1. Unfa a du waka taa u sa fan?

 DI FAN di u sa fan da wan kado di Gadu da u. Di Gadu mbei Adam, nöö a bi mbei ën a sö wan fasi taa hën ku ën bi sa ta fan. Adam bi sa mbei njunjun wöutu tu. A bi mbei njunjun wöutu di a bi musu da dee mbeti në (Ken. 2:19). Nöö a musu u dë taa a bi wai seei di a bi sa fan ku hën mujëë Eva, u di fosu pasi!​—Ken. 2:22, 23.

2. Unfa sëmbë bi wooko ku di kado di Gadu da u a di ten di pasa, nöö unfa de ta wooko ku ën a di ten aki?

² An bi tei longi seei, hën a ko pasa taa libisëmbë wooko ku di kado aki a wan föutu fasi. Saatan Didibi bi mindi soni, hën di soni aki mbei taa libisëmbë ko abi zöndu (Ken. 3:1-4). Adam an bi wooko ku di kado aki a wan bunu fasi. Di a pasa Jehovah buka, hën a bi taki taa Jehovah ku Eva de mbei (Ken. 3:12). Kain bi mindi soni di Jehovah bi fan ku ën baka di a kii hën baaa (Ken. 4:9). Bakaten, wan bakamii u Kain de kai Lamëki bi taki wan soni di bi ta lei unfa dee sëmbë u di ten fëën bi ta libi hogi tjika (Ken. 4:23, 24). Unfa soni dë a di ten aki? So juu dee tiima seei ta fan a wan fasi di an fiti, nöö de an ta pena fii sen seei. De ta kosi sëmbë a gaansë u dee fëlön u di ten aki. Dee mii ta jei soni di an fiti a siköö, nöö gaansëmbë ta jei dee lö soni aki a wookope tu. Di fan di sëmbë ta fan a wan fasi di an fiti a di ten aki, ta lei unfa di goonliba aki ko hogi tjika.

3. Ku un soni u musu ta köni, nöö fuun soni woo taki a di woto aki?

 ³ U di u sa ko guwenti di fasi fa sëmbë ta fan a di ten aki, mbei u musu köni taa wa ko ta fan sö tu. U di u da Keesitu sëmbë, söseei u di u kë mbei Jehovah wai ku u, mbei wa o ta taki soni di an fiti. Ma woo ta taki soni di o tja gafa ko da di Gadu fuu. Di soni dë o lei taa u ta wooko bunu ku di kado di a da u. A di woto aki, woo luku unfa u sa du di soni aki te u dë a di peleikiwooko, te u dë a dee komakandi, ku te u ta fan ku wotowan. Ma boo luku ufö faandi mbei Jehovah ta buta pakisei a di fasi fa u ta fan.

4. Faandi mbei Jehovah ta buta pakisei a dee soni dee u ta taki, te u luku Maleaki 3:16?

⁴ Lesi Maleaki 3:16. I sabi faandi mbei Jehovah o mëni dee dinima fëën dee ta fan a wan fasi di ta lei taa de ta lesipeki ën, söseei dee ta lei taa de ta hoi ën a pakisei ö? Dee soni dee u ta taki ta lei andi dë a u hati. Jesosi bi taki taa: „Di soni di fuu hati, hën buka ta taki” (Mat. 12:34). Dee soni dee u ta taki ta lei unfa u lobi Jehovah tjika. Jehovah kë taa dee sëmbë dee lobi ën musu libi u teego a di njunjun goonliba.

5. (a) Unfa di fasi fa u ta fan nama ku di dini di u ta dini Gadu? (b) Andi u musu hoi a pakisei te a nama ku di fasi fa u ta fan, kumafa u ta si a di peentje?

⁵ Di fasi fa u ta fan sa mbei Jehovah wai ku di fasi fa u ta dini ën (Jak. 1:26). So sëmbë di an lobi Gadu, ta fan goofu ku sëmbë, söseei de ta fan a wan fasi di ta lei taa de abi gaanfasi (2 Tim. 3:1-5). Wa kë dë kuma dee lö sëmbë dë. U kë u Jehovah wai ku di fasi fa u ta fan. Ma i si kuma Jehovah o wai ku u ee u ta fan sutisuti ku sëmbë te u dë a dee komakandi ku te u dë a di peleikiwooko, ma te u dë a wosu nöö u ta fan ku dee sëmbë fuu a wan fasi di an fiti ö?​—1 Pet. 3:7.

6. Andi bi pasa u di Kimberly bi fan a wan fasi di fiti?

⁶ Te u ta fan ku wotowan a wan suti fasi, nöö u ta lei taa u da dinima u Jehovah. A di fasi aki sëmbë o sa si „ambë ta dini Gadu, ku ambë an ta dini ën” (Mal. 3:18). Boo luku unfa a bi pasa ku wan sisa de kai  Kimberly. b A bi musu du wan siköö soni makandi ku wan mujëë mii. Baka di de bi wooko makandi, hën di mii bi ko si taa Kimberly an bi dë kuma dee woto mii. A bi ta fan bunu ku sëmbë, an bi ta kosi sëmbë a baka, söseei an bi ta kosi te a bi ta fan. Di fasi fa Kimberly bi ta tja hënseei bi bigi da di mujëë mii aki te a bi kë lei soni u Bëibel. Jehovah ta wai seei te u ta fan a wan fasi di ta mbei taa sëmbë ta kë ko sabi soni u di tuutuu lei!

7. Andi i dë kabakaba u du ku di kado di Gadu da i?

⁷ Hii u tuu kë fan a wan fasi di ta tja gafa ko da Jehovah, söseei di ta mbei u ku dee baaa ku dee sisa fuu ko dë möön gaan mati. Boo taki u wantu fasi fa u sa ta lei taa u da sëmbë di wotowan sa djeesi a di fasi fa u ta fan.

8. Unfa u sa djeesi Jesosi a di fasi fa a bi ta fan ku sëmbë di a bi ta du di diniwooko fëën?

⁸ Fan a wan suti fasi, söseei a wan lesipeki fasi, hii fa te hati fii boonu. Di Jesosi bi dë a goonliba aki, sëmbë bi ta taki taa a bi dë wan daanma, taa a bi ta njan hia poi, taa a bi dë wan wookoma u Didibi, taa an bi ta hoi di Saba daka, söseei taa an bi ta lesipeki Gadu seepiseepi (Mat. 11:19; 26:65; Luk. 11:15; Joh. 9:16). Ma tökuseei Jesosi an bi toona piki de hati soni baka. Leti kuma Jesosi, wa musu fan goofu ku sëmbë, aluwasi de fan goofu ku u (1 Pet. 2:21-23). Wë di soni aki an dë wan kösökösö soni u du (Jak. 3:2). Ma andi sa heepi u?

9. Andi sa heepi u fu fan a wan lesipeki fasi te u dë a di peleikiwooko?

⁹ Te wan sëmbë hogi da i te i dë a di peleikiwooko, nöö mbei möiti u hati fii an boonu ku ën. Wan baaa de kai Sam bi taki taa: „Mi ta mbei möiti u möön buta pakisei a di dë di a dë fanöudu u di sëmbë jei di bunu buka, söseei a di tooka di a sa tooka hën libi.” So juu di sëmbë hati ta boonu u di wa go nëën a wan bunu ten. Te u miti ku wan sëmbë di ta ligei ku u, nöö u sa du andi wan sisa de kai Lucia ta du. U sa begi kölö sö, nöö u hakisi Jehovah faa heepi u fu wa ligei, söseei fu wa taki soni di o lei taa wa abi lesipeki.

10. Un maaka u musu buta da useei, te u luku 1 Timoteo 4:13?

¹⁰ Ko toon wan möön bunu leima. Timoteo bi dë wan bunu peleikima, ma tökuseei a bi musu mbei möiti faa ta lei sëmbë soni a wan möön bunu fasi go dou. (Lesi 1 Timoteo 4:13.) Unfa u sa toon möön bunu leima? U musu seeka useei bunu a fesi. U abi peipei wookolai di ta heepi u fuu ko toon möön bunu leima. I sa feni bunu lai a di brochure Ko toon wan möön bunu lesima ku wan möön  bunu leima. Söseei i sa feni bunu lai a di pisi „Mbei möiti u ko toon wan möön bunu peleikima”, di dë a Di libi ku di diniwooko fuu kuma Keesitu sëmbë komakandi-buku. I ta wooko ku dee wookolai aki ö? Te u ta seeka useei bunu a fesi, nöö senuwe an ta naki u sö, söseei u sa möön dë seiki u di soni di u ta taki.

11. Unfa so Keesitu sëmbë ko toon möön bunu leima?

¹¹ U sa ko toon möön bunu leima te u ta lei soni a wotowan u di kemeente. Baaa Sam, di u bi taki soni fëën a fesi, bi hakisi hënseei unfa a waka taa so baaa ku sisa ta sa’ u lei sëmbë soni a sö wan bunu fasi. A ta buta pakisei a di fasi fa de ta lei sëmbë soni, nöö a ta mbei möiti u djeesi de. Wan sisa de kai Talia ta buta pakisei a di fasi fa dee baaa ta hoi taki. Di soni aki heepi ën faa ko sabi unfa a musu piki te sëmbë hakisi ën soni di de lo’ u hakisi dee Kotoigi te de ta du di peleikiwooko.

12. Andi ta taanga da so sëmbë u de du?

¹² Hii u tuu sa mbei soni waka bunu a dee komakandi te u ta kanda, söseei te u ta seeka useei bunu fuu da piki (Ps. 22:22). A ta taanga da so sëmbë u de da piki nasö u de kanda a komakandi. A ta taanga da i tu ö? Ee sö a dë, nöö kandë joo kë sabi andi bi heepi wotowan fu an ko ta taanga da de sö möön.

13. Andi sa heepi i fii kanda ku hii i hati te i dë a dee komakandi?

¹³ Kanda ku hii i hati. Di möön fanöudu soni mbei u ta kanda a dee komakandi, hën da fuu gafa Jehovah. Wan sisa de kai Sara ta si kuma an sa’ u kanda sö bunu. Ma tökuseei a ta kë kanda gafa Jehovah. Fëën mbei te a ta seeka da dee komakandi, nöö a ta kanda dee kanda tu. Te a ta du di soni aki, nöö a ta luku unfa dee kanda nama ku dee soni dee a o lei a di komakandi. Sara bi taki taa: „Di soni dë ta heepi mi u mi ta möön buta pakisei a dee wöutu u di kanda, ka u mi ta buta pakisei a di fasi fa mi ta kanda.”

14. Andi sa heepi i fii da piki a komakandi, aluwasi ee i ta fëëë?

¹⁴ U musu lo’ u da piki. Di soni aki sa dë wan taanga soni da so sëmbë. Talia, di u bi taki soni fëën kaa, bi taki taa: „Senuwe ta naki mi gaanfa seei te mi musu fan a sëmbë fesi. Fëën mbei a ta taanga da mi u da piki. Ma u di töngö u mi an ta tëëmë, mbei sëmbë an sabi taa sö mi ta fii.” Hii fa soni dë sö da Talia, tökuseei a ta da piki go dou. Te a ta seeka da komakandi, nöö a ta hoi a pakisei taa di fosu piki u wan hakisi musu dë di soifi piki, söseei an musu langa. A bi taki taa: „Di soni aki kë taki taa a dë wan bunu soni te dee  piki u mi an ta langa poi, te de dë soifi, söseei te de an taanga u fusutan, u di dee lö piki dë di baaa di ta hoi di takimakandi ta kë.”

15. Andi u musu hoi a pakisei te u ta da piki?

¹⁵ So juu a ta pasa taa wan Keesitu sëmbë an ta sen u da wan piki, ma tökuseei an ta da piki. Faandi mbei? Wan sisa de kai Juliet bi taki taa: „So juu ma ta kë da piki, u di mi ta fëëë taa dee piki u mi an o bunu tjika.” Hoi a pakisei taa Jehovah kë fuu mbei möiti fuu da dee möön bunu piki dee u sa da. c Jehovah ta wai ku u te u ta dë kabakaba u da piki a dee komakandi, hii fa u sa ta fëëë so juu.

16. Ku un pei fasi u fan u musu ta köni?

¹⁶ Na „kosi sëmbë” (Ef. 4:31). Kumafa u bi taki kaa, Keesitu sëmbë an musu ta kosi wotowan. Ma u musu ta köni ku woto soni tu. U musu ta köni fu wa taki soni u mbei sëmbë u wan woto lö, nasö u wan woto köndë fa. Söseei wa musu taki soni di sa hati wotowan. Wan baaa bi taki taa: „So juu mi bi ta mbei sipootu, ta taki soni di mi bi mëni taa da soni u mbei sëmbë lafu, ma dee soni dë bi ta hati wotowan. Mi mujëë bi heepi mi u fusutan taa so u dee soni dee mi bi ta taki bi ta hati hën ku woto sëmbë tuu.”

17. Unfa u sa da wotowan taanga, te u luku Efeise 4:29?

¹⁷ Taki soni di sa da wotowan taanga. I musu dë kabakaba u gafa wotowan, ma ja musu ta guunjan. (Lesi Efeise 4:29.) Dee Isaëli sëmbë bi sa ta da Gadu tangi da hii dee soni di a bi ta du da de, ma ka u de du sö, nöö de bi ta guunjan hii juu. Te u ta guunjan hii juu, nöö a sa mbei wotowan seei ko ta guunjan tu. Di teni u dee womi dee bi go tjubi luku wan köndë bi konda hogi soni da dee Isaëli sëmbë, hën hii de tuu bi bigi ta kuutu Mosesi (Nöb. 13:31–14:4). Ma te u ta gafa wotowan, nöö a sa mbei hii sëmbë ta möön dë waiwai. U sa dë seiki taa di mujëë mii u Jefita bi feni taanga u du di wooko fëën go dou, u di dee mati fëën bi ta gafëën (Kuutm. 11:40). Sara di u bi taki soni fëën a fesi, bi taki taa: „Te u ta gafa wotowan, nöö a ta mbei de fii taa Jehovah lobi de, söseei taa wotowan u di kemeente lobi de tu.” Fëën mbei a bunu fii ta suku fasi, fii sa gafa dee baaa ku dee sisa fii.

18. Faandi mbei u musu ta taki soni kumafa a dë, te u luku Psalöm 15:1, 2, nöö andi di soni aki kë taki?

¹⁸ Taki soni kumafa a dë. Jehovah an o ta wai ku u ee u ta mindi soni. A buuse di soni de kai mindi soni (Nöng. 6:16, 17). Hii fa sömëni  sëmbë an ta si mindi soni u wan gaan soni, tökuseei u ta köni ku ën, u di Jehovah taki taa an bunu. (Lesi Psalöm 15:1, 2.) An dë u taki taa wa musu mindi soni. Ma wa musu ganjan wotowan ku dee soni dee u ta taki tu.

19. Ku un woto soni u musu ta köni?

¹⁹ Na ta taki sëmbë soni (Nöng. 25:23; 2 Tes. 3:11). Juliet, di u bi taki soni fëën kaa, bi konda andi di taki di sëmbë ta taki sëmbë soni ta du ku ën. A bi taki taa: „Mi ta fii bookosaka te mi ta jei wan sëmbë ta taki woto sëmbë soni, söseei a ta mbei ma futoou di sëmbë di ta taki sëmbë soni dë möön. Biga a sa go taki soni u mi da woto sëmbë tu.” Ee i ta da woto ku sëmbë, hën i si taa un bigi taki sëmbë soni, nöö bia di taki, nöö i taki u soni di ta da sëmbë taanga.​—Kol. 4:6.

20. Andi i dë kabakaba u du ku di kado di Gadu da i?

²⁰ U di u ta libi a wan goonliba ka sëmbë ta fan a wan fasi di an fiti, mbei u musu ta mbei taanga möiti fuu fan a wan fasi di ta kai ku Jehovah. Hoi a pakisei taa di fan di u sa fan da wan kado di Jehovah da u, nöö a ta buta pakisei a di fasi fa u ta wooko ku ën. A o mbei u feni gaan bunu te u ta mbei möiti u fan a wan fasi di ta tja gafa ko dëën te u dë a di peleikiwooko, te u dë a dee komakandi, söseei te u ta fan ku wotowan. Te Jehovah poi di hogi goonliba aki kaba a sösö, nöö an o ta taanga da u sö möön fuu gafa Jehovah ku di fasi fa u ta fan (Jud. 15). Ma nöunöu kaa i musu dë kabakaba u mbei Jehovah wai ku ’dee soni dee i ta taki’.​—Ps. 19:14.