1. Нӕ бон дзорун ке фӕрци ӕй?

 НӔ БОН дзорун ке ӕй, е нин ӕй нӕ уарзӕгой Хуцауи лӕвар. Фиццаг адӕймаг Адами бон дӕр адтӕй дзорун ӕма ӕ уӕларвон Фиди хӕццӕ дзубанди кӕнун. Айдагъ дзорун нӕ, фал ма ӕ бон адтӕй нӕуӕг дзурдтӕ ӕргъуди кӕнун дӕр. Ӕма уой фӕрци ба ӕ бон адтӕй аллихузи цӕрӕгойтӕн нӕмттӕ дӕттун (Райд. 2:19). Удта ма дӕ цӕститӕбӕл рауайун кӕнӕ, Адам куд амондгун адтӕй, фиццаг хатт дессаги силгоймаг Еви ку фӕууидта ӕма ӕ хӕццӕ ку исдзурдта, уӕд (Райд. 2:22, 23).

2. Хуцауи лӕварӕй рагидзаманти дӕр ӕма нӕ рӕстӕги дӕр раст куд нӕ пайда кӕнунцӕ, уомӕн цӕветтонтӕ ӕрхӕссӕ?

² Берӕ нӕ рацудӕй ӕма еци лӕварӕй раст нӕбал пайда кодтонцӕ. Сайтан Еви басайдта, е ба ӕркодта тӕрегъӕд ӕма ӕнӕнхӕстдзийнадӕмӕ (Райд. 3:1–4). Уой фӕсте ба Адам ӕхе рӕдудтити фӕффудгин кодта Еви ӕма ма Йегови дӕр (Райд. 3:12). Каин ба Йегови басайдта, е ’нсувӕр Авели ку рамардта, уӕд (Райд. 4:9). Фӕстӕдӕр ба Каини байзӕддаг Ламех ци ӕмдзӕвгӕ ӕргъуди кодта, уомӕй бӕрӕг адтӕй, уӕди дуйне куд ӕнӕхатир иссӕй, е (Райд. 4:23, 24). Мах рӕстӕгӕй ба ци ес зӕгъӕн? Еуӕй-еу политиктӕ сӕ сӕрмӕ ӕрхӕссунцӕ адӕни рази ӕнахъӕл дзубандитӕ кӕнун. Ӕнӕфсӕрттӕ кӕми ма дзоронцӕ, уӕхӕн кинотӕ иссерун дӕр хъӕбӕр зин фӕууй. Ӕнӕфсӕрттӕ ӕма ӕнӕгъдау дзубандитӕ скъолай дӕр ӕма кусти дӕр фегъосӕн. Уӕхӕн цидӕртӕ адӕнмӕ дессаг ке нӕбал кӕсунцӕ, уомӕй бӕрӕг ӕй, аци дуйне куд ихӕлд ӕй, е.

3. Тӕссаг нин цӕмӕй ӕй ӕма аци статьяй цӕмӕ ӕркӕсдзиан?

³ Лӕмбунӕг ку нӕ уӕн, уӕд нӕхуӕдтӕ дӕр гурумухъ ӕма  ӕнӕгъдау дзубандитӕ кӕнун райдайдзиан. Фал мах, куд киристӕнтти, уотӕ фӕндуй алцӕмӕйдӕр Йегови зӕрдӕ рохс кӕнун. Уой туххӕй ба айдагъ ӕнӕфсӕрттӕ ма дзорай, е фагӕ нӕй. Нӕ бон дзорун ке ӕй, еци лӕварӕй гъӕуама раст пайда кӕнӕн, гъома Хуцауи кадгин кӕнӕн. Гъӕйдӕ ӕркӕсӕн уомӕн куд ес гӕнӕн: 1) игъосун кӕнгӕй, 2) ӕмбурдти, 3) иннети хӕццӕ дзубандитӕ кӕнгӕй. Фал бал фиццаг радзубанди кӕнӕн, Йеговӕ цийфӕнди цӕстӕй ке нӕ кӕсуй, ци ӕма куд дзорӕн, уомӕ.

4. Малахий 3:16 куд финст ӕй, уомӕ гӕсгӕ ци дзорӕн уомӕ Йеговӕ ӕ гъос цӕмӕ даруй?

⁴ Бакӕсӕ Малахий 3:16. Некӕд ибӕл расагъӕс кодтай, Йеговӕ «зӕрдӕбӕлдарӕн киунуги» цӕмӕн финсуй, ка си тӕрсуй ӕма ин ӕ номбӕл ка сагъӕс кӕнуй, уони нӕмттӕ? Адӕймаг дзоргӕ цӕбӕл фӕккӕнуй, уомӕй рабӕрӕг уй, ӕ медӕг цӕхуӕн ӕй, е. Киристе дӕр дзӕгъӕли нӕ загъта: «Адӕймагӕн ӕ зӕрдӕ идзаг цӕмӕй фӕууй, дзоргӕ дӕр уой фӕккӕнуй» (Матф. 12:34). Мадта ци фӕдздзорӕн, уомӕй рабӕрӕг уй, Йегови цӕйбӕрцӕбӕл уарзӕн, е. Берӕ ’й ка уарзуй, уонӕн ба нӕуӕг дуйней балӕвар кӕндзӕй ӕносон цард.

5. а) Ци ӕма куд фӕдздзорӕн, е нӕ лӕггади хӕццӕ куд баст ӕй? б) Ӕркӕсӕ хузӕмӕ. Нӕхе цӕмӕй гъӕуама хезӕн, кӕд нӕ Йегови зӕрдӕ рохс кӕнун фӕндуй, уӕд?

⁵ Куд ӕма ци дзорӕн, уомӕ Йеговӕ цийфӕнди цӕстӕй нӕ кӕсуй, ӕма уомӕй кӕнгӕ ’й, нӕ лӕггадӕй нин арази уодзӕй ӕви нӕ, е (Иак. 1:26). Хуцауи ка нӕ уарзуй, етӕ сӕ дзурди ӕрцӕф нӕ фӕллӕдӕрунцӕ ӕма гурумухъ дзурд фӕккӕнунцӕ (2 Тим. 3:1–5). Мах ба нӕ фӕндуй уони хузӕн ун. Мах архайӕн, цӕмӕй нӕ дзурдигъӕдӕй Йегови зӕрдӕ рохс кӕнӕн. Фал, зӕгъӕн, ӕмбурди кенӕ игъосун кӕнгӕй хуӕртӕ ӕма ӕнсувӕрти хӕццӕ фӕлмӕнӕй ӕма уӕзданӕй фӕдздзорӕн, хӕдзари ба фӕууӕн гурумухъ ӕма ӕнахъӕл. Цума уӕхӕн адӕймаги лӕггадӕй Йеговӕ арази уодзӕй? (1 Пет. 3:7).

6. Кимберли ӕхе куд дардта, е хуарзӕй цӕмӕ ӕркодта?

⁶ Нӕ дзурдигъӕдӕй гъӕуама бӕрӕг уа, Йегови лӕггадгӕнгутӕ ке ан, е. Адӕн ӕй фӕууинунцӕ, «Хуцауӕн ка лӕггадӕ кӕнуй ӕма ин ка нӕ лӕггадӕ кӕнуй, етӕ кӕрӕдземӕй  цӕмӕй хецӕн кӕнунцӕ, уой» (Мал. 3:18). Е бӕрӕг ӕй еу хуӕрӕ Кимберлий b хабарӕй. Хестӕр кълӕсти ку ахур кодта, уӕд ин ӕ къласи кизги хӕццӕ ихӕслӕвӕрд бацӕттӕ кӕнун баихӕс кодтонцӕ. Гъема ку цӕттӕ кодтонцӕ, уӕд ӕй еци кизгӕ фӕууидта, Кимберли иннетӕй хъӕбӕр ке хецӕн кӕнуй. Иннети кой некӕд фӕккӕнидӕ, адтӕй зӕрдхӕлар ӕма гурумухъ дзурд дӕр некӕд кодта. Е имӕ уотӕ дессаг фӕккастӕй, ӕма ’й бафӕндадтӕй Библи ахур кӕнун. Йеговӕн хъӕбӕр ӕхцӕуӕн фӕууй, ци ӕма куд дзорӕн, уомӕй адӕни ӕргом рӕстдзийнадӕмӕ ку фездахӕн, уӕд!

7. Идарддӕр дӕ куд фӕндуй Хуцауи лӕварӕй пайда кӕнун?

⁷ Мах фӕндуй Йегови лӕварӕй раст пайда кӕнун, цӕмӕй, ци дзорӕн, уомӕй Йегови дӕр кадгин кӕнӕн ӕма хуӕртӕ ӕма ӕнсувӕртӕбӕл дӕр нӕхе бӕттӕн. Цума нин ци банхус кӕндзӕй, цӕмӕй идарддӕр дӕр «дзурдӕй... фӕнзуйнаг» уӕн? Гъӕйдӕ ӕркӕсӕн цалдӕр унаффемӕ.

8. Игъосун кӕнгӕй нӕхе куд гъӕуама дарӕн, уомӕй нин Киристе фӕнзуйнаг куд ӕй?

⁸ Еске хилӕ ку къаха, уӕддӕр уӕзданӕй ӕма фӕлмӕнӕй дзорӕ. Киристей алли фудгъуддӕгти фудгин кодтонцӕ. Зӕгъӕн, дзурдтонцӕ си, губундзӕл ӕма ниуӕзтӕуарзагӕ ке ӕй, Сайтани лимӕн, дан, ӕй кенӕ ба, дан, сабатбони закъон не ’нхӕст кӕнуй, удта Хуцауи фауй (Матф. 11:19; 26:65; Лук. 11:15; Иоан. 9:16). Фал Киристе уӕддӕр сӕ хӕццӕ гурумухъ дзурд некӕд фӕккӕнидӕ. Мадта мах дӕр ку ’фхуӕронцӕ, уӕд гъӕуама лӕгъуз лӕгъузӕй макӕмӕн федӕн, фал Киристей фӕнзӕн (1 Пет. 2:21–23). Раст зӕгъгӕй, хебӕл фӕххуӕцун алкӕд ӕнцон нӕ фӕууй (Иак. 3:2). Цума нин еци гъуддаги ци банхус кӕндзӕй?

9. Игъосун кӕнгӕй нин ци банхус кӕндзӕй адӕни хӕццӕ уӕзданӕй дзорун?

⁹ Игъосун кӕнгӕй еске дӕ хӕццӕ гурумухъ дзурд кӕнун ку райдайа, уӕд ма рамӕстгун уисӕ. Еу ӕнсувӕр Сэм зӕгъуй: «Ӕз алкӕддӕр мӕ гъудий фӕддарун еу гъуддаг. Адӕймаг гъӕуама рӕстдзийнадӕ фегъоса, ка ’й зонуй, фӕстӕдӕр ӕ уодигъӕдӕ раййевдзӕй». Еуӕй-еухатт нӕмӕ адӕн рамӕстгун унцӕ, уомӕн ӕма сӕ бахъор кодтан. Уӕхӕн уавӕри нӕ бон ӕй нӕ хуӕрӕ Люсий хузӕн архайун. Игъосун кӕнгӕй мӕстгун адӕймагбӕл ку исӕмбӕлуй, уӕд цубуртӕй раковуй, цӕмӕй ӕхуӕдӕг дӕр ма рамӕстгун уа ӕма ӕхебӕл фӕххуӕца.

10. 1 Тимофеймӕ 4:13 финст дзурдтӕмӕ гӕсгӕ цӕхуӕн нисан хуарз уайдӕ исӕвӕрун?

¹⁰ Иннети ахур кӕнунмӕ дӕснидӕр кӕнӕ. Тимофей адтӕй фӕлтӕрдгун игъосунгӕнӕг, фал уой дӕр гъудӕй цӕбӕлдӕрти ахур кӕнун. (Бакӕсӕ 1 Тимофеймӕ 4:13.) Махӕн  ба ци банхус кӕндзӕй, цӕмӕй арӕхстгундӕрӕй игъосун кӕнӕн? Гъӕуама нӕхе дзӕбӕх цӕттӕ кӕнӕн. Еци гъуддаги нин банхус кӕндзӕй брошюрӕ «Хуӕздӕр кӕсӕ ӕма иннети ахур кӕнунмӕ арӕхсӕ». Удта ма устур ӕнхус уодзӕй нӕ «Косӕн тъетрад»-и хай «Арӕхстгундӕрӕй игъосун кӕнӕ». Еци ӕрмӕгӕй фӕппайда кӕнис? Дӕхе дзӕбӕх ку цӕттӕ кӕнай, уӕд игъосун кӕнгӕй тухсгӕ дӕр минкъийдӕр кӕндзӕнӕ, удта адӕни хӕццӕ дӕр нифсгунӕй дзордзӕнӕ.

11. Ци ма нин банхус кӕндзӕй иннети ахур кӕнунмӕ дӕснидӕр кӕнун?

¹¹ Цӕмӕй игъосун кӕнгӕй никки дӕснидӕр кӕнӕн, уой туххӕй нӕ бон ӕй ахур кӕнун иннӕ хуӕртӕ ӕма ӕнсувӕртӕй. Ӕнсувӕр Сэм лӕмбунӕг фӕккӕсуй, фӕлтӕрдгун игъосунгӕнгутӕ иннети куд фӕййахур кӕнунцӕ, уомӕ, ӕма уой фӕсте ӕхуӕдӕг дӕр уотӕ фӕййархайуй. Еу хуӕрӕ Талийӕ ба лӕмбунӕг фегъосуй фӕлтӕрдгун ӕнсувӕрти радзубандитӕмӕ, ӕма ин уой фӕрци ӕнцондӕр фӕууй, игъосун кӕнгӕй арӕхдӕр ци фарстатӕ фӕддӕттунцӕ, уонӕбӕл дзуапп кӕнун.

12. Еуӕй-еуетӕн зин ци фӕууй?

¹² Ӕмбурди рӕстӕг дӕр нӕ бон ӕй иннетӕн дзурдӕй фӕнзуйнаг ун (Пс. 22:22). Зӕгъӕн, дзӕбӕх ке бацӕттӕ кодтан, уӕхӕн дзуӕппитӕ ку фӕддӕттӕн, уӕд ӕма ку фӕззарӕн, уӕд дӕр. Фал еуӕй-еуетӕн зарун нӕ, фал уотид дзорун дӕр адӕни рази зин фӕууй. Кӕд дӕуӕн дӕр зин ӕй, уӕд хуарз уайдӕ базонун, иннӕ хуӕртӕ ӕма ӕнсувӕртӕн ци банхус кодта, уой.

13. Ӕмбурдти нин зӕрдиагӕй зарунмӕ ци банхус кӕндзӕй?

¹³ Зӕрдиагӕй зарӕ. Паддзахади зартӕ ку фӕззарӕн, уӕд нӕ сӕйраг нисан фӕууй Йегови кадгин кӕнун. Еу хуӕрӕ Сарӕ ӕхе дессаги зарӕгбӕл нӕ нимайуй, фал ӕй уӕддӕр фӕндуй Йегови зартӕй кадгин кӕнун. Уомӕ гӕсгӕ ӕмбурдтӕмӕ ӕхе ку фӕццӕттӕ кӕнуй, уӕд зартӕмӕ дӕр рагацау ӕркӕсуй, цӕмӕй ӕй балӕдӕра, ци ӕрмӕг ӕвзардзӕнцӕ, уой хӕццӕ куд баст ӕнцӕ. Сарӕ зӕгъуй: «Уой фӕрци ме ’ргом ӕздӕхт фӕууй зартӕн сӕ гъудимӕ, зарунмӕ ке неци уотӕ арӕхсун уомӕ нӕ, фал».

14. Ӕфсӕрмигӕнагӕ ку уай, уӕддӕр дин ӕмбурди дзуӕппитӕ дӕттунмӕ ци банхус кӕндзӕй?

¹⁴ Ӕмбурди дзуӕппитӕ дӕттӕ. Беретӕн е хъӕбӕр зин фӕууй. Талийӕ зӕгъуй: «Адӕни астӕу ку фӕуун ӕма ести ку фӕдздзорун, уӕд хъӕбӕр фӕттухсун, кӕд мӕ дзурдӕй е бӕрӕг нӕ фӕууй, уӕддӕр. Уомӕ гӕсгӕ мин ӕмбурдти дзуапп раттун дӕр хъӕбӕр зин фӕууй». Фал ӕй е нӕ бауорамуй. Ӕмбурдтӕмӕ цӕттӕ кӕнгӕй Талийӕ ӕ гъудий фӕддаруй, фиццаг дзуапп комкоммӕ ке гъӕуама уа. Талийӕ зӕгъуй: «Мадта мӕ дзуапп цубур ӕма хумӕтӕг ку уа, уӕд уоми лӕгъузӕй неци  ес, уомӕн ӕма, ӕрмӕг ка фӕууадзуй, уой дӕр уӕхӕн дзуапп фӕффӕндуй фегъосун».

15. Цӕмӕй нин дзуӕппитӕ дӕттун ӕнцондӕр уа, уой туххӕй нӕ гъудий ци гъӕуама дарӕн?

¹⁵ Ӕфсӕрмигӕнагӕ ка нӕй, еци хуӕртӕ ӕма ӕнсувӕртӕн дӕр хатгай ӕмбурди дзуапп раттун зин фӕууй. Цӕмӕн? Джулиет зӕгъуй: «Еуӕй-еухатт ӕмбурди мӕ къох исдарунмӕ мӕ нифс нӕ фӕххӕссун, уомӕн ӕма фӕттухсун, мӕ дзуапп ӕгӕр хумӕтӕг ку уа, уомӕй». Фал гъӕуама нӕ гъудий дарӕн: Йеговӕ ни дессагӕй неци агоруй, уой фӕндуй, цӕмӕй ин нӕ бон ци ӕй, уой дӕттӕн. Йеговӕн хъӕбӕр ӕхцӕуӕн фӕууй, нӕ дзуӕппитӕй ӕй ку фӕккадгин кӕнӕн, уӕд, кӕд еуӕй-еухатт нӕ нифс нӕ фӕххӕссӕн кенӕ хъӕбӕр фӕттухсӕн, уӕддӕр c.

16. Нӕхе цӕхуӕн дзубандитӕй гъӕуама хезӕн?

¹⁶ «Ӕфхуӕрӕн дзубандитӕй» дӕхе хезӕ (Еф. 4:31). Статьяй раздӕр куд загътан, уотемӕй киристӕнттӕ гъӕуама сӕхе хезонцӕ ӕнӕфсӕрттӕ дзорунӕй. Фал «ӕфхуӕрӕн дзубандитӕмӕ» айдагъ ӕнӕфсӕрттӕ нӕ хаунцӕ. Зӕгъӕн, гъӕуама лӕмбунӕг уӕн, цӕмӕй ӕндӕр адӕнихаттӕй кенӕ се ’гъдӕуттӕй ӕнӕнвӕрсон дзубандитӕ кӕнун ма райдайӕн. Мах нӕ фӕндуй ӕнӕргъуди дзурдтӕй еске зӕрдӕ фӕрресун кӕнун. Еу ӕнсувӕр ӕхе туххӕй радзурдта: «Раздӕр ӕхсилкъӕ дзубандитӕ кӕнун берӕ уарзтон, ӕма мӕмӕ е лӕгъуз нӕ кастӕй. Фал уомӕй иннети хъӕбӕр фӕрресун кӕнинӕ. Мӕ бийнойнагӕй хъӕбӕр боз дӕн, уал анзей дӕргъи мин мӕхебӕл косунмӕ ке ӕнхус кодта, уой туххӕй. Ме ’нӕрцӕф дзурдтӕй уой кенӕ ӕндӕр еске зӕрдӕ ку фӕрресун кӕнинӕ, уӕд мин ӕй уой фӕсте хебарӕй фӕззӕгъидӕ».

17. Ефесӕгтӕмӕ 4:29 финст дзурдтӕмӕ гӕсгӕ нӕ бон куд ӕй иннети федар кӕнун?

¹⁷ Дӕ дзурдтӕй иннети федар кӕнӕ. Иннети растаунмӕ рӕвдзӕ уо, еске фудкой кенӕ хъур-хъур кӕнунмӕ нӕ, фал. (Бакӕсӕ Ефесӕгтӕмӕ 4:29.) Израилӕгтӕ Йеговӕй берӕ хуарздзийнӕдтӕ зудтонцӕ, ӕма си гъӕуама боз адтайуонцӕ. Фал уӕддӕр аллихатт дӕр естӕбӕл хъур-хъур кӕниуонцӕ. Хъур-хъур кӕнун ба хуӕцгӕ нези хузӕн ӕй. Нӕ зӕрдӕбӕл ӕрлӕуун кӕнӕн, дӕс ӕсгарӕги ци радзурдтонцӕ, уой туххӕй Израили фурттӕ се ’гасдӕр Моисейбӕл хъур-хъур кӕнун ке райдӕдтонцӕ (Ним. 13:31–14:4). Иннердиги ба адӕймаги ку растауай, уӕд ибӕл базуртӕ базайуй. Ӕргъуди кӕнӕн Йефаййи кизги хабар. Е ’мбал кизгуттӕ имӕ ке ӕрбацӕуиуонцӕ ӕма ’й ке растауиуонцӕ, уой фӕрци имӕ хъауритӕ фӕззиннидӕ, цӕмӕй идарддӕр дӕр лӕггадӕ кӕна (Тӕрх. 11:40). Уӕлдӕр ке дзурдтӕ ӕрхастан, еци хуӕрӕ Сарӕ  зӕгъуй: «Адӕймаги ку растауай, уӕд ин е уобӕл дзорӕг фӕууй, ӕма ’й Йеговӕ, удта ӕмбурди хуӕртӕ ӕма ӕнсувӕртӕ дӕр берӕ уарзунцӕ». Мадта иннети зӕрдиагӕй растаунмӕ фадуӕттӕ агорӕ.

18. Ӕцӕг ци ӕй, уой цӕмӕн гъӕуама дзорӕн ӕма уомӕ ци хауй? (Псалом 15:1, 2).

¹⁸ Ӕцӕг ци ӕй, уой дзорӕ. Мӕнгӕттӕ ку дзорӕн, уӕд ни Йеговӕ арази неци хузи уодзӕй. Е мӕнгӕттӕй е ’сӕфт уинуй (Ӕмб. 6:16, 17). Абони адӕнмӕ басайун дессаг нӕбал кӕсуй. Фал мах еци гъуддагмӕ Йегови цӕстӕй гъӕуама кӕсӕн. (Бакӕсӕ Псалом 15:1, 2.) Ке зӕгъун ӕй гъӕуй, ӕргом мӕнгӕттӕ ма дзорай, е фагӕ нӕй. Гъӕуама нӕхе хезӕн ӕндӕр гъуддӕгтӕй дӕр. Зӕгъӕн, адӕймагӕн, раст ци ӕй, уой кӕронмӕ нӕ радзурдтан кенӕ ба барӕй цидӕр уотӕ загътан, цӕмӕй нӕ адӕймаг иннердӕмӕ балӕдӕра.

19. Нӕ зӕрдӕбӕл ма ци гъӕуама дарӕн?

¹⁹ Дӕхе хезӕ еске кой кӕнунӕй (Ӕмб. 25:23; 2 Фес. 3:11). Джулиет зӕгъуй: «Адӕймаг еске кой ку фӕккӕнуй, уӕд мин хъӕбӕр зин фӕууй. Уӕхӕн адӕймагбӕл ӕууӕнкӕ нӕбал фӕууй. Ка ин ци зонуй, уой фӕсте мӕн кой дӕр кӕми ракӕндзӕй». Ку ӕй балӕдӕрай, ӕма уӕ дзубанди еске кой кӕнунмӕ рахизтӕй, уӕд байархайӕ, цӕмӕй уӕ дзубанди хуарзӕрдӕмӕ раздахай (Кол. 4:6).

20. Хуцауи лӕварӕй дӕ куд фӕндуй пайда кӕнун?

²⁰ Аци дуйней адӕн куд дзорунцӕ, уомӕн ӕгъдау нӕбал ес. Уомӕ гӕсгӕ нӕ байархайун фӕгъгъӕуй, цӕмӕй, ци ӕма куд дзорӕн, уомӕй Хуцауи зӕрдӕ рохс кӕнӕн. Дӕ гъудий дарӕ, нӕ бон дзорун ке ӕй, е нин Хуцауи лӕвар ӕй, ӕма цийфӕнди цӕстӕй нӕ кӕсуй еци лӕварӕй куд пайда кӕнӕн, уомӕ. Не ’гас хъауритӕй ку архайӕн, цӕмӕй нӕ дзурдӕй иннетӕн фӕнзуйнаг уӕн, уӕд нин Йеговӕ ӕнхус кӕндзӕй, цӕмӕй ин ӕ ном кадгин кӕнӕн игъосун кӕнгӕй дӕр, ӕмбурди медӕг дӕр ӕма иннети хӕццӕ дзоргӕй дӕр. Аци ӕнӕхуцау дуйнейӕн ӕ кӕрон ку ралӕууа, уӕдта нин Йегови нӕ дзурдигъӕдӕй кадгин кӕнун дзӕвгарӕ ӕнцондӕр уодзӕй (Иуди 15). Уӕдмӕти ба бал нӕ гъӕуй, псаломзаргӕнӕг ци дзурдтӕ ниффинста, уонӕмӕ гӕсгӕ архайун: «Мӕ дзурдтӕ ӕма дин мӕ зӕрди сагъӕстӕ ӕхцӕуӕн уӕнтӕ, о Йеговӕ» (Пс. 19:14).