1. Ia wasa atail koahiek en koasoi kohsang ie?

 ATAIL koahiek en koasoi iei kisakis ehu sang atail Koht limpoako. Mwurinte tepin aramas, Adam, kepikipikda, e kak koasoiong Semeo nanleng. E pil kak wiahda ekei lokaia kapw. E doadoahngki koahiek wet pwehn kihong eden mahn kan koaros. (Sen. 2:19) Oh e uhdahn perenkihda eh kak koasoiong eh pwoud kaselelo, Ihp!​—Sen. 2:22, 23.

2. Ia duwen atail kisakis en lokaia eh suwedla mahso oh pil rahnwet?

² Sohte pwand, mie me sohla doadoahngki kisakis wet ni ahl pwung. Sehdan me Tepil lokaia likamw ong Ihp oh likamwo kahrehiong aramas nan dihp oh soh unsek. (Sen. 3:1-4) Adam doadoahngki kisakis wet ni ahl sapwung ni ahnsou me e kapwukoahki Ihp oh pil Siohwa pein eh sapwung kan. (Sen. 3:12) Kain lokaia likamw ong Siohwa mwurin eh kemehla rie pwutako Eipel. (Sen. 4:9) Mwuhr, kadaudok en Kain me adaneki Lamek wiahda koasoi ehu me kasalehda uwen aramas akan ar uhdahn lemei ni eh mwehio. (Sen. 4:23, 24) Ia mwomwen aramas akan rahnwet? Ekei pak, kaunen koperment kan sohte kin suwedki doadoahngki lokaia suwed. Oh pali laud en kasdo kan rahnwet kin doadoahngki lokaia suwed de peined. Serihn sukuhl kan kin rong lokaia suwed de peined ni wasahn sukuhl, oh me laud kan pil kin rong ni arail wasahn doadoahk. Aramas akan ar kin kalapw doadoahngki lokaia suwed rahnwet kin kasalehda uwen suwedlahn sampah.

3. Dahme kitail en kanahieng en dehr wia, oh dahme kitail pahn koasoiapene nan iren onop wet?

³ Ma kitail sohte kanahieng, kitail kakete ahnla rong lokaia  suwed oh tepida doadoahngki. Nin duwen Kristian kei, kitail men kaperenda Siohwa, eri kitail sohte men doadoahngki lokaia suwed. Kitail men doadoahngki kisakis en lokaia ni ahl me pwung pwehn kaperenda Koht. Nan iren onop wet, kitail pahn koasoiapene ia duwen atail kak wia met (1) nan kalohk, (2) nan mihting en mwomwohdiso kan, oh (3) ni atail koasoiong meteikan. Ahpw keieu, kitail pahn koasoiapene dahme kahrehda Siohwa kin ketin nsenohki dahme kitail kin nda.

4. Nin duwen me Malakai 3:16 mahsanih, dahme kahrehda Siohwa kin ketin nsenohki dahme kitail kin nda?

⁴ Wadek Malakai 3:16. Ke kak medewe kahrepe ehu me Siohwa ketin ntingihedi nan sapwellime “pwuhk” eden irail kan me arail lokaia kasalehda me irail kin lemmwiki ih oh doudouloale mwareo? Atail lokaia kin kasalehda dahme mi nan mohngiongitail. Sises mahsanih: “Ewen aramas kin kapwadewei audepen eh mohngiong.” (Mad. 12:34) Dahme kitail kin pilada en nda kin kasalehda ia uwen laud en atail poakohng Siohwa. Oh Siohwa ketin kupwurki irail kan me poakohng ih en ahneki mour nsenamwahu kohkohlahte nan sampah kapwo.

5. (a) Ia duwen atail kaudok eh kin pidada dahme kitail kin nda? (b) Nin duwen me kilelo kasalehda, dahme kitail anahne kanahieng ni atail kin lokaia?

⁵ Mwomwen atail koasoi kak kahrehiong Siohwa en ketin koasoanehdi ma e pahn ketin kupwurki atail kaudok. (Seims 1:26) Ekei me sohte kin poakohng Koht kin koasoi ni lemei, soh kadek, oh pohnmwahso. (2 Tim. 3:1-5) Kitail sohte men duwehte irail. Kitail kin men kaperenda Siohwa ni atail koasoi. Ahpw ia duwe, Siohwa kak ketin kupwurperenkin kitail ni atail doadoahngki lokaia kadek nan mihting en Kristian kan de nan kalohk ahpw lokaia lemei ong atail peneinei ni meteikan ar sohte kak kilang de rong kitail?​—1 Pit. 3:7.

6. Soahng mwahu dah kan me wiawi pwehki Kimberly kin lokaia mwahu ong aramas?

⁶ Ni atail kin doadoahngki mwahu atail kisakis en lokaia, kitail kin kasalehiong meteikan me kitail kin papah Siohwa. Kitail kin sewese  aramas akan en kilang ‘wekpeseng en aramas me kin papah Koht oh me sohte kin papah ih.’ (Mal. 3:18) Ih met me wiawihong sister men me adaneki Kimberly. * Ih oh ienge tohnsukuhlo anahne wia mehkot ong ara sukuhlo. Mwurin ara doadoahkpene, tohnsukuhlo kilang me Kimberly weksang tohnsukuhl teikan. E sohte kin kauwe aramas, e kin lokaia kadek, oh sohte kin doadoahngki lokaia suwed de peined. Iengen Kimberly tohnsukuhlo pwuriamweikihla met oh mwuhr tepida onop Paipel. Ia uwen Siohwa eh kin ketin kupwurperenkihda ni atail kin koasoi ni ahl ehu me kahrehiong meteikan en men sukuhlki duwen ih.

7. Dahme ke men wiahiong kisakis en lokaia me Koht ketikihong uhk?

⁷ Kitail koaros men lokaia ni ahl ehu me pahn kawauwihala Siohwa oh kakerenihkitailla rehn riatail Kristian kan. Eri met, kitail pahn koasoiapene ekei ahl mwahu kan me kitail kak pousehlahte wia “mehn kahlemeng ehu . . . ni lokaia.”

8. Mehn kahlemeng dah me Sises ketikihda duwen en koasoiong aramas akan nan kalohk?

⁸ Lokaia kadek oh wahu ni emen akamaiong uhk. Ni ahnsou me Sises ketiket nin sampah, aramas akan kin nda me e kin kamamsakau, ewen mwenge, doadoahk ong Tepilo, sohte kin wia Sapad, oh sohte kin wauneki Koht. (Mad. 11:19; 26:65; Luk 11:15; Sohn 9:16) Ahpw, Sises sohte ketin engiengda ni eh sapeng irail. Duwehte Sises, kitail en dehr akamaiong aramas akan ma irail akamaiong kitail. (1 Pit. 2:21-23) Ei mehlel, e sohte mengei en wia met. (Seims 3:2) Dahme kak sawas?

9. Dahme kak sewese kitail en kanahieng atail koasoi ni atail kalohk?

⁹ Ni emen eh akamaiong uhk nan kalohk, song en dehr lingeringerki. Brother men me adaneki Sam koasoia, “I kin song medewe ia uwen aramaso eh anahne esehla padahk mehlel oh I anahne tamataman me e kak wekila.” Ekei pak tohnihmwo kin lingeringerda pwehki kitail kohla ni ahnsou me sohte mwahu ong ih. Ma kitail koasoiong emen me lingeringer, kitail kak wia dahme emen sister me adaneki Lucia wia. Kitail kak kapakap ni mwotomwot, peki Siohwa en ketin sewese kitail en meleilei oh dehr nda mehkot me sohte kadek de sohte wahu.

10. Nin duwen me 1 Timoty 4:13 mahsanih, mehn akadei dah me kitail en ahneki?

¹⁰ Wiahla sounpadahk koahiek. Timoty wia sounkalohk koahiek men, ahpw e pil anahne kamwahwihala eh padahk kan. (Wadek 1 Timoty 4:13.) Ia duwen atail kak kamwahwihala atail padahk nan kalohk? Kitail anahne  kaunopada mwahu. Mie neitail sawasepen Paipel tohto me kak sewese kitail en wiahla sounpadahk mwahu kei. Ke kak diarada iren sawas kan nan kisin pwuhko Nantihong Omw Pwukoahn Wadawad oh Padahk oh “Kamwahwihala Omw Koahiek nan Kalohk” nan Atail Mour en Kristian oh Kalohk​—Doaropwehn Kasukuhl ong Mihting. Ke kin doadoahngki mehn sawas pwukat? Ni atail kin kaunopada mwahu, kitail kin koasoi ni eimah oh sohla kin nohn saloh.

11. Ia duwen ekei Kristian kan kin kamwahwihala arail padahk?

¹¹ Kitail pil kak kamwahwihala atail padahk sang ni atail kilang oh sukuhlsang meteikan nan mwomwohdiso. Sam, me kitail koasoiapene mwoweo, kin pein idek reh dahme kahrehda ekei rie Kristian kan wia sounpadahk koahiek kei. E kin rong kanahieng mwomwen arail kin kalohk oh song alasang irail. Sister men me adaneki Talia kin rong kanahieng brother koahiek kan ar kin wia kapahrek en wehipokon. Ni eh wia met, e kin sukuhlki ia duwen eh pahn koasoia ire kan me aramas kin kalapw idek nan kalohk.

12. Dahme kin apwal ong ekei?

¹² Kitail koaros kak iang koul oh pasapeng nan mihting en mwomwohdiso. (Mel. 22:22) Ekei kin apwalki iang koul de pasapeng nan mihting kan. Ke kin apwalki wia met? Ma ei, ke pahn perenki ese dahme kin sewese meteikan en powehdi kahpwal wet.

13. Dahme kak seweseiuk en koul sang nan omw mohngiong nan mihting kan?

¹³ Koul sang nan mohngiong. Kahrepe keieu kesempwal me kitail kin koul nan atail mihting kan iei pwehn kapinga Siohwa. Sister men me adaneki Sara, sohte medewe me e uhdahn mai en koul. Ahpw, e men koul oh kapinga Siohwa. Eri ni eh kin kaunopada ong mihting kan, e pil kin kaunopada koul kan. E kin praktiski koul ko oh kilang ia duwen lokaia ko ar pahrekiong padahk en mihtingo. E koasoia: “Ni ei kin medemedewe duwen lokaia ko, I sohte kin nohn pwunodki ma I ngilamwahu de soh.”

14. Ma ke kin namenek, dahme kak seweseiuk en wia pasapeng nan mihting kan?

¹⁴ Kalapw pasapeng. Met kin uhdahn apwal ong ekei. Talia me kitail koasoiapene mwoweo koasoia: “I kin uhdahn salohda ni ei kin anahne koasoi mwohn aramas, eri I uhdahn kin apwalki pasapeng.” Ahpw met sohte kauhdi Talia en iang pasapeng. Ni eh kaunopada ong mihting kan, e kin tamataman me keieun pasapengo anahne mwotomwot oh uhdahn sapengala peideko. E koasoia: “Met wehwehki me e mwahu ma ei pasapengo mwotomwot, mengei, oh kasalehda mouren  parakrapo pwehki ih soangen pasapengo me brother me wia Kahn Iroiro mwahuki.”

15. Dahme kitail anahne tamataman duwen atail pasapeng kan?

¹⁵ Pil Kristian kan me sohte kin namenek kin ekei pak pweiek en pasapeng. Dahme kahrehda? Sister men me adaneki Juliet koasoia, “Ekei pak I kin pweiek en pasapeng pwehki I perki me ei pasapengo nohn mengei oh sohte nohn mwahu.” Ahpw, tamataman me Siohwa ketin kupwurki ken wia pasapeng ni uwen omw kak. * E kin uhdahn ketin kupwurperenkihda ni atail kin wia uwen atail kak en iang pasapeng nan mihting kan mehnda ma ekei pak kitail kin saloh.

16. Soangen lokaia dah me kitail en dehr doadoahngki?

¹⁶ Dehr doadoahngki “lokaia kamedek.” (Ep. 4:31) Nin duwen me kitail koasoiapene mwoweo, Kristian kan en dehr doadoahngki lokaia suwed. Ahpw mie soangen lokaia me kitail sohte kin nohn wiahki me e suwed me kitail en kanahieng en dehr doadoahngki. Karasepe, kitail anahne kanahieng en dehr nda soahng suwed kan duwen aramas akan me arail tiahk, keinek, oh wehi weksang atail. Pil ehu, kitail sohte men kamedekihala meteikan sang ni atail koasoi kan. Emen brother koasoia: “I kin nda soahng kan me I medewe me kemenkouruhr oh sohte kamedek, ahpw uhdahno met sohte kadek oh kin kamedekihala meteikan. Erein sounpar tohto, ei pwoudo uhdahn sewese ie laud ni eh ndaiong ie ni at kelehpwla me ekei soahng kan me I kin nda kin mwomwawas oh kin kamedekihala ih oh meteikan.”

17. Nin duwen me Episos 4:29 mahsanih, ia duwen atail kak kangoange meteikan?

¹⁷ Lokaia ni ahl ehu me kin kangoange meteikan. Mwadang en kapinga meteikan, ahpw dehr kauwe de kaulimki irail. (Wadek Episos 4:29.) Mie soahng tohto me mehn Israel ko anahne kalahnganki, ahpw irail kin kalapw kaulim. Ni atail kin kalapw kaulim, e kak kahrehiong meteikan en pil kaulim. Tamanda ripoht suwed me lipoahrok ehk ko wiahda me kahrehda mehn Israel ko koaros en “lipahnedihada Moses.” (Nemp. 13:31–14:4) Ahpw ni atail kin kapinga meteikan, e kak sewese koaros en peren. Kitail kak uhdahn kamehlele me nein Sepda serepeino uhdahn alehdi kangoang laud pwehn wia eh pwukoa, pwehki peinakapw en Israel ko kin kohla oh “kapinga ih.” (Sounkopwung 11:40, NW) Sara me kitail koasoiapene mwoweo koasoia, “Ni atail kin kapinga meteikan, kitail kin kahrehiong irail en pehm me Siohwa ketin poakohng irail oh me meteikan nan mwomwohdiso pil poakohng  irail.” Eri rapahki ahl kan pwehn kapinga riomw Kristian kan.

18. Nin duwen me Melkahka 15:1, 2 mahsanih, dahme kahrehda kitail en lokaia mehlel, oh dahme met kin pidada?

¹⁸ Lokaia mehlel. Kitail sohte kak kaperenda Siohwa ma kitail kin likamw. E kin ketin kalahdeki soangen likamw koaros. (Lep. Pad. 6:16, 17) Mendahki aramas tohto rahnwet kin medewe me likamw sohte uhdahn sapwung, kitail en dehr wia met pwehki Siohwa ketin mahsanih me e sapwung. (Wadek Melkahka 15:1, 2.) Ei mehlel, kitail en dehr kin likamw, ahpw kitail en pil kanahieng en dehr nda soahng kan me pahn kahrehiong meteikan en ahneki madamadau sapwung.

19. Dahme kitail en pil kanahieng en dehr wia?

¹⁹ Dehr lipahned. (Lep. Pad. 25:23; 2 Des. 3:11) Juliet, me kitail koasoiapene mwoweo, koasoia dahme lipahned wiahiong ih. E nda: “Ei rongorong lipahned kin kamworusihehla, oh met kin kahrehiong ie en sohla likih aramas me liplipahnedo. Met pwehki I sohte ese ma e pahn lipahnedeie rehn emen tohrohr.” Ma ke kilang emen tepida lipahned, koasoia soahng kan me kangoang.​—Kol. 4:6.

20. Dahme ke koasoanehdi teng en wiahiong omw kin lokaia?

²⁰ Pwehki kitail mi nan sampah ehu me aramas tohto kin doadoahngki lokaia suwed, kitail anahne tehk mwahu me atail lokaia kin kaperenda Siohwa. Tamataman me lokaia wia kisakis ehu sang rehn Siohwa, oh e ketin nsenohki ia duwen atail kin doadoahngki. E pahn ketin kapaia kitail ni atail kin song en koasoi ni ahl ehu me pahn wahdo kaping ong ih nan kalohk, mihting, oh ni atail kin koasoiong meteikan. Ni ahnsou me Siohwa pahn ketin kasohrehla sampah suwed wet, e pahn mengei ong kitail en kawauwih Siohwa ni atail lokaia. (Sud 15) Ni ahnsou wet, kitail en koasoanehdi teng en kaperenda Siohwa sang ni “[atail] pato” kan.​—Mel. 19:14.