1. Grasa kimoun nou ka rivé palé ?

 GRASA Jéova, Pap’an nou ki enmé-nou, nou pé palé é sé on bèl kado toubònman. Prèmyé moun Bondyé kréyé asi latè sé té Adan. Menmsi Jéova, Pap’a-y, té an syèl-la, Adan té pé palé èvè-y. Anplisdisa, Adan té ka rivé kréyé dé nouvo mo. Pa ègzanp, i sèvi èvè kapasité-lasa pou ba chak zannimo on non, kon Jéova té mandé-y fè (Jén. 2:19). Lèwvwè i palé pou prèmyé fwa ba ondòt moun, sé té pou Èv madanm a-y é a pa ti kontan i dwèt té kontan ! (Jén. 2:22, 23).

2. An tan lontan, yo pa sèvi èvè bèl kado-la Jéova té ba-yo la byen konm i fo, kijansa ? É ès sa chanjé jòdijou ?

² Men malérèzman, lézimen arété sèvi èvè bèl kado-la Jéova ba-yo la byen konm i fo. É yo pa pèd tan pou yo fè sa. Enn gadé, Satan, ki sé Dyab-la, ba Èv on manti é akòz dè sa, limanité touvé-y anba jouk a péché-la é ponmoun pa té pawfè ankò (Jén. 3:1-4). Lè Adan dézobéyi, i akizé Èv é i jou akizé Jéova olyé i té pran rèsponsabilité a-y (Jén. 3:12). Lè Kayen tchouyé frè a-y Abèl, i manti ba Jéova (Jén. 4:9). É kèlkè tan apré, Lamèk fè on poèm é adan poèm-lasa, i té ka di onlo mové biten. Sa té ka montré jan sé moun-la té enmé lavyolans a épòk-lasa (Jén. 4:23, 24). É jòdijou, ès sa chanjé ? Awa, pas sé moun-la ki ka dirijé sé gouvènman-la pa wont di vyé pawòl douvan toutmoun. Anplisdisa, pou touvé on fim ki pa ni vyé pawòl adan-y, fò-w lévé bonnè. É ki sé lè ou lékòl, ki sé lè ou ka travay, si lamajorité a sé moun-la pa’a mèt dé vyé mo sal adan sa yo ka di, yo pa’a santi-yo byen. Lèfètkè lamajorité a sé moun-la ka palé konsa jòdijou, sa ka montré kè mond-la ka vin dè plizanpli mové.

3. Fò-nou fè atansyon pou nou pa fè on biten, ki biten ésa ? Ka nou ké vwè adan awtik-lasa ?

³ Si nou pa fè atansyon, afòs nou tann moun ki alantou an nou di vyé pawòl, nou pé rivé a fè menm biten ki yo. Men  konm nou sé dé krétyen, nou vlé fè Jéova plézi é pou nou pé sa fè sa, a pa arété pou nou arété di pawòl ki sal tousèl, men fò-nou fè plis ki sa. Nou vlé itilizé bèl kado-la Jéova fè-nou la byen konm i fo, kivédi, nou vé sèvi èvè kado-lasa pou ba Jéova glwa. Adan awtik-lasa, nou ké vwè kijan nou pé fè sa 1) lè nou ka préché, 2) lè nou k’ay réinyon é 3) lè nou ka palé èvè lézòt. Men pou koumansé, an-nou vwè poukwa sa nou ka di ni onlo valè pou Jéova.

4. Dapré Malaki 3:16, ka ki ka montré kè Jéova ka ba sa nou ka di onlo enpòwtans ?

⁴ (Li Malaki 3:16.) Jéova fè-yo maké non a moun ki ka krenn-li é non a moun ki ka pran tan réfléchi si non a-y « adan on liv pou i sonjé-yo » é i ka kontinyé fè sa. Dapré-w, poukwa i ka fè sa ? Pas sa nou ka di ka montré ka ki adan tchè an nou. Mi sa Jézi ni lokazyon di : « Pas sa ki ka sòti adan bouch a on moun ka montré sa ki andidan tchè a-y » (Mat. 12:34). Sa vlé di kè lè nou ka palé, sa nou ka chwazi di ka montré jan nou enmé Jéova. É Jéova pwomèt moun ki enmé-y, kè i ké ba-yo lavi pou touttan adan mond nouvo la.

5. a) Sa nou ka di ka aji asi adorasyon-la nou ka ba Jéova la. Kijansa ? b) Si nou vlé fè Jéova plézi ki biten pou nou pa fè ?

⁵ Sèlon jan nou ka palé, swa Jéova ké aksèpté adorasyon-la nou ka ba-y la, swa sa pé’é ni pon valè pou-y (Jak 1:26). Moun ki pa enmé Bondyé ka vougaré moun, pa’a palé èvè jantiyès ba moun nonplis, é lè yo ka palé ou ka santi yo ni òwgèy an tchè a yo (2 Tim. 3:1-5). Nou, nou vlé pa sanm sé moun-lasa menm menm menm. Nou vlé palé on mannyè ki ka fè Jéova plézi. Men èskè Jéova ké aksèpté kè on moun ki ka adoré-y ka palé èvè onlo jantiyès lèwvwè i lasal oben lèwvwè i an prédikasyon men kè lèwvwè i rantré akaz a-y, i ka palé rèd ba fanmi a-y olyé i montré-yo kè i enmé-yo lè i ka palé ba yo ? (1 Pyè 3:7).

6. Konm Kimberly té ka fè atansyon a jan i té ka palé, ki bon biten sa pòté ?

⁶ Lè nou ka fè tousa nou pé pou pon mové pawòl pa sòti an bouch an nou, nou ka ba Jéova glwa. Lè nou ka fè sa, nou ka édé  moun ki alantou an nou vwè ki diférans ki ni « ant on moun ki ka sèvi Bondyé é on moun ki pa ka sèvi-y » (Mal. 3:18). An-nou vwè ka ki rivé on sè, non a-y sé Kimberly b. Yo té mandé-y fè on dèvwa èvè on kanmarad-lékòl. Lèwvwè kanmarad a-y koumansé travay èvè-y, i rann-li kont kè Kimberly pa té kon toutmoun. I pa té ka kritiké ponmoun, i té ka palé jantiman, é pon pawòl sal pa té ka sòti an bouch a-y. Sa étoné kanmarad a Kimberly, kifè, i désidé étidyé Labib. Lè jan nou ka palé ka ba moun anvi konnèt lavérité, a pa ti kontan Jéova ka kontan !

7. Nou pé palé, sé on bèl kado Jéova fè-nou. Kijan ou anvi sèvi èvè bèl kado-lasa ?

⁷ Sa noutout vlé, sé kè pawòl an nou ba Jéova lonnè é kè sa édé-nou vin plibon zanmi èvè frè é sè an nou. Alò konnyéla, an-nou vwè déotwa biten nou pé fè pou nou kontinyé bay on bèl ègzanp lè nou ka palé.

8. Lèwvwè Jézi té ka préché, kijan i té ka palé ba sé moun-la ?

⁸ Lèwvwè yo ka vougaré-w an prédikasyon, palé jantiman ba moun-la, é montré-y kè ou ka rèspèkté-y. Lèwvwè Jézi té ka préché asi latè, yo di onlo biten asi-y. Yo di kè i té ka bwasonné, kè sé té on agoulou-granfal, kè i té ka travay pou Dyab-la, kè i pa té ka rèspèkté saba-la é yo jous di kè i té ka di bétiz asi Bondyé (Mat. 11:19 ; 26:65 ; Lik 11:15 ; Jan 9:16). Men, apapousa Jézi fè kòlè é kè i palé rèd ba sé moun-la (1 Pyè 2:21-23). Nou osi, nou pé imité Jézi, siwvwè nou pa’a monté an koko lèwvwè sé moun-la ka vougaré-nou. Nou ka tou konprann kè pou nou rivé métrizé-nou, a pa on ti afè (Jak 3:2). Men ka ki pé édé-nou ?

9. Lèwvwè on moun pa’a palé ban nou jantiman an prédikasyon, ka ki pé édé-nou métrizé-nou ?

⁹ Vinvwè ou ka préché é kè on moun pa’a palé ba-w jantiman, ka pou-w fè ? Fò ou éséyé vwè poukwa i ka aji konsa. Sé sa on frè non a-y sé Sam ka fè. Mi sa i ka èspliké : « An ka mèt an tèt an mwen kè moun-lasa bizwen tann palé dè lavérité é kè pétèt on jou i ké chanjé. » Dépawfwa, on moun ka fè kòlè lè nou ka vin vwè-y pas nou pasé a on mové moman. An-nou pran ègzanp a on sè, non a-y sé Lucia. Lèwvwè i ka jwenn on moun ki kòlè, i ka fè on priyè toukout pou mandé Jéova édé-y rété kalm é pou i pa di moun-la pon mové pawòl oben pon biten ki ka dérèspèkté-y. Lèwvwè nou ka touvé-nou douvan on moun ki kòlè, an-nou fè kon Lucia.

10. Dapré 1 Timoté 4:13, ki objèktif nou té’é pé ni ?

¹⁰ Fè ansòt pou ou vin on plibon anségnan. Timoté té ka préché byen menm. Men fò i té kontinyé pwogrésé pou i té anségné plibyen (li 1 Timoté 4:13). É nou, ka nou pé fè pou kò an nou vin plibon adan domenn-lasa ? Fò nou préparé-nou byen. É sa ki bèl, sé  kè nou ni dé bon ti zouti ki pé édé-nou vin on plibon anségnan. Pa ègzanp, nou ni bwochi an nou Fè éfò pou li é pou anségné plibyen é adan Kayé pou réinyon Vi é ministè a on krétyen an nou, nou ni pawti-la « Pran ministè-la oséryé » ki ka ban-nou dé bon ti konsèy. Men ès ou ka sèvi èvè sé zouti-lasa ? Si ou ka préparé-w byen, ou ké pli alèz é ou ké pli sèten dè sa ou ka di.

11. Kijan sèwten frè é sè pwogrésé pou yo vin pli filé lè yo ka anségné ?

¹¹ Nou pé vin pli filé lè nou ka anségné, si nou ka gadé jan lézòt ka fè pou nou pé sa imité-yo. Sé sa Sam, on frè nou palé dé-y talè la ka fè. I ka chèché a vwè ka ki ka fè kè on frè oben on sè ka anségné byen menm. Pou sa, i ka pran tan gadé kijan yo ka fè lè yo ka anségné é aprésa i ka éséyé imité-yo. Aprézan, an-nou palé dè on sè, non a-y sé Talia. I ka èspliké kè lè on frè ki ni èkspéryans ka fè on diskou, i ka gadé byen kijan frè-la ka dévlopé sé lidé-la. Konsa, sa ka édé-y vwè kijan pou i palé an prédikasyon èvè sé moun-la dè sa ki ka entérésé-yo vréman.

12. Ka sèwten frè é sè ni dimal a fè ?

¹² Noutout pé pawtisipé adan réinyon an nou lèwvwè nou ka chanté èvè tout frè é sè an nou é lèwvwè nou ka bay on ti komantè kè nou byen préparé (Sòm 22:22). Men dépawfwa sèwten adan frè é sè an nou ni dimal a chanté oben a palé douvan toutmoun. Si sé ka a-w, pétèt kè lè ou ké tann sa ki édé sèwten frè é sè pou yo pa lésé lapè pran lanmen asi yo lè yo ka chanté oben lè yo ka bay on ti komantè sa ké édé-w.

13. Lè nou réinyon, ka ki pé édé-nou pou nou pé sa chanté èvè tout tchè an nou ?

¹³ Fò ou chanté èvè tout tchè a-w. Lè nou ka chanté, sa ki pli enpòwtan pou nou, sé dè ba Jéova louwanj. An-nou palé dè on sè non a-y sé Sara. I ni lenprésyon kè kò a-y pa gè bon adan zafè a chanté la. Men kanmenmsa, i anvi chanté pou ba Jéova louwanj. Pou i rivé fè sa, lèwvwè i ka préparé réinyon a-y, i ka antréné-y akaz a-y pou i pé sa chanté sé kantik-la. Lè i ka antréné-y, i ka éséyé vwè ki rapò ki ni ant sé pawòl-la ki ni adan kantik-la, é sé lidé-la i ké vwè la pannan réinyon-la. Mi sa i ka di : « Lèwvwè an ka konsantré-mwen asi sé pawòl la ki adan kantik-la, an pa menm ka tann si an ka chanté byen oben si an pa’a chanté byen. »

14. Si ou timid, ka ki pé édé-w bay on ti komantè an réinyon ?

¹⁴ Fò ou pran labitid bay on ti komantè. Dépawfwa, sèwten frè é sè ni dimal a bay on ti komantè lè yo k’ay réinyon. Nou palé dè Talia talè la. Mi sa i ka èspliké : « Lè fò an palé douvan onpakèt moun, a pati pè an ka pè ! Men konm an sé on moun ki ka palé trankilman, onlo moun pa’a vwè sa. » Men apapousa Talia pa’a réponn. Lèwvwè i ka préparé-y pou sé réinyon-la, i ka sonjé kè lèwvwè yo  pozé on kèsyon é kè sé vou prèmyé ki ka réponn, fò répons a-w kout, é fò ou réponn dirèktèman a kèsyon-la yo pozé la. Mi sa i ka di ankò : « Sa vlé di kè lèwvwè komantè an mwen kout, kè sa an ka di senp, é kè an ka réponn a kèsyon-la, komantè an mwen bon, pas sé sa frè-la vlé. »

15. Si nou on ti jan pè réponn pannan sé réinyon-la, ka pou nou pa jen oubliyé ?

¹⁵ Délè, menm sèwten frè é sè ki pa timid on ti jan pè réponn pannan sé réinyon-la. Poukwa ? Mi sa on sè, non a-y sé Juliet ka èspliké : « Dépawfwa, an ka touvé kè répons an mwen tèlman senp, oben an pa ka touvé-y tèlman bèl, kifè an on ti jan pè é an ka mandé-mwen si fò an réponn. » Si sé sa ou ka rèsanti, fò pa ou jen oubliyé kè pou Jéova, sa ki pli enpòwtan sé kè ou fè tousa ou pé c. Lè ou ka fè éfò pou ba Jéova louwanj pannan sé réinyon-la, é pou ou pa lésé lapè pran lanmen asi-w a pa ti kontan Jéova ka kontan !

16. Ki kalté pawòl ki pa dwètèt sòti an bouch an nou ?

¹⁶ Fò pa pon kalté pawòl ki ka « fè moun ditò » sòti an bouch a-w (Éféz. 4:31). Kon nou vwè-y pli ho, fò pa pon vyé pawòl sòti an bouch a on moun ki ka adoré Bondyé. Men a pa pawòl ki sal tousèl pou nou woté an bouch an nou. Men fò-nou woté tout kalté pawòl ki ka fè moun ditò an bouch an nou. Pa ègzanp, nou ké fè atansyon pou nou pa di pon mové biten asi moun ki ni ondòt kilti, asi moun ki ka vin dè ondòt pèp, oben asi moun ki sòti adan ondòt péyi. Nou ké fè atansyon pou nou pa fè jé èvè tèt a ponmoun é pou lè nou fè on ti jé èvè on moun, sa pa fè-y mal. Mi sa on frè ka rèkonnèt : « Avan an té ka di moun sèwten biten, é pou mwen sé té dé ti blag an té ka fè é sé té dé biten an kouyonnad, men an réyalité, sa an té ka di la pa té janti, é sa té ka fè lézòt mal. Men madanm an mwen édé-mwen onlo pou an té pé sa chanjé. Pannan onpakèt lanné, lèwvwè an té ka di dé biten ki té ka fè ki madanm an mwen ki lézòt ditò, madanm an mwen té ka di’an sa. Men i té ka atann kè nou a 2 pou di-mwen sa. »

17. Dapré Éfézyen 4:29, ka nou pé fè pou fè lézòt dibyen ?

¹⁷ Fò pawòl a-w toujou ka fè lézòt dibyen. Olyé ou kritiké-yo, oben olyé ou malpalé-yo, pran labitid félisité-yo (li Éfézyen 4:29). Té ni onlo biten ki té pé fè sé Izraélit-la ni rèkonésans, men olyé dè sa, yo pa té jen kontan. Lèwvwè on moun toujou ka plenn-li, i ka détenn asi lézòt. Dayè, sé sa ki pasé an Izrayèl, paskè lèwvwè sé 10 èspyon-la di mové biten asi péyi-la Jéova té kay ba-yo la, sa pousé sé Izraélit-la malpalé Moyiz (Nonb 13:31 – 14:4). Men lè on moun ka félisité lézòt,  sa pé fè-yo dibyen toubònman. Pa ègzanp, lèwvwè zanmi a fi a Jèfté félisité-y, sèten sa édé-y onlo pou i té pé sa kontinyé travay adan tabèwnak-la (Jij 11:40). Nou palé dè Sara talè la. Mi sa i ka di : « Lèwvwè ou ka félisité lézòt, ou ka fè-yo santi kè Jéova enmé-yo é kè yo ni plas a yo adan lasanblé-la. » Alò, chèché tout ti lokazyon ou pé ni pou félisité frè é sè a-w èvè tout tchè a-w.

18. Dapré Sòm 15:1, 2, poukwa fò-nou di lavérité é kijan nou pé fè sa ?

¹⁸ Fò ou di lavérité. Pou nou pé sa fè Jéova plézi fò pa pon manti sòti an bouch an nou, pas i hay toutkalté manti (Pwov. 6:16, 17). Jòdijou, pou sé moun-la, lè yo ka manti, sa toutafè nòwmal. Men nou, a pa konsa nou ka vwè sa, pas pou Jéova, sa pa bon menm menm menm (li Sòm 15:1, 2). Sé pousa, nou pé ké di pon biten pa èspré pou nou manti, é nou pé ké kaché pon enfòwmasyon pas nou anvi kouyonné lézòt.

19. Kidòt kalté pawòl ki pa dwètèt sòti an bouch an nou ?

¹⁹ Pa fè pon ti pawòl monté é désann (Pwov. 25:23 ; 2 Tés. 3:11). Talè la nou palé dè Juliet, é i ka èspliké ka i ka rèsanti lè on moun ka bay on koudlang asi ondòt moun. Mi sa i ka di : « Lèwvwè an ka vwè kè on moun ka palé asi do a ondòt moun, sa ka dékourajé-mwen é an pa ni konfyans adan moun-la ki ka fè kankan-la ankò. An ka di-mwen kè si i ka bay on koudlang asi moun-lasa, ès i pé’é bay yonn asi mwen osi ? » Si ou ka rann-vou kont kè lèwvwè ou ka palé èvè on moun, i ka bay on koudlang asi ondòt moun, chanjé konvèwsasyon-la pou palé dè on biten ki ka fè moun dibyen (Kol. 4:6).

20. Ka ou byen désidé a fè ?

²⁰ Jòdijou, onlo moun ka di onpakèt vyé pawòl, sé pousa fò-nou fè tousa nou pé pou pawòl an nou toujou fè Jéova plézi. Fò-nou toujou sonjé kè si nou pé palé sé pas Jéova fè-nou on bèl kado. É i vlé kè nou sèvi èvè kado-lasa byen konm i fo. I ké béni-nou si nou ka fè éfò pou pawòl an nou toujou ba-y lonnè, ki sé adan prédikasyon-la, ki sé lè nou k’ay réinyon oben ki sé lè nou ka palé èvè lézòt. Lè Jéova ké détwi mond-lasa, nou ké pé sèvi èvè pawòl an nou pou ba Jéova glwa pli fasilman (Jid 15). Men annatandan, an-nou fè tousa nou pé pou ‘pawòl ki ka sòti an bouch an nou’ fè Jéova plézi (Sòm 19:14).