1. Isawa nkoka djɛso djɛ ntepela mámpe?

 NKOKA dj’okotshɛso djɛ ntepela oyɛwɔnde opapɛyɛ w’imé Ndjambe kɛso kɛ ngandji. Ngo winá wɔ onto wɔ ntondo Adama ndatongama, nde ayalaka l’akoka wa ntepela la nsawola nya Papa kɛnde kel’olongo. Nde akokaki lonkina mfudjɛ totepela má nkfumba totepela tonkina tɔ bango. Adama akambaka la nkoka djɛsɔ djɛ nkotshɛ olemo wɔ yɔpɛyɛ wɔ ndjɔ anyama wiina. (Ewa. 2:19) Edjinge nde ayalaka lonkina l’osasa efula winá wɔ ndasawola mbala kɛ ntondo nya onto onkina, ntepela ente wandjɛnde wɔ mbɔngi wɔlɔ, Eva!​—Ewa. 2:22, 23.

2. Wopo wɔkɔnge yakambe l’etepela lá yopo yɛ nyɛtshi l’etsho wɛ ntondo la l’etsho wɛso wɛnɛ?

² Atahetá ilá watateyɛka nkamba la nkoka djɛso dj’otepela lá yopo yɛ nyɛtshi. Satana Djabolo adjimbaka Eva, ko lodjimbo lɔnde lotshindaka anto djɛ nangha nyɛtshi edjinge nkoma ase ntshamba djɛ djɔ. (Ewa. 3:1-4) Adama akambaka l’opapɛyɛ wɔnde w’otepela lá yopo yɛ nyɛtshi winá wɔ ndamame Eva nya Yehova lowo l’evunga wɛnde nyɔmɛlɛ. (Ewa. 3:12) Kaina adjimbaka Yehova m’ɔkɔngɔ wɔ nde ndjaka nyanghɛmɔkɔ kɛnde Abɛlɛ. (Ewa. 4:9) M’ɔkɔngɔ, inkanola yɛ Kaina yɛ yetaka Lamɛkɛ atshumbaka yeembo yɛnyɛki akambo wa lopango wananghemaki l’etsho w’indawikaka. (Ewa. 4:23, 24) Ko otepelaso lɔɔko nge? Tɛna ewandji ɛmɔtshi wɛ pɔlitikɛ wapalekɔ la nsɔnyi kɛ ntepela etepela wɛ nyɛtshi lá ntondo k’anto. Edjinge alekɔ itondo y’okakasano djɛ ntana wa filimɛ imɔtshi yepalekɔ l’etepela wɛ mbindo l’eteyi. Ambeki ndjokaka etepela wɛ nyɛtshi winá woyɛwɔ lá nkalasa, edjinge ambotshi winá woyɛwɔ lá ndjena djɛwɔ dj’elemo. Yɛnyi nde, okambelo wɔ l’etepela wɛ nyɛtshi nyɛnyɛka tii lá lɛdji lɔkɔnge lombotshitana ɛlɛmbɛ welendana la nanghedji l’andja wanɛ.

3. Kɛkɔnge k’oyɛso ladjɛ mbadjɛ dj’ipa nangha, ko kɛkɔnge k’ɔkɔpaso nshishima lá djamba djɛnɛ?

³ Ntsha topawadjisa, tokoka ndoyapɛyɛ lá ndjekameyɛ etepela  wɛ nyɛtshi ko iso ndowanga ndaatepela. Lá nsɔsɔlɔ, ladjikɛnde tolekɔ Akristo, iso nkɔpaka nsasangɛ Yehova, edjinge nkambo djɛsɔ djepakome ngo lá ndjewɔ etepela wɛ mbindo toko. Koko lonkina, iso ladjɛ nkamba l’opapɛyɛ wɔso wɔ ntepela lá yopo yɛ wɔlɔ, ntepela ente lá yopo yɛngɔpɛyɛ Ndjambe kɛso lomo. Lá djamba djɛnɛ, tongoshishima wopo w’okokaso nangha nkambo djɛsɔ 1) l’olemo w’ipoposanyɛ, 2) lá nsanghanyɛ y’otshumano, la 3) l’asɛkɛlɔ waso wa lofu la lofu. Koko ntondontondo, nyontshɔ tokoshishima lamo Yehova ilakande yimba l’etepela wɛso.

4. Lá nkilika Malaki 3:16, lamo Yehova ilakande yimba l’etepela wɛso?

⁴ Wala Malaki 3:16. Okoka ndjewa lamo Yehova ófunakandé lá ‘onkanda wɔnde wɔ mvungo’ wiina w’anto w’etepela wɛwɔ nyɛnyɛka ambɔ, iwɔ ndoowokaka wɔma la ntɔnɔlaka lá nkambo djɛ djiina djɛnde? Etepela wɛso nyɛnyɛka kɛnɛ kelekɔ l’oloko wɔso. Yeso atepelaka ante: ‘Má efula k’akambo walekɔ l’oloko ndeke ɔlɔmɔ otepelakande.’ (Mat. 12:34) Kɛnɛ k’ɔsɔnaso djɛ ntepela nyɛnyɛka lɛdji lɔ ngandji k’okaso Yehova. Edjinge Yehova nkɔpaka djɛ wanɛ wowoka ngandji nsasanga la lowiko lotshindalotshinda l’andja wa bango.

5. a) Wopo wɔkɔnge ɔtɛmwɛlɔ wɔso oyɛwɔ la djokanelo la kɛnɛ k’otepelaso? b) Etengo yɔmbɛnyɛ lá ntshango, kɛkɔnge k’oyɛso ladjɛ ndjewa lá kɛnɛ kelendana l’etepela wɛso?

⁵ Yopo yɛso yɛ ntepela nkoka nyɛnyɛ ntsha Yehova nkoka ndjawola ɔtɛmwɛlɔ wɔso kana lako. (Dja. 1:26) Anto amɔtshi wápakɔpɛ́ Ndjambe ndjalaka l’etepela wɛkɔta, wɛ lopango, la ntepelaka l’otako onkfumɔ. (2 Ti. 3:1-5) Lá nsɔsɔlɔ topakombola ndjala etengo iwɔ. Iso nkombolaka nsasangɛ Yehova m’etepela wɛso. Yehova nkoka nsasanga laso ntsha iso nkambaká l’etepela wɛ lɔwɔndɔ la wɛ wɔlɔ winá woyɛso lá nsanghanyɛ yɛso y’Akristo kana l’olemo w’ipoposanyɛ koko ntepelaka la lopango edjinge lá yopo yepalekɔ la ngandji te ase nkfumbo kɛso winá wɔ anto ankina yopatɛnyi?​—1 Pɛ. 3:7.

6. Eposelo wɛ wɔlɔ wɛkɔnge weposisa má yopo yɛ wɔlɔ yɛ ntepela yɛ Kimberly?

⁶ Winá w’okambaso l’opapɛyɛ w’otepela lá yopo yɛ wɔlɔ, iso ndawewanyɛka etengo enkambi wɛ Yehova. Iso nkotshɛká anto watodjingi djɛ nyɛna papoo otshikitano wolekɔ ‘l’antenyɛ  wanɛ wakambelá Ndjambe la wanɛ wapokambelá.’ (Mal. 3:18) Tokoshishima wopo wɔ nsɔsɔlɔ kɛ nkambo djɛsɔ yɛnama le nkaana ketawɔ Kimberly. * Wɔsɔnaka nde nya winande ɔmɔtshi welá nkalasa djɛ nkamba olemo ɔmɔtshi lá nkalasa. M’ɔkɔngɔ wɔ iwɔ nkamba esanga, winande wɔsɔ ɛnaka ante Kimberly ntshikitana l’ambeki ankina. Nde apalekɔ la lɔtɛndɔ, ntepelaka ngo akambo wa wɔlɔ, la apakambe l’etepela wɛ mbindo. Winande welá nkalasa wɔsɔ akamɔka efula ko awangaka ndjeka Bible nya Kimberly. Ɔsɔngo osasa woyala la Yehova winá wɛnande totepela lá yopo yesepa anto ankina l’akambo wa nsɔsɔlɔ!

7. Kɛkɔnge kɛ ngombotshindama djɛ nangha l’opapɛyɛ w’otepela wɔ Ndjambe ndakɔpɛyɛ?

⁷ Isankfumɔ nkombolaka ntepela lá yopo yɛngɔpɛyɛ Yehova lomo la yengotokotshɛ djɛ ndjala la djokanelo djɛ wɔlɔ la wananyɔ. Djɛkondeke nyontshɔ tokoshishima winá wɔsɔ topo tɔmɔtshi tokokaso nkindjɛ mpɛyɛ ‘ndjɔmbɔmba . . . m’etepela.’

8. Ndjɔmbɔmba kɛkɔnge kɛ Yeso ndatotshikela lá wopo w’okokaso nkamba l’etepela wɛso l’olemo w’ipoposanyɛ?

⁸ Tepela lá yopo yɛ wɔlɔ edjinge la dilɛmɛlɔ winá w’anto ankina okomadjɛwɔ. Winá wɔ ndayalaka lá looko, anto watepelaki ambɔ Yeso alekɔ ɔnɔyi wɔ waana, kanga deyi, onkambi wɔ Djabolo, apalɛmɛyɛka ɔlɛmbɛ wɔ Saba la onto wopalekɔ la dilɛmɛlɔ te Ndjambe. (Mat. 11:19; 26:65; Luka 11:15; Dj. 9:16) Koko, Yeso átaakadjimola l’etepela wɛ nkɛlɛ. Lá ndjɔmbɔmba kɛ Yeso, winá w’anto otepelawɔ laso lá yopo yɛ nyɛtshi, topakoke ndaakadjimola la nkɛlɛ. (1 Pɛ. 2:21-23) Koko lá nsɔsɔlɔ, apalekɔ wɔdju ndjala wɔlɔ winá w’anto otepelawɔ nyɛtshi lá nkambo djɛso. (Dja. 3:2) Kɛkɔnge kekoka ntokotshɛ́?

9. Kɛkɔnge kekoka ntokotshɛ́ djɛ nama lolemi lɔso winá woyɛso l’olemo w’ipoposanyɛ?

⁹ Winá wɔ anto amɔtshi okokadjimolawɔ nyɛtshi winá woyɛ l’olemo w’ipoposanyɛ, tomalake. Wɔnanyɔ ɔmɔtshi wetawɔ Sam atepelaka ante: “Lemi ndjilaka yimba lá djonyi djelekɔ l’anto djɛ ndjoka akambo wa nsɔsɔlɔ, la mvungɔka ente iwɔ nkoka ntshikitana.” Lá mbamba imɔtshi onto wotekameyɛ nkoka nyomala ngo mande tomboyɛka lá winá wɔ nyɛtshi. Winá w’opomanaso l’onto ɔmɔtshi wolekɔ la nkɛlɛ, iso nkoka ndjokola kɛnɛ kɛ nkaana kɛmɔtshi ketawɔ Lucia onanghakande. Iso nkoka nangha lɔlɔmbɔ l’itenyi djɛ ndɔmba Yehova atokotshɛ́ djɛ nama vu djɛso la ndakota dj’ipa ntepela nkambo mɔtshi djɛ nyɛtshi kana djepalekɔ la dilɛmɛlɔ.

10. Lá nkilika 1 Timɔte 4:13, okoma wɔkɔnge woyɛso ladjɛ ndawilela?

¹⁰ Yala wetsha wɔ wɔlɔ. Timɔte ayalaki nsakodji kɛ balo, koko nde ayalaki la djonyi djɛ ndɔngɔsɔla yopo yɛnde yɛ mpoposanyɛ. (Wala 1 Timɔte 4:13.) Wopo w’ɔkɔnge wokokaso ndeka  ndjala wetsha wɛ wɔlɔ w’olemo w’ipoposanyɛ? Iso ladjɛ ndalɔngɔsɔlaka wɔlɔ. Mpeyinde, tolekɔ la mpeko djetshikitanyi djekoka ntokotshɛ́ djɛ nkoma wetsha wɛ wɔlɔ. Wɛ nkoka ntana alako wa wɔlɔ efula ntsha wɛ mbalaka inkakanda Yasha lo wadielo ndo lo wetshelo la l’etenyi kelekɔ l’ɔtɛ wɔ djoyi ante “Yapɛyɛ l’olemo w’ipoposanyɛ” kelekɔ lá Dikatshi dia losanganya lɔsɛnɔ ndo olimu aso w’Okristo. Ongokambake l’ekanda wɛsɔ? Winá woyalɔngɔsɔlaso wɔlɔ, topangoleka ndjoka wɔma koko tongotepela la ndashikikɛ kenkfumɔ.

11. Wopo wɔkɔnge Akristo amɔtshi iyakome wetsha wɛ wɔlɔ?

¹¹ Iso nkoka nkoma wetsha wɛ wɔlɔ efula má nkɔmɛka anto ankina wal’otshumano la mbaka olakanyelo mewɔ. Sam, kanga sotepelaki má djiko, ndawopolaka nyɔmɛlɛ kɛnɛ kekotshɛ́ Akristo amɔtshi djɛ ndjala wetsha wɛ wɔlɔ. Nde ndjekameyɛka la nkɔmɛ nkfumɔ yopo yɛwɔ yɛ ndakanyɛ, ko masɔ nde mponaka djɛ ndaawokola. Nkaana kɛmɔtshi ketawɔ Talia ndjekaka wopo wɔ ntepela la wɔ ntɔnɔla lá weepó ɛmɔtshi w’anto olekakawɔ djopola efula l’olemo w’ipoposanyɛ má ndjila yimba lá wopo wɔ antepedji wambopakisɔ ɔpɛyɛwɔ wamba wawɔ.

12. Ekakasano wɛkɔnge welekɔ l’anto amɔtshi?

¹² Isankfumɔ nkoka nkotshɛ́ djɛ nsanghanyɛ yɛso y’otshumano mpetaka wɔlɔ má ntshumbaka teembo esanga la má mpɛyɛka kɔmantɛrɛ yɛ salɔngɔsɔla wɔlɔ. (Yee. 22:22) Anto amɔtshi wangoyalake l’okakasano wɔ ntshumba kana mpɛyɛ kɔmantɛrɛ lá nsanghanyɛ. Oyɛwɔ nde nghɔsɔ edjinge lewɛ? Ntsha nghɔsɔ, ndjeka kɛnɛ kékótshisá anto ankina djɛ nyimɛ wɔma angokokotshɛ́.

13. Kɛkɔnge kekoka nkokotshɛ́ djɛ ntshumba l’oloko ɔmɔ winá woyɛ lá nsanghanyɛ?

¹³ Tshumba l’oloko wɔko onkfumɔ. Winá wotshumbaso teembo tɔso t’Onkfumi, okoma wɔso wɔ ntondo ladjɛ ndjala wɔ numɛ Yehova. Nkaana kɛmɔtshi ketawɔ Sara apayawɔsaka djɛ nde alekɔ ntshumbi kɛ wɔlɔ. Koko, nde nkɔpaka numɛ Yehova la teembo. Djɛ nkotshɛ okoma wɔsɔ, nde ndɔngɔsɔlaka teembo lá mbandja etengo ndɔlɔngɔsɔlaka ntenyi nkina djɛ nsanghanyɛ. Nde mvungolaka teembo nyɔmɛlɛ lá mbandja edjinge nde mponaka djokanelo djelekɔ l’antenyɛ etepela welá teembo la akambo wangekama lá losanghanyɛ. Nde ntepelaka ante: “Kɛsɔ nkotshɛka lemi djɛ ndeka ndjila yimba l’etepela welá yeembo koko ape lá nkoka djɛmi djɛ ntshumba.”

14. Ntsha olekɔ ɔnsɔnyi ɔnsɔnyi, kɛkɔnge kekoka nkokotshɛ́ djɛ mpɛyɛ kɔmantɛrɛ lá nsanghanyɛ?

¹⁴ Pɛyɛka kɔmantɛrɛ mbala la mbala. Lá nsɔsɔlɔ, nkambo djɛsɔ nkoka ndjala okakasano w’ekekete le anto amɔtshi. Talia, kanga sotepelaki ndambo má djiko ntepelaka ante: “Langoyalake la wɔma efula djɛ ntepela winá woyɛmi lá ntondo k’anto ankina, kaanga anto efula  yopasipisoyɛka nkambo djɛsɔ ladjikɛnde langotepelake ngo ɔkɔkɛ. Djɛkondeke mpɛyɛ kɔmantɛrɛ alekɔ itondo y’okakasano le lemi.” Koko, Talia atatshika mpɛyɛ kɔmantɛrɛ. Winá wɔlɔngɔsɔlakande nsanghanyɛ, nde namaka lá wɔɔngɔ ante kɔmantɛrɛ kɛ ntondo kelá itenyi ladjɛ ndjala itenyi edjinge ladjɛ nkadjimola mbala kɛkɔ kɛmɔ lá woopó. Nde ntepelaka ante: “Ntsha nsakiso kɛmi kelekɔ wɔdju, itenyi, la kekadjimola lá woopó, mbɔ kelekɔ kɛ wɔlɔ ladjikɛnde wopo wɔ nsakiso kɛ nghɔsɔ ndeke ilɔndjɛ yɛ wekelo ɔkɔpakande.”

15. Kɛkɔnge k’oyɛso ladjɛ mvungɔka lá kɛnɛ kelendana la kɔmantɛrɛ yɛso?

¹⁵ Kaanga Akristo wapalekɔ ɛnsɔnyi ɛnsɔnyi kana vu vu, nkoka ndjala l’okakasano wɔ mpɛyɛ kɔmantɛrɛ. Lamo? Nkaana kɛmɔtshi ketawɔ Juliet mpakisolaka ante: “Lá mbamba imɔtshi langokaakandake djɛ mpɛyɛ kɔmantɛrɛ ladjikɛnde langɛnake etengo kɔmantɛrɛ kɛmi kelekɔ itenyi efula la kepalekɔ wɔlɔ.” Koko, tovungɔke ente, Yehova ɔkɔpande nde, iso mpɛyɛ kɔmantɛrɛ yeleka wɔlɔ lá nkilika akoka waso. * Nde nsasangaka efula winá wonanghaso k’enkfumɔ k’oyɛso l’akoka wa nangha djɛ mpɛyɛ kɔmantɛrɛ lá nsanghanyɛ y’otshumano, lasɔ totawolake djɛ wɔma kana nsɔnyi ntokawoyɛ ɔkɔngɔ.

16. Wopo w’etepela wɛkɔnge woyɛso ladjɛ ndjewɔ?

¹⁶ Totone ‘wepo w’etepela enkfumɔ wɛ nyɛtshi.’ (Ɛfɛ. 4:31) Etengo sɛnaki má bango, Akristo wapakoke nkamba l’etepela wɛ nyɛtshi. Koko alekɔ wepo w’etepela ɛmɔtshi wɛ nyɛtshi w’oyɛso ladjɛ ndjewɔ. Ndjɔmbɔmba, iso ladjɛ mbadjɛ dj’ipa ndjɛdjɛ anto lá yopo yɛ nyɛtshi winá w’otepelaso nkambo djɛ djena djɛwɔ, tɔkɔlɛ tɔwɔ, kana engidji wɛwɔ. Lonkina, topakɔpɛ nkiyanyɛ anto ankina má ndaashimela etepela wákɔta. Wɔnanyɔ ɔmɔtshi ndjawolaka ante: “Lá mbamba imɔtshi láshimelaki anto etepela wákɔta, lákanelaki ente lako nyɛtshi ladjikɛnde lá lɔsɔkɔ ndeke otepelami koko lá nsɔsɔlɔ wakiyanyɛki anto amɔtshi. Koko l’ilá k’ɛnɔnyi efula, wadjɛmi ankotshɛki má nshimela lemi lá wisisa winá wɔ maposɛka etepela wɛ nyɛtshi la wokiyanyɛki nde kana anto ankina.”

17. Lá nkilika Ɛfɛsɛ 4:29, wopo wɔkɔnge w’okokaso nkembɛka anto ankina?

¹⁷ Tepelaka lá yopo yekembɛ anto ankina. Yala entshupa djɛ mbandola koko ape djɛ nyɔnyɔla kana nkiyana. (Wala Ɛfɛsɛ 4:29.) Ase Isariyɛlɛ wayalaki l’akambo efula wa yakokaka nyɛnyɛ djedjɛ djɛwɔ, koko l’edjena kɛ nangha nghɔsɔ, iwɔ wayalaki l’enkfumbo kɛ ndakiyanyɛ. Ikanyi yɛ ndakiyanyɛ nsambelanaka. Wɛ nkoka mvungɔ ente losango lɔ nyɛtshi lɔ antɔmbi djomi lotshindaka ‘ase Isariyɛlɛ ankfumɔ djɛ . . . nunghanunghela Mɔsɛ.’ (Ew. 13:31–14:4) L’onkoko  onkina, lowando nkoka ntshinda onto djɛ nangha kɛnɛ kelekɔ wɔlɔ. Iso nkoka ndashikikɛ ente wɔna Jafɛta w’omoto awaki wolo wɔ ntshikala l’olemo wɔnde, mpeyi la lowando lɔ ndawaka me ntombe yɛnde yɛ amato. (Tos. 11:40) Sara, kanga sotepelaki má djiko ntepelaka ante: “Winá wowandolaso anto ankina, iso ndaakotshɛka dj’iwɔ ndawoka ambɔ iwɔ nkɔpamaka me Yehova la wɔsa opiko l’olonganyelo wɔnde.” Djɛkondeke, honaka mbamba yɛ mbandolaka anto l’oloko ɔmɔ.

18. Lá nkilika Yeembo 15:1, 2, Lamo oyɛso ladjɛ ntepelaka nsɔsɔlɔ, ko nkambo djɛsɔ osakisolawɔ nge?

¹⁸ Tepelaka nsɔsɔlɔ. Topakoke nsasangɛ Yehova ntsha topatepela nsɔsɔlɔ. Nde ntonaka topo tonkfumɔ t’ongolo. (Woo. 6:16, 17) Kaanga oyɛwɔ nghɔsɔ anto efula lɔɔkɔ kɛnɛ wapɔshi ongolo etengo wolekɔ nyɛtshi, koko iso ndɔsaka ongolo etengo Yehova ɔsande. (Wala Yeembo 15:1, 2.) Lá nsɔsɔlɔ, iso ntonaka nsɔsɔlɔ yɛ totenyi, koko lonkina iso ntonaka nyɛnyɛ etengo anto ankina walekɔ nyɛtshi m’etepela wɛso.

19. Nkambo nkina djɛkɔnge dj’oyɛso ladjɛ ndalama dj’ipa nangha?

¹⁹ Ewɔ djɛ ntshanghanyɛ akambo wa ambɔ ante. (Woo. 25:23; 2 Te. 3:11) Juliet, kanga sotepelaki ndambo má djiko nsiposoyɛka eposelo weyalisa la akambo wa ambɔ ante tende. Nde ntepelaka ante: “Ndjekameyɛ etepela wɛ nyɛtshi wɛ ambɔ ante, ndɛmbɛka lemi, la ntshindaka lemi dj’ipa ndjeelá onto wotshanghanyɛ akambo wakɔ oloko. Nkambo deka nde, wopo wɔkɔnge w’okokami ndjewa ente nde apongototepela edjinge nkambo djɛmi le anto ankina?” Ntsha ɔmbɛna ente ntshawo djɛnyo mbotshɔ tá akambo wa ambɔ ante, hɛngɔla ntshawo djɛnyo tá akambo waleka wɔlɔ.​—Kɔl. 4:6.

20. Nkano djɛkɔnge ngombɔsa lá kɛnɛ kelendana l’etepela wɛko?

²⁰ Ladjikɛnde towika l’andja wambolola kfu l’etepela wɛ nyɛtshi, iso ladjɛ nangha la wolo djɛ ndashikikɛ ente etepela wɛso nsasangɛka Yehova. Tovungɔke ente, nkoka djɛ ntepela alekɔ opapɛyɛ w’ime Yehova, edjinge nde ndjilaka yimba lá wopo wokambaso l’opapɛyɛ wɔkɔ. Nde angɔtshɔkɔla welo wɛso wɛ l’oloko ɔmɔ w’ilaso djɛ ntepela lá yopo yɛ wɔlɔ winá woyɛso l’olemo w’ipoposanyɛ, lá nsanghanyɛ, edjinge l’asɛkɛlɔ waso wa lofu la lofu. Winá wɔ Yehova ndongootshita andja wa nyɛtshi wanɛ, angoyala wɔdju leso djɛ ndɔpɛyɛ lomo má etepela wɛso. (Yuda 15) Winá wokongelaso etena kɛsɔ, ɔsa nkano djɛ nsasangɛka Yehova la ‘etepela w’imá ɔlɔmɔ’ wɔko.​—Yee. 19:14.