1. Hinyi watwinka chawaana chakuhosha?

 NZAMBI watwinka chawaana chakuhosha. Chelili muntu watachi, Adama, amuleñi, wazatishileña mazu hakuhanjeka naTata yindi wamwiwulu. Wadizilileñaku mazu amakwawu amaha. Adama wazatishili iwu wuswa hakuzata mudimu windi wakutuumba anyama ejima majina. (Kutach. 2:19) Nawa hadaha watiyili muzañalu chikupu chahosheliyi namukwawu muntu katachi, ñodindi Eva!—Kutach. 2:22, 23.

2. Kufuma tuhu kunyima nakushika makonu, antu anazatishi ñahi mazu chatama?

² Hashimbwili wanyi chawaana chakuhosha atachikili kuchizatisha chatama. Satana Diyabolu wamudimbili Eva nawa chaletesheli antu kwikala nanshidi nikubula kuwanina. (Kutach. 3:1-4) Adama wazatishili chatama chawaana chindi chakuhosha hamutwikiliyi Eva niYehova muloña hansañu yakuluwa kwindi. (Kutach. 3:12) Kena wamudimbili Yehova hanyima yakumujaha manakwindi Abeli. (Kutach. 4:9) Chimwahitili mpinji, Lameki wamuchisaka chaKena wasonekeli mazu amwekeshelaña madombu adiñaku mumafuku indi. (Kutach. 4:23, 24) Yumanyi yinakumwekana makonu? Tunakumona anlomboli jamatuña nachiyuulu anakuzatisha nhoshelu yatama chakadi kutiya nsonyi. Nawa mumavidiyo amavulu mwekala hohu nhoshelu yakasawuntu. Atudizi atiyilaña nhoshelu yatama kushikola nawa akulumpi niwena ayitiyilaña kunyidimu. Chawushona, nhoshelu yatama chiyinasweji makonu  chinakumwekesha kaayi chikanasweji kutama.

3. Chumanyi chitwatela kubula kwila, nawa yumanyi yitukuhanjekahu muchinu chibaaba?

³ Neyi kubabala nehi, tunateli kwinjilila kutiyilila kunhoshelu yatama chakwila tukutachika kuyizatisha. Hela chochu, etu akaKristu, tunakukeña kumuzañalesha Yehova nawa mukumuzañalesha mwabombela kutondolwela nhoshelu yatama. Tunakukeña kuzatisha chawaana chetu chakuhosha munjila yayiwahi, yakumushimeka Nzambi yetu. Achinu chibaaba, chikutukwasha chitunateli kwila mwenimu, (1) mumudimu wakushimwina, (2) hakupompa, (3) nihampinji yitunakuhanjeka nawakwetu. Chatachi, tuhanjekenu chatiyañayi Yehova nanhoshelu yetu.

4. Kwesekeja naMalaki 3:16, Yehova watiyaña ñahi nanhoshelu yetu?

⁴ Tañenu Malaki 3:16. Chumanyi chaletesheli Yehova asoneki “mumukanda windi wachanukishu” majina awantu amutiyileña woma nikutoñojoka hejina dindi muloña wanhoshelu yawu? Nhoshelu yetu yamwekeshaña yuma yekala mumuchima. Yesu wahosheli nindi: “Muloña yuma yidi mumuchima diyahoshañayi muntu.” (Mat. 12:34) Yuma yitwahoshaña yamwekeshaña chitwamukeña Yehova. Nawa Yehova nakukeña antu amukeña akadiluñishi wumi wahaya nyaaka mwituña dadiha.

5. (a) Indi kudifukula kwetu kwendelaña ñahi hamu nanhoshelu yetu? (b) Neyi chinamwekeshiwu hamwevulu, chumanyi chitwatela kwiluka kutalisha kunhoshelu yetu?

⁵ Nhoshelu yetu yamwekeshaña neyi chakwila Yehova nateli kwiteja kudifukula kwetu hela nehi. (Yak. 1:26) Antu amakwawu abula kumukeña Nzambi ahoshaña nhoshelu yakuzuwa, chakadi luwi nawa munjila yakudivwimba. (2 Tim. 3:1-5) Hitunakukeña kwikala neyi wenaku. Tunakufwila kumuzañalesha Yehova nanhoshelu yetu. Komana Yehova nateli kutiya kuwaha neyi tuzatishaña nhoshelu yakutoweja nawa yayiwahi hakupompa kwetu hela mumudimu wakushimwina ilaña  chitwenza kwitala twayihoshaña chatama antu amuchisaka chetu?—1 Pet. 3:7.

6. Yumanyi yafuminimu muloña wanhoshelu yayiwahi yamuhela Kimberly?

⁶ Neyi tuzatisha chawaana chakuhosha munjila yayiwahi tukumwekesha netu tudi akakudifukula aYehova. Tukukwasha antu itwashakamaña nawu kwiluka chaambu chidi “hakachi kamuntu wamukalakelaña Nzambi nawabulaña kumukalakela.” (Mal. 3:18) Dichuma chamumwekeneni nimuhela Kimberly. * Ayinkeli nawu azati mudimu namukwawu mukashikola. Hanyima yakumanisha mudimu wayinkeliwu, mukwawu mukashikola wamweni nindi muhela Kimberly wambukaku chikupu nawakwawu ejima. Hatuñwileña antuku, wazatishileña nhoshelu yayiwahi nawa hazatishileña mazu atamaku. Iwu mukwawu watiyili kuwaha nawa nkumininaku watejeli kudiza Bayibolu. Yehova watiyaña kuwaha neyi tuzatishaña nhoshelu yaleteshaña antu kukeña kudiza chalala!

7. Mukuzatishaña ñahi chawaana chenu chayinkayi Nzambi chakuhosha?

⁷ Wejima wetu tunakukeñi kuhosha munjila yikuleta kalemesha hadi Yehova nawa yikutuletesha kuswina kwakwihi nawamanakwetu. Ichi tuhanjekenu njila yikutukwasha kwikala “akutalilahu amawahi . . . mukuhosha.”

8. Yesu wazatishili ñahi nhoshelu chiwahi mumudimu wakushimwina, nawa tunateli kumwimbujola ñahi?

⁸ Hoshenuña naluwi nawa nakalemesha neyi anayihilishi. Hampinji yazatileñayi Yesu mudimu windi, amutwambilili nawu wadiña mukakusheta, wafwa hakuda, muntu waDiyabolu, mukwakufumpa nshimbi yaSabata nawa mukakutuka Nzambi. (Mat. 11:19; 26:65; Luka 11:15; Yow. 9:16) Hela chochu, Yesu hayakwili chatamaku. Neyi antu anatuhoshi chatama, twatela kwikala neyi Yesu, bayi tuyakula chatamaku. (1 Pet. 2:21-23) Hela chochu, chapela wanyi kudiwunjika neyi muntu nakwili chatama. (Yak. 3:2) Chumanyi chinateli kutukwasha?

9. Chumanyi chikutukwasha kwikala nanhoshelu yayiwahi neyi tunakushimwina?

⁹ Neyi muntu yayihosha chatama hampinji yimunakushimwina bayi muhilaku. Manakwetu Sam wahosheli nindi, “Natoñojokeleña nami iwu muntu nateli kudiza chalala nawa nateli kuhimpa.” Mpinji yikwawu mwini itala wahilaña muloña wakwila tunenzi hampinji yatama. Neyi tuwana muntu wunahili, twatela kwila neyi chelañayi muhela Lucia. Hanyima yakulomba wumweneni, twatela kulomba Yehova atukwashi kwikala adiwunjika kulonda tubuli kumwakula chatama.

10. Kwesekeja na 1 Timotewu 4:13, chikonkwanyinyi chitwatela kwikala nachu?

 ¹⁰ Ikalenu antañishi amawahi. Timotewu wadiña mukaKristu wakulukila, hela chochu niyena wakeñekeleña kuwahishaku ntañishilu yindi. (Tañenu 1 Timotewu 4:13.) Tunateli kwikala ñahi antañishi amawahi mumudimu wakushimwina? Twatela kuloñeshaña chiwahi. Tukweti yozelu yayivulu yinateli kutukwasha kwikala antañishi amawahi. Nsañu yikuyikwasha yidi mubroshuwa yaShenu Muchima Kukutaña nikuKutañisha nimuchibalu “chaShenu Muchima kuMudimu Wakushimwina” mumukanda waChihandilu niMudimu Wanetu AkwaKristu Mukanda Wakupompa. Komana munakuzatisha iyi yozelu? Neyi tuloñesha chiwahi, woma wakehaña nawa twahoshaña nakuhamuka.

11. Amanakwetu niahela amakwawu anekali ñahi antañishi amawahi?

¹¹ Tukwikala cheñi antañishi amawahi neyi tumonaña chinakwilawu antu muchipompelu nawa tudizilaña kudi wena. Sam, itwashimunahu dehi wadihulaña nindi, chumanyi chaleteshaña amanakwetu nihela amakwawu kwikala antañishi amawahi? Wayitiyililaña nakanañachima neyi anakutañisha nawa wazatishaña njila jazatishañawu. Muhela Talia neluki chakuhosha nichakulumbulula nsañu yehulañawu nankashi mumudimu wakushimwina kuhitila mukutiyilila nakanañachima kudi anhoshi akulukila chahanañawu mpanji jawantu amavulu.

12. Chumanyi chayikalilaña antu amakwawu?

¹² Wejima wetu tunateli kuletesha kupompa kwendeña chiwahi kuhitila mukwimbila hamu nikwakula chachiwahi. (Mas. 22:22) Antu amakwawu chayikalilaña kwimba hela kwakula hadi antu amavulu. Komana ninenu chayikalilaña? Neyi chayikalilaña, mukutiya kuwaha kwiluka chuma chayikwashili antu amakwawu kuleka kutiya woma.

13. Chumanyi chinateli kuyikwasha kwimba namuchima wejima hakupompa?

¹³ Imbenu namuchima wenu wejima. Neyi tunakwimba tumina twetu twaWanta chuma cheneni chitwatela kufwilaña hikumushimeka Yehova. Muhela Sara watoñojokaña nindi wekala ñimbi wamuwahi wanyi. Hela chochu, wakeñaña kumushimeka Yehova nakamina. Dichi, hampinji yinakuloñeshayi kupompa waloñeshaña nitumina, wembaña tumina nawa wesekaña kumona mazu adimu chiyanesakaniwu nansañu yikudizawu hakupompa. Wahosheli nindi, “Kwila mwenimu kwankwashaña kusha  muchima hamazu chatela nitoñojokeña hachinembaña.”

14. Neyi mwatiyaña woma, chumanyi chinateli kuyikwasha kwakulahu hakupompa?

¹⁴ Akulenuña mpinji yejima. Kuhosha hohu chalala chumichi chinateli kuyikalila antu amakwawu. Muhela Talia itwashimunahu walumbulwili nindi: “Natiyaña woma kuhosha hadi antu amakwawu, hela chakwila antu hiyamonaña chumichiku. Dichi kwakulahu hakupompa kwankalilaña.” Hela chochu, Talia walekaña wanyi kwakula. Neyi nakuloñesha kupompa wanukaña nindi, ñakwilu yatachi yatela kwikala yayihi nawa yinashindameni hachikuma. Wahosheli nindi: “Chumichi chinayi mukwila nawu chidi hohu chiwahi neyi ñakwilu yami yikala yayihi, yapela, nawa yinashindameni hachikuma muloña diyi ñakwilu yakeñañayi muntu wunakulombola.”

15. Chumanyi chitwatela kwanukaña neyi tunakwakulahu?

¹⁵ Niamanakwetu niahela abulaña kutiya nsonyi mpinji yikwawu anateli kukañanya kwakula. Muloñadi? Muhela Juliet walumbulwili nindi: “Mpinji yikwawu nashintajalaña kwakulahu muloña natoñojokaña nami ñakwilu yami yapela nawa yashikilamu wanyi.” Anukenuña nenu, Yehova wakeñaña nindi tuhaneña ñakwilu kwesekeja nahanakumini wuswa wetu. * Watiyaña kuwaha chitwazataña nañovu kulonda twakulihu hakupompa hela chakwila mpinji yikwawu twatiyaña woma.

16. Nhoshelu yamuchidinyi yitwatela kutondolwela?

¹⁶ Tondolwelenu “nhoshelu yakasawuntu yejima.” (Efwe. 4:31) Neyi chitwahosha dehi, nhoshelu yakasawuntu hiyatela kufuma mukanwa kamukaKristuku. Ilaña kudi nhoshelu yikwawu yakasawuntu yamwekanaña neyi yakasawuntu wanyi yitwatela kwikala asoñama nayu. Chakutalilahu, twatela kwikala asoñama neyi tunakuhosha hadi antu akweti yisemwa yacheñi, madimi, hela afuma kumatuña acheñi. Cheñi, hitunakukeña kuneñesha antu kuhitila mukuyihosha mazu akasawuntuku. Manakwetu wumu wahosheli nindi: “Mpinji yikwawu nahosheleña mazu atama, innamweneña nami amawahi komana innakuneñesha antu. Hadi yaaka yayivulu ñodami nankwashi kwakankawetu nindi nhoshelu yami yatama, yamuneñeshaña nawa yaneñeshaña niamakwawu.”

17. Kwesekeja naAEfwesesa 4:29, tunateli kukolesha ñahi akwetu?

¹⁷ Hoshenuña munjila yakukolesha akwenu.  Nyakalenuña kuhameka chatela mudimbululeña, mwabokeña hela kutooba. (Tañenu AEfwesesa 4:29.) AIsarela adiña nayuma yayivulu yakusakililahu, ilaña atoobeleña nankashi. Neyi tutoobaña tukuletesha antu amakwawu niwena atoobeña. Anukenu nenu nsañu yatama yaleteliwu akakwendesha ituña 10 yaletesheli ‘aIsarela ejima kutachika kumutoobela Mosi.’ (Kuch. 13:31–14:4) Kwambukaku neyi tuyihamekeña akwetu, chikuyikwasha kwikala namuzañalu. Twatela kwiluka netu mwana kaYefwata wamumbanda, watwalekelihu kuzata mudimu windi muloña amukolesheleña kudi akwawu awambanda. (Anso. 11:40) Sara, itwahoshahu kunyima wahosheli nindi: “Neyi tuyihamekeña akwetu, chayileteshaña kwiluka nawu Yehova wayikeña nawa akweti mudimu mukuloñesha kwindi.” Dichi koleshenuña akwenu chakufuma hamuchima.

18. Kushindamena haMasamu 15:1, 2, muloñadi chitwatela kuhoshelaña chalala, nawa mukuhosha chalala munabombelidi?

¹⁸ Hoshenuña chalala. Neyi twatwambaña hitunateli kumuzañalesha Yehovaku. Wahela kutwamba kwejima. (Yish. 6:16, 17) Hela chakwila antu amavulu makonu amonaña nawu chidi hohu chiwahi kutwamba, ilaña etu twakuhela nawa twakwimonaña neyi chakwimonañayi Yehova. (Tañenu Masamu 15:1, 2.) Hela chochu, twatondolwelaña nhoshelu yakushaku, hela yakufumishaku yikuletesha muntu yakunkululi mwaluwa.

19. Chumanyi chikwawu chitwatela kusoñama nachu?

¹⁹ Tondolwelenuña matuñu. (Yish. 25:23; 2 Tes. 3:11) Juliet, itwashimuna, walumbulwili matuñu chiyamuneñeshaña. Wahosheli nindi: “Kutiyilila kumatuñu kwanneñeshaña nawa chanleteshaña kubula kumuhwelela muntu wunakutuñula akwawu. Nukwiluka ñahi neyi wakantuñula ninami kumbadi?” Neyi mumona nenu nsañu yimunakuhanjeka hiyikubalumuka matuñu himpenu nsañu kulonda mutachiki kuhosha hayuma yayiwahi.—Kol. 4:6.

20. Chumanyi chimunakufwila kwila nanhoshelu yenu?

²⁰ Chineli mukaayi mutunakushakama mudi nhoshelu yatama, twatela kuzata nañovu kulonda nhoshelu yetu yimuzañalesheña Yehova. Anukenu nenu, kuhosha hichawaana chafuma kudi Yehova, nawa watiyililaña chitwahoshaña. Wukatwikiswila neyi tuzatishaña chiwahi nhoshelu yetu, hakushimwina, hakupompa nihampinji yitunakuhanjeka nawakwetu. Neyi Yehova nafumishihu kaayi katama kamakonu, chikekala chaswayi kumulemesha Yehova nanhoshelu yetu. (Yuda 15) Chayinu mpinji, fwilenuña kumuzañalesha Yehova “namazu afumaña mukanwa [kenu].”—Mas. 19:14.