1. Alabɩ-ɖʋ yɔɔdaɣ kʋjɔʋ?

 YƆƆDAƔ kɛ kʋjɔʋ ŋgʋ kɩlɩnɩ ɖɔ-Ɛsɔ sɔɔlɩm tʋ cɔlɔ yɔ. Alɩwaatʋ ndʋ Ɛsɔ lɩzɩ Aɖam kpaagbaa yɔ, Aɖam pɩzaɣ se ɛlabɩnɩ tʋmɩyɛ tɔm pee nɛ ɛyɔɔdɩnɩ-ɩ. Aɖam pɩzaɣ se elu tɔm pee kɩfana nɛ ɛsɔzɩ wena ɛsɩma yɔ a-yɔɔ. Aɖam labɩ mbʋ, alɩwaatʋ ndʋ ɛhaɣaɣ kpɩna kpeekpe hɩla yɔ. (Kiɖe 2:19) Nɛ ɛ-taa kaalabɩ leleŋ siŋŋ alɩwaatʋ ndʋ ɛyɔɔdɩnɩ ɛyʋ lɛlʋ kajalaɣ ɖeɖe yɔ; ɛnʋ lɛ ɛ-halʋ kɩbanʋ Ɛva.—Kiɖe 2:22, 23.

2. (a) Ɛzɩma tɩyɛ patɩlabɩnɩ tʋmɩyɛ yɔɔdaɣ kʋjɔʋ camɩyɛ caanaʋ taa? (b) Nɛ ɛzɩma paalakɩnɩ-kʋ tʋmɩyɛ camɩyɛ sɔnɔ?

² Alɩwaatʋ pazɩ wayɩ lɛ, patɩlabɩnɩ yɔɔdaɣ kʋjɔʋ ŋgʋ tʋmɩyɛ camɩyɛ. Sataŋ Eleeu cɛtɩ Ɛva, nɛ cɛtɩm mbʋ piyeba nɛ ɛyaa la kɩwɛɛkɩm nɛ patɩtasɩ talʋʋ pilim. (Kiɖe 3:1-4) Aɖam tɩlabɩnɩ tʋmɩyɛ ɛ-nzʋlʋmɩyɛ camɩyɛ alɩwaatʋ ndʋ ɛ-maɣmaɣ ɛ-kɩwɛɛkɩm yɔɔ lɛ, ɛkʋ Ɛva tɔm nɛ halɩ ɛkʋ ɖɔɖɔ Yehowa tɔm yɔ. (Kiɖe 3:12) Kayɩnɩ cɛtɩ Yehowa alɩwaatʋ ndʋ ɛkʋ e-neu Aabɛɛlɩ yɔ. (Kiɖe 4:9) Pʋwayɩ Kayɩnɩ liɖe taa tʋ weyi payaɣ se Laamɛɛkɩ yɔ, ɛmabɩ keɣa nakɛyɛ nɛ kawɩlɩɣ ɛzɩma puuyaɣ lakasɩ kaatɔyɩ ɛ-alɩwaatʋ taa yɔ. (Kiɖe 4:23, 24) Nɛ sɔnɔ yɔ, ɛzɩma pɩwɛɛ? Nabʋyʋ taa, politiki ñʋndɩnaa lakɩnɩ tʋmɩyɛ ɛzaɣtʋ tɔm pee nɛ fɛyɛ ɛɛkpaɣ-wɛ. Sɔnɔ ɛzaɣtʋ tɔm wɛ filimwaa hɔɔlʋʋ sɔsɔʋ taa. Sukulibiya nɩɣ ɛzaɣtʋ tɔm sukuli taa, nɛ sɔsaa ñanɩɣ-tʋ pa-tʋma taa. Ɛzɩma ɛzaɣtʋ tɔm tɔyaa yɔ pɩwɩlɩɣ ɛzɩma ɛjaɖɛ wɛɛkɩ kpem yɔ.

3. (a) Ɛbɛ pɩwɛɛ se ɖɩkpa ɖa-tɩ nɛ ɖɩtaala? (b) Nɛ ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Ye ɖɩtɩkpa ɖa-tɩ yɔ, ɖɩpɩzɩɣ nɛ ɖiwelisiɣ ɛzaɣtʋ tɔm nɛ ɖa-maɣmaɣ ɖɩpaɣzɩ-tʋ labɩnʋʋ tʋmɩyɛ. Toovenim taa lɛ, ɖɩkɛ Krɩstʋ ñɩma nɛ ɖɩsɔɔlaa se ɖɔ-tɔm ɛkɛdɩnɩ Yehowa; pʋyɔɔ lɛ,  ɖɩtɩsɔɔlɩ kaaʋ se ɖɩlabɩnɩ tʋmɩyɛ azuluma tɔm pee. Ðɩsɔɔlaa se ɖɩlabɩnɩ yɔɔdaɣ kʋjɔʋ kɩbaŋʋ ŋgʋ tʋmɩyɛ camɩyɛ, pʋ-tɔbʋʋ se ɖɩsɔɔlaa se ɖɩlabɩnɩ-kʋ tʋmɩyɛ nɛ ɖɩsa ɖɛ-Ɛsɔ. Tɔm ñʋʋ kʋnɛ kɩ-taa, ɖɩkaɣ naʋ ɛzɩma ɖɩpɩzɩɣ nɛ ɖɩlabɩnɩ tʋmɩyɛ yɔɔdaɣ kʋjɔʋ camɩyɛ (1) tɔm susuu taa, (2) ɛgbɛyɛ taa kediɣzisi taa, nɛ (3) alɩwaatʋ ndʋ ɖɩyɔɔdʋʋnɩ ɛyaa lalaa paa evemiye nɖɩ yɔ. Ɛlɛ kajalaɣ lɛ, iyele nɛ ɖɩna mbʋ pʋyɔɔ ɖɔ-yɔɔdaɣ tɔm cɛyɩ Yehowa ɛsɩndaa yɔ.

4. Ɛzɩ Malakiya 3:16 yɔɔdʋʋ yɔ, lɩmaɣzɩyɛ nɖɩ yɔɔ tɔm ndʋ ɖɩyɔɔdʋʋ yɔ, tɩ-tɔm cɛyɩ Yehowa ɛsɩndaa?

⁴ Kalɩ Malakiya 3:16. Ŋpɩzɩɣ ŋmaɣzɩ nɛ ŋna mbʋ pʋyɔɔ Yehowa maɣ mba pɔ-yɔɔdaɣ wɩlɩɣ se pamaɣzɩɣ ɛ-hɩɖɛ yɔɔ nɛ pañaŋɩ-ɩ yɔ pa-hɩla “ɛ-camɩyɛ lakasɩ takayaɣ” taa yɔ? Ðɔ-yɔɔdaɣ wɩlɩɣ mbʋ pɩwɛ ɖa-laŋɩyɛ taa yɔ. Yesu yɔɔdaa se: “Tɔm ndʋ tisuu laŋɩyɛ taa yɔ, ndʋ nɔɔ yɔɔdʋʋ.” (Mat. 12:34) Tɔm ndʋ ɖɩyɔɔdʋʋ yɔ, tɩwɩlɩɣ ɛzɩma ɖɩsɔɔlɩ Yehowa yɔ. Nɛ Yehowa sɔɔlaa se mba pɔsɔɔlɩ-ɩ yɔ panɩɩ wezuu leleŋ tam ɛjaɖɛ kɩfaɖɛ taa.

5. (a) Nɔɔ kʋɖʋmaɣ ŋga wɛ ɖɔ-yɔɔdaɣ nɛ ɖɛ-Ɛsɔ sɛtʋ pɛ-hɛkʋ taa? (b) Ɛzɩ kɩlɛmʋʋ wɩlʋʋ yɔ, tɔm ndʋ pɩwɛɛ se ɖɩtɩlɩ ɖɔ-yɔɔdaɣ yɔɔ?

⁵ Ðɔ-yɔɔdaɣ pɩzɩɣ keyele nɛ ɖɛ-Ɛsɔ sɛtʋ kɛdɩnɩ Yehowa yaa tɩɩkɛdɩɣnɩ-ɩ. (Yak. 1:26) Mba patɩsɔɔlɩ Ɛsɔ yɔ, pa-taa nabɛyɛ ɩɩyɔɔdʋʋnɩ nɔɔ kɩbaŋa, pɔyɔɔdʋʋnɩ pana nɛ tɩ kpazʋʋ. (2 Tim. 3:1-5) Pɩtʋʋ fɛyɩ se ɖɩtɩsɔɔlɩ se ɖɩmaɣzɩnɩ-wɛ. Ðɩsɔɔlɩ siŋŋ se ɖɔ-yɔɔdaɣ ɛkɛdɩnɩ Yehowa. Ɛlɛ ye ɖɩyɔɔdʋʋnɩ nɔɔ kɩbaŋa ɛgbɛyɛ taa kediɣzisi taa yaa tɔm susuu taa, ɛlɛ ɖɩɩyɔɔdʋʋnɩ ɖɔ-hɔʋ taa ñɩma nɛ nɔɔ kɩbaŋa ɖa-ɖɩsɩ taa yɔ, ɛzɩ ɖɔ-tɔm kɛdɩɣnɩ Yehowa?—1 Pɩy. 3:7.

6. Kimberly labɩnɩ ɛ-yɔɔdaɣ tʋmɩyɛ camɩyɛ lɛ, pee kɩbana wena pɩlʋlaa?

⁶ Alɩwaatʋ ndʋ ɖɩlakɩnɩ yɔɔdaɣ kʋjɔʋ tʋmɩyɛ camɩyɛ yɔ, ɖɩwɩlɩɣ ɛyaa lalaa se ɖɩkɛ Yehowa sɛyaa. Ðɩsɩɣnɩ mba pɔcɔ-ɖʋ nɛ pata yɔ se pana tʋkaɣ ŋga kɛwɛ “weyi ɛɖʋʋ Ɛsɔ lɩm nɛ weyi ɛɛɖʋʋ-ɩ lɩm yɔ pɛ-hɛkʋ taa” yɔ kpayɩ kpayɩ. (Mal. 3:18) Payaɣ koobu halɩñɩnʋ nɔɔyʋ se Kimberly; * na ɛzɩma ɛwɩlaa se tɔm ndʋ tɩkɛ toovenim yɔ.  Paaɖʋ ɛ nɛ e-sukuli ɖaŋ taa taabalʋ nɔɔyʋ sukuli taa tʋmɩyɛ naɖɩyɛ se pɛkpɛndɩ nɛ palabɩ-ɖɩ. Pɛkpɛndaa nɛ pala tʋmɩyɛ nɖɩ nɛ pɩtɛ lɛ, e-sukuli ɖaŋ taa taabalʋ ɛnʋ eɖiɣzina se Kimberly wɛ ndɩ nɛ sukulibiya lɛɛsɩ. Ɛtɩyɔɔdɩ tɔm kɩdɛkɛdɩtʋ ɛyaa lalaa yɔɔ pa-wayɩ, ɛyɔɔdɩnɩ nɔɔ kɩbaŋa, nɛ ɛtɩlabɩnɩ tʋmɩyɛ ɛzaɣtʋ tɔm pee. Piitukuni Kimberly sukuli ɖaŋ taa taabalʋ ɛnʋ siŋŋ nɛ pʋwayɩ etisi nɛ ɛpaɣzɩ Bibl kpɛlɩkʋʋ. Yehowa taa lakɩ leleŋ siŋŋ alɩwaatʋ ɖɔ-yɔɔdaɣ hɔŋ ɛyaa nɛ pɩkɔnɩ toovenim taa yɔ.

7. Ɛbɛ ŋsɔɔlaa se ŋlabɩnɩ yɔɔdaɣ kʋjɔʋ ŋgʋ Ɛsɔ labɩ-ŋ yɔ?

⁷ Ða-tɩŋa payɩ ɖɩsɔɔlaa se ɖɔ-yɔɔdaɣ ɛɖʋ Yehowa hɩɖɛ nɛ kɛtɛ keyele nɛ taabalɩyɛ kɩbanɖɛ wɛɛ ɖa nɛ ɖo-koobiya ɖɛ-hɛkʋ taa. Ye mbʋ, lɛɛlɛɛyɔ iyele nɛ ɖɩna nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖiwolo pɩ-yɔɔ nɛ ɖɩkɛ “kɩɖaʋ . . . yɔɔdaɣ taa” yɔ ɩ-taa nɩɩyɩ.

8. Ɛzɩma Yesu labɩnɩ tʋmɩyɛ ɛ-yɔɔdaɣ tɔm susuu taa yɔ, lɔŋ weyi pɩkpɛlɩkɩɣ-ɖʋ?

⁸ Alɩwaatʋ ndʋ pacaɣ-ŋ tɔm yɔ, yɔɔdɩnɩ nɔɔ kɩbaŋa nɛ ñamtʋ. Alɩwaatʋ ndʋ Yesu lakaɣ ɛ-Ɛsɔ sɛtʋ tʋmɩyɛ tɛtʋ yɔɔ yɔ, paacɛtɩnɩ ɛ-taa se ɛkɛ sʋlʋm kpaŋɩyʋ, hiluu tʋ, weyi ɛlakɩ Eleeu tʋmɩyɛ yɔ, weyi ɛɛñaŋ Sabaatɩ yɔ, nɛ weyi ɛyɔɔdʋʋ tɔm kɩdɛkɛdɩtʋ Ɛsɔ yɔɔ yɔ. (Mat. 11:19; 26:65; Luka 11:15; Yoh. 9:16) Paa mbʋ yɔ, Yesu ticosi-wɛ nɛ pana. Ɛzɩ Yesu yɔ, pɩtɩpɔzɩ kaaʋ se ɖicosini pana alɩwaatʋ ndʋ paayɔɔdʋʋnɩ-ɖʋ nɛ nɔɔ kɩbaŋa yɔ. (1 Pɩy. 2:21-23) Ɛlɛ pɩfɛyɩ kɛlɛʋ se ɖicosini nɔɔ kɩbaŋa alɩwaatʋ ndʋ lalaa ɩɩyɔɔdʋʋnɩ-ɖʋ nɛ nɔɔ kɩbaŋa yɔ. (Yak. 3:2) Ɛbɛ pɩzɩɣ nɛ pɩsɩnɩ-ɖʋ?

9. Alɩwaatʋ ndʋ ɖɩwɛɣ tɔm susuu tʋmɩyɛ taa yɔ, ɛbɛ pɩzɩɣ pɩsɩnɩ-ɖʋ nɛ ɖɩcɔnɩ ɖɔ-yɔɔdaɣ yɔɔ?

⁹ Alɩwaatʋ ndʋ ŋwɛɣ tɔm susuu taa yɔ, ye nɔɔyʋ ɛtɩyɔɔdɩnɩ-ŋ nɛ nɔɔ kɩbaŋa yɔ, ñaɣ pana nɛ ŋtaakɔ pana. Payaɣ koobu nɔɔyʋ se Sam, ɛyɔɔdaa se: “Mañakɩ pana se manka ma-lɩmaɣza ɛzɩma pɩcɛyaa kpem se ɖɩɣdʋ ɛnɩɩ toovenim yɔ pɩ-yɔɔ nɛ mɔntɔzʋʋ se ɛpɩzɩɣ nɛ ɛlɛɣzɩ.” Nabʋyʋ taa, ɖɩɣdʋ taa wɩɣ mbʋ pʋyɔɔ yɔ ɖitiwolo alɩwaatʋ kɩbandʋ yɔɔ. Payaɣ koobu halɩñɩnʋ nɔɔyʋ se Lucia. Alɩwaatʋ ndʋ ɛkatɩɣ ɛyʋ weyi ɛkɔ pana yɔ, ɛlakɩ adɩma naayɛ tobi nɛ ɛpɔzɩ Yehowa se ɛsɩnɩ-ɩ nɛ ɛɖɔkɩ ɛ-tɩ nɛ ɛtaayɔɔdɩ tɔm kɩdɛkɛdɩtʋ natʋyʋ yaa kaañamtʋ tɔm. Alɩwaatʋ ndʋ ɖɩkatɩɣ ɛyʋ weyi ɛkɔ pana yɔ, ɖɩpɩzɩɣ nɛ ɖɩla ɛzɩ Lucia lakʋʋ yɔ.

10. Ɛzɩ 1 Timootee 4:13 yɔɔdʋʋ yɔ, kaɖʋwa ŋga pɩwɛɛ se ɖɩwɛɛna?

¹⁰ Pɩsɩ wɩlɩyʋ kɩbanʋ nɛ pɩkɩlɩ. Timootee kaakɛ Krɩstʋ tʋ weyi ɛɛwɛ niye Ɛsɔ sɛtʋ taa yɔ, paa mbʋ yɔ pɩɩpɔzaa se ewolo pɩ-yɔɔ nɛ ɛɖɛɣnɩ ɛsɩndaa fezuu taa. (Kalɩ 1 Timootee 4:13.) Ɛbɛ ɖɩpɩzɩɣ ɖɩla nɛ ɖɩpɩsɩ wɩlɩyaa kɩbama tɔm susuu taa nɛ pɩkɩlɩ? Pɩpɔzʋʋ se ɖɩñɔɔzʋʋ ɖa-tɩ camɩyɛ. Taa leleŋ tɔm  lɛ se ɖɩwɛnɩ wondu ndɩ ndɩ ndʋ tɩpɩzɩɣ tɩsɩnɩ-ɖʋ nɛ ɖɩpɩsɩ wɩlɩyaa kɩbama nɛ pɩkɩlɩ yɔ. Ŋkaɣ naʋ lɔŋ tasʋʋ kɩbam Ka ñʋʋ nɛ tɔm kalʋʋ nɛ tɔm wɩlʋʋ hatʋ cabɩ takayaɣ taa nɛ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kpɛlɩkʋʋ takayaɣ tɛ hɔɔlʋʋ “Falɩsɩ ña-tɩ nɛ ŋsusi tɔm camɩyɛ” taa. Ŋwɛɛ nɛ ŋlakɩnɩ tʋmɩyɛ wondu ndʋ? Alɩwaatʋ ndʋ ɖɩñɔɔzʋʋ ɖa-tɩ camɩyɛ yɔ, sɔɔndʋ ɛɛkɩlɩɣ-ɖʋ kpaʋ; nɛ ɖɩyɔɔdʋʋnɩ kaalɛyɩtʋ nɛ pɩkɩlɩ.

11. Ɛzɩma Krɩstʋ ñɩma nabɛyɛ laba nɛ papɩsɩ wɩlɩyaa kɩbama nɛ pɩkɩlɩ?

¹¹ Pɩtasɩ lɛ, ye ɖɩcɔŋnɩ ɛgbɛyɛ taa ñɩma lalaa nɛ ɖɩkpɛlɩkɩɣ lɔŋ pɔ-cɔlɔ yɔ, ɖɩpɩzɩɣ nɛ ɖɩpɩsɩ wɩlɩyaa kɩbama nɛ pɩkɩlɩ. Sam weyi ɖɩyɔɔdɩ ɛ-tɔm nɛ pɩɖɛɛ yɔ, ɛpɔzɩ ɛ-tɩ tɔm se ɛna mbʋ pɩsɩnɩ Krɩstʋ ñɩma nabɛyɛ nɛ pɛkɛ wɩlɩyaa kɩbama yɔ. Ɛkpɛlɩkɩ nʋmɔŋ weyi ɩ-yɔɔ patɩŋɩɣna nɛ pawɩlɩɣ tɔm yɔ nɛ ɛñaɣ pana nɛ ɛmaɣzɩnɩ-wɛ. Payaɣ koobu halɩñɩnʋ nɔɔyʋ se Talia, ewelisini koobiya mba pɛwɛ niye samaɣ taa tɔm yɔɔdʋʋ taa yɔ camɩyɛ. Ɛlabɩ mbʋ lɛ, ɛkpɛlɩkɩ ɛzɩma ɛla kɛdaɣ pɩlɩɩnɩ tɔm ndʋ ɛyaa pɔzʋʋ ɖoŋ ɖoŋ tɔm susuu taa yɔ tɩ-yɔɔ yɔ.

12. Kala wena nabɛyɛ katɩɣ?

¹² Ye ɖa-tɩŋa payɩ ɖiteɣ hendu, nɛ ɖɩñɔɔzʋʋ ɖa-tɩ camɩyɛ se ɖicosi tɔm kediɣzisi taa yɔ, ɖɩpɩzɩɣ ɖɩɖʋ nesi nɛ ɖɛ-ɛgbɛyɛ taa kediɣzisi ɖɔ camɩyɛ. (Keɣa 21:23) Pɩwɛ nabɛyɛ kaɖɛ se petee hendu yaa pocosi tɔm ɛyaa taa. Pɩwɛ ña ɖɔɖɔ kaɖɛ na? Ye pɩwɛ-ŋ kaɖɛ yɔ, pɩkaɣ-ŋ kɛdɩnʋʋ se ŋna mbʋ pɩsɩnɩ lalaa nɛ pawa pɔ-sɔɔndʋ yɔ.

13. Ɛbɛ pɩzɩɣ pɩsɩnɩ-ŋ nɛ ŋtee hendu nɛ ña-laŋɩyɛ pilim kediɣzisi taa?

¹³ Tee hendu nɛ ña-laŋɩyɛ pilim. Alɩwaatʋ ndʋ ɖiteɣ Kewiyaɣ hendu yɔ, pɩpɔzʋʋ se ɖa-kaɖʋwa kajalaɣ ñɩŋga ɛkɛna se ɖɩsaŋ Yehowa. Payaɣ koobu halɩñɩnʋ nɔɔyʋ se Sara, ɛmaɣzɩɣ se ɛtɩkɛnɩ hendu teyu kɩbanʋ. Paa mbʋ yɔ, ɛsɔɔlaa se etee hendu nɛ ɛsamnɩ Yehowa. Pɩsa nɛ ɛpɩzɩ nɛ ɛla mbʋ lɛ, alɩwaatʋ ndʋ ɛɛñɔɔzʋʋ kediɣzisi yɔ, ɛñɔɔzʋʋ ɖɔɖɔ hendu ndʋ pakaɣ teu yɔ. Ɛkpɛlɩkɩɣ hendu ndʋ teu nɛ ɛñakɩ pana ɖɔɖɔ se ɛna se nɔɔ kʋɖʋmaɣ ŋga wɛ hendu ndʋ tɩ-taa tɔm pee nɛ tɔm ndʋ tɩ-taa pakaɣ tazʋʋ kediɣzaɣ taa yɔ pɛ-hɛkʋ taa. Ɛyɔɔdaa se: “Pɩsɩɣnɩ-m nɛ mankaŋ ma-lɩmaɣza hendu taa tɔm pee yɔɔ nɛ pɩkɩlɩɣ nɛ maakɩlɩɣ-yɛ kam ɛzɩma menteɣ hendu yɔ pɩ-yɔɔ na.”

14. Ye sɔɔndʋ ɛkpaɣ-ŋ yɔ, ɛbɛ pɩzɩɣ pɩsɩnɩ-ŋ nɛ ŋcosuu tɔm kediɣzisi taa?

¹⁴ Cosuu tɔm ɖoŋ ɖoŋ. Toovenim taa lɛ, pɩwɛ ɛyaa nabɛyɛ kaɖɛ se pocosuu tɔm. Talia weyi ɖɩyɔɔdɩ ɛ-tɔm nɛ pɩɖɛɛ yɔ, ɛyɔɔdaa se: “Alɩwaatʋ ndʋ pɩpɔzʋʋ se mɔyɔɔdɩ ɛyaa ɛsɩndaa yɔ, sɔɔndʋ kpaɣ-m siŋŋ; ɛlɛ ɛyaa lalaa iiɖiɣziɣna mbʋ pʋyɔɔ yɔ, mɛnkɛ ɛyʋ weyi ɛyɔɔdʋʋ hɛɛɛ yɔ. Pʋyɔɔ tɔm cosuu wɛ-m kaɖɛ kpem.” Paa mbʋ yɔ, Talia tiyele  tɔm cosuu kediɣzisi taa. Alɩwaatʋ ndʋ ɛñɔɔzʋʋ kediɣzaɣ yɔ, pɩwɛɣ ɛ-lɩmaɣza taa se pɔpɔzʋʋ tɔm nɛ weyi ɛcalɩɣ cosuu yɔ, pɩpɔzʋʋ se ɛ-tɔm cosuu ɛwɛɛ tobi nɛ pitukuni lɩmaɣzɩyɛ sɔsɔyɛ. Ɛyɔɔdaa se: “Pɩwɩlɩɣ se ye moncosi tɔm yɔɔ nɛ pɩwɛɛ tobi, pɩwɛɛ kɛlɛʋ nɛ pitukuni lɩmaɣzɩyɛ sɔsɔɖɛ yɔ mbʋ wɛnɩ ɖeu mbʋ pʋyɔɔ yɔ, weyi ɛcɔŋnɩ kpɛlɩkʋʋ yɔɔ yɔ mbʋ ɛsɔɔlaa se pocosi tɔm.”

15. Tɔm ndʋ yɔɔ pɩwɛɛ se ɖɩtɔzɩ pɩlɩɩnɩ tɔm ndʋ ɖicosuu kediɣzisi taa yɔ tɩ-yɔɔ?

¹⁵ Halɩ Krɩstʋ ñɩma mba pɛfɛyɩ fɛyɛ yaa paaseɣ sɔɔndʋ yɔ, nabʋyʋ taa paacosuu tɔm kediɣzisi taa. Ɛbɛ yɔɔ? Payaɣ koobu halɩñɩnʋ nɔɔyʋ se Juliet, ɛyɔɔdaa se: “Nabʋyʋ taa mantɩsɔɔlɩ tɔm cosuu mbʋ pʋyɔɔ yɔ sɔɔndʋ kpaɣ-m se tɔm ndʋ mancaɣ cosuu yɔ tɩkɩlɩ kɛlɛʋ yaa tɩfɛyɩ ɖeu ɖeyi ɖeyi ɛzɩ pɩpɔzʋʋ yɔ.” Ɛlɛ tɔzɩ se Yehowa sɔɔlaa se ɖicosi tɔm camɩyɛ ɛzɩ ɖɩpɩzʋʋ yɔ. * Ɛ-taa lakɩ leleŋ siŋŋ alɩwaatʋ ndʋ ɖɩlakɩ ɖo-ɖoŋ ɖeɖe se ɖicosi tɔm kediɣzisi taa paa nabʋyʋ taa sɔɔndʋ ɛkpaɣ-ɖʋ yɔ.

16. Tɔm ndʋ pɩwɛɛ se ɖikizi yɔɔdʋʋ?

¹⁶ Kizi tɔm ndʋ payɩ “tɩɖʋʋ ɖɩwɩzɩyɛ yɔ.” (Efɛz. 4:31) Ɛzɩ ɖɩtɛm naʋ nɛ pɩɖɛɛ yɔ, pɩtɩpɔzɩ kaaʋ se Krɩstʋ tʋ ɛyɔɔdɩ ɛzaɣtʋ tɔm. Ɛlɛ tɔm natʋyʋ wɛɛ nɛ tɩɖʋʋ ɖɩwɩzɩyɛ mɛsaɣ tɛɛ, nɛ pɩwɛɛ se ɖɩkpa ɖa-tɩ ɖɔɖɔ nɛ tɔm ndʋ. Pɩpɔzʋʋ se ɖɩkpa ɖa-tɩ nɛ ɖɩtaayɔɔdʋʋ tɔm kɩdɛkɛdɩtʋ ɛyaa mba pɛwɛnɩ sɔnzɩ nzɩ sɩwɛ ndɩ nɛ ɖa-ñɩnzɩ yaa pɛ-ɛjaɖɛ wɛ ndɩ nɛ ɖa-ñɩnɖɛ yɔ pɔ-yɔɔ. Pɩtasɩ lɛ, ɖɩtɩsɔɔlɩ se ɖɩyɔɔdɩ lalaa yɔɔ tɔm ndʋ tɩkɛnɩ tʋtʋ yɔ nɛ ɖɩɖʋnɩ-wɛ ɖɩwɩzɩyɛ. Koobu nɔɔyʋ yɔɔdaa se: “Alɩwaatʋ natʋyʋ mɔyɔɔdaɣ tɔm ndʋ mamaɣzaɣ se tɩkɛ tanaʋ tɔm nɛ tɩɩkɔŋnɩ kaɖɛ nɔɔyʋ yɔ; ɛlɛ toovenim taa lɛ, tɩɩkɛ ɛzaɣtʋ tɔm nɛ tɩwɩzaɣ ɛyaa lalaa. Pɩnzɩ wɛɛ nɛ sɩɖɛɣ lɛ, ma-halʋ sɩnɩ-m siŋŋ; alɩwaatʋ ndʋ mɔyɔɔdʋʋ tɔm ndʋ tɩtɩmʋna nɛ tɩɖʋʋ ɛ nɛ ɛyaa lalaa ɖɩwɩzɩyɛ yɔ, eheyiɣ-m alɩwaatʋ ndʋ ɖɩkɔŋ nɛ ɖɩwɛɛ ɖa-taa ɖe-ɖeke yɔ.”

17. Ɛzɩ Efɛɛzɩ mba 4:29 yɔɔdʋʋ yɔ, ɛzɩma ɖɩpɩzɩɣ nɛ ɖɩkpazɩ lalaa ɖoŋ?

¹⁷ Yɔɔdɩ tɔm ndʋ tɩkpazɩɣ lalaa ɖoŋ yɔ. Mbʋ ɛzɩ ŋŋhɔm ɛyaa lalaa nɛ tɔm nɛ ŋmidiɣ lɛ, sam-wɛ. (Kalɩ Efɛɛzɩ mba 4:29.) Izrayɛɛlɩ piya kaawɛnɩ wondu sakɩyɛ ndʋ tɩ-yɔɔ pɩɩwɛɛ se sɩwɛɛnɩ ɛsɩmɩyɛ yɔ, ɛlɛ ɖoŋ ɖoŋ lɛ simidaɣ. Ye ɖimidiɣ ɖoŋ ɖoŋ yɔ, pɩpɩzɩɣ piyele nɛ lalaa ɖɔɖɔ paɣzɩ miduu. Tɔzɩ se tɔm kɩdɛkɛdɩtʋ ndʋ cɔŋɩyaa hiu yɔɔdaa yɔ, tiyeba nɛ “Izrayɛɛlɩ piya kpeekpe midi sɩ-mɔɔŋ tɛɛ nɛ Moyizi.” (Kɩg. 13:31–14:4) Ɛlɛ alɩwaatʋ ndʋ ɖɩsaŋ ɛyaa lalaa yɔ, pɩpɩzɩɣ nɛ pɩsɩnɩ ɛyaa tɩŋa nɛ pa-taa la leleŋ nɛ  pɩkɩlɩ. Ða-taa pɩzɩɣ nɛ pɩtɛ se Yɛftee pɛlɛ kaakpa ɖoŋ nɛ ɛñɔɔnɩ ɛ-tʋmɩyɛ mbʋ pʋyɔɔ yɔ, ɛ-taabalaa kaasamɩ-ɩ. (Th. 11:40) Sara weyi ɖɩyɔɔdɩ ɛ-tɔm nɛ pɩɖɛɛ yɔ, ɛyɔɔdaa se: “Alɩwaatʋ ndʋ ɖɩsaŋ ɛyaa lalaa yɔ, ɖiyeki se peɖiɣzina se Yehowa sɔɔlɩ-wɛ nɛ pɛwɛnɩ lone ɛ-ɛgbɛyɛ taa.” Ye mbʋ, ñɩnɩ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋsa ño-koobiya yɔ.

18. (a) Ɛzɩ Keɣa 14:1, 2 yɔɔdʋʋ yɔ, ɛbɛ yɔɔ pɩwɛɛ se ɖɩyɔɔdʋʋ toovenim? (b) Nɛ ɛbɛ toovenim yɔɔdʋʋ pɔzʋʋ?

¹⁸ Yɔɔdʋʋ toovenim. Ye ɖɩɩyɔɔdʋʋ toovenim yɔ, ɖɔ-tɔm ɛɛpɩzɩɣ nɛ tɩkɛdɩnɩ Yehowa. Ɛpaɖɩɣ cɛtɩm kpeekpe. (Adu. 6:16, 17) Sɔnɔ, paa ɛyaa sakɩyɛ ɩmaɣzɩɣ se cɛtɩm kɛ mbʋ pɩtɩwɛɛkɩ pʋyʋ yɔ, ɖa lɛ ɖikiziɣ-pʋ mbʋ pʋyɔɔ yɔ Yehowa yɔɔdaa se pɩfɛyɩ ɖeu. (Kalɩ Keɣa 14:1, 2.) Pɩkɛ toovenim se ɖikiziɣ cɛtɩm, ɛlɛ alɩwaatʋ ndʋ ɖɩyɔɔdʋʋ tɔm natʋyʋ yɔ, ɖɩɩmɛsɩɣ lalaa toovenim tɔm natʋyʋ se pɩsa nɛ pɛwɛɛnɩ lɩmaɣza wena atɩtʋʋzɩ yɔ.

19. Ɛbɛ ɖɔɖɔ pɩpɔzʋʋ se ɖɩkpa ɖa-tɩ nɛ ɖɩtaala?

¹⁹ Taayɛlɩnɩ kɔlɔmɔtʋ tɔm. (Adu. 25:23; nwt; 2 Tes. 3:11) Juliet weyi ɖɩyɔɔdɩ ɛ-tɔm nɛ pɩɖɛɛ yɔ, ɛyɔɔdɩ ɛzɩma kɔlɔmɔtʋ tɔm kaawɛnɩ ɖoŋ kɩdɛkɛdɩŋ ɛ-yɔɔ yɔ pɩ-tɔm. Ɛyɔɔdaa se: “Kɔlɔmɔtʋ tɔm welisuu yeki nɛ pitiki-m yɔɔɔ; nɛ piyeki nɛ maatasɩɣ taʋ liu ɛyʋ weyi ɛyɔɔdʋʋ-tʋ yɔ. Toovenim taa lɛ, mananɩ we se ɛyʋ ɛnʋ ɛɛkaɣ yɔɔdʋʋ kɔlɔmɔtʋ tɔm mɔ-yɔɔ ɛyʋ lɛlʋ cɔlɔ?” Ye ŋɖiɣzinaa se kɔlɔmɔtʋ tɔm paɣzɩ sʋʋ kɛdaɣ nakɛyɛ taa yɔ, lɛɣzɩ kɛdaɣ ŋga nɛ ŋyɔɔdɩ tɔm ndʋ tɩkpazɩɣ ɛyʋ ɖoŋ yɔ.—Kol. 4:6.

20. Ɛbɛ ŋtɛm ña-taa se ŋlakɩnɩ ñɔ-yɔɔdaɣ?

²⁰ Ðɩwɛ ɛjaɖɛ nɖɩ ɖɩ-taa ɛyaa sakɩyɛ yɔɔdʋʋ ɛzaɣtʋ tɔm yɔ; pʋyɔɔ lɛ, pɩpɔzʋʋ se ɖɩñaɣ pana siŋŋ nɛ ɖɔ-yɔɔdaɣ kɛdɩnɩ Yehowa. Taasɔɔ se yɔɔdaɣ kɛ kʋjɔʋ ŋgʋ kɩlɩnɩ Yehowa cɔlɔ yɔ, nɛ ɛzɩma ɖɩlakɩnɩ-kʋ tʋmɩyɛ yɔ pɩ-tɔm cɛyɩ ɛ-ɛsɩndaa. Ɛkaɣ-ɖʋ wazʋʋ ye ɖɩñakɩ pana nɛ ɖɩlakɩnɩ ɖɔ-yɔɔdaɣ tʋmɩyɛ camɩyɛ tɔm susuu taa, kediɣzisi taa, nɛ kɛdɛsɩ nzɩ ɖa nɛ lalaa ɖɩlakɩ yɔ sɩ-taa yɔ. Alɩwaatʋ ndʋ Yehowa ɖɩzɩɣ ɛjaɖɛ kɩdɛkɛdɩyɛ ɖɩnɛ yɔ, pɩkaɣ-ɖʋ wɛʋ kɛlɛʋ nɛ pɩkɩlɩ se ɖɩtɩŋnɩ ɖɔ-yɔɔdaɣ yɔɔ nɛ ɖɩɖʋ-ɩ hɩɖɛ. (Yud. 15) Pʋcɔ nɛ alɩwaatʋ ndʋ tɩtalɩ lɛ, tɛ ña-taa se ŋyeki nɛ ‘ñɔ-nɔɔ taa tɔm’ kɛdɩnɩ Yehowa.—Keɣa 18:15.