1. Baka amin’ia ty fahaizantsika mivola?

 FANOMEZA tena soa baka amy Ndranaharintsika be fitiava iny ty fahaizantsika mivola. Afaky nivola, ohatsy, Adama laha vo niforony ka nifampiresaky tamy Babany an-danitsy any iny. Afaky namoro safà vaovao koa ie. Nanao ani-zay ie lafa nanome anara ty biby iaby. (Gen. 2:19) Mba eritsereto moa hoe nanao akory ty hafaleani-Adama lafa nifampiresaky tamy Eva ie! Valiny io ty olombelo niresahany voalohany.​—Gen. 2:22, 23.

2. Ino ty mampiseho fa nampiasà amy fomba raty fahafaha mivola io taloha noho henanizao?

² Tsiela tafarani-zay, nisy nampiasa tamy fomba raty fanomeza baka amy Ndranahary io. Navandy tamy Eva, ohatsy, Satana Devoly, le vandy zay ro nahavy ty olombelo ho lasa mpanota noho tsy lavorary. (Gen. 3:1-4) Nampiasa ty lelany tamy fomba raty koa Adama lafa nanao hadisoa satria Eva noho Jehovah ro nameany tsiny. (Gen. 3:12) Navandy tamy Jehovah koa Kaina lafa baka namono ani-Abela rahalahiny. (Gen. 4:9) Tafarani-zay, le nanoratsy tononkalo mampiseho ty haratiam-panahin’olo tamy androny Lameka, taranakini-Kaina. (Gen. 4:23, 24) Ka manao akory henanizao? Vomaiky mihamanjeky raha zay. Tsy mahamenatsy ty mpanao politiky kindraiky ty mivola raha raty amason’olo. Misy zivaziva noho safà raty koa ty ankamaroani-filma. Ahareza ani-zay iaby ndre ty an-dakilasy noho am-piasà any. Hitantsika baka amy zay fa tena miharaty tontolo toy.

3. Ino ty raha mila itandremantsika, le ino ty hodinihintsika amy lahatsoratsy toy ato?

³ Laha tsy miamby soa tsika, le mety ho zatsy mijanjy vola raty ka hanomboky hampiasa ani-zay koa. Fe Kristiana tsika  ka teantsika ty hanao raha mampifalifaly ani-Jehovah. Dikani-zay tsy tokony hivola raha raty mihintsy tsika. Teantsika laha mivola raha soa avao ty lelantsika, zany hoe midera ani-Ndranaharintsika iny. Hodinihintsika amy lahatsoratsy toy ato hoe manao akory ty hanaovantsika ani-zay lafa tsika 1) manompo, 2) mivory, noho 3) miresaky amin’olo andavanandro. Fe ndao tse horesahintsika hoe manino ro vatan-draha amy Jehovah ty raha volanintsika.

4. Laha hentea ty Malakia 3:16, manino ro vatan-draha amy Jehovah ty raha volanintsika?

⁴ Vakio Malakia 3:16. Hosoratini-Jehovah anatini-“boky fahatiarova” ao hoasany ty anaran’olo raiky laha hita amy ty raha volaniny hoe matahotsy azy noho mametsivetsy ty anarany ie. Hainao va hoe ino ty antony? Satria hita amy ty raha volanintsika ze anaty fontsika any. Hoy Jesosy: “Ze mameno ty fon’olo ro volanini-vavany.” (Mat. 12:34) Hita amy raha resahintsika hoe manao akory ty habeni-fitiavantsika ani-Jehovah. Teani-Jehovah ho velo zisiky farany amy tontolo vaovao ao ze olo tea azy.

5. a) Ino ty ifandrambesani-fanompoantsika amy ty raha volanintsika? b) Laha hentea sary io, ino ty raha tokony hotandremantsika lafa tsika miresaky?

⁵ Arakarakini-fomba fivolanantsika ro hahavy ani-Jehovah haneky ty fanompoa ataontsika ho azy. (Jak. 1:26) Ty sisany amin’olo tsy tea a Ndranahary rey masiaky lafa mivola. Tsy soa fanahy rozy sady miavonavo. (2 Tim. 3:1-5) Azo antoky fa tsy teantsika ty hanahaky an-drozy. Teantsika laha mampifalifaly ani-Jehovah ty raha volanintsika. Fe manao akory laha soa fanahy tsika lafa mivory na manompo, kanefa masiaky tsika lafa miresaky amy ty fianakaviantsika an-trano ao? Ho falifaly amintsika va Jehovah laha zay ty ataontsika?​—1 Pet. 3:7.

6. Ino ty vokany lafa nihitan’olo hoe tsy manao safà raty Kimberly?

⁶ Laha ampiasantsika amy fomba soa ty fahafahantsika mivola, le ho hain’olo hoe mpanomponi-Jehovah tsika. Lasa ho hitan’olo manodidy antsika soa hoe ino ty tsy  mampitovy “ty [olo] manompo a Ndranahary noho ty tsy manompo azy.” (Mal. 3:18) Zay mihintsy ty raha nataoni-ranabavy Kimberly. b Nivoatendry hanao devoara niaraky tamy mpiaraky mianatsy aminy rezay ie. Lafa nivita raha iny, le nihitan’ajà rey hoe tsy mitovy amy mpianatsy hafa Kimberly. Tsy mitsikotsiko olo ie sady tsy mitimbotimbo fa soa fanahy avao. Nahakinto ani-mpiaraky mianatsy amy Kimberly rey raha zay, farany rozy naneky hianatsy Baiboly. Tena falifaly Jehovah lafa mahavy olo haniry hianatsy mikasiky azy ty fomba fivolanantsika!

7. Natao-Ndranahary afaky mivola tsika. Manao akory ty teanao hampiasà ani-raha zay?

⁷ Teantsika iaby ty hivola raha manome voninahitsy ani-Jehovah noho mahavy antsika hifandramby soa amy rahalahy noho anabavintsika reo. Ino ty azontsika atao? Ndao tsika handiniky soso-kevitsy vitsivitsy azo orihy mba hahavy antsika “ho modely ... amy safà” avao.

8. Ino ty modely nengani-Jesosy ho antsika amy resaky safà lafa amy fanompoa eny?

⁸ Miezaha ho soa fanahy noho hanaja avao lafa mivola ndre manao raha mampeloky anao aza ty olo. Nasaran’olo raha maro Jesosy tamy ie mbo tan-tany etoy. Nivola ty olo fa nao zao ie olo mamo lava, tea hany, irakini-Devoly, tsy mpanaja Sabata, sady mpanivativa a Ndranahary mihintsy aza. (Mat. 11:19; 26:65; Lioka 11:15; Jaona 9:16) Fe tsy neloky Jesosy. Tokony hanahaky ani-Jesosy tsika, ka lafa misy olo masiaky amintsika le tsy tokony hasiaky aminy koa tsika. (1 Pet. 2:21-23) Fe tsy mora avao ty hoe soa fanahy lafa miseho raha zay. (Jak. 3:2) Ino ty hanampy antsika?

9. Ino ty hanampy antsika hahay hifehy ty raha volanintsika lafa tsika mitory?

⁹ Laha tsy soa fanahy aminao olo hitorianao iny le miezaha mba tsy ho meloky. Hoy rahalahy mana anara Sam zay: “Zao avao ty raha ataoko an-tsay: Tena mila mahay ty marina mikasiky a Ndranahary olo toy, le tiaroviko hoe afaky miova ie.” Tsy raha bevata kindraiky ro tena mampeloky ani-tompon-trano iny fa hoe niavy amy fotoa tsy mety aminy avao tsika. Lafa nitojiky olo meloky, ohatsy, ranabavy raiky mana anara Lucia zay, le nanao vavaky boribory ie, sady nangataky ani-Jehovah mba hanampy azy ho kalma avao noho hahay hiresaky am-panajà fa tsy hasiaky. Azontsika atao koa ty manao manahaky ani-ranabavy Lucia lafa tojiky olo meloky tsika.

10. Laha hentea ty 1 Timoty 4:13, ino ty tokony hataontsika raha kendrè?

¹⁰ Miezaha hahay hampianatsy. Tena nahay nitory Timoty, fe mbo nila nanasoa ty fahaizany  mampianatsy avao ie. (Vakio 1 Timoty 4:13.) Manao akory ty hahavy antsika ho lasa mpampianatsy mahay? Mila manoma soa tsika. Soa avao tsika fa mana fitaova sankarazany afaky manampy antsika hahay hampianatsy. Hanampy anao ty fanazavà amy bokikely Miezaha Marè amy Vakiteny Noho Fampianara noho ty fizarà hoe “Fianara Manompo” amy Kahiem-pivoria amy Fiaina Noho Fanompoa Kristiana ao. Ampiasanao soa va fitaova reo? Laha manoma soa tsika, le lasa hatòky tena lafa mivola fa tsy hatahotahotsy.

11. Ino ty nanampy ty rahalahy noho anabavy sisany hahay hampianatsy?

¹¹ Hihamahay mampianatsy koa tsika laha miana-draha baka amy mpitory hafa amy fiangona eo. Nieritseritsy Sam, azy niresahintsika taloha teroy iny hoe manino ty rahalahy noho anabavy sisany ro tena mahay mampianatsy. Nijanjininy soa amy zay rozy lafa nampianatsy, bakeo ie niezaky nanahaky an-drozy. Ty ahini-anabavy Talia koa, nihenteany soa hoe manao akory ty ataoni-mpandahateny mahay rey lafa manao lahateny, le lasa nahay niresaky noho niaraky nidiniky amin’olo amy faritany eny ie, sirtò amy fanontanea fapetrakin’olo matetiky rey.

12. Ino ty raha sarotsy amin’olo sisany?

¹² Samby afaky mandramby anjara iaby tsika lafa atao ty fivoriani-fiangona. Manao ani-zay, ohatsy, tsika lafa mihira noho manome valin-teny voaoma soa. (Sal. 22:22) Mety ho sarotsy amin’olo sisany ty mihira na manome valin-teny. Manahaky ani-zay koa va iha? Laha zay ty mahazo anao, le mety ho teanao ty hahay hoe ino ty nanampy ty olo hafa handresy ani-tahotsy zay.

13. Ino ty raha mety hanampy anao hihira amy fo lafa mivory?

¹³ Mihirà amy fo. Zao ty tena antony bevata mahavy antsika mihira lafa mivory: Hidera ani-Jehovah. Nieritseritsy ranabavy mana anara Sara zay hoe tsy mahay mihira ie. Fe ndre zay, teany ty hidera ani-Jehovah amy alalani-hira. Farany lafa manoma fivoria ie, le omaniny soa koa hira rey. Manao famerena ie, le iezahany hentea hoe ino ty ifandrambesani-tononkira iny amy raha hodinihy am-pivoria any rey. Hoy ty asany: “Manampy ahy raha zay mba hifantoky amy raha volanini-hira iny fa tsy amy ty fahaizako mihira.”

14. Laha somary menamenatsy iha, ino ty hanampy anao hanome valin-teny lafa mivory?

¹⁴ Manomeza valin-teny saky mivory. Tena sarotsy amin’olo sisany aloha ty manao ani-zay. Hoy Talia, azy niresahintsika taloha teroy iny: “Midobodoboky biby ty foko lafa zaho hiresaky amason’olo. Tena sarotsy amiko ty mamaly teny.” Fe tsy nahasaka ani-Talia tsy hanome valin-teny raha zay. Saky  manoma fivoria ie, le tiaroviny avao hoe tokony ho boribory noho mivanta ty valin-teny tokony hamea voalohany. Hoy ty asany: “Tsy manahy zany ndre ataoko boribory, tsotra, noho mivanta ty valin-teniko, satria zay ty teani-mpitariky fianara iny.”

15. Ino ty tokony hotiarovintsika mikasiky ty valin-teny ataontsika?

¹⁵ Ndre ty mpiara-manompo tsy saro-kenatsy aza mety hatahotsy hamaly teny kindraiky. Ino ty antony? Hoy ranabavy mana anara Juliet zay: “Misalasala hamaly teny aho kindraiky satria matahotsy aho tsy no tsotra marè ty valin-teny ameako na tsy de soa.” Fe tiarovo fa tsy mitaky raha maro Jehovah fa teany avao tsika laha manome ze valin-teny tena soa baka amintsika. c Tena falifaly ie laha manao ze fara herintsika tsika mba hanomeza valin-teny lafa mivory, ndre somary matahotsy aza tsika kindraiky.

16. Karaza safà manao akory ro tsy tokony hataontsika?

¹⁶ Ialao lafa atao “safà raty.” (Efes. 4:31) Niresahintsika taloha teroy hoe tsy tokony hivola raha raty mihintsy ty Kristiana. Fe mila miamby soa avao koa tsika satria misy safà sisany tsy avy le mora hita hoe safà raty, kanefa tsy tokony hataontsika. Mila miamby soa, ohatsy, tsika mba tsy hivola raha raty mikasiky olo tsy mitovy fiavia na foko amintsika, na tsy manaraky fomban-tany amintsika eo. Tsy teantsika koa ty hanao raha mampalahelo olo ka hivola raha mandratsy an-drozy. Nieky rahalahy raiky zay hoe: “Misy fotoa aho mieritseritsy hoe mampihehy ty raha volaniko sady tsy de manahy, kay hondy tena nampalahelo olo raha rey. Fe niezaky nanampy ahy avao valiko tanatini-tao maro. Nivolaniny mitoka aho lafa hitany hoe tsy de soa ty raha nivolaniko sady nampalahelo azy noho ty olo hafa.”

17. Ino ty azontsika atao mba hampahereza olo hafa? (Efesianina 4:29)

¹⁷ Manaova safà mampahery. Ka malaky mikinokino na be taray fa manaova safà fiderà. (Vakio Efesianina 4:29.) Maro ty raha azoni-Israelita rey nisaora, fe nitoretoreo avao rozy matetiky. Laha be taray tsika le lasa hanao ho zay koa ty olo hafa. Tiarovo fa nahavy ‘ty Israelita iaby himenimeny tamy Mosesy’ ty tatitsy raty nataoni-mpisafo tany folo rey. (Nom. 13:31–14:4) Mifanohitsy amy zay fa misy vokany soa ty safà fiderà. Azo antoky fa tena nampahery ani-anakampelani-Jefta iny ty safà fiderà nataoni-namany rey azy, ka vomaiky ie tsy ta hiala tamy fanompoa nampanaovy azy iny. (Mpits. 11:40) Hoy Sara,  azy niresahintsika taloha teroy iny: “Lafa midera ty hafa tsika, le manampy an-drozy hahatsapa hoe tea an-drozy Jehovah sady tea an-drozy koa ty fiangona.” Milà fomba hiderà ani-rahalahy noho anabavinao reo zany.

18. Laha hentea ty Salamo 15:1, 2, manino tsika ro tokony hivola ty marina, le ino iaby ty tafilitsy amy zay?

¹⁸ Mivolana ty marina. Tsy afaky hampifalifaly ani-Jehovah tsika laha tsy mivola ty marina. Halany lafa atao vandy. (Ohab. 6:16, 17) Maro ty olo mieritseritsy fa tsy mampanino ty hoe mavandy, fe tsy manao ani-zay tsika satria mivola Jehovah hoe raty raha zay. (Vakio Salamo 15:1, 2.) Tsy hoe tsy mavandy avao zany tsika, fa miamby soa koa mba tsy hivola raha mety hahavy ty olo ho diso hevitsy.

19. Ino koa ty raha mila tandremantsika?

¹⁹ Ka mitsikotsiko. (Ohab. 25:23; 2 Tes. 3:11) Nivola Juliet, azy niresahintsika taloha teroy iny hoe tena nisy vokany taminy ty tsikotsiko. Hoy ty asany: “Mahakivy ty mijanjy tsikotsiko, sady lasa tsy matoky an’olo mitsikotsiko iny sasy aho. Aia moa ty ahaizako laha tsy hitsikotsiko ahy amin’olo hafa any koa ie?” Lafa hitanao hoe manaly ta hivaliky tsikotsiko resaky iny, le ovao ka miezaha hiresaky raha mampahery.​—Kol. 4:6.

20. Tapa-kevitsy hanao ino iha?

²⁰ Mbo miay amy tontolo raty toy eto tsika. Tea mivola raty ty ankamaroan’olo ka mila miezaky mafy tsika mba hivola raha mampifalifaly ani-Jehovah avao. Tiarovo fa fanomeza baka amy Jehovah ty fahafaha mivola, ka tena vatan-draha aminy ty fomba ampiasantsika ani-raha io. Hitahy antsika ie laha miezaky mampiasa ani-raha io amy fomba soa tsika lafa manompo, mivory, noho miresaky andavanandro. Lafa horavàni-Jehovah tontolo raty toy, le ho moramora amintsika amy zay ty hanome voninahitsy ani-Jehovah amy ze raha volanintsika. (Joda 15) Fe zisiky iaviani-zay, loniky lahy iha ho tapa-kevitsy hampifalifaly ani-Jehovah amy ze ‘safà aboakini-vavanao.’​—Sal. 19:14.