1. Kisannla inn donn nou kapasite pou koze?

 SE ZEOVA ki’nn donn nou kapasite pou koze. Deswit kouma Zeova ti kree Adan, Adan ti kapav servi bann mo pou koz ar so Papa ki dan lesiel. Adan ti kapav osi invant bann nouvo mo. Par exanp, li ti fer sa kan li ti donn tou bann zanimo bann nom. (Zen. 2:19) Ek sirman li ti bien kontan kan li ti koz pou premie fwa avek enn lot imin, so zoli madam, Ev!​—Zen. 2:22, 23.

2. Dan lepase ek azordi, kouma boukou inn mal servi zot kapasite pou koze?

² Me bien vit, boukou inn mal servi zot kapasite pou koze. Par exanp, Satan Lediab ti koz manti ar Ev, ek akoz sa mansonz-la, bann imin inn fer pese ek zot inn vinn inparfe. (Zen. 3:1-4) Kan li ti fer bann erer, Adan ti met tor lor Ev ek Zeova. (Zen. 3:12) Apre ki li touy so frer Abel, Kain ti koz manti ar Zeova. (Zen. 4:9) Plitar, enn desandan Kain, ki ti apel Lamek, ti ekrir enn poem pou explike kouma bann dimounn ti violan dan so lepok. (Zen. 4:23, 24) Kouma bann dimounn ete azordi? Sertin dirizan politik pa ezite pou servi bann langaz vilger an piblik. Ek dan laplipar bann fim azordi, ena bann zoure. Mem dan lekol ek dan travay, boukou dimounn zoure. Tousala montre ki lemond pe vinn deplizanpli pir!

3. Ar ki kitsoz nou bizin fer bien atansion, ek ki nou pou examine dan sa lartik-la?

³ Si nou pa fer atansion, kitfwa nou kapav trouv sa normal pou tann bann parol ki grosie, ek lerla, noumem nou koumans vinn grosie. Antan ki Kretien, nou anvi fer Zeova plezir. Alor, fode zame nou servi enn langaz ki vilger. Nou anvi servi sa zoli kado ki Zeova inn donn nou la  dan enn bon fason, setadir kan nou donn Li loner. Dan sa lartik-la, nou pou gete kouma nou kapav fer sa kan nou (1) dan predikasion, (2) dan renion, ek (3) kan nou koz avek lezot. Pou koumanse, anou gete kifer nou bann parol inportan pou Zeova.

4. Dapre Malaki 3:16, kifer nou bann parol inportan pou Zeova?

⁴ Lir Malaki 3:16. b Dan so “liv souvenir,” kifer Zeova ekrir nom bann dimounn, ki montre par zot parol, ki zot ena lakrint pou Li ek ki zot medit lor so nom? Enn rezon, se parski nou bann parol montre seki ena dan nou leker. Zezi ti dir: “Labous exprim seki ena dan fon leker.” (Mat. 12:34) Kan nou swazir bien seki nou dir dan nou bann konversasion, nou montre ki kantite nou kontan Zeova. Ek Zeova promet ki bann dimounn ki kontan Li pou viv pou touletan dan lemond nouvo.

5. (a) Ki lien ena ant seki nou dir ek nou ladorasion pou Zeova? (b) Dapre zimaz pou sa paragraf-la, ki kitsoz nou bann parol montre?

⁵ Fason ki nou koze, kapav montre si Zeova pou aksepte nou ladorasion ouswa non. (Zak 1:26) Sertin dimounn ki pa kontan Bondie zot koz brit, zot koz bann koze kontrer, ek zot koz ar lorgey. (2 Tim. 3:1-5) Nou pa anvi resanble zot, pa vre! Nou anvi ki nou bann parol fer Zeova plezir. Me eski sa pou fer Zeova plezir si nou koz dan enn bon fason kan nou dan renion ouswa dan predikasion, me ki nou koz dan enn move fason ar nou fami kan personn pa trouv nou?​—1 Pier 3:7.

6. Ki bienfe Kimberly inn gagne parski li’nn koz dan enn bon fason?

⁶ Kan nou koz dan enn bon fason, nou montre lezot ki nou bann serviter Zeova. Nou ed zot pou trouv diferans ki ena  “ant enn dimounn ki pe servi Bondie ek enn dimounn ki pa pe servi Li.” (Mal. 3:18) Anou get lexanp enn ser ki apel Kimberly. c Li ti gagn enn proze pou fer avek enn parmi so bann kamarad lekol. Kan zot ti travay ansam, kamarad-la ti remarke ki Kimberly ti bien diferan ar bann lezot zelev. Kimberly pa ti koz koze lezot deryer zot ledo, li ti bien amikal, ek li pa ti zoure. Kimberly so kamarad ti bien inpresione ek li ti koumans etidie Labib. Zeova bien kontan kan nou atir bann dimounn ver laverite par fason ki nou koze!

7. Ki kitsoz nou anvi fer gras-a nou bann parol?

⁷ Nou tou nou anvi koz dan enn fason ki pou donn loner Zeova ek ki pou fer nou vinn pli pros ar nou bann frer ek ser. Alor, anou gete kouma nou kapav kontign vinn ‘enn lexanp par nou parol.’

8. Ki leson nou kapav aprann ar Zezi, par fason ki li ti koze dan so minister?

⁸ Koz avek respe ek bonte kan lezot provok twa. Kan Zezi ti lor later, bann dimounn ti dir ki li ti enn soular, ki li ti gourma, ki li ti travay pou Lediab, ek ki li pa ti ena respe pou Saba ek Bondie. (Mat. 11:19; 26:65; Lik 11:15; Zan 9:16) Selman, Zezi pa ti koz brit ar zot. Parey kouma Zezi, fode zame nou koz brit ar lezot kan zot koz ar nou dan enn move fason. (1 Pier 2:21-23) Me li pa fasil pou nou res zanti avek lezot kan zot provok nou. (Zak 3:2) Ki kitsoz kapav ed nou?

9. Ki kitsoz kapav ed nou pou vey bien lor seki nou dir kan nou pe prese?

⁹ Kan nou pe prese, fode pa nou ankoler kan enn kikenn koz brit avek nou. Enn frer, ki apel Sam, dir: “Kan enn kitsoz koumsa arive, mo fer zefor pou rapel ki sa dimounn-la bizin aprann konn laverite lor Bondie, ek mo pa bliye ki li kapav sanze.” Parfwa, kan nou prese, enn kikenn kapav ankoler ar nou zis parski nou’nn pas dan enn move ler. Kan enn kikenn ankoler, nou kapav swiv lexanp enn ser ki apel Lucia. Parey kouma li, nou kapav fer enn ti lapriyer ek demann Zeova pou ed nou pou res kalm, pou nou pa dir enn move kitsoz.

10. Dapre 1 Timote 4:13, ki lobzektif nou bizin ena?

¹⁰ Vinn enn pli bon ansegnan. Timote ti enn proklamater bien efikas. Kanmem sa, li ti bizin kontign fer zefor pou vinn enn pli bon ansegnan. (Lir 1 Timote 4:13.) Kouma nou kapav vinn bann pli bon ansegnan? Nou bizin prepar nou bien. Nou ena enn kantite zouti osi ki kapav ed nou pou vinn bann pli bon ansegnan.  Par exanp, to kapav gagn bann sigzesion bien pratik dan brosir Amelior To Lektir ek To Lansegnman, ek dan seksion “Amelior To Minister,” ki trouv dan Kaye Renion Lavi Kretien ek Minister. Eski to pe servi sa bann piblikasion-la? Kan to prepar twa bien, to pou mwins strese ek to pou ena plis konfians an tomem kan to pou koze.

11. Ki kitsoz sertin Kretien inn fer pou zot vinn bann pli bon ansegnan?

¹¹ Nou kapav osi vinn bann pli bon ansegnan kan nou aprann ar lezot dan lasanble. Sam, ki nou ti mansione avan, ti demann limem kifer sertin frer ek ser ti bann bon ansegnan. Lerla, li ti get bien kouma zot ti ansegne ek li ti fer parey kouma zot. Enn ser, ki apel Talia, ti ekout bien fason ki bann orater, ki ena lexperyans, fer bann diskour piblik. Sa ti ed li pou kone kouma pou koz lor bann size ki interes bann dimounn dan teritwar.

12. Ki difikilte sertin frer ek ser gagne?

¹² Nou tou nou kapav partisipe dan renion kan nou sant bann kantik ek kan nou donn bann repons ki bien prepare. (Ps. 22:22) Selman, sertin frer ek ser kapav trouv sa difisil pou sant bann kantik ouswa pou donn enn repons dan renion. Eski twa osi to gagn sa difikilte-la? Si to dan sa sitiasion-la, kan to pou aprann kouma sertin frer ek ser finn sirmont zot laper, sa pou kapav ed twa pou sirmont to laper.

13. Ki kitsoz kapav ed twa pou sant bann kantik avek tou to leker dan renion?

¹³ Sant avek tou to leker. Rezon prinsipal pou kifer nou sant bann kantik dan renion, se pou donn loner Zeova. Enn ser, ki apel Sara, ti panse ki li pa ti sant bien. Selman, li ti anvi sant bann kantik dan renion pou donn loner Zeova. Alor, kan li ti prepar so bann renion, li ti osi sant bann kantik ki ti pou sante dan renion. Li ti sant sa bann kantik-la plizir fwa. Li ti osi esey trouv bann lien ki ena ant bann parol sa bann kantik-la ek bann size ki pou examine dan renion. Sara dir: “Sa ti ed mwa pou res konsantre lor bann parol sa bann kantik-la, olie ki mo konsantre mwa lor fason ki mo sante.”

14. Si to timid, ki kitsoz kapav ed twa pou reponn dan renion?

¹⁴ Reponn souvan. Pou sertin frer ek ser, kitfwa sa kapav bien difisil. Talia, ki nou ti mansione avan, dir: “Mem si boukou pa remarke parski mo ena enn lavwa ki kalm, mo bien strese kan mo  bizin koz devan boukou dimounn. Akoz sa, mo trouv sa bien difisil pou reponn dan renion.” Me sa pa ti anpes Talia pou reponn dan renion! Kan li prepar so renion, li touletan rapel ki bann premie komanter bizin kourt ek reponn kestion-la direk. Talia dir: “Savedir ki mo kapav donn enn ti repons ki sinp ek ki direk, parski se sa kalite repons-la ki frer-la pe atann.”

15. Kan nou reponn dan renion, ki kitsoz nou bizin rapel?

¹⁵ Mem bann Kretien ki pa timid, kitfwa ezite pou reponn dan renion. Kifer? Enn ser, ki apel Juliet, dir: “Parfwa, mo ezite pou reponn dan renion, parski mo per tansion mo repons tro sinp ouswa ki li pa ase bon.” Selman, fode pa nou bliye ki Zeova anvi ki nou reponn dapre nou kapasite. d Li bien kontan kan nou fer nou best pou reponn dan renion, mem si parfwa nou inpe strese.

16. Ki kitsoz fode pa nou fer?

¹⁶ Pa ‘insilte’ lezot. (Efe. 4:31) Kouma nou ti trouve taler-la, fode pa ki enn Kretien zoure. Me ena enn lot kalite insilt osi ki nou bizin fer bien atansion. Par exanp, nou bizin fer bien atansion ki nou pa dir bann move kitsoz lor bann dimounn ki sorti dan enn lot kiltir, enn lot lanvironnman, ouswa enn lot pei. Fode pa osi ki nou ofans lezot kan nou dir zot bann kitsoz ki kapav bles zot. Enn frer dir: “Ena fwa, mo ti dir bann kitsoz ki sarkastik, parski mo ti panse ki sa ti komik ek ki sa pa ti pe fer lezot ditor. Me an realite, sa ti bien bles zot. Pandan plizir lane, mo madam inn ed mwa pou mo aret fer sa. Kan bann sitiasion koumsa ti arive, li ti explik mwa, an prive, kouma seki mo ti dir ti bles li ouswa ti bles lezot.”

17. Dapre Efezien 4:29, kouma nou kapav ankouraz lezot?

¹⁷ Dir bann kitsoz ki pou ankouraz lezot. Felisit lezot, olie ki to plengne ouswa kritik lezot. (Lir Efezien 4:29.) Bann Izraelit ti ena plizir rezon pou montre zot rekonesan anver Zeova. Selman, souvan zot ti plengne. Kan nou plengne souvan, lezot osi pou fer parey kouma nou. Par exanp, kan dis espion ti donn pep Izrael enn move rapor, “tou bann Izraelit ti koumans mirmir kont Moiz.” (Nonb 13:31–14:4) Parkont, kan nou felisit lezot, sa pou fer zot gagn lazwa. Nou kapav sir ki tifi Zefte ti gagn bann lankourazman ki li ti bizin kan so bann kamarad  ti felisit li, ek sa ti ed li pou kontign so servis. (Ziz 11:40) Sara, ki nou ti mansione avan, dir: “Kan nou felisit lezot, nou fer zot santi ki Zeova kontan zot ek ki zot ena zot plas dan lasanble.” Alor, anou rod bann lokazion pou felisit lezot!

18. Dapre Psom 15:1, 2, kifer nou bizin koz laverite, ek ki sa inplike?

¹⁸ Koz laverite. Nou pa kapav fer Zeova plezir si nou koz manti. Kifer? Parski Zeova deteste tou sort kalite mansonz. (Prov. 6:16, 17) Mem si, pou boukou dimounn, koz manti li enn kitsoz ki normal, nou pa pou fer sa parski Zeova deteste sa. (Lir Psom 15:1, 2.) Li vre ki nou pa pou koz manti, me fode pa osi ki nou kasiet bann linformasion pou fer lezot konpran seki nou nou anvi.

19. Ar kitsoz ankor nou bizin fer atansion?

¹⁹ Pa fer palab. (Prov. 25:23; 2 Tes. 3:11) Juliet, ki nou ti mansione avan, explike kouma bann palab ti fer li boukou ditor. Li dir: “Kan mo tann bann palab, sa bien dekouraz mwa, ek mo perdi konfians dan sa dimounn ki pe fer palab-la. Anplis, kouma mo kapav sir ki sa dimounn-la pa pou al fer bann palab lor mwa ar lezot?” Si to trouve ki enn konversasion pe vinn enn palab, sanz konversasion-la ek koz lor enn kitsoz ki ankourazan.​—Kol. 4:6.

20. Ki kitsoz nou bien deside pou fer?

²⁰ Nou pe viv dan enn lemond kot boukou dimounn dir bann move kitsoz. Alor, nou bizin fer zefor pou dir bann kitsoz ki fer Zeova plezir. Pa bliye ki nou kapasite pou koze se enn kado ki Zeova inn donn nou, ek Li anvi ki nou servi li bien. Li pou beni nou si nou fer zefor pou koz dan enn fason ki donn Li loner kan nou prese, kan nou dan renion, ek kan nou koz ar lezot. Kan Zeova pou detrir sa move lemond-la, li pou pli fasil pou nou donn Li loner par nou bann parol. (Zid 15) Me an-atandan, anou bien deside pou fer Zeova plezir par bann ‘parol nou labous.’​—Ps. 19:14.