1. Catar avel o daro te das duma?

 O DARO te das duma avel catar amaro Del iubitorii. Anda o iechto ghies cana sas cărdo o Adam, vo daisardea te del duma pesche Dadeia cerisco. Sa cadea, vo cărdea neve cuvintea hai cadea daisardea te del duma sea mai but. Vo folosisardea-pe catar cado daro caște del anava sea le animalenghe. (Gen. 2:19) Hai so bucurime sas-lo o Adam cana dea duma i iechto data ieche avere manușeia, pesca șucar rromniaia, i Eva. (Gen. 2:22, 23)

2. Den chichiva exemplea cai sicaven sar folosisarde le manușa ande iech modo nasul o daro te den duma andel puraimata hai sar cheren cadaia vi aghies.

² Na pala but timpo, le manușa folosisarde ande iech modo nasul o daro te den duma. O Satan o Beng hohadea la Eva, hai cado hohaimos îngărdea le manușen ca o păcato hai ca i imperfecțiunea. (Gen. 3:1-4) O Adam folosisardea o daro te del duma ande iech modo nasul cana doșardea la Eva hai chiar vi le Iehovas anda peschi doș. (Gen. 3:12) O Cain hohadea le Iehovas pala so mudardea pesche phrales. (Gen. 4:9) Hai, mai târzio, iech andal șiave cai avenas anda o Cain, cai bușiolas Lameh, cărdea iech poezia cai sicavelas chichi de ratavale sas le manușa anda lesche ghiesa. (Gen. 4:23, 24) Sar si le buchia aghies? Amen dichas sar le bare manușa andai politica ci încăren-pe parpale te den duma melales angla aver. Hai si pharo te araches iech filmo ande savo te na del-pe duma melales. Le șiave așunen sar del-pe duma melales ca i școala, hai le bare manușa, ca i buchi. O modo nasul ande savo le manușa folosin penghi șib, sicavel chichi de but rimosardea-pe moralo i lumea de aghies.

3. Ca so trebul te las sama hai so va dichaia mai dur?

³ Anda codoia că traisaras mașcar le manușa cai den duma sea o timpo jiungales, daisaras vi amen, bi te das amari sama, te arăsas  te das duma nasul sar von. Si ciaces, sar creștini camas te avas cuci andel iacha le Iehovasche hai cadaia însemnol mai but sar te na das duma melales. Amen camas te folosisaras amari șib caște așaras le Devles. Mai dur, va avela te dichas sar daisaras te folosisaras o șucar daro te das duma: 1) andi predicarea, 2) ca le întruniri hai 3) cana das duma ande fiesavo ghies. Tha, mai anglal, va avela te dichas sostar si cadichi de importanto anda o Iehova o modo sar das duma.

4. Sar sicavel o verseto anda Maleahi 3:16 că, anda o Iehova, si zurales importanto o modo sar das duma?

⁴ Citisar Maleahi 3:16. Gândisardean-tu vroiechdata sostar scriil o Iehova ande iech „lil de amintire” le anava codolenghe cai sicaven prin o modo sar den duma că daran lestar hai că meditin ca lesco anav? O modo sar das duma sicavel so si ande amaro ilo. O Isus phendea: „Anda so si pherdo o ilo del duma o mui”. (Mat. 12:34) Le buchia anda save alosaras te das duma sicaven chichi de but iubisaras le Iehovas. Hai o Iehova camel ca codola cai iubin-les te bucurin-pe viațatar anda sea o timpo ande iech lumea nevi.

5. a) So phanglimos si mașcar amari închinarea hai o modo sar das duma? b) Cadea sar dichiol-pe andel imagini, ca so trebul te las sama cana das duma?

⁵ O modo sar das duma si iech buchi cai daștil te cherel le Iehovas te camel sau nici amari închinarea. (Iac. 1:26) Amen ci camas te avas sar codola cai ci iubin le Iehovas hai cai den duma jiungales, pherde holi hai baricanes. (2 Tim. 3:1-5) Mai but, amen camas ca prin o modo sar das duma te avas cuci andel iacha le Iehovasche. Tha avelas o Iehova bucurime dacă ca le întruniri sau andi lucrarea de predicare das duma șucar hai pherde lașimos, hai cana sam numai le jenența anda amari familia, das duma holiaia hai ci sicavas iubirea? (1 Pet. 3:7)

6. So buchia lașe andea o fapto că i Kimberly folosisardea pesco daro te del duma ande iech modo lașio?

⁶ Cana folosisaras ande iech modo lașio o daro te das duma, sicavas că sam slujitori le Iehovasche. Cadea, codola de pașa amende va dichena i „deosebirea … mașcar codo cai slujil le Devlesche hai codo cai ci slujil lesche”. (Mal.  3:18) Te dichas i experiența iecha pheiachi po anav Kimberly b. Co liceo, voi sas-li șiuti te cherel iech proiecto ande iech than iecha colegaia anda lachi clasa. Ando timpo so cherenas buchi ande iech than, lachi colega dichlea că voi ci sas cadea sar le coaver șiave andai școala. Voi ci delas duma anda aver pala o dumo, delas duma lașimaia hai ci folosilas cuvintea melale. Cana dichlea chichi de șucar phiravelas-pe hai delas duma i Kimberly, lachi colega camlea te sichiol mai but buchia andai Biblia. Cana das duma ande iech modo cai țârdel le manușen co ciacimos, o ilo le Iehovasco bariol!

7. Sar cames te folosisares o daro te des duma cai sas tuche dino le Devlestar?

⁷ Savore camas ca, prin o modo sar das duma, te das pachiv le Iehovasche hai te pașioas amare phralendar. Mai dur, va avela te dichas chichiva buchia cai daștin te ajutin-ame te avas „iech exemplo … cana das duma”.

8. Sar folosisardea o Isus ande iech modo lașio pesco daro te del duma cana sas-lo pi phuv?

⁸ De duma lașimaia hai pachivales cana aver camen te holiaren-tu. Cana sas-lo pi phuv, o Isus sas-lo doșardo pe neciacimaste că sas-lo hașvalo po haben hai po pimos, că cherelas buchi anda o Beng, că ci încărelas o sabato hai chiar sas phendo anda leste că ci sicavelas pachiv le Devlesche. (Mat. 11:19; 26:65; Luca 11:15; Ioan 9:16) Tha, o Isus ci holiardea-pe hai ci phendea lenghe parpale cuvintea cai pusaven. Cana aver camen te holiaren-ame prin so phenen, amen trebul te las-ame pala o exemplo le Isusosco hai te na das duma nasul lența. (1 Pet. 2:21-23) Si ciaces, ci si amenghe ușoro te încăras-ame parpale ande cadal situații. (Iac. 3:2) So daștil te ajutil-ame?

9. So daștil te ajutil-ame te încăras-ame parpale te na das duma nasul andi lucrarea de predicare?

⁹ Cana iech manuș savesche phenas i vestea lași, del duma bi lașimasco, te das amari zor te dichas părdal le buchia cai phenel-le. Iech phral po anav Sam phenel: „Gândisarav-ma sostar si importanto anda cado manuș te așunel o ciacimos hai dav mânri zor te încărav andi goghi că vo daștil te paruvel-pe”. Poiechdata, iech manuș daștil te avel holiardo, cana dichel-ame ca lesco udar anda codoia că ci arachleam-les ande iech momento lașio. Cana das duma ieche manușeia cai silo holiardo, daisaras te las-ame pala o exemplo iecha pheiaco po anav Lucia. Voi phenel iech harno manglimos, ande savo manghel le Iehovas te ajutil-la te na holiarel-pe hai te na phenel vareso cai ci sicavel lașimos sau pachiv.

10. Cadea sar phenel-pe ando 1 Timotei 4:13, so trebul te cheras?

¹⁰ De chi zor te aves iech sicaitorii mai lașio. Chiar cana o Timotei jianelas mișto te sicavel  averen, vi vo trebuisardea te bariol spiritualo caște avel iech sicaitorii mai lașio. (Citisar 1 Timotei 4:13.) Sar daisaras vi amen te avas sicaitoria mai lașe? Trebul te pregătisaras-ame mișto. Cadaia va ajutila-ame te na daras hai te das duma anda ilo. Si amen but instrumentea cai daștin te ajutin-ame. Sar exemplo, i broșura Dedichisar-tu te citis hai te sicaves hai i secțiunea „Te avas mai lașe andi predicarea”, anda O Caieto anda i întrunirea „Viața creștino hai predicarea”. Folosisares vi tu cadal materialea?

11. Sar cărdile sicaitoria mai lașe chichiva phrala?

¹¹ Iech aver modo prin savo daisaras te avas sicaitoria mai lașe si te las-ame pala o exemplo codolengo cai jianen te sicaven mișto averen. O Sam, anda savo deam duma mai anglal, pușel-pe sar daștin chichiva phrala te aven sicaitoria cadea de lașe, pala codoia dichel atento sar cadala sicaven averen hai del peschi zor te lel-pe pala lende. Iech phei po anav Talia așunel atento sar le phrala cai sile lașe sicaitori încăren penghe cuvântări publico. Cadaia ajutisardea-la te sichiol sar te del duma anda anumime buchia cai le manușa pușen-le butivar andi lucrarea de predicare.

12. Prin so pharimata nachen chichiva phrala?

¹² Fiesavo anda amende daisaras te las partea ca le întruniri cana ghilabas ande iech than hai cana das răspunsuri mișto pregătime. (Ps. 22:22) Anda chichiva daștil te avel pharo te ghilaban sau te den iech răspunso angla aver. Si pharo vi anda tute? Dacă si cadea, o fapto te jianes so ajutisardea avere phralen te nachen părdal lenghe daraimata daștil te ajutil vi tut.

13. So daștis te cheres caște ghilabas anda sea o ilo ca le întruniri?

¹³ Ghilaba anda sea o ilo. O mai importanto motivo sostar ghilabas ca amare întruniri le ghilea le Regatosche si te das pachiv le Iehovasche. Iech phei po anav Sara camel te așarel le Iehovas prin o modo sar ghilabal. Tha, voi ci pachial că ghilabal cadea de șucar. So cherel voi? Pregătil-pe andal ghilea cadea sar cherel vi anda le coaver teme. Ghilabal mai butivar le ghilea hai rodel te dichel o phanglimos mașcar le versuri hai so va dela-pe duma ca i întrunirea. Voi phenel: „Cadaia ajutil-ma te așel mânri goghi ca le cuvintea, na ca o fapto că ci ghilabav șucar.”

14. So daștil te ajutil-tu te des răspunsui ca le întruniri chiar cana san lajiavuno?

¹⁴ De răspusuri ca fiesavi întrunirea. Cadaia daștil te avel zurales pharo anda chichiva. Vi i Talia, anda savi deam duma mai anglal, si mașcar codola savenghe si pharo te den răspunsuri ca le întruniri. Voi phenel: „Mânro ilo astarel te marel zurales cana dav duma angla aver, hai si man emoții. But jene ci den penghi sama, anda codoia că dav duma calmo. Tha si manghe zurales pharo te dav răspunsuri”. Cu  sea cadala, voi ci încărel-pe parpale te del răspunsuri. So cherel voi? Cana pregătil-pe andal întruniri, gândil-pe că o iechto răspunso trebul te avel harno hai directo. Voi phenel: „Jianav că codo cai încărel i tema ajucărel iech răspunso harno hai simplo. Anda codoia, dav mânri zor te dav iech răspunso sar cado”.

15. So ci trebul te bâstras ande soste priveal le răspunsuri cai das-le ca le întruniri?

¹⁵ Vi le creștini cai nai-le lajiavune daștin te încăren-pe parpale poiechdata te den răspunsuri. Sostar? Iech phei po anav Juliet phenel: „Poiechdata, încărav-ma parpale te dav iech răspunso, anda codoia că pachiav că silo prea simplo hai nai-lo cadea de lașio”. Tha te na bâstras că o Iehova camel te das-les sea so si amen mai lașio ca le întruniri. c Sam zurales cuci andel iacha le Iehovasche cana anas lesche pachiv ando mașcar la congregațiaco, hai ci mechas ca amare daraimata te încăren-ame parpale te cheras cadaia.

16. So ci trebul te phenas niciechdata?

¹⁶ De chi zor ca prin o modo sar des duma te na duchaves averen. (Ef. 4:31) Cadea sar dichleam ji acana, le cuvintea melale ci trebun te aven niciechdata pe le ușta ieche creștinosche. Tha daisaras te das duma ande iech modo cai duchavel averen, bi te das amari sama. Sar exemplo, trebul te las sama te na das duma nasul andal manușa cai silen aver cultura, etnia sau naționalitatea. Sa cadea, ci trebul te folosisaras cuvintea cai pusaven sau cai daștin te duchaven averen. Iech phral phenel: „Poiechdata, mânre cuvintea sas-le jiungale hai prasanas averen. Me pachiaiem că sas numai phirasa hai că ci sas chanci nasul. Tha, butivar, so phendem duchavelas averen. Ando timpo, mânri rromni ajutisardea-ma but, hai phendea manghe cana samas corcore ori chichivar phendem vareso cai duchavelas averen”.

17. Cadea sar phenel-pe ando Efeseni 4:29, sar daisaras te zuriaras averen?

¹⁷ De duma ande iech modo cai zuriarel averen. Cher tuche o obiceio te așares averen ando than te rovares-tu hai te rodes i doș ca le coaver. (Citisar Efeseni 4:29.) Le israielițen sas-le but motivea te aven recunoscători, tha von alosarde te rovaren-pe sea o timpo. Cana iech manuș rovarel-pe butivar daștil te cherel vi le coaveren de pașa leste te cheren sa cadea. Te anas amenghe amintea că o raporto nasul andino catar le deș spioni cărdea ca „sea le israeliți . . . te den duma nasul contra o Moise”. (Num. 13:31–14:4) Tha, pe aver partea, le așarimata daștin te zuriaren averen. Sar exemplo, daisaras te avas siguri că le așarimata cai primisardea-le i șei le Ieftaschi catar lache amalea,  zuriarde-la te cherel peschi buchi anda o Iehova. (Jud. 11:40) I Sara, anda savi deam duma mai anglal, phenel: „Cana așaras amare phralen hai pheian, von dichen că sile cuci andel iacha le Iehovasche hai că silen iech than ande leschi organizația”. Cadea că, te rodas ocazii te așaras averen anda sea o ilo.

18. Cadea sar phenel-pe ando Psalmo 15:1, 2, sostar trebul te phenas o ciacimos hai so însemnol cadaia?

¹⁸ Phen o ciacimos. Amen ci daisaras te avas cuci andel iacha le Iehovasche dacă hohavas, anda codoia că vo urâl o hohaimos tela sea lesche forme. (Prov. 6:16, 17) Chiar dacă but manușa de aghies pachian că o hohaimos si vareso normalo cana den duma, amen camas te phiravas-ame cadea sar phenel amenghe o Iehova. (Citisar Psalmo 15:1, 2.) Amen ci phenas hohaimata hai nici na banghiaras o ciacimos, ca le coaver te arăsăn te pachian aver vareso.

19. Ca so aver vareso trebul te las sama?

¹⁹ Na de duma nasul pala averengo dumo. (Prov. 25:23; 2 Tes. 3:11) I Juliet, anda savi deam duma mai anglal phenel: „Som peradi cana așunav buchia nasul anda aver, hai cadaia cherel-ma te na mai pachiav-ma ando manuș cai del duma cadea. Dacă del duma nasul anda aver, catar jianav că ci va dela duma nasul vi anda mande?” Cana diches că arăsăl te del-pe duma nasul pala averengo dumo, de chi zor te paruves o subiecto hai phen vareso șucar cai zuriarel. (Col. 4:6)

20. Sar cames te folosisares chio daro te des duma?

²⁰ Anda codoia că traisaras ande iech lumea cai le manușa den duma melales sea o timpo, trebul te das sea amari zor ca prin o modo sar das duma te avas mișto dichle le Iehovastar. O fapto te das duma si iech daro le Iehovastar, anda codoia anda leste si importanto sar das duma. O Iehova va dela-ame bare miștimata dacă das amari zor te folosisaras o daro te das duma cadea sar camel vo andi predicarea, ca le întruniri hai cana das duma ande fiesavo ghies. Cana cado sistemo nasul va nachela hai, iech data leia, vi o zuralimos cai siles opral le manușa, va avela amenghe but mai ușoro te das pachiv le Iehovasche prin so phenas. (Iuda 15) Ji atunci, camas anda sea o ilo, ca le ‘dumes cai înclen anda amaro mui’ te aven cuci angla o Iehova. (Ps. 19:14)