1. Eaha te taime matamua i fa mai ai te parau?

 UA HOROA mai to tatou Atua here i te parau ei ô na tatou. I te poieteraahia te taata matamua ra, o Adamu, ua nehenehe o ˈna e paraparau i to ˈna Metua i te raˈi e e imi i te tahi atu mau taˈo apî. Maoti teie ô i mairi ai Adamu i te iˈoa o te mau animara. (Gen. 2:19) Ua oaoa atoa o ˈna i te taime matamua a paraparau ai o ˈna i te tahi atu taata, oia hoi ta ˈna vahine ra, o Eva!—Gen. 2:22, 23.

2. Mea nafea te ô o te parau i te faaohiparaahia ma te tano ore?

² Te mea peapea râ, aita te ô o te parau i faaohipa-maitai-hia i muri aˈe. Ua haavare Satani te Diabolo ia Eva e mai reira mai to tatou riroraa mai ei taata hara e te tia ore. (Gen. 3:1-4) Ma te pari ia Eva, ua pari atoa Adamu ia Iehova no te hoê hape ta ˈna iho i rave a ore atu ai e faaohipa maitai i te ô o te parau. (Gen. 3:12) Ua haavare Kaina ia Iehova i muri aˈe i to ˈna taparahi-pohe-raa i to ˈna taeae ia Abela. (Gen. 4:9) Ua papai Lameha, te hoê huaai o Kaina, i te tahi pehepehe o te faaite ra i te ino o te taata o to ˈna tau. (Gen. 4:23, 24) Eaha râ te huru o te taata i teie mahana? Te itehia ra te mau tia poritita e parau ino ra i mua i te taata. Mea fifi atoa ia imi i te hohoˈa teata aita e parau ino to roto. I te fare haapiiraa e i te vahi raveraa ohipa, te faaroo-atoa-hia ra te mau parau ino. Te faaite ra taua mau tupuraa ra e ua ino roa teie nei ao.

3. Eaha te titauhia ia tatou ia haapao maitai e eaha ta tatou e ite mai i roto i teie tumu parau haapiiraa?

³ Ia ore tatou e haapao, e haamata atoa paha tatou i te faahiti i te mau parau ino ta tatou e faaroo. Papu maitai, ei Kerisetiano, te hinaaro ra tatou e faaoaoa ia Iehova, eita roa ˈtu ïa tatou e faahiti i te parau ino. E faaohipa  maitai tatou i te ô faahiahia o te parau no te arue i to tatou Atua. I roto i teie tumu parau haapiiraa, e ite mai tatou e nafea ia faaohipa maitai i te ô o te parau (1) i roto i te taviniraa, (2) i te mau putuputuraa e (3) ia tauaparau tatou ia vetahi ê. Na mua râ, e hiˈo anaˈe no te aha mea faufaa roa no Iehova ta tatou e parau.

4. Ia au i te Malaki 3:16, no te aha mea faufaa no Iehova ta tatou e parau?

⁴ A taio i te Malaki 3:16. A feruri na. No te aha Iehova i papai ai i te iˈoa o te feia tei faaite i te mǎtaˈu ia ˈna e tei feruriruri i to ˈna iˈoa i roto i “te hoê buka haamanaˈoraa”? No te mea na ta tatou mau parau e faaite eaha to roto i to tatou aau. Ua parau hoi Iesu: “E parau te vaha i te mea e vai ra i roto i te aau.” (Mat. 12:34) Na roto i ta tatou mau parau, e faaite tatou i to tatou here ia Iehova. Te hinaaro ra o ˈna ia fanaˈo te feia e here ra ia ˈna i te hoê oraraa oaoa i roto i te ao apî e a muri noa ˈtu.

5. (1) No te aha mea faufaa ta tatou huru paraparau i roto i ta tatou haamoriraa? (2) Ia au i te hohoˈa, eaha ta tatou e haamanaˈo a paraparau ai?

⁵ E nehenehe ta tatou huru paraparau e faaite e farii anei Iehova i ta tatou haamoriraa. (Iak. 1:26) I rotopu i te feia o te ore e tavini ra i te Atua, te vai ra vetahi o te faahiti nei i te parau ino ma te iria, te etaeta e te teoteo. (Tim. 2, 3:1-5) Eita roa ˈtu tatou e hinaaro e pee i tera haerea. E hinaaro tatou e faaoaoa ia Iehova na roto i ta tatou mau parau. E oaoa anei râ Iehova mai te peu e faahiti tatou i te parau nehenehe i te mau putuputuraa e i roto i te taviniraa, area i te fare, e paraparau ïa tatou ma te iria?—Pet. 1, 3:7.

6. Eaha tei tupu a faaohipa ˈi Kimberly i te parau ma te tano?

⁶ Ia faaohipa tatou i te ô o te parau ma te tano, e faaite ïa tatou e te haamori ra tatou ia Iehova. E tauturu tatou i te feia e haaati ra ia tatou ia ite i “te taa-ê-raa . . . i rotopu i te taata o te tavini i te Atua e te  taata o te ore e tavini ia ˈna.” (Mal. 3:18) Tera ta te tuahine Kimberly b i ite. I te haapiiraa, ua titauhia ia ˈna ia ohipa e te hoê piahi. I te otiraa ta raua ohipa, ua tapao te hoa haapiiraa mea taa ê roa Kimberly i te tahi atu mau piahi. Eita o ˈna e paraparau i muri i te tua o vetahi ê, e faahiti noa o ˈna i te parau maitai e eita o ˈna e parau ino. Ua faahiahia roa te hoa i te hiˈoraa o Kimberly e farii atura i te hoê haapiiraa Bibilia. Auê Iehova i te oaoa a ite ai e te hinaaro ra te taata e haapii no nia ia ˈna maoti ta tatou mau parau!

7. E nafea tatou e faaohipa ˈi i te ô o te parau ta te Atua i horoa mai?

⁷ Na roto i ta tatou mau parau, te hinaaro nei tatou paatoa e faahanahana ia Iehova e e piri atu â i to tatou mau taeae. E hiˈo anaˈe te tahi mau tuhaa e nehenehe ai tatou e tamau i te riro ei hiˈoraa maitai na roto i ta tatou mau parau.

8. E nafea te hiˈoraa maitai o Iesu e tauturu mai ai i roto i ta tatou taviniraa?

⁸ Ei parau maitai e te faatura noa to outou i mua i te taata iria. I te roaraa o ta ˈna taviniraa, ua pari haavarehia Iesu. Ua parauhia no ˈna e taata inu i te uaina e te tamaa haapuupuu, e tavini o ˈna na te Diabolo, aita o ˈna e faatura i te Sabati e ua faaino o ˈna i te Atua. (Mat. 11:19; 26:65; Luka 11:15; Ioa. 9:16) Aita râ Iesu i pahono atu ma te riri. Mai ia ˈna, ia parau-ino-hia mai tatou, eita roa ˈtu tatou e pahono ma te iria. (Pet. 1, 2:21-23) Papu, e ere roa ˈtu i te mea ohie ia na reira. (Iak. 3:2) Eaha râ te tauturu mai?

9. Eaha te tauturu mai ia haavî i to tatou vaha a poro ai tatou?

⁹ Tei mua anaˈe tatou i te hoê taata iria, eiaha roa ˈtu tatou e riri. Te na ô ra te taeae Sam: “E tiatonu noa vau i nia i te faufaaraa ia ite teie taata i te parau mau no nia i te Atua ma te haamanaˈo atoa e e nehenehe o ˈna e taui.” I roto i te pororaa, ua farerei paha tatou i te hoê taata o tei riri aˈena. I mua i tera tupuraa, e nehenehe tatou e pee i te hiˈoraa o tuahine Lucia tei ani ia Iehova i te tauturu ia vai hau noa e ia ore e faahiti i te mau parau tano ore.

10. Ia au i te Timoteo 1, 4:13, eaha ta tatou fa?

¹⁰ A riro ei taata aravihi atu â i te haapii. Ua riro Timoteo ei Kerisetiano aravihi i te haapii e ua tamau o ˈna i te haamaitai atu â i ta ˈna taviniraa. (A taio i te Timoteo 1, 4:13.) E nafea tatou ia riro ei taata aravihi atu â i te haapii? E titauhia ia faaineine maitai ia tatou. Ua rau te mauhaa  e vai ra ia tatou no te riro ei taata aravihi atu â i te haapii. E nehenehe tatou e faaohipa i te buka rairai A haamataro i te taio e te haapii atu, oia atoa te tuhaa “A rave maite i ta oe taviniraa” i roto i te Faaineineraa no te putuputuraa Oraraa e taviniraa Kerisetiano. Te faaohipa maitai ra anei oe i tera mau mauhaa? Ia faaineine maitai tatou ia tatou, eita ïa tatou e taiâ e e paraparau tatou ma te papu.

11. Mea nafea te tahi mau Kerisetiano i te riroraa mai ei taata aravihi atu â i te haapii?

¹¹ E nehenehe atoa te mau taeae e tuahine i roto i te amuiraa e tauturu ia tatou ia riro ei taata aravihi atu â i te haapii. Ua ui Sam ia ˈna iho eaha tei tauturu i te tahi mau Kerisetiano ia riro ei taata aravihi i te haapii. Ua haapii o ˈna i ta ratou mau huru raveraa e ua tamata o ˈna i te pee i to ratou hiˈoraa. Ua haapii te tuahine Talia e no te faataa maitai i te mau tumu parau faaroo-pinepine-hia i roto i te pororaa, mea faufaa ia haapao i te huru e horoa ˈi te mau taeae aravihi i ta ratou oreroraa parau.

12. Eaha te fifi ta vetahi i farerei?

¹² I ta tatou mau putuputuraa, e himene amui tatou e e horoa atoa tatou i te mau pahonoraa faaineine-maitai-hia. (Sal. 22:22) E mea fifi paha no vetahi ia himene e ia horoa i te pahonoraa i mua i te taata. Tera anei to oe tupuraa? E faufaahia oe a ite ai eaha tei tauturu i te tahi mau tavini tei taiâ i te himene e i te pahono i te mau putuputuraa.

13. Eaha te tauturu mai ia himene ma te aau atoa i te mau putuputuraa?

¹³ A himene ma to aau atoa. E himene tatou na mua roa no te faahanahana ia Iehova. Ua manaˈo te tuahine Sara e ere o ˈna i te mea aravihi roa no te himene. Ua hinaaro mau râ o ˈna e arue ia Iehova na roto i te himene. Ua faaineine maitai ïa o ˈna ia ˈna i te fare mai ta ˈna e rave nei no te tahi atu mau tuhaa o te putuputuraa. E na nia iho noa o ˈna i te faaroo i te himene no te ite eaha te tuatiraa i rotopu i te himene e te tumu parau o te putuputuraa. Te na ô ra o ˈna: “Ia tiatonu noa vau i nia i te mau taˈo, eita ïa vau e haapao faahou i ta ˈu huru himene.”

14. Mai te peu mea mamahu oe, eaha te tauturu ia oe ia pahono i te putuputuraa?

¹⁴ A tamau i te horoa i te pahonoraa. E nehenehe te reira e riro ei mea fifi no vetahi. Te faataa ra Talia: “E taiâ hanoa vau, noa ˈtu aita vetahi e tapao ra no te mea aita to ˈu reo e rûrû ra ia paraparau vau. E ere roa ˈtu ïa i te mea ohie no ˈu ia  pahono.” Aita râ te reira i tapea ia Talia ia horoa i te pahonoraa. Ia faaineine o ˈna i ta ˈna mau putuputuraa, e haamanaˈo noa o ˈna e i te pahonoraa matamua, e titauhia ia faahiti i te parau poto o te pahono iho â i te uiraa. Te na ô ra o ˈna: “Aita ïa vau e haapeapea ia horoa vau i te pahonoraa poto, ohie e te tano no te mea tera iho â ta te taeae faatere i te haapiiraa e tiai ra.”

15. Eaha te titauhia ia haamanaˈo ia horoa tatou i te pahonoraa?

¹⁵ Noa ˈtu e ere te tahi mau Kerisetiano i te mea mamahu, e taiâ atoa paha ratou i te horoa i te pahonoraa. No te aha? Te faataa ra te tuahine Juliet: “I te tahi taime, e taiâ vau i te pahono no te mea e manaˈo vau e ere ta ˈu pahonoraa i te mea maitai roa.” A haamanaˈo, te hinaaro ra Iehova ia horoa outou i te pahonoraa e maraa ia outou. c E oaoa roa Iehova ia tutava tatou i te pahono i te mau putuputuraa noa ˈtu i te tahi taime e taiâ tatou.

16. Eaha te mau parau ta tatou e haapae roa?

¹⁶ A haapae roa i te mau huru parau ino atoa. (Eph. 4:31) Mai ta tatou i ite mai i te omuaraa, ei Kerisetiano, eita tatou e faahiti i te parau ino. E rave rau hoi huru parau ino. E titauhia râ ia tatou ia haapae roa i te faahiti i te reira. Ei hiˈoraa, e haapao maitai tatou ia ore e faaau i te hoê pǔpǔ taata i te tahi atu e ia ore e faaino i to ratou nunaa e taˈere. Eita roa ˈtu tatou e hinaaro ia mauiui vetahi ê no ta tatou mau parau. Te na ô ra te hoê taeae: “I te tahi taime, e faahiti au i te parau hauti ma te ore e manaˈo e nehenehe te reira e haamauiui ia vetahi ê. A mairi ai te mau matahiti, ua tauturu rahi mai ta ˈu vahine ia ˈu ia haapao maitai i ta ˈu huru paraparau.”

17. Ia au i te Ephesia 4:29, e nafea tatou e faaitoito ai ia vetahi ê?

¹⁷ Ei parau maitai noa to outou no te faaitoito. Ia ru outou i te haapopou, eiaha râ i te faaino e te amuamu. (A taio i te Ephesia 4:29.) Mea rahi te tumu e mauruuru ai te mau Iseraela, pinepine râ ratou i te amuamu. Ia pinepine tatou i te amuamu, e na reira atoa vetahi ê. E haamanaˈo paha tatou i te faatiaraa hape o na ahuru mata huna tei turai i te ati Iseraela atoa ia “amuamu ia Mose.” (Num. 13:31–14:4) Ia haapopou râ tatou ia vetahi ê, e tauturu te reira ia ratou ia oaoa noa. Papu maitai, ua itoitohia te tamahine a Iepheta i roto i ta ˈna taviniraa maoti  te mau haapopouraa a to ˈna mau hoa. (Tav. 11:40) Te na ô ra te tuahine Sara: “Ia haapopou tatou ia vetahi ê, e ite ratou e mea herehia ratou e Iehova e e mea faufaa ratou i roto i ta ˈna faanahonahoraa.” A tamau ïa i te haapopou i te mau taeae e tuahine.

18. Ia au i te Salamo 15:1, 2, no te aha e mea tia ia faaite i te parau mau e eaha te titauhia ia tatou?

¹⁸ A faaite i te parau mau. Eita Iehova e mauruuru aita anaˈe tatou e faaite i te parau mau. Mea hae hoi na ˈna te mau huru haavare atoa. (Mas. 6:16, 17) Noa ˈtu no e rave rahi taata, e ere i te mea ino ia haavare, e pee noa tatou i te manaˈo o Iehova. (A taio i te Salamo 15:1, 2.) Papu, eita tatou e haavare, eita atoa râ tatou e taviri i te parau.

19. Eaha ta tatou e vai ara?

¹⁹ Eiaha e hopoi haere i te parau. (Mas. 25:23; Tes. 2, 3:11) Te faataa ra Juliet mea nafea te hopoi-haere-raa i te parau i te haamauiuiraa ia ˈna. Te na ô ra o ˈna: “E toaruaru roa vau a faaroo ai i te taata ia faaino ia vetahi ê. Mea fifi no ˈu ia tiaturi faahou i tera huru taata. O vai ite e te faaino atoa ra paha o ˈna ia ˈu.” E arero hopoi parau anaˈe to roto i te hoê aparauraa, a taui i te aparauraa ma te faahiti i te parau faaitoito.—Kol. 4:6.

20. Na roto i ta tatou mau parau, eaha ta tatou e faaoti papu i te rave?

²⁰ I teie mahana, mea rahi te taata o te ore e faaohipa maitai ra i te ô o te parau. Mea tia ïa ia tutava tatou i te faahiti i te parau e oaoa ˈi Iehova. A haamanaˈo, e ô te reira no ǒ mai ia Iehova ra e mea faufaa roa no ˈna ta tatou e parau. E haamaitai o ˈna i te mau tutavaraa atoa ta tatou e rave no te faahiti i te parau maitai i roto i te taviniraa, i te mau putuputuraa e ia tauaparau tatou ia vetahi ê. I te taime noa e haamou ai Iehova i teie ao ino, eita tatou e haafifi-faahou-hia no te faahanahana ia Iehova na roto i ta tatou mau parau. (Iuda 15) A tiai noa ˈi, e faaoti papu anaˈe i te faaoaoa ia Iehova na roto i “te mau parau a to [tatou] vaha.”—Sal. 19:14.