1. Kwisu kwadiokala chipan cha kulond?

 KULOND chid chipan chatwinkishau kud Nzamb wetu mukatish. Pamutangau muntu wa kusambish Adam, wading ni mutapu wa kusadin dizu mulong wa kwambamb ni Tatukwend wa mwiur. Wading kand ukwet mutapu wa kuwej majin ma yom yikwau mu dizu diend. Chilakej, Adam wasala mwamu mulong wa kuwanyish chisend chend cha kupil annam majin. (Dis. 2:19) Ni ukutwish kutong mutapu wovay musangar chisu chambambay kapamp ka kusambish ni muntu mukwau​—mukajend wa ufun, Ev!​—Dis. 2:22, 23.

2. Mutapu ik wasadinau nayimp chipan cha kulond pasak ni mutapu ik uchisadidinau nayimp nlel?

² Kupwa kwa chisu chikemp, chipan cha kulond achisadina mu mutapu uyimp. Satan Djabul wamudimba Ev, ni makasu minam mayishikija antu ku chitil ni kuburen kuwanyin. (Dis. 3:1-4) Adam wasadina nayimp rudim rend chisu chamufishay nich Ev​—chikupu ni Yehova—​mulong wa kurumbuk kwa amwinend. (Dis. 3:12) Kain wamudimba Yehova kupwa kwa kumujip mwanchend Abel. (Dis. 4:9) Mu kusut kwa chisu, Lamek wa mu dijuku dia Kain walonda mazu mamekesha anch kwading chisum nakash pa chisu chadingay mwom. (Dis. 4:23, 24) Chad chid nchik nlel? Tumen antakel a chipolitik akad usany wa kusadin mazu mayimp mukach mwa antu. Ni mu mafilm mavud nlel mud antu asadidina mazu mayimp. Ansand a shikol akat kutesh mazu mayimp ku shikol, ni antu amakurump akat kumatesh ku jindond ja mudimu. Cha ushon, mutapu uyimp wa kulond tumena mu mangand umekeshin patok anch mikadil ya antu yiyil kamu mu kuyip nakash.

3. Mupit ik tufanyidina kubabel, ni yom ik tukumana mu mutu wa mulong winou?

 ³ Anch tubabelap, tukutwish kwikal ni chaku cha kutesh mazu mayimp ni kuwil mu mupit wa kusambish niyetu kumasadin. Chakin kamu, mulong tud in Kristu, tukatin kumusangaresh Yehova, ni chinech chitinap kwau kwimen kusu pa kwipuk kulond yom yiyimp. Tukatin kusadin chipan cha kulond mu mutapu uwamp​—mulong wa kumutumbish Nzamb wetu. Mu mutu wa mulong winou tukuman mutapu tukutwisha kusal mwamu (1) mu mudimu wa kulejan, (2) ku yikumangan, ni (3) mu mambamb metu ma pichuku pichuku. Pakwez chakusambish, el tumanany bil mulong wak mutapu wetu wa kulond ukwet usey ku mes ma Yehova.

4. Kukwatijan ni Malakiy 3:16, mulong wak mutapu wetu wa kulond ukwet usey ku mes ma Yehova?

⁴ Tang Malakiy 3:16. Ov, ukutwish kutongijokin mayingishin mamubachika Yehova kufundikish mu “mukand [wa] yivurikish” majin ma antu ading alondina yom yamekesha anch amwovil wom ni atongijokidin pa dijin diend? Yom tulondina yimekeshining yom yidia mu muchim wetu. Yesu walonda anch: “Kan ka muntu kakat kubudish yom yizwila mu muchim wend.” (Mat. 12:34) Yom tukwatining mupak wa kulond yimekeshining mutapu tumukatina Yehova. Ni Yehova ukatin anch antu amukatina asanger mwom wa chikupu mwi ngand yisu.

5. (a) Kukwatijan ik kudia pakach pa difukwil dietu ni yom tulondina? (b) Mud mumekeshinau pa chipich, yom ik tufanyidina kubabel piur pa mutapu wetu wa kulond?

⁵ Mutapu wetu wa kulond ukutwish kumekesh anch Yehova ukutwish kwitiy difukwil dietu ap bwat. (Jak. 1:26) Mutapu wa kulond wa antu amwing akad kumukat Nzamb uding wa kuswej, wa nchir, ni wa chibud. (2 Tim. 3:1-5) Chakin tukatinap kamu kuyimburij. Tukatin kumusangaresh Yehova kusutin mutapu wetu wa kulond. Pakwez, ov, Yehova ukutwish kutusanger anch twalond mu mutapu uwamp ni wa rukat ku yikumangan ap mu mudimu wetu wa kulejan, pakwez oku tukat kulond mu mutapu wa chisum ni wakad rukat chisu twisambina ni antu a mu dijuku dietu?​—1 Pita 3:7.

6. Yibudikin ik yiwamp yatanay Kimberly mulong wa mutapu wend uwamp wa kulond?

⁶ Anch twasadin nawamp chipan chetu cha kulond, tukwimekesh ayinetu patok kud antu  akwau anch tud atushalapol a Yehova. Tukuyikwash antu atunyingumukina kuman patok kushalijan kudia ‘pakach pa muntu umusadidila Nzamb ni muntu wakad kumusadil.’ (Mal. 3:18) Shinshikin mutapu wamekana uyakin winou mu mwom wa nambaz Kimberly. * Ayinkisha ku shikol mudimu wa kusal pamwing ni mbay nend. Kupwa kwa kusal nend pamwing, mbay nend wa shikol wajingunina anch Kimberly wading ushalijadin ni ansand a shikol akwau. Kadingap kuyilondang antu nayimp kuns, walondang mu mutapu wa kalimish, ni kabudishangap mazu mayimp mu kan mwend. Mbay a shikol wa Kimberly wasangera nakash mwikadil winou ni witiya kwilej Bibil. Chikat kumusangaresh Yehova mud ik anch twalond mu mutapu ukata kuyipwitin antu ku uyakin!

7. Mutapu ik ukatina kusadin chipan chakwinkishay Nzamb cha kulond?

⁷ Etu awonsu tukatin anch mutapu wetu wa kulond umutumbish Yehova ni kutusejish piswimp ni akadivar netu. Chawiy, el tumanany mitapu yimwing tufanyidina kudandamen kwikal “[chilikej] chiwamp . . . ku kulond.”

8. Chilakej ik chatushilay Yesu piur pa mutapu wasadinay rudim rend mu mudimu wa kulejan?

⁸ Akul mu mutapu uwamp ni wa kalimish anch akusarumun. Mu mudimu wend panap pansh, Yesu amudimbena makasu anch wading ikundj upumbila kudia ni kuna, anch wading kashalapol wa Djabul, mwin kujip chijil cha Sabat, ni mwin kumusaal Nzamb. (Mat. 11:19; 26:65; Luka 11:15; Yoh. 9:16) Pakwez, Yesu kakulap nich ujim. Mud Yesu, anch antu atulond mu mutapu uyimp, tufanyidinap kwakul niyetu mu mutapu uyimp. (1 Pita 2:21-23) Pakwez, chid chakin anch chiswapelap kwilam mu mutapu winou. (Jak. 3:2) Yom ik yikutwisha kutukwash?

9. Yom ik yikutwisha kutukwash kudimukin mazu metu chisu tudia mu mudimu wa kulejan?

⁹ Sal usu wa kulik kwimen pa yom yiyimp yilondinay mwin chikumbu. Mukadivar Sam ulondin anch: “Nikat kusal usu wa kushinshikin pa maswir makwetay mwin chikumbu ma kutesh uyakin ni kukarumuk mu mwom wend.” Yisu yimwing mwin chikumbu ukutwish kujiman kwend mulong twamwendin kal pa chisu chiyimp. Anch twatanijan ni muntu ujimena, tukutwish kumwimburij nambaz Lucia. Tukutwish kusal malembil miswimp mu muchim, ni kumwit Yehova chakwel atukwash kulam ujim wetu ni kulik kulond mu mutapu uyimp wakad kalimish.

10. Kukwatijan ni 1 Timote 4:13, mupak ik tufanyidina kukwat?

¹⁰ Dandamen kuwapish mutapu wey wa kufundish. Timote wadinga mwin kulejan ukweta ukaliweny, pakwez ap mwamu, wading uswirikedin kudandamen kuwapish yom kanang piur pa mutapu wend wa kufundish. (Tang 1 Timote 4:13.) Mutapu ik tukutwisha kudandamen  kuwapish mutapu wetu wa kufundish? Tufanyidin kwirijekang nawamp. Cha musangar, tukwet yamu kushalijan yikutwisha kutukwash kwikal alej awamp nakash. Chid cha ukwash nakash anch wilej broshir Ipana mu Kutang ni mu Kufundish, ni chikunku “Ipana mu Mudimu wa Kulejan” chiding ku Mudimu ni Mashakamin ma In Kristu​—Mukand wa Chikumangan. Ov, ukat kusal usu wa kutaninamu mu yamu yiney ya mudimu? Anch twirijek nawamp, tukuzalap, ni tukulond nich kashinsh kawonsu.

11. Mutapu ik washikenau in Kristu amwing kwikal alej awamp?

¹¹ Tukutwish kand kwikal alej awamp kusutin kushinshikin ni kwilejin kud antu akwau mu chikumangen. Sam twajimbulang kwiur oku wiyipula amwinend mulong wa kwijik yom yisadina anch in Kristu amwing ikal alej awamp. Wileja mitapu yau ya kufundish, ni kupwa wasala usu wa kuyimburij. Nambaz Talia washinshikinang nawamp mutapu ukatau akadivar akweta ukaliweny kusal madiskur. Kusutin kusal mwamu, wileja mutapu wa kwakul ni kutongijokin pa yipul yikatau kwipul yisu yivud mu mudimu wa kulejan.

12. Yikokujol ik yirishinau nich antu amwing?

¹² Etu awonsu tukutwish kukwash chakwel yikumangan yetu yisut nawamp kusutin kuwang nich dizu dia piur ni kwakul yom twarijekang kal nawamp. (Kus. 22:23) Chiyikasikedining antu amwing kuwang ni kwakul ku yikumangen yetu. Ov, chid kand mwamu ku mutambu wey? Anch mwawiy, chikukusangaresh kwijik yom yayikwasha antu akwau kupwish wom wau.

13. Yom ik yikutwisha kukukwash kuwang nich musangar wawonsu ku yikumangan?

¹³ Wang nich musangar wawonsu. Chisu tuwangina miminy ya Want, tufanyidin chakusambish kushinshikin maswir metu ma kumushiman Yehova. Nambaz Sara kimeningap amwinend mud mwin kuwang muwamp. Pakwez, ukatining nakash kumutumbish Yehova nich miminy. Mulong wa diyingishin dined, ukatining kwirijek ku chikumbu mutapu wa kuwang, mud mutapu ukatay kand kurijek yikunku yikwau ya chikumangan. Ukat kwiyijidish tupamp tuvud mutapu wa kuwang, ni kushinshikin mutapu ukwatijadina mazu madia mu miminy ni yom yikwilejau ku yikumangan. Ulondin anch: “Chinech chikat kwinkwash kushinshikin nakash pa mazu pa ndond pa kushinshikin pa mutapu wam wa kuwang.”

14. Anch ukweting wom wa kulond kurutu kwa antu avud, yom ik yikutwisha kukukwash kwakul ku yikumangan?

¹⁴ Ikal ni chaku cha kwakulang. Mu kulond win kashinsh, chikutwish kuyikasiken antu amwing kusal mwamu. Talia twajimbulang kwiur oku ulondin anch: “Nikweting wom nakash wa kulond kurutu kwa antu avud, pakwez antu avud kijingap mwamu mulong yisu yivud dizu diam dikuzalangap. Chawiy, chinkasikedining  nakash kwakul.” Ap mwamu, Talia kakatap kulik kwakul ku yikumangan. Chisu chikatay kurijek yikumangan, ukat kulam mu manangu anch chakul chakusambish chifanyidin kwikal chiswimp ni chakwila kapamp kamwing ku chipul. Ulondin anch: “Chinech chimekeshin anch chid chiwamp anch chakul cham chid chiswimp, chiswapela kutesh ni chovikeshina chitongijok cha pa dishin, mulong yakul ya mutapu winou yawiy yikimbiningay mukadivar utakedina dilejan.”

15. Yom ik tufanyidina kuvurik piur pa yakul yetu?

¹⁵ Ap in Kristu akading usany ap wom wa kulond, akutwish yisu yimwing kwidjidjek pa kwakul ku yikumangan. Mulong wak? Nambaz Juliet urumburil anch: “Yisu yimwing nikat kwidjidjek kwakul mulong noviling wom anch pamwing ap chakul cham chid cha usweral ni chiwapinap kwau nakash.” Chawiy vurik anch yom yikimbinay Yehova yid anch tupana yakul yiwamp kukwatijan ni ukaliweny wetu. * Ukwatining nich usey nakash usu tusadina mulong wa kumushiman mu yikumangan ni wa kulik kulikidil wom chakwel utukangesh kusal mwamu.

16. Mazu ma mutapu ik tufanyidina kwipuk?

¹⁶ Ipuk mazu ma “kuchirilan.” (Efes 4:31, TMK) Mud mutapu twadiokala kal mu kuman, mazu mayimp makwetap ndond mu kan mwa mwin Kristu. Pakwez kud kulond kukwau kwa nchir kwakad kwijikan patok tufanyidina kand kubabel. Chilakej, tufanyidin kwipuk kulond yom yiyimp chisu twisambidina piur pa antu a kabil, muchid, ni ngand yikwau. Chikwau kand, tukatinap anch mazu metu mayovish antu kwau nayimp ku muchim. Mukadivar umwing witiyidin anch: “Yisu yimwing, nalonda yom natonga anch yading kwau ya maswimbu ni yakad kutwish kumusal muntu nayimp, pakwez mu win kashinsh, kwading kulond kuyimp ni kwayitapa antu akwau ku muchim. Mu mivu yivud, mukajam wankwasha nakash mu kwinlejang ku ujindj chisu chawonsu chamanangay anch yom nilondina yiwapinap ni yamutapang ndiy ni antu akwau ku muchim.”

17. Kukwatijan ni Efes 4:29, mutapu ik tukutwisha kuyikasikesh antu akwau?

¹⁷ Lond mu mutapu uyikasikeshina antu akwau. Ikal uswakela kulond yom yiwamp piur pa antu akwau pa ndond pa kuyilond yom yiyimp ap kunyinyit piur pau. (Tang Efes 4:29.) In Isarel ading ni yom yivud yafanyina kuyibachik kwikal in kujikitish, pakwez yisu yivud, adinga in kunyinyit. Chaku cha kunyinyit chikutwish kuyisamburikin antu akwau. Vurik anch rapor muyimp wapanau in kutentish dikum wayishikija “in Isarel awonsu [kumununganijan] Moses.” (Kuch. 13:31–14:4) Ku mutambu ukwau, kulond yom yiwamp piur pa antu akwau kukutwish kuyikwash  antu awonsu kwikal nich musangar. Tukutwish kwikal nich kashinsh anch yom yiwamp yalondangau arund a mwan mband wa Jefite yawiy yamukasikesha nakash kudandamen mu chisend chend. (Ank. 11:40) Sara twajimbulang kwiur oku ulondin anch: “Anch twasambish kulond yisu yawonsu yom yiwamp piur pa antu akwau, tukuyikwash kwiyov anch Yehova uyikatin ni anch akwet ndond mu dirijek diend.” Chawiy kimb mitapu ya kulond yom yiwamp piur pa akadivar ni anambaz ney.

18. Kukwatijan ni Kuseng 15:1, 2, mulong wak tufanyidina kulond nich win kashinsh, ni chinech chirumburikin ik?

¹⁸ Lond nich win kashinsh. Tukutwishap kumusangaresh Yehova anch tudiap in kashinsh. Mulong ukisining milad yawonsu ya makasu. (Jnsw. 6:16, 17) Ap anch antu avud nlel amening mud chiyipinap kwau kulond makasu, etu tulamin chitongijok cha Yehova pa mulong winou. (Tang Kuseng 15:1, 2.) Chid chakin anch twipukining kudimban, pakwez twipukining kand kujindjik uyakin witina kulond.

19. Chom ik chikwau tufanyidina kubabel?

¹⁹ Ipuk mboj. (Jnsw. 25:23; 2 Tes. 3:11) Juliet, twajimbulang kwiur oku urumburil mutapu ukata mboj kumusal nayimp. Ulondin anch: “Chikat kwinziyish anch namutesh muntu ukat kulond yom yiyimp piur pa antu akwau, ni chikat kwinkasiken kumuchingejin muntu winou. Kupwa nikat kutong anch ukutwish kand kwend kwinlond niyam yom yiyimp kurutu kwa antu akwau.” Anch waman anch mambamb men masambish kal kwikal ma mboj, sal usu wa kumaswimp mulong wa kwisambin yom yikasikeshina.​—Kol. 4:6.

20. Mupak ik wakwata kal piur pa mazu mey?

²⁰ Mulong tushich mu mangand mwizwila antu akweta mutapu uyimp wa kulond, tufanyidin kusal usu nakash mulong wa kuman anch mazu metu mamusangareshin Yehova. Vurik anch kulond chid chipan chatwinkishay Yehova, ni ukat kushinshikin mutapu tuchisadidina. Ukuyukish usu tusadina mulong wa kusadin rudim retu mu mutapu uwamp mu mudimu wa kulejan, ku yikumangan, ni mu mambamb metu ma pichuku pichuku. Chisu chikusheshau mangand minam mayimp, chikutuswapel chad nakash kumushiman Yehova nich mazu metu. (Jud 15) Mu kachisu kakemp kishalaku kal, kwat mupak wa kumushiman Yehova nich “mazu” ma mukan mwey.​—Kus. 19:14.