1. Nanyi watubhana o uhete wakuzwela?

 O UHETE wakuzwela, ujitu watubhana Nzambi yetu ya henda. Kyoso kyabhange o diyala dya dyanga, Adá, mwene wexile ni uhete wakutumbula izwelu mukudizwelesa ni Tata yê yadyulu. Mwene wejitena kwijiya maba a ubhe, kyenyiki, wejikala ni izwelu yavulu mukilunji. O uhete wakuzwela wakwatekesa Adá kukumbidila o kikalakalu kyê kya kuluka o majina ku yama yoso. (Dim. 2:19) Sé phata, mwene wasangulukile kyavulu kyoso kyazwela muveji yadyanga ni muthu kala mwene—kazola kê, Eva.—Dim. 2:22, 23.

2. Tunde ukulu katé mu izuwa yalelu, kyebhi o athu kyene mukalakala kyayibha ni uhete wakuzwela?

² Kikulaleka, o athu amateka kukalakala kyayibha ni uhete wakuzwela. Satanaji Dyabhu, watangela makutu kwa Eva, o makutu ya abhekela o kituxi ni kukamba o kuyuka ku athu oso. (Dim. 3:1-4) Kyoso kyate o kituxi, Adá wakalakala we kyayibha ni uhete wakuzwela mu kutatela Eva, katé mwene ni Jihova. (Dim. 3:12) Kayini watange makutu kwa Jihova kyoso kyajibha phang’yê. (Dim. 4:9) Mukubhita kithangana, Lameke wejila kumbutu ya Kayini, wasoneka ima yalondekesa kwila, o athu mu izuwa yê exile mubhanga usweya wavulu. (Dim. 4:23, 24) Abha o mu izuwa yetu? Sayi ithangana, o atwameni a jinguvulu, kene mukala ni jisonyi ja kuxinga jindaka jabolo. Lelu kibhonza kusanga jifilime jakambe o izwelu yabolo. O minzangala evwa izwelu yabolo muxikola, o adyakime a ivwa ku salu. Kima kya kuluwala, maji o kudibandekesa kwa izwelu yabolo, kulondekesa kwila, o ngongo itwala yayibha mwene kyavulu.

3. Twatokala kudilanga phala kitubhange ihi, ni ihi itwandadilonga mu milongi yiyi?

 ³ Mukonda dya kwivwa kyavulu o izwelu yabolo, se kitudilange, twandamateka ku izwelu we. Mu kidi, kuma tu Jikidistá, twamesena kusangulukisa o muxima wa Jihova, kyenyiki kitwandazwela ima yabolo. Twamesena kukalakala kyambote ni uhete wakuzwela, phala kuximana Nzambi yetu. Mu milongi yiyi, twandamona kyebhi kitutena kubhanga kiki (1) mu ukunji, (2) mu yônge ya kilunga, ni (3) mu jithathe jetu ja kizuwa ni kizuwa. Maji kya dyanga, tumone hanji se mukonda dyahi Jihova wamesena kwila, tu kalakala kyambote ni uhete wetu wakuzwela.

4. Kala kilondekesa Malakiya 3:16, mukonda dyahi Jihova usuwa o ima ituzwela?

⁴ Tanga Malakiya 3:16. Utena kuxinganeka se mukonda dyahi Jihova wandasoneka ‘mu divulu dya dilembalelu’ o majina a yó amukala ni wôma axinganeka mu dijina dyê? O ima ituzwela ilondekesa yoso yatukala ku muxima. Jezú wambe: “O dikanu dizwela o ima yala ku muxima.” (Mat. 12:34) O ima itusola kuzwela ilondekesa se twazolo mwene Jihova mba kana. Jihova wamesena kwila o yó amuzolo, asanguluka katé ku hádya ni hádya mu mundu wa ubhe.

5. (a) Mu ukexilu webhi o ubhezelu wetu walungu ni ima ituzwela? (b) Kala kilondekesa o jifoto, yalungu ni ima ituzwela ihi itwatokala o kudilanga?

⁵ O ukexilu wetu wakuzwela wandalondekesa se Jihova wandaxikina o ubhezelu wetu mba kana. (Tiy. 1:26) Sayi ya akambe kuzola Nzambi, azwela ni undanda, sé henda ni kudizangeleka. (2 Ti. 3:1-5) Mukidi, kitumesena kukala kala ene. Etu tubhanga nguzu phala kusangulukisa o muxima wa Jihova, bhukaxi ka ima ituzwela. O kwila Jihova wandasanguluka n’etu se tuzwela ngó ni henda mu yônge ni musidivisu yakuboka, maji ni mwiji wetu kubhata tuzwela ni undanda, sé henda?—1 Ph. 3:7.

6. O uzwelelu wambote wa phange Suzana wabhekela mbote yahi?

⁶ Kyoso kituzwela ni henda, tulondekesa ku athu kwila, tu abhezi a Jihova. Tukwateksa  o athu atukondoloka kumona kyambote o kuditungula kwala “bhu kaxi ka yó ubheza Nzambi, ni yú wa ditunu ku mu bheza.” (Mal. 3:18) Kiki kyene kyabhiti ni phange ya muhatu amwixana Suzana. * Mwene amusolo phala kubhanga kikalakalu kya xikola kumoxi ni jikoleka jê. Kyazubha o kikalakalu, ene amono kwila, phange Suzana kadifwile ni jikoleka ja mukwâ. Mwene kexile mulongolola akwâ, wexile muzwela ima yambote yalungu ni ene, kexile muzwela ima yabolo. O jikoleka ja phange Suzana adiwana kyavulu, katé mwene axikina kudilonga o Bibidya. Jihova usanguluka kyavulu kyoso kitubhangesa o athu kumesena kumwijiya, mukonda dya ukexilu wetu wakuzwela!

7. Ihi iwamesena o kubhanga ni uhete wakuzwela wakubhana Nzambi?

⁷ Etwenyoso twamesena kuzwela mu ukexilu ubhana kijingu kwa Jihova, utuzukamesa dingi ku jiphange jetu. Kindalaphe, tudilonge maukexilu andatukwatekesa kusuluka ni kubhana “phangu yambote, . . . mu kuzwela.”

8. Phangu yahi yatuxila Jezú yalungu ni ukexilu wa kuzwela mu ukunji?

⁸ Kyoso kyakulokalala, zwela ni henda ni kuxila. Mu ukunji wê, Jezú amutatela o makutu a kwila, wexile hôlwa, wexile mukwa kudya kyavulu, wexile mukunji wa Dyabhu, mukwa kubhukumukina o kizuwa kya Sabhalu, katé mwene amutatela kwila waxingi Nzambi. (Mat. 11:19; 26:65; Luk. 11:15; Nzw. 9:16) Né kiki, Jezú kavutula phonzo. Kala kyabhangele Jezú, etu kitwatokala kuvutula phonzo, né mwene se athu atulokalala. (1 Ph. 2:21-23) Mu kidi, kudilanga mu ithangana yiyi kubhonza. (Tiy. 3:2) Ihi itena kutukwatekesa?

9. Ihi itena kutukwatekesa kulanga o dimi mu kuboka?

⁹ Se mukuboka usanga muthu uzwela sé henda, bhanga yoso phala ki udizangale. Sayi phange amwixana Samuwele, wambe: “Ngisota kulunga o muxima mu kibhindamu kya mukwa dibhata, kya kwijiya o kidi ni ima yatena kulungulula ku mwenyu wê.” Sayi ithangana o mukwa dibhata udizangala mukonda twabhixila ngó mwene mu ola kiyatokala. Se mu ukunji tudisanga ni muthu wadizangala, tutena kukayela yene mubhanga phange amwixana Lucia. Tutena kusamba, kubhinga kwa Jihova phala kutukwatekesa kutululuka, ni kulanga o dimi phala kituzwele ni undanda mba kukamba kuxila.

10. Kala kilondekesa 1 Timote 4:13, mbambe yebhi itwatokala kukala nayu?

¹⁰ Bandekesa o uhete wé wakulonga. Mu ukunji, Timote wexile kya ni mauhete. Maji né kiki, mwene wabhingile kusuluka ni kubandekesa  o mauhete mê akulonga. (Tanga 1 Timote 4:13.) Kyebhi kitutena kubandekesa o uhete wetu wakulonga mu ukunji? Twatokala kudipelepalala kyambote. Tusakidila Jihova, mukonda twala ni jifalamenda javulu jitukwatekesa kukala tu alongexi ambote. Kwandakukwatekesa kyavulu kutokwesa o kadivulu Ta O Muxima Wé Mu kutanga ni Kulonga ni mbandu “Kumbidila o Milongi Yiyi mu Ukunji wé” imoneka mu Ukexilu wa Ukidistá ni Ukunji Wetu—Milongi Phala o Yônge. O kwila wene mukatula mbote mu jifalamenda jiji? Se udipelepalala kyambote, kiwandakala ni woma, maji wandazwela ni kidyelelu kyoso.

11. Ihi yene mubhanga o jiphange phala kubandekesa o uhete wâ wakulonga?

¹¹ Tutena we kubandekesa o uhete wetu, mukutala kyebhi akwetu mukilunga kyene mulonga ni kukatula mbote mu uhete wâ. Phange Samuwele, twamutumbula kudima, wene mudibhwidisa se ihi yene mubhangesa o jiphange mukilunga kukala alongexi ambote. Mwene wividila kyambote kyebhi akwâ kyene mulonga, anga usota kukayela o phangu yâ. Phange yamuhatu amwixana Talina, wadilongo kyebhi kyatokala kuzwela ni kuxinganeka mu ibhwidisu yene mubhanga o athu mu ukunji, mukutala kyambote kyebhi o jiphange ala ni uhete wa kubhanga madiskulusu akatunda, kyene mujimbulula o maka.

12. Amoxi ene mudibhana ni ibhidi yebhi?

¹² Etwenyoso tutena kukwatekesa o yônge yetu yakilunga kwenda kyambote, mu kwimba ni dizwi dya swina kumoxi ni jiphange ni kubhana itambwijilu itula kumuxima. (Jisá. 22:22) Amoxi kyene mu abhonza kwimba mba kubhana itambwijilu bhukaxi ka athu avulu. O kwila kyene mubhita n’eye? Se kyene, wandawabhela kwijiya yakwatekesa akwenu kutolola o wôma wexile nawu.

13. Ihi itena kukukwatekesa kwimba ni muxima woso mu yônge?

¹³ Imba ni muxima woso. O kima kyabetakota kitubhangesa kwimba muyônge, o kumesena kuximana Jihova. Phange amwixana Sala, udivwa kwila kala ni uhete wakwimba. Maji né kiki, mwene wamesena kuximana Jihova bhukaxi ka mimbu. Kimukwatekesa kubhanga kiki, o kupelepalala o mimbu kubhata, kala kyene mubhanga ni jimbandu jamukwa ja yônge. Mwene wivwa lwavulu o mimbu, usota kwijiya kyebhi o izwelu yamimbu yalungu ni maka anda zwela mu kyônge. Mwene wambe: “Kubhanga kiki kungikwatekesa kulunga o muxima mu izwelu yamimbu, kana mu uhete wami wa kwimba.”

14. Se umukwa jisonyi, ihi yandakukwatekesa kutambwijila jinga mu yônge?

¹⁴ Sota kutambwijila mu yônge mu semana joso. Sayi ya kubhanga kiki kutena  kwabhonza lwavulu. Phange Talina, twamutumbula kudimatekenu, wajimbulula wixi: “Eme ngikala ni wôma wakuzwela bhwezala o mundu. Kyenyiki, kutambwijila muyônge kwene mungibhonza kyavulu.” Né kiki, phange Talina wene mutambwijila mwene mu yônge. Mu kupelepalala o yônge, mwene kajimbi kwila, o kitambwijilu kya dyanga, kikyatokala kubhana jihonda, maji kyatokala kutambwijila o kibhwidisu. Mwene wambe: “Kifwa, o kima kyabetakota, o kutumbula o pondo yakibhwidisu, né mwene se ngitambwijila mu izwelu yofele, yabhebhuluka. Kiki, kyene kyamesena phange wamukwendesa o milongi.”

15. Yalungu ni kutambwijila muyônge, ihi itwatokala kulembelala?

¹⁵ Né mwene o Jikidistá asakamanaku dingi, sayi ithangana akala we ni hele yakutambwijila mu yônge. Mukonda dyahi? Phange amwixana Julia wajimbula, wixi: “Sayi ithangana ngikala ni hele yakutambwijila muyônge mukonda dya kuxinganeka kwila, o itambwijilu yami kiyafwama kyambote kala ya akwetu.” Maji lembalala kwila, Jihova wamesena kuma, ubhana o itambwijilu yasoko ni i utena kubhana. * Mwene usanguluka kyavulu kyoso ki ubhanga yoso phala kumuximana mu yônge, se kwehela o hele kukufidisa.

16. Uzwelelu webhi utwatokala o kulenga?

¹⁶ Lenga o maukexilu oso a “jindaka.” (Efe. 4:31) Kala kyakitumbula kudimatekenu, o Kidistá katokala kuxinga jindaka. Maji sayi maukexilu akuxinga utwatokala we kulenga. Mu kifika, twatokala kudilanga phala kitusokese mu ukexilu wayibha, kyoso kitutumbula athu a idifwa yengi, miji yengi mba jixi jengi. Kitwandamesena we kuzwela ima ku akwetu, itwejiya kwila ene kawabhela ku ivwa, o imona kala kulokalala. Sayi phange waxikina ni kidi kyoso: “Eme ngazwelele kya ima ingafikile kwila kutonoka ngó, maji mukidi yexile muluwalesa akwetu. Mu mivu yavulu, muhatwami wexile mungitangela mukaswekele, kyoso kingexile muzwela kima kya luwalesa akwetu.”

17. Kala kilondekesa Efezu 4:29, kyebhi kitutena kuswinisa akwetu?

¹⁷ Zwela mu ukexilu uswinisa akwenu. Kala jinga ni kifwa kya kuximana akwenu, muveji dya kulongolola mba kudikalanganza. (Tanga Efezu 4:31.) Akwa Izalayele exile ni ima yavulu yeji kwa bhangesa kusakidila, maji muveji javulu ene adikalanganza. O muthu udikalanganza, utena kubhangesa akwa kudikalanganza we. Eye nange wamulembalala yabhiti, kyoso o dikwinyi dya alondi kya bheka  njimbu yayibha. O Bibidya yamba: “A’na Izalayele oso anga a longolola Mozé.” (Dya. 14:2) Maji o kuximana akwetu, kutena kubandekesa o kusanguluka kwâ. Tutena kudyelela kwila, o kiximanu kyatambula mon’a Jefete ku makamba mê, kyamukwatekesa kudikwatenena mu kikalakalu kyê. (Afun. 11:40) Phange Sala, twamutumbula kudima, wambe: “Kyoso kituximana akwetu, twa akwetekesa kumona kwila Jihova wa azolo, ni kwila, ene ala ni kididi mu kilunga kyê.” Kyenyikiphe, sota kuximana jinga akwenu ni muxima woso.

18. Kala kilondekesa Jisálamu 15:1, 2, mukonda dyahi kitutokala kutanga makutu? O kiki kyalungu we ni ihi?

¹⁸ Zwela ngó o kidi. Kitutena kusangulukisa Jihova se twenda ni kuzwela makutu. Mwene wazembe o maukexilu oso akutanga o makutu. (Jisa. 6:16, 17) Lelu, athu avulu axinganeka kwila, o kutanga o makutu ki kima kyayibha, maji etu tulenga o makutu mukonda Jihova wazembe o ukexilu wenyú. (Tanga Jisálamu 15:1, 2.) Kiki kyalungu we ni kutanga makutu. Etu kitubhangesa we akwetu kuxikina mu kima kya makutu.

19. Mu ihi dingi mutwabhingi kudilanga?

¹⁹ Kana kuta jimbwembwe. (Jisa. 25:23; 2 Te. 3:11) Phange Julia, twamutumbula kudima, wajimbulula o ibhidi yadibhananayu mukonda dya jimbwembwe. Mwene wambe: “Kwivwa o jimbwembwe kuluwalesa, kungibhangesa kukamba kudyelela o muthu wate o jimbwembwe. Mukonda kwandaya, utena we kungita jimbwembwe ni muthu wengi.” Se umona kwila o ima imwazwela yamukituka kya jimbwembwe, sota kulungulula o maka ni muzwela kima kyengi kiswinisa.—Kol. 4:6.

20. Ihi iwamesena kubhanga ni uhete wé wakuzwela?

²⁰ Kuma ku mundu ku twatungu athu avulu azwela ima yabolo, twabhingi kubhanga nguzu phala kusangulukisa Jihova mu izwelu yetu. Lembalala kwila, o uhete wakuzwela, ujitu watubhana Jihova. Mwene wamesena kwila, tudilanga ni ukexilu wetu wakuzwela. Mwene wanda tubesowala se tubhanga nguzu phala kuzwela mu ukexilu umusangulukisa, mu ukunji, mu yônge ni mu ima ituzwela mu kizuwa ni kizuwa. Kyoso Jihova kyandabwika o mundu yú wayibha, kikyanda tubhonza dingi kumubhana kijingu bhukaxi ka uzwelelu wetu. (Jud. 15) Katé kibhixila o kithangana kiki, sota kusangulukisa o muxima wa Jihova mu “kuzwela kwé.”—Jisá. 19:14.