1. ¿Akin okichi ma titlajtokan?

 JEHOVÁ techtlasojtla, ik non, okichi ma titlajtokan. Adán iuan omotlapoui ijkuak ye okichijchi. Noijki iselti okimiaktili itlajtol, ik non, kuali okintokayoti yolkamej (Gén. 2:19). Uan sapanoua oyolpakik ijkuak omotlapoui iuan Eva (Gén. 2:22, 23).

2. ¿Ken otlajtouayaj yiuejkika uan axkan ken tlajtouaj?

² Pero satepan Satanás okikajkaya Eva, ik non, tinochtin titlajtlakolejkej uan tikchiuaj tlen amo kuali (Gén. 3:1-4). Adán amo kuali otlajto ijkuak okichi tlen amo kuali, okijto itlajtlakol Jehová uan Eva (Gén. 3:12). Caín okikajkaya Jehová ijkuak okimikti ikni (Gén. 4:9). Seki xiuitl satepan se ixui Caín tlen omotokayotiaya Lamec okijto seki tlamantli tlen okiteititi ijkuakon sapanoua omoteuiayaj (Gén. 4:23, 24). ¿Uan axkan tlen panoua? Tekiuajkej amo pinauaj tlauijuikaltiskej, noijki onka miak películas kanin san tlauijuikaltiaj, itech escuelas uan kanin titekipanouaj noijki ijkon kichiuaj.

3. ¿Tlen uelis techpanos tla amo timomaluiaj uan tlen timomachtiskej?

³ Tla amo timomaluiaj, peuas titlauijuikaltiskej ken oksekimej. Tejuan tiknekij tikyolpaktiskej Jehová, ik non, amo titlauijuikaltiskej uan timochijchikauaskej para kuali titlajtoskej uan ijkon tikueyichiuaskej Jehová. Axkan timomachtiskej ken uelis ijkon tikchiuaskej ijkuak titetlapouiaj, timonechikouaj uan ijkuak timotlapouiaj iuan tokniuan. Ma tikitakan tleka Jehová kipatioita tlen tikijtouaj.

4. Ijkon ken kijtoua Malaquías 3:16, ¿tleka Jehová kipatioita tlen tikijtouaj?

⁴ (Xiktlajtolti Malaquías 3:16). ¿Tleka itech iamoch Jehová kijkuiloua intoka akinmej kitlakamatij uan mokuayejyekouaj tlen ye kichiua? Tlen kijtouaj kiteititia tlen onka itech inyolo. Jesús okijto: “Porke tlan kitemitijtok toyolo ye tlan tikijtoah” (Mat. 12:34). Ik non, tlen timotlapouiaj kiteititia kox sapanoua tiktlasojtlaj Jehová. Tla tiktlasojtlaj, ye techkauilis nochipa ma tiyoltokan itech xochitlali.

5. (1) ¿Tleka moneki kuali titlajtoskej? (2) Ijkon ken mota itech fotos, ¿tlen amo moneki tikchiuaskej uan ijkon Jehová touan yolpakis?

⁵ Jehová kiselis ijkuak tikueyichiuaj tla kuali titlajtouaj (Sant. 1:26). Akinmej amo kixmatij Jehová moueyinekij, san niman kualanij uan amo kuali kintlapouiaj oksekimej (2 Tim. 3:1-5). Tejuan amo tiknekij ijkon tikchiuaskej, tiknekij kuali titlajtoskej para tikyolpaktiskej Jehová. Pero, ¿ye yolpaki ijkuak ikaj kuali tlajtoua ijkuak tetlapouia, monechikoua pero amo kuali kintlapouia ifamiliares uan san kualani? (1 Ped. 3:7).

6. ¿Tlen okipanok Kimberly?

⁶ Tla kuali titlajtouaj, oksekimej kitaskej akinmej kitekichiuiliaj Jehová uan akinmej amo (Mal. 3:18). Kijtosneki tejuan tikteititiskej melauak tikueyichiuaj Jehová. Ma tikitakan tlen okipanok se tokni tlen itoka Kimberly. b Ye uan se ichpochtli tlen iuan omomachtiaya itech escuela san sekan okichijkej se tlamantli. Ijkuakon non ichpochtli okitak Kimberly okipiaya kuali inemilis porque amo otlateneuaya, amo otlauijuikaltiaya uan kuali okintlapouiaya oksekimej. Non ichpochtli okitlajtlani tleka ijkon okichiuaya uan satepan Kimberly opejki kimachtia. ¡Jehová sapanoua yolpaki ijkuak sekimej peua momachtiaj iTlajtol porque kitaj kuali titlajtouaj!

7. ¿Ken tiknekij titlajtoskej?

 ⁷ Tinochtin tiknekij tlen tikijtoskej ma kiueyichiua Jehová uan noijki ma techpaleui ma timouikakan iuan tokniuan. Ik non, ma tikitakan tlen uelis tikchiuaskej uan ijkon noijki uelis tikinpaleuiskej oksekimej.

8. ¿Ken uelis tikchiuaskej ken Jesús ijkuak titetlapouiaj?

⁸ Ma titetlakaitakan ijkuak amo kuali technankiliskej. Ijkuak Jesús okatka nikan tlaltikpak oksekimej okijtouayaj ye sapanoua otlakuaya uan okatka tlauanki, okitekichiuiliaya Diablo, amo okitlakaitaya sábado uan hasta okijtojkej okiuijuikalti toTajtsin Dios (Mat. 11:19; 26:65; Luc. 11:15; Juan 9:16). Pero Jesús amikaj okiuijuikalti. Tla ikaj amo kuali technankilia uan kualani, ma tikchiuakan ken Jesús uan amo ma timomakopakan (1 Ped. 2:21-23). Xamo oui ijkon tikchiuaskej (Sant. 3:2). ¿Tlen techpaleuis nochipa kuali ma titlajtokan?

9. ¿Tlen techpaleuis ma titetlakaitakan ijkuak titetlapouiaj?

⁹ Tla ikaj amo kuali technankilia ijkuak titetlapouiaj, amo san non ma tikilnamiktokan. Se tokni tlen itoka Sam, okijto: “Nimokuayejyekoua akin oniktlapoui moneki kikakis tlen toTajtsin Dios kijtoua uan nikneltoka uelis kipatlas inemilis”. Noijki xamo kualani porque otiajsitoj ijkuak amo kuali omomachiliaya. Ijkuak titetlapouitiuij uan tikajsiskej ikaj kualantok, ma tikchiuakan ken tokni Lucía: ma tiktlatlaujtikan Jehová ma techpaleui para uelis tiktlakaitaskej uan amo tikiluiskej itlaj tlen okachi kikualanis.

10. Ijkon ken kijtoua 1 Timoteo 4:13, ¿tlen moneki tikchiuaskej?

¹⁰ Ma timotlatlaujtikan para kuali titlamachtiskej. Timoteo okimatiaya ken tetlapouis pero ok omonekiaya mochijchikauas para kuali tlamachtis (xiktlajtolti 1 Timoteo 4:13). ¿Ken uelis okachi kuali titlamachtiskej? Moneki kuali timoyektlaliskej uan para ijkon tikchiuaskej ma timomachtikan ninmej amatlajkuilolmej: Ximoyektlali uan okachi kuali titlamachtis uan sección tlen kajki itech, Toteki akinmej tikchiuaj ken Cristo (Tlen tiktekitiltiskej itech nechikol) tlen itoka: “Okachi kuali ma titlamachtikan”. ¿Ika timoyektlaliaj? Tla ijkon tikchiuaj, amo timomojtiskej ijkuak titetlapouiskej.

11. ¿Tlen kichiuaj sekimej tokniuan para kuali tlamachtiskej uan tetlapouiskej?

 ¹¹ Noijki techpaleuis titetlapouiskej uan titlamachtiskej tla tikinmitaj ken kichiuaj oksekimej tokniuan. Itech párrafo 9 otikitakej tlen mokuayejyekoua Sam, ye kita tlen kichiuaj oksekimej tokniuan para kuali tlamachtiskej, ik non, kuali kinkaki uan kichiua ken yejuan. Se tokni tlen itoka Talía kuali kikakij ken tlamachtiaj tokniuan kanin monechikoua uan non kipaleuia ijkon ma kichiua ijkuak tetlapouia uan kinpaleuia ma mokuayejyekokan akinmej kinmachtia.

12. ¿Tlen kitaj oui sekimej tokniuan ijkuak monechikouaj?

¹² Ijkuak timonechikouaj tinochtin uelis titlakuikaskej uan tla kuali timoyektlaliaj kuali titlanankiliskej (Sal. 22:22). Sekimej kitaj oui tlakuikaskej uan tlanankiliskej ¿Ijkon mitspanoua? Xamo tikneki tikmatis tlen yokinpaleui oksekimej para ayakmo ma momojtikan.

13. ¿Tlen techpaleuis ma titlakuikakan ika nochi toyolo kanin timonechikouaj?

¹³ Ma titlakuikakan ika nochi toyolo. Ma tikilnamikikan ijkuak timonechikouaj tikueyichiuaj Jehová ijkuak titlakuikaj. Ma tikitakan tlen okichi se tokni tlen itoka Sara. Ye kijtoua amo kualtsin tlakuika pero kineki kitlakuikilis Jehová. Ik non, ijkuak moyektlalia para monechikos, kojpauia tlen ijkuakon tlakuikaskej. Ijkon kita tlen ompa momachtiskej noijki kijtoua tlakuikali. Ye kijtoua: “Non nechpaleuia ma nikita tlen kijtoua uan amo ken nitlakuika”.

14. ¿Tlen uelis techpaleuis tla tipinauaj titlanankiliskej?

¹⁴ Ma titlanankilikan kanin timonechikouaj. Miakej tokniuan kitaj oui tlanankiliskej. Itech párrafo 11 otikitakej tlen kichiua Talía, ye okijto: “Maski mokaki amo nipinaua nitlajtos kanin katej miakej, nikita oui nitlanankilis”. Pero ye tlanankilia. Ijkuak moyektlalia kita moneki kijtos tlen okachi ipati uan amo uejkauas. Ye kijtoua: “Ijkuak nitlanankilia amo niuejkaua uan nikijtoua tlen okachi ipati porque ijkon kineki tokni ma titlanankilikan”.

15. ¿Tlen moneki tikilnamikiskej ijkuak titlanankiliaj?

¹⁵ Oksekimej tokniuan amo pinauaj tlajtoskej pero ualeua amo tlanankiliaj.  ¿Tleka? Se tokni tlen itoka Juliet, okijto: “Ualeua nikita oui nitlanankilis porque nimokuayejyekoua amo kuali nitlanankilia”. ¿Ijkon techpanoua? Ma tikilnamikikan Jehová kineki ma timochijchikauakan ma titlanankilikan. c Maski ualeua timomojtiaj titlanankiliskej Jehová kipatioita ijkuak timochijchikauaj.

16. ¿Tlen amo ma tikijtokan?

¹⁶ Amo ma tikijtokan tlen kinyolkokos oksekimej (Efes. 4:31). Akinmej tikchiuaj ken Cristo amo titlauijuikaltiaj pero tla amo timomaluiaj uelis tikijtoskej itlaj tlen kinyolkokos oksekimej. Amo ma tikijtokan amo kuali tlen kichiuaj akinmej uitsej itech okse altepetl. Noijki amo ma tikijtokan itlaj tlen kinyolkokos oksekimej. Se tokni okijto: “Ualeua nikijtoua tlen kinuetskitia oksekimej pero amo onikitaya ijkon onikinyolkokouaya oksekimej. Nosiua yonechpaleui porque nechiluia ijkuak ye nikyolkokoua noso nikinyolkokoua oksekimej”.

17. Ijkon ken kijtoua Efesios 4:29, ¿ken uelis tikinyolchikauaskej tokniuan?

¹⁷ Ma tikijtokan tlen kinyolchikauas tokniuan. Amo ma tikinteneuakan uan ma tikinmiluikan tlen kuali kichiuaj (xiktlajtolti Efesios 4:29). Amo ma tikchiuakan ken israelitas, yejuan omonekiaya motlasojkamatiskej pero san otlateneuayaj uan non okichi oksekimej noijki ijkon ma kichiuakan. Majtlaktli tlakamej okijtojkej tlen amo kuali, ik non, israelitas okitenejkej Moisés (Núm. 13:31-14:4). Ijkuak tikinmiluiaj tokniuan tlen kuali kichiuaj, non kinpaleuia. Ma tikitakan tlen okipanok ichpoch Jefté. Xamo iyolikniuan okiyolchikajkej uan non okipaleui ma kitekichiuilijto Jehová (Juec. 11:40). Itech párrafo 13 otikitakej tlen kichiua Sara, ye okijto: “Ijkuak tikinmiluiaj tlen kuali kichiuaj oksekimej, yejuan kitaj Jehová kintlasojtla uan kinkauilia ma kitekichiuilikan”. Nochipa ma tikinmiluikan tlen kuali kichiuaj tokniuan.

18. Ijkon ken kijtoua Salmo 15:1, 2, ¿tleka amo kuali ma titlakajkayauakan?

¹⁸ Nochipa ma tikijtokan tlen melauak. Tikyolpaktiskej Jehová tla ijkon tikchiuaj porque ye amo kipaktia  ijkuak ikaj tlakajkayaua (Prov. 6:16, 17). Miakej kinpaktia tlakajkayauaskej pero tejuan tiknekij timokuayejyekoskej ken Jehová (xiktlajtolti Salmo 15:1, 2). Amo keman ma titlakajkayauakan, noijki amo kuali ma tikijtokan tlen amo ajsitok porque tlamo oksekimej mokuayejyekoskej okse tlamantli tlen amo melauak.

19. ¿Tlen noijki amo moneki ma tikchiuakan?

¹⁹ Amo ma tikijtojtinemikan tlen kinpanoua oksekimej (Prov. 25:23; 2 Tes. 3:11). Itech párrafo 15 otikitakej tlen kipanoua Juliet, ye kijtoua amo kiyolchikaua ijkuak ikaj kijtoua tlen kinpanoua oksekimej. Ye okijto: “Ijkuak nikkaki ikaj kijtoua tlen kinpanoua oksekimej, nechyolkokoua uan ayakmo nikneki nikiluis tlen nechpanoua. Nimokuayejyekoua ¿ken nikmati amo kijtojtinemis tlen nechpanoua?”. Tla akinmej inmiuan tikatej peuaj kijtouaj tlen kinpanoua oksekimej, san niman ma tikijtokan okse tlamantli tlen techyolchikauas (Col. 4:6).

20. ¿Tlen uelis tikchiuaskej?

²⁰ Miakej kijtouaj itlaj tlen amo kinpaleuia oksekimej. Ik non, moneki tikijtoskej tlen Jehová kipaktia. Ma tikilnamikikan ye okichi ma titlajtokan uan kipatioita tlen tikijtouaj. Ye techteochiuas tla tikueyichiuaj ika tlen tikijtouaj, ijkuak titetlapouiaj, timonechikouaj uan ijkuak timotlapouiaj iuan tokniuan. Ijkuak ayakmo tlanauatis Satanás nochi tlen tikijtoskej kiueyichiuas Jehová (Jud. 15). Ik non, ma tikijtokan ken salmista: “Nochi tlen nikijtos uan nimokuayejyekos ma mitsyolpakti Jehová” (Sal. 19:14).