1. Ngaˬ hui tawˇ yaw tuˬ a shu peꞈ laˇ ve le?

 Ngaˬ hui tawˇ yaw tuˬ Gʼuiˬ sha ngaˬ hui htaꞈ daꞈ jaˇ ve laꞈ shawnˍ peꞈ laˇ ve hkʼe hpehꞈ ve yoˬ. Yaˬhoˉvaˬ Aˍdanˍ htaꞈ hpanˍ peuˬ hkʼawꞈ nawˉ, Aˍdanˍ Gʼuiˬ sha htaꞈ tawˇ yaw daꞈ gʼa leh Aˍdanˍ laiˉ ceuˬ hpawˇ tawˇ yaw tuˬ awˬ hkʼaˇ shiˍ ve yoˬ. Hkʼe te leh, yawˇ puiˉ ve hpehꞈ ve chi htaꞈ yehˇ leh to nuˇ to shaˆ hkʼa peu˗eˬ htaꞈ awˬ meh meh piˇ ve yoˬ. (Awˬ hkuiˉ puiˍ 2:19) Chaw yaˇ awˬ nu ve teˇ gʼaˇ htaꞈ yawˇ tawˇ awˉ lawˉ teˇ pawˆ gʼa yaw piˇ htaˇ, yawˇ ha lehˬ jaˇ ve yoˬ hehˉ. Chi ve lehˬ yawˇ ve awˬ miˇ ma Eˇvaꞈ htaꞈ yoˬ!—Awˬ hkuiˉ puiˍ 2:22, 23.

2. Oˇ htaˇ teˇ co˗e leh chi beuꞈ teˇ co˗e kaꞈ tawˇ maˇ cawˇ ve hpawˇ hkʼaˬ hkʼe yaw ve le?

² Maˇ maw tawˇ maˇ cawˇ ve hpawˇ tanˬ yaw la ve yoˬ. Saˍtanˍ Eˇvaꞈ htaꞈ heˍ piˇ ve pa taw, chaw yaˇ venˇ baˆ cawˬ la leh maˇ biˇ ve chaw hpehꞈ ve yoˬ. (Awˬ hkuiˉ puiˍ 3:1-4) Aˍdanˍ kaꞈ maˇ cawˇ ve hpawˇ tawˇ yaw ve yoˬ. Gʼuiˬ sha maˇ caˇ tcuh taˍ ve iˉ shiˍ Eˇvaꞈ yawˇ htaꞈ caˇ tcuh laˇ ve tehꞈ kʼoˆ leh yawˇ Gʼuiˬ sha htaꞈ kaꞈ venˇ baˆ taˍ ve yoˬ. (Awˬ hkuiˉ puiˍ 3:12) Kaˍiˉnaˆ yawˇ ve awˬ nyi paˍ Aˍbeˍlaˆ htaꞈ tiˇ pehˍ peuˬ hkʼawꞈ nawˉ Yaˬhoˉvaˬ htaꞈ heˍ piˇ ve yoˬ. (Awˬ hkuiˉ puiˍ 4:9) Kaˍiˉnaˆ ve awˬ yaˇ awˬ duˬ Laˍmehˆ ve awˬ co˗e htaˇ, hehnˇ ve htaꞈ caˉ daꞈ ve yawˇ kʼoˆ ve yoˬ. (Awˬ hkuiˉ puiˍ 4:23, 24) Chi beuꞈ teˇ co˗e mvuhˇ miˬ kanˉ te paˍ tawˇ maˇ daꞈ ve yaw leh shu gʼuˇ suhˍ lo maˇ yaꞈ taw ve hkʼaw maˇ daꞈ ve tawˇ yaw ve yoˬ. Leh awˬ han hkʼaw kaꞈ maˇ daꞈ ve tawˇ yaw ve cawˬ maˇ ve yoˬ. Liꞈ henˇ yaˇ kaꞈ liꞈ henˇ yehˬ hkʼaw maˇ daꞈ ve tawˇ hkʼaˬ htaˆ kaꞈ gʼa kaˇ ve pa taw a hkʼe leˇ ceh hpehꞈ ve tehꞈ dawˇ ve yoˬ. Leh kanˉ te kuiˬ hkʼaw ve chaw kaꞈ maˇ daꞈ ve tawˇ yaw daꞈ ve yoˬ. Maˇ daꞈ ve tawˇ yaw ve a hkʼe leˇ ceh hpehꞈ ve tehꞈ shawˍ ve pa taw, miˬ guiˬ chi hkʼoˆ lo gʼaˇ hteꞈ luˬ kʼai chehˇ ve yoˬ.

3. Ngaˬ hui aˬ htoꞈ ma htaꞈ shaˍ tiꞈ gʼa te cawˇ ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Ngaˬ hui shaˍ tiꞈ maˇ te ve kʼo, awˬ nu ve chaw maˇ daꞈ ve tawˇ yaw ve hkʼe ngaˬ hui kaꞈ yaw la ve yoˬ. Yaꞈ hkʼaˇ, Yaˬhoˉvaˬ Gʼuiˬ sha ngaˬ  hui htaꞈ nyi hkʼaˇ suh tcuh gaˇ ve kʼo, pehꞈ ve tzuhˆ ve hpawˇ maˇ heˆ leh maˇ daꞈ ve tawˇ maˇ yaw ve ceh maˇ heˆ. Ngaˬ hui tawˇ yaw ve lehˬ, Yaˬhoˉvaˬ geh gʼa ve laꞈ shawnˍ hkʼe hpehꞈ leh yawˇ htaꞈ chiˇ mvuh cawˇ ve yoˬ. Chi ve ngaˬ hui hkʼaˬ hkʼe te gʼa tuˬ awˬ lawn chi ve hkʼaw teˇ geh henˇ tuˬ yoˬ. (1) Gʼuiˬ sha ve kanˉ te ve, (2) hpawnˬ daꞈ ve, leh (3) awˬ nu ve chaw geh tawˇ yaw daꞈ ve yoˬ. Ngaˬ hui tawˇ yaw ve lehˬ, Yaˬhoˉvaˬ awˬ pon a yeˇ hkʼaˬ hkʼe taw uiˍ ve chi ve htaꞈ awˉ lawˉ teˇ geh henˇ tuˬ yoˬ.

4. Maˍlaˍhkiˆ liꞈ 3:16 hkʼaw ngaˬ hui tawˇ yaw ve Yaˬhoˉvaˬ awˬ pon a yeˇ uiˍ jaˇ tehꞈ hkʼaˬ hkʼe hpeuꞈ maw piˇ gʼa ve le?

⁴ Maˍlaˍhkiˆ liꞈ 3:16 gʼaw sheˍ. Chi ve teˇ tawn hkʼaw chaw teˇ hpaˍ, “[Yaˬhoˉvaˬ] htaꞈ kawˆ leh yawˆ yan ve” tehꞈ hpeuꞈ maw piˇ ve yoˬ. Gʼuiˬ sha ve “caˇ lanˇ” hkʼaw yawˇ hui ve awˬ meh bvuhꞈ keu tcuh taˍ ve yoˬ. Nawˬ dawˇ kʼo, aˬ htoꞈ ma te chi hkʼe hpehꞈ ve le? Yawˇ hui yaw ve tawˇ yawˇ hui ve nyi ma hkʼaw hkʼaˬ hkʼe cawˬ ve shiˍ tuˬ hpeuꞈ maw piˇ ve yoˬ. Yeˍsuˆ kʼoˆ ve, “nyi ma awˬ hkʼaw lo hkʼa biˇ cawˬ ve hkʼe, mawꞈ kʼaw yaw tawˆ la ve yoˬ.” (Maꞈhtehˍ 12:34) Ngaˬ hui yaw ve tawˇ kaꞈ Yaˬhoˉvaˬ htaꞈ hkʼaˬ hkʼe taw haꞈ ve hpeuꞈ maw piˇ gʼa ve yoˬ. Leh Yaˬhoˉvaˬ kaꞈ yawˇ htaꞈ haꞈ ve chaw miˬ guiˬ awˬ suhˉ hkʼaw co co taiˍ taiˍ chehˇ tcuh gaˇ ve yoˬ.

5. (a) Ngaˬ hui yaw ve tawˇ leh Gʼuiˬ sha htaꞈ oˉ kʼoˍ pui ve hkʼaˬ hkʼe te caˉ daꞈ ve le? (b) Liꞈ kʼoˆ chi ve hkʼaw awˬ han htaꞈ ngaˬ hui mawˬ ve hkʼa shuˍ, ngaˬ hui Yaˬhoˉvaˬ nyi hkʼaˇ suh tcuh gaˇ ve kʼo, aˬ htoꞈ ma gʼa te cawˇ ve le?

⁵ Yaˬhoˉvaˬ ngaˬ hui oˉ kʼoˍ pui ve htaꞈ haꞈ yuˬ laˇ tuˬ, maˇ heˆ leh maˇ haꞈ yuˬ laˇ tuˬ, ngaˬ hui tawˇ yaw ve htaꞈ caˉ daꞈ ve yoˬ. (Yaˍkoˆ 1:26) Gʼuiˬ sha htaꞈ maˇ haꞈ ve chaw lehˬ, heuˉ keu ve, maˇ daꞈ ve tawˇ yaw ve, leh nyi ma uiˍ ve tawˇ yaw ve, maˇ heˆ leh shu htaꞈ nyi cha ve yoˬ. (2 Tiˆmoˉseˍ 3:1-5) Ngaˬ hui chi hkʼe maˇ hpehꞈ gaˇ taˬ. Ngaˬ hui tawˇ yaw ve awˬ hkʼaw lo Yaˬhoˉvaˬ nyi hkʼaˇ suh tuˬ hkʼaˬ htaˆ kaꞈ yaw gaˇ ve yoˬ. Hpawnˬ daꞈ kuiˬ hkʼaw leh hto toˇ kuiˬ awˬ ti lo ngaˬ hui awˬ nu ve chaw htaꞈ tawˇ daꞈ daꞈ yaw piˇ ve kʼo Yaˬhoˉvaˬ nyi hkʼaˇ suh tuˬ laˇ? Yaꞈ hkʼaˇ, awˬ nu ve chaw maˇ mawˬ htaˇ, yehˬ kʼa hkʼaw ve chaw htaꞈ maˇ daꞈ ve tawˇ yaw piˇ ve kʼo, Yaˬhoˉvaˬ nyi hkʼaˇ suh tuˬ laˇ?—1 Peˍtruˆ 3:7.

6. Hki˗bon˗liˇ yaw ve tawˇ awˬ bon hkʼaˬ hkʼe cawˬ ve le?

⁶ Ngaˬ hui na sha ve tawˇ yaw ve kʼo, ngaˬ hui Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ a shu kaꞈ shiˍ tuˬ yoˬ. ‘Gʼuiˬ sha ve tawˇ htaꞈ na  yuˬ ve chaw leh maˇ na yuˬ ve chaw’ hkʼaˬ ma peun daꞈ ve awˬ nu ve chaw mawˬ tuˬ, ngaˬ hui hpeuꞈ maw piˇ gʼa ve yoˬ. (Maˍlaˍhkiˆ 3:18) Awˬ viˉ awˬ nyi Hki˗bon˗liˇ b ve awˬ lawn htaꞈ teˇ geh nyi sheˍ. Liꞈ henˇ kuiˬ lo ve saˍ laꞈ Hki˗bon˗liˇ htaꞈ awˬ chawˇ teˇ gʼaˇ geh kanˉ teˇ geh te tcuh ve yoˬ. Kanˉ teˇ geh te htaˇ awˬ chawˇ chi ve teˇ gʼaˇ lehˬ Hki˗bon˗liˇ awˬ nu ve chaw htaꞈ maˇ shuˍ ve yawˇ gʼa mawˬ ve yoˬ. Hki˗bon˗liˇ shu ve awˬ lawn maˇ hkʼaiˉ ve, maˇ daꞈ ve tawˇ maˇ yaw ve, leh daꞈ ve hpawˇ yaw ve yoˬ. Awˬ chawˇ chi ve teˇ gʼaˇ Hki˗bon˗liˇ ve te hkʼaˇ dawˇ hkʼaˇ htaꞈ dawˇ cawˇ jaˇ leh yawˇ geh Liꞈ hpu henˇ tuˬ kʼoˆ piˇ ve yoˬ. Ngaˬ hui tawˇ yaw ve kaꞈ awˬ nu ve chaw awˬ tehˬ ve htaꞈ nyi ma pfuhˇ tuˬ te piˇ ve kʼo, Yaˬhoˉvaˬ ha lehˬ jaˇ tuˬ yoˬ!

7. Tawˇ yaw ve lehˬ Yaˬhoˉvaˬ geh gʼa ve laꞈ shawnˍ hpehꞈ ve pa taw ngaˬ hui hkʼaˬ hkʼe yaw gaˇ ve le?

⁷ Ngaˬ hui teˇ gʼaˇ le le tawˇ yaw ve lehˬ, Yaˬhoˉvaˬ awˬ meꞈ awˬ hponˇ gʼa tuˬ leh awˬ viˉ awˬ nyi geh meuˆ daꞈ maˇ la tuˬ yaw gaˇ ve yoˬ. Ngaˬ hui tawˇ yaw ve lehˬ shu awˬ pon “henˇ kuiˬ jawˬ kuiˬ” hkʼaˬ hkʼe hpehꞈ gʼa tuˬ chi teˇ hkui teˇ geh henˇ tuˬ yoˬ.

8. Yeˍsuˆ miˬ guiˬ hkʼoˆ Gʼuiˬ sha ve kanˉ te htaˇ yawˇ ngaˬ hui awˬ pon daꞈ ve henˇ yuˬ tuˬ hkʼaˬ hkʼe hpehꞈ ve le?

⁸ Shu nawˬ htaꞈ maˇ daꞈ ve tawˇ yaw laˇ htaˇ nuˇ nehˬ ve leh yawˆ yan ve hkʼaw yaw piˇ ve. Yeˍsuˆ miˬ guiˬ hkʼoˆ Gʼuiˬ sha ve kanˉ te htaˇ caˇ leuˉ dawˬ leuˉ ve chaw, a pehˉ meuˇ gʼuiˬ dawˬ ponˬ dawˬ leuˉ ve chaw, Saˍtanˍ geh kanˇ paˆ gʼa ve chaw, leh shinˉ nyi ve awˬ liˇ htaꞈ maˇ gʼaꞈ te ve chaw tehꞈ shu she pfuhˍ piˇ ve yoˬ. Leh chaw teˇ hpaˍ kʼo, Yeˍsuˆ Gʼuiˬ sha htaꞈ maˇ shawˍ maˇ caˆ te ve tehꞈ kʼoˆ piˇ ve yoˬ. (Maꞈhtehˍ 11:19; 26:65; Luˉkaꞈ 11:15; Yoˇhanˬ 9:16) Yaꞈ hkʼaˇ, Yeˍsuˆ hehnˇ ve tawˇ maˇ yaw hkʼawꞈ piˇ. Ngaˬ hui Yeˍsuˆ htaꞈ henˇ yuˬ cawˇ ve yoˬ. Ngaˬ hui htaꞈ shu maˇ daꞈ ve tawˇ yaw laˇ htaˇ, tawˇ hehnˇ ve hkʼaw maˇ yaw hkʼawꞈ piˇ cawˇ. (1 Peˍtruˆ 2:21-23) Yaꞈ hkʼaˇ, chi hkʼe te tuˬ maˇ sha. (Yaˍkoˆ 3:2) Hkʼe kʼo, ngaˬ hui htaꞈ aˬ htoꞈ ma ga laˇ gʼa tuˬ le?

9. Hto toˇ˗e htaˇ ngaˬ hui tawˇ yaw ve htaꞈ shaˍ tiꞈ te tuˬ aˬ htoꞈ ma ga laˇ ve le?

⁹ Nawˬ hto toˇ˗e htaˇ yehˬ shehˍ hpaˇ maˇ daꞈ ve tawˇ yaw laˇ ve kʼo, nyi ma taˇ zuhˆ. Awˬ viˉ awˬ nyi Shehn kʼoˆ ve, “yehˬ shehˍ hpaˇ Liꞈ hpu hkʼaw awˬ tehˬ ve htaꞈ gʼa shiˍ cawˇ leh yawˇ ve te hkʼaˇ dawˇ hkʼaˇ gʼa pa cawˇ ve tehꞈ ngaˬ dawˇ ve yoˬ.” Teˇ pawˆ pawˆ yehˬ shehˍ hpaˇ nyi ma maˇ sha htaˇ, yawˇ hui geh ngaˬ hui tawˇ ca yaw˗e ve pa taw deˇ laˇ ve yoˬ. Shu ngaˬ hui htaꞈ maˇ daꞈ ve tawˇ yaw laˇ ve gʼa hpuˇ htaˇ, awˬ viˉ awˬ nyi Lu˗she˗a hkʼe ngaˬ hui te gʼa ve yoˬ. Yehˬ shehˍ hpaˇ yawˇ htaꞈ deˇ piˇ htaˇ, yawˇ nyi ma gawˬ lehˍ cawˬ tuˬ Yaˬhoˉvaˬ geh bon chi suhˉ˗ehˍ lawˬ ve, maˇ daꞈ ve tawˇ maˇ yaw piˇ ve, maˇ heˆ leh yawˇ htaꞈ maˇ yawˆ yan ve maˇ te piˇ.

10. 1 Tiˆmoˉseˍ liꞈ 4:13 hkʼaw kʼoˆ taˍ ve hkʼe, ngaˬ hui aˬ htoꞈ ma te tuˬ dawˇ teh taˍ cawˇ ve le?

¹⁰ Maˍ cheuˬ la tuˬ ve. Tiˆmoˉseˍ Gʼuiˬ sha ve kanˉ te cheuˬ leh hpehꞈ laˬ jaw ve awˬ lawn kaꞈ cawˬ ve yoˬ. Yaꞈ hkʼaˇ, yawˇ maˍ cheuˬ la tuˬ kaꞈ te jawˬ ve yoˬ.  (1 Tiˆmoˉseˍ 4:13 gʼaw sheˍ.) Hkʼe kʼo, ngaˬ hui hkʼaˬ hkʼe te maˍ cheuˬ la gʼa tuˬ le? Ngaˬ hui maˍ cheuˬ la gʼa tuˬ ngaˬ hui hkʼa dehꞈ gu ve kʼo, ngaˬ hui htaꞈ ga laˇ gʼa ve laꞈ caˉ laiˉ ceuˬ cawˬ ve yoˬ. Tawˇ pa haˉ te kʼo, Gʼaw leh maˍ puiˉ tuˬ coˇ caˇ sheˍ tehꞈ kʼoˆ ve liꞈ kʼoˆ leh Ngaˬ hui Hkriꞈ yaˇ a shaꞈ teꞈ hkʼaˇ leh Gʼuiˬ sha kanˉ te ve liꞈ kʼoˆ hkʼaw “Nawˬ hto toˇ kuiˬ lo yuˬ yehˇ tuˬ ve awˬ lawn” chi ve hkʼaw beˆ maˍ laˇ taˍ ve htaꞈ nawˬ yuˬ yehˇ˗oˬ laˇ? Ngaˬ hui hkʼa dehꞈ gu ve kʼo, tawˇ yaw htaˇ maˇ veˆ leh tawˇ hkʼa dehꞈ yaw gʼa ve yoˬ.

11. Awˬ viˉ awˬ nyi teˇ hpaˍ maˍ cheuˬ la tuˬ hkʼaˬ hkʼe te ve le?

¹¹ Ngaˬ hui hkʼa dehꞈ maˍ cheuˬ la tuˬ ve awˬ nu ve teˇ hkʼaˇ lehˬ, Hkriꞈ yaˇ awˬ moˍ hkʼaw awˬ viˉ awˬ nyi htaꞈ henˇ yuˬ sheˍ. Chi awˬ gʼuˇ suhˍ htaˇ kʼoˆ kʼai peuˬ ve awˬ viˉ awˬ nyi Shehn hkʼaˬ hkʼe te maˍ cheuˬ ve awˬ hkʼaˇ htaꞈ yawˇ nyi ve yoˬ. Yawˇ hui Liꞈ hpu maˍ chehˇ htaˇ Shehn hkʼa dehꞈ na taˍ leh yawˇ hui hkʼe gʼaꞈ te ve yoˬ. Awˬ viˉ awˬ nyi yaˇ miˇ Htan˗li˗aˬ kaꞈ shinˉ nyi htaˇ, awˬ viˉ awˬ nyi bon maˍ cheuˬ ve htaꞈ yawˇ hkʼa dehꞈ na taˍ ve yoˬ. Yawˇ hto toˇ htaˇ shu na laˇ hkʼeh ve awˬ lawn htaꞈ hkʼawꞈ piˇ gʼa tuˬ, bon maˍ paˍ hkʼaˬ hkʼe te maˍ ve leh awˬ hkʼaˇ hkʼaˬ hkʼe te ca ve htaꞈ yawˇ henˇ yuˬ ve yoˬ.

12. Awˬ viˉ awˬ nyi teˇ hpaˍ aˬ htoꞈ ma te maˇ haꞈ hanˉ ve le?

¹² Ngaˬ hui teˇ gʼaˇ le le hpawnˬ daꞈ htaˇ, te gʼa ve awˬ ceuˬ lehˬ kʼa muiˬ hkawˇ kʼa leh hkʼa dehꞈ gu taˍ ve htaꞈ hkʼawꞈ ve yoˬ. (Chiˇ mvuh ve 22:22) Yaꞈ hkʼaˇ, awˬ viˉ awˬ nyi teˇ hpaˍ kʼo maˇ hkʼawꞈ haˆ leh kʼa muiˬ hkawˇ kʼa htaˇ shu kaˇ la ve htaꞈ yaꞈ taw ve yoˬ. Nawˬ chi hkʼe hpehꞈ˗aw laˇ? Chi hkʼe hpehꞈ ve kʼo, awˬ viˉ awˬ nyi hkʼaˬ hkʼe te haꞈ hanˉ la ve awˬ lawn htaꞈ teˇ geh nyi sheˍ.

13. Nawˬ nyi ma awˬ tawˬ hkʼa gaˬ kʼa muiˬ hkawˇ kʼa gʼa tuˬ aˬ htoꞈ ma ga laˇ ve le?

¹³ Nyi ma awˬ tawˬ hkʼa gaˬ kʼa muiˬ hkawˇ kʼa ve. Ha lehˬ ha kʼa ve hkʼaw Yaˬhoˉvaˬ htaꞈ kʼa muiˬ hkawˇ kʼa piˇ ve a yeˇ uiˍ jaˇ ve teˇ hkʼaˇ lehˬ, ngaˬ hui Yaˬhoˉvaˬ htaꞈ chiˇ mvuh gaˇ ve yoˬ. Awˬ viˉ awˬ nyi yaˇ miˇ Sa˗laˇ yawˇ kʼa muiˬ hkawˇ kʼa ve maˇ cheuˬ tehꞈ dawˇ ve htawˇ, yawˇ Yaˬhoˉvaˬ htaꞈ chiˇ mvuh piˇ tuˬ kʼa muiˬ hkawˇ kʼa gaˇ ve yoˬ. Hkʼe te leh, yawˇ hpawnˬ daꞈ kuiˬ hkʼaw hkʼawꞈ tuˬ hkʼaˬ htaˆ kaꞈ gu ve hkʼe, yawˇ aˉ hkʼaw chehˇ htaˇ kʼa muiˬ hkawˇ kʼa jawˬ ve yoˬ. Kʼa muiˬ hkawˇ hkʼaw ve chi hpawnˬ daꞈ ve htaꞈ hkʼaˬ hkʼe te caˉ daꞈ ve yawˇ nyi leh kʼa jawˬ ve yoˬ. Yawˇ kʼoˆ ve, “chi hkʼe te ve lehˬ ngaˬ kʼa muiˬ hkawˇ kʼa ve awˬ hkawˇ daꞈ maˇ daꞈ ve htaꞈ a yeˇ te ve aꞈ kehˉ, kʼa muiˬ hkawˇ hkʼaw ve awˬ lawn htaꞈ a yeˇ te tuˬ ga laˇ ve yoˬ.”

14. Nawˬ yaꞈ taw puiˉ ve chaw hpehꞈ ve kʼo, hkʼaˬ htaˆ kaꞈ hpawnˬ daꞈ kuiˬ hkʼaw hkʼawꞈ haˆ tuˬ aˬ htoꞈ ma ga laˇ ve le?

¹⁴ Hkʼaˬ htaˆ kaꞈ hkʼawꞈ ve. Awˬ viˉ awˬ nyi teˇ hpaˍ hpaˍ kʼo hkʼawꞈ tuˬ haˍ jaˇ. Chi awˬ gʼuˇ suhˍ htaˇ henˇ kʼai peuˬ ve Htan˗li˗aˬ kʼoˆ ve, “ngaˬ chaw awˬ moˍ lonˉ geh chehˇ htaˇ kawˆ ve yoˬ. Maˇ˗awˍ ve kʼo, ngaˬ hkʼawꞈ htaˇ ngaˬ ve awˬ hkawˇ maˇ veˆ ve pa taw, awˬ viˉ awˬ nyi maˇ shiˍ. Ngaˬ hkʼawꞈ ve teˇ pawˆ le le kawˆ jaˇ.” Htan˗li˗aˬ chi hkʼe hpehꞈ ve htawˇ, yawˇ hkʼawꞈ tuˬ laꞈ sheh chiˇ ve yoˬ. Hpawnˬ daꞈ ve hkʼaw hkʼawꞈ tuˬ gu htaˇ, na hkawˇ htaꞈ hawˍ daꞈ tuˬ chi suhˉ˗ehˍ  hkʼawꞈ ve yoˬ. Htan˗li˗aˬ kʼoˆ ve, “na hkawˇ htaꞈ hawˍ daꞈ ve chi suhˉ˗ehˍ hkʼawꞈ ve kaꞈ cawˇ˗oˬ. Awˬ tehˬ kʼo, sheh kʼai shehˍ hpaˇ lehˬ chi suhˉ˗ehˍ kʼawꞈ piˇ ve htaꞈ dawˇ cawˇ ve yoˬ.”

15. Hpawnˬ daꞈ kuiˬ hkʼaw hkʼawꞈ ve htaꞈ caˉ daꞈ ve ngaˬ hui aˬ htoꞈ ma htaꞈ tawnˇ taˍ cawˇ ve le?

¹⁵ Awˬ viˉ awˬ nyi teˇ hpaˍ hpaˍ kʼo maˇ yaꞈ taw puiˉ ve htawˇ, hpawnˬ daꞈ kuiˬ hkʼaw hkʼa dehꞈ maˇ hkʼawꞈ. Aˬ htoꞈ ma pa taw le? Awˬ viˉ awˬ nyi Cu˗li˗aˬ kʼoˆ ve, “teˇ pawˆ pawˆ hkʼawꞈ tuˬ ngaˬ laꞈ sheh maˇ chiˇ ve lehˬ, ngaˬ hkʼawꞈ ve hkʼa dehꞈ maˇ daꞈ ve tehꞈ dawˇ ve pa taw yoˬ.” Yaˬhoˉvaˬ lehˬ ngaˬ hui htaꞈ hkʼa dehꞈ gu leh hkʼawꞈ tcuh gaˇ ve tehꞈ tawnˇ taˍ sheˍ. c Yaꞈ hkʼaˇ, ngaˬ hui te gʼa ve hkʼe te˗oˬ ve kʼo, ha lehˬ jaˇ ve yoˬ. Awˬ lawn kʼo, ngaˬ hui kawˆ ve htaꞈ gʼaˇ tuˬ coˇ caˇ leh Gʼuiˬ sha htaꞈ chiˇ mvuh tuˬ dawˇ teh taˍ ve tehꞈ yawˇ shiˍ ve yoˬ.

16. Ngaˬ hui tawˇ yaw htaˇ hkʼaˬ hkʼe ve htaꞈ shaˍ tiꞈ te cawˇ ve le?

¹⁶ “Shu htaꞈ maˇ shawˍ maˇ caˆ kʼoˆ ve” teˇ ceuˬ le le ngaˬ hui maˇ yaw. (Eˇfeˇsuꞈ 4:31) Ngaˬ hui gʼa henˇ˗oˬ ve hkʼe, Hkriꞈ yaˇ lehˬ maˇ daꞈ ve tawˇ maˇ yaw. Awˬ lawn maˇ uiˍ ve tehꞈ ngaˬ hui dawˇ ve htawˇ, awˬ nu ve tawˇ maˇ daꞈ ve htaꞈ ngaˬ hui maˇ yaw tuˬ shaˍ tiꞈ gʼa te ve yoˬ. Tawˇ pa haˉ te kʼo, awˬ nu teˇ kaˬ lo laˬ ve chaw, awˬ nu ve chaw liˇ vaˇ liˇ, ngaˬ hui htaꞈ maˇ shuˍ ve chaw ceuˬ, shu nyi ma naˬ tuˬ tawˇ maˇ yaw leh shu htaꞈ maˇ gʼa tehˆ daꞈ tuˬ ngaˬ hui shaˍ tiꞈ gʼa te ve yoˬ. Awˬ viˉ awˬ nyi hawˉ hkʼaˆ teˇ gʼaˇ kʼoˆ ve, “ngaˬ shu htaꞈ kʼoˆ guiˇ puiˉ ve chaw hpehꞈ ve yoˬ. Teˇ pawˆ pawˆ kʼo ngaˬ shu ve awˬ lawn maˇ daꞈ ve htaꞈ kʼoˆ guiˇ gʼuiˬ guiˇ piˇ ve yoˬ. Chi ve teꞈ chiˉ maˇ heˆ, gʼuiˬ yaw guiˇ tuˬ ceh hpehꞈ ve tehꞈ dawˇ ve yoˬ. Yaꞈ hkʼaˇ, awˬ tehˬ kʼo shu nyi ma naˬ tuˬ te piˇ ve yoˬ. Hkʼe te leh, ngaˬ miˇ ma ngaˬ htaꞈ ga laˇ ve yoˬ. Ngaˬ shu htaꞈ kʼoˆ guiˇ gʼuiˬ guiˇ piˇ htaˇ ngaˬ yaw ve tawˇ lehˬ, yawˇ nyi ma naˬ tuˬ te piˇ leh awˬ nu ve chaw htaꞈ kaꞈ nyi ma naˬ tuˬ te piˇ ve tehꞈ ngaˬ huiˉ maˬ tiˉ chehˇ htaˇ ngaˬ miˇ ma ngaˬ htaꞈ kʼoˆ laˇ ve yoˬ.”

17. Eˇfeˇsuꞈ liꞈ 4:29 hkʼaw kʼoˆ taˍ ve hkʼe, ngaˬ hui shu htaꞈ awˬ gʼaˇ piˇ ve tawˇ hkʼaˬ hkʼe yaw piˇ gʼa tuˬ le?

¹⁷ Shu htaꞈ awˬ gʼaˇ piˇ ve tawˇ yaw ve. Ngaˬ hui awˬ nu ve chaw htaꞈ taˇ deˇ piˇ. Hkʼaˬ htaˆ kaꞈ chiˇ mvuh piˇ sheˍ. (Eˇfeˇsuꞈ 4:29 gʼaw sheˍ.) Iˉsaˍreˍlaˆ chaw hui Yaˬhoˉvaˬ geh daꞈ ve awˬ ceuˬ laiˉ ceuˬ gʼa ve htawˇ, yawˇ hui hkʼanˇ naˉ jaˇ. Hkʼanˇ ve lehˬ teˇ gʼaˇ hkʼanˇ ve kʼo, teˇ gʼaˇ kaꞈ kʼawꞈ gʼaꞈ hkʼanˇ la ve yoˬ. Ngaˬ hui hkʼanˇ ve kʼo, awˬ nu ve chaw kaꞈ ngaˬ hui hkʼaˇ suh gʼaꞈ hkʼanˇ la ve yoˬ. Nawˬ chaw jaˆ 10 gʼaˇ ve awˬ lawn htaꞈ tawnˇ gʼa ve yoˬ hehˉ. Iˉsaˍreˍlaˆ chaw lehˬ yawˇ hui kʼoˆ ve maˇ daꞈ ve awˬ lawn htaꞈ gʼa kaˇ htaˇ, ‘yawˇ hui Moˉseˍ htaꞈ hkʼanˇ maˍ piˇ ve yoˬ.’ (Heh puiˉ hkʼaw 13:31–14:4) Chiˇ mvuh piˇ ve lehˬ shu daꞈ ve htaꞈ te tuˬ awˬ gʼaˇ gʼa ve yoˬ. Yeˍhpaˍtaˆ ve yaˇ miˇ yawˇ ve awˬ vuiˬ htaꞈ hkʼa dehꞈ te gʼa ve lehˬ, yawˇ ve  awˬ chawˇ Iˉsaˍreˍlaˆ chaw yaˇ miˇ teˇ hpaˍ yawˇ htaꞈ hkʼaˬ htaˆ kaꞈ chiˇ mvuh piˇ ve tehꞈ ngaˬ hui yonˍ gʼa ve yoˬ. (Suhˉ jehˬ ve 11:40) Chi awˬ gʼuˇ suhˍ htaˇ henˇ kʼai peuˬ ve Sa˗laˇ kʼoˆ ve, “shu htaꞈ chiˇ mvuh piˇ ve lehˬ Yaˬhoˉvaˬ yawˇ htaꞈ haꞈ leh yawˇ Gʼuiˬ sha ve kanˉ hkʼaˇ hkʼaw awˬ hpfuhˇ cawˬ ve tehꞈ dawˇ ve yoˬ.” Chi htaꞈ pa taw, shu htaꞈ nyi ma awˬ tawˬ hkʼa gaˬ chiˇ mvuh piˇ tuˬ awˬ yanˇ ca sheˍ.

18. Chiˇ mvuh ve liꞈ 15:1, 2 hkʼaw kʼoˆ taˍ ve hkʼe, aˬ htoꞈ ma te ngaˬ hui awˬ tehˬ ve tawˇ htaꞈ yaw cawˇ ve le? Leh awˬ tehˬ ve tawˇ yaw ve aˬ htoꞈ ma htaꞈ kʼoˆ gaˇ ve le?

¹⁸ Awˬ tehˬ ve tawˇ yaw ve. Ngaˬ hui awˬ tehˬ ve tawˇ maˇ yaw ve kʼo, Yaˬhoˉvaˬ ngaˬ hui htaꞈ nyi hkʼaˇ maˇ suh taˬ. Heˍ ve teˇ ceuˬ le le htaꞈ Yaˬhoˉvaˬ maˇ dawˇ cawˇ. (Tawˇ naˉ ve 6:16, 17) Chi beuꞈ teˇ co˗e ve chaw lehˬ, heˍ ve a hkʼe leˇ ceh hpehꞈ ve tehꞈ dawˇ ve htawˇ, chi hkʼe ve htaꞈ Yaˬhoˉvaˬ maˇ dawˇ cawˇ tehꞈ ngaˬ hui shiˍ leh ngaˬ hui yawˇ dawˇ ve hkʼe gʼa dawˇ ve yoˬ. (Chiˇ mvuh ve 15:1, 2 gʼaw sheˍ.) Ngaˬ hui heˍ ve tawˇ maˇ yaw cawˇ. Yaꞈ hkʼaˇ, chi hkʼe ceh tiˉ maˇ heˆ. Shu nyi ma maˇ sha tuˬ ngaˬ hui tawˇ maˇ yaw piˇ tuˬ dawˇ teh taˍ cawˇ ve yoˬ.

19. Ngaˬ hui shaˍ tiꞈ gʼa te cawˇ ve aˬ htoꞈ ma cawˬ sheˍ ve le?

¹⁹ Shu htaꞈ taˇ hkʼaiˉ. (Tawˇ naˉ ve 25:23; 2 Hteˇsaˍlawˇniˆ 3:11) Chi awˬ gʼuˇ suhˍ htaˇ henˇ kʼai peuˬ ve Cu˗li˗aˬ kʼoˆ ve, “shu htaꞈ hkʼaiˉ ve lehˬ ngaˬ nyi ma maˇ sha tuˬ te laˇ ve yoˬ. Chaw teˇ gʼaˇ shu ve awˬ lawn ngaˬ htaꞈ kʼoˆ maˍ laˇ htaˇ nyi ma maˇ sha. Hkʼe te leh, ngaˬ htaꞈ kʼoˆ maˍ laˇ ve chaw htaꞈ kaꞈ maˇ dawˇ cawˇ. Awˬ lawn kʼo, yawˇ ngaˬ htaꞈ kaꞈ maˇ hkʼaiˉ tuˬ ve laˇ?” Nawˬ awˬ nu ve chaw geh tawˇ yaw daꞈ chehˇ ve kʼo, tawˇ yaw daꞈ chehˇ ve awˬ lawn shu htaꞈ hkʼaiˉ ve tehꞈ dawˇ ve kʼo, daꞈ ve hpawˇ tawˇ yaw daꞈ sheˍ.—Kawˇlawˇsehˇ 4:6.

20. Nawˬ aˬ htoꞈ ma te tuˬ dawˇ teh taˍ ve le?

²⁰ Chi teˇ hkui ngaˬ hui chehˇ ve awˬ yanˇ lehˬ, maˇ daꞈ ve tawˇ tiˉ yaw ve yoˬ. Hkʼe te leh, Yaˬhoˉvaˬ nyi hkʼaˇ suh tuˬ ve tawˇ ngaˬ hui gʼa yaw cawˇ ve yoˬ. Tawˇ yaw ve lehˬ Yaˬhoˉvaˬ geh gʼa ve laꞈ shawnˍ hpehꞈ ve tehꞈ tawnˇ taˍ sheˍ. Leh ngaˬ hui shu htaꞈ hkʼaˬ hkʼe ve tawˇ yaw piˇ ve yawˇ awˬ pon a yeˇ uiˍ jaˇ. Ngaˬ hui Gʼuiˬ sha ve kanˉ te ve, hpawnˬ daꞈ ve, leh shu htaꞈ tawˇ yaw piˇ htaˇ, ngaˬ hui Yaˬhoˉvaˬ nyi hkʼaˇ suh tuˬ tawˇ yaw ve kʼo, yawˇ awˬ bon naꞈ laˇ tuˬ yoˬ. Yaˬhoˉvaˬ lehˬ miˬ guiˬ hkʼoˆ haiˬ ve awˬ ceuˬ htaꞈ te luˬ peuˬ hkʼawꞈ nawˉ, Yaˬhoˉvaˬ htaꞈ chiˇ mvuh tuˬ tawˇ yaw ve sha tuˬ yoˬ. (Yuˇdaꞈ 15) Yaꞈ hkʼaˇ, oˇ ve teˇ yanˇ maˇ gaˬ sheˍ htaˇ ‘Gʼuiˬ sha˗oˬ, ngaˬ hui ve tawˇ teˇ hpaˍ lehˬ nawˬ nyi ma cawˇ ve awˬ ceuˬ hpehꞈ la piˇ˗oˆ.’—Chiˇ mvuh ve 19:14.