1. Κον ντινάς-αμέν ο δώρος τι κεράς λάφι;

 ΑΜΑΡΟ Ντεβέλ σο μανγκέλα-αμέν μπουτ ντινάς-αμέν ο δώρος τι κεράς λάφι. Μόλις κερντιλό ο πρώτος τζενό, ο Αδάμ, μπορίνελας τι κερέλ λάφι πι Νταντέσαρ, ι Ιεχωβάσαρ. Ντα μπορίνελας τι νικαβέλ νεβέ λάφια σο κα κερένας λέσκι τσσιπ πο σουκάρ. Ο Αδάμ κερντάς-λες ανταβά κάνα ο Ιεχωβά βακερντάς λέσκε τι τσσουβέλ ναβά σαρέ κο ζώα. (Γέν. 2:​19) Ντα ανέν τουμαρέ γκοντιάτε καζόμ χαρά πρέπει τι λιντάς κάνα κερντάς λάφι πρώτη φαρ εκχέ γιαβερέ τζενέσαρ​—πι σουκάρ ρομνιάσαρ, ι Ευάσαρ!​—Γέν. 2:​22, 23.

2. Σαρ χρησιμοποιησάλο ο δώρος ι λαφίσκο γκεραλέ τροπόσαρ εμ ανγκλέ εμ ακανά;

² Μπουτ σουγκό, ο δώρος ι λαφίσκο χρησιμοποιησάλο γκεραλέ τροπόσαρ. Ο Σατανάς ο Διάβολος βακερντάς ψέματα κι Εύα, ντα οντουβά ψέμας γκερντάς σαρέ ι τζενέν κι αμαρτία ντα κι ατέλεια. (Γέν. 3:​1-4) Ο Αδάμ να χρησιμοποιηντάς λατσσές πι τσσιπ κάνα τσσουντάς ο βάρετα κι Εύα​—ατζέ-ντα κο Ιεχωβά—​οντουλένγκε σο κερντάς βοβ. (Γέν. 3:​12) Ο Κάιν βακερντάς ψέματα κο Ιεχωβά κάνα μουνταρντάς πι πφραλές ι Αβελίς. (Γέν. 4:9) Σοράν, εκ τζενό σο αστάρντιβελας κατά Κάιν, ο Λάμεχ, νικαντάς εκ ποίημας σο σικαβέλας καζόμ άγρια ισινέ ο τζενέ αζομάν. (Γέν. 4:​23, 24) Σο αβέλα-πες αντιβές; Ντικχάσα πολιτικόν μα τι λατζάν τι βακερέν γκεραλέ λάφια ανγκλάλ μπουτέ τζενέντε. Ισί δύσκολος τι αρακχάς εκ σιναμάς σο να τθερέλα ιτς μπέτι λάφια. Ο χουρντέ ασουνένα γκεραλέ λάφια κο σχολείος ντα ο μπαρέ κι μπουτί. Ο μπίλατζανε λάφια ισί σάντε εκ κατά πράγματα σο σικαβένα καζόμ πφιρνό αβιλό ο ντουνιάς.

3. Σο μπέκιμ τι αβέλ-πες άμα να κα τθεράς αμαρί γκοντί, ντα σο κα ντικχάς ανταλέ μαθημάστε;

³ Ο μπέτι λάφια ασούντιβενα αζόμ μπουτ σο, άμα να κα τθεράς  αμαρί γκοντί, μπέκιμ τι αρχίνας τι βακεράς-λεν αμέν-ντα. Σαρ Χριστιανοί, μανγκάσα τι κεράς ο γκι ι Ιεχωβάσκο, οτθάρ να ερεσέλα σάντε μα τι βακεράς μπίλατζανε λάφια. Πρέπει τι χρησιμοποιήνας ο μπουτ σουκάρ δώρος ι λαφίσκο λατσσέ τροπόσαρ, για τι δοξάνας αμαρέ Ντεβλές. Ανταλέ μαθημάστε, κα ντικχάς σαρ τι κεράς-λες ανταβά (1) κο έργος, (2) κο συναθροίσεις ντα (3) κάθε ντιβές αμαρέ ζωγιάτε. Πρώτα όμως κα ντικχάς σόσκε ισί σημαντικός ι Ιεχωβάσκε ο τρόπος σο κεράσα λάφι.

4. Σόσκε ισί σημαντικά ι Ιεχωβάσκε αμαρέ λάφια σαρ αγαβάσα κατά εδάφιος Μαλαχίας 3:16;

⁴ Διαβάνεν Μαλαχίας 3:​16. Ο Ιεχωβά γραφίνελα πι βιβλιόστε ο ναβά οντουλένγκε σο σικαβένα πουμαρέ λαφίντζαρ ότι νταρένα λέσταρ ντα κερένα σκέψεις λέσκε ναβέσκε. Σόσκε τι κερέλ-λες ανταβά; Σόσκε αμαρέ λάφια σικαβένα σο τθεράσα αντρέ αμαρέ γκίστε. Ο Ιησούς βακερντάς: «Ο μούι ι τζενέσκο κερέλα λάφι ι πραγματένγκε σο πφερένα λέσκο γκι». (Ματθ. 12:​34) Οντουλά σο τραμπίνασα τι βακεράς σικαβένα καζόμ μανγκάσα ι Ιεχωβάς. Ντα ο Ιεχωβά μανγκέλα τι τζουβντιόν μπουτ σουκάρ για πάντα κο νεβό ντουνιάς σαρέ οντουλά σο τθερένα μανγκιπέ λέσκε.

5. (α) Σο σχέση τθερέλα αμαρί λατρεία οντουλέντζαρ σο βακεράσα; (β) Άμα μανγκάσα τι κεράς ι Ιεχωβάσκο γκι αμαρέ λαφίντζαρ, σο να κα κεράς σαρ σικαβέλα η φωτογραφία;

⁵ Αμαρέ λάφια μπορίνενα τι κερέν ι Ιεχωβάς είτε τι μανγκέλ αμαρί λατρεία είτε μα τι μανγκέλ-λα. (Ιακ. 1:​26) Τζενέ σο να μανγκένα ι Ντεβλές κερένα λάφι χολιάσαρ ντα μπέτι ή μπαρικανέ τροπόσαρ. (2 Τιμ. 3:​1-5) Σίγουρα να μανγκάσα τι αβάς σαρ λέντε. Αμέν μανγκάσα μπουτ τι κεράς ο γκι ι Ιεχωβάσκο αμαρέ λαφίντζαρ. Αλλά κα αβέλας ι Ιεχωβάσκο γκι άμα κα βακεράς σουκάρ ντα λατσσέ λάφια κο συναθροίσεις ή κο έργος αλλά μπέτι λάφια αμαρέ φαμιλιάκε κάνα να ασουνένα-αμέν ο γιαβερά;​—1 Πέτρ. 3:7.

6. Καλά λατσσέ πράγματα αβιλέ-πες επειδή η Κίμπερλι κερέλας λάφι λατσσέ τροπόσαρ;

⁶ Κάνα χρησιμοποιήνασα ο δώρος ι λαφίσκο λατσσές, σικαβάσα κο γιαβερά ότι υπηρετίνασα ι Ιεχωβάς. Βοηθίνασα ι γιαβερέν τι ντικχέν  λατσσές ι διαφορά σο τθερέλα «οντουβά σο υπηρετίνελα ι Ντεβλές οντουλέσταρ σο να υπηρετίνελα-λες». (Μαλ. 3:​18) Ντικχέν σαρ αβιλό-πες ανταβά εκχέ πφενιάκε σο βακερένα λάκε Κίμπερλι. b Βόι ντα λάκι συμμαθήτρια τθερένας τι κερέν εκ εργασία ι σχολειόσκε. Κάνα κερένας γιεκ ι εργασία, η συμμαθήτρια ντικχλάς ότι η Κίμπερλι να ισινέ σαρ ο γιαβερά μαθητές. Να βακερέλας μπέτι πράγματα ι γιαβερένγκε, κερέλας λάφι λατσσιμάσαρ ντα να κουσέλας. Λάκι συμμαθήτρια μπεϊντιντάς-λες ανταβά ντα μανγκλάς τι κερέλ μελέτη. Καζόμ μπουτ αβέλα ι Ιεχωβάσκο γκι κάνα κεράσα λάφι τροπόσαρ σο ταρτίνελα ι τζενέν κι αλήθεια!

7. Σαρ μανγκάσα τι χρησιμοποιήνας ο δώρος ι λαφίσκο σο ντινάς-αμέν ο Ντεβέλ;

⁷ Σαρέ μανγκάσα τι κεράς λάφι τροπόσαρ σο ντέλα δόξα κο Ιεχωβά ντα ανέλα-αμέν πο πασέ αμαρέ πφραλέντε. Οτθάρ, κα ντικχάς ακανά σο τι κεράς για μα τι τσσιναβάς τι ντας λατσσό παράδειγμας αμαρέ λαφίντζαρ.

8. Σο παράδειγμας μουκχλάς αμένγκε ο Ιησούς πι λαφίντζαρ κάνα κερέλας έργος;

⁸ Σικαβέν λατσσιπέ ντα σεβασμός τουμαρέ λαφίντζαρ κάνα ο γιαβερά χολιασκιαρένα-τουμέν. Κάνα ο Ιησούς κερέλας έργος, ο τζενέ βακερντέ σινανέ ότι πίλας μπουτ μολιά, χάλας μπουτ, κερέλας μπουτί ι Μπενγκέσκε, να κερέλας ο Σάββατος, ατζέ-ντα ότι να σεβάνελας ι Ντεβλές. (Ματθ. 11:​19· 26:​65· Λουκ. 11:​15· Ιωάν. 9:​16) Όμως, ο Ιησούς να κερέλας λέντζαρ λάφι χολιάσαρ. Σαρ ο Ιησούς, αντικάς αμέν-ντα δεν πρέπει τι τσσιναβάς τι κεράς λάφι λατσσιμάσαρ, ατζέ-ντα άμα ο τζενέ κερένα αμέντζαρ λάφι μπέτι τροπόσαρ. (1 Πέτρ. 2:​21-23) Αλλά νανέ ιτς εύκολος τι ατσσικιαράς-αμέν. (Ιακ. 3:2) Σο κα βοηθίνελ-αμέν;

9. Σο κα βοηθίνελ-αμέν τι κεράς κουμάντος αμαρέ λάφια κάνα ισινάμ κο έργος;

⁹ Μα χολιάνεν κάνα εκ τζενό κο έργος κερέλα τουμέντζαρ μπέτι λάφι. Εκ πφραλ, ο Σαμ, βακερέλα: «Μαράβα-μαν τι σκεφτίναβ ότι ο τζενό τθερέλα ανάγκη τι ασουνέλ ι αλήθεια ντα ότι μπορίνελα τι αλλάνελ». Μπάζιμα, εκ τζενό χολιάνελα σάντε επειδή να γκιλάμ λατσσέ σαατίστε. Κάνα τθεράσα ανγκλ’ αμέντε εκχέ χολιαμέ τζενές, μπορίνασα τι κεράς οντουβά σο κερέλα εκ πφεν, η Λουσία. Μπορίνασα τι κεράς εκ χουρντί προσευχή για τι μανγκάς κατά Ιεχωβά τι βοηθίνελ-αμέν τι ατσσάς ήρεμοι ντα μα τι βακεράς λάφια σο νανέ λατσσέ ή να σικαβένα σεβασμός.

10. Σο πρέπει τι μανγκάς τι κεράς σαρ βακερέλα ο εδάφιος 1 Τιμόθεο 4:13;

¹⁰ Σικλιαρέν πο λατσσές. Ο Τιμόθεος τζανέλας τι κερέλ μπουτ λατσσές έργος, αλλά ατζέ-ντα βοβ δεν έπρεπε τι τσσιναβέλ τι κερέλ πο λατσσό πο σικλιαριπέ. (Διαβάνεν 1 Τιμόθεο  4:​13) Σαρ κα σικλιαράς πο λατσσές κο έργος; Πρέπει τι προετοιμάνας-αμέν λατσσές. Ισινάμ πφερντέ εκτίμηση σο τθεράσα μπουτ εργαλεία για τι βοηθίνεν-αμέν τι σικλιαράς πο λατσσές. Κα βοηθίνελ-τουμέν ο βιβλιάριος Τι Συνεχίνεν τι Διαβάνεν ντα τι Σικλιαρέν πιο Λατσσές ντα Ι Χριστιανόνγκι Ζωή ντα ο Έργος​—Πρόγραμμας ι Συναθροισιάκε, οτθέ σο βακερέλα «Σαρ τι Σικλιαράς ι Ντεβλέσκε πο Λατσσές». Τουμέν, χρησιμοποιήνενα-λεν ανταλά; Κάνα προετοιμάνασα-αμέν λατσσές, να αγχώνασα μπουτ ντα τθεράσα σιγουριά οντουλένγκε σο βακεράσα.

11. Σο κερντέ μερικοί Χριστιανοί για τι σικλιαρέν πο λατσσές;

¹¹ Μπορίνασα επίσης τι σικλιαράς πο λατσσές κάνα ντικχάσα γιαβερέν κι κχανγκιρί ντα κάνα σικλιάσα λένταρ. Κάνα ο Σαμ ντικχέλα πφραλέν ντα πφενίν τι σικλιαρέν λατσσές, μπεσέλα ντα σκεφτίνελα σο βοηθίνελα-λεν. Ντικχέλα λατσσές σαρ σικλιαρένα ντα σοράν κερέλα-λεν βοβ-ντα. Εκ πφεν, η Ταλία, ντέλα σημασία ι πφραλέν σο κερένα λατσσέ ομιλίες. Αντικάς, σικλιλί σαρ τι κερέλ λάφι πραγματένγκε σο πουτσένα ο τζενέ μπουτ φαρ κο έργος.

12. Σο δυσκολίντιβενα τι κερέν μερικά πφραλά ντα πφενιά;

¹² Σαρέ βοηθίνασα τι τζαν λατσσές ο συναθροίσεις άμα γκιλιαβάσα ύμνοι ντα ντάσα λατσσέ προετοιμασμέ απαντήσεις. (Ψαλμ. 22:​22) Μερικοί δυσκολίντιβενα τι γκιλιαβέν ή τι ντεν εκ απάντηση κο συναθροίσεις. Άμα ανταβά αβέλα-πες τουμέντζαρ-ντα, κα κερέλ τουμένγκε λατσσιπέ τι σικλιόν σο βοηθιντάς γιαβερέν τι νακχαβέν πουμαρί νταρ.

13. Σο μπέκιμ τι βοηθίνελ-τουμέν τι γκιλιαβέν σαρέ τουμαρέ γκίσαρ κο συναθροίσεις;

¹³ Γκιλιαβέν σαρέ τουμαρέ γκίσαρ. Κάνα γκιλιαβάσα ύμνοι ι Βασιλειάκε, οντουβά σο μανγκάσα πο μπουτ ισί τι δοξάνας ι Ιεχωβάς. Εκ πφεν, η Σάρα, πακιάλα ότι να γκιλιαβέλα λατσσές. Αλλά μανγκέλα τι δοξάνελ ι Ιεχωβάς γκιλίντζαρ. Οτθάρ, κάνα προετοιμάνελα-πες ι συναθροισιάκε κχερέ, γκιλιαβέλα ο ύμνοι-ντα. Κερέλα πρόβα ο ύμνοι ντα προσπαθίνελα τι αγαβέλ σο σχέση τθερένα ο λάφια οντουλέντζαρ σο κα βακέρντιβεν κι συνάθροιση. Βόι βακερέλα: «Ανταβά βοηθίνελα-μαν τι νταβ σημασία πο μπουτ κο λάφια ντα όχι σαρ γκιλιαβάβα».

14. Άμα ισινέν λατζανέ, σο κα βοηθίνελ-τουμέν τι ντεν απαντήσεις κο συναθροίσεις;

¹⁴ Ντεν απαντήσεις. Ισί μπαγιά ότι ανταβά ισί μπουτ δύσκολος μερικέ τζενένγκε. «Αγχώντιβαβα μπουτ κάνα κεράβα λάφι ανγκλάλ γιαβερέ τζενέντε, παρόλο σο να αγαντίντιβελα επειδή μι φωνή ο πο μπουτ φαρ ισί ήρεμη», βακερέλα η Ταλία. «Οτθάρ, ισί μάνγκε μπουτ δύσκολος τι νταβ απαντήσεις». Αλλά η Ταλία να σακιντίνελα τι απαντίνελ. Κάνα  προετοιμάνελα-πες ι συναθροισιάκε, τθερέλα πι γκοντιάτε ότι ο πρώτος τζενό πρέπει τι βακερέλ χάνικ λάφια σο απαντίνενα κι ερώτηση. Βόι βακερέλα: «Ανταβά μανγκέλα τι βακερέλ ότι νανέ πρόβλημας άμα μι απάντηση ισί χουρντί, απλή ντα οπράλ κο σημείος, σόσκε ο πφραλ ασακί απάντηση μπεκλεντίνελα τι ασουνέλ».

15. Σο πρέπει τι ντας-αμέν γκοντί αμαρέ απαντησιένγκε;

¹⁵ Ατζέ-ντα ο Χριστιανοί σο νανέ αζόμ μπουτ λατζανέ ισί φαρ σο σακιντίνενα τι ντεν απαντήσεις. Σόσκε; Εκ πφεν, η Τζούλιετ, βακερέλα: «Μπάζιμα σακιντίναβα τι απαντίναβ σόσκε νταράβα ότι μι απάντηση ισί μπουτ απλή ντα νανέ αζόμ λατσσί». Ντεν-τουμέν γκοντί όμως ότι οντουβά σο μανγκέλα ο Ιεχωβά ισί ο πο λατσσέ απαντήσεις σο μπορίνασα τι ντας αμέν. c Αβέλα μπουτ λέσκο γκι κάνα κεράσα ο πο λατσσό για τι δοξάνας-λες κο συναθροίσεις ντα να μουκχάσα αμαρί νταρ τι τσσιναβέλ-αμέν.

16. Καλά λάφια νανέ λατσσό τι βακεράς;

¹⁶ Νασκιαρέν τουμένταρ σαρέ ο «κουσίματα». (Εφεσ. 4:​31) Σαρ βακέρντιλο πο οπρέ, ο Χριστιανοί δεν πρέπει τι βακερέν γκεραλέ λάφια. Ισί όμως κουσίματα σο να ντικχίντιβενα αζόμ γκεραλέ. Για παράδειγμας, χρειαζίντιβελα τι τθεράς αμαρί γκοντί για μα τι βακεράς λάφια σο νανέ λατσσέ ι τζενένγκε σο τθερένα γιαβέρ κουλτούρα, γιαβέρ φυλή ή ισί γιαβερέ τθεμέσταρ. Επίσης, δεν πρέπει ποτές τι ανάς ντουκχ αμαρέ λαφίντζαρ κο γιαβερά. Εκ πφραλ βακερέλα: «Μπάζιμα, βακεράβας λάφια σο αμντίναβας ότι κα ασάνας λέντζαρ ο γιαβερά ντα ότι να κερένας ζιάνι, αλλά κι πραγματικότητα να ισινέ λατσσέ ντα ανένας ντουκχ κο γκι κι γιαβερένγκο. Καζόμ νακχένας ο μπρεσά, μι ρομνί βοηθιντάς-μαν μπουτ, σόσκε κάνα ισινάμας κορκορέ ντέλας-μαν τι αγαβάβ καλά λάφια σο βακεράβας να ισινέ λατσσέ ντα ανένας ντουκχ λάκε ντα ι γιαβερένγκε».

17. Σαρ μπορίνασα τι ντας ζορ ι γιαβερέν σαρ βακερέλα ο εδάφιος Εφεσίους 4:29;

¹⁷ Κερέν λάφι τροπόσαρ σο ντέλα ζορ ι γιαβερέν. Ισαρέν ι γιαβερέν αντίς τι κρίνεν-λεν ή τι κερέν λένγκε παράπονα. (Διαβάνεν Εφεσίους 4:​29) Ο Ισραηλίτες τθερένας μπουτ λόγους τι τθερέν εκτίμηση, αλλά κερένας παράπονα παλάλ γιαβερέστε. Ο τζενέ σο ισί σικλέ τι κερέν παράπονα νακχαβένα-λες ανταβά κο γιαβερά-ντα. Ντεν-τουμέν γκοντί ότι, ιτιρί κατά μπέτι αμπέρια σο βακερντέ ο ντες κατάσκοποι, «σαρέ ο Ισραηλίτες αρχισάλε τι γκρινιάνεν ντα τι τζαν κόντρα κο Μωυσής». (Αριθ. 13:​31–14:4) Οκιά μπάνταρ, ο ισαριπέ βοηθίνελα σαριλέν τι αβέν πο χαρούμενοι. Μπορίνασα τι αβάς σίγουροι ότι ο ισαριπέ σο λέλας η  τσσάι ι Ιεφθαέσκι πι αμαλινένταρ ντέλας-λα μπουτ ζορ τι ατσσόλ πι διορισμόστε. (Κριτ. 11:​40) Η Σάρα βακερέλα: «Κάνα ισαράσα ι γιαβερέν, κεράσα-λεν τι νιωθίνεν ότι ο Ιεχωβά μανγκέλα-λεν ντα ότι ισί σημαντικοί αντρέ κι οργάνωση λέσκι». Οτθάρ, ρόντεν ευκαιρίες για τι ισαρέν τουμαρέ πφραλέν ντα πφενίν.

18. Σόσκε πρέπει τι βακεράς ι αλήθεια σαρ βακερένα ο εδάφια Ψαλμός 15:1, 2, ντα σο μανγκέλα τι βακερέλ ανταβά;

¹⁸ Βακερέν ι αλήθεια. Ναστί κεράσα ο γκι ι Ιεχωβάσκο άμα να βακεράσα ι αλήθεια. Ο Ιεχωβά μισίνελα σαρέ ο ψέματα. (Παρ. 6:​16, 17) Παρόλο σο μπουτ τζενέ αντιβές αμντίνενα ότι ο ψέματα νανέ μπέτι, αμέν ντικχάσα-λεν σαρ ο Ιεχωβά. (Διαβάνεν Ψαλμός 15:1, 2) Σίγουρα, να βακεράσα ψέματα κο γιαβερά, αλλά δεν πρέπει τι ντας-λεν τι αγαβέν-ντα επίτηδες κάτι λάθος.

19. Σο γιαβέρ πρέπει τι προσοχίνας;

¹⁹ Μα κερέν κουτσομπολιός. (Παρ. 25:​23· 2 Θεσ. 3:​11) Η Τζούλιετ βακερέλα σαρ νιωθίνελα κάνα ασουνέλα γιαβερέν τι κερέν κουτσομπολιός: «Κάνα ασουνάβα κουτσομπολιά, χασαράβα μι ζορ ντα τσσιναβάβα τι νταβ μπέσα κο τζενό σο κερέλα κουτσομπολιός. Ντα κον βακερέλα μάνγκε ότι να κα κουτσομπολίνελ μαν-ντα κο γιαβερά;» Άμα αγαβένα ότι εκ τζενό αρχίνελα τι κερέλ κουτσομπολιός, γκερέν ι συζήτηση εκχέ λατσσέ πραγμάστε.​—Κολ. 4:6.

20. Σο μανγκένα τι κερέν τουμαρέ λαφίντζαρ;

²⁰ Αφού τζουβντιάσα εκχέ ντουνιάστε σο ο πο μπουτ τζενέ κερένα μπέτι λάφι, πρέπει τι μαράς-αμέν για τι αβάς σίγουροι ότι αμαρό λάφι κερέλα ο γκι ι Ιεχωβάσκο. Ντεν-τουμέν γκοντί ότι αμαρό λάφι ισί δώρος κατά Ιεχωβά ντα χάλα-λες ανάγκη σαρ χρησιμοποιήνασα-λες. Βοβ κα ευλογίνελ ο προσπάθειες σο κεράσα αντράλ αμαρέ γκίσταρ για τι αβέν λατσσέ οντουλά σο βακεράσα κο έργος, κο συναθροίσεις ντα κάθε ντιβές αμαρέ ζωγιάτε. Κάνα κα καταστραφίντιβελ ανταβά πφιρνό ντουνιάς, κα αβέλ μπουτ πο εύκολος αμένγκε τι δοξάνας ι Ιεχωβάς αμαρέ λαφίντζαρ. (Ιούδα 15) Μέχρι τι αβέλ-πες ανταβά, μανγκέν σαρέ τουμαρέ γκίσαρ τι κερέν ι Ιεχωβάσκο γκι ι “λαφίντζαρ σο νικιόνα τουμαρέ μόσταρ”.​—Ψαλμ. 19:14.