15-زەرتتەۋ ماقالاسى
ٴسوزىڭىزبەن ۇلگى كورسەتىپ ٴجۇرسىز بە؟
«ادال بولىپ جۇرگەندەرگە سوزىڭمەن... ۇلگى كورسەت» (ٴتىم. 1-ح. 4:12).
90-ٵن ٴبىر-ٴبىرىمىزدى جىگەرلەندىرەيىك
اڭداتپا a
1. سويلەۋ قابىلەتى بىزگە قايدان بىتكەن؟
قۇداي ٴتۇپ اتامىز — ادامدى جاراتقاندا، وعان سويلەۋ قابىلەتىن دارىتقان. وسى قابىلەتتىڭ ارقاسىندا ادام كوكتەگى اكەسىمەن تىلدەسە العان. سونداي-اق ونىڭ ٶزى دە جاڭا سوزدەر ويلاپ تاۋىپ، ٴسوز قورىن بايىتا الاتىن. مىسالى، ول جان-جانۋارلاردىڭ ٵرقايسىسىنا ات قويعان (مۇس. 1-ج. 2:19). ال ٶزى سياقتى باسقا اداممەن، ايداي سۇلۋ ايەلى حاۋامەن، تىلدەسكەندە، ونىڭ باقىتتان باسى اينالعانىندا ٴسوز جوق! (مۇس. 1-ج. 2:22، 23).
2. سويلەۋ قابىلەتى ەجەلدە قالاي تەرىس قولدانىلعان؟ ال بۇگىندە شە؟
2 وكىنىشكە قاراي، سويلەۋ قابىلەتى كەيىن تەرىس قولدانىلا باستادى. شايتان ٸبىلىس حاۋاعا وتىرىك ايتىپ، ناتيجەسىندە بۇكىل ادامزاتقا كۇنا مەن كەمەلسىزدىك بەرىلدى (مۇس. 1-ج. 3:1—4). ادام دا ٴتىلىن تەرىس قولدانىپ، ٶز قاتەلىگى ٷشىن حاۋانى، ٴتىپتى ەحوبانى دا جازعىردى (مۇس. 1-ج. 3:12). قابىل بولسا ٸنىسىن ولتىرگەننەن كەيىن، ەحوباعا وتىرىك ايتتى (مۇس. 1-ج. 4:9). ال كەيىنىرەك قابىلدىڭ ۇرپاعى لامەحتىڭ شىعارعان ولەڭىنەن سول زامانداعى ادامداردىڭ قانداي جاۋىز بولىپ كەتكەنىن كورەمىز (مۇس. 1-ج. 4:23، 24). ال بۇگىنگى جاعداي تۋرالى نە دەۋگە بولادى؟ كوپ ساياساتكەرلەر ەل الدىندا تۇرسا دا، جامان سوزدەردى ەمىن-ەركىن ايتا بەرەدى. سونداي-اق بۇگىندە بوعاۋىز ٴسوز ايتىلمايتىن فيلمدەر كەمدە-كەم. مەكتەپ قابىرعاسىنداعى بالالاردىڭ دا، جۇمىستاعى ەرەسەكتەردىڭ دە بالاعات سوزدەرگە قۇلاقتارى ۇيرەنىپ بارادى. جامان سوزدەردىڭ كەڭىنەن قولدانىلىپ جاتقانى وسى دۇنيەنىڭ مورالدىق جاعىنان قاتتى بۇزىلىپ كەتكەنىن كورسەتەدى.
3. ٴبىز نە نارسەدەن اباي بولۋىمىز كەرەك جانە بۇل ماقالادا نە تالقىلايمىز؟
3 قۇلاعىمىز جامان سوزدەرگە ۇيرەنىپ قالعانى سونشا — اباي بولماساق، ٶزىمىز دە سولاي سويلەي باستاۋىمىز مۇمكىن. ٴبىراق ٴماسىحشى بولعاندىقتان، ٴبىز ەحوباعا ۇنامدى بولعىمىز كەلەدى. بۇل ٷشىن ادەپسىز سويلەۋدەن اۋلاق بولعانىمىز جەتكىلىكسىز. ٴبىز ٴتىلىمىزدى دۇرىس ماقساتپەن، ياعني قۇدايدى ماداقتاۋ ٷشىن قولدانۋىمىز كەرەك. بۇل ماقالادا ٴبىز قىزمەتتە، قاۋىم كەزدەسۋلەرىندە جانە باسقالارمەن ارالاسقاندا، ٴتىلدى قالاي دۇرىس قولدانا الاتىنىمىزدى بىلەمىز. ٴبىراق، الدىمەن، قالاي سويلەيتىنىمىز ەحوباعا نە ٷشىن ماڭىزدى ەكەنىنە توقتالايىق.
قالاي سويلەيتىنىمىز ەحوباعا ٴبارىبىر ەمەس
ٴسوزدەرىڭىزدەن جۇرەگىڭىزدە نە بار ەكەنىن بايقايسىز با؟ (4، 5-ابزاستاردى قاراڭىز) d
4. مالاحي 3:16 عا ساي، ەحوبا ٴبىزدىڭ سوزىمىزگە نە ٷشىن نازار اۋدارادى؟
4 مالاحي 3:16 وقىڭىز. ەحوبا سويلەسىپ جاتقان ادامداردىڭ ەسىمدەرىن «ەستەلىك كىتابىنا» نە ٷشىن جازعانىن بايقادىڭىز با؟ ولاردىڭ سوزدەرىنەن ەحوبادان قورقاتىندارى جانە ونىڭ ەسىمى تۋرالى وي جۇگىرتەتىندەرى كورىنىپ تۇرعان. ٴبىزدىڭ ٴسوزىمىز جۇرەگىمىزدە نە بار ەكەنىن ايان ەتەدى. يسا: «ادامنىڭ جۇرەگى نەگە تولى بولسا، اۋزى سونى ايتار»،— دەگەن (مات. 12:34). ٴبىزدىڭ نە تۋرالى ايتاتىنىمىزدان ەحوبانى قانشالىقتى سۇيەتىنىمىزدى كورۋگە بولادى. ال ەحوبانى سۇيەتىندەرگە ول جاڭا دۇنيەدە ماڭگى ٶمىر سيلاعىسى كەلەدى.
5. ا) عيباداتىمىز بەن سويلەگەن ٴسوزىمىز ٴبىر-بىرىمەن قالاي بايلانىستى؟ ٵ) سۋرەتتەن كورىنەتىندەي، ٴسوزىمىز ەحوباعا جاعىمدى بولۋ ٷشىن، نەدەن اۋلاق بولۋىمىز كەرەك؟
5 ەحوبا قالاي سويلەيتىنىمىزگە قاراپ، عيباداتىمىزدى قابىلدايدى نە قابىلدامايدى (جاق. 1:26). مىنا دۇنيەدە قۇدايدى سۇيمەيتىن ادامدار ايعايلاپ، دورەكى نە پاڭدانا سويلەيدى (ٴتىم. 2-ح. 3:1—5). ٴبىز ولار سياقتى بولعىمىز كەلمەيدى، ارينە. قايتا، اۋزىمىزدان شىققان ٴسوزىمىز ەحوباعا جاعىمدى بولعانىن قالايمىز. الايدا كەزدەسۋلەر مەن قىزمەتتە ىلتيپاتپەن سويلەپ، ال ۇيگە كەلگەندە «ٶزىمىز عوي»-عا سالىپ، جاقىندارىمىزعا اشتى ٵرى اۋىر سوزدەردى ايتساق، ەحوبا بىزگە رازى بولا ما؟ (پەت. 1-ح. 3:7).
6. كيمبەرليدىڭ سويلەۋ قابىلەتىن دۇرىس قولدانعانى قانداي جەمىس اكەلدى؟
6 سويلەۋ قابىلەتىن دۇرىس قولدانساق، ەحوبانىڭ قىزمەتشىلەرى ەكەنىمىز بايقالىپ تۇرادى. سوندا ادامدار «قۇدايعا قىزمەت ەتەتىن مەن قىزمەت ەتپەيتىننىڭ اراسىنداعى ايىرماشىلىقتى» انىق كورەتىن بولادى (مالح. 3:18). كيمبەرلي b دەگەن قىز باۋىرلاسىمىزدىڭ وقيعاسىنا توقتالايىقشى. مەكتەپتە وعان سىنىپتاس قىزى ەكەۋىنە ٴبىر تاپسىرما بەرىلەدى. تاپسىرماعا بىرگە دايىندالىپ جۇرگەندە، سىنىپتاسى كيمبەرليدىڭ باسقا وقۋشىلارعا مۇلدەم ۇقسامايتىنىن بايقايدى. ويتكەنى ول ەشكىمدى سىرتىنان وسەكتەمەيتىن، جىلى-جۇمساق سويلەيتىن جانە جامان ٴسوز قولدانبايتىن. سىنىپتاس قىزى كيمبەرليدىڭ ٴجۇرىس-تۇرىسىنا ٴتانتى بولىپ، كەيىن ٶزى دە كيەلى كىتاپتى زەرتتەي باستادى. وسى جاعدايداعى سياقتى، جاعىمدى سويلەيتىنىمىزگە قاراپ، ادامدار شىندىقتى ۇناتىپ جاتسا، ەحوبا قاتتى قۋانادى!
7. ٴسىز قۇدايدىڭ بەرگەن سيى — سويلەۋ قابىلەتىن قالاي قولدانعىڭىز كەلەدى؟
7 ٴبارىمىز دە ەحوباعا داڭق اكەلەتىندەي جانە باۋىرلاستارمەن قارىم-قاتىناسىمىزدى كوركەيتە تۇسەتىندەي سويلەگىمىز كەلەدى. ەندەشە، ٴقازىر سوزىمىزبەن ۇلگى كورسەتە بەرۋگە كومەكتەسەتىن بىرنەشە ٴتيىمدى كەڭەستەردى قاراستىرايىق.
قىزمەتتە ۇلگىلى بولىڭىز
قىزمەتتە ادامدارعا مەيىرىممەن سويلەسەك، ەحوبا قۋانادى (8، 9-ابزاستاردى قاراڭىز)
8. يسا قىزمەتتە ٴتىلىن قالاي قولدانعانىنان ٴبىز قانداي ساباق الامىز؟
8 اشۋىڭىزعا تيگەندە، مەيىرىممەن جانە قۇرمەتپەن جاۋاپ بەرىڭىز. يسا جەردە قىزمەت ەتىپ جۇرگەندە، كەيبىرەۋلەر وعان ىشكىش، قوماعاي، ىبىلىسپەن سىبايلاس، دەمالىس كۇنىن ۇستانبايدى، ٴتىپتى قۇدايدى قورلايدى دەپ جالا جاپقان (مات. 11:19؛ 26:65؛ لۇقا 11:15؛ جوح. 9:16). ٴبىراق يسا ەشقاشان «ٵ» دەگەنگە «ٴما» دەمەگەن. ٴبىز دە سۇيەكتەن وتەتىن اشتى سوزدەردى ەستىسەك تە، يسا سياقتى سابىرلى بولعانىمىز ٴجون (پەت. 1-ح. 2:21—23). ٴبىراق بۇلاي ەتۋ وڭاي بولا بەرمەيدى (جاق. 3:2). ەندەشە، بىزگە نە كومەكتەسەدى؟
9. ۋاعىزداپ جۇرگەندە، تىلىمىزگە يە بولۋعا نە كومەكتەسەدى؟
9 قىزمەتتە ٷي يەسى دورەكىلىك تانىتسا، بۇعان تىم قاتتى ٴمان بەرمەي، كەڭىرەك ويلانىڭىز. سەم دەگەن ەر باۋىرلاس بىلاي دەيدى: «مەن ول ادام دا قۇداي تۋرالى شىندىقتى ٴبىلۋى كەرەك قوي دەپ ويلانامىن جانە ونىڭ دا جاقسارا الاتىنىن ەستە ۇستايمىن». كەيدە ٷي يەسىنىڭ اشۋ شاقىرۋىنا ٴبىزدىڭ وعان ىڭعايسىز ۋاقىتتا كەلگەنىمىز سەبەپ بولىپ جاتادى. وسىنداي ادامعا جولىعىپ قالساق، ليۋسيا باۋىرلاس سياقتى ارەكەت ەتسەك بولادى. ول ەحوباعا «سابىر ساقتاپ، تىلىمە يە بولۋعا كومەكتەسشى، ٷي يەسىنە جامان بىردەڭە ايتىپ قويمايىنشى» دەپ قىسقاشا دۇعا ەتىپ الادى ەكەن.
10. تىموتەگە 1-حات 4:13 تە ايتىلعانداي، ٴبىز قانداي ماقسات قويۋىمىز كەرەك؟
10 ٴتالىم بەرۋ شەبەرلىگىڭىزدى شىڭداڭىز. تىموتەنىڭ ۋاعىز ىسىندە ٴبىراز تاجىريبەسى بولسا دا، ول ٴتالىم بەرۋ شەبەرلىگىن شىڭداي بەرۋى كەرەك بولعان (تىموتەگە 1-حات 4:13 وقىڭىز). ٴبىز دە وسى شەبەرلىگىمىزدى قالاي ارتتىرساق بولادى؟ بۇل ٷشىن جاقسى دايىندىق كەرەك. قۋانىشقا وراي، بىزدە جاقسى تالىمگەر بولۋعا كومەكتەسەتىن قۇرالدار كوپ. مىسالى، «وقۋ مەن ٴتالىم بەرۋ قابىلەتىن شىڭدايىق» كىتاپشاسىنان جانە «ماسىحشىلىك ٶمىرىمىز بەن قىزمەتىمىز» جۇمىس داپتەرىندەگى «قىزمەتىمىزدىڭ ساپاسىن ارتتىرايىق» دەگەن بولىمنەن پايدالى كەڭەستەردى تابا الاسىز. وسى قۇرالداردى قولدانىپ، بارىنشا پايداسىن كورۋگە تىرىساسىز با؟ ەگەر دايىندىعىڭىز جاقسى بولسا، وندا قىزمەتتە قاتتى قوبالجىماي، سەنىممەن سويلەيتىن بولاسىز.
11. كەيبىر ماسىحشىلەر جاقسى تالىمگەر بولۋدى قالاي ۇيرەنگەن؟
11 ٴبىز قاۋىمداعى باۋىرلاستاردان دا جاقسى تالىمگەر بولۋدى ۇيرەنە الامىز. مىسالى، جوعارىدا ايتىلىپ كەتكەن سەم باۋىرلاس قاۋىمىنداعى جاقسى تالىمگەرلەر جايلى: «ولاردىڭ شەبەرلىكتەرىنىڭ كىلتى نەدە؟»— دەپ ويلانادى ەكەن. سەم ولاردىڭ ٴتالىم بەرۋ تاسىلدەرىنىڭ قىر-سىرىن مەڭگەرىپ العاننان كەيىن، ٶزى دە سونى قولدانادى. ال تاليا دەگەن ايەل باۋىرلاس بولسا تاجىريبەلى بايانداماشىلاردىڭ كوپشىلىككە ارنالعان باياندامانى قالاي وربىتەتىندەرىنە ٴمان بەرەدى ەكەن. سونىڭ ارقاسىندا ول قىزمەتتەگى ادامداردى قىزىقتىراتىن تاقىرىپتا اڭگىمە باستاپ، بىرگە وي ٴتۇزۋدى ۇيرەنىپ العان.
قاۋىمدا ۇلگىلى بولىڭىز
قاۋىمدا بار جۇرەكپەن ٵن ايتساق، ەحوبانى ماداقتايمىز (12، 13-ابزاستاردى قاراڭىز)
12. كەيبىرەۋلەر ٷشىن نە نارسە قيىن بولۋى مۇمكىن؟
12 ٴبىز قاۋىمدا باۋىرلاستارمەن بىرگە بار داۋىسپەن ٵن شىرقاعاندا جانە جاقسى دايىندالعان تۇسىنىكتەمەلەر بەرگەندە، كەزدەسۋدىڭ كەرەمەت وتۋىنە ۇلەس قوسامىز (ٴزاب. 22:22). ٴبىراق كەيبىرەۋلەر ٷشىن قول كوتەرىپ جاۋاپ بەرۋ مەن ٵن شىرقاۋدىڭ ٶزى دە — ۇلكەن ٴبىر سىناق. ەگەر بۇل نارسەلەر سىزگە دە قيىن بولسا، باسقالارعا قورقىنىشتارىن جەڭۋگە نە كومەكتەسكەنىنە نازار اۋدارايىق.
13. سىزگە قاۋىمدا بار جۇرەكپەن ٵن شىرقاۋعا نە كومەكتەسە الادى؟
13 ٵندى بار جۇرەكپەن شىرقاڭىز. قاۋىم كەزدەسۋىندە پاتشالىق اندەرىن شىرقاعاندا، ٴبىزدىڭ ەڭ باستى ماقساتىمىز — ەحوبانى ماداقتاۋ. سارا دەگەن باۋىرلاسىمىز جەزتاڭداي ٵنشى بولماسا دا، ەحوبانى انمەن داڭقتاعىسى كەلەدى. سوندىقتان ول ۇيدە قاۋىم كەزدەسۋلەرىنە قالاي دايىندالسا، ٵن شىرقاۋعا دا ٴدال سولاي دايىندالادى. ول ٵندى بىرنەشە رەت ايتىپ جاتتىعىپ، ونىڭ ٴماتىنى مەن قاۋىمدا تالقىلاناتىن تاقىرىپتىڭ قانداي بايلانىسى بار ەكەنىن بايقاۋعا تىرىسادى. «سوندا مەن ٵن ايتۋ قابىلەتىمنىڭ جوقتىعىنا ەمەس، اننىڭ سوزدەرىنە كوبىرەك نازار اۋدارامىن»،— دەيدى سارا.
14. تۇسىنىكتەمە بەرۋدەن قاتتى قورقىپ، قوبالجيتىن بولساڭىز، سىزگە نە كومەك بولا الادى؟
14 كەزدەسۋدە ٴجيى جاۋاپ بەرىڭىز. الايدا كەيبىرەۋلەر ٷشىن بۇل وتە قيىن. مىسالى، جوعارىدا ايتىلىپ كەتكەن تاليا باۋىرلاس بىلاي دەيدى: «مەن كوپشىلىك الدىندا سويلەۋدەن قاتتى قورقامىن. ٴبىراق داۋسىم تابيعاتىمنان جاي شىعاتىندىقتان، بۇنداي فوبيام بار ەكەنىن كەيبىرەۋلەر بىلە بەرمەيدى». ٴبىراق، قانشالىقتى قيىن بولماسىن، تاليا ٴبارىبىر دە جينالىستا قول كوتەرىپ جاۋاپ بەرۋگە تىرىسادى. ول كەزدەسۋلەرگە دايىندالعاندا، سۇراقتىڭ العاشقى جاۋابى قىسقا دا نۇسقا بولۋ كەرەكتىگىن ەستە ۇستايدى. «تۇسىنىكتەمە بەرگەندە، نەگىزگى ويدى عانا ايتىپ، قاراپايىم، قىسقا جاۋاپ بەرۋدەن قىسىلمايمىن، ويتكەنى تالقىلاۋدى جۇرگىزىپ تۇرعان باۋىرلاس الدىمەن سونداي جاۋاپتى كۇتەدى»،— دەيدى تاليا.
15. تۇسىنىكتەمەلەرگە قاتىستى نەنى ەستە ۇستاعانىمىز ٴجون؟
15 كەيبىر باۋىرلاستار اسا جاسقانشاق بولماسا دا، قاتتى قوبالجىماسا دا، تۇسىنىكتەمە بەرۋدەن تارتىنۋى مۇمكىن. نەگە؟ دجۋليەت دەگەن باۋىرلاس بىلاي دەيدى: «كەيدە مەن: —قويشى، مەنىڭ تۇسىنىكتەمەلەرىم اناۋ ايتقانداي تەرەڭ ەمەس، تىم قاراپايىم. ودان دا جاۋاپ بەرمەي-اق قويايىن،— دەپ ويلايمىن». الايدا ەحوبا مۇمكىندىكتەرىمىزدى ەسكەرەدى. ول شامامىزعا قاراي بەرگەن ەڭ جاقسى تۇسىنىكتەمەلەرىمىزدى جوعارى باعالايدى c. قورقىپ يا قوبالجىعانىمىزعا قاراماستان، ەحوبانى قاۋىمدا ماداقتاساق، ول شەكسىز ريزا بولادى.
باسقالارمەن ارالاسقاندا ۇلگىلى بولىڭىز
16. ٴبىز قانداي سوزدەردەن اۋلاق بولۋىمىز كەرەك؟
16 «قورلىق سوزدەردىڭ» بارلىق تۇرىنەن اۋلاق بولىڭىز (ەفەس. 4:31). باسىندا ايتىپ كەتكەنىمىزدەي، ٴماسىحشىنىڭ اۋزىنان جامان ٴسوز شىقپاۋ كەرەك. ٴبىراق، ٴبىر ەسكەرەتىن جايت، قورلىق سوزدەردىڭ جاسىرىن تۇرلەرى دە بار. مىسالى، وزگە مادەنيەتتىڭ، ۇلتتىڭ، رۋدىڭ ادامدارى جايلى جاعىمسىز سوزدەر ايتۋدان اۋلاق بولعانىمىز ٴجون. سونداي-اق باسقالاردى كەمسىتىپ سويلەپ، اۋىر سوزدەر ايتۋدان دا ساق بولۋىمىز كەرەك. ٴبىر ەر باۋىرلاس ٶزى جايلى بىلاي دەپ ٴبولىستى: «مەن كەيدە باسقالارعا قىزىق بولسىن دەپ، بىرەۋدىڭ ۇستىنەن كۇلىپ، كەكەتىپ-مۇقاتىپ قالجىڭداعاندى جاقسى كورەتىنمىن. ٴبىراق الگى ادامنىڭ كوڭىلىنە ٴتيىپ، جانىن جارالايتىنىمدى ويلاماپپىن. ايەلىم ماعان كوپ جىلدان بەرى وسى بەيىمدىلىگىممەن كۇرەسۋگە كومەكتەسىپ كەلەدى. ەگەر دورەكى سويلەپ، ونىڭ نەمەسە باسقا بىرەۋدىڭ كوڭىلىنە ٴتيىپ كەتسەم، ول مەنى وڭاشادا تۇزەتىپ وتىرادى».
17. ەفەستىكتەرگە 4:29 دا ايتىلعانداي، ٴبىز باۋىرلاستاردىڭ جانىن قالاي جادىراتا الامىز؟
17 ادامنىڭ جانىن جادىراتاتىن سوزدەر ايتىڭىز. بىرەۋدى سىناپ-مىنەپ، كۇڭكىلدەۋگە ەمەس، ماقتاۋعا اسىق بولىڭىز (ەفەستىكتەرگە 4:29 وقىڭىز). يسرايل حالقى ەحوبانىڭ بەرگەن كوپ جاقسىلىعىنا ريزاشىل بولۋدىڭ ورنىنا قايتا-قايتا كۇڭكىلدەي بەردى. كۇڭكىلدەۋدىڭ اسەرى وتە كۇشتى. بىرەۋ كۇڭكىلدەسە، باسقالار وعان تەز ەلىگىپ، ولار دا كۇڭكىلدەي باستايدى. ەسىمىزدە بولسا، ون بارلاۋشى قارا اسپاندى ٴتوندىرىپ، ۋادە ەتىلگەن جەر تۋرالى جاعىمسىز حابار ايتقاندا، «يسرايلدىكتەردىڭ ٴبارى مۇساعا كۇڭكىلدەي باستاعان» (مۇس. 4-ج. 13:31—14:4). ٴدال سول سياقتى، ماقتاۋ سوزدەردىڭ دە قۇدىرەتى زور. ولار ادامدى يگىلىككە تالپىندىرا الاتىن كۇشكە يە. مىسالى، ەفتانىڭ قىزى قۇربىلارىنىڭ جىل سايىن كەلىپ، ونى ماقتاپ، جىگەرلەندىرىپ تۇرعانىنىڭ ارقاسىندا قىزمەتىن ٵرى قاراي دا ادال اتقارا بەرگەنىندە ٴسوز جوق (بي. 11:40). جوعارىدا اتالىپ كەتكەن سارا باۋىرلاس: «ٴبىز باسقالاردى ماقتاعاندا، ولار ەحوبانىڭ سۇيىسپەنشىلىگىن جانە ۇيىمعا كەرەك ەكەندەرىن سەزىنەدى»،— دەيدى. ولاي بولسا، باۋىرلاستاردى ماقتاۋدىڭ مۇمكىندىكتەرىن جىبەرىپ المايىق.
18. ٴزابۇر 15:1، 2 گە ساي، ٴبىز نەگە شىندىقتى ايتۋىمىز كەرەك جانە شىندىقتى ايتۋعا نە جاتادى؟
18 شىندىقتى ايتىڭىز. وتىرىك ايتىپ، جالعان سويلەسەك، ەحوباعا ۇنامدى بولا المايمىز. ول وتىرىكتىڭ كەز كەلگەن ٴتۇرىن جەك كورەدى (ناق. س. 6:16، 17). مىنا دۇنيەدەگى ادامدار ٷشىن وتىرىك ايتا سالۋ تۇك تە ەمەس، ٵرى سول ٷشىن ار-ۇجداندارى مازالامايدى دا. ٴبىراق ٴبىز ٵرقاشان دا ەحوبانىڭ كوزقاراسىن ۇستانعىمىز كەلەدى (ٴزابۇر 15:1، 2 وقىڭىز). ارينە، ٴبىز قىپ-قىزىل وتىرىك ايتپايتىن شىعارمىز، ٴبىراق ادامنىڭ باسقا ماعىنا تۇسىنگەنىن قالاپ، شىندىقتى بۇرمالاپ، ەكىۇشتى دا سويلەمەيمىز.
جاعىمسىز اڭگىمەنى جاعىمدى اڭگىمەگە بۇرساق، ەحوبانىڭ باتاسىن الامىز (19-ابزاستى قاراڭىز)
19. ٴبىز تاعى نەدەن اۋلاق بولۋىمىز كەرەك؟
19 وسەكتەن قاشىق بولىڭىز (ناق. س. 25:23؛ سال. 2-ح. 3:11). جوعارىدا اتالىپ كەتكەن دجۋليەت وسەك سوزدەردىڭ وعان قالاي اسەر ەتەتىنىن ايتىپ بەردى. ول بىلاي دەيدى: «بىرەۋ كەلىپ، ماعان باسقا بىرەۋدى وسەكتەپ جاتسا، ٶزىمدى جامان سەزىنىپ، كوڭىلىم ٴتۇسىپ كەتەدى. سول ادامعا دەگەن سەنىمىم جوعالادى. ويتكەنى ول ەرتەڭ بارىپ، مەنى دە باسقا بىرەۋگە وسەكتەۋى مۇمكىن». سوندىقتان بىرەۋمەن اڭگىمەلەرىڭىز وسەككە ۇلاسىپ بارا جاتقانىن بايقاساڭىز، ونى بىردەن جاعىمدى ارناعا بۇرىپ جىبەرىڭىز (قول. 4:6).
20. ٴسىز نە ىستەۋگە بەكىندىڭىز؟
20 باسىندا ايتىپ كەتكەنىمىزدەي، ادەپسىز سويلەۋ بۇگىندە جاپپاي قوعامدىق ادەتكە اينالىپ كەتكەن. سوندىقتان ايتاتىن ٴسوزىمىز ەحوباعا ۇنامدى بولۋ ٷشىن كوپ كۇش سالۋىمىز كەرەك. ٴتىل ەحوبانىڭ بەرگەن سيى ەكەنىن جانە ونى قالاي قولداناتىنىمىز وعان ٴبارىبىر ەمەس ەكەنىن ۇمىتپاڭىز. ٴبىز قىزمەتتە، قاۋىم كەزدەسۋلەرىندە جانە باسقالارمەن ارالاسقاندا ٴتىلىمىزدى دۇرىس قولدانۋعا تىرىسساق، ەحوبا باتاسىن بەرەدى. مىنا قۇدايسىز زامان جويىلعاننان كەيىن، ەحوبانى تىلىمىزبەن ماداقتاۋ الدەقايدا جەڭىل بولادى (ياھد. 15). سول ۋاقىت كەلگەنشە، اۋزىمىزدان شىعاتىن سوزدەرىمىز ەحوباعا «ۇنامدى بولعاي!» (ٴزاب. 19:14).
121-ٵن ۇستامدىلىق تانىتايىق
a سويلەۋ قابىلەتى — ەحوبا بەرگەن كەرەمەت سي. وكىنىشكە قاراي، كوپ ادام بۇل سيدى ەحوبا قالاعانداي قولدانبايدى. بارعان سايىن قۇلدىراپ، ادەپسىز بولىپ بارا جاتقان مىنا دۇنيەدە تازا سويلەۋ ٷشىن جانە سوزدەرىمىز باسقالاردىڭ كوڭىلىن جادىراتاتىنداي بولۋ ٷشىن نە ىستەي الامىز؟ قىزمەتتە، قاۋىمدا جانە باسقالارمەن ارالاسقاندا سوزدەرىمىز ەحوباعا جاعىمدى بولۋ ٷشىن نە ىستەۋىمىز كەرەك؟ ٴقازىر وسى سۇراقتاردىڭ جاۋابىن بىرگە بىلەيىك.
b كەيبىر ەسىمدەر وزگەرتىلگەن.
c تۇسىنىكتەمە بەرۋ جايلى كوبىرەك ٴبىلۋ ٷشىن، 2019-جىلدىڭ قاڭتار ايىنداعى «كۇزەت مۇناراسىنان» «ەحوبانى قاۋىمدا ماداقتايىق!» دەگەن ماقالانى قاراڭىز.
d سۋرەت سيپاتتاماسى: ەر باۋىرلاس اشۋلى ٷي يەسىنە دورەكى سويلەپ جاتىر. ەر باۋىرلاس قاۋىمدا ٵن ايتقىسى كەلمەي تۇر. ايەل باۋىرلاس بىرەۋدىڭ وسەگىنە قوسىلىپ تۇر.
