1. ¿Ima bendiciondata Jehová Diosca carashca?

 JEHOVÁ DIOSCA juyaimandami gentecunamanga parlana bendicionda carashca. Chaimandami Adán runagupash Jehová Dioshuanga parlai usharca. Ashtahuangarin Adanga paillata shuj shuj shimicunata churashpami ashtahuan parlashpa catirca. Shinami animalgucunatapash shutita churaita usharca (Gén. 2:19). Shinallata Adanga por primera vez paipa huarmigu Evahuan parlashpaca ninandami cushijushcanga (Gén. 2:22, 23).

2. Gentecunaca ¿imashata parlana bendiciondaca utilizanajushca?

² Parlana bendiciondaca gentecunaca na aliguta utilizarcachu. Satanás Diablo, Evahuan parlashpa llullacunata nishcamandami gentecunaca cunanbica tucuicuna juchayucuna capanchi (Gén. 3:1-4). Adán runaca pai pandarishcata na aceptashpami, paipa huarmi Evatara y Jehová Diostara culparca. Shinami paica parlana bendiciondaca na ali utilizarca (Gén. 3:12). Cainbashmi paipa huauqui Abelta huañuchishca jipaca, Jehová Diosta llullashpa parlarca (Gén. 4:9). Shinallata ashtaca tiempo jipaca, Caín runapa familiamanda Lamec shuti runapash nali ruraicunata alitashna nishpa escribishpami chai tiempopi ashtaca nali ruraicunata paipash catijushcata ricuchirca (Gén. 4:23, TNM, 24). Cunanbipash politicocunaca shina cuendallatami gentecunapa ñaupapipash na pinganayachishpa, shimi cacharishcata mala palabracunataca parlanllami. Peliculacunapipashmi shinallata nali shimicunaca uyarin. Cunanbica escuelacunapi, colegiocunapi, trabajopipashmi gentecuna mala palabracunatalla nishpa rimajta uyarin. Shinata ricushpami, cai mundo ashtahuan peor tucujujta ricupanchi.

3. Si na cuidadota charinchica ¿imata ñucanchihuanga pasaita ushan? Cai temapica ¿imatata yachajupashun?

³ Cunanbi gentecuna casi siempre mala palabracunata parlanajujta uyaimandami, chaicunapi na cuidadota charishpaca talvez  ñucanchicunapash paicunashna parlai callarinchiman. Jehová Diospa ñaupajpi ali ricuringapami munapanchi. Chaimandami mala palabracunataca na utilizana capanchi. Más bien ali shimicunata parlashpa, Jehová Diosta alabangapami munapanchi. Cai temapimi predicajushpa, tandanajuipi cashpa, shujcunahuan parlajushpa imashna parlana cashcata yachajugripanchi. Pero primeroca ñucanchipa parlocuna imashpa Jehová Diospa ñaupajpi importante cashcatami ricugripanchi.

4. Malaquías 3:16​pi shimicunaca ¿imatata Jehová Diosmandaca ricuchin?

⁴ (Malaquías 3:16​ta liipangui). Jehová Diosca ñucanchipa parlocunataca tucuitami uyajun. Chaimandami Jehová Diosca paita respetashpa, cazushpa parlashca gentecunapa shutitaca yaipi charin. Ñucanchipa parlocunaca imata ñucanchi shungupi charishcatami ricuchin. Chaimandami Jesusca, “gentecunaca shungupi imata charishcatami parlan” nishpa yachachirca (Mat. 12:34). Shinaca ñucanchi rimashca shimicunaca, Jehová Diosta juyashcata o na juyashcatami ricuchin. Jehová Diosca paita tucui shungu juyajcunataca para siempre shuj paraíso alpagupi causachunmi munan.

5. a) Ñucanchipa adoracionda Jehová Dios chasquichunga ¿ñucanchi parlocunaca imashinata cana can? b) Cai fotocunapi ricushca shinaca, Jehová Dios ñucanchicunata ali ricuchunga ¿imacunatata na rurana capanchi?

⁵ Ñucanchipa adoracionda chasquingapaca Jehová Diosca ñucanchipa parlocuna imashna cashcatami ricun (Sant. 1:26). Jehová Diosta na sirvij gentecunaca huaquinbica shimi cacharishcata parlanllami. Huaquingunacarin cridoyashca, millai millaicunami can (2 Tim. 3:1-5). Ñucanchica chai gentecunashnaca na cangapaj munapanchichu. Ashtahuangarin ali shimicunahuan parlashpa Jehová Diospa ñaupapi ali ricuringapami munapanchi. Shinaca predicacionbi o reuniongunapi cashpa gentecunata juyaihuan ali tratashpapash, pero huasipi familiataca nali shimicunahuan tratajpica ¿Jehová Diosca imashinashi ricunga? (1 Ped. 3:7).

6. Kimberly panigu ali shimicunahuan parlana costumbreta charishcamandaca ¿imata pasarca?

⁶ Si ñucanchi ali shimicunahuan parlana costumbreta charinchica gentecunaca Taita Diosta  sirvijcunaca diferente cashcatami cuenta japinga (Mal. 3:18). Shinami Jehová Diosta sirvijushcata ricuchipashun. Kimberly b shuti paniguhuan ima pasashcata ricupashunchi. Shuj viajeca, Kimberly paniguca paipa compañerahuanmi shuj trabajota rurana carca. Chaimi Kimberly panigu shujcunata juyaihuan tratashcata, shinallata nali shimicunata na parlan cashcata paipa compañera ricushpa, paipash Bibliamanda yachajungapaj munarca. Ñucanchi ali shimicunahuan parlajta ricushpa shuj gentecunapash Jehová Diosmanda yachajungapaj munajpica Jehová Diosca ninandami cushijun.

7. ¿Imatata cada uno rurangapaj munapanchi?

⁷ Tucuicunallatami ñucanchipa ali parlashcacunahuan Jehová Diosta sirvijcuna cashcata ricuchingapaj, shinallata huauquipanicunahuanbash ali amigo tucuita ushangapaj munapanchi. Shinaca ñucanchi parlashca shimicunahuan alipacha ejemplo cangapaj huaquin consejocunata ricupashunchi.

8. Predicacionbi cashpaca ¿imashinata Jesuspa ejemplota cati ushapanchi?

⁸ Nali tratajpipash siempremi respetohuan, ali tratana capanchi. Jesús cai alpapi cajpica gentecunaca Jesustaca, “paica ushashcatami micun, vinotapash yapatami ufian” nishpami riman carca. Shinallata Jesustaca Diablota sirvishpami causan nishpa, sábado punllatapash, Taita Diostapash na respetanllu nishpami riman carca (Mat. 11:19; 26:65; Luc. 11:15; Juan 9:16). Gentecuna Jesusta shina tratajpipash Jesusca nunca na shinallata tigrachircachu. Shinaca pipash ñucanchita nali, shinlli rimajpipash Jesushnallatami ñucanchipash na shinallata tigrachishpa ali portarina capanchi (1 Ped. 2:21-23). Shinapash huaquinbi ñucanchita shina tratajpi controlarinaca na facilchu can (Sant. 3:2). Pero controlari ushachunga ¿imata ñucanchita ayudaita ushanga?

9. Predicacionbi cashpaca ¿imashinata ñucanchi parlashcacunapi cuidadota charishcata ricuchipanchi?

⁹ Predicacionbi pipash ñucanchita nali tratajpica na chaipillaca pensarijunachu capanchi. Sam shuti huauquiguca: “Gentecuna nali tratajpica, paicunaca Taita Diosmanda yachajunatami minishtin. Paicunaca cambiai ushangami yashpami pensarini” ninmi. Talvez huaquinbica imamandapash culirashca caj horasmi chayajuringa. Chaimandami huaquinbica culira sintiringa. Pipash ñucanchita culiralla chasquijpica, panigu Luciashnami rurana capanchi. Paica pacienciata charishpa, chai personata respetohuan, juyaihuan tratangapaj Jehová Diosta ayudahuai nishpami chai rato mañan.

10. 1 Timoteo 4:13​pi nishcashnaca ¿imata rurangapata esforzarina capanchi?

¹⁰ Ali yachachingapami esforzarina capanchi. Timoteoca predicangapaca ashtaca experienciatami charirca. Shinapash ashtahuan ali yachachingapami  mejorashpa catina carca (1 Timoteo 4:13​ta liipangui). Aliguta yachachingapaca ¿imatata rurana capanchi? Shujcunata aliguta yachachingapaca ashtaca ayudacunatami charipanchi. Por ejemplo, Ashtahuan aliguta liipangui yachachipangui nishca folletota, shinallata chaupi semana reunionbi, “Ali yachachijcuna cashunchi” nishca partetapashmi charipanchi. Shinaca cai ayudacunata aliguta aprovechashpaca, na manllashpami tranquilo yachachishun.

11. Ali yachachijcuna cangapaca ¿imatata huaquin huauquipanicunaca rurashca?

¹¹ Shinallata ali yachachijcuna cangapaca, congregacionbi huauquipanicunapa ejemplotapashmi catita ushapanchi. Párrafo 9​pi parlashca Sam huauquiguca, ali yachachingapaj huauquipanicuna imacunatalla ruran cashcata ricushpami paipash chaitallata rurangapaj esforzarin. Shinallata Talía shuti paniguca, congregacionbi huauquicuna imashina yachachijta ricushpami, paipash territoriopi gentecuna ima temacunamanda parlangapaj munashcata ali ali uyashpa paicunamanga aliguta villachita ushashca.

12. Huaquin huauquipanicunapaca ¿imata ruranata shinlli ricurin?

¹² Tandanajuicunapica tucui shungu candashpa, ali prepararishca comentariocunata cushpami animachita ushapanchi (Sal. 22:22). Shinapash huaquingunapaca candana, comentanaca ashata shinllimi ricurin. Quiquinda shina pasajujpica, shuj huauquipanicuna manllaicunata ladoman saquingapaj imacunatalla rurashcata yachanami quiquindaca ayudaita ushapanga.

13. Tandanajuicunapi tucui shunguhuan candachunga ¿imata ayudaita ushan?

¹³ Tucui shunguhuanmi candana capanchi. Tandanajuipi candashpaca, ñucanchita uyachunga na candapanchichu. Más bien Jehová Diosta alabangapami candapanchi. Cunanga Sara panigupa ejemplota ricupashunchi. Paniguca na ali vozta charinichu nishpapash, Jehová Diosta cushichingapa munaimandami candan. Paniguca tandanajuicunapi comentangapaj prepararijushpaca, canticocunatapashmi repasan. Shinami paica tandanajuipi imamandapacha parlanata ricun. Paniguca, “chaita ruranami tucui shunguhuan candachun ayudahuan” ninmi.

14. Tandanajuicunapi ama manllashpa comentachunga ¿imata ayudaita ushan?

¹⁴ Tandanajuipi comentangapaj esforzaripangui. Ciertota nishpaca, tucuicunapallatami tandanajuipi comentanaca ashata difícil ricurin. Párrafo 11​pi parlashca Talía paniguca cashnami nin: “Aunque na sintichishpapash gentecunapa ñaupapi parlanaca ñucapaca shinllimi ricurin. Chaimandami tandanajuicunapi comentanaca shinllipacha cahuan” ninmi. Panigupaca comentana shinlli cajpipash, paica comentashpami catin. Tandanajuicunapa prepararijushpaca, tapuita  ricushpami ashalla shimicunapi chai tapuipa respuestata nina capanchi. Panigu Taliaca cashnami nin: “Ñucaca asha shimicunapillami comentanata yachani, porque turigucunapash shina asha tiempopi asha shimicunahuanlla comentachunmi munan” ninmi.

15. Comentajushpaca ¿imatata siempre yaipi charina capanchi?

¹⁵ Huaquinbica comentangapaj na manllaita sintij huauquicunapashmi comentanataca jarcarin. Por ejemplo Juliet paniguca: “comentanata manllaitaca na manllanichu. Más bien huaquinbica, ñucaca shujcunashnaca na aliguta comentaita ushanichu yashpami na comentangapaj munani” ninmi. Shinaca comentangapaj manllaita charishpa o na charishpapash Jehová Diosca ñucanchicuna shungumanda comentajta, comentangapaj ninanda esforzarijujta ricujushcatami yaipi charina capanchi. c

16. ¿Ima shimicunatata na parlana capanchi?

¹⁶ “Groserota rimanatapash” saquinami capanchi (Efes. 4:31). Jehová Diosta sirvijcunaca nunca na mala palabracunata nishpaca parlanachu capanchi. Shinapash huaquinbica na cuenta japijtami shujcunata ñucanchi parlashcacunahuan nali sintichita ushapanchi. Chaimi imata parlajushpapash cuidadohuan parlana capanchi. Por ejemplo, shuj costumbreta charishcamanda o shuj llacta cashcamanda nalicachishpaimanga na parlajunachu capanchi. Caimanda parlashpaca shuj huauquiguca: “Huaquinbica ñucaca ‘alitami nijuni’ yashpami imatapash parlanlla carcani. Pero jipaman cuenta japishpaca, ñuca parlashcacunaca shujcunata nali sintichin cashcatami cuenta japishcani. Ñuca huarmigupash ña ishcandilla cashpaca chashnaca na nijunachu carcangui nishpa ayudajpimi tiempohuanga asha asha mejorashpa catishcani” ninmi.

17. Efesios 4:29​pi nishcashnaca ¿imashinata shujcunata animaita ushapanchi?

¹⁷ Cushichishpa, animachij shimicunahuanmi parlana capanchi. Shujcunata criticanapa o huasha rimanapa randica paicunata felicitangapami esforzarina capanchi (Efesios 4:29​ta liipangui). Ñucanchicunaca israelitacunashnaca na cangapaj munapanchichu. Paicunaca Jehová Diosmanda tucuita charishpapash siempremi tucuimanda quejarinajurca. Paicuna shina quejarishcamandami shujcunapash quejari callarirca. Por ejemplo 10 espiacuna nali informeta cujpica, israelitacunaca Moisestami quejarinajurca (Núm. 13:31–14:4). Quejarijunapa randica felicitanaca ninandami ayudaita ushan. Por ejemplo, Jefté runagupa ushipi pensaripashunchi. Paitaca amigacuna cushichishpa animajpimi, paipash paipa asignacionbi cushilla catita usharca (Juec. 11:40). Párrafo 13​pi parlashca Sara paniguca: “Ñucanchi turiñañacunata ali shimicunahuan  parlajpica, Jehová Dios paicunata juyashcata cuenta japishpami Jehovapa organizacionbi paicuna valishca cashcata cuenta japinga” ninmi. Shinaca siempremi huauquipanicunata felicitangapaj esforzarina capanchi.

18. Salmo 15:1, 2​pi nishcashnaca ¿imamandata na llullashpa parlana capanchi?

¹⁸ Na llullashpami parlana capanchi. Jehová Diosca ñucanchicuna llullashpa parlachunga nimamanda na gushtanllu (Prov. 6:16, 17). Gentecunapaca llullashpa parlanaca normalmi can. Pero ñucanchica Jehová Diospa ejemplotami catingapaj munapanchi (Salmo 15:1, 2​ta liipangui). Shinaca nunca na llullashpaca parlajunachu capanchi. Shinallata imatapash pacashpaimanbash na parlajunachu capanchi.

19. ¿Imacunamandata cuidadota charina capanchi?

¹⁹ Chismecunataca na parlajunachu capanchi (Prov. 25:23; 2 Tes. 3:11). Párrafo 15​pi parlashca Juliet paniguca cashnami nin: “Pipash shujcunamanda chismecunata, nalicunata parlajujta uyashpaca ninandami desanimarini, ñana paihuan confianza parlaitaca ushanichu. Shujcunamanda shina parlashpaca, ñucamandapash ima horapash shinallatami parlanga yashpami pensani” ninmi. Pipash shujcunamanda chismecunata parlai callarijujpica, na chaimandallata parlashpa catinachu capanchi. Chaipa randica, uchallami shuj temacunamanda parlaita ushapanchi (Col. 4:6).

20. Quiquinga ¿imatata rurangapaj munapangui?

²⁰ Cunanbica parlana bendiciondaca gentecunaca na aliguta utilizanllu. Shinapash ñucanchicunaca Jehová Dios munashcashna aliguta parlangapami munapanchi. Predicacionbi cashpa, reunionbi cashpa, shujcunahuan parlajushpa cai parlana bendicionda aliguta utilizajpica Jehová Diosca ninandami bendicianga. Ña paraíso alpagupi causajushpami ñucanchipa parlashcacunahuan siempre Jehová Diosta alabanaca ashtahuan fácil canga (Jud. 15). Shinapash chai punlla chayamungacamanga, salmista runagushna ñucanchipash cashna nipashun: “Mandaj Dioslla […] Ñuca shimihuan nishcacunapash, […] cambaj ñaupajpica chasqui ushanalla cachun” nishpa (Sal. 19:14).