1.‏ سانوں بولن دی صلاحیت کنہے دِتی اے؟‏

 سانوں بولن دی صلاحیت ساڈے اسمانی باپ یہوواہ نے دِتی اے۔ جدوں یہوواہ نے سب توں پہلے انسان یعنی آدم نُوں بنایا سی تے اوہ اپنے اسمانی باپ نال گل بات کر سکدا سی۔ آدم کئی سارے نویں نویں لفظ بنا سکدا سی۔ ایس صلاحیت دی وجہ توں اوہنے سارے جانوراں دے ناں رکھے۔ (‏پیدایش 2:‏19‏)‏ ذرا سوچو کہ جدوں آدم نے پہلی وار کسے انسان یعنی حوا نال گل کیتی ہوئے گی تے اوہنوں کِنّی زیادہ خوشی ہوئی ہوئے گی۔—‏پیدایش 2:‏22، 23‏۔‏

2.‏ پرانے تے اَج دے زمانے چ لوکاں نے بولن دی صلاحیت دا غلط استمال کیویں کیتا اے؟‏

² انساناں دی تخلیق دے تھوڑے عرصے بعد ای بولن دی صلاحیت دا غلط استمال ہون لگ پیا۔ شیطان اِبلیس نے حوا نال جھوٹھ بولیا تے ایس جھوٹھ دی وجہ توں انسان گُناہ‌گار تے عیب‌دار بن گئے۔ (‏پیدایش 3:‏1-‏4‏)‏ جدوں آدم نے اپنیاں ساریاں غلطیاں دا اِلزام حوا ایتھوں تک کہ یہوواہ تے لایا تے اوہنے وی اپنی بولن دی صلاحیت دا غلط استمال کیتا۔ (‏پیدایش 3:‏12‏)‏ قائن نے اپنے بھرا ہابل نُوں قتل کر‌ن دے بعد یہوواہ نال جھوٹھ بولیا۔ (‏پیدایش 4:‏9‏)‏ بعد چ قائن دی نسل دے اِک بندے نے جدا ناں لمک سی اِک نظم لکھی جدے توں پتہ چلدا اے کہ اوہدے زمانے دے لوک کِنّے ظالم سن۔ (‏پیدایش 4:‏23، 24‏)‏ اَج وی بوہت سارے لوک اِنج ای کر‌دے نیں۔ بوہت سارے سیاسی رہنما سرِعام گندی زبان استمال کر‌دے نیں۔ تے ایہو جہی کوئی فلم وی بڑی مشکل نال ای مِلدی اے جدے چ گندی زبان استمال نہ کیتی گئی ہووے۔ بچیاں نُوں سکولاں چ تے وڈیاں نُوں کم دی جگہ تے گندی زبان سننی پیندی اے۔ گندی زبان دا ایناں عام ہو جانا ایس گل دا ثبوت اے کہ دُنیا کِنّی بھیڑی ہو گئی اے۔‏

3.‏ (‏الف)‏ سانوں کیہڑی گل توں خبردار رہنا چاہی دا اے؟ (‏ب)‏ ایس مضمون چ اَسی کیہڑیاں گلاں تے غور کر‌اں گے؟‏

³ جے اَسی دھیان نئیں دَواں گے تے گندی زبان سُن سُن کے ہو سکدا اے کہ اَسی وی ایہنوں استمال  کر‌ن لگ پیئے۔ ایہہ سچ اے کہ اَسی یہوواہ نُوں خوش کر‌نا چاہنے آں پر اوہنوں خوش کر‌ن لئی صرف ایہہ ای کافی نئیں اے کہ اَسی گندی زبان استمال کر‌ن توں بچئے۔ سانوں اپنی بولن دی صلاحیت نُوں یہوواہ دی تعریف کر‌ن لئی وی استمال کر‌نا چاہی دا اے۔ ایس مضمون چ اَسی ویکھاں گے کہ اَسی (‏1)‏ مُنادی کر‌دے ویلے،(‏2)‏ عبادتاں چ تے (‏3)‏ دُوجیاں نال گل بات کر‌دے ویلے اپنی زبان توں یہوواہ دی تعریف کیویں کر سکنے آں۔ پر آؤ سب توں پہلے ایہہ ویکھئے کہ ساڈیاں گلاں توں یہوواہ نُوں فرق کیوں پیندا اے۔‏

4.‏ ملاکی 3‏:‏16دے مطابق یہوواہ نُوں ساڈیاں گلاں توں فرق کیوں پیندا اے؟‏

⁴ ملاکی 3:‏16 نُوں پڑھو۔‏ کیہہ تُسی کدی سوچیا اے کہ یہوواہ اوہناں لوکاں دے ناں اِک کتاب چ کیوں لکھواندا اے جنہاں دِیاں گلاں توں پتہ چلدا اے کہ اوہ اوہدے توں ڈردے تے اوہدے ناں نُوں یاد کر‌دے نیں؟ ساڈیاں گلاں توں پتہ چلدا اے کہ ساڈے دل چ کیہہ اے۔ یسوع مسیح نے وی کہیا سی کہ جو ساڈے دل چ بھریا ہوندا اے اوہی ساڈی زبان تے آندا اے۔ (‏متی 12:‏34‏)‏ اَسی جیہو جہیاں گلاں کر‌نے آں اوہدے توں پتہ چلدا اے کہ اَسی یہوواہ نُوں کِنّاں پیار کر‌نے آں۔ یہوواہ چاہندا اے کہ اوہ لوک نوِیں دُنیا چ خوشیاں بھری زندگی گزارن جیہڑے اوہنوں پیار کر‌دے نیں۔‏

5.‏ (‏الف)‏ ساڈی عبادت تے ساڈیاں گلاں چ کیہہ تعلق اے؟ (‏ب)‏تصویر دے مطابق سانوں بولن دی صلاحیت بارے کیہڑیاں گلاں دا دھیان رکھنا چاہی دا اے؟‏

⁵ اَسی جیویں گل بات کر‌نے آں اوہدی بنیاد تے یہوواہ فیصلہ کر‌دا اے کہ اوہ ساڈی عبادت نُوں قبول کر‌ے گا یاں نئیں۔ (‏یعقوب 1:‏26‏)‏ جیہڑے لوک یہوواہ نُوں پیار نئیں کر‌دے اوہ دُوجیاں نال بڑی سختی، آکڑ تے غصے نال گل کر‌دے نیں۔ (‏2-‏تیمُتھیُس 3:‏1-‏5‏)‏ اَسی ایہو جہے لوکاں ورگے بالکل نئیں بننا چاہندے۔ ساڈی دلی خواہش اے کہ اَسی اپنیاں گلاں توں یہوواہ نُوں خوش کر‌یئے۔ ذرا سوچو کہ جے اَسی عبادتاں تے مُنادی دے دوران تے دُوجیاں نال بڑے پیار نال گل کر‌نے آں پر کلّے چ اپنے گھر والیاں نال بڑی سختی تے غصے نال گل کر‌نے آں تے کیہہ یہوواہ خوش ہوئے گا؟—‏1-‏پطرس 3:‏7‏۔‏

6.‏ جدوں بھین کر‌ن نے اپنی بولن دی صلاحیت دا صحی طریقے نال استمال کیتا تے ایہدا کیہہ نتیجہ نکلیا؟‏

⁶ جدوں اَسی اپنی بولن دی صلاحیت نُوں صحی طریقے نال استمال کر‌نے آں تے ایہدے توں پتہ چلدا اے کہ اَسی یہوواہ دی عبادت کر‌نے آں۔ اِنج ساڈے آلے دوالے دے لوک خدا دی عبادت کر‌ن والیاں تے نہ کر‌ن والیاں چ بڑی اسانی نال فرق کر سکدے نیں۔ (‏ملاکی 3:‏18‏)‏ ایہدے بارے ذرا بھین کر‌ن دی مثال تے غور کر‌و۔‏ b بھین کر‌ن دی اِک ٹیچر نے  اوہنوں کلاس دی اِک ہور کڑی نال مِل کے اِک مضمون تے کم کر‌ن نُوں کہیا۔ جدوں اوہناں نے کم ختم کر لیا تے اوس کڑی نے ویکھیا کہ کر‌ن کلاس دے باقی بچیاں توں بالکل فرق اے۔ اوہنے ویکھیا کہ کر‌ن دُوجیاں دِیاں بُرائیاں نئیں کر‌دی سگوں ہمیشاں پیار نال گل کر‌دی اے تے گندی زبان وی استمال نئیں کر‌دی۔ ایس وجہ توں اوس کڑی نے کر‌ن نال بائبل کورس کر‌نا شروع کر دِتا۔ ذرا سوچو کہ جدوں ساڈیاں گلاں دی وجہ توں لوک سچائی وَل کِھچے چلے آندے نیں تے یہوواہ کِنّاں خوش ہوندا اے۔‏

7.‏ توانوں اپنی بولن دی صلاحیت نُوں کیویں استمال کر‌نا چاہی دا اے؟‏

⁷ سانوں اِنج گل بات کر‌نی چاہی دی اے جدے توں یہوواہ دی وڈیائی ہووے تے اَسی اپنے بھین بھراواں دے ہور نیڑے ہو جائیے۔ آؤ کجھ ایہو جہے طریقیاں تے غور کر‌یئے جنہاں تے عمل کر کے اَسی اپنیاں گلاں توں دُوجیاں لئی مثال قائم کر سکنے آں۔‏

8.‏ یسوع مسیح نے دُوجیاں نال گل بات کر‌ن دے معاملے چ ساڈے لئی چنگی مثال کیویں قائم کیتی؟‏

⁸ جدوں دُوجے توانوں غصہ دَوان تے اوہناں نال نرمی تے عزت نال گل کر‌و۔‏ جدوں یسوع مسیح زمین تے سی تے لوک اوہدے تے ایہہ جھوٹھے اِلزام لاندے سن کہ اوہ شرابی، کھاؤ، شیطان دا ساتھی، سبت نُوں توڑن والا تے خدا دی بےعزتی کر‌ن والا اے۔ (‏متی 11:‏19؛‏ 26:‏65؛‏ لُوقا 11:‏15؛‏ یوحنا 9:‏16‏)‏ پر یسوع نے کدی وی ایہناں گلاں دا جواب غصے نال نئیں دِتا۔ جدوں لوک ساڈے نال سختی نال گل کر‌دے نیں تے سانوں یسوع وانگوں بننا چاہی دا اے تے بدلے چ اوہناں نال بُرے طریقے نال گل نئیں کر‌نی چاہی دی۔ (‏1-‏پطرس 2:‏21-‏23‏)‏ سچ اے کہ اِنج کر‌نا اسان نئیں ہوندا۔ (‏یعقوب 3:‏2‏)‏ پر کیہڑی چیز اِنج کر‌ن چ ساڈی مدد کر سکدی اے؟‏

9.‏ مُنادی دے دوران جدوں لوک ساڈے نال غصے نال گل کر‌دے نیں تے کیہڑی چیز ساڈی مدد کر‌ے گی کہ اَسی وی اَگوں غصہ نہ کر‌یئے؟‏

⁹ مُنادی کر‌دے ویلے جدوں کوئی ساڈے نال بھیڑے طریقے نال گل کر‌دا اے تے غصے چ آن دی بجائے ایس گل تے دھیان دَوو کہ اوہنے تواڈے نال اِنج گل کیوں کیتی اے۔ اِک بھرا جدا ناں سموئیل اے، اوہنے کہیا:‏ ”‏میں ایس گل تے دھیان دین دی کوشش کر‌نا واں کہ ایس بندے نُوں یہوواہ بارے سکھن دی کِنّی ضرورت اے تے ایہہ بدل سکدا اے۔“‏ کدی کدی لوک ایس لئی غصے چ آ جاندے نیں کیونکہ اَسی اِک ایہو جہے وقت تے اوہناں کول جانے آں جیہڑا اوہناں لئی مناسب نئیں ہوندا۔ جدوں اَسی کسے ایہو جہے بندے نُوں ملنے آں جیہڑا چھیتی غصے چ آ جاندا اے تے اَسی بھین لوسی دی مثال تے غور کر‌سکنے آں۔ بھین لوسی وانگوں اَسی وی ایہہ چھوٹی جہی دُعا کر سکنے آں کہ غصے چ نہ آئیے تے اوس بندے نُوں بُرا بھلا نہ کہیے۔‏

10.‏ 1-‏تیمُتھیُس 4:‏13 دے مطابق ساڈا مقصد کیہہ ہونا چاہی دا اے؟‏

¹⁰ ہور چنگے استاد بنو۔‏ تیمُتھیُس کول مُنادی کر‌ن دا بڑا تجربہ سی۔ پر فیر وی اوہنوں دُوجیاں نُوں تلیم دین دی اپنی مہارت نُوں نکھاردے رہن دی لوڑ سی۔ ‏(‏1-‏تیمُتھیُس 4:‏13 نُوں پڑھو۔)‏ مُنادی کر‌دے ویلے اَسی دُوجیاں نُوں ہور چنگی طرحاں تلیم کیویں دے سکنے آں؟ سانوں چنگی تیاری کر‌نی چاہی دی اے۔ اَسی یہوواہ دے بڑے شکرگزار آں کہ اوہنے سانوں ایہو جہیاں چیزاں دِتیاں نیں جنہاں دی مدد نال اَسی ہور چنگے استاد بن سکنے آں۔ اَسی ‏”‏تلیم دین تے پڑھن چ ماہر بنو‏“‏ کتاب چ دِتے گئے مشوریاں تے غور  کر سکنے آں۔ نالے اَسی ‏”‏مسیحی زندگی تے خدمت“‏ والے قاعدے چ آن والے حصے ‏”‏شاگرد بناؤن لئی تربیت“‏ توں وی فائدہ حاصل کر سکنے آں۔ کیہہ تُسی ایہناں سہولتاں توں فائدہ چک رہے او؟ جدوں تُسی چنگی تیاری کر‌و گے فیر تُسی خوشخبری سناندے ویلے گھبراؤ گے نئیں سگوں اعتماد نال گل کر‌و گے۔‏

11.‏ کجھ بھین بھرا ہور چنگے استاد کیویں بنے نیں؟‏

¹¹ اَسی اپنی کلیسیا دے اوہناں بھین بھراواں دی مثال تے وی عمل کر کے چنگے استاد بن سکنے آں جیہڑے دُوجیاں نُوں چنگی طرحاں تلیم دیندے نیں۔ بھرا سموئیل جدا مضمون چ پہلاں وی ذکر ہویا اے، اوہ اوہناں بھین بھراواں دی مثال تے غور کر‌دا اے جیہڑے چنگے استاد بن گئے نیں۔ اوہ اوہناں بھین بھراواں دے تلیم دین دے طریقے تے غور کر‌دا اے تے فیر اوہناں وانگوں تلیم دین دی کوشش کر‌دا اے۔ بھین تانیہ ایس گل تے غور کر‌دی اے کہ عوامی تقریراں دین والے بھرا کیویں تقریراں دیندے نیں۔ اِنج اوس بھین نے سکھیا اے کہ اوہ مُنادی چ اوہناں موضوعاں بارے گل کیویں کر سکدی اے جنہاں بارے لوک جاننا چاہندے نیں۔‏

12.‏ کجھ بھین بھراواں نُوں کیہڑا کم مشکل لگدا اے؟‏

¹² عبادتاں چ ساڈے کول موقع ہوندا اے کہ اَسی اُچی آواز چ گیت گائیے تے چنگی تیاری کر کے جواب دَئیے۔ (‏زبور 22:‏22‏)‏ پر کجھ بھین بھراواں نُوں ساریاں دے سامنے گیت گانا یاں جواب دینا مشکل لگدا اے۔ کیہہ توانوں وی ایس مشکل دا سامنا اے؟ جے ہے وے تے فیر تُسی ضرور جاننا چاہوو گے کہ کجھ بھین بھراواں نے اپنے ایس ڈر تے کیویں قابو پایا اے۔‏

13.‏ عبادتاں تے دلوں گیت گان چ کیہڑی چیز ساڈی مدد کر‌ے گی؟‏

¹³ دلوں گیت گاؤ۔‏ جدوں اَسی دلوں گیت گانے آں تے ایہدی سب توں وڈی وجہ ایہہ ہوندی اے کہ اَسی یہوواہ دی تعریف کر‌نا چاہنے آں۔ سارہ ناں دی اِک بھین نُوں لگدا اے کہ اوہ ایناں چنگا نئیں گا سکدی۔ پر فیر وی اوہ یہوواہ دی تعریف چ گیت گانا چاہندی اے۔ ایس لئی عبادت دی تیاری کر‌دے ویلے اوہ گیت گان دی تیاری وی کر‌دی اے۔ اوہ پہلے توں گیت گان دی پریکٹس کر‌دی اے تے ایس گل تے دھیان دیندی اے کہ گیت دے بولاں دا عبادت چ دَسیاں جان والیاں گلاں نال کیہہ تعلق اے۔ اوہ کہندی اے کہ اِنج میرا دھیان گیت دے بولاں تے رہندا اے ایس گل تے نئیں کہ میں چنگی طرحاں گا سکنی آں یاں نئیں۔‏

14.‏ جے تُسی شرمیلے او تے کیہڑی چیز عبادتاں چ جواب دین چ تواڈی مدد کر سکدی اے؟‏

¹⁴ باقاعدگی نال جواب دَوو۔‏ ایہہ سچ اے کہ کجھ لوکاں نُوں عبادت چ جواب دینا مشکل لگ سکدا اے۔ بھین تانیہ جدا پہلاں وی ذکر ہویا اے، اوہ کہندی اے:‏ ”‏میں لوکاں نال گل کر‌دے ویلے گھبرا جانی آں۔ پر دُوجیاں نُوں ایس گل دا پتہ نئیں لگدا کیونکہ میں بڑے سکون نال گل کر‌نی آں۔ مینوں عبادتاں تے جواب دینا بڑا مشکل لگدا اے۔“‏ پر فیر وی بھین تانیہ عبادتاں تے جواب ضرور دیندی اے۔ عبادتاں دی تیاری کر‌دے ویلے اوہ ایس گل نُوں ذہن چ رکھدی اے کہ کسے سوال دا پہلا جواب چھوٹا ہونا چاہی دا اے تے سانوں اوہی دَسنا چاہی دا اے جو پچھیا جاندا اے۔ اوہ کہندی اے:‏ ”‏جے میں چھوٹا تے سادہ جیہا جواب دینی آں تے اوہی دسنی آں جو پچھیا جاندا اے تے ایہدے چ کوئی مسئلہ نئیں کیونکہ مطالعیا کر‌ان والا بھرا وی اِنج دا جواب ای چاہندا اے۔“‏

15.‏ سانوں عبادتاں تے جواب دین دے حوالے نال کیہڑی گل یاد رکھنی چاہی دی اے؟‏

 ¹⁵ کجھ بھین بھرا شرمیلے نئیں ہوندے پر فیر وی اوہ عبادتاں تے جواب نئیں دیندے۔ ایہدی کیہہ وجہ اے؟ جولیٹ ناں دی اِک بھین کہندی اے:‏”‏کدی کدی میں جواب ایس لئی نئیں دیندی کیونکہ مینوں لگدا اے کہ میرا جواب بڑا سادہ جیہا اے تے ایناں چنگا نئیں اے۔“‏ پر یاد رکھو کہ یہوواہ چاہندا اے کہ اَسی جِنّاں چنگا جواب دے سکنے آں، اوہ ضرور دَئیے۔‏ c جدوں اَسی گھبران دے باوجود عبادتاں تے جواب دین دی پوری کوشش کر‌نے آں تے یہوواہ خوش ہوندا اے۔‏

16.‏ سانوں کیہو جہیاں گلاں نئیں کر‌نیاں چاہی دِیاں؟‏

¹⁶ کسے وی طرحاں دِیاں نقصان پونچان والیاں گلاں نہ کر‌و۔‏ (‏اِفسیوں 4:‏31‏)‏ جیویں کہ مضمون چ پہلے دَسیا گیا اے، اِک مسیحی نُوں اپنی زبان تے گندیاں گلاں بالکل وی نئیں لیانیاں چاہی دِیاں۔ کجھ گلاں ایہو جہیاں ہوندیاں نیں جنہاں بارے سانوں پتہ وی نئیں ہوندا کہ ایہناں توں دُوجیاں نُوں نقصان پونچ سکدا اے۔ سانوں ایہو جہیاں گلاں کر‌ن توں خبردار رہنا چاہی دا اے۔ مثال لئی، سانوں دُوجیاں دے رہن سہن، قوم تے رنگ دی وجہ توں اوہناں بارے بھیڑیاں گلاں نئیں کر‌نیاں چاہی دِیاں۔ ایہدے علاوہ سانوں کدی وی دُوجیاں دی بےعزتی نئیں کر‌نی چاہی دی تے نہ ای اوہناں دا مذاق اُڈانا چاہی دا اے۔ ایس بارے اِک بھرا نے اپنی غلطی نُوں تسلیم کر‌دے ہوئے کہیا:‏ ”‏کدی کدی میں دُوجیاں دا مذاق اُڈانا ساں تے اوہناں نُوں لا لا کے گلاں کر‌نا ساں۔ مینوں لگدا سی کہ میں تے بس مذاق کر رہیا واں تے ایہدا کوئی نقصان نئیں۔ پر اصل چ میریاں گلاں توں دُوجیاں نُوں بڑی تکلیف پونچ رہی سی۔ پچھلے کجھ سالاں چ میری بیوی نے ایہہ سمجھن چ میری مدد کیتی اے کہ میریاں کیہڑیاں گلاں دی وجہ توں اوہنوں تے دُوجیاں نُوں تکلیف پونچی اے۔“‏

17.‏ اِفسیوں 4:‏29 دے مطابق اَسی دُوجیاں دا حوصلہ کیویں ودھا سکنے آں؟‏

¹⁷ ایہو جہیاں گلاں کر‌و جنہاں توں دُوجیاں دا حوصلہ ودھے۔‏ سانوں دُوجیاں چ نُقص یاں کیڑے کڈھن دی بجائے اوہناں دی تعریف کر‌نی چاہی دی اے۔ ‏(‏اِفسیوں 4:‏29 نُوں پڑھو۔)‏ بنی‌اِسرائیل کول ایہو جہیاں بڑیاں چیزاں سن جنہاں لئی اوہ یہوواہ دا شکر ادا کر سکدے سن۔ پر اوہ آئے دن کسے نہ کسے گل چ کیڑے کڈھدے رہندے سن۔ جے اَسی وی گل گل چ کیڑے کڈھاں گے تے سانوں ویکھ کے دُوجے وی اِنج کر‌نا شروع کر دین گے۔ توانوں یاد ہوئے گا کہ جدوں دس جاسوساں نے کنعان دے ملک بارے بھیڑیاں گلاں دَسیاں تے بنی‌اِسرائیل موسیٰ دی شکایت کر‌ن لگ پئے۔ (‏گنتی 13:‏31–‏14:‏4‏)‏ پر جدوں اَسی دُوجیاں دی تعریف کر‌نے آں تے ایہدے توں ساریاں نُوں بڑی خوشی مِلدی اے۔ اَسی پورے یقین نال کہہ سکنے آں کہ جدوں ہر سال اِسرائیلی عورتاں اِفتاح دی دھی نُوں مِلن جاندیاں سن تے ایہدے توں اوہنوں ایہہ حوصلہ مِلدا سی کہ اوہ سیلا چ یہوواہ دی خدمت کر‌دی رہوے۔ (‏قضاۃ 11:‏40‏)‏ بھین سارہ جدا پہلاں وی ذکر ہویا اے، اوہ کہندی اے:‏”‏جدوں اَسی دُوجیاں دی تعریف کر‌نے آں تے اوہناں نُوں محسوس ہوندا اے کہ یہوواہ تے کلیسیا دے بھین بھرا اوہناں نال بڑا پیار کر‌دے نیں۔“‏ ایس لئی ایس گل تے دھیان دَوو کہ تُسی کیہڑیاں گلاں لئی دُوجیاں دی تعریف کر سکدے او۔‏

18.‏ زبور 15:‏1، 2 دے مطابق سانوں سچ کیوں بولنا چاہی دا اے تے سچ بولن چ کیہڑی گل شامل اے؟‏

 ¹⁸ سچ بولو۔‏ جے اَسی جھوٹھ بولنے آں تے یہوواہ ساڈے توں خوش نئیں ہوئے گا کیونکہ اوہنوں ہر طرحاں دے جھوٹھ توں نفرت اے۔ (‏امثال 6:‏16، 17‏)‏ بوہت سارے لوکاں دی نظر چ جھوٹھ بولنا معمولی جہی گل اے۔ پر اَسی ایس معاملے نُوں یہوواہ دی نظر نال ویکھنے آں۔ ‏(‏زبور 15:‏1، 2 نُوں پڑھو۔)‏ سانوں جھوٹھ نئیں بولنا چاہی دا پر ایہدے نال نال سانوں جان‌بجھ کے ایہو جہیاں گلاں وی نئیں کر‌نیاں چاہی دِیاں جنہاں توں دُوجیاں نُوں کوئی غلط‌فہمی ہوئے۔‏

19.‏ سانوں ہور کیہڑی گل دا دھیان رکھنا چاہی دا اے؟‏

¹⁹ کسے بارے غلط گلاں نہ پھیلاؤ۔‏ (‏امثال 25:‏23؛‏ 2-‏تھسلُنیکیوں 3:‏11‏)‏ بھین جولیٹ جدا ایس مضمون چ پہلے وی ذکر ہویا اے دَسدی اے کہ دُوجیاں بارے غلط گلاں سنن نال اوہدے تے کیہہ اثر ہویا۔ اوہنے کہیا:‏ ”‏دُوجیاں بارے غلط گلاں سنن دا بڑا نقصان ہوندا اے۔ ایس وجہ توں میرا اوس بندے توں بھروسا ای اُٹھ گیا جیہڑا دُوجیاں بارے غلط گلاں کر رہیا سی۔ جے اوہ میرے نال کسے دِیاں بُرائیاں کر رہیا اے تے فیر اوہ کسے ہور نال میریاں بُرائیاں وی کر‌دا ہوئے گا۔“‏ جدوں اَسی ویکھنے آں کہ گل بات دے دوران کسے دِیاں بُرائیاں ہون لگ پئیاں نیں تے سانوں فوراً گل بات دا رُخ موڑ کے ایہو جہیاں گلاں کر‌نیاں چاہی دِیاں نیں جنہاں توں دُوجیاں نُوں فائدہ ہوئے۔—‏کُلسّیوں 4:‏6‏۔‏

20.‏ تُسی اپنی بولن دی صلاحیت بارے کیہہ ارادہ کیتا اے؟‏

²⁰ اَسی اِک ایہو جہی دُنیا چ رہ رہے آں جِتھے لوکاں دی زبان وقت دے نال نال ہور گندی ہوندی جا رہی اے۔ پر سانوں ایہو جہی گل بات کر‌نی چاہی دی اے جدے توں یہوواہ خوش ہوئے۔ یاد رکھو کہ بولن دی صلاحیت یہوواہ وَلّوں اِک نعمت اے تے اوہنوں ایس گل توں فرق پیندا اے کہ اَسی ایس نعمت نُوں کیویں استمال کر‌نے آں۔ جدوں اَسی مُنادی کر‌دے ویلے، عبادتاں چ تے دُوجیاں نال گل بات کر‌دے ہوئے ایہو جہیاں گلاں کر‌اں گے جنہاں توں یہوواہ دی وڈیائی ہوئے گی تے فیر یہوواہ سانوں برکتاں دَوے گا۔ جدوں یہوواہ ایس بھیڑی دُنیا نُوں ختم کر دَوے گا تے ساڈے لئی اپنی بولن دی صلاحیت دے ذریعے یہوواہ دی وڈیائی کر‌نا اسان ہو جائے گا۔ (‏یہوداہ 15‏)‏ جدوں تک اِنج نئیں ہوندا ایس گل دا پکا ارادہ کر‌و کہ تُسی اپنے موُنہہ دے کلام یعنی اپنیاں گلاں توں یہوواہ نُوں خوش کر‌ن دی پوری کوشش کر‌دے رہوو گے۔—‏زبور 19:‏14‏۔‏