1. ¿Akoni kichiuak maj ueli titajtokan?

 KEMEJ Jiova techtasojta kichiuak maj ueli titajtokan. Uan kemej techmakak nejin kualtsin netetayokolil, Adán, yekinika takat uelia tajtouaya iuan iTajtsin akin kichijchiujka. Uan no, uelia kinemiliaya yankuik tajtolmej tein ueliskia kikuis. Nejon kipaleuij maj uelini kintaliliani inintokay nochi tapialmej (Gén. 2:19). Uan xa semi yolpakik keman yekinika tajtoj iuan aksa: Eva, inamik akin semi kuakualtsin katka (Gén. 2:22, 23).

2. ¿Keniuj peuak amo kuali kikuij inintajtol ne uejkauj uan hasta axkan?

² Sayoj ke niman peuak amo kuali kikuij nejon netetayokolil. Satanás kikajkayauak Eva, uan yejua ika axkan tinochin titajtakolejkej (Gén. 3:1-4). Adán amo kuali kikuik netetayokolil tein Jiova kimakaka keman kitajtakoltij Eva uan hasta Jiova tein yejua kichiujka (Gén. 3:12). Satepan ke Caín kimiktij iikniuj, Abel, amo kiluij Jiova tein melauj (Gén. 4:9). Xiujmej satepan, Lamec se takat akin ualeuaya itech ichankauan Caín kijkuiloj seki tajtolmej tein kinextiayaj ke itech itonaluan semi moteuiayaj (Gén. 4:23, 24). ¿Uan toni panoua axkan? Tekiuanij amo pinauaj kijtoskej pitsotik tajtolmej maski miakej kinkakiskej. Semi ouij se kiajsis se película kampa amo mokuij pitsotik tajtolmej. Uan no mokui nejin tajtolmej itech kaltamachtiloyamej uan kampa taltikpakneminij tekitij. Nochi nejin kinextia ke itech taltikpak okachi mochiujtok tein amo kuali.

3. ¿Toni ueliskia panos komo amo timoyekpiaj, uan toni tikitaskej itech nejin tamachtilis?

³ Kemej semi miakej kikuij pitsotik tajtolmej komo amo timoyekpiaj  xa no uelis peuas ijkon titajtoskej. Itekitikauan Jiova tiknekij tikyolpaktiskej yejuatsin, yejua ika amo sayoj amo tikuij pitsotik tajtolmej, ta no timochikauaj kuali titajtoskej kemej ika tikueyichiuaskej. Itech nejin tamachtilis tikitaskej keniuj uelis tikchiuaskej nejin keman titanojnotsaj, keman tiouij nechikolmej uan keman titajtouaj iniuan oksekin. Sayoj ke achto maj tikitakan keyej Jiova kiita keniuj titajtouaj.

4. Ika tein kijtoua Malaquías 3:16, ¿keyej Jiova kiita keniuj titajtouaj?

⁴ (Xikonixtajtolti Malaquías 3:16). ¿Keyej Jiova kijkuiloskia itech se amatajkuilol inintokay sekin akin kinextiaj ke kimoujkatokaj uan ke itech tanemiliaj itokay ika tein kijtouaj? Tein tikijtouaj kinextia tein yekmelauj tiknemiliaj. Jesús kijtoj: “Tein semi se kinemilijtok yejua tein se kijtoua” (Mat. 12:34, TNM). Yejua ika, tein tikijtouaj kinextia ox tiktasojtaj Jiova. Uan yejuatsin kineki maj nemikan nochipaya akin kitasojtaj itech yankuik taltikpak.

5. 1) ¿Keyej kemej titajtouaj mouika ika totaueyichiualis? 2) Kemej moita itech taixkopimej, ¿toni amo moneki tikchiuaskej komo tiknekij maj Jiova kiyolpakti kemej titajtouaj?

⁵ Jiova kuali kikaki tein tikijtoua uan ijkon kiita ox kiselis totaueyichiualis oso amo (Sant. 1:26). Miakej akin amo kitasojtaj Jiova keman tajtouaj kikuij tajtolmej tein teyolkokouaj uan tein ika kinextiaj ke moueyimatij (2 Tim. 3:1-5). Senkis amo tiknekij tiyeskij kemej yejuan, ta tiknekij maj Jiova nochipa kiyolpakti kemej titajtouaj. Sayoj ke, ¿kiyolpaktiskia komo aksa kualtsin tajtoua itech nechikol uan itech tanojnotsalis sayoj ke kinchikaujkanojnotsa ichankauan? (1 Ped. 3:7).

6. ¿Toni tein kuali panok porin Kimberly amo tajtouaya kemej oksekin?

⁶ Komo kuali titajtouaj, oksekin kiitaskej ke semi taman “se akin kitekitilia Dios uan se akin amo kitekitilia” (Mal. 3:18). Tein kijtosneki ke senkis moitas ke tejuan tiktekitiliaj Jiova. Maj tikitakan tein kipanok se tokniuj siuat akin monotsa Kimberly. b Keman yejua uan se ichpoch akin iuan momachtiaya kisenchiujkej  se tekit tein kinkauilijka tamachtijkej, akin iuan momachtiaya kiitak ke Kimberly semi taman katka. Amo kinijijtouaya oksekin, katka kualtakat uan amo keman kikuia pitsotik tajtolmej. Akin iuan momachtiaya kinekik kimatis keyej ijkon katka, uan satepan peuak momachtia Biblia iuan Kimberly. ¡Jiova semi yolpaki keman kiita ke oksekin kinekij kiixmatiskej porin kikakij keniuj titajtouaj!

7. ¿Keniuj tikonneki tiontajtos?

⁷ Tinochin tiknekij tikueyitaliskej Jiova ika tein tikijtouaj uan maj nejon techpaleui maj kuali timouikakan iniuan tokniuan. Yejua ika, maj tikitakan seki taman tein techpaleuis maj kuali titajtokan uan ijkon oksekin kinpaleuis tein tikijtouaj.

8. ¿Keniuj uelis tikchiuaskej kemej Jesús keman titanojnotsaj?

⁸ Xionkualtakat uan xiontepoujkaita keman amo kuali mitsonnankiliskej. Keman Jesús yetoya nikan taltikpak kijtouilijkej ke ‘teltakuaya uan tayitinemia ne vino’, ke kitekitiliaya Amokuali, ke amo moseuiaya tonal sábado uan hasta ke kiuijuikaltiaya Dios (Mat. 11:19; 26:65; Luc. 11:15; Juan 9:16). Sayoj ke Jesús amo keman kintauelnankilij. Maj tikchiuakan kemej yejua, komo aksa techtauelnankilia, maj amo no ijkon tiknankilikan (1 Ped. 2:21-23). Sayoj ke kemansa xa ouij techkisa (Sant. 3:2). ¿Toni techpaleuis maj kuali titanankilikan?

9. ¿Toni uelis techpaleuis maj amo titetauelnankilikan keman titanojnotsaj?

⁹ Komo aksa amo kuali mitsonnankilia keman tiontanojnotsa amo sayoj xikonita keniuj tanankilia. Se tokniuj takat akin monotsa Sam, kijtoua: “Nimochikaua niknemilis ke taltikpaknenkej moneki kikakis tein Biblia tamachtia uan ke uelis mopatas”. Uan no, taltikpaknenkej xa kualantoya porin kipanoka teisa nejon tonal. Keman techtauelnankiliskej uelis tikchiuaskej kemej se tokniuj siuat akin monotsa Lucía, uelis tiktataujtiskej Jiova maj techpaleui maj tiyolseujtokan uan maj amo tikijtokan teisa tein kinextis ke amo tikualtakamej oso ke amo titepoujkaitaj.

10. Kemej kijtoua 1 Timoteo 4:13, ¿toni monekiskia tikixtaliskej tikchiuaskej?

¹⁰ Xionmochikaua kuali tiontamachtis. Timoteo miak xiujmejya tanojnotsaya maski ijkon monekia kisentokas mochikauas okachi kuali tamachtis (xikonixtajtolti 1 Timoteo 4:13). ¿Keniuj uelis okachi kuali titamachtiskej? Moneki kuali timomachtiskej. Uan tikpiaj miak taman tein uelis techpaleuis, kemej folleto Maj okachi kuali titaixtajtoltikan uan titamachtikan, uan taxelol “Maj okachi kuali titamachtikan” tein kipia amaix Tein timomachtiaj itech nechikol Tonemilis uan Totanojnotsalis. ¿Kuali tikonkuitok nochi nejin? Komo  kuali tionmomachtia, okachi amo tionmouis uan okachi kuali tiontajtos.

11. ¿Toni kichiuanij seki tokniuan tein kinpaleuiani maj okachi kuali tamachtikan?

¹¹ No techpaleuis maj okachi kuali titamachtikan komo tikitaj tein kichiuaj tokniuan uan tikchiuaj kemej yejuan. Sam, akin ika titajtojkej itech párrafo 9, kiita toni kinpaleuia tokniuan maj kuali tamachtikan. Yejua ika kuali kinkaki uan mochikaua tamachtis kemej yejuan. Se tokniuj siuat akin monotsa Talía, kuali kikaki keniuj tamachtiaj tokniuan akin kitemakaj kuali tanojnotsmej. Nejin semi kipaleuiani itech tanojnotsalis porin kimati keniuj tanankilis uan tetanemililtis keman aksa kitajtania teisa.

12. ¿Toni ouij kinkisa kichiuaskej seki tokniuan?

¹² Tinochin ueli titapaleuiaj itech nechikolmej keman timokuikatiaj uan keman achto kuali timomachtiaj tein titanankiliskej (Sal. 22:22). Seki tokniuan semi ouij kinkisa mokuikatiskej uan tanankiliskej itech nechikol. ¿No ijkon mitsonpanoua? Komo kemaj, xa tikonnekis tikonmatis toni kinpaleuiani oksekin maj amo mouikanok.

13. ¿Toni uelis mitsonpaleuis xionmokuikati ika yolpakilis itech nechikolmej?

¹³ Xionmokuikati ika yolpakilis. Xikonelnamiki ke timokuikatiaj itech nechikolmej porin ika tikueyichiuaj Jiova. Maj tikitakan tein kichiua se tokniuj siuat akin monotsa Sara. Maski kinemilia ke amo kualtsin mokuikatia, kineki ika kiueyichiuas Jiova. Yejua ika, keman momachtia tein moitas itech nechikolmej no momamachtia nekuikatilmej uan kiita keniuj mouika ika tein motajtos itech nechikol. Yejua kijtoua: “Nejin nechpaleuia maj okachi itech nitanemili tein moijtoua itech nekuikatil uan amo kemej nimokuikatia”.

14. Komo tejuatsin tionpinaua tiontajtos, ¿toni uelis mitsonpaleuis xiontanankili itech nechikolmej?

¹⁴ Xionmochikaua nochipa tiontanankilis. Miakej tokniuan semi ouij kinkisa kichiuaskej nejin. Talía, akin ika titajtojkej itech párrafo 11, kijtoua: “Maski amo mokaki, semi nimoui nitajtos kampa miakej yetokej. Yejua ika semi ouij nechkisa nitanankilis”. Maski ijkon, Talía tanankilia itech nechikolmej. Keman momachtia tein moitas itech nechikolmej kielnamiki ke yekinika tanankilil amo moneki uejkauas nion kijtos miak taman. Yejua kijtoua: “Keman nitanankilia, kuali yetok maj amo niuejkaua nion maj nikijto miak taman, porin yejua nejon kichia tokniuj akin kipanoltia tamachtilis”.

15. ¿Toni moneki tikelnamikiskej ika tein titanankiliaj itech nechikolmej?

¹⁵ Kemansa, hasta tokniuan akin amo pinauaj tajtoskej ouij kinkisa tanankiliskej. ¿Keyej? Se tokniuj siuat akin monotsa Juliet,  kijtoua: “Kemansa ouij nechkisa nitanankilis porin niknemilia ke amo miak taman tein nikijtoua uan amo kemej monekiskia”. ¿No ijkon mitsonpanoua tejuatsin? Komo kemaj, xikonelnamiki ke Jiova kineki maj tikchiuakan nochi tein tiueliskej. c Jiova semi kipatiuita keman timochikauaj titanankiliskej maski kemansa timouij.

16. ¿Toni amo moneki tikijtoskej?

¹⁶ Amo xikonijto “tajtolme ten teyolxokolia” (Efes. 4:31). Kemej tikitakejya, se tokniuj amo keman monekiskia kijtos pitsotik tajtolmej. Sayoj ke maski amo tikmatiskej ueliskia tikinyolxokoliskej oksekin, yejua ika moneki kuali tiknemiliskej tein tikijtouaj. Kemej neskayot, amo monekiskia tikinijtouiliskej teisa akin okseko kayomej oso taman kemej nemij. Uan amo no tiknekij tikijtoskej teisa tein kichiuas maj oksekin amo kuali momachilikan. Se tokniuj takat kijtoua: “Kemansa nikijtouani teisa tein niknemilia ke kuali uan teueuetskitij, sayoj ke tein melauj kichiuani maj aksa amo kuali momachili. Itech nochi nejin xiujmej nonamik semi nechpaleuiani porin nechiluia keman toselti tietokej komo nikyolxokolia yejua oso oksekin”.

17. Kemej kijtoua Efesios 4:29, ¿keniuj uelis tikinyolchikauaskej oksekin?

¹⁷ Xikonijto tein teyolchikauas. Amo xikonijijto oksekin, ta xionmochikaua tikoniluis tein kuali tein kichiuaj (xikonixtajtolti Efesios 4:29). Amo tiknekij tikchiuaskej kemej israelitas. Maski yejuan kipiayaj miak taman tein ika motasojkamatiskej, nochipa kijtojtinemiaj tein amo kiuelitayaj, uan keman aksa ijkon kichiua, oksekin no kichiuaj. Tein kijtojkej majtakti tapijpianij kichiuak maj “nochin israelitas kijtouani tein amo kiuelitiliayaj Moisés” (Núm. 13:31-14:4). Sayoj ke, keman tikiniluiaj oksekin tein kuali tein kichiuaj semi kinpaleuia. Maj itech titanemilikan isiuapil Jefté. Keman itasojikniuan kiluijkej tein kuali tein kichiuaya uan kiyolchikaujkej kipaleuij maj kisentokani kichiuani tekit tein kipiaya (Juec. 11:40). Sara, akin ika titajtojkej itech párrafo 13, kijtoua: “Keman tikiniluiaj oksekin tein kuali tein kichiuaj tikinpaleuiaj maj kimachilikan ke Jiova kintasojta uan ke okseki tokniuan no kintasojtaj”. Nochipa keman uelis, xikonilui oksekin tein kuali tein kichiuaj.

18. Ika tein kijtoua Salmo 15:1, 2, ¿keyej moneki nochipa tikijtoskej tein melauj, uan toni kijtosneki?

¹⁸ Maj nochipa tikijtokan tein melauj. Komo titakajkayauaj amo tikyolpaktiskej Jiova porin yejuatsin kitauelita nochi taman takajkayaualis (Prov. 6:16, 17). Maski taltikpakneminij  kinemiliaj ke kuali yetok maj se takajkayaua, tejuan tiknekij titanemiliskej kemej Jiova (xikonixtajtolti Salmo 15:1, 2). Xa amo titakajkayauaskej, sayoj ke amo no kuali yetok maj tiktatikan teisa tein tikmatij para maj oksekin kineltokakan ke melauj maski amo.

19. ¿Toni amo no moneki tikchiuaskej?

¹⁹ Amo ininka xiontajtojtinemi oksekin (Prov. 25:23; 2 Tes. 3:11). Juliet, akin ika titajtojkej itech párrafo 15, kijtoua keniuj momachilia keman kikaki ke aksa ininka tajtojtinemi oksekin. Yejua kijtoua: “Keman nikaki ke aksa ininka tajtojtinemi oksekin, amo nechyolchikaua uan kichiua maj amo nitakuaujtamatiok iuan. ¿Keniuj nikmati ke amo no noka tajtojtinemis?”. Keman tikonkakis ke aksa peua ininka tajtoua oksekin okachi kuali ika xiontajto okse taman uan xikonijto teisa tein tapaleuia (Col. 4:6).

20. ¿Toni tikonixtalijtok tikonchiuas?

²⁰ Axkan semi miakej amo kualtsin tajtouaj. Yejua ika tejuan moneki timochikauaskej titajtoskej kemej Jiova kineki. Xikonelnamiki ke Jiova kichiuak maj titajtokan uan yejuatsin kuali kiita keniuj titajtouaj. Komo timochikauaj tikueyitaliskej Jiova ika tein tikijtouaj keman titanojnotsaj, itech nechikolmej uan keman titajtouaj iniuan oksekin, yejuatsin techtatiochiuis. Keman amo mochiuasok tein amo kuali tein onkak itech taltikpak, okachi amo ouij techkisas tikueyitaliskej Jiova ika tein tikijtoskej (Jud. 15). Kemej ayamo ejko nejon tonal, maj tikixtalikan tikchiuaskej tein kijtoj se salmista: “Maj notajtoluan […] mitsyolpaktikan, Jiova” (Sal. 19:14).