1. Ne maua mai i fea a te ‵tou atamai ke fai‵pati?

 A TE ‵TOU atamai ke fai‵pati se meaalofa mai i te ‵tou Atua alofa. I te otiga eiloa ne faite a te tagata muamua, ko Atamu, ne mafai o fakaaoga ne ia a pati ke fesokotaki ki tena Tamana faka-te-lagi. Ne mafai foki o fakaopoopo ne ia a pati ‵fou e uke. Ne fakaaoga ne Atamu tena atamai tenā ke fakataunu tena tofiga ki te fakaigoaga o manu katoa. (Kene. 2:19) Kae ko tafaga la tena fiafia i te taimi muamua ne faipati atu ei a ia ki te suā tino—ko tena avaga tinogali, ko Eva!—Kene. 2:22, 23.

2. Ne fakaaoga ‵se pefea a te meaalofa ko te faipati i aso mua mo aso nei?

² E seki leva, kae ne fakaaoga ‵se a te meaalofa ko te faipati. Ne loi a Satani te Tiapolo ki a Eva, kae ne iku atu i ei ki te agasala mo te tulaga sē ‵lei katoatoa o tino. (Kene. 3:1-4) Ne fakaaoga ‵se ne Atamu te meaalofa tenei i te taimi ne ‵losi atu ei a ia ki a Eva—ke oko foki loa ki a Ieova—mō ana mea ‵se ne fai. (Kene. 3:12) Ne loi a Kaino ki a Ieova mai tua o te tamatega ne ia o tena taina ko Apelu. (Kene. 4:9) Fakamuli ifo, ne ‵fatu ne Lameko, se tino ne tupu mai i a Kaino, se kupu o fakamatalaga telā e fakaasi mai i ei a amioga fakasaua i te taimi ne ola ei a ia. (Kene. 4:23, 24) Se a te tulaga i aso nei? E lavea ne tatou a takitaki fakapolitiki kolā e fakaaoga faeloa ne latou a pati sē ‵lei i mua o tino. Kae faigata o maua ne koe se ata vitio telā e seai ne pati ma‵sei i ei. E pati ma‵sei a tama‵liki i te akoga, kae lagona foki ne tino ma‵tua a pati konā i olotou koga ga‵lue. Se mea fakafanoanoa me i te fakaaogaga o pati ma‵sei, e fakaasi mai i ei a te gasolo ifo o tulaga i mea tau amioga mo pati i te lalolagi i aso nei.

3. Se a te mea fakamataku e ‵tau o iloa ne tatou kae ne a mea ka sau‵tala tatou ki ei i te mataupu tenei?

 ³ Kafai e se fakaeteete tatou, e mafai eiloa o fakaaoga ne tatou a pati konā ona ko te fakalogologo ‵soko ki ei. E tonu, e pelā me ne Kelisiano, e ma‵nako tatou o fakafiafia a Ieova, kae e aofia i ei a mea e uke atu i lō te ‵kalo keatea fua mai te sē pati masei. E ma‵nako tatou o fakaaoga a te meaalofa gali ko te faipati i se auala ‵lei—ke avatu ei a vikiga ki te ‵tou Atua. Ka mafau‵fau tatou i te mataupu tenei ki te auala ke fai ei penā (1) i te galuega talai, (2) i fakatasiga a te fakapotopotoga (3) i ‵tou sau‵talaga i aso katoa. Kae ke onoono mua tatou ki te pogai e tāua ei ki a Ieova a ‵tou pati e fai.

4. E ‵tusa mo te Malaki 3:16, kaia e tāua ei ki a Ieova a ‵tou pati?

⁴ Faitau te Malaki 3:16. Kai mafaufau aka eiloa koe me se a te pogai ne tusi ei ne Ieova i tena “tusi o fakamasauaga” a igoa o latou kolā e fakaasi mai i olotou pati me e ma‵taku ki a ia kae mafaufau ‵loto ki tena igoa? E fakaasi atu i ‵tou pati a mea i ‵tou loto. Ne fai mai a Iesu: “Me e faipati mai ne te gutu a mea kolā e ‵fonu i te loto.” (Mata. 12:34) A mea e filifili ne tatou ke fai‵pati ki ei e fakaasi atu ei te lasi o te ‵tou a‵lofa ki a Ieova. Kae e manako a Ieova ke maua ne tino kolā e a‵lofa ki a ia a te ola se-gata-mai i te lalolagi fou.

5. (a) Se a te sokoga o ‵tou tapuakiga mo ‵tou pati e fai? (e) E pelā mo te ata, se a te mea e ‵tau o iloa ne tatou e uiga ki ‵tou pati?

⁵ E faka‵na eiloa a te talia ne Ieova a te ‵tou tapuakiga ki te auala e fai‵pati atu ei tatou. (Iako. 1:26) A nisi tino kolā e se a‵lofa ki te Atua, e fai‵pati atu mo te kaitāua, i se auala sē alofa kae fakamata‵mata. (2 Timo. 3:1-5) E se ma‵nako eiloa tatou ke fai pelā mo latou. E ma‵nako tatou o fakafiafia a Ieova ki ‵tou pati. Kae e mata, e mafai o fiafia a Ieova ki a tatou māfai e fai‵pati atu mo te atafai i ‵tou fakatasiga Kelisiano, io me ko te galuega talai kae kafai ko ‵nofo i te fale, ko faipati i se auala sē alofa ki ‵tou kāiga?—1 Pe. 3:7.

6. Ne a mea ne iku mai me ne fakaaoga faka‵lei ne Kimberly ana pati i se auala ‵lei?

 ⁶ Kafai e fakaaoga faka‵lei ne tatou a te meaalofa ko te faipati, ko fakaasi atu i ei me e tapuaki tatou ki a Ieova. E fesoasoani atu tatou ki tino i ‵tou tafa ke lavea faka‵lei ne latou a te ‵kese o “te tino e tavini atu ki te Atua mo te tino e se tavini atu ki a ia.” (Mala. 3:18) Tenā eiloa te mea ne tupu ki te tuagane ko Kimberly. * Ne ‵tofi aka tou fafine ke fai fakatasi lā meaa‵koga mo te suā tamaliki i tena vasega. I te otiga, ne iloa ne te tamaliki tenā a te ‵kese o Kimberly mai nisi tama‵liki. Ne seki fakamasei ne ia a tino, ne faipati atu a ia mo te atafai kae e se gutu pati masei sāle. Ne fia iloa ne te kautama o Kimberly a mea e uke atu kae fakamluli ifo ne talia ne ia ke fai tena akoga faka-te-Tusi Tapu. Ko tafaga la te fiafia o Ieova māfai e fai‵pati atu tatou i se auala telā e fai ei ke tosina mai a tino ki te munatonu!

7. Ka fakaaoga pefea ne koe a te meaalofa mai te Atua ko te faipati?

⁷ E ma‵nako a tatou katoa ke fai‵pati atu i se auala telā e fakaaloalo atu ei ki a Ieova kae momea aka ei te ‵pili atu o tatou ki ‵tou taina. Tela la, ke na mafaufau nei ki nisi auala aoga kolā e mafai ei o fai koe “mo fakaakoakoga . . . i au pati.”

8. Se a te fakaakoakoga ne fakaasi mai ne Iesu i te auala ne fakaaoga ei ana pati i te galuega talai?

⁸ Faipati atu i se auala atafai mo te āva māfai ko fai ne se tino ke kaitaua koe. I te taimi ne fai ei tena galuega talai, ne taku fakamasei ei a Iesu e pelā me se tino inu kava, e gafula, se sui o te Tiapolo, se tino soli Sapati, kae pati masei ki te Atua. (Mata. 11:19; 26:65; Luka 11:15; Ioa. 9:16) Kae ne seki faipati kaitaua atu a Iesu ki a latou. E pelā mo Iesu, e se ‵tau foki mo tatou o toe fai‵pati atu mo te kaitāua ki tino penā. (1 Pe. 2:21-23) E tonu, e se faigofie ke faipati faka‵lei atu i vaegā taimi penā. (Iako. 3:2) Ne a mea e mafai o fesoasoani mai?

9. Ne a mea e mafai o fesoasoani mai ke fai faka‵lei ‵tou pati i te galuega talai?

⁹ Taumafai ke se kilo atu fua koe ki te auala sē ‵lei e tali mai ei a te tino i te fale. Ne fai mai te taina ko Sam, “E taumafai au o saga tonu atu ki te manakoga tāua ke lagona ne te tino i te fale a te munatonu mo te manatu me e mafai o ‵fuli a ia.” I nisi taimi e kaitaua te tino i te fale, ona ko te mea ne asi atu tatou i se taimi ‵se. Kafai ko kaitaua mai se tino, e mafai o fai ne tatou a te mea ne fai ne te tuagane ko Lucia. E mafai o akai fakavave atu tatou ki a Ieova mō tena fesoasoani e auala i se ‵talo ko te mea ke kufaki kae ke se fai atu ne tatou a pati sē ‵tau kae se āva.

10. E ‵tusa mo te 1 Timoteo 4:13, se a te fakamoemoega e ‵tau o kausaki atu tatou ki ei?

 ¹⁰ Ke momea aka tou apo e pelā me se faiakoga. A Timoteo se faifeau Kelisiano atamai, kae ne manakogina ke tumau a ia i te gasolo ki mua i te feitu faka-te-agaga. (Faitau te 1 Timoteo 4:13.) E mafai pefea o fai tatou mo faiakoga apo i te galuega talai? E ‵tau o fakatoka faka‵lei tatou. E fakafetai tatou me e uke a mea faigaluega kese‵kese kolā e mafai o fesoasoani mai ke fai tatou mo faiakoga ‵lei. Ka aoga eiloa ki a koe a manatu i te polosiua ko te Ke Atamai i te Faitau mo te Akoako Atu mo te vaega ko te “Ke Fakaaoga ne Koe i te Galuega Talai” i te ‵Tou Olaga Kelisiano mo te Galuega Talai—Tusi mō Fakatasiga. E mata, e fakaaoga faka‵lei ne koe a mea konei? Kafai e fakatoka faka‵lei tatou, ka se pole‵pole malosi tatou kae ka fai‵pati atu mo te loto tali‵tonu.

11. Ne fai pefea a nisi Kelisiano mo fai ne faiakoga tai ‵lei atu?

¹¹ E mafai foki o fai tatou mo faiakoga tai ‵lei atu mai te onoono ki nisi tino i te fakapotopotoga kae tauloto mai i a latou. Ne mafaufau sāle a Sam, telā ne taku muamua mai, ki mea ne fai ei a nisi Kelisiano e pelā me ne faiakoga ‵lei. Ne fakalogologo faka‵lei a ia ki te auala e akoako atu ei latou kae taumafai o fakaakoako ki ei. Ne saga tonu atu a te tuagane ko Talia ki te auala e fai ei ne failauga ata‵mai a lāuga mō tino katoa. Mai te faiga penā, ne iloa ei ne ia o faipati kae fakamatala atu a nisi mataupu kolā e masani o ‵sae aka i te galuega talai.

12. Se a te mea e faigata ki nisi tino?

¹² E mafai o fesoasoani atu tatou ki te faiga ke ‵gali a fakatasiga a ‵tou fakapotopotoga mai te usu malosi atu i pese mo te faiga o ‵tou tali kolā ne fakatoka faka‵lei. (Sala. 22:22) E faigata ki nisi tino ke usu io me fai olotou tali i mua o tino. Kae ko koe? Kafai e penā loa, ka fiafia koe ke iloa atu a mea kolā ne fesoasoani atu ki nisi tino ke manumalo i ei.

13. Ne a mea ka fesoasoani mai ke usu atu koe mo tou loto kātoa i fakatasiga?

¹³ Usu atu mo te loto kātoa. Kafai ko usu atu a pese o te Malo, e ‵saga tonu atu tatou ki te manakoga ke tavae atu ki a Ieova. E mafaufau a te tuagane ko Sara me e se iloa ne ia o usu faka‵lei. Kae ne fia tavae atu a ia ki a Ieova e auala i pese. Ona ko te mea tenā, ne lavea ne ia te aoga ke fakatoka faka‵lei ki pese, e pelā eiloa mo tena fakatoka faka‵lei ki nisi vaega o te fakatasiga. E fakaakoako a ia ki pese kae taumafai ke iloa ne ia a te sokoga o pati i te pese mo te mataupu. “E fesoasoani mai te mea tenei ke saga tonu atu au ki pati kae e se ki te auala e usu atu ei au,” ko ana pati.

14. Kafai koe se tino mata ma, ne a mea ka fesoasoani atu ke fai au tali i fakatasiga?

 ¹⁴ Ke tali faeloa. A te ‵tonuga loa, e mafai o faigata te mea tenei ki nisi tino. “E manavase malosi au i mua o tino, faitalia me e se iloa ne latou te mea tenā ona ko te mea e masani faeloa o faipati atu au i se leo malalo,” ko pati a Talia, telā ne taku muamua mai. “Tela la, ne faigata ‵ki ke fai saku tali.” Kae ne seki taofi aka ei a Talia mai te faiga o ana tali. I te taimi e fakatoka ei a ia mō fakatasiga, e masaua ne ia me i te tali muamua, e ‵tau o toetoe kae tali ‵tonu atu ki te fesili. Ne fai mai a ia: “Ko tena uiga, se mea ‵lei eiloa māfai taku tali e toetoe, e faigofie, kae tali ‵tonu atu ki te fesili me tenā loa te vaegā tali e manako ki ei a te tino e fai ne ia te akoga.”

15. Se a te mea e ‵tau o masaua ne tatou e uiga ki ‵tou tali?

¹⁵ Ke oko foki loa ki nisi Kelisiano kolā e se mata ma, e se fia fai sāle olotou tali. Kaia? E fai mai te tuagane ko Juliet, “I nisi taimi e se manako au o tali ona ko te manavase me ko tō toetoe kae se gali taku tali.” Masaua la, me e manako a Ieova ke fai atu ne tatou te ‵toe tali ‵lei e mafai ne tatou o fai. * E fakatāua malosi eiloa ne ia a ‵tou taumafaiga ke tavae atu ki a ia i fakatasiga a te fakapotopotoga kae ke mo a ma taofi aka ona ko te manava‵se.

16. Ne a vaegā pati e ‵tau o ‵kalo keatea tatou mai i ei?

¹⁶ ‵Kalo keatea mai i vaegā “pati faka‵mae loto.” (Efe. 4:31) E pelā mo mea ne taku muamua mai, e se ‵tau eiloa o pati masei se Kelisiano. Kae e isi ne vaega fai lēmū o pati faka‵mae loto kolā e ‵tau o fakaeteete tatou i ei. E pelā mo te fakaeteete ke mo a ma fai atu ne pati sē ‵lei e uiga ki tuu mo aganuu, matakāiga, io me ko fenua. E se gata i ei, e se ma‵nako eiloa tatou ke fai atu a pati fakalogo‵mae ki nisi tino. Ne fai ‵tonu mai se taina: “I nisi taimi, ne fai ne au a pati fakalogo‵mae kae fakatauemu kolā ne mafaufau au me ne mea fai faka‵kata kae ‵lei, kae ko te ‵tonuga loa, ne fakalogo‵mae atu ki te suā tino. I te fia o tausaga, ne lasi ‵ki te fesoasoani o taku avaga mai te fai ‵tonu mai māfai ko se ‵lei kae fakalogo‵mae aku pati ki a ia mo nisi tino.”

17. E ‵tusa mo te Efeso 4:29, e ati aka pefea ne tatou a nisi tino?

¹⁷ Faipati atu i te auala telā e ati aka ei a nisi tino. Ke fakamālō fakavave atu i lō te fakamasei io me fameo. (Faitau te Efeso 4:29.) Ne uke ‵ki a mea ne ‵tau o loto fakafetai ki ei a tino Isalaelu, kae ne fameo faeloa latou. A te uiga fameo e faigofie o ‵pisi atu ki nisi tino. Kāti e masaua ne koe me i te lipoti sē ‵lei mai i sipai e toko sefulu, ne fai ei a “tino Isalaelu  katoa” ke “mui‵mui ki a Mose.” (Nume. 13:31–14:4) I te suā feitu, a pati fakamālō e mafai o fai ei a tino ke fia‵fia. E mautinoa eiloa me ne fakamalosi atu ki te tama fafine a Iefata a pati fakamālō kolā ne fai atu ne ana taugasoa fa‵fine ke tumau a ia i tena taviniga. (Fama. 11:40) Ne fai mai a Sara, telā ne taku muamua mai, “Kafai e fakamālō atu tatou ki nisi tino, e fai ei ke lagona ne latou te alofa o Ieova mo te a‵lofa o nisi tino i te fakapotopotoga ki a latou.” Tela la, ‵sala ki avanoaga ke fakamālō atu.

18. E ‵tusa mo te Salamo 15:1, 2, kaia e ‵tau ei o fai‵pati tatou ki te mea tonu, kae ne a mea e aofia i ei?

¹⁸ Faipati ki te mea tonu. E se mafai o fakafiafia ne tatou a Ieova māfai e se fai‵pati tatou ki te mea tonu. E takalialia a ia ki so se vaegā loi. (Faata. 6:16, 17) E tiga eiloa e mafau‵fau a tino e tokouke i aso nei me i te loi se faifaiga masani, e ‵piki ‵mau tatou ki te kilokiloga a Ieova e uiga ki ei. (Faitau te Salamo 15:1, 2.) E tonu, e se pati ‵loi tatou kae ‵kalo keatea foki tatou mai te sē fakaasi atu o fakamatalaga ‵tonu e uiga ki nisi tino.

19. Se a te suā mea e ‵tau o fakaeteete tatou i ei?

¹⁹ ‵Kalo keatea mai te gutu fatufatu. (Faata. 25:23; 2 Tesa. 3:11) Ne fai mai a Juliet, telā ne taku muamua mai, a te auala ne pokotia ei a ia i te gutu fatufatu. Ana muna: “A te fakalogologo ki pati fatufatu e fakavāivāi mai kae fai ei ke se talitonu au ki te tino gutu fatufatu. Kae e mafai pefea o iloa ne au me ka se fatufatu ne ia au ki se isi tino?” Kafai e iloa ne koe me ko kamata o mafuli te sau‵talaga ki te fatufatu, ke ‵fuli malielie ne koe ki se isi mea gali.—Kolose 4:6.

20. Se a te mea ka fakaiku aka ne koe e uiga ki au pati?

²⁰ Ona ko te mea e ‵nofo tatou i se lalolagi telā ko ‵fonu eiloa i pati ma‵sei, e ‵tau mo tatou o ga‵lue malosi ke fakamautinoa aka me e fakafiafia ‵tou pati ki a Ieova. Masaua, me i te faipati se meaalofa mai i a Ieova, kae e tāua eiloa ki a ia a te auala e fakaaoga ei ne tatou. Ka fakamanuia ne ia ‵tou taumafaiga ke fakaaoga ‵tou pati i se auala ‵lei i te galuega talai, i fakatasiga, mo sau‵talaga i aso katoa. Kafai ko ‵galo atu a fakamalosiga mai te olaga masei tenei, ka sili atu i te faigofie ke fakaaloalo atu tatou ki a Ieova e auala i ‵tou pati. (Iuta 15) I te taimi nei, ke na fakaiku aka ke fakafiafia ne tatou a Ieova ki “pati i [‵tou] gutu.”—Sala. 19:14.