1. ¿Imajtintaj parlayta atinchej?

 JEHOVAQA parlayta atinapaj jina ruwawarqanchej. Chayrayku ñaupa tatanchej Adanpis, ruwasqa kasqantawan Tatan Jehovawan parlayta aterqa. Chantapis payqa mosoj palabrasta rikhurichiyta atillarqataj. Ajinamanta tukuynin animalesman sutista churananta Jehová kamachisqanta juntʼarqa (Gén. 2:19). Maytatajchá kusikorqa warmin Evawan primera vez parlarispa (Gén. 2:22, 23).

2. ¿Imaynapitaj yachanchej unaymantapacha mana allintachu parlakusqanta?

² Pisi tiemponmanqa Evaman Satanás llulla imasta nerqa. Chayrayku runasqa juchallikunchej, pantaj runastaj kanchej (Gén. 3:1-4). Adanqa Evata, Jehovata ima juchacharqa pay pantaykuspapis. Ajinamanta mana allintachu parlarqa (Gén. 3:12). Caintaj hermanon Abelta wañuchiytawan Jehovaman llullaykukorqa (Gén. 4:9). Aswan qhepamantaj Lamecpis nerqa, tiemponmanta runas ancha sajras kasqankuta. Payqa Cainpa mirayninmanta karqa (Gén. 4:23, 24). Kay tiempopipis runasqa ajinallatataj parlanku. Politicosqa runaspa ñaupaqenpi millay imasta parlayta mana pʼenqakunkuchu. Chantapis casi tukuy peliculaspi millay palabrasta uyarikun. Chay jina palabrasllatataj wawaspis escuelankupi uyarinku, kuraj runastaj trabajonkupi. Runas millay palabrasta parlasqankoqa sutʼita rikuchin kay mundo mana allinman tukushasqanta.

3. ¿Imataj kanman parlasqanchejta mana allinta qhawarikojtinchej, chanta imastataj kay yachaqanapi yachakusun?

³ Ichapis yachaykukusunman millay palabrasta uyariyman. Mana sumajta qhawarikuspataj ichá noqanchejpis kikinta parlayta  qallarisunman. Cristianosqa Jehovata kusichiyta munasqanchejrayku ni imarayku millay palabrasta parlanchejchu. Astawanpis kallpachakunchej allinta parlasqanchejwan Jehovata jatunchanapaj. Kay yachaqanapeqa yachakusun imaynatachus parlasqanchejwan Jehovata kusichinata predicaspa, reunionesman rispa, wajkunawan parlaspa ima. Jinapis ñaupajtaqa yachakusun Jehová sumajta uyarishasqanta imaynatachus parlasqanchejta.

4. Malaquías 3:16 nisqanman jina, ¿imaraykutaj ninchej Jehová parlasqanchejta sumajta uyarisqanta?

⁴ (Malaquías 3:16 leey). Ashkhasqa parlasqankuwan rikuchinku Jehovata manchachikusqankuta, sutinpitaj tʼukurisqankuta. Jehovataj uj libropi qhelqan paykunaj sutisninkuta. ¿Imajtintaj Jehová chayta ruwan? Imajtinchus parlasqanchejqa sutʼita rikuchin imayna runachus kasqanchejta. Jesús nerqa: “Sonqopi imachus juntʼa kashan, chaymanta simeqa parlan”, nispa (Mat. 12:34). Chayrayku imaynatachus parlasqanchejqa, sutʼita rikuchin maytapuni Jehovata munakusqanchejta. Jehovataj munan payta munakojkuna, wiñaypaj mosoj jallpʼapi kausakunankuta.

5. 1) ¿Imajtintaj Jehová parlasqanchejta sumajta uyarin? 2) Fotospi rikusqanchejman jina, ¿imajtintaj parlasqanchejta allinta qhawarikunanchej tiyan?

⁵ Jehovaqa imatachus parlasqanchejta sumajta uyarin. Imajtinchus chayman jina yupaychasqanchejta allinpaj qhawan chayrí mana (Sant. 1:26). Jehovata mana munakoj runasqa parlanku sajrata, sonqota nanachinapaj jina, jatunchakunankupaj jinataj (2 Tim. 3:1-5). Noqanchejqa ni imarayku paykuna jina kayta munanchejchu. Astawanpis parlasqanchejwan Jehovata kusichiyta munanchej. Ichapis uj hermanoqa reunionespi, predicacionpipis kʼachamanta parlanman. Jinapis familianwanqa sonqota nanachinapaj jina, nitaj munakuywanchu parlanman. Chayta ruwajtin, ¿Jehová Dios payta allinpajchu qhawanman? (1 Ped. 3:7).

6. Kimberly allinta parlasqanrayku, ¿imatataj compañeran ruwarqa?

⁶ Allintapuni parlasun chayqa, wajkuna sutʼita reparanqanku “pichus Diosta sirvisqanta,  pitajchus mana sirvisqantapis” (Mal. 3:18). Arí, runasqa parlasqanchejpi sutʼita reparanqanku Jehovata sirvisqanchejta. Hermana Kimberlymanta parlarina. b Uj pacha paywan compañeranwanqa khuska tareankuta ruwarqanku. Compañerantaj repararqa Kimberlyqa, mana wakin compañerasnin jinachu kasqanta. Payqa wajkunamanta allin kajtapuni parlaj, mana wasankumanta rimakojchu, nitaj millay palabrastapis parlajchu. Compañeranqa imajtinchus Kimberly ajina kasqanta yachayta munarqa, tiemponmantaj Bibliata estudiayta qallarerqa. Jehovaqa maytapuni kusikun allinta parlasqanchejrayku runas paymanta yachakuyta munajtinku.

7. ¿Imatataj parlasqanchejwan ruwayta munanchej?

⁷ Tukuy munanchej parlasqanchejwan Jehovata jatunchayta. Munallanchejtaj parlasqanchejqa hermanoswan amigos kanapaj yanapanawanchejta. Chayrayku kay yachaqanapi qhawarisun, parlasqanchejwan wajkunata yachachinallapajpuni imaschus yanapanawanchejta.

8. ¿Imatataj Jesús jina ruwasunman predicacionpi kashaspa?

⁸ Wajkuna mana allin imasta niwajtinchejpis paykunawan kʼachas kana, respetanataj. Jesustaqa kay jallpʼapi kashajtin qhasimanta juchacharqanku: “Kay runaqa anchata mikhun, vinomanta wañusqataj”, nispa. Chantá paymanta nillarqankutaj Satanaspa atiyninwan imatapis ruwasqanta, samarikuna pʼunchayta mana respetasqanta, Diospa contrantataj parlasqanta (Mat. 11:19; 26:65; Luc. 11:15; Juan 9:16). Chaywanpis Jesusqa ni jaykʼaj sajrallawantaj kutichikorqachu. Noqanchejpis Jesús jina kana wajkuna sonqonchejta nanachinawanchejpaj jina parlawajtinchej, amataj sajrallawantaj kutichikunachu (1 Ped. 2:21-23). Jinapis wakin kutisqa, runas mana allinta parlawajtinchej mana kʼachas kayta atillanchejchu (Sant. 3:2). Chanta, ¿imataj yanapawasunman kʼachas kanapaj?

9. Wasiyojta phiñasqata taripaspa, ¿imataj yanapawasunman mana noqanchejpis phiñakunallapajtaj?

⁹ Predicacionpi pillapis kʼamirpawajtinchejqa ama phiñakunachu. Hermano Samuel nin: “Wasiyoj phiñakojtenqa, piensarini Bibliamanta yachakuytapuni necesitasqanpi, cambiaytataj atisqanpi”, nispa. Chantapis ichá wasiyojqa phiñakunman, waj imasta ruwashajtinpuni chayasqanchejrayku. Hermana Luciaqa wasiyojta phiñasqata taripaspa, sonqollanpi Jehovamanta mañakun sonqo tiyasqa kananpaj, respetowantaj parlananpaj yanapananta. Noqanchejpis wasiyojta phiñasqata taripaspaqa hermana Lucía jina ruwasunman. 

10. Kay 1 Timoteo 4:13 nisqanman jina, ¿imapajtaj kallpachakullaytapuni munanchej?

 ¹⁰ Sumaj yachachejkuna kanapaj kallpachakuna. Timoteoqa predicananpaj sumaj experienciayoj kaspapis, sumaj yachachej kananpaj kallpachakunallanpuni karqa (1 Timoteo 4:13 leey). ¿Imatá ruwasunman aswan sumaj yachachejkuna kanapaj? Sumajta wakichikunanchej tiyan. Chaypajtaj kapuwanchej sumaj yanapas. Ujqa kashan Leellaypuni, yachachillaypunitaj nisqa folleto. Ujnintaj Cristiano Kausayninchej tantakuypaj folletomanta “Sumajta yachachinachej” nisqa parte. Chaykunawan yanapachikuna. Sumajta wakichikuspaqa mana manchachikuspa, nitaj iskayrayaspa parlasunchej.

11. ¿Imatataj wakin hermanos ruwanku sumaj yachachejkuna kanankupaj?

¹¹ Sumaj yachachejkuna kallasunmantaj congregacionmanta hermanos imaynatachus yachachisqankuta qhawaspa. Chantá paykuna jina ruwaspa. Hermano Samuelmantaqa párrafo nuevepi parlarerqanchej. Payqa sumajta qhawan wakin hermanos sumaj yachachejkuna kanankupaj imastachus ruwasqankuta. Chaypajtaj imaynatachus yachachisqankuta sumajta uyarin, chantá paykuna jina yachachinanpaj kallpachakun. Hermana Taliaqa sumajta uyarin hermanos imaynatachus discursosninkupi sutʼinchasqankuta. Chantá paypis ajinallatataj predicacionpi runas imata tapojtinkupis sutʼincharin, tʼukurichintaj.

12. ¿Imastataj wakin hermanos reunionespi ruwayta manchachikunku?

¹² Reunionespeqa tukuy atinchej takiriyta, comentaytapis (Sal. 22:22). Wakin hermanosqa reunionespi takiriyta, comentayta ima manchachikunku. Ichá noqanchejpis manchachikullanchejtaj. Chayrayku qhawarina imachus wakin hermanosta yanapasqanta mana manchachikunankupaj.

13. ¿Imataj yanapawasunman reunionespi tukuy sonqo takirinapaj?

¹³ Tukuy sonqo takirina. Reunionespeqa Jehovata jatunchananchejpaj takinchej. Hermana Saramanta parlarina. Payqa yuyan mana sumajta takisqanta. Jinapis takispa Jehovata jatunchayta munan. Chayrayku reunionespaj wakichikushaspaqa, takiykunatapis wakichikullantaj. Payqa takiykunata ensayan, sumajtataj letranta kikincharin imatachus reunionespi parlakunanwan. Pay nin: “Ajinata wakichikusqayqa yanapawan imamantachus chay takiy parlashasqanpi piensarinaypaj, nitaj imaynatachus takisqaypichu”, nispa.

14. Reunionespi comentayta manchachikunchej chay, ¿imataj yanapawasunman mana manchachikunapaj?

¹⁴ Reunionespi comentanapuni. Ashkha hermanosqa mayta manchachikunku comentayta. Hermana Taliamanta párrafo oncepi parlarerqanchej. Pay nin: “Runa chaupipi parlaspaqa  maytapuni kharkatini, parlasqaypi mana reparakojtinpis. Chayrayku comentaytaqa mana atillanichu”, nispa. Jinapis hermana Taliaqa comentallanpuni. Payqa yachan ñaupaj kaj kuticheyqa sutʼi, pisi parlayllapitaj kananta. Chayman jinataj reunionespaj wakichikun. Pay nin: “Comentasqay sutʼi, pisi parlayllapi, entiendenapaj jinallataj kananqa allinpuni. Imajtinchus tapumoj hermanoqa ajinata comentananchejtapuni suyan”, nispa.

15. ¿Imatataj Jehová munan?

¹⁵ Wakin hermanosqa parlayta mana manchachikuspapis, comentayta manchachikunku. ¿Imajtin? Hermana Julieta nin: “Wakin kutisqa manchachikuni comentayta, imajtinchus yuyani mana allintachu comentasqayta”, nispa. Jehovataj munan comentanapaj tukuy atisqanchejta kallpachakunanchejta. c Jehovaqa may allinpaj qhawan comentanapaj kallpachakusqanchejta wakin kutis manchachikojtinchejpis.

16. ¿Imaynatataj manapuni parlananchejchu tiyan?

¹⁶ Amapuni “sonqota nanachinapaj jina” parlanachu (Efe. 4:31). Kaykama yachakunchej cristianosqa manapuni millay palabrasta parlananchejchu kasqanta. Jinapis ichá mana reparakuspalla wajkunaj sonqonkuta nanachinapaj jina parlasunman. Chayrayku allinta qhawarikuna. Ama sajrata parlanachu waj culturayojkunamanta, waj ayllumanta kajkunamanta chayrí waj nacionesmanta kajkunamanta. Nillataj munanchejchu parlasqanchejwan wajkunata phiñachiyta, sonqonkutataj nanachiyta. Uj hermano nin: “Wakin kutisqa yuyaj kani parlasqay allillan kasqanta, chistakunallapajtaj kasqanta. Jinapis ajinata parlasqayqa wajkunaj sonqonkuta nanarpacherqa. Watas pasasqanman jinataj señorayqa mayta yanapawarqa manaña ajinata parlanaypaj. Payqa sapallaypi niwaj maykʼajchus mana allinta parlasqaywan paypa sonqonta chayrí wajkunaj sonqonkuta nanachisqayta”, nispa.

17. Efesios 4:29 nisqanman jina, ¿imaynatataj parlananchej tiyan?

¹⁷ Wajkunata kallpachanapaj jinapuni parlana. Thutunamanta, wajkunapaj sajrata parlanamantaqa allinta ruwasqankuta nina (Efesios 4:29 leey). Israelitasqa thutullajpuni kanku, ashkha imasmanta agradecekunankumanta nisqaqa. Yachanchej jina uj runa thutuyta qallarejtenqa, wajkunapis thutullankutaj. Israelitasqa chunka wateqajkuna mana allin willayta willasqankurayku ‘Moisespa contranta thutuyta qallarerqanku’ (Núm. 13:31–14:4). Wajkunata “allinta ruwanki” nejtinchejqa  paykuna kusikunku. Jeftej warmi wawanpi piensarina. Paytaqa amigasnin sumajta ruwashasqanta nej kanku, kallpacharejtaj kanku. Chaytaj maytachá yanaparqa Jehovata sirvinallanpajpuni (Jue. 11:40). Hermana Saramantaqa 13 parrafopi parlarerqanchej. Pay nin: “Wajkunata allinta ruwashasqankuta nejtinchejqa reparanku Jehová paykunata munakusqanta, llajtanpipis munasqa kasqankuta”, nispa. Chayrayku mayta kallpachakuna, hermanos imatapis sumajta ruwajtinkoqa “allinta ruwanki” ninapaj.

18. Salmo 15:1, 2 versiculospi nisqanman jina, ¿imajtintaj ni uj chhikitallantapis llullakunachu tiyan?

¹⁸ Cheqa kajtapuni parlana. Mana ajinata parlasunman chayqa, Jehová mana allinpajchu qhawawasunman. Imajtinchus payqa chejnikun tukuy laya llullakuyta (Pro. 6:16, 17). Runas llullakuyta allillanpaj qhawajtinkupis, noqanchejqa Jehová jina yuyayta munanchej (Salmo 15:1, 2 leey). Chayrayku ni uj chhikitallantapis llullakunchejchu, nillataj imatapis pakanchejchu wajkuna allillan kasqanta yuyanankupaj.

19. ¿Imamantataj qhawarikunallanchejtaj tiyan?

¹⁹ Ama cuento qʼepis kanachu (Pro. 25:23; 2 Tes. 3:11). Hermana Julietamantaqa 15 parrafopi parlarerqanchej. Paytaqa wajkunamanta mana allin cuentosta uyariy mayta llakichin. Hermana Julieta nin: “Pillatapis wajkunamanta mana allinta parlasqanta uyarispaqa desanimakuni, nitaj paypi confianiñachu. Noqamantapis ajinallatataj parlasqanta yuyani”, nispa. Pillawanpis parlashajtinchej cuentota rikhurichishasqanchejta reparaspaqa, waj allin imasmanta parlana (Col. 4:6).

20. ¿Imapajtaj kallpachakullaytapuni munanchej?

²⁰ Kay mundopeqa casi tukuy runas mana allin imasta parlanku. Chayrayku mayta kallpachakunanchej tiyan Jehovaj munasqanman jina parlananchejpaj. Kay yachaqanapi yachakorqanchej Jehovaqa parlayta atinapaj jina ruwawasqanchejta. Paytaj imaynatachus parlasqanchejta sumajta uyarin. Predicacionpi, reunionespi, wajkunawan parlasqanchejpi ima, tukuy atisqanchejta Jehovata jatunchanapaj kallpachakusun chayqa, payqa bendeciwasun. Manaña kay sajra mundo kajtenqa, parlasqanchejwan Jehová Diosta jatunchayta atillasun (Jud. 15). Chaykamataj Jehovata parlasqanchejwan kusichinapaj kallpachakunallapuni (Sal. 19:14).