1. Koj dengja amen i sposobnost te kera lafi?

 I SPOSOBNOST te kera lafi tano poklon taro amaro Devel kova so but mangela amen. Samo so sine stvorimo, o prvo manuš, o Adam šaj sine te koristinel lafija te šaj te komunicirinel ple nebesno Dadea. Isto agjaar, ov šaj sine te izmislinel neve lafija hem agjaar te koristinel poviše lafija. Ov kergja adava keda dobingja i zadača te čhivel anava e životnenge (1. Moj. 2:19). A kobor sine bahtalo keda prvo puti kergja javere manušea lafi — ple šuže romnjaja, e Evaja! (1. Moj. 2:22, 23).

2. Sar o keribe lafi počmingja te koristinel pe ko pogrešno način hem sar tano avdive?

² Ama kratko palo adava i sposobnost te kerel pe lafi počmingja te koristinel pe ko pogrešno način. O Satana hovavgja e Eva hem adava hovajbe kergja o manuša te grešinen hem te oven nesovršena (1. Moj. 3:1-4). O Adam koristingja akava poklon ko pogrešno način keda krivingja e Eva, pa čak e Jehova bašo ple lična greške (1. Moj. 3:12). O Kain hovavgja e Jehova otkeda mudargja ple phrale e Avele (1. Moj. 4:9). Palo nesavo vreme, jekh potomco taro Kain so vikinela pe Lameh pišingja jekh gili kote so opravdingja adava so mudargja jekhe manuše. Tari adaja gili dikhela pe kobor sine nasilna o manuša ko adava vreme (1. Moj. 4:23, 24). A sar tane o manuša avdive? Šaj te dikha kaj o politička vodačija bizi ladž vakerena gruba lafija. Isto agjaar, ko poviše filmija avdive koristinena pe bezobrazna lafija. O terne šunena lošna lafija ki škola hem o vozrasna šunena adava ki buti. Adava so avdive o lošno keribe lafi tano doborom voobičaeno sikavela samo kobor e svetoskere merilija tane tele.

3. Baši koja opasnost valjani te ova svesna, hem so ka dikha ki akaja statija?

³ Ako na pazinaja, šaj doborom te naviknina amen ko adala lošna lafija so ka počmina amen da te koristina len.  Džangjola pe, sar hristijanja mangaja te kera e Jehova bahtalo ama te šaj te kera adava nane dovolno samo te na koristina lošna lafija. Amen valjani te koristina i sposobnost te kera lafi ko ispravno način, javere lafencar ko način kolea so ka slavina e Devle. Ki akaja statija ka dikha sar šaj te kera adava: 1) ki služba, 2) ko sostanokija hem 3) keda keraja lafi e javerencar. Ama najangle te dikha soske e Jehovaske tano važno save lafija koristinaja.

4. Sprema Malahija 3:16, soske tano važno e Jehovaske sar keraja lafi?

⁴ Čitin Malahija 3:16. Šaj li te setine tut ki jekh pričina soske o Jehova ka pišinel ko plo „lil e setibaskoro“ o anava okolengere kola so ple lafencar sikavena kaj darana lestar hem hor razmislinena bašo leskoro anav? Amare lafija sikavena so isi amen andre ko vilo. O Isus vakergja: „O muj vakerela adava solea tano pherdo o vilo“ (Mat. 12:34). Taro adava bašo so keraja lafi dikhjola pe kobor mangaja e Jehova. A ov mangela okola so le mangena te oven bahtale zasekogaš ko nevo sveto.

5. a) Sar amari služba tani povrzimi adalea sar keraja lafi? b) Sar soj sikavdo ki slika, kola bukja valjani te izbegina ako mangaja te kera e Jehova bahtalo amare lafencar?

⁵ O način sar keraja lafi šaj but te vlijajnel upro adava dali o Jehova ka prifatinel i služba so keraja leske ili na (Jak. 1:26). Nesave manuša kola so na mangena e Devle kerena lafi agresivno, grubo hem ko gordo način (2. Tim. 3:1-5). Sigurno na mangaja te ova sar lende. Amen taro vilo mangaja te kera bahtalo e Jehova amare lafencar. Ama dali o Jehova ka ovel zadovolno ako keraja ljubezno lafi ko sostanokija hem ki služba, a keraja grubo lafi amare familijaja keda o javera na dikhena amen? (1. Pet. 3:7).

6. So slučingja pe adaleske so i Kimberli kergja lafi ko jekh šukar način?

⁶ Keda keraja lafi ko ispravno način, amen sikavaja e javerenge kaj služinaja e Jehovaske. Agjaar, ola šaj jasno te dikhen i razlika maškar okova so služinela e Devleske hem okova so na služinela leske (Mal. 3:18).  Ko akava uveringja pe jekh phen koja so vikinela pe Kimberli. b La sine la i zadača te kerel buti ko jekh proekti jekhe součeničkaja. Džikote kerena sine zaedno buti, oj primetingja kaj i Kimberli razlikujnela pe sine taro javera učenikija. Na ogovorinela sine e javeren, kerela sine ljubezno lafi hem na koristinela sine gruba lafija. Adava but pozitivno vlijajngja upri late hem adaleske palo nesavo vreme počmingja te proučinel i Biblija. O Jehova tano sigurno but bahtalo keda amaro način sar keraja lafi privlekujnela e manušen ko čačipe.

7. Sar mangea te koristine tli sposobnost te kere lafi?

⁷ Sarine amen mangaja te kera lafi ko način kolea so ka ana slava e Jehovaske hem so ka pomožinel amenge te ova popaše amare phralencar. Adaleske, te dikha nekobor praktična načinija kola so ka pomožinen amenge te ova primer e javerenge ko keribe lafi.

8. Sar koristingja o Isus pli sposobnost te kerel lafi ki služba, hem so šaj te sikljova taro adava?

⁸ Ker ljubezno lafi hem sikav poštovanje keda o javera provocirinena tut. Džikote kerela sine pli služba, o Isus sine pogrešno obvinimo kaj tano pijanica, kaj tano halano, kaj služinela e Bengeske, kaj na ikerela pe ko sabat, hem čak kaj na poštujnela e Devle (Mat. 11:19; 26:65; Luka 11:15; Jovan 9:16). Sepak, o Isus na irangja lenge lošno lafencar. Sar o Isus, amen da na valjani te irana e javerenge lošnipaja (1. Pet. 2:21-23). Džangjola pe adava nane lokho (Jak. 3:2). Te dikha so šaj te pomožinel amenge.

9. So šaj te pomožinel amenge te pazina sar keraja lafi keda siem ki služba?

⁹ Ako o manuš kaske so svedočinea kerela tuja grubo lafi, trudin tut te ačhove smirimo. Jekh phral kova so vikinela pe Sem vakerela: „Trudinava man te mislinav ko adava kobor tano važno o manuš te šunel o čačipe hem kaj ov šaj te meninel pe“. Ponekogaš o manuš tano holjamo samo adaleske so alem ko pogrešno vreme. Keda keraja lafi nekasaja soj tano holjamo, šaj te kera adava so kerela jekh phen so vikinela pe Lusija. Oj kratko molinela pe e Jehovaske te pomožinel lake te na vakerel nešto so nane ljubezno hem te ačhovel smirimi hem te sikavel poštovanje.

10. Sprema 1. Timotej 4:13, savi cel valjani te ovel amen?

¹⁰ Ov pošukar učiteli. Iako sine iskusno propovedniko, o Timotej sepak valjani sine ponadari da te ovel pošukar ko plo način sar sikavela. (Čitin 1. Timotej 4:13.) So šaj te pomožinel amenge te ova pošukar učitelija ki služba? Valjani šukar te spremina amen. But siem blagodarna so isi amen različna alatke kola so šaj  te pomožinen amenge te ova pošukar učitelija. Šaj te arakhe korisna informacie ki brošura Ov sa pošukar ko čitibe hem sikajbe hem ko delo „ De tutar sa ki služba“ ko Amaro životo hem služba sar hristijanja — listija spremibaske. Dali trudinea tut te koristine akala publikacie? Keda siem šukar spremime, isi amen pohari trema hem siem pouverime keda keraja lafi.

11. So pomožingja nesave objavitelenge te oven pošukar učitelija?

¹¹ Šaj isto agjaar te ova pošukar učitelija agjaar so ka sikljova taro iskusna phralja hem phenja. O Sem, kova so sine poangle spomnimo, pučela pe sine soske nesave taro sobranie tane doborom šukar učitelija. Ov vnimatelno šunela sar sikavena e javeren hem palo adava trudinela pe te džal palo lengoro primer. Jekh phen koja so vikinela pe Talija šukar šunela sine sar o iskusna phralja ikerena ple javna govorija. Adava pomožingja lake te sikljol sar te kerel lafi bašo teme so interesinena e javeren hem sar te pomožinel lenge te aven ko ispravno zaklučok.

12. So šaj nekaske te ovel pharo te kerel?

¹² Sarine amen šaj te učestvujna ko amare sostanokija agjaar so ka giljava zaedno hem ka da šukar spremime komentarija (Ps. 22:22). Nesavenge nane lokho te komentirinen ili te giljaven anglo javera. Dali tuke da akava tano pharo? Ako oja, sigurno ka ovel tuke korisno ako doznajnea so pomožingja e javerenge te nakhaven pumari dar.

13. So šaj te pomožinel tuke ko sostanokija te giljave taro vilo?

¹³ Giljav taro vilo. I najvažno pričina soske giljavaja ko sostanokija tani te falina e Jehova. Jekh phen koja so vikinela pe Sara, mislinela kaj na giljavela šukar. Ama, oj sepak mangela te falinel e Jehova giljaja. Adaleske, keda spreminela pe sostanokonge, isto agjaar spreminela pe e gilenge. Oj vežbinela te giljavel hem razmislinela bašo adava sar i gili tani povrzimi e materijalea so ka proučinel pe ko sostanok. I Sara vakerela: „Adava pomožinela mange poviše te koncentririnav man ko lafija, a na ko adava sar giljavava“.

14. So šaj te pomožinel tuke te komentirine ko sostanokija ako sian ladžutno?

¹⁴ De redovno komentarija. Mora te priznajna kaj akava šaj te ovel nekaske but pharo. I Talija, kola so spomningjem la angleder vakerela: „Isi man bari trema keda anglo javera valjani te kerav lafi. Adaleske but mange pharo te komentirinav iako o javera na primetinena adava“. Sepak, adava na čhinavela e Talija te del komentarija.  Džikote spreminela pe bašo sostanok, oj džanela kaj o prvo komentari bašo pasus valjani te ovel kratko hem direktno odgovor ko pučibe. Oj vakerela: „Adava značinela kaj nane pogrešno ako mle komentarija tane kratka, ednostavna hem istakninena i glavno misla, soske o phral kova so vodinela i točka očekujnela asavke odgovorija“.

15. So na valjani te bistra keda kerela pe lafi bašo amare komentarija?

¹⁵ Čak nesave phralja hem phenja kola so nane ladžutne ponekogaš na komentirinena. Soske? Jekh phen koja so vikinela pe Džuliet vakerela: „Ponekogaš na komentirinava soske mislinava kaj mle komentarija tane but ednostavna hem kaj nane doborom šukar sar e javerengere“. Ama ma bistre kaj o Jehova mangela te da o najšukar komentarija kola so amen šaj te da len. c Ov tano but bahtalo keda dikhela kaj mangaja te slavina le ko sostanokija hem kaj na dozvolinaja amari trema te čhinavel amen te komentirina.

16. Save lafija na valjani te koristina?

¹⁶ Ma koristin „lafija so vredžinena“ (Ef. 4:31). Sar so dikhlem poangle, o hristijanja nikogaš na valjani te koristinen asavke lafija. Ama isi nesave lafija kola so nane doborom očigledno kaj vredžinena. Na primer, valjani but te pazina ma te vakera nešto lošno baši nekaste so avela tari javer kultura ili nacija. Isto agjaar, nikogaš na valjani te vakera nešto kolea so ka povredina e javeren. Jekh phral priznajnela: „Ponekogaš vakerava sine sarkastična bukja soske mislinava sine kaj samo šalinava man. Ama ustvari adalea povredinava sine e javeren. Beršencar mli romni pomožingja mange agjaar so keda siem sine korkori vakerela mange sine keda vakerava nešto so na sine šukar, hem keda adalea povredinava sine late ili nekas javere“.

17. Sprema Efešanite 4:29, sar šaj te pofalina e javeren?

¹⁷ Ohrabrin e javeren tle lafencar. Neka ovel tut navika te pofaline namesto te kritikujne ili te žaline tut. (Čitin Efešanite 4:29.) Iako sine len but pričine te oven blagodarna, o Izraelcija često žalingje pe. Ako stalno žalinaja amen šaj te kera o javera da te žalinen pe. Ma te bistra kaj adaleske so o deš špionja dengje jekh negativno izveštaj, sa o Izraelcija počmingje te keren lafi protiv o Mojsej (4. Moj. 13:31 —14:4). A tari javer strana, i pofalba šaj but šukar te vlijajnel upro javera. Sigurno i pofalba so dobingja e Jeftajeskiri čhaj taro lakere amalinka but ohrabringja  la hem sine odlučno ponadari da te kerel pli služba (Sud. 11:40). I Sara, kola so spomningjem la angleder vakerela: „Keda pofalinaja, pomožinaja e javerenge te haljon kaj o Jehova mangela len hem kaj tane skapocena ki leskiri organizacija“. Adaleske, rode prilike iskreno te pofaline e phralen hem e phenjen.

18. Sprema Psalm 15:1, 2, soske valjani te vakera o čačipe hem soj tano vklučimo ko adava?

¹⁸ Vaker o čačipe. Našti te ugodina e Jehovaske ako na vakeraja o čačipe. Ov mrzinela sekova hovajba (Izr. 6:16, 17). Iako avdive bute manušenge tano normalno te hovaven, amen ko hovajbe dikhaja sar o Jehova so dikhela. (Čitin Psalm 15:1, 2.) Džangjola pe, amen na samo so na mangaja te hovava nego isto agjaar namerno na vakeraja nesave informacie samo te šaj o javera te aven ko pogrešno zaklučok.

19. Ko so javer valjani te pazina?

¹⁹ Ma ogovorin (Izr. 25:23; 2. Sol. 3:11). I Džuliet, kola so spomningjem angleder, objasninela sar o ogovoribe vlijajnela upri late. Oj vakerela: „But obeshrabrinela man keda šunava kaj nekoj ogovorinela hem adava kerela te na ovel man više doverba ki adaja ličnost. Ustvari, kotar te džanav kaj adaja ličnost tajsa nane man te ogovorinel?“ Ako primetinea kaj nekoj počminela te ogovorinel, trudin tut te kere lafi bašo nešto pozitivno (Kol. 4:6).

20. Sar mangea te koristine tli sposobnost te kere lafi?

²⁰ Adaleske so živinaja ko sveto kote so o manuša pogrešno koristinena pli sposobnost te keren lafi mora te da amendar sa te šaj amare lafencar te kera e Jehova bahtalo. Ma te bistra kaj i sposobnost te kera lafi tani poklon taro Jehova hem kaj leske but važno sar koristinaja le. Ov ka del amen bereketi ako akava poklon koristinaja le ko ispravno način ki služba, ko amare sostanokija hem keda keraja lafi e javerencar. Keda akava lošno sveto ka ovel uništimo, ka ovel amenge but polokho te slavina e Jehova amare lafencar (Juda 15). Dži tegani, ov odlučno te slavine e Jehova „e lafencar taro tlo muj“ (Ps. 19:14).