1. Baani anivahile mukono wowoga?

 KOPOLO ninnihuna yowoga, mukono nivahiwihu ni Baabihu Yehova. Nupaddusiwa mulobwana oobajha Adawu, oliye wambela owoga ni Baabe oodhulu. Makalelo aye oowoga yowenjhedhedheya wodhela wawoga madhu maxa, teto Adawu oherana yeyo, nuwinkiwa mutholo wowavaha mandina anenyama aatene. (Gén. 2:19) Kubuwela makalelo ahagalaliye nuwambela owoga ni muthu mmodha, mwariye oowoma Eva.—Gén. 2:22, 23

2. Athu enalabihedha addi mukono ola wowoga?

² Mukono wowoga omambelelowene ohulabihedhiwa mwamakalelo abure. Saddana ohumuleketha Eva, teto olekethiwa wula ohudhana othega ni ohilogomana. (Gén. 3:1-4) Adawu alabihedhe mwamakalelo abure mukono ola wowoga, nuumwinkedha Eva ni Yehovaya wodhela yothega yewa. (Gén. 3:12) Kayini nuumpa ddibile Abeli, omotedha Yehova. (Gén. 4:9) Nuuvira mudhidhi, mwaana a Kayini ithaniwa Lameki, oleba powema yooniha opanga wa mudhidhi yole. (Gén. 4:23, 24) Peeno dhithudha dhiri avi? Malabo mamodha, anamaholela a pulitika enowawoga madhu amanyazo vathaddovene. Soorusa woona filime ehinalabihedha madhu ootakala. Anaskola enowawiwa madhu ootakala oskola winasuziwa, teto athu owunnuwelavo enawiwa omabasani wiwa. Yowukulihaya sowi madhu yala, enowoneyiha wi mweddelo waathu ni mawogelwiwaya onna othabwa ovirigana.

3. Nnofwanelela nikale pasope ninddi, ki musolo ola nnahudhere ddi?

³ Nahikala pasope, madhu ala ootakala podi onivolowela ni nambele walabihedha. Nihinona wihina ninga makiristawu, nnofuna vanlubale omuhagalasa Yehova, ni ohalabihedha madhu yala. Nnafuna nlabihedhe kopolo ninnihuna yowoga mwamakalelo  apama wihina ninvuwihena Mulugu ehu. Musolo ola, nnere woona makalelo nnandihu werana ndo (1) mmalaleyelo, (2) mmutugumanoni, ni (3) nathapanyaga kadda labo. Mbwenye nihinathi, nnafuna noone mwahaya bwaddi Yehova agathuwa-thuwa ni makalelo nnawogihu.

4. Mowiwanana ni Malaquias 3:16, mwahaya Yehova agathuwa-thuwa nindhe nnawogihu?

⁴ Omwileri Malaquias 3:16. Bibliya anihina wi Yehova ohukanna ‘livuru nowubuwela’ na mandina aathu wodhela madhu ewa enoniha wi enomoova Yehova ni enoopendda ndina naaye. Onubuwela wi livuru nna anahiddana ddi? Ndhe nnawogihu dhinotonyihedha ndhe ninnihuna mmurimani. Bumwahaya Yesu adhe erege: ‘Mwaha mulomo onawoga dhendhe dhinakuma vati vamurima.’ (Mat. 12:34) Odhivela winlubale ninnihuna ni Yehova, winowoneya wodhela ndhe nnasakulihu owoga. Yehova anafuna wi yaale enamudhivela ekanne egumi yohimala elabo yela yavati.

5. a) Madhu ehu eniwanana avi ni makalelo nnamwebedhihu Yehova? b) Mowiwanana ni fotu, nawogaga nihiddiwalege ddi?

⁵ Kinapwatheya makalelo nnawogihu, Yehova podi weenya webedha wehu obe naari. (Tia. 1:26) Athu amodha ehinna odhivela ni Mulugu, enawoga nuuwali, ni makalelo abure teto bowithukula. (2 Tim. 3:1-5) Mwebaribarene, iyo kannafuna okala ninga athu yala. Nnafuna nerena dhatedhene wihina nimuhagalase Yehova. Mbwenye kinandeya omuhagalasa Yehova naalabiheraga madhu apama nakala ni addibilihu ammulogoni ni athu ammalaleyelo, mbwenye nakala vaade ni amudhihu iyo okala athu amodheene. — 1 Ped. 3:7.

6. Makalelo apama owooga a Kimberly yamukavihere addi mukwaye ooskola?

⁶ Nalabihedhaga pama kopolo ninnihuna yowoga, nnowawoniha amodha wi nnomulabela Yehova. Ni makalelo yala, nnowanda wakavihera athu woona ‘ohiyana orivo wa muthu anamulabela Mulugu ni ahinamulabela.’ (Mal. 3:18) Siyeyo empadduwele murogola anithaniwa Kimberly. * Oliye wapara mabasa ooskola  ni mukwaye. Nuumala, mukwaye a Kimberly, wonelamo wi oliye aari oohiyana ni naakwaye amodha ooskola. Oliye kaawaba akwaye ooskola, aari apama, teto kaawoga madhu ootakala. Omagomihedhowa mukwaye Kimberly, weenya omuhudhera Bibliya ni oliye. Kubuwela makalelo Yehova anahagalaliye nawogaga mwamakalelo enaathukulela athu ohudhera ebaribari!

7. Iyo aatene, nnafuna wi nlabihedhege addi mukono ola nivahiwihu wowoga?

⁷ Iyo aatene, nnafuna wi makalelo ehu owooga emuthithimihege Yehova, ni enandanihege ni addibilihu. Bumwahaya nnafuna nawoone makalelo ookweya enaanikavihere okala muthu anna makalelo apama oowoga.

8. Yotajhiha baani anihiyedhe Yesu wodhela okala muthu oonona owoga pama mmalaleyelo?

⁸ Owogege nuupama ni nriho naarive oligiwaga. Mudhidhi Yesu aaparaga mabasa oolaleya, ahiinkedhiwa okala mulobwana oojha bure ni namag’wa, namakavihera a Ddiyabo, muliba omulupa Sabadu ni ofiyedha winkedhiwa wi anna onyemula ndina na Mulugu. (Mat. 11:19; 26:65; Lucas 11:15; João 9:16) Naarive dhigaari ndo, Yesu kahogolosa madhu abure. Mowindala ninga Yesu, iyo kannafuna ohogolosela kunyakunya muthu aaniruwanaga. (1 Ped. 2:21-23) Nihinona wi malabo mamodha kahi ethu yokweya werana ndo. (Tia. 3:2) Ki enaanikavihere ddi?

9. Enaanikavihere ddi wasugwedha madhu ehu nakala mmalaleyelo?

⁹ Muthu uwogela madhu oopiha mbani mmalaleyelo, kutakaleliwe mwaha wa yeyo. Ddibila anithaniwa Sam anihina: “Miyo ginathabwa omusugwa mwanamurala efunelo anniyena yovuruwana muthenga ginamulaleyimi, ni wubuwelela wihina nlabo nimodha anere osaddula mubuwelo waye.” Malabo mamodha, anamurala enoninyanyuwela mwaha wi nifiyile mudhidhi wohifwanelela. Nanfwanya muthu ahinaliba otakaleliwa mmalaleyelo, iyo podi werana ethu emodhave anerana murogola anithaniwa Lucia. Iyo podi olobela mowaguva, nimulobaga Yehova wi anikavihere okalave ookurumuwene wihina nihiwoge ethu yopiha mbani.

10. Mowiwanana ni 1 Timóteo 4:13, naaparaga mabasa oolaleya efunelo yehu ekalege eevi?

¹⁰ Wawomihedhe makalelo awo oohudhiha. Timotiyu ahakovelela pamadhene mabasa oolaleya, mbwenye oliye oofwanelela owomihedha makalelo aye oohudhiha. (Omwileri 1 Timóteo 4:13.) Iyo nnande addi owomihedha makalelo ehu oohudhiha nakala mmalaleyelo? Nnofwanelela wiwegeredha pamadhene. Iyo nihikanna dhipano dhowinjhiva dhinanikavihera. We podi ohudhera ni buruxura ninna musolo Wilibihere wileri ni ohudhiha obe we podi olabihera epaddi wilibihere mmabasani oolaleya, egumi ni mabasa mwana livuru namutugumano.  Onande addi olabihera pama dhipano ndha, wihina owomihedhena makalelo awo oohudhiha? Niwegeredha pama, nnere wanda okala oomaleya ni nnerege oowoga nihanganyedhaga.

11. Addibila yandile addi owomihedha makalelwiwa oolaleya?

¹¹ Ohiya eyo, iyo podi owomihedha makalelo ehu oohudhiha, wodhela ohudhera ni addibila amodha ammulogoni. Siyeyo anerana Sam nimuwogilihu mundduli. Oliye anowasugwa addibila enonne owoga pama mwaha dhavathaddo, indo, oxixa watajhiha makalelo eneriwana. Murogola anithaniwa Talia, anowasugwera pamadhene addibila ekovelele owoga pama mwahadhiwa dhavathaddo makalelo enatapuleliwa. Mwaha wowerana yeyo, oliye oohudhera owoga ni opendda wodhela muselu dhinadha epaddi wilibihere mmabasani oolaleya.

12. Makathamiho baani enaafwanya athu amodha?

¹² Aatene iyo, podi werana epaddiihu omutugumanoni wodhela wiiba jhibo ni ndhu nootaama, ni ovaha dhowakula dhowegeredheya pamadhene. (Sal. 22:22) Amodha enowarusa wiiba obe ovaha dhowakula dhewa omutugumanoni. Akala siyeyo enupadduwela, onere ohagalala onona ethu yakavihere amodha ogonjhiha woova wula.

13. Enukavihere wiiba ni murima wamutene omutugumanoni ddi?

¹³ Wibege ni murimaawo wamutene. Niibaga omutugumanoni, efunelo yehu ekalege onvuwiha Yehova. Murogola anithaniwa Sara, kanna oyesa wowiiba. Mbwenye peeno, anofuna onvuwiha Yehova wodhela wiiba jhibo dhomwene. Ethu enamukavihera Sara wera ndo, fuwegeredha jhibo ndhe ahinathi odhowa omutugumanoni. Motajhiha, egeredhaga dhipaddi dhimodha dha mutugumano, oliye anowixagiha wodhela wiiba jhibo, asugwaga makalelo jhiboya eniwanana ni muselu onaawogiwe omutugumanoni. Oliye anihina: “Eyo enogikavihera wapwasedha madhuya ohiya makalelo ginibimi.”

14. Akala ori muthu amanyazo, enukavihere ovaha yowakula mmutugumanoni ddi?

¹⁴ Wilibihere wihina ovahe yowakulawo omutugumanoni. Nihinona wi, eyo podi okala ethu yorusa wa athu amodha. Talia awogiwe mundduli anihina: “Athu owinjhiva kinonelamo mwahaya ngawoga mwamakalelo oomaleya, mwaha giri muthu amanyazo, teto gaawogaga vaari vaanamwinjhi ginothabwa okanna manyazo. Bumwahaya enogirusa ovaha yowakula omutugumanoni. Naari dhigaari ndo, kaginaahiya ovaha yowakula yaga omutugumanoni. Gegeredhaga mutugumano dhaaga, kaginadduwala wihina yowakula yowambela ya ddima enohoweleya okala yowaguva ni  owoga mutomaya.” Oliye anihina: “Eyo enatapulela wi yowakula yaga ekalege yokweya ni yowoneleyamo. Mwaha siyeyo anafuna ddibila anamweddiha namasugweraya.”

15. Ethu baani nihinafwanelelihu oddiwala wodhela ovaha dhowakula omutugumanoni?

¹⁵ Naarive naaleya ehinna manyazo podi ohiya ovaha yowakula omutugumanoni. Mwahaya? Ddibila anithaniwa Juliet anihina: “ Malabo mamodha kaginanda ovaha yowakulaaga, gubuwelaga wi yowakulaaga ehithabwa okweya ni kinoneleyamo.” Akala onoonamo ndo, wubuwelege wi Yehova kanuloba ovaha yowakula ohunandiwe. * Mbwenye oliye anohagalala nilibiheraga wihina naakule omutugumanoni naarive nigaari athu amanyazo.

16. Madhu baani mukiristawu ahinafwaneleliye wawoga?

¹⁶ Kuwalabihedhege madhu oovoreyiha murima. (Efé. 4:31) Ninga niwogilihu mundduli, mukiristawu kaawogege madhu amanyazo. Mbwenye ehikalawo madhu mamodha enavoreyiha murima mukiristawu ahinafwaneleliye wawoga. Motajhiha, nnohowela okala pasope wihina nihikanne ekalelo yabure yowiliganiha nadhowaga owoga ni nlogo, dhilemelelo, mweddelo, nihimo, obe naathu a dhilabo dhimodha. Ohiya eyo, kannafuna wawoga madhu enavoreyihe murima athu amodha. Ddibila ayi anihina: “Malabo mamodha gowawoga madhu, gawubuwelimi wi madhu ooteyiha, mbwenye mwebaribarene, yowavoreyiha murima athu amodha. Mbwenye nuuvira mudhidhi, mwaraga ogikavihera vanlubale. Malabo mamodha gawoga madhu oovoreyiha murima, oliye anogonelihamo makalelo madhu ale yavoreyiwa athu amodha obe naari oliyeene.”

17. Mowiwanana ni Efésios 4:29, nnande addi wahagalasa athu amodha?

¹⁷ Wawogege madhu enaahagalasa athu amodha. Ohiya wavanyihaga obe owogaga obure dhithu dhineriwana, watamalelege. (Omwileri Efésios 4:29.) Amwaana Ezarayeli, yahikanna dhithu dhowinjhiva yafwaneleliwa otamalela. Mbwenye ohiya otamalela, aliwa yosayela ethu-sithu wihina evanyihe dhoholela dha Yehova. Muthu akanna elamalelo yovanya, athu amodha enowambela werana emodhave. Podi wera onowawubuwela alobwana ale kumi yadhonwe weddelela elabo yothomeliwa. Nuwoga ni makalelo abure elabo ele yothomeliwa, amwaana Ezarayeli aatene wambela ompambiha Moses. (Núm. 13:31–14:4) Wa epaddi emodhaya, natamalelaga athu amodha nnere wahagalasa. Motajhiha, iyo podi okanna ebaribari wi mwaana Jefte, mwana a mwihiyanaya, ahithetheliwa naakwaye, emulibihaga wihina adhowegeve aaparaga mabasa a Yehova. (Juízes 11:40)  Sara awogiwe mundduli, anihina: “Natamalelaga athu amodha, nnowawoniha wihina Yehova anowadhivela, teto ni addibilaya ammulogoni.” Bumwahaya, opathege kadda mudhidhi wihina watamalelege athu amodha ni murimawo wamutene.

18. Mowiwanana ni Salmos 15:1, 2, mwahaya bwaddi nigafanelelaga owoga ebaribari, ki ethu baani enavolowelavo?

¹⁸ Owogege ebaribari. Iyo kannande omuhagalasa Yehova wula nihiwogaga ebaribari. Mwaha oliye anowawidda makalelo amatene owoota. (Pro. 6:16, 17) Yowukulihaya sowi, athu owinjhiva enubuwela wi woota kahi ethu yabure, teto athu aatene enowoota. Mbwenye iyo, nihikanna monelo wa Yehova wodhela woota. (Omwileri Salmos 15:1, 2.) Mbwenye iyo kanootege, newene kaniwogege ethu nihinnihuna ebaribari, wihina nnakwakwathuse athu amodha.

19. Makalelo baani oowoga nnafwanelelihu orabela?

¹⁹ Kuwawogege obure athu amodha. (Pro. 25:23; 2 Tes. 3:11) Juliet, awogiwe mundduli, anowoga makalelo anakaliiye aawoonaga athu amodha yawogaga obure akwiwa. Oliye anihina: “Wawiwa athu amodha yawogaga obure akwiwa dhinogitakalela, ni ginohiya waroromela athu yayo. Mwaha ginowanganyedha wi akala muthu yola onowawoga obure akwaye, ki miyo kanagiwoge obure naathu amodha?” We wonelamo wi muselu munathapanyedhinyu munamuwogavo obure muthu mmodha, muhiye museluya ni muwogege muselu mmodhaya, analibiha.—Col. 4:6.

20. Wiikome wera ddi?

²⁰ Iyo nnakala elabo, enakalamo athu ehinonne olabihera pama nlumi neewa. Bumwahaya, nnohowela wilibihera vanlubale wi niwogege dhithu dhinamuhagalasa Yehova. Kuddiwale wi, kopolo ninnihuna yowoga, nvaho wa Yehova, teto oliye anothuwathuwela makalelo nnalabihedhihu nvaho ola. Iyo podi ororomela wi Yehova anere onreeliha, nilibihera olabihera owoga mwamakalelo oolibiha mmalaleyelo, omutugumanoni ni nathapanyaga kadda labo. Elabo ela yabure yafiya omakuthulo, enaakale yokweya omuthithimiha Yehova ni makalelo ehu oowoga. (Judas 15) Mbwenye labo nenno nihinafiye, wiikome omuhagalasa Yehova ni makalelo awo owooga.—Sal. 19:14.