1. Ino cipego cakwaambaula cakazwa kuli?

 KWAAMBAULA ncipego kuzwa kuli Leza wesu siluyando. Mbwaakalengelwa buyo muntu wakusaanguna Adamu, wakali kucikonzya kwaambaula a Usyi wakujulu. Alimwi wakali kucikonzya akupanga mabala mapya. Adamu wakacibelesya cipego eeci mumulimo wakwe wakuulika banyama boonse. (Matl. 2:19) Eelo kaka wakakkomana naakaambaula ciindi cakusaanguna amuntunyina, mukaintu wakwe mubotu, Eva!—Matl. 2:22, 23.

2. Mbuti cipego cakwaambaula mbocatakabelesyegwa kabotu kaindi alimwi amazuba aano?

² Tiilyakalampa, cipego cakwaambaula cakanyonganizyigwa. Saatani Diabolosi wakacenga Eva, aboobo bubeji bwakwe bwakapa kuti bantu babisye alimwi akuba bantu batalondokede. (Matl. 3:1-4) Adamu tanaakaubelesya kabotu mulaka wakwe ciindi naakatamikizya Eva alimwi buya a Jehova akaambo kakulubizya kwakwe. (Matl. 3:12) Kaini wakacenga Jehova naakamana kujaya mwanookwabo Abelo. (Matl. 4:9) Kumbele, Lameki siluzubonyina Kaini wakeema munzila iyakali kutondezya kuti bantu bamuciindi ncaakali kupona bakali basinkondo. (Matl. 4:23, 24) Ino buli buti bukkale mazuba aano? Basololi batwaambo twacisi tabalisendi kwaamba majwi mabyaabi mubuleya. Mafilimu manji mazuba aano atondezya ŋambawido iitali kabotu. Basicikolo balaimvwa ŋambawido iili boobu kucikolo, abalo bapati balaimvwa kumilimo. Akaambo kakuti ŋambawido mbyaabi yaduma kapati mazuba aano, citondezya buyo nyika mboyaindila buya kubija.

3. Ncinzi ncotweelede kucenjelela alimwi ino tulalanga-langa nzi mucibalo eeci?

³ Ikuti tiitwacenjela, tulakonzya kuzyibila kumvwa ŋambawido mbyaabi cakuti andiswe tulakonzya kutalika kwiibelesya.  Masimpe mbotuli Banakristo, tuyanda kukkomanisya Jehova, eeci cibikkilizya kweeleba ŋambawido yacisapi. Tuyanda kubelesya cipego eeci cibotu munzila iitembaula Leza wesu. Mucibalo eeci, tulalanga-langa mbotukonzya kucita oobo (1) notuli mumulimo wamumuunda, (2) kumiswaangano yambungano, alimwi (3) amumibandi yabuzuba abuzuba. Pele cakusaanguna, atulange-lange kaambo ŋambawido yesu ncaali makani mapati kuli Jehova.   

4. Kweelana a Malaki 3:16, nkaambo nzi ŋambawido yesu ncaali makani mapati kuli Jehova?

⁴ Amubale Malaki 3:16. Sena mulakonzya kuyeeya kaambo Jehova ncalemba ‘mubbuku lyakwe lyakwiibalusya,’ mazina abaabo ibaambaula munzila iitondezya kuti balamuyoowa alimwi akuzinzibala kuyeeya zina lyakwe? Ŋambawido yesu itondezya zili mumoyo wesu. Jesu wakaamba kuti: “Mulomo waamba zizwide mumoyo.” (Mt. 12:34) Nzyotusala kwaamba zitondezya mbotumuyanda Jehova. Alimwi Jehova uyanda kuti aabo ibamuyanda bakapone kukabe kutamani munyika mpya.

5. (a) Ino bukombi bwesu buswaangene buti aŋambawido yesu? (b) Kweelana ambokutondezyedwe mucifwanikiso, ncinzi ncotweelede kuyeeya kujatikizya ŋambawido yesu?

⁵ Mbotwaambaula cilakonzya kutondezya naa Jehova inga wabutambula bukombi bwesu naa pe. (Jak. 1:26) Bantu bamwi ibatamuyandi Leza balaambaula cabukali alimwi acakulisumpula. (2Tim. 3:1-5) Tatuyandi kuba mbuli mbabo naaceya. Tulikanzide kumukkomanisya Jehova muŋambawido yesu. Sena Jehova ulakonzya kukkomana ikuti katwaambaula caluzyalo notuli kumiswaangano naa mumulimo wamumuunda, pele katwaambaula cabukali akubula luyando kubanamukwasyi ciindi notuli buyo tolikke ambabo?—1Pet. 3:7.

6. Ncinzi cakacitika akaambo kakuti Kimberly wakali kwaambaula munzila iili kabotu?

⁶ Ciindi notucibelesya kabotu cipego cakwaambaula, tulalitondezya kuti tuli bakombi ba Jehova. Tulabagwasya aabo batulangilila kubona ‘lwiindano luliko akati kayooyo uubelekela Leza ayooyo uutamubelekeli.’  (Mal. 3:18) Eeci ncicakacitikila mucizyi Kimberly. * Kucikolo bakapegwa mulimo umwi asicikolonyina. Nobakamana kucita mulimo ooyu, sicikolonyina wakabona kuti mucizyi Kimberly wakaliindene abasicikolo bamwi. Walo kunyina naakali kuvwiya bantu, wakali kwaambaula munzila iili kabotu, alimwi taakali kubelesya majwi mabyaabi. Sicikolonyina ooyo wakakkomana kapati cakuti kumbele wakazumina kwiiya Bbaibbele. Eelo kaka Jehova ulakkomana ciindi notwaambaula munzila iikwelelezya bantu kukasimpe!

7. Ino mukanzide kucibelesya buti icipego cakwaambaula ncaakamupa Leza?

⁷ Toonse tuyanda kwaambaula munzila iipa bulemu kuli Jehova alimwi akutupa kuba azilongwe ziyumu abakwesu. Aboobo lino atulange-lange nzila zigwasya mbotukonzya kuzumanana kuba ‘cikozyanyo cibotu mukwaambaula.’

8. Ncikozyanyo nzi Jesu ncaakatusiila kweelana ambwaakali kwaambaula mumulimo wamumuunda?

⁸ Amwaambaule caluzyalo acabulemu ciindi bamwi nobamunyemya. Mumulimo wakwe, Jesu wakatamikizyigwa kuti wakali cakolwa, mulyato, mubelesi wa Diabolosi, sikutyola Sabata alimwi buya asikusampaula Leza. (Mt. 11:19; 26:65; Lk. 11:15; Joh. 9:16) Nokuba boobo, Jesu kunyina naakajola cibi kwiinda mukubelesya majwi mabyaabi. Mbuwenya mbuli Jesu, andiswe tatweelede kujolela cibi nociba ciindi bamwi nobaambaula cabukali. (1Pet. 2:21-23) Masimpe, kulijata tacili cuubauba. (Jak. 3:2) Pele ino ncinzi cikonzya kutugwasya?

9. Ncinzi cikonzya kutugwasya kweendelezya ŋambawido yesu ciindi notuli mumulimo wamumuunda?

⁹ Ikuti muntu umwi watwaambila majwi mabyaabi notuli mumulimo wamumuunda, atusole kulijata. Mukwesu Sam wakaamba kuti, “Ndilasola kubona nzyayandika mukamwiniŋanda kutegwa akamvwe kasimpe alimwi akumubona kuti ulakonzya kucinca.” Zimwi ziindi mukamwiniŋanda ulakonzya kunyema akaambo buyo kakuti twasika aciindi citali kabotu. Ciindi notwajana muntu uunyemede mumulimo wamumuunda, atusole kucita ncacita mucizyi Lucia. Tulakonzya kupaila mupailo mufwaafwi, kulomba Jehova kuti atugwasye kukkazyika moyo alimwi akutaamba majwi aali woonse aatondezya kubula bulemu naa luzyalo.

10. Kweelana a 1 Timoteyo 4:13, nimbaakani nzi njotweelede kuba anjiyo?

¹⁰ Amube mwiiyi uucibwene. Timoteyo wakali mwiiyi uucibwene pele wakali kuyandika kuzumanana kusumpula nzila zyakwe zyakuyiisya. (Amubale 1 Timoteyo 4:13.) Mbuti  mbotukonzya kuba bamayi bacibwene mumulimo wamumuunda? Tweelede kulibambila cakulomya. Cikkomanisya ncakuti, tulijisi zibelesyo ziindene-indene izikonzya kutugwasya kuba bamayi bacibwene. Mulakonzya kujana nzila zigwasya kwiinda mukulanga-langa broshuwa yakuti Amusungwaale Kubala Alimwi Akuyiisya, acibeela icili mu Kabbuku Kamuswaangano Wabuumi Amulimo icakuti, “Amusungwaale Mumulimo Wamumuunda.” Sena mulazibelesya zibelesyo eezyi? Ciindi notulibambila cakulomya, tulakonzya kucesya-cesya kulibilika alimwi akuzumanana kwaambaula cabusungu.

11. Ncinzi cigwasya Banakristo bamwi kuba bamayi bacibwene?

¹¹ Kuyungizya waawo, tulakonzya kuba bamayi bacibwene kwiinda mukwiiya kuli bamwi mumbungano. Mukwesu Sam iwaambwa kale, ulalibuzya kaambo Banakristo bamwi ncobali bamayi bacibwene. Ulaiya nzila nzyobabelesya alimwi akuzisola. Mucizyi Talia ulabikkila maano kapati ciindi baambi bacibwene nobapa makani aabuleya. Kwiinda mukucita boobo, waiya mbwakonzya kupandulula twaambo ntobavwula kwaamba bantu mumulimo wamumuunda.

12. Mbuyumuyumu nzi bamwi mbobajana?

¹² Toonse tulakonzya kupa kuti miswaangano yambungano kaikkomanisya ikuti twaimbila antoomwe alimwi akupa bwiinguzi bwakalibambilwa kabotu. (Int. 22:22) Bamwi cilabayumina kwiimba naa kupa bwiinguzi mubuleya. Sena andinywe cilamukatazya? Ikuti kacili boobo, mulakkomana kuzyiba icakagwasya bamwi kuzunda penzi eeli.

13. Ncinzi cikonzya kumugwasya kwiimba kuzwa ansi amoyo kumiswaangano?

¹³ Amwiimbe kuzwa ansi amoyo wanu. Ciindi notwiimba nyimbo zya Bwami, makanze eesu ayelede kuba aakutembaula Jehova. Mucizyi Sara ulimvwa kuti tali mwiimbi uucibwene. Pele ulayanda kutembaula Jehova kwiinda mukwiimba. Aboobo ubona kuti cilagwasya kulibambila nyimbo kuŋanda mbubonya mbwalibambila zibeela zimwi zyamiswaangano. Ulaziimba kuŋanda alimwi akusola kubikkila maano kubona majwi aali munyimbo mbwaayendelana amakani aabandikwa. Wakaamba kuti: “Eeci cilandigwasya kubikkila maano kumajwi aali munyimbo ikutali mbondiimba.”

14. Ikuti naa mulayoowa kupa bwiinguzi lyamiswaangano, ncinzi cikonzya kumugwasya?

¹⁴ Kamwiingula lyoonse. Mubwini, eeci cilabakatazya bamwi. Mucizyi Talia iwaambwa kale, wakati: “Inga ndilalibilika kapati kwaambaula kumbele lyabantu. Aboobo cilandiyumina kapati kupa bwiinguzi.” Nokuba boobo, mucizyi Talia taleki kupa bwiinguzi. Ciindi  nalibambila zibeela zyamuswaangano ulabikkila maano kubona kuti bwiinguzi bwakusaanguna bweelede kuti kabuli bufwaafwi alimwi bugaminide kweelana amubuzyo. Waamba kuti: “Cili buyo kabotu kuti bwiinguzi bwangu kabuli bufwaafwi, buubauba alimwi bugaminide, kayi mbobwiinguzi mbwayanda sikusololela.”

15. Ncinzi ncomweelede kuyeeya kujatikizya bwiinguzi bwanu?

¹⁵ Nobaba Banakristo batakwe nsoni naa batalibiliki, zimwi ziindi balayoowa kupa bwiinguzi. Nkaambo nzi? Mucizyi Juliet wakaamba kuti, “Zimwi ziindi ndilawayawaya kupa bwiinguzi nkaambo ndiyoowa kuti bwiinguzi bwangu mbuubauba kapati naa tabuli bubotu boobo.” Pele kamuyeeya kuti Jehova uyanda kuti kamupa bwiinguzi mbomukonzya. * Ulalumba kapati kukusolekesya nkomucita kumutembaula lyamiswaangano yambungano alimwi akutazumizya buyoofwu kumulesya kupa bwiinguzi.

16. Niŋambawido iili buti njotweelede kweeleba?

¹⁶ Amuyeelebe misyobo yoonse ‘yamajwi aakusampaula.’ (Ef. 4:31) Mbubwenya mbokwaambwa kale, Munakristo tayelede kwaamba majwi mabyaabi. Pele kuli misyobo yamajwi aakusampaula njotweelede kutantamuka. Mucikozyanyo, ciindi notwaambaula, tweelede kucenjela kutegwa tutabi aacilengwa cakwaamba zintu zibyaabi kujatikizya bantu ibazwa muzilengwa naa mumyaambo iindene-indene alimwi amumasi aambi. Kuyungizya waawo, tatuyandi kunyemya bamwi kwiinda mukwaamba majwi aacisizya moyo. Mukwesu umwi wakaamba kuti: “Zimwi ziindi, ndakali kwaamba zintu nzyondakali kuyeeya kuti masesya buyo alimwi kunyina mbozibede, pele mubwini tiizyakali kabotu alimwi zyakali kubacisa bamwi. Kwamyaka minji, bakaintu bangu bakali kundigwasya kwiinda mukundaambila kumbali ciindi ŋambawido yangu noyatakali kabotu, noyakali kubacisa balo alimwi abamwi.”

17. Kweelana a Baefeso 4:29, mbuti mbotukonzya kuyaka bamwi?

¹⁷ Amwaambaule munzila iiyaka bamwi. Kamufwambaana kubalumbaizya bamwi muciindi cakubatongooka. (Amubale Baefeso 4:29.) Bana Israyeli bakajisi twaambo tunji itwakeelede kubapa kulumba, nokuba boobo, kanji-kanji bakali kutongooka. Kutongooka kulakonzya kubayambukila bamwi. Amuyeeye kuti mulumbe mubyaabi ngobakaleta basikutwela bali kkumi wakapa “bana Israyeli boonse . . . kutongookela Musa.” (My. 13:31–14:4) Kulubazu lumwi, kubalumbaizya bamwi  kulakonzya kubagwasya kucita kabotu. Tulijisi lusyomo lwakuti akaambo kakukulwaizyigwa abeenzinyina, mwana musimbi wa Jefita wakazumanana amulimo wakwe. (Bab. 11:40) Ba Sara ibaambwa kale bakati: “Ciindi notubalumbaizya bamwi, tubapa kulimvwa kuti balayandwa a Jehova alimwi akuti balijisi busena mumbunga yakwe.” Aboobo atujane nzila zyakubalumbaizya kuzwa ansi amoyo.

18. Kweelana a Intembauzyo 15:1, 2, nkaambo nzi ncotweelede kwaamba masimpe alimwi ino ncinzi cijatikizyidwe mukucita boobo?

¹⁸ Amwaambe masimpe. Tatukonzyi kumukkomanisya Jehova kuti katubeja. Uliisulide misyobo yoonse yakubeja. (Tus. 6:16, 17) Nokuba kuti bantu banji mazuba aano kubeja bakubona kuti kuli buyo kabotu, swebo tulazumanana kukubona mbwakubona Jehova. (Amubale Intembauzyo 15:1, 2.) Tulakutantamuka kubeja cacigaminina, alimwi akweeleba cilengwa cakutabaambila bamwi twaambo toonse tujatikizyidwe.

19. Makani nzi aambi ngotweelede kucenjelela?

¹⁹ Amukutantamuke kuvwiya. (Tus. 25:23; 2Tes. 3:11) Ba Juliet ibaambwa kale, bapandulula kuvwiya mbokubajatikizya. Bakaamba kuti: “Kuswiilila muntu uuvwiya kulandityompya, kupa kuti ndicileke kumusyoma muntu ooyo. Kayi, ino inga ndazyiba buti kuti andime takandivwiyi kuli bamwi?” Ikuti mwabona kuti muntu watalika kuvwiya, amuucince mubandi kwiinda mukwaamba twaambo tuyaka.—Kol. 4:6.

20. Ino mujisi makanze nzi kujatikizya ŋambawido yanu?

²⁰ Mbwaanga tupona munyika mwalo ŋambawido mbyaabi moivwulide kapati, tweelede kubeleka canguzu akubona kuti ŋambawido yesu ilamukkomanisya Jehova. Amuyeeye kuti kwaambaula ncipego kuzwa kuli Jehova, alimwi ulabikkila maano kujatikizya mbotucibelesya. Uyootulongezya kuti twasolekesya kwaambaula munzila iimutembaula ciindi notuli mumulimo wamumuunda, kumiswaangano alimwi amumibandi yesu yabuzuba abuzuba. Ciindi Jehova aakwiinyonyoona nyika eeyi mbyaabi, cinooli cuubauba kumulemeka kwiinda mumajwi ngotwaambaula. (Jud. 15) Calino atube amakanze aakumukkomanisya Jehova kwiinda muzintu ‘nzyotwaambaula amulomo wesu.’—Int. 19:14.