1. Кој денѓа амен и способност те кера лафи?

 И СПОСОБНОСТ те кера лафи тано поклон таро амаро Девел кова со бут мангела амен. Само со сине створимо, о прво мануш, о Адам шај сине те користинел лафија те шај те комунициринел пле небесно Дадеа. Исто аѓаар, ов шај сине те измислинел неве лафија хем аѓаар те користинел повише лафија. Ов керѓа адава кеда добинѓа и задача те чхивел анава е животненге (1. Мој. 2:19). А кобор сине бахтало кеда прво пути керѓа јавере манушеа лафи — пле шуже ромњаја, е Еваја! (1. Мој. 2:22, 23).

2. Сар о керибе лафи почминѓа те користинел пе ко погрешно начин хем сар тано авдиве?

² Ама кратко пало адава и способност те керел пе лафи почминѓа те користинел пе ко погрешно начин. О Сатана ховавѓа е Ева хем адава ховајбе керѓа о мануша те грешинен хем те овен несовршена (1. Мој. 3:1-4). О Адам користинѓа акава поклон ко погрешно начин кеда кривинѓа е Ева, па чак е Јехова башо пле лична грешке (1. Мој. 3:12). О Каин ховавѓа е Јехова откеда мударѓа пле пхрале е Авеле (1. Мој. 4:9). Пало несаво време, јекх потомцо таро Каин со викинела пе Ламех пишинѓа јекх гили коте со оправдинѓа адава со мударѓа јекхе мануше. Тари адаја гили дикхела пе кобор сине насилна о мануша ко адава време (1. Мој. 4:23, 24). А сар тане о мануша авдиве? Шај те дикха кај о политичка водачија бизи лаџ вакерена груба лафија. Исто аѓаар, ко повише филмија авдиве користинена пе безобразна лафија. О терне шунена лошна лафија ки школа хем о возрасна шунена адава ки бути. Адава со авдиве о лошно керибе лафи тано добором вообичаено сикавела само кобор е светоскере мерилија тане теле.

3. Баши која опасност ваљани те ова свесна, хем со ка дикха ки акаја статија?

³ Ако на пазинаја, шај добором те навикнина амен ко адала лошна лафија со ка почмина амен да те користина лен.  Џанѓола пе, сар христијања мангаја те кера е Јехова бахтало ама те шај те кера адава нане доволно само те на користина лошна лафија. Амен ваљани те користина и способност те кера лафи ко исправно начин, јавере лафенцар ко начин колеа со ка славина е Девле. Ки акаја статија ка дикха сар шај те кера адава: 1) ки служба, 2) ко состанокија хем 3) кеда кераја лафи е јаверенцар. Ама најангле те дикха соске е Јеховаске тано важно саве лафија користинаја.

4. Спрема Малахија 3:16, соске тано важно е Јеховаске сар кераја лафи?

⁴ Читин Малахија 3:16. Шај ли те сетине тут ки јекх причина соске о Јехова ка пишинел ко пло „лил е сетибаскоро“ о анава околенгере кола со пле лафенцар сикавена кај дарана лестар хем хор размислинена башо лескоро анав? Амаре лафија сикавена со иси амен андре ко вило. О Исус вакерѓа: „О муј вакерела адава солеа тано пхердо о вило“ (Мат. 12:34). Таро адава башо со кераја лафи дикхјола пе кобор мангаја е Јехова. А ов мангела окола со ле мангена те овен бахтале засекогаш ко нево свето.

5. а) Сар амари служба тани поврзими адалеа сар кераја лафи? б) Сар сој сикавдо ки слика, кола буќа ваљани те избегина ако мангаја те кера е Јехова бахтало амаре лафенцар?

⁵ О начин сар кераја лафи шај бут те влијајнел упро адава дали о Јехова ка прифатинел и служба со кераја леске или на (Јак. 1:26). Несаве мануша кола со на мангена е Девле керена лафи агресивно, грубо хем ко гордо начин (2. Тим. 3:1-5). Сигурно на мангаја те ова сар ленде. Амен таро вило мангаја те кера бахтало е Јехова амаре лафенцар. Ама дали о Јехова ка овел задоволно ако кераја љубезно лафи ко состанокија хем ки служба, а кераја грубо лафи амаре фамилијаја кеда о јавера на дикхена амен? (1. Пет. 3:7).

6. Со случинѓа пе адалеске со и Кимберли керѓа лафи ко јекх шукар начин?

⁶ Кеда кераја лафи ко исправно начин, амен сикаваја е јаверенге кај служинаја е Јеховаске. Аѓаар, ола шај јасно те дикхен и разлика машкар окова со служинела е Девлеске хем окова со на служинела леске (Мал. 3:18).  Ко акава уверинѓа пе јекх пхен која со викинела пе Кимберли. b Ла сине ла и задача те керел бути ко јекх проекти јекхе соученичкаја. Џикоте керена сине заедно бути, ој приметинѓа кај и Кимберли разликујнела пе сине таро јавера ученикија. На оговоринела сине е јаверен, керела сине љубезно лафи хем на користинела сине груба лафија. Адава бут позитивно влијајнѓа упри лате хем адалеске пало несаво време почминѓа те проучинел и Библија. О Јехова тано сигурно бут бахтало кеда амаро начин сар кераја лафи привлекујнела е манушен ко чачипе.

7. Сар мангеа те користине тли способност те кере лафи?

⁷ Сарине амен мангаја те кера лафи ко начин колеа со ка ана слава е Јеховаске хем со ка поможинел аменге те ова попаше амаре пхраленцар. Адалеске, те дикха некобор практична начинија кола со ка поможинен аменге те ова пример е јаверенге ко керибе лафи.

8. Сар користинѓа о Исус пли способност те керел лафи ки служба, хем со шај те сикљова таро адава?

⁸ Кер љубезно лафи хем сикав поштовање кеда о јавера провоциринена тут. Џикоте керела сине пли служба, о Исус сине погрешно обвинимо кај тано пијаница, кај тано халано, кај служинела е Бенгеске, кај на икерела пе ко сабат, хем чак кај на поштујнела е Девле (Мат. 11:19; 26:65; Лука 11:15; Јован 9:16). Сепак, о Исус на иранѓа ленге лошно лафенцар. Сар о Исус, амен да на ваљани те ирана е јаверенге лошнипаја (1. Пет. 2:21-23). Џанѓола пе адава нане локхо (Јак. 3:2). Те дикха со шај те поможинел аменге.

9. Со шај те поможинел аменге те пазина сар кераја лафи кеда сием ки служба?

⁹ Ако о мануш каске со сведочинеа керела туја грубо лафи, трудин тут те ачхове смиримо. Јекх пхрал кова со викинела пе Сем вакерела: „Трудинава ман те мислинав ко адава кобор тано важно о мануш те шунел о чачипе хем кај ов шај те менинел пе“. Понекогаш о мануш тано хољамо само адалеске со алем ко погрешно време. Кеда кераја лафи некасаја сој тано хољамо, шај те кера адава со керела јекх пхен со викинела пе Лусија. Ој кратко молинела пе е Јеховаске те поможинел лаке те на вакерел нешто со нане љубезно хем те ачховел смирими хем те сикавел поштовање.

10. Спрема 1. Тимотеј 4:13, сави цел ваљани те овел амен?

¹⁰ Ов пошукар учители. Иако сине искусно проповеднико, о Тимотеј сепак ваљани сине понадари да те овел пошукар ко пло начин сар сикавела. (Читин 1. Тимотеј 4:13.) Со шај те поможинел аменге те ова пошукар учителија ки служба? Ваљани шукар те спремина амен. Бут сием благодарна со иси амен различна алатке кола со шај  те поможинен аменге те ова пошукар учителија. Шај те аракхе корисна информацие ки брошура Ов са пошукар ко читибе хем сикајбе хем ко дело „ Де тутар са ки служба“ ко Амаро живото хем служба сар христијања — листија спремибаске. Дали трудинеа тут те користине акала публикацие? Кеда сием шукар спремиме, иси амен похари трема хем сием поувериме кеда кераја лафи.

11. Со поможинѓа несаве објавителенге те овен пошукар учителија?

¹¹ Шај исто аѓаар те ова пошукар учителија аѓаар со ка сикљова таро искусна пхраља хем пхења. О Сем, кова со сине поангле спомнимо, пучела пе сине соске несаве таро собрание тане добором шукар учителија. Ов внимателно шунела сар сикавена е јаверен хем пало адава трудинела пе те џал пало ленгоро пример. Јекх пхен која со викинела пе Талија шукар шунела сине сар о искусна пхраља икерена пле јавна говорија. Адава поможинѓа лаке те сикљол сар те керел лафи башо теме со интересинена е јаверен хем сар те поможинел ленге те авен ко исправно заклучок.

12. Со шај некаске те овел пхаро те керел?

¹² Сарине амен шај те учествујна ко амаре состанокија аѓаар со ка гиљава заедно хем ка да шукар спремиме коментарија (Пс. 22:22). Несавенге нане локхо те коментиринен или те гиљавен англо јавера. Дали туке да акава тано пхаро? Ако оја, сигурно ка овел туке корисно ако дознајнеа со поможинѓа е јаверенге те накхавен пумари дар.

13. Со шај те поможинел туке ко состанокија те гиљаве таро вило?

¹³ Гиљав таро вило. И најважно причина соске гиљаваја ко состанокија тани те фалина е Јехова. Јекх пхен која со викинела пе Сара, мислинела кај на гиљавела шукар. Ама, ој сепак мангела те фалинел е Јехова гиљаја. Адалеске, кеда спреминела пе состаноконге, исто аѓаар спреминела пе е гиленге. Ој вежбинела те гиљавел хем размислинела башо адава сар и гили тани поврзими е материјалеа со ка проучинел пе ко состанок. И Сара вакерела: „Адава поможинела манге повише те концентриринав ман ко лафија, а на ко адава сар гиљавава“.

14. Со шај те поможинел туке те коментирине ко состанокија ако сиан лаџутно?

¹⁴ Де редовно коментарија. Мора те признајна кај акава шај те овел некаске бут пхаро. И Талија, кола со спомнинѓем ла англедер вакерела: „Иси ман бари трема кеда англо јавера ваљани те керав лафи. Адалеске бут манге пхаро те коментиринав иако о јавера на приметинена адава“. Сепак, адава на чхинавела е Талија те дел коментарија.  Џикоте спреминела пе башо состанок, ој џанела кај о прво коментари башо пасус ваљани те овел кратко хем директно одговор ко пучибе. Ој вакерела: „Адава значинела кај нане погрешно ако мле коментарија тане кратка, едноставна хем истакнинена и главно мисла, соске о пхрал кова со водинела и точка очекујнела асавке одговорија“.

15. Со на ваљани те бистра кеда керела пе лафи башо амаре коментарија?

¹⁵ Чак несаве пхраља хем пхења кола со нане лаџутне понекогаш на коментиринена. Соске? Јекх пхен која со викинела пе Џулиет вакерела: „Понекогаш на коментиринава соске мислинава кај мле коментарија тане бут едноставна хем кај нане добором шукар сар е јаверенгере“. Ама ма бистре кај о Јехова мангела те да о најшукар коментарија кола со амен шај те да лен. c Ов тано бут бахтало кеда дикхела кај мангаја те славина ле ко состанокија хем кај на дозволинаја амари трема те чхинавел амен те коментирина.

16. Саве лафија на ваљани те користина?

¹⁶ Ма користин „лафија со вреџинена“ (Еф. 4:31). Сар со дикхлем поангле, о христијања никогаш на ваљани те користинен асавке лафија. Ама иси несаве лафија кола со нане добором очигледно кај вреџинена. На пример, ваљани бут те пазина ма те вакера нешто лошно баши некасте со авела тари јавер култура или нација. Исто аѓаар, никогаш на ваљани те вакера нешто колеа со ка повредина е јаверен. Јекх пхрал признајнела: „Понекогаш вакерава сине саркастична буќа соске мислинава сине кај само шалинава ман. Ама уствари адалеа поврединава сине е јаверен. Бершенцар мли ромни поможинѓа манге аѓаар со кеда сием сине коркори вакерела манге сине кеда вакерава нешто со на сине шукар, хем кеда адалеа поврединава сине лате или некас јавере“.

17. Спрема Ефешаните 4:29, сар шај те пофалина е јаверен?

¹⁷ Охрабрин е јаверен тле лафенцар. Нека овел тут навика те пофалине наместо те критикујне или те жалине тут. (Читин Ефешаните 4:29.) Иако сине лен бут причине те овен благодарна, о Израелција често жалинѓе пе. Ако стално жалинаја амен шај те кера о јавера да те жалинен пе. Ма те бистра кај адалеске со о деш шпиоња денѓе јекх негативно извештај, са о Израелција почминѓе те керен лафи против о Мојсеј (4. Мој. 13:31 —14:4). А тари јавер страна, и пофалба шај бут шукар те влијајнел упро јавера. Сигурно и пофалба со добинѓа е Јефтајескири чхај таро лакере амалинка бут охрабринѓа  ла хем сине одлучно понадари да те керел пли служба (Суд. 11:40). И Сара, кола со спомнинѓем ла англедер вакерела: „Кеда пофалинаја, поможинаја е јаверенге те хаљон кај о Јехова мангела лен хем кај тане скапоцена ки лескири организација“. Адалеске, роде прилике искрено те пофалине е пхрален хем е пхењен.

18. Спрема Псалм 15:1, 2, соске ваљани те вакера о чачипе хем сој тано вклучимо ко адава?

¹⁸ Вакер о чачипе. Нашти те угодина е Јеховаске ако на вакераја о чачипе. Ов мрзинела секова ховајба (Изр. 6:16, 17). Иако авдиве буте манушенге тано нормално те ховавен, амен ко ховајбе дикхаја сар о Јехова со дикхела. (Читин Псалм 15:1, 2.) Џанѓола пе, амен на само со на мангаја те ховава него исто аѓаар намерно на вакераја несаве информацие само те шај о јавера те авен ко погрешно заклучок.

19. Ко со јавер ваљани те пазина?

¹⁹ Ма оговорин (Изр. 25:23; 2. Сол. 3:11). И Џулиет, кола со спомнинѓем англедер, објаснинела сар о оговорибе влијајнела упри лате. Ој вакерела: „Бут обесхрабринела ман кеда шунава кај некој оговоринела хем адава керела те на овел ман више доверба ки адаја личност. Уствари, котар те џанав кај адаја личност тајса нане ман те оговоринел?“ Ако приметинеа кај некој почминела те оговоринел, трудин тут те кере лафи башо нешто позитивно (Кол. 4:6).

20. Сар мангеа те користине тли способност те кере лафи?

²⁰ Адалеске со живинаја ко свето коте со о мануша погрешно користинена пли способност те керен лафи мора те да амендар са те шај амаре лафенцар те кера е Јехова бахтало. Ма те бистра кај и способност те кера лафи тани поклон таро Јехова хем кај леске бут важно сар користинаја ле. Ов ка дел амен берекети ако акава поклон користинаја ле ко исправно начин ки служба, ко амаре состанокија хем кеда кераја лафи е јаверенцар. Кеда акава лошно свето ка овел уништимо, ка овел аменге бут полокхо те славина е Јехова амаре лафенцар (Јуда 15). Џи тегани, ов одлучно те славине е Јехова „е лафенцар таро тло муј“ (Пс. 19:14).