1. Hereva karana be daika amo ia mai harihari gauna?

 HEREVA karana be iseda lalokau Diravana ese ia henia harihari gauna. Dirava ese tau ginigunana, Adamu, ia karaia neganai, ia be hereva ta ta ia gaukaralaia ena guba Tamana ida ia herevahereva totona. Ia ese hereva matamatadia ia gaukaralaia danu. Adamu be unai dala ai animal edia ladana ta ta ia henia. (Gen. 2:19) Bona nega ginigunana ena adavana hairaina, Heva, ia hereva henia neganai, ia moale bada!​—Gen. 2:22, 23.

2. Idaunegai bona hari, edena dala ai taunimanima ese hereva karana idia gaukaralaia kerere?

² Haida ese edia harihari gauna, hereva karana unai, idia gaukaralaia kerere. Satani Diabolo ese Heva ia koia, bona unai ese taunimanima dekenai kara dika bona goevadae lasi maurina ia havaraia. (Gen. 3:1-4) Adamu be kerere ia karaia neganai, Heva bona Iehova dekenai bleim ia atoa, unai amo iena hereva karana ia gaukaralaia kerere. (Gen. 3:12) Kaino ese ena tadina Abela ia hamasea murinai, Iehova dekenai ia koikoi. (Gen. 4:9) Lameka ena ane herevadia ese ia hahedinaraia, iena nega ai dagedage taudia idia noho danu. (Gen. 4:23, 24) Hari taunimanima edia kara be edena bamona? Nega haida politikol gunalaia taudia be hereva dikadia gaukaralaia totona idia hemarai lasi. Bona hari muvi momo ai hereva dikadia idia gaukaralaia. Sikuli bona gaukara gabudia ai momo be hereva dikadia idia gwauraia. Hari, hereva dikadia gaukaralaia karana be ia bada ia lao, unai ese ia hahedinaraia tanobada be ia dika momokani.

3. Dahaka dainai ita naria namonamo, bona inai atikol ai dahaka do ita herevalaia?

³ Bema ita naria namonamo lasi, reana ita kamonai loulou hereva dikadia ita gaukaralaia matamaia diba. Oibe, ita be  Keristani taudia dainai, ita ura Iehova ita hamoalea, bona ita ura lasi hereva dikadia ita gaukaralaia. Ita ura iseda harihari gauna, hereva karana, ita gaukaralaia Dirava ita hanamoa totona. Inai atikol ai, unai ita karaia dalana do ita herevalaia, (1) haroro gaukara ai, (2) kongrigeisen heboudia ai, bona (3)  iseda herevahereva karana ai. To ginigunana be, Iehova ese iseda hereva karana ia laloa bada ena badina ita herevalaia.

4. Malaki 3:16 hegeregerena, dahaka dainai Iehova ese iseda hereva karana ia laloa bada?

⁴ Malaki 3:16 duahia. Iehova ese ia laloatao taudia edia ladana be iena “buka ai” ia torea. Unai taudia be edia hereva karana amo idia hahedinaraia ia idia gari henia bona iena ladana idia laloa bada. Dahaka dainai Iehova be unai bamona ia karaia? Iseda kudouna ai idia noho gaudia be eda hereva amo ita hahedinaraia. Iesu ia gwau: “Kudouna ai idia honu gaudia be uduna ese ia gwauraia.” (Mat. 12:34) Ita gwauraia herevadia ese ia hahedinaraia Iehova ita lalokau henia bada. Bona Iehova ia ura ia idia lalokau henia taudia be tanobada matamatana ai mauri hanaihanai do idia moalelaia.

5. (a) Edena dala ai eda hereva dalana ese iseda tomadiho karana ia hahedinaraia? (b) Laulau hegeregerena, dahaka dainai iseda hereva dalana ita naria namonamo?

⁵ Iseda hereva dalana ese ia hahedinaraia, Iehova be iseda tomadiho karana do ia abia dae eiava lasi. (Iam. 1:26) Dirava idia lalokau henia lasi taudia haida be badu bona hekokoroku dalanai idia hereva. (2 Tim. 3:1-5) Ita ura lasi idia ita tohotohoa. Ita ura bada eda hereva karana amo Iehova ita hamoalea. Bema Keristani heboudia eiava haroro gaukara ai hereva namodia ita gaukaralaia, to ruma dekenai badu bona lalokau lasi dalana ai iseda famili ita hereva henia, Iehova be unai kara ia moalelaia, a?​—1 Pet. 3:7.

6. Kimberly ena hereva dalana ia naria namonamo dainai, dahaka ia vara?

⁶ Iseda hereva dalana ita naria namonamo neganai, ita hahedinaraia ita be Iehova ita tomadiho henia. Bona unai ese ma haida ia durua “Dirava ia hesiai henia tauna  bona ia hesiai henia lasi tauna” ena idau idia itaia totona. (Mal. 3:18) Taihu ta ladana Kimberly dekenai unai bamona ia vara. b Ia be ena klas kekenina ta ida sikuli asainmen totona idia gaukara hebou. Unai murinai, ena turana ese ia itaia Kimberly be stiuden haida amo ia idau. Ia be taunimanima ia maumauraia lasi, mai hemataurai ida ia hereva, bona hereva dikadia ia gaukaralaia lasi. Kimberly ena klas turana ia hoa bona gabeai Baibel ia stadilaia matamaia. Oibe, iseda hereva dalana amo taunimanima ita veria hereva momokani idia dibaia neganai, Iehova ia moale bada!

7. Dirava ena harihari gauna, hereva karana, be edena bamona oi ura gaukaralaia?

⁷ Ita ibounai ita ura eda hereva dalana amo Iehova ita hanamoa bona iseda tadikaka taihu ita tura henia namonamo. Dala haida do ita herevalaia, unai ese ita do ia durua iseda hereva karana dekenai “haheitalai namona” ita hahedinaraia noho.

8. Haroro gaukara ai Iesu be ena hereva ia gaukaralaia dalana amo dahaka ita dibaia?

⁸ Haida ese oi idia habadua neganai, manau bona hemataurai dalanai oi hereva. Iesu be tanobada ai ia noho neganai, taunimanima idia gwau ia be inuinu kekero bona aniani momo tauna, Diabolo ena gaukara ia karaia, Sabati taravatuna ia badinaia lasi, bona Dirava ia matauraia lasi. (Mat. 11:19; 26:65; Luka 11:15; Ioa. 9:16) To, Iesu be badu dalanai idia ia hereva henia lasi. Iesu hegeregerena, ma haida ese ita idia hereva auka henia neganai, badu dalanai idia ita hereva henia lasi. (1 Pet. 2:21-23) Oibe, unai bamona ita karaia be auka. (Iam. 3:2) To dahaka ese ita do ia durua?

9. Haroro gaukara ita karaia neganai, dahaka ese ita do ia durua eda hereva dalana ita naria namonamo totona?

⁹ Haroro gaukara ai ta ese oi ia hereva auka henia neganai, namo lasi oi badu. Tadikaka ta ladana Sam ia gwau, “Lau laloa bada gauna be, ruma tauna ese hereva momokani do ia kamonai bona ena mauri do ia haidaua.” Nega haida ruma tauna ia badu badina nega kererena ai ita haroro henia. Taihu Lucia ese haroro gaukara ai badu tauna ta ia davaria neganai, ia be Iehova dekenai guriguri kwadogina ia gwauraia, ia do ia durua manau bona hemataurai dalanai ia hereva totona. Haroro gaukara ai ta ia badu neganai, Lucia ena haheitalai ita tohotohoa be namo.

10. Timoteo Ginigunana 4:13 hegeregerena, iseda tahua gauna be dahaka?

¹⁰ Hadibaia tauna namona ai oi lao. Timoteo be haroro gaukara ia karaia namonamo, to ena hadibaia dalana ia hanamoa noho be namo. (1 Timoteo 4:13 duahia.) Edena dala ai hadibaia tauna namona ai ita lao? Namona  be ita hegaegae namonamo. Ita moale badina tulu idauidau idia noho, unai ese ita ia durua hadibaia tauna namona ai ita lao totona. Inai buklet Duahiduahi Bona Hadibaia Karana Oi Hanamoa bona Iseda Haroro Bona Mauri Dalana​—Hebou Pepana ai inai kahana “Emu Haroro Dalana” ese oi do ia durua. Unai tulu namodia oi gaukaralaia, a? Ita hegaegae namonamo neganai, mai gari lasi ida do ita hereva.

11. Edena dala ai Keristani taudia haida edia hadibaia dalana be namo herea?

¹¹ Kongrigeisen ai ma haida amo diba ita abia neganai, unai ese ita do ia durua hadibaia tauna namona ai ita lao totona. Paragraf gunanai ita herevalaia tadikaka, Sam, be sibona ia nanadaia dahaka dainai Keristani taudia haida edia hadibaia dalana be namo herea. Ia ese edia hadibaia daladia ia kamonai namonamo bona idia ia tohotohoa. Taihu ta ladana Talia ese pablik tok idia henia tadikaka edia hereva dalana ia kamonai namonamo, unai ese ia durua haroro gaukara ai momo ese idia henia henanadai ia haerelaia namonamo totona.

12. Haida dekenai ia auka dahaka idia karaia totona?

¹² Ane ita abia badabada bona haere ita henia karana amo kongrigeisen heboudia ita durua. (Sal. 22:22) Haida dekenai ia auka hebou ai ane idia abia eiava haere idia henia totona. Oi dekenai unai ia vara, a? Bema oibe, ma haida ese unai gari karana idia hanaia dalana oi diba be namo.

13. Dahaka ese oi ia durua hebou dekenai mai kudouna ibounai ida ane oi abia totona?

¹³ Mai kudouna ibounai ida ane abia. Hebou dekenai ane ita abia ena badina badana be, Iehova ita hanamoa. Taihu ta ladana Sara ia laloa ena gadona be namo lasi ane ia abia totona. To, ia ura ane amo Iehova ia hanamoa. Unai dainai, hebou gaudia ia hegaegaelaia neganai, ane ia praktis danu. Bona ane herevadia be hebou ai do idia herevalaia gaudia ida ia hahegeregerea. Ia gwau: “Unai ese lau ia durua ane herevadia lau laloa bada bona ane lau abia namonamo eiava lasi lau laloa bada lasi.”

14. Bema haere oi henia totona oi gari, dahaka ese oi do ia durua?

¹⁴ Hanaihanai haere oi henia. Ita gwau diba, haida dekenai unai be auka. Matamanai ita herevalaia taihu, Talia, ia gwau, “Taunimanima vairanai lau hereva neganai, lau gari bada. Unai dainai haere lau henia totona be auka.” To, unai ese Talia ia koua lasi haere ia henia totona. Hebou totona ia hegaegae negadiai, ia laloatao do ia henia haere ginigunana be kwadogi, bona henanadai ena haere sibona. Ia gwau: “Lau henia haere ia kwadogi, auka lasi, bona point badana  lau hahedinaraia, badina stadi naria tauna be unai bamona haere ia ura.”

15. Haere ita henia totona, dahaka ita laloatao be namo?

¹⁵ Ena be Keristani taudia haida be idia hemarai lasi, to nega haida idia ura lasi haere idia henia. Dahaka dainai? Taihu ta ladana Juliet ia gwau: “Nega haida lau ura lasi haere lau henia, badina lau gari egu haere be kwadogi bona haere maorona lasi.” To, namona be ita laloatao Iehova ia ura haere namodia ita henia. c Ena be nega haida ita gari, to ita hekwarahi hebou dekenai haere ita henia neganai, Iehova ia moale bada.

16. Edena bamona herevadia ita dadaraia be namo?

¹⁶ “Hadikaia herevadia” ita gwauraia lasi. (Efe. 4:31) Matamanai ita herevalaia bamona, Keristani tauna ese hadikaia herevadia ia gwauraia lasi be namo. Danu, iseda hereva dalana ita naria namonamo. Hegeregere, tano eiava bese ma ta amo idia mai taudia ita herevalaia neganai, namo lasi ma haida ida ita hahegeregerea. Danu, ita ura lasi ita gwauraia herevadia ese idia ia hahisia. Tadikaka ta ia gwau: “Lau laloa nega haida lau gwauraia herevadia be kiri gauna sibona bona ta do ia hahisia lasi. To, unai be maoro lasi, badina ma ta ena hemami lau hadikaia. Lagani momo lalonai, egu adavana ese lau ia durua bada, badina sibona ai noho negadiai lau ia hamaoroa lau herevalaia gaudia be maoro lasi bona ia bona ma haida ia hahisia danu.”

17. Efeso 4:29 hegeregerena, edena dala ai ma haida ita hagoadaia?

¹⁷ Ma haida ia hagoadaia herevadia oi gwauraia. Hanamoa herevadia ita gwauraia, to hadikaia eiava maumau herevadia ita gwauraia lasi. (Efeso 4:29 duahia.) Israela taudia be gau namodia momo dainai tanikiu karana idia hahedinaraia diba, to nega momo idia maumau. Ita maumau momo neganai, ma haida ese ita do idia tohotohoa. Namona be ita laloatao spai taudia 10 ese idia gwauraia sivarai dikana dainai, “Israela taudia ibounai be Mose . . . idia maumauraia.” (Num. 13:31–14:4) To, hanamoa herevadia gwauraia karana ese namo ia havaraia. Ita diba Iapeta ena natuna kekeni be ena turana edia hanamoa herevadia ese ia hagoadaia ena asainmen ia karaia noho totona. (Hah. 11:40) Matamanai ita herevalaia taihu, Sara, ia gwau, “Ma haida dekenai hanamoa herevadia ita gwauraia neganai, do idia mamia Iehova bona tadikaka taihu ese idia lalokau henidia.” Unai dainai, dala ita tahua iseda tadikaka bona taihu dekenai hanamoa herevadia ita gwauraia totona.

18. Salamo 15:1, 2 hegeregerena, dahaka dainai ita hereva momokani, bona dahaka ita karaia lasi be namo?

 ¹⁸ Hereva momokani gwauraia. Bema hereva momokani ita gwauraia lasi, Iehova ita hamoalea diba lasi. Ia ese koikoi karadia ibounai ia inai henia. (Aon. 6:16, 17) Taunimanima momo idia laloa koikoi herevadia gwauraia karana be kerere lasi, to unai ita dadaraia badina Iehova ese unai kara ia inai henia. (Salamo 15:1, 2 duahia.) Oibe, ita be koikoi herevadia ita gwauraia lasi, bona ita ura lasi ita herevalaia gaudia ese ma haida dekenai lalohadai kererena ia henia danu.

19. Dahaka kara dekenai ita naria namonamo be namo?

¹⁹ Udu mauri karana dadaraia. (Aon. 25:23; 2 Tes. 3:11) Ataiai ita herevalaia taihu, Juliet, be udu mauri karana ese ia hahisia dalana ia herevalaia. Ia gwau: “Udu mauri herevadia lau kamonai neganai, unai ese egu lalona ia hahisia bona lau ura lasi unai bamona taudia lau abidadama henia. Reana ma haida dekenai egu ladana idia hadikaia danu?” Bema herevahereva karana lalonai udu mauri herevadia oi kamonai, namona be hagoadaia herevadia oi gwauraia.​—Kol. 4:6.

20. Emu lalona oi hadaia dahaka oi karaia totona?

²⁰ Inai tanobada ai, hereva dikadia gaukaralaia karana ia bada dainai, ita hekwarahi iseda hereva amo Iehova ita hamoalea be namo. Laloatao, iseda hereva karana be Iehova ena harihari gauna, bona ita gaukaralaia dalana ia laloa bada. Haroro gaukara, hebou, bona dina ta ta herevahereva karana lalonai, ita hekwarahi Iehova hanamoa herevadia ita gwauraia neganai, ita do ia hanamoa. Iehova ese inai tanobada dikana ia haorea neganai, do ia auka lasi iseda hereva amo Iehova ita hanamoa totona. (Iuda 15) To, hari iseda lalona ita hadaia “[Eda] uduna herevadia” amo Iehova ita hamoalea totona.​—Sal. 19:14