1. Haniha zameʼe khöda buala fahuhuosa?

 LOWALANGIDA sebua faʼomasi zameʼe khöda buala ba wahuhuosa. Me no aefa tewöwöi niha siföföna yaʼia daʼö Adamo, tola iʼanemaiʼö fahuhuo ia khö Namania si so ba zorugo. Tola göi ifazökhi ngawua wehede si bohou, duma-dumania me ifatörö döi ngawalö gurifö. (1 Mo. 2:19) Tatu omuso sibai göi dödönia me awena fahuhuo ia khö woʼomonia si baga-baga sotöi Khawa!—1 Mo. 2:22, 23.

2. Hewisa wangogunaʼö niha buala fahuhuosa ba lala si fasala, he ba götö föna hegöi ba götöda iadaʼa?

² Lö ara aefa daʼö, ibörögö muʼogunaʼö mbuala fahuhuosa ba lala si fasala. Falimo Zatana khö Khawa irege aekhu niha ba horö ba tobali ira niha si lö moʼahonoa. (1 Mo. 3:1-4) Me no ifalua horö Adamo, itahigö Khawa hegöi Yehowa. (1 Mo. 3:12) Falimo Gaʼino khö Yehowa me no aefa ibunu nakhinia sotöi Habeli. (1 Mo. 4:9) Ba gafuriata, me no aefa ibunu niha ngaʼötö Gaʼino sotöi Lameki, ifazökhi gamaedola sangoromaʼö wa lö fasala nifaluania andrö. Moroi ba gamaedola daʼö, oroma waʼalösökhi niha ba götönia. (1 Mo. 4:23, 24) Hewisa niha ba götöda andre? Asese laʼogunaʼö wehede si lö sökhi föna niha sato ira sondröniaʼö ba politik. Oya göi film iadaʼa sangogunaʼö fehede simane daʼö. Ba zekola hegöi ba nahia wohalöwö, asese tarongo niha sangogunaʼö fehede si lö baga. Daʼö fefu zangoromaʼö wa itugu lö sökhi gamuata hegöi fehede niha ba gulidanö andre.

3. Hadia zinangea taʼangelamaisi, ba hadia manö nitutunöda ba artikel daʼa?

 ³ Börö me asese tarongo niha sangogunaʼö fehede si lö baga, tola manö ibörögö fatema daʼö ba dödöda. Na lö mangelama ita, tola tedönisi dödöda ba wamalua daʼö. Börö me niha Keriso ita, tatu omasi ita taʼomusoiʼö dödö Yehowa. Börö daʼö, lö taʼogunaʼö wehede si lö sökhi. Hizaʼi, lö ibönö daʼö. Lö tola löʼö taʼogunaʼö göi mbuala fahuhuosa ba lala si tefaudu, yaʼia daʼö ba wanuno Lowalangi. Ba artikel daʼa, tatutunö dania hewisa wamaluada daʼö (1) na möi ita manuriaigö, (2) na so ita ba gangowuloa, ba (3) na fahuhuo ita ba niha böʼö. Hizaʼi si oföna, datatutunö hadia mbörö wa iʼameʼegö tödö lala wahuhuosada Yehowa.

4. Moloʼö Maleakhi 3:16, hana wa inehe-nehegö wehededa Yehowa?

⁴ Baso Maleakhi 3:16. Moloʼö ayati daʼa, na so niha sangoromaʼö moroi ba wehedera wa laʼataʼufi Yehowa ba laʼangerönusi döinia, inehe-nehegö ira Yehowa ba isura döira ba ”mbuku famasugi ba dödö”. Hana wa inehe-nehegö wehedera Yehowa? Börö me fehedera andrö zangoromaʼö ösi dödöra. Imane Yesu, ”Hadia zi no fahöna ba dödö, daʼö zalua ba mbewe.” (Mat. 12:34) Börö daʼö, moroi ba nifadunö-dunöda, tola oroma hawaʼebua waʼomasida khö Yehowa. Ba omasi Yehowa enaʼö fefu niha sangomasiʼö yaʼia lasöndra waʼowua-wua dödö ba gulidanö si bohou sagötö faʼara.

5. (a) Hana wa moguna taʼamoniʼö wehededa? (b) Simane niforomaʼö ba gambara, hadia zi tebai tafalua na mohede ita?

⁵ Moguna taʼamoniʼö wehededa enaʼö itema zumange nibeʼeda Yehowa. (Yak. 1:26) Sasesenia, lö sökhi lagu wahuhuosa niha si lö mangomasiʼö Yehowa, ba asiliyawa ira na humede. (2 Ti. 3:1-5) Tatu lö omasi ita tafalua zimane daʼö. Omasi ita na omuso dödö Yehowa ba wehededa. Hizaʼi, hewisa na tahaogö-haogö wehededa ba gangowuloa hegöi ba wanuriaigö, hizaʼi lö sökhi wehededa ba nösi nomoda? Hadia omuso dödö Yehowa khöda?—1 Fe. 3:7.

6. Hadia mbuania börö me sökhi lagu wehede Kimberly?

⁶ Na taʼogunaʼö mbuala fahuhuosa moroi khö Lowalangi ba lala si sökhi, no taforomaʼö wa yaʼita andre ono mbanua Yehowa. Na tafalua  daʼö, aboto ba dödö niha si so ba zi fasuida gamaehuta ”niha samosumange Lowalangi ba si löʼö”. (Mal. 3:18) Nehegö zi no irai alua khö dalifusöda ira alawe sotöi Kimberly. b Labeʼe khönia halöwö ba zekola, ba fao ira samösa nawönia sekola ba wangasiwai halöwö daʼö. Me falulu fohalöwö ira, inehe-nehegö awönia andrö wa faehu Kimberly moroi khö ndra awö-awönia tanö böʼö. Lö irai iʼobousi nawönia, no ihaogö-haogö manö na fahuhuo ia, ba lö irai iʼogunaʼö wehede si lö sökhi. Toröi-röi ba dödö nawönia andrö gamuata Kimberly irege omasi ia lafahaʼö ba Zura Niʼamoniʼö. Tatu omuso dödö Yehowa na sökhi lagu wehededa irege adöni dödö niha ba wamahaʼö yaʼira sanandrösa khönia!

7. Hadia zomasiʼö öfalua me no ibeʼe khöu Yehowa mbuala fahuhuosa?

⁷ Omasi ita taʼogunaʼö ba lala si sökhi mbuala fahuhuosa si no ibeʼe khöda Yehowa irege möi famolakhöminia ba tobali famahatöda khö ndra talifusöda. Hadia zinangea tafalua enaʼö tobali ita ’duma-duma ba wehede’? Datatutunö.

8. Hadia duma-duma nibeʼe Yesu khöda?

⁸ Haogö wahuhuosa ba niha böʼö hewaʼae na lö sökhi wehedera khöu. Me so Yesu ba gulidanö, laböbögö khönia zi lö duhu wa yaʼia andrö niha si mabu-mabu, soluʼa-luʼa, sanöndra faʼabölö moroi khö Zatana, sangosiwawöi luo Sabato, ba sangoʼaya Lowalangi. (Mat. 11:19; 26:65; Luk. 11:15; Yoh. 9:16) Hewaʼae simanö, lö irai isulöni khöra Yesu wehede si lö sökhi. Simanö göi, na so niha samaʼema khöda fehede si lö sökhi, böi tasulöni göi faoma fehede si lö sökhi. (1 Fe. 2:21-23) Sindruhu sa, abua khöda wanaha tödöda na alua zimane daʼö. (Yak. 3:2) Hadia zi tola manolo yaʼita?

9. Hadia zanolo yaʼita ba wanaha fehededa na möi ita manuriaigö?

⁹ Na so zangumaʼö khöu fehede si lö sökhi ba wanuriaigö, forege enaʼö lö mofönu ndraʼugö. Imane talifusöda ira matua sotöi Sam, ”Uforege enaʼö itörö tödögu wa moguna ifahaʼö ia sokhö omo andrö ba zindruhu sanandrösa khö Lowalangi ba tola ibulöʼö gamuatania.” Itaria mofönu khöda zokhö omo ha börö me lö tefaudu ginötö weʼasoda. Nehegö hadia nifalua dalifusöda ira alawe sotöi Lucia me mofönu khönia zokhö omo. Iʼanemaiʼö ilau mangandrö khö Yehowa bakha ba dödönia enaʼö so khönia wanaha tödö ba lö isulöni wehede si lö sökhi khö zokhö omo andrö. Tola göi tafalua zimane daʼö.

10. Moloʼö 1 Timoteo 4:13, hadia zinangea tafalua?

¹⁰ Forege enaʼö tobali ndraʼugö samahaʼö satua-tua. Timoteo andrö samösa sanuriaigö satua-tua. Hizaʼi, moguna nasa idouʼö waʼatua-tuania ba wamahaʼö. (Baso 1 Timoteo 4:13.)  Hewisa enaʼö tola tobali ita samahaʼö si sökhi ba wanuriaigö? Moguna tahaogö wamaʼanö yaʼita. Oya sibai khöda publikasi si tola möi fanoloda enaʼö tobali ita samahaʼö satua-tua. Duma-dumania, tola öfahaʼö ndraʼugö ba brosur Odödögö Wombaso hegöi ba Wamahaʼö mazui ba faosatö ”Owölö-ölö ba Wanuriaigö” ba Waʼauri Niha Keriso ba Fanuriaigö—Waö-Waö Halöwö ba Gangowuloa. Hadia no öʼogunaʼö fefu publikasi daʼö ba wamahaʼö yaʼugö? Na tahaogö tafaʼanö ita, lö saʼae manizi-nizi ita ba wanuriaigö ba tola fahuhuo ita si fao faʼafaduhu dödö.

11. Hadia nifalua ndra talifusöda enaʼö tobali ira samahaʼö si sökhi?

¹¹ Tola tobali ita samahaʼö si sökhi na tafahaʼö ita khö ndra talifusöda ba mbanua niha Keriso. Sam, si no mutötöi moroi yawa, inehe-nehegö ndra talifusöda sonekhe mamahaʼö. Iʼosisiʼö hewisa lalara ba wamahaʼö niha, ba iforege wamalua simane daʼö. Samösa dalifusöda ira alawe sotöi Talia inehe-nehegö ndra talifusöda si no toʼölö mamaʼema huhuo sebua. Börö me ifalua daʼö, tola ifahaʼö ia hewisa lala ba wanutunö tuho-tuho sasese lasofu niha na möi ita manuriaigö.

12. Hadia zabua famalua moloʼö ira talifusöda?

¹² Ba gangowuloa, tola fao fefu ita ba wanunö hegöi ba wamaʼema bua gera-erada si no tahaogö tafaʼanö. (Si. 22:22) Hizaʼi, so ösa ndra talifusöda sorasoi wa abua khöra wanunö ba gangowuloa mazui ba wameʼe bua gera-era. Hadia simane daʼö göi nirasoimö? Na yaʼia, datatutunö ösa zi no irai alua si tola möi fanolomö.

13. Hadia zanolo yaʼugö enaʼö tola ölau manunö soroi ba dödö ba gangowuloa?

¹³ Anunö soroi ba dödö. Ohitö dödöda wa manunö ita ba gangowuloa yaʼia daʼö ba wanuno Yehowa. Irasoi talifusöda ira alawe sotöi Sara wa lö onekhe ia manunö. Hewaʼae simanö, omasi ia manunö ba wamolakhömi Yehowa. Börö daʼö, ba ginötö ifaʼanö waö-waö halöwö ba gangowuloa, ifaʼanö göi ia ba zinunö niʼanunöisi. Ifahaʼö ia wanunö ba iʼangeragö hadia gamakhaita ngawua wehede zinunö andrö ba duho nifatunö. Imane Sara, ”Börö me ufalua daʼö, tola uʼosambuaʼö dödögu ba nösi zinunö andrö ba lö saʼae itörö tödögu wa lö onekhedo manunö.”

14. Hadia zanolo yaʼugö na manizi-nizi ndraʼugö na öbeʼe mbua gera-eramö?

¹⁴ Forege enaʼö asese öbeʼe mbua gera-eramö. So ösa ndra talifusöda sorasoi wa abua khöra wamalua daʼö. Imane Talia si no mutötöi moroi yawa, ”Manizi-nizido na fahuhuo ndraʼo föna niha sato. Lö laʼila daʼö niha tanö böʼö börö me no uhaogö manö na fahuhuo ndraʼo. Sindruhunia, abua sibai khögu wameʼe bua gera-eragu.” Hewaʼae simanö, iforege Talia ba wameʼe bua gera-erania. Ba ginötö ifaʼanö waö-waö halöwö  ba gangowuloa, lö tebulö itörö-törö tödönia wa moguna adogo-dogo wanema li si oföna ba tefaudu ba wanofu nibeʼe zondröniaʼö. Imane, ”Lö fasala na adogo-dogo mbua gera-era nibeʼegu ba tefaudu ba wanofu nifaʼema, börö me daʼö zomasi zondröniaʼö.”

15. Hadia zi tebai taʼolifugö?

¹⁵ So ösa niha Keriso salawö-lawö ba wameʼe bua gera-era hewaʼae na tenga niha saila-aila ira. Hadia mbörö? Imane talifusöda ira alawe sotöi Juliet, ”Itaria uwaʼö tödögu wa talafo adogo-dogo ba ambö baga mbua gera-era nibeʼegu.” Hizaʼi, böi olifu ita wa omasi Yehowa na taforege wameʼe bua gera-erada. c Omuso sibai dödönia na tafalua daʼö hewaʼae na itaria manizi-nizi ita.

16. Hadia wehede si tebai taʼogunaʼö?

¹⁶ Böi ogunaʼö wehede ”fangoʼaya”. (Kol. 3:8) Simane si no tatutunö, tebai laʼogunaʼö wehede si lö sökhi ira niha Keriso. Hizaʼi, moguna göi mangelama ita enaʼö böi taʼogunaʼö wehede si möi fangailasi niha böʼö, hewaʼae na hulö sökhi wehede daʼö ba wamondrongoda. Duma-dumania, moguna mangelama ita enaʼö böi tafaʼema wehede si lö sökhi sanandrösa ba soi, mado, mazui si toʼölö lafalua niha böʼö. Baero daʼö, böi tafatörö-törö li ba niha böʼö si möi fangafökhö dödöra. Imane si samösa talifusöda ira matua, ”Itaria, hewaʼae na uwaʼö tödögu wa möi famaʼiki niha wehedegu, sindruhunia tetutu dödöra wamondrongo hadia niwaʼögu andrö. Barö zi hauga fakhe andre, oya wanolo nitemagu khö woʼomogu. Na uwaʼö wehede si möi fangafökhö dödönia mazui niha böʼö, ifatunö khögu daʼö ba zi ha darua ndraʼaga.”

17. Simane nitutunö ba Efeso 4:29, hewisa lalada ba wamarou tödö niha böʼö?

¹⁷ Ogunaʼö ngawua wehede si möi famarou dödö niha böʼö. Forege ba wanuno niha böʼö ba böi fatahi-tahi mazui mukökö-kökö ndraʼugö khöra. (Baso Efeso 4:29.) Oya howu-howu nitema ndraono Gizaraʼeli moroi khö Yehowa. Hewaʼae simanö, mukökö-kökö ira ba lö laʼandrö saohagölö. Na mukökö-kökö ita, tola lagoʼö-goʼö daʼö niha böʼö. Duma-dumania, börö me lö laböhöli wamaʼema turia si lö sökhi ira samauze si dafulu ba ndraono Gizaraʼeli, ”mukökö fefu ndraono Gizaraʼeli khö Moze”. (4 Mo. 13:31–14:4) Hizaʼi, na tasuno niha böʼö, tatu manö omuso dödöra. Daʼö nirasoi nono alawe ono Yefita. Börö me lasuno ia ira awö-awönia, tefarou dödönia irege anau gölönia ba wangai halöwönia. (Sangu. 11:40) Imane Sara si no mutötöi moroi yawa, ”Ba ginötö tasuno niha böʼö, no tafaduhuʼö ba dödöra wa iʼomasiʼö ira Yehowa hegöi ira talifusöda ba mbanua  niha Keriso.” Börö daʼö, alui ginötö ba wanuno niha böʼö soroi ba dödö.

18. Moloʼö Sinunö 15:1, 2, hana wa tatörö zindruhu na fahuhuo ita, ba hadia zi tebai tafalua?

¹⁸ Törö zindruhu na fahuhuo ndraʼugö. Na lö tatörö zindruhu, tebai taʼomusoiʼö dödö Yehowa. Fatuwu khönia fefu ngawalö walimosa. (Amd. 6:16, 17) Hewaʼae na ato niha sangaohasi ba dödö falimosa, lö tebulö taʼoʼö lala wangera-ngera Yehowa sanandrösa ba daʼö. (Baso Zinunö 15:1, 2.) Baero walimosa, tebai göi tabiniʼö ösa zindruhu na so nifatunöda irege fasala niha böʼö wangai rahu-rahu moroi ba wehededa.

19. Hadia nasa zi tebai tafalua?

¹⁹ Böi fatou-tou niha. (Amd. 25:23; 2 Te. 3:11) Itutunö Juliet, si no mutötöi moroi yawa, hadia nirasoinia na so niha böʼö samatou-tou awönia. Imane wanutunö, ”Abu dödögu na urongo zimane daʼö, ba lö saʼae faduhu dödögu ba niha samatou-tou awönia andrö. Umane tödögu, alai göi na ifatou-tou ndraʼo ba niha böʼö.” Na öʼila wa ibörögö ahole huhuomi ba wamatou-tou niha böʼö, alui lala ba wombulöʼö tuho huhuomi enaʼö möi famarou dödömi.—Kol. 4:6.

20. Hadia gangetula sinangea öhalö?

²⁰ Ba gulidanö andre, ato niha sangogunaʼö fehede si lö sökhi. Börö daʼö, moguna taforege enaʼö omuso dödö Yehowa ba wehededa. Törö tödöu wa Yehowa zameʼe khöda buala fahuhuosa, ba inehe-nehegö hewisa wangogunaʼöda buala andrö. Na sökhi wehededa ba ginötö möi ita manuriaigö, na so ita ba gangowuloa, hegöi na fahuhuo ita ba niha böʼö, hasambalö ifahowuʼö ita Yehowa. Na no ihori gulidanö si lö sökhi andre dania, itugu aoha khöda wamolakhömi yaʼia ba wehededa. (Yud. 15) Fatua lö alua daʼö, datahalö gangetula ba wangomusoiʼö tödö Yehowa ba ’wehede si otarai mbawada’.—Si. 19:14.