1. Sin-o ang naghatag sa aton sang ikasarang sa paghambal?

 REGALO sang aton mahigugmaon nga Dios ang aton ikasarang sa paghambal. Sang gintuga ang una nga tawo nga si Adan, ginhatagan sia sang ikasarang nga mag-istorya sa iya Amay sa langit. May ikasarang man sia nga maghimo sang bag-o nga mga tinaga. Gingamit ni Adan ini nga ikasarang para mahimo niya ang iya asaynment nga amo ang paghatag sang ngalan sa tanan nga sapat. (Gen. 2:19) Kag sigurado nga nalipay gid sia sang may naistorya na sia nga isa man ka tawo, nga amo ang iya matahom nga asawa nga si Eva.—Gen. 2:22, 23.

2. Paano gingamit sa indi husto nga paagi ang ikasarang sa paghambal?

² Sang ulihi, gingamit sa indi husto nga paagi ang ikasarang sa paghambal. Halimbawa, nagbinutig si Satanas nga Yawa kay Eva. Bangod sini nga kabutigan, nakasala ang mga tawo kag nangin indi sila perpekto. (Gen. 3:1-4) Sang nakasala si Adan, ginbasol niya si Eva, kag ginbasol pa gani niya bisan si Jehova. (Gen. 3:12) Sang ginpatay ni Cain ang iya utod nga si Abel, nagbinutig si Cain kay Jehova. (Gen. 4:9) Sang ulihi, nagkomposo ang kaliwat ni Cain nga si Lamec sang isa ka binalaybay nga nagapakita nga grabe gid kalain sang mga tawo sadto. (Gen. 4:23, 24) Ano naman ang masiling naton sa mga tawo subong? May mga pulitiko nga nagapamuyayaw sa atubangan sang madamo nga tawo. Kag mabatian sa kalabanan nga pelikula ang malaw-ay nga panghambal. Sa eskwelahan kag sa ulubrahan, madamo ang nagapamuyayaw kag nagahambal sing binastos. Ginapakita sining malaw-ay nga panghambal sang mga tawo nga grabe na gid kalain sang kalibutan subong.

3. Ngaa dapat kita maghalong, kag ano ang binagbinagon naton sa sini nga artikulo?

³ Kon indi kita maghalong, posible nga daw wala na lang sa aton kon makabati kita sang malaw-ay nga panghambal kay pirme naton ini mabatian. Posible pa gani nga mailog naton ini nga panghambal.  Bilang mga alagad ni Jehova, gusto naton nga malipay sia sa aton, gani ginalikawan gid naton ang malaw-ay nga panghambal. Gusto naton gamiton ang dalayawon nga regalo nga ikasarang sa paghambal sa husto nga paagi, nga amo ang pagdayaw sa aton Dios. Sa sini nga artikulo, binagbinagon naton kon paano naton ini mahimo (1) kon nagabantala kita, (2) kon naga-attend kita sa mga miting sang kongregasyon, kag (3) kon nagaistorya kita sa iban. Pero binagbinagon anay naton kon ngaa importante kay Jehova kon paano naton ginagamit ang aton ikasarang sa paghambal.

4. Suno sa Malaquias 3:16, ngaa importante kay Jehova kon paano naton ginagamit ang aton ikasarang sa paghambal?

⁴ Basaha ang Malaquias 3:16. May ‘isa ka libro si Jehova nga nagaunod sang mga ngalan sang mga tawo nga ginadumdom niya.’ Ini nga mga tawo nagakahadlok sa iya kag nagapamalandong sa iya ngalan, kag ginapamatud-an nila ini sa ila paghambalanay. Ano ayhan ang rason kon ngaa ginasulat ni Jehova ang ila ngalan sa iya libro? Bangod mabal-an sa aton ginahambal kon ano ang ara sa aton tagipusuon. Si Jesus nagsiling: “Sa kabuganaan sang tagipusuon nagahambal ang baba.” (Mat. 12:34) Mabal-an sa topiko nga aton ginaistoryahan kon daw ano naton ka palangga si Jehova. Kag gusto ni Jehova nga magkabuhi sing wala sing katapusan sa bag-ong kalibutan ang mga nagapalangga sa iya.

5. (a) Paano makaapekto sa aton pagsimba ang aton paagi sang paghambal? (b) Base sa mga piktyur, ano ang aton dapat tandaan parte sa aton paagi sang paghambal?

⁵ Nagadepende sa aton paagi sang paghambal kon bala batunon ni Jehova ang aton pagsimba sa iya. (Sant. 1:26) Makita sa paagi sang paghambal sang pila nga wala nagaalagad sa Dios nga madali sila maakig, masakit sila maghambal, kag bugalon sila. (2 Tim. 3:1-5) Indi gid naton gusto nga mangin pareho sa ila. Sa baylo, gusto naton nga malipay si Jehova sa aton paagi sang paghambal. Malipay ayhan sa aton si Jehova kon maayo kita maghambal kon ara kita sa aton mga miting kag kon nagabantala kita, pero masakit kita maghambal sa mga miembro sang aton pamilya kon wala sang iban nga tawo?—1 Ped. 3:7.

6. Ano ang makalilipay nga resulta sang maayo nga paagi sang paghambal ni Kimberly?

⁶ Kon ginagamit naton ang aton ikasarang sa paghambal sa maayo nga paagi, ginapakita naton  sa iban nga nagaalagad kita kay Jehova. Ginapakita naton sa ila ang kinalain “sang isa nga nagaalagad sa Dios kag sang isa nga wala nagaalagad sa iya.” (Mal. 3:18) Matuod ini sa eksperiensia sang isa ka sister nga si Kimberly b nga nagaeskwela sa hayskul. Ginsilingan sia nga mag-obra sang project upod sa isa niya ka klasmeyt. Pagkatapos nila mahimo ang project, natalupangdan sang iya klasmeyt nga lain si Kimberly kon ikumparar sa iban nga estudyante. Wala niya ginalibak ang mga tawo, mainabyanon sia kon nagaistorya, kag wala sia nagapamuyayaw. Nagdayaw gid ang klasmeyt ni Kimberly sa iya kinaiya, kag nagpasugot sia nga magpa-Bible study kay Kimberly. Nalipay gid si Jehova kon ang aton paagi sang paghambal nagapalig-on sa mga tawo nga magtuon parte sa iya.

7. Ngaa gusto mo gamiton sa maayo nga paagi ang regalo sa imo sang Dios nga ikasarang sa paghambal?

⁷ Gusto naton tanan nga ang aton paagi sang paghambal nagapadungog kay Jehova kag nagabulig sa aton nga magsuod kita sa aton mga kauturan. Gani binagbinagon naton ang pila sa mga puede naton himuon para mangin maayo kita pirme nga ‘halimbawa sa aton paghambal.’

8. Paano nagpakita si Jesus sang maayo nga halimbawa sa iya paghambal sang nagbantala sia?

⁸ Mangin mainayuhon kag matinahuron sa imo paghambal bisan pa ginapakalain ka sang iban. Sang nagbantala si Jesus diri sa duta, may mga tawo nga nagsiling nga palahubog sia, sobra sia ka palakaon, kakunsabo sia sang Yawa, wala niya ginatuman ang Adlaw nga Inugpahuway, kag ginapasipalahan niya ang Dios. (Mat. 11:19; 26:65; Luc. 11:15; Juan 9:16) Pero, wala gid sila gin-akigan ni Jesus. Pareho kay Jesus, indi man kita magbalos bisan pa ginapakalain kita sang iban. (1 Ped. 2:21-23) Pero indi ini mahapos himuon. (Sant. 3:2) Ano ang makabulig sa aton?

9. Ano ang makabulig sa aton para makontrol naton ang aton ihambal kon nagabantala kita?

⁹ Kon ginapakalain ka sang imo ginabantalaan, tinguhai nga indi maglain ang imo buot. Ang isa ka brother nga si Sam nagsiling, “Ginatinguhaan ko nga hunahunaon nga importante gid nga mabatian sang akon ginabantalaan ang kamatuoran, kag puede pa sia magbag-o.” Kon kaisa, indi sa aton akig ang tagbalay, kundi natabuan lang nga akig sia. Kon akig ang aton ginabantalaan, puede naton himuon ang ginahimo sang isa ka sister nga si Lucia. Puede kita makapangamuyo sing malip-ot kay Jehova nga buligan kita nga mangin kalmado kag indi kita makahambal sing masakit ukon wala sing pagtahod.

10. Suno sa 1 Timoteo 4:13, ano ang dapat naton panikasugan nga himuon?

¹⁰ Pauswaga ang imo ikasarang sa pagtudlo. Madugay na nga nagabantala si Timoteo, pero kinahanglan niya gihapon nga pauswagon ang iya ikasarang sa pagtudlo. (Basaha ang 1 Timoteo 4:13.) Ano ang dapat naton himuon para mangin mas epektibo kita sa aton pagbantala? Dapat kita  maghanda sing maayo. Nagapasalamat gid kita kay madamo kita sang mga gamit nga makabulig sa aton nga mapauswag ang aton ikasarang sa pagtudlo. Makabulig sa imo ang brosyur nga Mag-ukod Ka sa Pagbasa kag Pagpanudlo kag ang “Mangin Epektibo sa Ministeryo” nga seksion sang Ang Aton Cristianong Pagkabuhi kag Pagministeryo—Workbook Para sa Miting. Ginagamit mo bala ini nga mga publikasyon? Kon nagahanda kita sing maayo, mabuhinan ang aton kulba kag madugangan ang aton kompiansa sa paghambal.

11. Ano ang ginahimo sang pila ka kauturan para mapauswag nila ang ila ikasarang sa pagtudlo?

¹¹ Mapauswag man naton ang aton ikasarang sa pagtudlo paagi sa pag-ilog sa iban nga kauturan sa kongregasyon. Ginapamensar ni Sam, nga ginsambit kaina, kon ngaa maayo magtudlo ang iban nga kauturan. Ginaobserbahan niya ang ila paagi sang pagtudlo kag ginatinguhaan niya nga ilugon sila. Ginapamatian naman sing maayo ni Talia kon paano ginapaathag sang eksperiensiado nga mga speaker ang topiko sang ila pamulongpulong. Nakabulig ini sa iya nga mapaathag sing maayo ang mga topiko nga pirme ginapamangkot sang mga tawo nga iya mabantalaan.

12. Ano ang nabudlayan nga himuon sang iban bangod nahuya sila ukon nakulbaan?

¹² Makabulig kita tanan para mangin madinalag-on ang aton mga miting sang kongregasyon. Paano? Paagi sa pagkanta sing matunog kag paagi sa pagkomento sing makapalig-on. (Sal. 22:22) May iban nga nahuya magkanta ukon nakulbaan magkomento sa tion sang mga miting. Amo bala sini ang nabatyagan mo? Makabulig sa imo ang ginahimo sang iban para indi sila mahuya magkanta ukon para indi sila makulbaan magkomento.

13. Ano ang puede makabulig sa imo para makakanta ka sing tinagipusuon sa mga miting?

¹³ Magkanta sing tinagipusuon. Ang pinakaimportante nga rason kon ngaa nagakanta kita sa aton mga miting amo ang dayawon si Jehova. Para sa isa ka sister nga si Sara, indi sia manami magkanta. Pero gusto niya nga dayawon si Jehova paagi sa pagkanta. Gani kon nagahanda sia para sa mga miting, ginapraktis man niya ang mga kanta, kag ginatinguhaan niya nga makita ang koneksion sang lyrics sang kanta sa pagatun-an sa miting. “Nakabulig ini sa akon nga magpokus sa mensahe sang kanta, kag indi masyado mabalaka sa akon tingog,” siling niya.

14. Kon mahuluy-on ka, ano ang makabulig sa imo para makakomento ka sa mga miting?

¹⁴ Magkomento sing regular. May pila ka utod nga nabudlayan magkomento. “Grabe ang akon nerbios kon kinahanglan ko maghambal sa atubangan sang iban nga tawo, pero indi ini matalupangdan sang iban kay indi ini bal-anon sa akon tingog,” siling ni Talia nga ginsambit kaina. “Gani nabudlayan gid ako magkomento.” Pero wala ini nakapugong kay Talia nga magkomento sa mga miting. Kon nagahanda sia para sa mga miting, ginadumdom niya nga ang una nga sabat dapat malip-ot lang kag kon ano lang ang sabat sa  pamangkot. Nagsiling sia: “Gani OK lang nga malip-ot, simple, kag direkta sa punto ang akon sabat bangod amo ini nga sabat ang ginapaabot sang nagadumala sang pagtuon.”

15. Ano ang dapat naton tandaan parte sa aton mga komento?

¹⁵ May mga kauturan nga indi man mahuluy-on, pero daw nagaalang-alang sila magkomento kon kaisa. Ngaa? Ang isa ka sister nga si Juliet nagsiling, “Kon kaisa, nagaalang-alang ako magkomento kay pamatyag ko tam-an ka simple kag indi manami ang akon ikomento.” Pero tandai nga gusto ni Jehova nga magkomento kita suno sa aton nga masarangan. c Nalipay gid sia kon ginahimo naton ang aton bug-os nga masarangan nga makakomento sa mga miting bisan pa nakulbaan kita kon kaisa.

16. Ano nga klase sang paghambal ang dapat naton likawan?

¹⁶ Likawi ang tanan nga klase sang “masakit nga hambal.” (Efe. 4:31) Ginsambit kaina nga indi dapat magpamuyayaw ang isa ka Cristiano. Pero dapat kita maghalong kay may mga klase sang paghambal nga daw indi naton matalupangdan nga masakit na gali nga hambal. Halimbawa, dapat kita maghalong para indi kita makahambal sing malain parte sa mga tawo nga iban ang kultura, tribo, ukon pungsod. Indi man naton dapat pag-insultuhon ang iban kay indi naton gusto nga masakitan sila. Ang isa ka brother nagsiling: “Kon kaisa, may ginahambal ako nga abi ko kaladlawan kag daw indi man masakit. Pero ang matuod, masakit gali ini pamatian. Sa sulod sang madamo nga tinuig, daku gid ang nabulig sang akon asawa kay ginasilingan niya ako kon kamihanon lang kon may nahambal ako nga nakasakit sa iya kag sa iban.”

17. Base sa Efeso 4:29, paano naton mapalig-on ang iban?

¹⁷ Panikasugi nga ang imo ginahambal makapalig-on sa iban. Mangin maabtik sa pagdayaw ukon sa pagpasalamat sa iban imbes nga pakalainon sila ukon magreklamo. (Basaha ang Efeso 4:29.) Madamo sing rason para magpasalamat ang mga Israelinhon, pero pirme sila nagareklamo. Kon pirme kita nagareklamo, posible nga sundon man kita sang iban. Dumduma nga bangod sang malain nga report sang napulo ka espiya, “nagkumod ang tanan nga Israelinhon kay Moises.” (Num. 13:31–14:4) Pero kon ginadayaw naton kag ginapasalamatan ang iban, makabulig ini para mangin malipayon ang tanan. Sigurado kita nga napalig-on gid ang anak nga babayi ni Jefte nga magpadayon sa iya asaynment bangod pirme sia ginadayaw sang iya mga abyan nga babayi. (Huk. 11:40) Si Sara nga ginsambit kaina nagsiling, “Kon ginadayaw naton kag ginapasalamatan ang iban, ginapabatyag naton sa ila nga palangga sila ni Jehova kag may mabulig sila sa iya organisasyon.” Gani mangita  sang kahigayunan nga madayaw mo kag mapasalamatan ang imo mga kauturan.

18. Base sa Salmo 15:1, 2, ngaa dapat kita maghambal sing matuod, kag ano ang nalakip sa sini?

¹⁸ Maghambal sing matuod. Indi malipay sa aton si Jehova kon nagabinutig kita. Ginadumtan niya ang tanan nga klase sang pagbutig. (Hulu. 6:16, 17) Bisan pa madamo nga tawo subong ang nagasiling nga normal na lang ang pagbutig, wala naton ini ginahimo kay nagsiling si Jehova nga sala ini. (Basaha ang Salmo 15:1, 2.) Magluwas nga ginalikawan naton ang pagbutig, ginalikawan man naton ang hungod nga indi pagsugid sang pila ka impormasyon sa tuyo nga mangin sala ang konklusion sang iban.

19. Ano pa ang dapat naton likawan?

¹⁹ Likawi ang pagpalapta sang kutsokutso. (Hulu. 25:23; 2 Tes. 3:11) Ginpaathag ni Juliet, nga ginsambit kaina, kon paano sia naapektuhan sang kutsokutso. Nagsiling sia: “Makapaluya ang pagpamati sa kutsokutso, kag nagakadula man ang akon pagsalig sa tawo nga nagakutsokutso. Kay man, paano ko masigurado nga wala man niya ako ginakutsokutso sa iban?” Kon matalupangdan naton nga nagapakadto na sa kutsokutso ang pag-istoryahanay, panikasugi nga maghambal sang makapalig-on nga topiko.—Col. 4:6.

20. Ano ang gusto mo nga panikasugan nga himuon parte sa imo ikasarang sa paghambal?

²⁰ Bangod normal na lang sa madamo nga tawo subong ang malaw-ay nga panghambal, dapat gid naton panikasugan nga malipay si Jehova sa aton paagi sang paghambal. Tandai nga regalo ni Jehova ang aton ikasarang sa paghambal, kag importante sa iya kon paano naton ini ginagamit. Pakamaayuhon niya kita kon panikasugan naton nga makadayaw sa iya ang aton paagi sang paghambal kon nagabantala kita, kon naga-attend kita sa mga miting, kag kon nagaistorya kita sa iban. Kon laglagon na ni Jehova ining malain nga kalibutan, mangin mahapos na sa aton nga padunggan si Jehova sa aton paagi sang paghambal. (Jud. 15) Samtang ginahulat naton ina nga tion, panikasugi nga malipay si Jehova sa ‘imo ginahambal.’—Sal. 19:14.