1. Ari ni penatai penau bejaku?

 JEHOVAH meri kitai penau bejaku. Pengudah mensia ti keterubah iya nya Adam digaga, iya ulih bejaku enggau Jehovah. Ketegal iya bisi penau bejaku, iya ulih ngaga leka jaku ti baru. Ketegal penau nya mega, iya ulih meri nama ngagai semua jelu. (P-kal. 2:19) Iya tentu gaga ati lebuh iya keterubah kali bejaku enggau mensia ke bukai iya nya bini iya Awa!—P-kal. 2:22, 23.

2. Kenyau ari menya nyentukka diatu, baka ni penau bejaku dikena enggau chara ti salah?

² Penau bejaku dikena enggau chara ti salah. Sitan nipu Awa lalu ngujungka mensia bedosa sereta enda sempurna. (P-kal. 3:1-4) Adam ngena penau bejaku nya enggau chara ti salah lebuh iya nyalahka Awa sereta Jehovah taja pan nya penyalah iya empu. (P-kal. 3:12) Kain bula ngagai Jehovah pengudah iya munuh Abel. (P-kal. 4:9) Pengudah nya, seiku peturun Kain ke benama Lamek ngaga siti pantun. Pantun nya nunjukka orang maya nya amat jai. (P-kal. 4:23, 24) Baka ni enggau kemayaharitu? Tuai politik ngena jaku ti kamah ba mua orang mayuh. Mayuh cherita wayang kemayaharitu ngena jaku ti jai. Bala nembiak ningaka jaku kamah ba sekula. Lalu orang ke besai  tuai mega ningaka jaku kamah ba endur gawa. Sinu amat, jaku ti jai kemayaharitu suah didinga. Nya alai, tu nunjukka standard moral dunya majak jai.

3. Nama utai ke enda patut digaga kitai, lalu nama utai ke deka dikerandauka kitai ba artikel tu?

³ Enti enda bejimat, kitai engka berengkah ngena jaku ti jai ketegal kitai teleba ninga jaku ti jai. Laban kitai orang Kristian, kitai deka ngelantangka ati Jehovah. Nya alai, kitai enggai ngena jaku ti jai. Kitai deka ngena pemeri bejaku enggau chara ti manah kena muji Petara. Ba artikel tu, kitai deka berandauka baka ni kitai ulih ngereja nya (1) ba pengawa nginjil, (2) ba gempuru, sereta (3) ba jaku kitai ninting hari. Keterubah iya, aram kitai berandauka kebuah Jehovah ibuhka chara kitai ngena penau bejaku.

4. Nitihka Malaki 3:16, nama kebuah Jehovah ibuhka chara kitai ngena penau bejaku?

⁴ Bacha Malaki 3:16. Kati nuan nemu kebuah Jehovah nulis nama orang ke bejaku enggau chara ti nunjukka sida nangi sereta bebasaka Iya “dalam siti bup?” Tu ketegal, jaku kitai nunjukka utai ke bisi ba ati kitai. Ku Jesus: “Laban mulut kita nyebut utai ti ngemenuhka ati kita.” (Mat. 12:34) Utai ke disebut kitai nunjukka naka ni penalam pengerindu kitai ngagai Jehovah. Jehovah dekaka orang ke rinduka Iya idup lantang belama iya ba dunya ti baru.

5. (a) Nama kaul entara sembah kitai enggau chara kitai bejaku? (b) Baka ke diayanka ba gambar, nama kebuah kitai patut bejimat enggau chara kitai bejaku?

⁵ Chara kitai bejaku nentuka sekalika Jehovah nerima sembah kitai tauka enda. (Jas. 1:26) Orang ke enda rinduka Jehovah bejaku enggau chara ti kasar, sumbung sereta mangah. (2 Tim. 3:1-5) Kitai enggai nyadi baka sida. Kitai keran deka ngelantangka ati Jehovah ari jaku kitai. Taja pia, uji perundingka tu: Lebuh ba gempuru Kristian tauka ba pengawa nginjil, kitai ngena jaku ti siru sereta manah. Tang lebuh enda dipeda orang bukai, kitai ngena jaku ti kasar enggau diri sebilik. Kati Jehovah lantang ati enggau chara kitai bejaku nya?—1 Pet. 3:7.

6. Nama asil iya lebuh Kimberly bejaku enggau manah?

 ⁶ Lebuh kitai ngena pemeri bejaku enggau manah, kitai nunjukka diri penyembah Jehovah. Kitai nulung orang ke ngelingi kitai meda “bida entara orang ke lurus enggau orang ke jai.” (Mal. 3:18) Tu meh utai ke nyadi ba Kimberly. b Iya bisi pengawa sekula enggau seiku indu ke sekelas enggau iya. Pengudah gawa begulai, indu nya sedar Kimberly enda sebaka enggau nembiak bukai. Tu ketegal Kimberly enda bejakuka orang. Iya bejaku enggau chara ti manah lalu enda ngena jaku ti kamah. Indu ke sekelas enggau Kimberly rindu enggau chara iya bejaku. Asil iya, indu nya setuju deka belajarka Bup Kudus. Jehovah rindu lebuh kitai bejaku enggau manah laban tu ulih narit ati orang ngagai pemendar!

7. Nama deka digaga nuan enggau penau bejaku ke diberi Petara?

⁷ Kitai deka semua jaku ngemuliaka Petara sereta ngerapatka kaul kitai enggau bala menyadi Kristian. Aram kitai berandauka sekeda chara ngambika kitai ulih terus nyadi teladan ari jaku.

8. Nama teladan Jesus ti manah pasal chara bejaku lebuh nginjil?

⁸ Bejaku enggau manah sereta basa lebuh orang ngasuh nuan ringat. Lebuh ba dunya, orang nuduh Jesus pemabuk, bam, bekerejasama enggau Sitan, enda ngasika adat Hari Sabat sereta enda bebasaka Petara. (Mat. 11:19; 26:65; Luk. 11:15; Jhn. 9:16) Tang, Jesus enda malas enggau jaku ti kasar. Baka Jesus, kitai enggai malas lebuh orang bejaku kasar enggau kitai. (1 Pet. 2:21-23) Tang tu enda senang dikereja. (Jas. 3:2) Nama ulih nulung kitai?

9. Nama ulih nulung kitai nagang jaku lebuh ba pengawa nginjil?

⁹ Anang meh pedis ati lebuh orang bejaku enda manah ngagai nuan maya nginjil. Seiku menyadi lelaki ke benama Sam madah, “Aku berundingka orang ke bempu rumah ke amat begunaka pemendar sereta ulih ngaga ubah.” Kekadang orang engka nganu kitai laban kitai datai ba maya ti salah. Lebuh kitai betemu enggau orang ke ringat ngagai kitai, kitai ulih neladan seiku menyadi indu ke benama Lucia. Kitai ulih besampi minta Jehovah nulung kitai enda ringat lalu nagang diri ari nyebut utai ti enda manah tauka enda bebasa.

10. Nitihka 1 Timoti 4:13, nama juluk ati ke patut dikembuan kitai?

¹⁰ Nyadi pengajar ti landik agi. Timoti seiku pengajar ti landik, tang iya agi patut ngemansangka chara iya ngajar. (Bacha 1 Timoti 4:13.) Baka ni kitai ulih nyadi pengajar ti landik agi ba pengawa nginjil? Kitai patut nyediaka diri enggau manah. Kitai bisi mayuh perengka  kena nulung kitai nyadi pengajar ti landik agi. Nuan ulih tetemuka mayuh penerang ti beguna ari brosur Ngemanahka Agi Chara Macha enggau Ngajar sereta begian “Ngemanahka Agi Chara Kitai Nginjil” ba Pengidup enggau Pengawa Kristian Kitai—Bup Kereja Kena Gempuru. Kati nuan bisi ngena litaricha ke disediaka tu? Enti kitai nyediaka diri enggau manah, kitai enda entu berasai takut sereta ulih bejaku enggau manah.

11. Baka ni sekeda menyadi Kristian ulih nyadi pengajar ti landik agi?

¹¹ Kitai ulih nyadi pengajar ti landik agi lebuh beratika menyadi Kristian ba eklisia sereta belajar ari sida. Sam, ke disebut tadi, nanya diri empu nama utai ti ngasuh bala menyadi nyadi pengajar ti landik agi. Iya belajar ari chara sida ngajar sereta nunda sida. Seiku menyadi indu ke benama Talia beratika chara bala menyadi lelaki nerangka poin lebuh meri cheramah. Ari nya, iya belajar chara nerangka siti-siti topik ke suah ditanya orang lebuh nginjil.

12. Nama sekeda penanggul ke ditapi bala menyadi Kristian?

¹² Semua kitai ulih sama belagu sereta meri saut ti manah ba gempuru. Enggau nya, kitai ulih ngasuh gempuru kitai bejalai enggau manah. (Mas. 22:22) Tang sekeda orang tusah deka belagu sereta meri komen ba gempuru. Kati nuan ngasaika nya? Enti pia, peneleba sida ke udah mutarka asai ati ti nangi deka belagu sereta meri saut ba gempuru ulih nulung nuan.

13. Nama ulih nulung nuan belagu enggau pengabis ati ba gempuru?

¹³ Belagu enggau pengabis ati. Kebuah ti pemadu beguna kitai deka belagu ba gempuru laban nya meri puji ngagai Jehovah. Seiku menyadi indu ke benama Sara ngumbai diri enda entu landik belagu. Tang iya deka muji Jehovah ngena lagu. Nya alai sebedau begempuru, Sara ukai semina nyediaka komen aja, tang iya mega bebendar belatih belagu. Sara berunding baka ni lirik lagu nya bekaul enggau utai ke dipelajar ba gempuru. Sara madahka: “Lebuh aku berundingka reti leka lagu nya, aku enda kelalu irau enggau pengelandik aku belagu.”

14. Nama ulih nulung nuan meri saut ba gempuru enti nuan orang ti pemalu?

¹⁴ Seruran meri saut. Sekeda orang berasai tusah deka meri saut. Talia ke disebut ba pun tadi madahka: “Aku balat kesal lebuh bejaku ba mua orang mayuh. Tang mayuh orang enda nemu laban munyi nyawa aku enda getar-getar. Nya alai, meri saut nya amat tusah ba aku.” Taja pia, nya enda nagang Talia meri saut. Lebuh iya nyediaka diri sebedau begempuru, iya selalu ingat saut ti keterubah  patut pandak sereta terus nyaut ari tanya ba genteran nya. Iya madah: “Enda ngawa enti saut aku pandak, senang sereta terus nyaut utai ke ditanya ba genteran nya. Kebendar iya, nya meh saut ti dikedekaka menyadi ke ngiring.”

15. Nama patut dikingatka kitai pasal saut kitai?

¹⁵ Indah kekadang bisi menyadi ke enda pemalu mega tusah deka meri saut. Nama kebuah? Seiku menyadi indu ke benama Juliet madah: “Kadang-kadang aku kakang ati deka meri saut laban ngasaika saut aku kelalu mudah sereta enda chukup manah.” Tang kingatka, Jehovah deka kitai enggau naka ulih meri saut, taja pan nya pandak aja. c Jehovah amat gaga ati enti kitai enggau naka ulih meri saut lalu enda ngelakka asai ati ti takut nagang kitai ngereja nya.

16. Nama sekeda chara bejaku ke patut diseliahka kitai?

¹⁶ Seliahka ari “bejakuka orang.” (Eps. 4:31) Baka ke dipadah ba pun tadi, orang Kristian patut nyeliahka jaku ti kamah. Tang bisi gaya bejaku ke enda manah ti enda entu diperatika kitai. Ambika chunto, kitai patut bejimat lebuh bejaku pasal gaya pengidup, bansa, enggau menua orang bukai ngambika enda mandingka sida. Pia mega, kitai enggai sekali-kali ngemediska ati orang enggau jaku ti ngemaruhka sida. Seiku menyadi lelaki ngaku: “Aku ngumbai utai ke disebut aku ngasuh orang ketawa. Tang kebendar iya, jaku aku enda manah sereta ngemediska ati orang bukai. Bini aku udah mayuh kali terus terang madah ngagai aku lebuh kami kediri pasal jaku aku ti ngemediska ati iya enggau ati orang.”

17. Nitihka Epesus 4:29, baka ni kitai ulih meransang orang bukai?

¹⁷ Bejaku enggau chara ti meransang orang bukai. Manah agi enti nuan jampat deka muji orang ari ngutuk orang sereta mutap. (Bacha Epesus 4:29.) Kelia menya, orang Israel bisi mayuh kebuah patut beterima kasih, tang sida suah agi mutap. Enti kitai suah mutap, tu ulih ngasuh orang bukai deka nunda kitai lalu berengkah mutap. Nuan tentu agi ingat pasal sepuluh iku pematau ke meri riput ti enda manah. Ketegal tu ‘orang Israel mutap ngelaban Moses.’ (P-pau. 13:31–14:4) Tang enti kitai muji orang, tu ulih ngasuh tiap iku orang gaga ati. Ambika chunto, anak indu Jeptah seruran nerima jaku puji ari bala kaban indu iya. Jaku puji nya tentu meransang iya ngereja pengawa iya. (P-ulu. 11:40) Sara, ke disebut tadi madah: “Lebuh kitai muji orang bukai, kitai ngasuh sida berasai dikerinduka Jehovah sereta nemu diri berega ba gerempung Jehovah.”  Nyadi, giga meh peluang muji bala menyadi Kristian nuan.

18. Nitihka Masmur 15:1, 2, nama kebuah kitai patut nyebut utai ti amat, lalu tu nyengkaum nama?

¹⁸ Nyebut utai ti amat. Kitai enda ulih ngelantangka ati Jehovah enti kitai nyebut utai ti enda amat. Iya begedika semua pemula. (J-lam. 6:16, 17) Taja pan mayuh orang kemayaharitu ngumbai jaku bula nya utai ti biasa, tang kitai patut nyeliahka nya laban nya salah ba mata Jehovah. (Bacha Masmur 15:1, 2.) Endang amat, kitai tentu deka nyeliahka jaku ti bula. Tang kitai mega patut nyeliahka ari ngelalaika sekeda penerang ke ulih ngasuh orang bisi runding ti salah.

19. Nama utai bukai ke patut dikingatka kitai?

¹⁹ Anang ngerembaika gosip. (J-lam. 25:23; 2 Tes. 3:11) Juliet, ke disebut tadi nerangka baka ni gosip udah ngachau iya. Iya madah: “Ninga gosip ngasuh asa ati, lalu tu ngasuh aku enda agi arapka orang ke ngerembaika gosip nya. Pia mega, asai aku, iya mega engka bisi bejakuka aku ba orang bukai.” Enti nuan sedar randau nya nyau berubah nyadi gosip, uji meh nukar randau ngagai randau ke meransang agi.—Kol. 4:6.

20. Nama utai ke keran deka digaga nuan bekaul enggau chara nuan bejaku?

²⁰ Kitai diau ba dunya ke bisi mayuh orang ngena jaku ti jai. Nya alai, kitai patut bebendar ngena jaku ti ngelantangka ati Jehovah. Ingat meh, penau bejaku nya pemeri ari Jehovah lalu Iya ibuhka chara kitai ngena penau nya. Jehovah deka merekatka kitai enti kitai bejaku enggau chara ti mai mulia ngagai Iya ba pengawa nginjil, ba gempuru sereta jaku kitai ninting hari. Pengudah Jehovah ngerusak dunya ti jai tu, kitai senang agi deka ngemuliaka Jehovah nengah jaku kitai. (Jud. 15) Ke diatu, aram meh kitai keran agi nentuka jaku kitai ngelantangka ati Jehovah.—Mas. 19:14.