EKIRAJAAYA 15
Ana pünüiki suʼupala wayuu
«Shia anaka aluʼu müleka keisarale pia sümüin pukuaippa suʼupala wayuu süpüla süshatüinjatüin pukuaippa: maa aka tü paashajaakat achiki» (1 TIM. 4:12).
JAYEECHI 90 Watütüleʼerajiraa waaʼin waneepia
SÜCHIKI TÜ WEKIRAJAAINJATKALÜ ANAIN a
1. ¿Jarai chi kanüikikai atuma wayuu?
SÜKA alin wayuu nüpüla Jehová, kanüisü nutuma. Müshijeseʼe naashajaain Adán chi palajachikai wayuu nümaa chi Nüshi iipünaajachikai nukumajaiwaʼaya nia. Eesü süpüla nukumajüin Adán pütchi jeketü. Sünainjee tia nuuntuin niʼitaain sünülia tü mürütkalüirua (Gén. 2:19). Talatakajasaʼa naaʼin naashajaapa soʼu tü palajatkat nukua sümaa Eva, tü nuʼwayuusekat (Gén. 2:22, 23).
2. ¿Jamüsü sukuwaʼipa sünüiki wayuu sümaiwa jee maaʼulu?
2 Mapa, mojutusai Jehová sutuma nnojoluin anain sünüiki wayuu. Aküjashi alawaa Satanás sümüin Eva, müsüjeseʼe kaainjalain wayuu jee nnojoluin lotuin maʼin nakuwaʼipa (Gén. 3:1-4). Nnojotsü anain nünüiki Adán wanaa sümaa niʼitaain Eva otta Jehová saaʼu tü alatakat nümüin (Gén. 3:12). Aküjashi alawaa Caín nümüin Jehová süchikijee nuʼutuin naaʼin chi nimüliakai, Abel münakai (Gén. 4:9). Kakalia mapa, eejachi wanee nüpüshi Caín kanüliakai Lamec, nukumajüin wanee jayeechi wayaawataka atuma jouluin mojulawaa soʼu tia (Gén. 4:23, 24). ¿Müsüche sukuwaʼipa wayuu maaʼulu? Jamüshiijaʼa na polítikokana, maapüliinsalii naya sünain aküjaa pütchi yarüttüsü suʼupala wayuu. Tü joutkat suluʼu peliikula maaʼulu shia yarüttüin sünüiki wayuu. Müsia sukuwaʼipa sünüiki wayuu suluʼu koleejia jee naʼyataaleruʼu. Wayaawata aaʼu sünainjee tia, kashüülain maʼin sukuwaʼipa wayuu maaʼulu.
3. (1) ¿Kaseerü alataka nnojorüle eejüin waaʼin suulia tü pütchi waapajakat? (2) ¿Kasa wekirajaainjatka anain sünain ekirajaayakat tüü?
3 Waapüle pütchi mojuluʼut waneepia sutuma wayuu, eesü süpüla washatüin nanüiki nnojorüle eejüin waaʼin. Süka talateein naaʼin Jehová watuma waya anoujashiikana, nnojoleerü wayoutuin neʼe yarüttüin wanüiki, wachajaweerü sukuwaʼipa süpüla anain wanüiki süpüla waʼwaajüin nia. Sünain ekirajaayakat tüü, wekirajaweerü anain tü waaʼinrajatkat süpüla anain wanüiki waküjapa pütchi, woutkajaapa jee waashajaapa sümaa wayuu. Wekirajaa palajana jamüin jülüjaka naaʼin Jehová tü waashajaakalü achiki.
JÜLÜJASÜ NAAʼIN JEHOVÁ TÜ WAASHAJAAKALÜ ACHIKI
Atüjaaneerü aaʼu tü suluʼukat waaʼin sükajee tü waashajaakalü achiki. (Paashajeʼera tü pütchikat 4 otta 5). d
4. Sünainjee tü sümakat Malaquías 3:16, ¿jamüsü watüjaaka saaʼu jülüjain naaʼin Jehová tü waashajaakalü achiki?
4 (Paashajeʼera Malaquías 3:16). ¿Jamüsü nüshajireeka Jehová sünain wanee karaloʼuta nanülia na kojutukana amüin nia sükajee nanüiki? Shia süka sütüjaaneerüin aaʼu tü suluʼukat waaʼin sükajee wanüiki. Anuu nünüiki Jesús: «Tü saashajaakat wane wayuu, shia tü ajuittakat suluʼujee saaʼin» (Mat. 12:34). Sükajee tü waashajaakalü achiki, ayaawatüneerü aaʼu aire wapüla Jehová. Keeʼireesü naaʼin Jehová katüin noʼu na aikana apüla nia suluʼu tü mma jeketkat.
5. (1) ¿Jamüsü sünainpünaaka aʼwaajaa Jehová tü waashajaakalü achiki? (2) Maʼaka weʼrüin suluʼu tü ayaakuaakalüirua, ¿kasa eejüinjatka oulia waaʼin waashajaapa?
5 Süpüla nücheküin Jehová tü waaʼinrakat süpüla waʼwaajüin nia, jülüjasü naaʼin tü waashajaakalü achiki, müleka anale jee müleka mojule shia (Sant. 1:26). Naashajaapa noʼutku na nnojoliikana alin apüla Jehová, airuʼutsü nanüiki, kataaʼasü nanüiki jee yaletüsü naaʼin (2 Tim. 3:1-5). Jalia waya suulia majüin wakuwaʼipa. Tü keeʼireekat waaʼin shia talatüin naaʼin Jehová wamaa sükajee anain sukuwaʼipa wanüiki. ¿Talateetche naaʼin Jehová nümaa wanee wawala kamaneere nia sünain tü outkajawaakat, sünain aküjaa pütchi sümaa airuʼuluin nünüiki sümüin nüpüshi nipialuʼu jee maalinre naya nüpüla? (1 Ped. 3:7).
6. ¿Kasa eeka sünainjee anain sukuwaʼipa sünüiki Kimberly?
6 Anale sukuwaʼipa wanüiki, shiyaawateerü aaʼu wayuu jaralin aʼyataain nümüin Maleiwa otta jaralin nnojolin aʼyataain nümüin (Mal. 3:18). Sütüjaajeerü aaʼu wayuu waʼyataain nümüin Jehová sükajee anain wanüiki. Jülüjataa waaʼin tü alatakat sümüin wanee wawala kanüliasü Kimberly. b Saainjapa wanee tareea sümaa wanee wayuu koleejiajiraaka sümaa, shiyaawata aaʼu tia wayuukot naatain sukuwaʼipa Kimberly. Nnojotsü shiyoujuin sukuwaʼipa wayuu, kamaneesü maʼin shia jee nnojotsü aküjain pütchi yarüttüsü. Sütüjawee aaʼu tia wayuukot jamüin anaka sukuwaʼipa Kimberly. Mapa, shikirajaaka sünain tü Bibliakat. Talatüshi maʼin Jehová sükajee sürütkaain wayuu nünainmüin sutuma anain sukuwaʼipa wanüiki.
7. ¿Jamüsü keeʼireeka paaʼin anain sukuwaʼipa pünüiki?
7 Keeʼireesü waaʼin anain sukuwaʼipa wanüiki süpüla kojutuin Jehová watuma jee aleewain waya namaa na wawalayuukana. Anasü wekirajaale sünain waneirua kasa waaʼinrajatka süpüla ayatüin anain sukuwaʼipa wanüiki suʼupala wayuu.
ANA PÜNÜIKI SUʼUPALA WAYUU PÜKÜJAPA PÜTCHI
Keeʼireesü naaʼin Jehová kamaneein waya sümüin wayuu waküjapa pütchi. (Paashajeʼera tü pütchikat 8 otta 9).
8. ¿Kasa waaʼinrajatka süpüla washatüin nukuwaʼipa Jesús waküjapa pütchi?
8 Kamanee pia jee kojuta pümüin wayuu mojule sünüiki pümüin. Yaaiwaʼaya Jesús yaa mmapaʼa aküjünüsü pütchi mojuluʼut nüchiki, maʼaka saaʼin kasain nüleʼe, nipeʼrülin, niʼyataain nümüin chi Yolujaakai, mojutuin nümüin tü kaʼi neemeraakalü oʼu na judíokana otta niʼrülin wayumüin süka nünüiki nümüin Maleiwa (Mat. 11:19; 26:65; Luc. 11:15; Juan 9:16). Nnojotpejeʼe mojuin nünüiki neʼipajee. Airuʼurule sünüiki wayuu wamüin, washata nukuwaʼipa Jesús, nnojo waküjain pütchi mojusü neʼipajee (1 Ped. 2:21-23). Eesü kaʼi kapüleejeetka oʼu wamüin wachecherüin waaʼin airuʼurule sünüiki wayuu wamüin (Sant. 3:2). ¿Kasa waaʼinrajatka süpüla wachecherüin waaʼin soʼunnaa tia?
9. ¿Kasa waaʼinrajatka suulia mojuin wanüiki sümüin wayuu waküjapa pütchi?
9 Mojule nünüiki pümüin wanee wayuu püküjakai amüin pütchi, nnojo jülüjakuʼu müin paaʼin nünüiki. Jülüjataa waaʼin tü naaʼinrakat wanee wawala, Sam nünülia, soʼunnaa airuʼuluin nünüiki wanee wayuu nümüin sünain aküjaa pütchi, müshi nia: «Jülüjasü taaʼin choʼujaain nümüin naapajüin tü pütchikat otta eein süpüla niiʼiratüin nukuwaʼipa». Eesüjaʼa mojule sünüiki wayuu wamüin süka sülatüin wanee kasa sümüin soʼunnaa tia. Waashajaapa nümaa wanee wayuu eekai jashichin, waaʼinra tü saaʼinrakat wanee wawala kanüliasü Lucía, woʼuraaja nümüin Jehová motsomüin suluʼu waaʼin süpüla nüchecherüin waaʼin suulia jashiee otta suulia wasoutuin niʼipajee.
10. ¿Kasa waaʼinrajatka saashin 1 Timoteo 4:13?
10 Pikirajaa süpüla pütüjain maʼin ekirajaa. Yalayalasü naaʼin Timoteo sünain aküjaa pütchi, ayatüinjachipejeʼe ekirajaain nia süpüla nütüjain ekirajaa (paashajeʼera 1 Timoteo 4:13). ¿Kasa waaʼinrajatka süpüla watüjain maʼin ekirajaa? Acheküshii wekirajaain palajana. Süpüla tia, anashii wekirajaale sünain tü poyeetokot Ayata pia sünain aashajeʼeraa otta ekirajaa otta sünain tü karaloʼutakat Wekirajaayainjatü sünain tü outkajawaakat Wakuwaʼipa otta Waʼyataain nümüin Maleiwa eere sümüin «Atüjainjana waya ekirajaa». ¿Pikirajaainche sünain tia? Paaʼinrüle tia, nnojoleechi pia mmoluin jee atüjeechi pia aashajawaa pikirajapa wayuu.
11. ¿Kasa naaʼinraka waneinnua wawalayuu süpüla natüjain maʼin ekirajaa?
11 Wane kasa waaʼinrajatka süpüla watüjain maʼin ekirajaa shia jülüjale waaʼin nekirajia na wawalayuukana sünain tü outkajawaakat jee wooʼulaküle shia. Sam, chi wachuntayüikai anülia suluʼu pütchika 9, jülüjasü naaʼin sukuwaʼipa nekirajia na wawalayuu atüjakana ekirajaa. Jülüjachonsü maʼin naaʼin nanüiki jee nüshatüin sukuwaʼipa nekirajia. Talía, shia wanee wawala jülüjaka maʼin saaʼin tü pütchi naküjakat na wawalayuu atüjakana maʼin ekirajaa. Sutuma tia atüjasü shia süpüleerua aashajawaa jee emeʼejaa saaʼin wayuu süküjapa pütchi.
ANA PÜNÜIKI SUʼUPALA WAYUU PUUTKAJAAPA
Waʼwaajüin Jehová weeʼirajapa süka süpüshuaʼa waaʼin sünain tü outkajawaakat. (Paashajeʼera tü pütchikat 12 otta 13).
12. ¿Kasa kapüleeka namüin waneinnua wawalayuu sünain tü outkajawaakat?
12 Eesü süpüla anain wakuwaʼipa wapüshuaʼa napüleerua na wawalayuukana sünain tü outkajawaakat. Waaʼinrüin tia weeʼirajapa süka süpüshuaʼa waaʼin jee yapapa watuma tü wanüikinjatkat wasoutapa shiʼipajee tü asakinnakalü anain (Sal. 22:22). Eeshii na kapüleekana amüin tia. ¿Müsüche pukuwaʼipa? Anasü pütüjaale saaʼu tü naaʼinrakat waneinnua wawalayuu ountakana tia.
13. ¿Kasa waaʼinrajatka süpüla weeʼirajüin sümaa talatüin waaʼin sünain tü outkajawaakat?
13 Piiʼiraja sümaa talatüin paaʼin. Soto paaʼin piiʼirajüin sünain tü outkajawaakat süpüla puʼwaajüin Jehová. Jülüjataa waaʼin tü saaʼinrakat wanee wawala kanüliasü Sara. Mayaainjeʼe nnojoluin anain maʼin sümüraluʼu saashin, eeʼirajüsü shia süka suʼwaajeein Jehová. Soʼunnaa shikirajaain sünain tü ekirajaanajatkalü anain sünain tü outkajawaakat, suuʼulaküin tü jayeechikalüirua otta jülüjasü saaʼin tü saashajaakalü achiki wanaapünaa sümaa tü ekirajaanajatkalü anain sünain tü outkajawaakat. Anuu sünüiki: «Sutuma taaʼinrüin tia, jülüjasü taaʼin tü sümakat tü jayeechikalüirua suulia jülüjain taaʼin anain maʼin tamüraluʼu».
14. Japüleʼere pia, ¿kasa paaʼinrajatka süpüla pusoutuin shiʼipajee tü asakinnakalü anain sünain tü outkajawaakat?
14 Pusouta waneepia sünain tü outkajawaakat. Kapüleesü tia namüin wainma wawalayuu. Anuu sünüiki Talía, tü wachuntayütkalü anülia suluʼu pütchika 11: «Mmotshaatasü maʼin taya taashajaapa suʼupala wayuu mayaainjeʼe nnojoluin jaʼyain tia saaʼu tanüiki. Müsüjeseʼe kapüleein maʼin tamüin tasoutawalin sünain tü outkajawaakat». Ayatapejeʼe shia asoutuin sünain tü outkajawaakat. Shikirajaapa sünain tü ekirajaanajatkalü anain sünain tü outkajawaakat, jülüjasü saaʼin palitchonjatüin sünüiki shiʼipajee tü asakinnakalü anain sünain tü palajatkat pütchi. Anuu sooʼomüin sünüiki: «Anasü palitchonle tanüiki jee mapüleechonle shia shiʼipajee tü asakinnakalü anain sünain tü outkajawaakat, jama shiain tü keeʼireekat naaʼin chi ekirajakai».
15. ¿Kasa sotuinjatka waaʼin wasoutapa shiʼipajee tü asakinnakalü anain sünain tü outkajawaakat?
15 Eeshii wawalayuu nnojoliikana japüleʼein, kapüleepejeʼe namüin nayalerüin najapü sünain tü outkajawaakat. ¿Jamüsü kapüleeka tia namüin? Anuu sünüiki wanee wawala kanüliasü Juliet: «Kapüleesü tamüin tayalerüin tajapü sünain tü outkajawaakat süka jülüjain taaʼin nnojoluin anain maʼin tü taküjakat otta nnojoluin kasain saamüin». Müle pukuwaʼipa mayaa, soto paaʼin keeʼireein naaʼin Jehová pusoutuin süka süpüshuaʼa paaʼin. c Kojutusü maʼin nümüin Jehová tü waaʼinrakat süpüla wasoutuin sünain tü outkajawaakat mayaainjeʼe mmoluin waya.
ANA PÜNÜIKI SUʼUPALA WAYUU PAASHAJAAPA NAMAA
16. ¿Jarat tü pütchi nnojoluinjatkat waashajaain achiki?
16 Jalia pia suulia paashajaain pütchi mojuluʼut (Éf. 4:31). Wekirajaaitpa anain nnojoluinjatüin mojuin nanüiki na anoujashiikana. Eepejeʼe süpüla airuʼuluin wanüiki sümaa nnojoluin wayaawatüin saaʼu. Jalia waya suulia majüin wakuwaʼipa. Jamüshiijaʼa waya, nnojoluinjatü mojuin wanüiki nachiki na naatakana akuwaʼipa, oumain jee eʼiruku. Jee nnojotsü waküjeein wanee pütchi mojeetka atuma saaʼin wayuu. Anuu nünüiki wanee wawala: «Eesü taküjawaire wanee pütchi süpüla temeeʼerajaain neʼe. Nnojotpejeʼe tayaawatüin saaʼu mojuin saaʼin wayuu tatuma. Tanouteʼeraka takuwaʼipa süka sükaalinjain taya taʼwayuuse. Aashajaasü shia tamaa süpüla süküjain nnojoluin anain tanüiki sümüin otta sümüin wayuu».
17. Saashin Éfeso 4:29, ¿kasa waaʼinrajatka süpüla watütüleʼerüin naaʼin na waneinnua sükajee wanüiki?
17 Püküja pütchi analuʼut atütüleʼereetka saaʼin wayuu. Paaʼinra tia suulia piyoujain naya (paashajeʼera Éfeso 4:29). Nnojotsü meein wakuwaʼipa maʼaka naaʼin na israelitakana. Mayaainjeʼe wainmain kasa naapüinjatka aaʼujee analuʼut, younakuʼu müshii naya waneepia. Younakuʼu müle waya waneepia, nashateerü tia wachiirua na waneinnua. Sünainjee tü pütchi mojuluʼut naküjakat na polooshiikana ajayajülii, ayounnalaashii na israelitakana nümüin Moisés (Núm. 13:31–14:4). Eekajasaʼa waküjale pütchi analuʼut, aneerü saaʼin wayuu sutuma. Jülüjataa waaʼin sukuwaʼipa nüchon Jefté. Eesüjaʼa süpüla sütütüleʼerüin saaʼin tü pütchi analuʼut naküjakat sümüin saʼaleewainyuu süpüla ayatüin shiʼyataain nümüin Maleiwa (Juec. 11:40). Anuu sünüiki Sara, tü wachuntayütkalü anülia suluʼu pütchika 13: «Waküjapa pütchi analuʼut namüin na waneinnua, nayaawateerü aaʼu alin naya nüpüla Jehová jee jaloulin naya sümüin nupueulose». Jülüja paaʼin tü kasa anasü naaʼinrakat na waneinnua süpüla püküjain pütchi analuʼut atütüleʼereetka naaʼin.
18. (1) Sünainjee tü sümakat Salmo 15:1, 2, ¿jamüsü waküjainjatka tü shiimainkat waneepia? (2) ¿Kasa waaʼinrajatka süpüla tia?
18 Püküja tü shiimainkat waneepia. Nnojorüle waaʼinrüin tia, nnojoleechi talatüin Jehová wamaa, jama niyoutuin tü alawaakat (Prov. 6:16, 17). Mayaainjeʼe kiʼrain wayuu sünain aküjaa alawaa, nnojotsü meein wakuwaʼipa. Keeʼireesü waaʼin wayoutuin tia maʼaka niyoutuin shia Jehová (paashajeʼera Salmo 15:1, 2). Nnojoluinjatü waküjain alawaa süpüla wemeejüin wayuu otta nnojoluinjatü wounjulakuʼu wamüin wanee kasa shiiʼiree sunoujain wayuu alawaa.
Waashajaale sümaa wayuu aküjeeka perulaa, talateechi Jehová wamaa waʼwanajaale tü waashajaakalü achiki. (Paashajeʼera tü pütchikat 19).
19. ¿Jarat tü wane kasa eejüinjatka oulia waaʼin?
19 Nnojo püküjain perulaa (Prov. 25:23; 2 Tes. 3:11). Anuu sünüiki Juliet, tü wachuntayütkalü anülia suluʼu pütchika 15 süchiki jamüin saaʼin saapapa perulaa: «Süküjapa tamüin wanee wayuu perulaa, mojusü maʼin taaʼin jee jülüjasü taaʼin eein süpüla süküjain perulaa tachiki». Paashajaapa sümaa wayuu jee piyaawatüle saaʼu perulaain tü aküjünajatkat, paashajaa süchiki wanee kasa naata suulia jee püküja pütchi analuʼut atütüleʼereetka saaʼin wayuu (Col. 4:6).
20. ¿Kasa paaʼinrajatka süpüla talatüin naaʼin Jehová pümaa?
20 Kepiashii waya saʼaka wayuu yarüttaka anüiki. Müsüjeseʼe jülüjainjatüin waaʼin wanüiki süpüla anain shia noʼuluʼu Jehová. Soto waaʼin kanülin waya nutuma Jehová otta jülüjasü naaʼin tü waashajaakalü achiki. Kojutule watuma Jehová sükajee wanüiki waküjapa pütchi, woutkajaapa jee waashajaapa sümaa wayuu, eʼreena waya kasa anasü nutuma. Nnojotpa wayuu mojulaasü, mapüleejeerü wamüin kojutuin watuma Jehová sükajee tü waashajaakalü achiki (Jud. 15). Sümaʼinruʼu süntüin tia kaʼikat, waaʼinra tü nümakat chi salmistakai, tü makat: «Jehovákalee, [...] kasataalejeseʼe talatüin paaʼin sümaa süpüshuaʼa tü pütchi tamakat» (Sal. 19:14).
JAYEECHI 121 Choʼujaasü maʼin wachecherüin waaʼin
a Kanüishii waya nutuma Jehová, wainmapejeʼe na nnojoliikana kojutuin amüin Jehová sükajee nanüiki. Mayaainjeʼe sumojujaain sukuwaʼipa wayuu maaʼulu, ¿kasa waaʼinrajatka süpüla watütüleʼerüin saaʼin wayuu sükajee wanüiki jee talatüin naaʼin Jehová watuma? ¿Kasa waaʼinrajatka süpüla talatüin naaʼin Jehová watuma sükajee wanüiki waküjapa pütchi, woutkajaapa jee waashajaapa sümaa wayuu? Wekirajaajeerü anain tia sünain ekirajaayakat tüü.
b Aʼwanajaanüsü waneirua anüliee.
c Pütüjeere sooʼomüin süchiki tia, paashajeʼera tü pütchikat «Waʼwaaja Jeʼwaa wanaa namaa na wawalayuukana», ojuʼitaka suluʼu Aapiria Wayuu eneeroʼu soʼu 2019.
d SÜCHIKI TÜ AYAAKUAAKALÜIRUA: Wanee wawala awoolojooshi niʼipajee wanee wayuu airuʼutkai anüiki nümüin. Wanee wawala nnojoikai aaʼin sünain eeʼirajaa sünain tü outkajawaakat. Wanee wawala aküjasü perulaa.
