamacala e matanalevu, e sega ga ni kilai levu ena rorogo ni domoqu. E dau dredre gona meu vakamacala.” Ia e sasaga tiko ga o Tulia me dau vakamacala. Ni vakavakarau ena soqoni, ena nanuma tiko me lekaleka ga na imatai ni isaunitaro qai saumi vakadodonu. E kaya: “Ena vinaka me lekaleka noqu isaunitaro, me rawarawa, me tiko kina na tikina bibi, ni qori ga na ka e vinakata o koya e veivakavulici tiko.”

15. Na cava meda nanuma me baleta noda ivakamacala?

¹⁵ O ira mada ga na lotu vaKarisito era sega ni dau mamadua se rere, era na rairai sega tale ga ni dau vakamacala. Na vuna? E kaya e dua na tacida yalewa o Joana, “Eso na gauna au sega ga ni via vakamacala niu nanuma ni sa rui rawarawa tale noqu isaunitaro qai sega ni vinaka.” Ia mo nanuma tiko ni o Jiova e vinakata meda solia na noda vinaka kece. * E marautaka noda sasaga meda vakacaucautaki koya ena soqoni ni ivavakoso, me kua ni tarovi keda noda rere.

16. Na mataqali veivosaki vakacava meda qarauna?

¹⁶ Kua ni dau “vosavakacaca.” (Efeso 4:31) Me vaka sa tukuni oti mai, e sega ni dodonu meda dau vosavosa ca tiko na lotu vaKarisito. Ia e tiko eso tale na mataqali vosavakacaca eda sega ni dau kauaitaka meda qarauna. Me kena ivakaraitaki, meda qarauna meda kua ni vakalewai ira eso tale e duidui nodra itovo vakavanua, yavusa, se matanitu. Kena ikuri, eda sega ni via vakararawataki ira eso tale ena vosa mosimosi. E kaya e dua na tacida tagane: “Eso na gauna, au dau nanuma ni lasa tu na ka au kaya ia e mosimosi qai sega ni kena inaki me rarawa kina e dua. E dau yaco sara ga qori. Sa vica vata na yabaki qo nona vukei au vakalevu o watiqu ni tukuna ena gauna keirau tiko taurua ga ni a sega ni rogo vinaka, e mosimosi tale ga na ka au kaya qai vakararawataki koya kei ira eso tale.”

17. Me salavata kei na Efeso 4:29, eda rawa ni veivakauqeti vakacava?

¹⁷ Me veivakauqeti nomu vosa. Me totolo ga nomu dau veivakacaucautaki, kua ni veivakalewai se kudruvaka e dua na ka. (Wilika Efeso 4:29.) E levu na vuna mera vakavinavinaka kina na Isireli ia era vosakudrukudru ena levu na gauna. E  rawa ni dewa na vosakudrukudru va qori. Vakasamataka na itukutuku ca ratou mai kaya na tini na yamata e vakavuna mera “vosakudrukudrutaki Mosese [kina] . . . na Isireli kece.” (Tiko 13:31–14:4) Ia na veivakacaucautaki e rawa ni vakamarautaka e dua. E macala ni uqeti sara ga na luvei Jefica me dei ena nona ilesilesi nira dau vakacaucautaki koya na nona itokani yalewa. (Dvei. 11:40) E kaya o Sera, sa cavuti oti mai, “Nida veivakacaucautaki, era vakila kina eso tale ni lomani ira o Jiova, era lewe tale ga ni nona isoqosoqo.” Koya gona, qara na sala mo dau veivakacaucautaki kina.

18. Me vaka e tukuni ena Same 15:1, 2, na cava meda dau dina kina? Cava e okati kina?

¹⁸ Mo dau tukuna na ka dina. Eda sega ni rawa ni vakamarautaki Jiova ke da dau lasu. E cata o koya na lasu kece. (Vkai. 6:16, 17) E levu nikua era raica me sa ivakarau tu ga ni bula na lasu, ia eda dei ena rai i Jiova me baleta na tikina qori. (Wilika Same 15:1, 2.) Macala ga nida na qarauna na lasu, eda na sega tale ga ni tukuna na ka era na rawa ni vakacalai kina eso tale.

19. Na cava tale meda qarauna?

¹⁹ Kua ni dau kakase. (Vkai. 25:23; 2 Ces. 3:11) E vakamacalataka o Joana sa tukuni oti mai, ni sega ni taleitaka na kakase. E kaya: “E dau veivakayalolailaitaki na kakase, au sega tale ga ni nuitaki koya e kakase tiko. Au na kila vakacava ni na sega ni lai kakasetaki au tale?” Ke o rogoca ni sa caka na kakase ena veitalanoa, saga sara mo tukuna e dua na ka e veiuqeti.—Kolo. 4:6.

20. Na cava mo vakadeitaka me baleta nomu vosa?

²⁰ Nida bula tu ena vuravura e takalevu kina na vosavosa ca, ena vinakati meda cakacaka vakaukaua meda vakadeitaka ni vakamarautaki Jiova na noda vosa. Nanuma tiko ni vosa e dua na isolisoli i Jiova, e kauaitaka tale ga na sala eda vakayagataka kina. Ena vakalougatataka noda sasaga ke da vakayagataka noda vosa meda veiuqeti ena cakacaka vakaitalatala, ena soqoni kei na noda veivosaki e veisiga. Ni sa na vakarusai na veika e veivakamuai tu ena vuravura ca qo, ena rawarawa sara noda dokai Jiova ena noda vosa. (Juta 15) Ia ena gauna mada ga qo, mo vakadeitaka me vakamarautaki Jiova na “vosa ni [gusumu].”—Same 19:14.