1. Кин кузьмаз милемлы вераськыны быгатонлыкез?

 ВЕРАСЬКЫНЫ быгатонлык — со яратӥсь Инмармылэн кузьымез. Нырысетӥ адямилэн, Адамлэн, инмысь Атаезлы аслэсьтыз малпанъёссэ кылъёсын верамез луэ вал. Со быгатэ вал выль кылъёс малпаны. Солы луыса Адам пудо-животъёслы нимъёс сётъяны быгатӥз (Ул.-выл. 2:19). Пуктэ син азяды, макем шумпотӥз Адам, куке нырысетӥзэ вераськиз аслаз кышноеныз, Еваен! (Ул.-выл. 2:22, 23).

2. Кызьы вераськыны быгатонлыкез адямиос азьвыл кутӥзы но кызьы туннэ куто?

² Но ӝоген куд-огъёсыз шонертэм вераськыны кутскизы. Кылсярысь, Шайтан Еваез пӧяз. Соин сэрен адямиос сьӧлыкоесь луизы (Ул.-выл. 3:1—4). Собере Адам шонертэм ужъёсыз понна Еваез но Иеговаез янгыше уськытӥз (Ул.-выл. 3:12). Каин Авель агайзэ виемез бере Иеговаез пӧяз (Ул.-выл. 4:9). Берлогес Ламех гожтӥз кылбур, кудӥз возьматэ, со дыръя дунне лек ужъёсын тырмемын вал шуыса (Ул.-выл. 4:23, 24). Нош туннэ кивалтӥсьёс лек кылъёсын верасько. Фильмъёс кырсь вераськонъёсын тырмемын. Школаын, уж дорын ӵем дыръя урод кылъёсты кылыны луэ. Таӵе вераськонъёс возьмато, та дунне туж лек луиз шуыса.

3. Мар луоз, ми сак ӧм луэ ке, но мае ми эскеромы та статьяын?

 ³ Сак ӧм луэ ке, оло нош, ми но кырсь кылъёсын вераськыны кутскомы. Но ми христианъёс бере, милям урод кылъёсын вераськеммы уг поты. Со интые, вераськонъёсынымы милям Иеговаез данъяммы потэ. Ойдолэ тодомы, кызьы ми кылъёсынымы Иеговаез данъяны быгатӥськомы: 1) тодытыкумы, 2) кенешлэн пумиськонъёсаз но 3) огшоры вераськонъёсын. Но нырысь эскеромы, малы Иегова чакла, мар сярысь но кызьы ми вераськиськомы.

4. Малахиялэн 3:16 верамъя, малы Иегова чакла, мар сярысь ми вераськиськомы?

⁴ Лыдӟе Малахиялэсь 3:16. Малпаськиды-а тӥ, малы Иегова «буре ваён книгае» гожтэ со адямиослэсь нимъёссэс, кудъёсыз солэсь кышкаса но солэн нимыз сярысь малпаськыса уло? Милям кылъёсмы возьмато, мар милям сюлмамы. Соин ик Иисус вераз: «Сюлэм пачылмыку, кыл вера» (Матф. 12:34). Вераськонъёсмы возьмато, макем юн ми яратӥськомы Иеговаез. Нош Иеговалэн потэ, сое яратӥсь адямиос пырак дауръёс ӵоже выль дуннеын мед улозы шуыса.

5. а) Малы чаклано, кызьы ми вераськиськомы? б) Учке суредэз. Малэсь палэнсконо, вераськонъёсмы Иеговалы ярамонэсь мед луозы шуыса?

⁵ Со сяна, ужам-тыршеммы Иеговалы ярамон мед луоз шуыса, милемлы чакланы кулэ, кызьы ми вераськиськомы (Иак. 1:26). Соос, кинъёс Иеговаез уг ярато, урод но лек кылъёсын верасько (2 Тим. 3:1—5). Нош милям озьы вераськеммы уг поты. Милям вераськонэнымы Иеговаез шумпоттэммы потэ. Но ми христиан пумиськонъёсын но тодытыкумы асьмеды лякытэн возиськомы ке, нош матысь адямиосынымы лек кылъёсын вераськиськомы ке, Иеговалы со ярамон уз луы (1 Пётр 3:7).

6. Кыӵе пайда вайиз Кимберли сузэрлэн умой кылъёсын вераськемез?

⁶ Куке ми вераськиськомы озьы, кызьы Иеговалэн потэ, ми возьматӥськомы,  солы ужаськомы-тыршиськомы шуыса. Соку котырысьтымы адямиос адӟозы «Инмарлы ужаса улӥсьлэсь но Солы ужатэк-тыршытэк улӥсьлэсь пӧртэмлыксэс» (Мал. 3:18). Тани Кимберли b сузэрлэн учырез. Школаын дышетскыкуз, солы ӵош дышетскисеныз уж сётӥзы. Дасяськыкузы ӵош дышетскисез адӟиз, Кимберли кыл вӧлдыса уг ветлы, ассэ лякытэн возе но урод кылъёсын уг вераськы шуыса. Тае адӟыса, солэн Библиез дышетэмез потӥз. Иегова туж шумпотэ, куке вераськеммес кылыса, адямиослэн мылкыдзы ӝутске зэмлыкен тодматскыны.

7. Кызьы милям вераськеммы потэ?

⁷ Ваньмылэн милям вераськеммы потэ озьы, со Иеговаез мед данъялоз, озьы ик вын-агайёсынымы но сузэр-апайёсынымы кусыпъёсмес мед юнматоз шуыса. Соин ик ойдолэ эскеромы пайдаё визь-кенешъёсты, кудъёсыз юрттозы милемлы вераськыны озьы, кызьы Иеговалы кельше.

8. Кызьы Иисус ассэ возиз, куке адямиос со сярысь уродзэ веразы, но кызьы ми солэсь адӟем карыны быгатӥськомы?

⁸ Адямиос споръяськыны кутско ке, лякытэн но гажаса вераське. Иисус сярысь веразы, со сиськыны, вина юыны яратэ, Шайтанлы ужа-тырше, субботаез уг утьы но Инмарез сантэма шуыса (Матф. 11:19; 26:65; Лука 11:15; Иоанн 9:16). Но Иисус уродлы пумит уродэн ноку ӧз берыктылы. Туннэ но адямиос лекъяськыны кутско ке, милемлы, Иисус сямен, пумитазы урод кылъёс верано ӧвӧл (1 Пётр 2:21—23). Но со котьку ик капчи ӧвӧл (Иак. 3:2). Мар милемлы юрттоз?

9. Мар юрттоз тодытыкумы лякытэн вераськыны?

⁹ Тодытыкуды адямиос лекъясько ке, вождэс эн поттэ. Тани мар вера Сэм агай: «Мон тыршисько тодам возьыны, адямиослы зэмлыкез кылыны кулэ но соос воштӥськыны быгато шуыса». Куддыръя адямиос йыркуръяськыны кутско, малы ке шуоно ми тупасьтэм дыре лыктӥмы. Ойдолэ адӟем каромы Люсия сузэрлэсь. Куке со лекъяськись адямиез пумита, со Иеговалы вакчияк вӧсяське но куре юрттыны солы ассэ кияз кутыны но лякытэн вераськыны.

10. Мар милемлы карыны тыршоно азьланяз но, 1 Тимофейлы 4:13 верамъя?

¹⁰ Адямиосты эшшо но быгатыса дышетэ. Тимофей умой тодытыны быгатэ вал ке но, солы но дышетсконо вал эшшо но умойгес тодытыны. (Лыдӟе 1 Тимофейлы 4:13.) Нош мар юрттоз милемлы адямиосты  эшшо но быгатыса дышетыны? Со понна тодытэмлэсь азьло умой дасяськыны кулэ. Милемлы юрттыны быгато «Дышетскы устогес лыдӟиськыны но дышетыны» брошюра но ужан тетрадьысь «Дышетскиськомы устогес ивортыны» люкет. Уже кутӥськоды-а тӥ та публикациосты? Умой дасяськон юрттоз тӥледлы ӧжытгес сюлмаськыны.

11. Мар эшшо юрттоз на адямиосты быгатыса дышетыны?

¹¹ Со сяна, ми мукет вын-агайёслэсь но сузэр-апайёслэсь дышетскыны быгатӥськомы. Кылсярысь, Сэм агай адӟем каре агайёслэсь но сузэръёслэсь, кудъёсыз мукетъёссэ умой дышетыны быгато. Нош Татьяна сак кылзэ агайёсты, кудъёсыз умой речьёс верало, но дышетске валэктонъёс сётъяны юанъёслы, кудъёссэ тодытыкумы ӵем сётъяло.

12. Мар куд-огъёсызлы секытэн сётӥське?

¹² Ваньмы ми быгатӥськомы пумиськонъёсы пыриськыны, валэктонъёс сётъяса но кырӟанъёсты кырӟаса (Пс. 21:23). Но куд-огъёсызлы трос адямиос азьын вераськыны, уката ик кырӟаны но, туж секыт. Тӥледлы но секыт-а? Соку ойдолэ тодомы, мар юрттоз милемлы таӵе шӧдонъёсты вормыны.

13. Мар юрттоз милемлы пумиськонъёсын вань сюлмысьтымы кырӟаны?

¹³ Вань сюлмысьтыды кырӟалэ. Эксэйлык кырӟанъёсты кырӟакумы, нырысь ик милям потэ Иеговаез данъяммы. Кылсярысь, Сара сузэр уг малпа, со туж чебер кырӟаны быгатэ шуыса. Озьы ке но солэн Иеговаез данъямез потэ. Соин ик пумиськонъёслы дасяськыкуз, со малпаське, кызьы кырӟанысь кылъёс герӟаськемын соин, мар пумиськонын эскериськоз. Сара вера: «Куке мон малпаськисько кырӟанысь кылъёс вылын, соку мон уг сюлмаськиськы, кырӟаны быгатӥсько-а, уг-а шуыса».

14. Мар юрттоз пумиськонъёсын валэктонъёс сётъяны, тӥ возьдаськиськоды ке но?

¹⁴ Пумиськонъёсын валэктонъёс ялан сётъялэ. Куд-огъёсызлы со туж секыт! Татьяна вера: «Адямиос азьын мон туж сюлмаськисько, мукетъёсыз сое уг адӟо ке но». Озьы ке но Татьяна тырше валэктонъёс сётъяны. Пумиськонъёслы дасяськыкуз, со тодаз возе, юанлы нырысетӥ валэктон вакчи но валамон луыны кулэ шуыса. Со вера: «Валэктонэ вакчи но огшоры кылъёсын верамын луиз ке, со умой. Малы ке шуоно пумиськонэз нуись агай ӵапак сыӵе валэктонэз возьма».

15. Мае вунэтоно ӧвӧл, пумиськонъёсын валэктонъёс сётыкумы?

¹⁵ Куддыръя соослы но, кинъёс туж ик уг  возьдасько, пумиськонъёсын валэктонъёс сётъяны секыт. Малы? Джулиет сузэр валэктэ: «Куддыръя мыным секыт киме ӝутыны, малы ке шуоно мон кышкасько, мае ке туж огшорызэ верало шуыса». Но ойдолэ ум вунэтэ: Иегова уг возьма, ми туж визьмо малпан вераломы шуыса. Со возьма, ми лэсьтомы шуыса ваньзэ, мае быгатомы c. Инмар туж шумпотэ, куке ми, кышканмы шоры учкытэк, кенешлэн пумиськонъёсаз сое данъяны тыршиськомы.

16. Кыӵе кылъёсын вераськоно ӧвӧл?

¹⁶ «Лек кылъёсын» эн вераське (Еф. 4:31). Кызьы гожтэмын вал ини, христианъёс лек кылъёсын уг верасько. Но куддыръя ми асьмеос но ум валаське, лек кылъёсмы пото шуыса. Кылсярысь, сак луоно но мукет калыкысь адямиос сярысь урод кылъёс верано ӧвӧл. Со сяна, милям вӧсь карись кылъёс вераммы уг поты. Одӥг агай вера: «Азьвыл мон быгатӥсько вал кинэ ке мыскыл карыны. Мон малпасько вал, отын номыр умойтэмез ӧвӧл но адямиосты со вӧсь уг кары шуыса. Но вань со аръёс ӵоже огнамы дыръя кышное валэктылӥз мыным, озьы мон сое но мукетъёссэ вӧсь карисько шуыса».

17. Ефесъёслы 4:29 верамъя, кызьы ми мукетъёссэ юнматыны быгатӥськомы?

¹⁷ Юнматӥсь кылъёс вералэ. Мукетъёссэ ушъялэ, нош соосты пыкылыса но ӝожтӥськыса эн улэ. (Лыдӟе Ефесъёслы 4:29.) Израиль калыклэн тау карон понна трос мугъёсыз вал ке но, соос ялан ӝожтӥськыса улӥзы. Но куддыръя одӥг адямилэн ӝожтӥськемез сэрен мукетъёсыз но ӝожтӥськыны кутско. Кылсярысь, дас учкисьёслэн-чакласьёслэн Сӥзем музъем сярысь урод кылъёс верамзы сэрен, быдэс израиль калык Моисей вылэ ӝожтӥськыны кутскиз (Лыд. 13:32—14:4). Нош кыӵе пайда ваё ушъян кылъёс? Соос бурдъяло! Тодамы ваёмы Иеффайлэсь нылзэ. Куке эшъёсыз сое ушъязы, та солы кужым сётӥз азьланяз но ужаны-тыршыны (Суд. 11:40, ВД, сноска). Сара сузэр, кудӥз сярысь гожтэмын вал ини, вера: «Куке ми кинэ ке ушъяськомы, адями вала, Иегова, вын-агайёс но сузэр-апайёс сое ярато шуыса». Соин ик ойдолэ тыршомы мукетъёссэ ушъяны.

18. Малы пӧяськоно ӧвӧл но мар со пӧлы пыре? (Псалтирь 14:1, 2).

¹⁸ Эн пӧяське. Иегова пӧяськисьёсты уг яраты. Со «синазькыль каре... ӧрекчаськись  кыло» адямиосты (Мад. 6:16, 17). Туннэ тросэз малпало, пӧяськытэк улыны уг луы шуыса. Но та юан шоры милям Иегова кадь учкеммы потэ. (Лыдӟе Псалтирез 14:1, 2.) Соин ик ми ум пӧяськиське, озьы ик ӝынызэ шонер, нош ӝынызэ пӧяса но ум вераське.

19. Мар сярысь эшшо вунэтоно ӧвӧл?

¹⁹ Кыл нуллыса эн ветлэ (Мад. 25:23; 2 Фес. 3:11). Джулиет сузэр валэктэ: «Кин ке но кыл нуллыса ветлэ ке, со мылкыдэз куашкатэ, малы ке шуоно со адямилы оскыны секыт ини. Кытысь мон тодӥсько, со мон сярысь но кыл нуллыса уз улы шуыса?» Тӥ шӧдӥськоды ке, кин ке сярысь уродзэ вераны кутско шуыса, тырше умоез сярысь вераськыны (Кол. 4:6).

20. Кыӵе мылкыдын тӥляд улэмды потэ?

²⁰ Та дуннеын адямиос туж урод кылъёсын верасько. Соин ик милемлы туж тыршоно вераськонэнымы Инмарез данъяны. Но ойдолэ ум вунэтэ: вераськыны быгатонлык — со Иеговалэн кузьымез. Соин ик со чакла, мар сярысь но кызьы ми вераськиськомы. Тодытон дыръя, кенешлэн пумиськонъёсаз но огшоры вераськонъёсын ми тыршиськомы ке кылъёсынымы Иеговаез данъяны, со милемыз бакель кароз. Ӝоген та дунне быдтэмын луоз. Соку вераськонэнымы Иеговаез данъяны капчигес луоз (Иуда 15). Нош али ойдолэ уломы сыӵе ик мылкыдын, кыӵе вал псаломъёсты гожъясьлэн: «Ымысьтым потэм кылъёсы... Тон азьын ярамонэсь мед луысалзы» (Пс. 18:15).