TLAMACHTIJLI 15
Jehová kineki kuajli matitlajtokan
“Motech ma kitakan on yejuan tlaneltokaj kenijki titlajtlajtoua” (1 TIM. 4:12).
TLAKUIKAJLI 90 Xmoyolchikauakan
TLEN TIKITASKEJ a
1. ¿Tleka ueli titlajtouaj?
JEHOVÁ melak techtlasojtla. Ika yejon, okichiuj matiuelikan matitlajtokan. Ijkuak yejua okichijchiuj Adán nimantsin ouel iuan otlajto. Adán opeuj kinmiyekilia totlajtoluan niman opeuj kintokayotia yolkamej (Gén. 2:19). Niman san matikonnemilikan kenon melak oyolpak ijkuak otlajto iuan isiuatsin, Eva (Gén. 2:22, 23).
2. ¿Akinomej opeuj xkuajli tlajtouaj, niman tlenon tikitaj aman?
2 Jehová kinekiya nochimej kuajli matlajtokan, san ika, xijkon opanok. Satanás xkuajli otlajto pampa okikajkayauj Eva, niman pampa okikajkayaujkej Eva tinochimej titlajtlakolejkej (Gén. 3:1-4). Adán noijki xkuajli otlajto ijkuak okitlajtlakolti Eva niman Jehová (Gén. 3:12). Caín noijki ijkon okichiuj pampa xokijli Jehová ika okimikti ikniuj, Abel (Gén. 4:9). Tlen okijto Lamec noijki techititia kenon miyekej kichiujtoyaj tlen xkuajli (Gén. 4:23, 24). Niman aman tikitaj kenon ipan escuelas, kampa titekitij niman miyekej políticos teuijuikaltiaj. Noijki ouijtika tiknextis se película kampa xteuijuikaltiaj. Kuajli tikitaj ika melak yotlaijtlakauj.
3. ¿Tlenon uelis topan panos, niman tlenon tikitaskej ipan yejuin tlamachtijli?
3 Nochiuiyan tijkakij kenon miyekej teuijuikaltiaj, niman tla xtotlajpiyaj noijki uelis peuas ijkon titlajtoskej. San ika, akin tikchiuaj ken Cristo xtiteuijuikaltiaj pampa tiknekij tikyolpaktiskej Jehová. Tejuamej nochipa tiknekij kuajli titlajtoskej pampa tiknekij tikueyichiuaskej Jehová. Ipan yejuin tlamachtijli tikitaskej kenon uelis kuajli titlajtoskej ijkuak titenojnotsaskej, ijkuak tiaskej tlanechikoltin niman ijkuak titlajtlajtoskej imiuan oksekimej. San ika, kachtopa matikitakan tleka Jehová kineki kuajli matitlajtokan.
JEHOVÁ KINEKI KUAJLI MATITLAJTOKAN
Tlen tikijtouaj, kiteititia tlenon tikpiyaj ipan toyojlo. (Xkimita párrafos 4 niman 5). e
4. Ken kijtoua Malaquías 3:16, ¿tleka Jehová kineki kuajli matitlajtokan?
4 (Xpoua Malaquías 3:16, TNM). b Biblia kinteneua miyekej tlakamej niman siuamej akin okiteititijkej ika kitlasojtlayaj Jehová. ¿Kenon okiteititijkej? Ipampa tlen okijtokej. Niman matikilnamikikan ika Jesús okijto: “On tlen kisa ipan tekamak ualeua ne ipan teyojlo” (Mat. 12:34). Kuakon, tlen tikijtouaj kiteititia tla yemelak tiktlasojtlaj Jehová. Niman yejua kineki nochipa manemikan akin kitlasojtlaj.
5. a) ¿Tlenon panoua ijkuak xkuajli titlajtouaj? b) Ken nesi ipan tlaixkopinaltin, ¿tlenon xtiknekij tikchiuaskej ijkuak titlajtouaj?
5 Jehová kineki ika nochimej itekipanojkauan makiueyichiuakan niman kuajli matlajtokan. Kuakon, tla xkuajli titlajtouaj kentla xtikueyichiujtoskiaj Jehová (Sant. 1:26). Miyekej akin xkitlasojtlaj Jehová tetlauelnotsaj, xtetlakaitaj niman noueyimatij (2 Tim. 3:1-5). Tejuamej xtiknekij ijkon tikchiuaskej. Ka, tiknekij nochipa tikyolpaktiskej Jehová ijkuak titlajtouaj. San ika ¿kiyolpaktiskia Jehová tla yakaj melak kuajli tenotsa ipan tlanechikojli noso ijkuak tenojnotsa, san ika, ijkuak nemij imiuan ichanejkauan kintlauelnotsa? (1 Ped. 3:7).
6. ¿Tlenon opanok pampa Kimberly kuajli tlajtouaya?
6 Tla kuajli titlajtouaj, oksekimej kitaskej ika akin kitekichiuiliaj toTajtsin xsan noijki kichiuaj ken akin xkitekichiuiliaj toTajtsin (Mal. 3:18). Kuakon, ken titlajtouaj kiteititia tla yemelak tiktekichiuiliaj Jehová. Matikitakan tlen ipan onochiuj tokniuj Kimberly. c Ijkuak se ichpochtli akin iuan nomachtiaya san sekan okichijchiujkej se tarea, yejua okitak ika Kimberly xtetejteneuaya, kuajli tenotsaya niman xteuijuikaltiaya. Yejuin ichpochtli kinekiya kimatis tleka Kimberly xkichiuaya ijkon ken oksekimej. Niman sakin Kimberly opeuj kimachtia Biblia. ¡Jehová melak yolpaki ijkuak kita ika oksekimej nomachtiaj san pampa kitaj ika kuajli titlajtouaj!
7. ¿Tleka tikneki kuajli titlajtos?
7 Tinochimej tiknekij nochipa kuajli titlajtoskej pampa tiknekij tikueyichiuaskej Jehová niman pampa tiknekij touikaskej imiuan tokniuan. Amantsin tikitaskej tlen techpaleuis nochipa kuajli matitlajtokan.
KUAJLI XTLAJTO IJKUAK TITENOJNOTSAS
Jehová kineki kuajli matitenankilikan ijkuak titenojnotsaj. (Xkimita párrafos 8 niman 9).
8. ¿Kenon uelis tikchiuaskej ijkon ken Jesús ijkuak titenojnotsaskej?
8 Xtetlakaita niman kuajli xtenotsa ijkuak mitstlauelnotsaskej. Ijkuak Jesús nemiya ipan tlaltikpaktli, miyekej okijtokej ika melak tlakuaya niman tlauaniya, ika kitekichiuiliaya Diablo, ika xkitlakaitaya tonajli sábado niman hasta okijtouilijkej ika yokiuijuikaltijka toTajtsin (Mat. 11:19; 26:65; Luc. 11:15; Juan 9:16). Maski ijkon, Jesús xkeman okintlauelnankili. Matikchiuakan ijkon ken Jesús, ijkuak yakaj techtlauelnotsas maka matiktlauelnankilikan (1 Ped. 2:21-23). Kemantika noijki tikualanij ijkuak techtlauelnotsaj (Sant. 3:2). Ika yejon, ¿tlenon techpaleuis maka matitetlauelnankilikan?
9. ¿Tlenon uelis tikchiuaskej tla yakaj techtlauelnotsa ijkuak titenojnotsaj?
9 Maka nimantsin matikualanikan ijkuak yakaj techuajtlauelnankilis kampa titenojnotsaj. Matikitakan tlenon kichiua se tokniuj tlakatl akin itoka Sam, yejua kijtoua: “Ijkuak yakaj nechtlauelnotsa, niknemilia ika yejua noijki noneki kimatis tlen kijtoua Biblia niman ika uelis nopatlas”. Sekimej techualajuaj pampa kanaj ipan yejon tonajli itlaj kinkualanijtoya. Ijkuak yakaj ijkon texchiuilis, matikchiuakan ken tokniuj Lucía: matiknotsakan Jehová niman matiktlajtlanilikan matechpaleui matitetlakaitakan niman maka matitetlauelnankilikan.
10. Ken kijtoua 1 Timoteo 4:13, ¿tlenon noneki tikchiuaskej?
10 Xyejyeko más kuajli xtemachti. Timoteo melak kuajli tenojnotsaya, san ika, Pablo okijli ika nonekiya nokojtilis más kuajli temachtis (xpoua 1 Timoteo 4:13). Tla tejuamej noijki tiknekij ijkon tikchiuaskej, noneki kuajli tomachtiskej. Uelis techpaleuis amatlajkuilojli Xmomachti kuajli titlaamapouas niman titemachtis niman sección Xmomachti melak kuajli xtenojnotsa tlen uajlauej ipan amatlajkuilojli Nemilistli niman Tekitl ken Cristo. Tlen Tomachtiskej niman tlen Notekitiltis. Tla kuajli tikintekitiltiaj yejuin amatlajkuiloltin, techpaleuis maka matomojtikan niman más kuajli matitenojnotsakan.
11. ¿Tlenon kichiuaj sekimej tokniuan para kuajli temachtiskej?
11 ¿Tlenon okseki uelis tikchiuaskej tla tiknekij más kuajli titemachtiskej? Matikitakan kenon temachtiaj tokniuan niman noijki ijkon matikchiuakan. Sam, akin otikteneujkej ipan párrafo 9, ijkon kichiua. Yejua kuajli kinkaki tokniuan niman nokojtilia temachtis ijkon ken yejuamej kichiuaj. Noijki matikchiuakan ken tokniuj Talía, yejua kuajli kinkaki tlamachtiltin tlen kinpanoltiaj tokniuan. Niman ijkuak kitlajtoltia itlaj tlen ouijtika ijkuak tenojnotsa kitetomilia ijkon ken tokniuan kichiuaj.
KUAJLI XTLAJTO IPAN TLANECHIKOLTIN
Tikueyichiuaj Jehová ijkuak tokuikatiaj ika nochi toyojlo ipan tlanechikoltin. (Xkimita párrafos 12 niman 13).
12. ¿Tlenon ouijtika kitaj sekimej tokniuan?
12 Tinochimej uelis tokuikatiskej niman titlanankiliskej ipan tlanechikoltin (Sal. 22:22). Sekimej pinauij nokuikatiskej niman nomojtiaj tlanankiliskej. ¿Noijki ijkon mopan nochiua? Tla kema, kanaj tikneki tikmatis tlenon yokinpaleui sekimej tokniuan.
13. ¿Tlenon uelis mitspaleuis xmokuikati ika nochi moyojlo ipan tlanechikoltin?
13 Xmokuikati ika nochi moyojlo. Xkilnamiki ika tokuikatiaj ipan tlanechikojli pampa ijkon tikueyichiuaj Jehová. Tokniuj Sara kijtoua ika maski xmás kualtsin nokuikatia, ika nochi iyojlo nokuikatia ipan tlanechikoltin pampa kimati ika ijkon kiueyichiua Jehová. Ika yejon, ijkuak nomachtia tlen nopanoltis ipan tlanechikoltin noijki nomajmachtia tlakuikaltin tlen tokuikatiskej niman kita kenon yejon tlakuikaltin noijki tlajtouaj itech tlen nopanoltis ipan tlanechikojli. Yejua kijtoua: “Nochi yejuin nechpaleuiya ika ijkuak ninokuikatia nikaktiuj tlen nikijtojtiuj niman xsan nijkaki ken ninokuikatia”.
14. ¿Tlenon uelis mitspaleuis tla timomojtia titlanankilis?
14 Nochipa xtlanankili. Miyekej tokniuan nomojtiaj tlanankiliskej. Talía, akin otikteneujkej ipan párrafo 11, kijtoua: “Maski xnesi, nejua ninomojtia nitlajtos teixpan, ika yejon, nipinaui nitlanankilis”. Maski ijkon tokniuj Talía nochipa nokojtilia tlanankilis. Ijkuak yejua nomachtia tlen nopanoltis ipan tlanechikojli, nochipa kilnamiki ika akin kachtopa tlanankilia xnoneki uejkauis. Yejua kijtoua: “Yompa ika xniuejkaui ijkuak nitlanankilia pampa yejon tlen kineki akin kiyekana tlamachtijli”.
15. ¿Tlenon noneki tikilnamikiskej?
15 Sekimej tokniuan, maski xnomojtiaj, xkinekij tlanankiliskej. ¿Tleka? Matikitakan tlenon kijtoua tokniuj Juliet: “Xmás nikneki nitlanankilis pampa nikmachilia ika xmiyek nikijtoua ijkuak nitlanankilia”. Tla tejua noijki ijkon titlanemilia, xkilnamiki ika Jehová kineki matikchiuakan nochi tlen tiuelij. d Jehová kuelita ijkuak kita ika tejuamej tokojtiliaj titlanankiliskej maski tomojtiaj.
KUALTSIN XTENOTSA
16. ¿Tlenon xnoneki tikchiuaskej?
16 Maka xkijto tlen uelis kinyolkokos oksekimej (Efes. 4:31). Ken yotikitakej, akin tiktekichiuiliaj Jehová xtitlauijuikaltiaj. San ika, tla xtotlajpiyaj uelis tikijtoskej tlen uelis kinyolkokos oksekimej. Noijki, matotlajpiyakan maka tikinyolkokoskej akin oksekan ualeuaj. Niman noijki, maka matikijtokan itlaj tlen uelis kinyolkokos noso kinpinaujtis oksekimej. Se tokniuj kijtoua: “Kemantika nikijtoua itlaj para niteuetskitis, san ika, xniknemilia ika tlen nikijtoua teyolkokoua. Aman xok más ijkon nikchiua pampa nosiuatsin nimantsin nechijlia ijkuak nikijtoua itlaj tlen ika onikpijpinaujti noso ika onikinpijpinaujti oksekimej”.
17. Ken kijtoua Efesios 4:29, ¿kenon uelis tikinyolchikauaskej oksekimej?
17 Xkinyolchikaua oksekimej. Maka xtetejteneua, yej xkimijli oksekimej tlen kuajli kichiuaj (xpoua Efesios 4:29). Maka matikchiuakan ijkon ken israelitas akin san kijtouayaj tlen xkuelitayaj. Biblia kijtoua ika pampa majtlaktli ichtakatlachixkej xkuajli otlajtokej itech tlajli tlen kinmakaskiaj, israelitas noijki “opejkej tlamach kijtouiliaj Moisés” (Núm. 13:31-14:4). Tla tejuamej tikimijliaj tokniuan tlen kuajli kichiuaj, yejuamej noijki yolpakiskej. San matontlanemilikan itech ichpoch Jefté. Yejua, ika iyojlo tlapaleuiaya ipan tabernáculo pampa ichpochikniuan konyolchikauayaj (Juec. 11:40). Tokniuj Sara, akin otikteneujkej ipan párrafo 13, kijtoua: “Ijkuak tikimijliaj tokniuan tlen kuajli kichiuaj, kimachiliaj ika Jehová niman tejuamej melak tikintlasojtlaj”. Kuakon, nochipa xkimijli tokniuan tlen kuajli kichiuaj.
18. Ken kijtoua Salmo 15:1, 2, ¿tleka xnoneki titekajkayauaskej?
18 Nochipa xkijto tlen melauak. Jehová xkuelita ijkuak yakaj tekajkayaua, ika yejon, maka matitekajkayauakan (Prov. 6:16, 17). Maski aman miyekej tekajkayauaj, tejuamej xtiknekij ijkon tikchiuaskej pampa tiknekij tikyolpaktiskej Jehová (xpoua Salmo 15:1, 2). Tejuamej xkeman tiistlakatiskiaj, san ika, kanaj kemantika uelis tikijtoskej tlen xmelauak.
Jehová melak yolpaki ijkuak titeyolchikauaj. (Xkita párrafo 19).
19. ¿Tlenon xnoneki tikchiuaskej?
19 Maka xtetejteneua (Prov. 25:23; 2 Tes. 3:11). Juliet, akin otikteneujkej ipan párrafo 15, kijtoua ika xkuajli nomachilia ijkuak yakaj peua tetejteneua. Yejua kijtoua: “Ijkuak nijkaki ika yakaj peua tetejteneua xok itech nitlaneltoka pampa niknemilia ika kanaj noijki nechtejteneua”. Tla tikita ika yakaj peua tetejteneua, xpatla itech tlen nentlajtojtokej niman xkijtokan itlaj tlen teyolchikaua (Col. 4:6).
20. ¿Tlenon tiknektok tikchiuas?
20 Aman melak miyekej xkuajli tlajtouaj. Ika yejon, tejuamej noneki tokojtiliskej titlajtoskej ijkon ken Jehová kuelita. Matikilnamikikan ika Jehová okichiuj matiuelikan matitlajtokan niman yejua kineki nochipa matikijtokan tlen kuajli. Tla tejuamej tokojtiliaj kuajli titlajtoskej ijkuak titenojnotsaj, ijkuak tiauej tlanechikoltin niman ijkuak titlajtlajtouaj imiuan oksekimej Jehová melak techteochiuas. Kuakon, matikchiuakan tlen okijto se salmista: “NoTEKO xseli ikan paktli tlinon nikijtoua niman tlinon nikpiya ipan noyojlo” (Sal. 19:14). Ijkon matikchiuakan hasta ijkuak yejkos on tonajli ijkuak tinochimej uelis tikueyichiuaskej Jehová ika totlajtol ipan se kualtsin xochitlalpan (Jud. 15).
TLAKUIKAJLI 121 Noneki matoteltikan
a Jehová melak kualtsin otexchijchiuj: okichiuj matiuelikan matitlajtokan. San ika, miyekej xtlajtouaj ijkon ken Jehová kuelita. Ika yejon, ipan yejuin tlamachtijli tiknankiliskej yejuin: ¿tlenon uelis tikchiuaskej tla tiknekij nochipa titlajtoskej ijkon ken Jehová kuelita niman tla tiknekij mateyolchikaua tlen tikijtouaj? ¿Kenon tikmatiskej tla kiyolpaktia Jehová tlen tikijtouaj ijkuak titenojnotsaj, ijkuak tiauej tlanechikoltin niman ijkuak titlajtlajtouaj imiuan oksekimej?
b Malaquías 3:16: “Ipan yejon tonaltin akin kimojkaitayaj Jehová otlajtokej se iuan okse, se iuan akin kistinemij, niman Jehová xnoteltiaya ika kuajli kinkakiya. Niman se amoxtli tlen tetlalnamiktia onoijkuilo ixpan inpampa akin kimojkaitayaj Jehová niman akin tlanemiliayaj itech itoka”.
c Seki tokayomej yonopatlakej.
d Uelis okseki tikitas ipan tlamachtijli “Matikueyichiuakan Jehová ipan tlanechikojli”, itech Amatl Tekakistilijketl de enero de 2019.
e TLEN NESI IPAN TLAIXKOPINAJLI: Se tokniuj tetlauelnankilia kampa tenojnotsa; se tokniuj xika iyojlo nokuikatijtika, niman se tokniuj siuatl tetejteneua.
