1. Kede ngiluu a duch er kid el mengedecheduch er ker?

 A DUCH er kid el mengedecheduch a sengk el mlara betik er a rengud el Dios. A Adam er a lobeob e ngmle sebechel lousbech a tekoi el mengedecheduch er a Demal el ngar er a eanged. Ngdirrek el mle sebechel el melibech a beches el tekoi. Nguluusbech er tia el duch er ngii el lomngakl a rokui el charm. (Gen. 2:19) E ulterekokl el kmal mlo dmeu a rengul er a leketengel el mengedecheduch er a kuk ta er a chad, el ngii a Eva el klebokel el bechil!​—Gen. 2:22, 23.

2. Ngmilekera mlo mekngit a usbechel a omengedecheduch er a irechar me chelechang?

² E a uriul, e tia el sengk er a omengedecheduch a mlo mekngit a usbechel. A Satan a ulumulak er a Eva e tia el blulak a mlo uchul a klengit me a diak lecherrungel el blekeradel. (Gen. 3:1-4) A Adam a ultelecheklii a Eva me a dirrek el Jehovah el kirel a kngtil. (Gen. 3:12) Kain a ulumulak er a Jehovah er a uriul er a lokodir a ochellel er a Abel. (Gen. 4:9) E a uriul, e a Lamek el ta er a ruldidellel a Kain a dilbechii a poem el milsaod el kirel a koadelchad er sel taem. (Gen. 4:23, 24) E kuk uangera blekeradel er chelechang? Kede meseterir a remengeteklel a kabelment el di beot er tir a melekoi a mekngit el tekoi er a buai. Ngmeringel er kid a metik a mubi el diak a mekngit el tekoi er ngii. A rengalek er a skuul a orrenges a mekngit el tekoi er a skuul me a remeklou el chad a remenges a mekngit el tekoi er a urerir. Ngklengiterreng e le usbechel a mekngit el tekoi a ochotii el kmo ngdi merael el mo mekngit a blekeradel me a omelekoi er tia el beluulechad.

3. Ngera kired el mo kerekikl el kirel, e ngera bo dosaod er tia el suobel?

³ A lak dekerekikl, e ngsebeched el kmal mo smau el orrenges a mekngit el tekoi me kede mocha ousbech. Nguaisei  kid el Kristiano a soad lodeuir a rengul a Jehovah me ngkmal diak bo dolekoi a mekngit el tekoi. Engdi ngdirrek el soad el ousbech er tia el sengk er a omengedecheduch er a ungil rolel, el mo odengesii a Dios. Ngar tia el suobel e kede mo mesaod a rolel e ngsebeched el meruul er tiang sel (1) domerk er a klumech, (2) dengar er a miting, me a (3) dongedecheduch er a rechad. Engdi kot e kede mo mesaod er a uchul me a cheldechedechad a klou a ultutelel er a Jehovah.

4. A doltirakl er a Malakai 3:16, e ngera uchul me a cheldechedechad a klou a ultutelel er a Jehovah?

⁴ Monguiu er a Malakai 3:16. Omomdasu e ngera uchul me a Jehovah mo meluches er a “babier” a ngklir tirke el cheldechedecherir a ulechotii el kmo te meluu er ngii e melebedebek er a ngklel? A cheldechedechad a olecholt aike el ngar er a rengud. A Jesus a dilu el kmo: “A ikel omichoech er a reng a me tuobed er a ngor.” (Mt. 12:34) Me aike el dolilt el mesaod a ochotii a delechel a bltkil a rengud el mora Jehovah. E a Jehovah a soal tirke el betik a rengrir er ngii a bo lekiei el diak a ulebengelel er a beches el beluulechad.

5. (a) Ngmekera omengull er kid e ngar ngii a lerellii er a cheldechedechad? (b) Ngua lolecholt a siasing, ngera kired el mo kerekikl er ngii el kirel a cheldechedechad?

⁵ A rolel a dongedecheduch a sebechel loterekeklii el kmo a Jehovah ngkongei er a omengull er kid ngdiak. (Jak. 1:26) A rebebil el diak el betik a rengrir er a Dios a mengedecheduch el oeak a ngasecherreng me a kldidairreng. (2 Ti. 3:1-5) Ngkmal diak el soad el mo uai tir. Ngbai soad el odeuir a rengul a Jehovah loeak a cheldechedechad. Engdi a Jehovah ngmo dmeu a rengul er kid a lsekum kede ungil mengedecheduch sel dengar er a miting me a lechub sel doldingel, engdi ngmekngit a cheldechedechad el mora rechedal a telungalek er kid sel lak a chad lomes?​—1 Pe. 3:7.

6. Ngera el tekoi a dilubech el ungil cheldechedechal a Kimberly a uchul?

⁶ Sel dungil mengedecheduch, e kede ochotii el kmo kede mengull er a Jehovah. Kede ngosuterir tirke el iliuekl er kid el mo mesa klekakerous er a “chad el mesiou er [a Dios]  ma chad el diak losiou er [ngii].” (Mal. 3:18) Tia mle uaisei el kirel a odos el Kimberly. * Ngika ble le assign er ngii el mo oureor lobengkel a classmate er ngii el meruul er a project er tir er a skuul. A uriul er tiang, e a classmate er ngii a miltebengii el kmo ngkmal mle ngodech er tirke el bebil er a rengalek er a skuul. Ngdimlak lolaes er a rechad, e mle ungil mengedecheduch, e dimlak lolius. Tia kmal chilsir a rengul ngika el classmate er ngii me ngkilengei er a uriul el mo mesuub a Biblia. A Jehovah a ulterekokl el kmal dmeu a rengul sel dongedecheduch el ngar er a rolel e ngolechau a rengrir a rechad el mei er a klemerang!

7. Ngera soam el meruul el kirel tia el sengk er a omengedecheduch el bla lebeskid a Dios?

⁷ Kid el rokui a soad el mengedecheduch el ngar er a rolel e ngkobkellii a Jehovah e olekeed er kid er a rudam er kid. Me chelecha e bo dosaod a bebil rolel e ngsebechel a ‘chomelekinged . . . bo le kerebai.’

8. Ngera el kerebai a lebilecherei a Jesus el kirel a rolel a longedecheduch er sera loruul er a omesiungel?

⁸ Mongedecheduch loba delemedemek me a omengull sel lolengasech er a rengum a rechad. Ngar er a omesiungel, e a Jesus a lultelecheklii el kmo ngchad er omelim, ngemokel, ngoderchelel a Diabelong, ngdiak loltirakl er a Ulengull el Sils, e oltuub er a Dios. (Mt. 11:19; 26:65; Lk. 11:15; Jn. 9:16) Me nguaisei engdi ngdimlak a ta el bo lolaitechei lolab a mekngit el tekoi. Me ngua Jesus, ngdiak el kired el melaitechei el mo lmuut me a lsekum a rechad a mekngit a tekingir el mei er kid. (1 Pe. 2:21-23) Nguaisei el diak el beot a doruul er tiang. (Jak. 3:2) Me ngera sebechel ngosukid?

9. Ngera sebechel ngosukid el mo kerekikl a cheldechedechad sel domerk er a klumech?

⁹ Sel sekum a chad a mekngit el mengedecheduch er kau e molasem el diak el bo el kesib a rengum. A odam el Sam a kmo, “Ak melasem el melatk er a uchul me a chad a ousbech el rongesii a klemerang me ngii bo el sebechel melodech a blekerdelel.” A lebebil e a chad er a blai a kesib a rengul e le kede mlong er a mekngit el taem. Sel bo dechebengelii a chad el uaisei a uldesuel, e ngsebeched el meruul er a tekoi el loruul er ngii a Lucia. Ngsebeched el dulii a kedeb el nglunguuch, el olengit er a Jehovah me lechelleklii a rengud me lak bo demekngit el mengedecheduch er a chad.

10. A doltirakl er a 1 Timothy 4:13, e ngera kirel mo turrekong er kid?

¹⁰ Bo mungil lolisechakl. A Timothy a kmal mle meduch el omerk er a klumech engdi ngdirk mle kirel el olengeriakl er a tekoi er a klereng. (Monguiu er a 1 Timothy 4:13.)  Kede mekera mo ungil lolisechakl sel domerk er a klumech? Ngkired el mo ungil kutmeklid. Kede oba omereng el saul e le ngar ngii a kakerous el dongu el sebechel ngosukid el mo ungil lolisechakl. Ngsebechem el metik a ungil uldasu el ngar er a brochure el Mosuub el Mo Ungil Menguiu e Molisechakl me sel “Moltaut er Ngii er a Omesiungem” el ngar er a Subeled er a Miting er a Klengar er Kid a Rekristiano me a Omesiunged. Kau ke ousbech aika el babier? Sel bo dungil kutmeklid, e ngmo diak desal medakt e mo ulterekokl a rengud el mengedecheduch.

11. Te mekera rebebil Kristiano e mo ungil lolisechakl?

¹¹ Ngsebeched el mo ungil lolisechakl sel domes er a rebebil el ngar er a ongdibel e dosuub er tir. A Sam el dulsaod er ngii er a uchei a di ngii el oker er a uchul me a rebebil rudam me a rudos a ungil lolisechakl. E mesuub a rolel a lolisechakl e melasem el oukerebai er tir. A odos el Talia a kerekikl el orrenges er tirke el oltobed a cheldecheduch el mora buai a losaod a suobel. Ngoeak tiang e ngmla suubii a rolel a losaod a tekoi el leblechoel a rechad el loker sel domerk er a klumech.

12. Ngera meringel er a rebebil el meruul?

¹² Kid el rokui a sebeched el remuul a miting er kid el kmal mo ungil sel dedak el mengitakl e deketmokl a ungil nger er kid. (Psa. 22:22) A rebebil a meringel er tir el mengitakl me a lechub e te onger sel leteloi er a rechad. Kau ke ta er tir? A leuaisei, e ke mo semeriar el mo medengei aike el tekoi el ngilsuterir a rebebil el mo mesisiich er aika el dektir.

13. Ngera sebechel ngosukau el mo mengitakl loba rengum el rokir sel mngar er a miting?

¹³ Mongitakl loba rengum el rokir. Sel dongitakl a chelitakl er a Renged, e a kot el soad el meruul er ngii a mo oldanges er a Jehovah. A odos el Sara a diak lomdasu el kmo ngkmal meduch el mengitakl. Me nguaisei, engdi ngsoal loldanges er a Jehovah loeak a chelitakl. Me ngmla mesa el kmo ngngosuir sel losuub aike el chelitakl el bo dongitakl sel longetmokl er ngii el mora miting. Ngmengitakl aika el chelitakl e melasem el omes el kmo ngmekera ike el tekoi er ngii e mesaod er a suobel el mo soadel. Ngmelekoi el kmo, “Tia ngosukak el mo ultaut a osengek er aike el tekoi er a chelitakl er a bai di kulatk er a rolel a kungitakl.”

14. A lsekum e ke sekemerur, e ngera sebechel ngosukau el onger sel mngar er a miting?

¹⁴ Bo blechoel longer. Nguaisei, tia sebechel mo meringel er a rebebil el meruul er ngii. A Talia el dulsaod er ngii er a uchei a kmo, “Ngak a kot el medakt el mengedecheduch er a seked, e meringel er a rebebil el mo mtebengii tiang e le ngmedemedemek a oto er a ngerek. Me ngkot el meringel er ngak a onger.”  Me nguaisei engdi tiang a diak leterebengii me lak longer. Sel longetmokl er ngii el kirel a miting, e ngblechoel el melatk el kmo a kot el nger a kirel di kedeb e onger er a ker. Ngdmu el kmo: “Tia belkul a kmo ngdi ungil a lsekum a nger er ngak a kedeb, beot, e di bleketakl e le seikid a nger el losiik er ngii a odam el oltobed er a suobel.”

15. Ngera diak dobes er ngii el kirel a nger er kid?

¹⁵ Ngmo lmuut er a Rekristiano el diak lesekemerur omai er a rengrir a onger. E ngera uchul? A odos el Juliet a kmo, “A lebebil e a kumai er a renguk a onger e le kbekikl el kmo a nger er ngak a kora kmal beot e diak lsal ungil.” Me nguaisei engdi lak dobes el kmo a Jehovah a soal a debsa aike el kot el ungil nger el sebeched el msang. * Ngkmal oba omereng el saul el kirel a blakerreng er kid el oldanges er ngii el ngar er aike el miting er kid alta lebebil e ngmo meringel er kid a meruul uaisei.

16. Ngua ngera el rolel a cheldecheduch a kired el mengeroid er kid er ngii?

¹⁶ Mongeroid er kau er a rokui el bedengel a “otuub.” (Efe. 4:31) Ngdi ua dulsaod er a uchei, a Kristiano a kmal diak el kirel melius. Me nguaisei engdi ngar ngii a bebil bedengel a otuub el dirrek el kired el mo kokerengid er ngii. El ua tiang, ngdiak el kired el melekoi a mekngit el tekoi el kirir a rechad el kakerous a siukang er tir me a lechub a belurir. Me a lmuut el tang, ngkmal diak el soad el melemall a rengrir a rebebil loeak a merredes el tekoi. A ta el odam a kongei el kmo: “A lebebil e ak millekoi a merredes el tekoi el kulemdasu el kmo ngoltobedechur e diak a telemellel engdi mera er ngii ngtilemellii a rengul a ta er a chad. Ngar er aika el mereko el rak, e a bechik a kmal mla ngosukak le ngouchais er ngak sel di lekemam el tang er aike el taem el tekingek a kmal tilemellii a rengul ngii me a rebebil.”

17. A doltirakl er a Efesus 4:29, e ngmekera sebeched el melisiich er a rebebil?

¹⁷ Mongedecheduch el ngar er a rolel e ke melisiich er a rebebil. Bo mereched el chemat er a bai momes a kngtil me a lechub e mongeremrum. (Monguiu er a Efesus 4:29.) A rechad er a Israel a kmal mle betok a sebechir el mereng a saul el kirel engdi te blechoel el mengeremrum. Sel dongeremrum e ngsebeched el rulleterir a rebebil el mo mengeremrum. Ke locha dirk melatk el kmo a mekngit el chais el luluuchais er ngii tirke el teruich el ourabek a rirelleterir a rokui el chad er a Israel el mo ‘mengeremrum er a Moses.’ (Ule. 13:31–14:4) Me nguaisei engdi a dechat er a chad e ngklou a klungiolel. Ngsebechel el mo ulterekokl a rengud el kmo a ngelekel a Jeftha  el redil a kmal ngilai a omelisiich el mo melemolem er a omesiungel er sera lechat er ngii tirke el sechelil. (Men. 11:40, NW) A Sara el dulsaod er ngii er a uchei a kmo: “Sel dechat er a rebebil, e kede rulleterir el mo melechesuar el kmo a Jehovah betik a rengul er tir e tir a ngar ngii a basio er tir er a cheldebechelel.” Me mosiik a techall el mo chemat er a rudam me a rudos er kau.

18. A doltirakl er a Psalm 15:1, 2, e ngera uchul me ngkired el melekoi a klemerang, e tia nguldimukl er a ngerang?

¹⁸ Molekoi a klemerang. Ngdiak el sebeched el odeuir a rengul a Jehovah a lsekum ngdiak dolekoi a klemerang. Ngkmal chetil a rokui el bedengel a blulak. (Osi. 6:16-19) Me alta rubdois el chad er chelechang a omes er a blulak el kmo ngkuk di ta er a bedengel a cheldecheduch, kid a oba osengel a Jehovah el kirel tia el tekoi. (Monguiu er a Psalm 15:1, 2.) Nguaisei el diak bo dolekoi a blulak engdi ngdirrek el diak dorreked a bebil el tekoi me bo luchul e a chad a mo cheleuid a uldesuel.

19. Ngera dirrek el kired el mo kerekikl er ngii?

¹⁹ Lak momerk a telulechoid. (Osi. 25:23; 2 Th. 3:11) A Juliet el dulsaod er ngii er a uchei a mesaod el kmo ngmekera telulechoid e ngar ngii a lerellii er ngii. Ngmelekoi el kmo: “A dorrenges a telulechoid e ngmengitechut er kid e rullid el mo diak doumerang er a chad el outulechoid. E le ngmekera kudengei el kmo ngdiak el loutulechoid el kirek el mora kuk ta er a chad?” Me sel mesa el kmo tia el cheldecheduch a merael mo mekngit, e bo mosaod er a kuk ta er a tekoi el melisiich.​—Kol. 4:6.

20. Ngera bla mrellii er a rengum a mo meruul er ngii loeak a omelekingem?

²⁰ Kid el kiei er a beluulechad el kmal klou a mekngit el omelekoi er ngii a uchul me ngkired el meringel el oureor me a omelekinged lodeuir a rengul a Jehovah. Lak dobes el kmo a cheldecheduch a sengk el mlara Jehovah e ngii a kerekikl el omes er a rolel a dousbech er ngii. Ngmo omekngeltengat er a blakerreng er kid el ousbech er ngii el ngar er a ungil rolel sel domerk er a klumech, dengar er a miting, me a dongedecheduch er a rechad. A Jehovah sel lokngemedii tia el mekngit el blekeradel, e seikid e ngkmal mo beot er kid el mengebkall er ngii loeak a omelekinged. (Jud 15) Me chelechang el mo lmuut er sel taem, e derellii er a rengud el mo odeuir a rengul a Jehovah loeak ‘a tekinged.’​—Psa. 19:14.