1. Kado ya guzuela yakatugile gudi nanyi?

 GUZUELA gudi kado yatuhanele Nzambi wetu wa guzumba. Tangua diafugiwe Adama muthu wa thomo, wakhalele nu luendu lua guta maga nu Sh’enji wa mu dilu. Wakhalele nji nu luendu lua guzola mbimbi jihe-jihe. Adama wakalegele kado yaguzuela ha guhana shitu jiagasue majina. (Gis. 2:19) Wakhalele diago nu gusuanguluga guavula tangua diazuelele muene mbala ya thomo nu mukaji’enji wabonga Eva.—Gis. 2:22, 23.

2. Luholo lutshi athu ana kalegela kado ya guzuela mu luholo luabola ikhale mu masugu abalega nga mangino?

² Gungima, kado yene yakalegewego muluholo luabonga. Satana Diabulu wahuigile Eva, mambo ene atumine muthu ha gutshita gubola nu atshitshile egi athu akhadigo luko atagana. (Gis. 3:1-4) Adama wakalegele kado ya guzuela mu luholo luabola tangua diazuelele muene egi gubola gudi gua Eva nu gua Yehowa. (Gis. 3:12) Gungima dia gushiya phangi’enji Abele, Gayino wambile mambo gudi Yehowa. (Gis. 4:9) Lameke mujigulu wa Gayino wasonegele lungimbo luakhalele mumonesa ndaga jiakhuta jiakalegewe mu masugu enji. (Gis. 4:23, 24) Ndaga jitshi athu adi mukalagala mangino? Matangua ako mafumu a politike ana guzuela mbimbi jiabola ha meso a athu. Mangino filme jiavula jiana zuelela ndaga jia musonyi. Ana akhalasa ana guvua ndaga jia musonyi gu khalasa, mambuta ana guvua nji ndaga jia luholo lumoshi mu mafundo a midimo. Luholo mangino athu adi muzuela ndaga jiavula jiabola, idi diago mumonesa egi mavu abola diago muavula.

3. Mu ndaga itshi tudi naye gumonesa gutema? Itshi tuza muzuelela mu longo edi?

³ Luholo tuana guvua ndaga jiabola jiana zuela athu ako gula  tuatemelego, tuajiya gusendesa guzuela ndaga jiene. Esue Aklisto tuana tshigina gusuanguluisa Yehowa, hene tudi naye gutuna guzuela ndaga jiabola. Tuana tshigina gukalegela kado ya guzuela mu luholo luabonga ha gutumbuisa Nzambi wetu. Mu longo edi, tuza mumona luholo tuajiya guyikalagala (1) mu mudimo wagulongesa, (2) mu gudibungisa gua mu hungu, (3) nu tangua tudi muta maga nu athu ako. Uvi thomo, tutadilenu mukunda natshi ndaga tuana zuela jiana khala nu ndando gu meso a Yehowa.

4. Ha gutadila Malaki 3:16, mukunda natshi ndaga tuana zuela jiana khala nu ndando gu meso a Yehowa?

⁴ Tanga Malaki 3:16. Udi mujiya mukunda natshi Yehowa wana tshigina gusonega mu ‘mukanda wenji wa giwungulugilo’ majina a athu anyi guzuela guawo guana monesa egi ana gumuvila woma nu ana gutangigiza jina dienji? Ndaga tuana zuela jiana monesa ndaga jidi mu mutshima wetu. Yesu wazuelele egi: “Kano diana zuela ndaga jidi jia guzala mu mutshima.” (Mat. 12:34) Ndaga tuana zuela jiana monese gula tuana zumba Yehowa muavula nga ndo. Yehowa wana tshigina egi athu ana gumuzumba mbaajinge mayilago mu mavu ahe-ahe.

5. (a) Mukunda natshi luholo luetu lua guzuela ludi nu ndando mu gukombelela guetu? (b) Luholo gifuanesa gidi guyimonesa, itshi tudi naye gutuna gutshita tangua tudi muzuela ha gusuanguluisa Yehowa?

⁵ Guzuela guetu guajiya gumonesa gula Yehowa mbawutshigina gukombelela guetu nga ndo. (Yak. 1:26) Athu ako anyi anago guzumba Nzambi ana zuela nu khabu jiagasue, ana zuela nu lulendo, ana guzuela nji ndo nu gisemo. (2 Tim. 3:1-5) Esue tuana tshiginago gukhala gifua ene. Uvi, tuana tshigina gusuanguluisa Yehowa tangua tudi muzuela. Yehowa gajiyilego gusuanguluga nu esue gula mu gudibungisa gua mu hungu nga mu mudimo wagulongesa tudi muzuela nu gisemo, uvi tangua tudi hakhetu nu enya fami yetu tushigo muzuela nu gisemo.—1 Phet. 3:7.

6. Gubonga gutshi phangi Kimberly wahetele luholo wakalegele kado ya guzuela mu luholo luabonga?

⁶ Tangua tuana tshitshila kado ya guzuela mu luholo luabonga, tuana monesa diago egi tudi akombeledi a Yehowa. Ngenyi tuana kuatesa athu ako ha gukotelesa ‘gudisha gudi mukatshi dia muthu wana kombelela Nzambi nu muthu  wanago gumukombelela.’ (Mal. 3:18) Tutadilenu luholo ndaga yene yabuidile phangi wa mukhetu Kimberly. * Aahanele devuare ha gutshita nu futa dienji wakhalasa. Gungima dia gutshita devuare diene, futa dienji muene wakotelesele egi Kimberly wakhalele wagudisha nu ana ako akhalasa. Kimberly gakhalelego mufeta athu, wakhalele muzuela nu gisemo, gakhalelego nji muzuela ndaga jia musonyi. Futa dienji dia khalasa wadihudile muavula nu wandesele gulonguga Biblia. Yehowa wana suanguluga muavula gula luholo luetu lua guzuela ludi mukuatesa athu ako ha gutshigina gulonguga giamatshidia.

7. Mu luholo lutshi tudi naye gukalegela kado ya guzuela ya tuhanele Nzambi?

⁷ Mukut’etu agasue tuana tshigina egi luholo luetu lua guzuela lutumbuise Yehowa nu lutukuatese ha gukuata ufuta nu aphangi’etu. Tutadilenu mu ndaga jitshi tuajiya gukalagala ngolo ha gulandula gukhala “gifezegeselo . . . mu guzuela.”

8. Gifezegeselo gitshi Yesu watubembele mu ndaga yatadila luholo luenji lua guzuela mu mudimo wa gulongesa?

⁸ Khala muzuela nu gisemo nu ginemua gula athu ako aguhana khabu. Tangua diakhalele mulongesa Yesu, athu akhalele muzuela egi udi munui wa matombe, wafudila gudia, wakatugile gudi Diabulu, gashigo munemesa Lusugu lua Guhuluguga, nu udi mushinga Nzambi. (Mat. 11:19; 26:65; Luka 11:15; Yone 9:16) Uvi, Yesu gaahanelego mvutu nu khabu. Gula athu ashigo gutuwambela ndaga nu gisemo, tudi naye gulandula gifezegeselo gia Yesu, tushigo naye gutshita ndaga gifua muatshitshi ene. (1 Phet. 2:21-23) Uvi gutshita ngenyi gushigo ndaga yaleba. (Yak. 3:2) Itshi yajiya gutukuatesa?

9. Itshi yajiya gutukuatesa ha gudikanda tangua tudi mu mudimo wa gulongesa?

⁹ Gula muthu gaguhanelego mvutu nu gisemo tangua udi mu mudimo wagulongesa, kamba gujiya itshi yamutumi ha gutshita ngenyi. Phangi Sam udi muzuela egi: “Ngana tangigiza luholo athu adi nu funu yagujiya giamatshidia nu ngana jiya egi ajiya gusombegesa makalegelo awo.” Ma tangua ako muthu wajiya guvua khabu mu mudimo wagulongesa handaga tuayi mu tangua diabola. Gula tudi mutshigina guzuela nu muthu udi nu khabu, tuajiya gutshita ndaga yana tshita phangi wa mukhetu Lucia. Tuajiya gukalagala gisambu gia hihia, ha gutoga ukuateshi gudi Yehowa hagula tuajiya gudikanda ha gutuna guzuela mu luholo luabola.

10. Ha gutadila 1 Timote 4:13, itshi tudi naye gutshita?

¹⁰ Khala mulongeshi wabonga. Timote wakhalele nu eksperianse mu mudimo wa gulongesa, uvi wakhalele naye gulandula gukudisa luholo luenji lua gulongesa. (Tanga 1 Timote 4:13.) Luholo lutshi tuajiya gubua alongeshi abonga mu mudimo wa gulongesa? Tudi naye gudilondega muabonga gutuama dia gulongesa. Ndaga  yabonga idi egi, tudi nu ikadigilo yavula yajiya gutukuatesa ha gubua alongeshi abonga. Wajiya guheta malongo abonga mu gamukanda Dihane ha Gutanga nu Gulongesa nu mu gitshinyi “Yikadikile mu Mudimo wa Gulongesa” gidi mu Lujingu nu Mudimo wa Uklisto—Mukanda wa gukalegela mu gudibungisa. Wahetele gale gubonga mu ikadigilo yene ba? Gula tuadilondega muabonga mbayikhala yaleba ha guzuela nu mutshima wetu wagasue nu ha gutuna guvua woma.

11. Luholo lutshi Aklisto ako ana gubua alongeshi abonga?

¹¹ Tuajiya nji gubua alongeshi abonga gula tudi mutala muabonga luholo aphangi ako a mu hungu ana longesa. Phangi Sam tuazuelela gu thunda wakhalele gudihula ha gujiya ndaga yana kuatesa Aklisto ako hagubua alongeshi abonga. Wakhalele mulonguga ba metode aphangi ene ana kalegela mu mudimo wa gulongesa nu walanduile gifezegeselo giawo. Phangi wa mukhetu Talia wana tegelela muabonga tangua aphangi adi nu eksperianse ana tshita ba diskur. Gutshita ngenyi guamukuatesele ha gujiya luholo lua guzuelela ndaga jinyi athu ana hula muavula mu mudimo wa gulongesa.

12. Itshi yajiya gukhala lamba gudi athu ako ha gutshita?

¹² Hagula gudibungisa gua mu hungu gubalege muabonga, mukut’etu agasue tuajiya guyimba hamoshi nu guhana ba komantere tualondega muabonga. (Ngi. 22:22) Yana khala lamba gudi athu ako ha guyimba nu guhana ba komantere mu gudibungisa. Yana khala nji lamba gudi aye ba? Gula idi ngenyi wajiya gukamba gujiya ndaga yakuatesele athu ako ha gutuna guvua woma wa guyimba nu guhana ba komantere.

13. Itshi yajiya gugukuatesa ha guyimba nu mutshima waye wagasue mu gudibungisa?

¹³ Guyimba nu mutshima wagasue. Tuana yimba gimbo jietu jia Ufumu mu gudibungisa gua mu hungu ha gutumbuisa Yehowa. Phangi Sara wana tangiza egi gana yimba diago ndo muabonga. Uvi wana tshigina gutumbuisa Yehowa mu gimbo. Hene wana londega ngimbo gu inzo gifua luholo luana londega muene ndaga jiko jia mu gudibungisa gua mu hungu. Wana yimba nu wana kamba gujiya luholo mbimbi jia gimbo jidi gudivua nu ndaga adi naye guzuelela mu gudibungisa. Phangi muene udi muzuela egi: “Ndaga yene yana gungukuatesa hagusha matangi mu mbimbi jidi mu ngimbo, ha fundo dia gudisagesa mu luholo ngudi muyimba.”

14. Gula wana vua woma ha guzuela ha meso a athu avula, itshi yajiya gugukuatesa ha guhana mvutu mu gudibungisa?

¹⁴ Khala muhana mvutu mu gudibungisa. Idi yadiago egi yajiya gukhala lamba gudi athu ako. Phangi Talia tuazuelela gu thunda udi muzuela egi: “Ngana vua woma ha guzuela ha meso a athu avula. Athu ako ana kotelesago ndaga yene hadanga ngana zuela ndo muavula. Hene yana khala diago lamba gudi ame ha guhana mvutu  mu gudibungisa.” Uvi, phangi Talia wana tshita diago ngolo ha guhana mvutu mu gudibungisa. Tangua diana londega muene gudibungisa wana wunguluga egi mvutu ya thomo idi naye gukhala yahihia nu idi naye gukhala mvutu ya muhu wa paragrafe. Udi muzuela luko egi: “Idi mukotelesa egi idi ndaga yabonga gula mvutu yami idi ya hihia, yaleba nu idi muhana matangi a ndando adi mu paragrafe. Handaga mvutu ya luholo elu yene muthu udi mutuameza wana nengena.”

15. Itshi tushigo naye gujimbila mukunda nu mvutu tuana hana mu gudibungisa?

¹⁵ Ikhale Aklisto anyi anago guvua musonyi ha guzuela, matangua ako ana guhana ndo mvutu mu gudibungisa. Mukunda natshi? Phangi Juliet udi muzuela egi: “Matangua ako ngana guvua musonyi ha guhana mvutu handaga ngana vua woma egi mvutu yami ishigo diago yabonga.” Jiya egi Yehowa wana tshigina egi tuhane mvutu jiabonga tuajiya guhana. * Wana suanguluga muavula tangua tuana tshita yagasue ha guhana mvutu mu gudibungisa ngatshima matangua ako tuana guvua woma.

16. Guzuela gua luholo lutshi tudi naye gutuna?

¹⁶ Bembenu “mbimbi jiabola” jia maluholo agasue. (Ef. 4:31) Gifua luholo tuayimonyi gu thunda, Aklisto ashigo naye guzuela mbimbi jiabola jia maluholo agasue. Uvi gudi nji nu maluholo ako abola a guzuela tudi naye gutuna. Ha gufezegesa, tudi naye gutuna guzuela ndaga jiabola ha gufuanesa athu a mazuelelo gudisha, ifutshi ya gudisha nu ndaga jiana kalegewa mu mafundo a gudisha. Tushigo naye nji guzuela mbimbi jidi mumonesa egi tudi mushingana athu ako. Phangi mungoshi wa yala udi muzuela egi: “Matangua ako ngakhalele muzuela ndaga jiabola mukunda nu aphangi, ngakhalele mutangiza egi idi mukunda nu gualelesa uvi ya khalele musagesa athu ako. Mukaji’ami wangukuatesele muavula hagukotelesa luholo mbimbi jiami jiakhalele musagesa athu ako.”

17. Mu gudivua nu Efeso 4:29, luholo lutshi tuajiya gukolesa athu ako?

¹⁷ Khala muzuela mbimbi jiabonga jidi mukolesa athu ako. Khala mushimana athu ako, ha fundo dia guafeta. (Tanga Efeso 4:29.) Enya Isalele akhalele nu ndaga jiavula jia guhanela Nzambi mersi, uvi akhalele nu khadilo dia gunyema (guboguta). Gula tudi nu khadilo dia gunyema, athu ako ajiya nji gutulandula. Tudi mujiya egi mala kumi anyi ayile mutala gifutshi gia Kanana azuelele ndaga jiabola mukunda nu gifutshi giene, hene ‘enya Isalele agasue asendesele gunyemena Moize.’ (Lutang. 13:31–14:4) Uvi, gula tudi mushimana athu ako yajiya guahana gikhesa nu guasuanguluisa. Mafuta a mun’a Yefeta wa mukhetu akhalele muya gumushimana,  ndaga yene yamuhanele gikhesa ha gutagenesa mudimo wenji muabonga. (Manz. 11:40) Phangi Sara, tuazuelela guthunda udi muzuela egi: “Tangua tuana shimana athu ako tuana guakuatesa ha gujiya egi Yehowa nu aphangi a mu hungu ana guazumba.” Hene tudi naye gukamba maluholo a gushimana aphangi’etu nu mutshima wagasue.

18. Ha gutadila Ngimbo 15:1, 2, mukunda natshi tudi naye guzuela diago giamatshidia?

¹⁸ Khala muzuela giamatshidia. Tuajiyilego gusuanguluisa Yehowa gula tudi mumba mambo. Yehowa wana tuna mambo a maluholo agasue. (Ish. 6:16, 17) Mangino athu avula ana tangiza egi gumba mambo gushigo ndaga yabola. Esue tuana tuna matangi awo handaga Yehowa wana zuela egi idi ndaga yabola. (Tanga Ngimbo 15:1, 2.) Tuana tuna nji guzuela ndaga jishigo diago jia giamatshidia ha gutuna gutuma athu ako ha gutangiza muabola.

19. Ndaga itshi iko tudi naye gutuna?

¹⁹ Tuna khadilo dia gufeta athu ako. (Ish. 25:23; 2 Tes. 3:11) Phangi Juliet, tuazuelela guthunda udi mumonesa luholo khadilo dia gufeta diana gumusagesa. Udi muzuela egi: “Guvua ndaga jiabola jiana zuela athu ako guana lebesa muila nu ngana shila ndo muthu wana feta athu ako mutshima. Ngumujiya egi lusugu wajiya nji gungu feta gudi muthu muko.” Gula wamona egi tangua mudi muta maga phangi mumoshi wasendesa gufeta muthu muko, udi naye guzuela ndaga iko yajiya gusombegesa maga ene.—Kol. 4:6.

20. Desizio ditshi wazula mukunda nu kado ya guzuela yaguhanele Yehowa?

²⁰ Tudi naye gutshita ngolo hagula guzuela guetu gusuanguluise Yehowa, handaga ha mavu awa athu avula anago guzuela mu luholo luabonga. Tudi naye gujiya egi guzuela idi kado yatuhanele Yehowa, wana tshigina egi tuyikalegele muabonga. Gula tudi mutshita ngolo ha gukalegela muabonga kado ya guzuela mu mudimo wa gulongesa, mu gudibungisa guetu gua mu hungu nu tangua tudi muta maga nu athu ako, Yehowa mbawutushimbiga. Tangua mbadishiya Yehowa mavu awa abola, mbayikhala yaleba gudi esue ha gumutumbuisa nu kado ya guzuela yatuhanele muene. (Yuda 15) Hene, khala mutshita yagasue ha gusuanguluisa Yehowa nu “mbimbi jia mukano [diaye].”—Ngi. 19:14.