1. Chi che ne ga dato la abilità de parlar?

 NOANTRI parlemo parché el nostro Pare, Geovà, el ne ga dato questo bel presente. Pena dopo che Adon l’è stà creà, lu el ga scominsià a parlar col so Pare. Adon el gavea anca la abilità de crear parole nove. Lu el ga fato questo quando el ga dato nome ale bèstie. (Gén. 2:19) Podemo imaginar come Adon l’è restà contento quando el ga parlà la prima volta cola so bela dona, Eva! — Gén. 2:22, 23.

2. Come le persone le dopera el presente che Geovà el ne ga dato?

² Savemo che pena dopo che el primo omo l’è stà creà, tanti no i ga doperà ben el presente che Geovà el ne ga dato. Par esémpio, Sàtana el ga contà una busia a Eva, e par quela, no semo perfeti e sbaliemo. (Gén. 3:1-4) Adon el ga sbalià e el ga parlà che la colpa la era de Eva e de Geovà. (Gén. 3:12) Cain el ga contà una busia a Geovà dopo de copar el so fradel, Abel. (Gén. 4:9) Dopo, Lameche el ga fato un poema che el gavea tanta violensa. (Gén. 4:23, 24) Cossa parlemo dei nostri giorni? Tanti governanti i dopera parole brute davanti dei altri. L’è anca fadiga catar un filme che no’l gàpie parole brute. I gióveni i parla robe sporche e brute nela scola e quei pi veci nel so laoro. Tuto questo mostra che cada volta de pi le persone le parla e le fà le robe che disgusta a Geovà.

3. (a) Con cossa ghemo de star atenti? (b) Cossa ndaremo veder in questo stùdio?

³ Se no stemo mia atenti, podemo seitar a scoltar parole sporche e dopo scominsiar a doperarle anca noantri. Ma mai ghemo de doperar queste parole, parché volemo contentar e lodar a Geovà. In questo stùdio, ndaremo veder  come podemo far cossita (1) nela predicassion, (2) nele riunion, e (3) nele nostre ciàcole. Prima, vedemo parché che Geovà l’è atento a quel che parlemo.

4. De acordo con Malachia 3:16, parché che Geovà l’è atento a quel che parlemo?

⁴ Ledi Malachia 3:16. b La Bìblia la dise che Geovà el ga un “libro de ricordassion”. In questo libro, ghen’è el nome dele persone, che par meso de quel che le parla, le mostra che le rispeta e le pensa sora el so nome. Parché che Geovà el ga el nome de queste persone nel so libro? Parché quel che le parla el mostra cossa le ga rento el so cuor. Gesù el ga dito che la boca la parla quel che ghen’è nel cuor. (Mat. 12:34) Alora, mostremo che amemo a Geovà par meso de quel che parlemo. E Geovà el vol tanto che quei che i lo ama i possa viver felice par sempre qua nela Tera.

5. (a) Parché che ghemo de parlar sol quel che l’è bon? (b) De acordo coi ritrati, quando che podarìssino disgustar a Geovà?

⁵ Geovà sol ghe piaserà dela nostra adorassion se parlemo quel che l’è bon e con bontà. (Tiago 1:26) Arquanti che no i ama a Geovà i parla de una maniera cativa, sensa bontà e con orgòlio. (2 Tim. 3:1-5) Sicuro che no volemo far come queste persone. Pitosto, volemo sforsarse par far e parlar quel che ghe piase a Geovà. Ma Geovà no’l resta mia contento se doperemo bele parole quando semo nela predicassion o coi fradei, ma no femo cossita casa. — 1 Pie. 3:7.

6. Cossa ga sucedesto par via dela maniera che Kimberly la parlea?

⁶ Quando parlemo quel che l’è bon e con bontà, mostremo ai altri che semo servi de Geovà. Cossita, podemo giutarli a veder la difarensa “intrà quel che el serve a Dio e quel che no lo serve”. (Mal. 3:18)  Varda quel che ga sucedesto cola sorela Kimberly. c Ela la ga fato un laoro de scola con nantra tosa. Alora quela tosa la ga capio che Kimberly la era difarente dei altri gióveni. Ela no la parlea mal dei altri, gnanca no la doperea parole sporche e la parlea sempre con bontà. Alora, quela tosa la ga scominsià a studiar la Bìblia con Kimberly. Sicuro che Geovà el resta tanto contento quando i altri i vol imparar sora lu par via dela maniera che parlemo.

7. Cossa che tuti noantri volemo far col presente che Geovà el ne ga dato?

⁷ Tuti noantri volemo parlar de una maniera che ghe dae onor a Geovà e che ne giute a esser cada volta pi amighi dei fradei. Alora, ndaremo veder arquante robe che podemo far par seitar a esser boni esempi in quel che parlemo.

8. Che esémpio Gesù el ne ga dato?

⁸ Parla con rispeto e bontà anca quando i te dise su. Quando Gesù l’era qua nela Tera, arquante persone le disea che lu l’era un omo che el magnea e el bevea massa, che el laorea par Sàtana, che no’l obedia ala lege del sabo e che no’l rispetea a Dio. (Mat. 11:19; 26:65; Luc. 11:15; Gioani 9:16) Anca cossita, Gesù no’l ghe ga mia dito su. Cossa imparemo? Quando qualchedun el ne dise su, no ghemo mia de risponderghe dela medèsima maniera. (1 Pie. 2:21-23) Sicuro che no l’è fàcile far cossita. (Tiago 3:2) Alora, cossa pol giutarne?

9. Cossa pol giutarne a seitar tranquili quando qualchedun el ne dise su nela predicassion?

⁹ Quando qualchedun el ne dise su nela predicassion, no ghemo de restar ofendesti. Un fradel de nome Sam el ga dito: “Mi proo ricordarme che l’è tanto importante che la persona la impare sora Geovà e che la pol cambiar.” Pol esser che la persona anca la ne dise su parché semo rivadi nela so casa nte una ora che no la pol discorer. Quando catemo qualchedun che l’è cativo nela predicassion, podemo far compagno ala sorela Lucia. Ela la ga dito che la fà una pìcola orassion a Geovà e la domanda el so aiuto par seitar tranquila e no dirghe gnente de bruto indrio.

10. De acordo con 1 Timòteo 4:13, cossa che volemo far?

¹⁰ Proa insegnar cada volta meio. Timòteo l’era un bravo predicador, ma el se sforsea par farlo cada volta meio. (Ledi 1 Timòteo 4:13. d) Come anca noantri  podemo predicar cada volta meio? Ghemo de pareciarse ben. Vedemo arquante robe che le pol giutarne. Par esémpio, podemo imparar tanto cola revista Sfòrsate par Leder e Insegnar Meio e cola session “Imparemo a Insegnar come Gesù” nela Programassion Vivemo e Insegnemo. Sito drio doperarle ben? Quando se pareciemo ben, restemo pi tranquili e pi sicuri de quel che parlemo.

11. Cossa che ga giutà arquanti fradei a predicar meio?

¹¹ Noantri podemo predicar cada volta meio quando imparemo del esémpio de bravi fradei dela congregassion. Sam, che ghemo parlà vanti, el fà cossita. Lu el varda i fradei che i fà boni discorsi e el proa far compagno a lori. Una sorela de nome Talia anca la ze tanto atenta ai discorsi de bravi fradei. Cossita, la ga imparà a risponder meio le domande che le persone nela predicassion le fà.

12. Che dificoltà arquanti infronta?

¹² Tuti noantri podemo cantar e dar boni comentari nele riunion. (Sal. 22:22) Ma par arquanti ghe fà fadiga far queste robe. Anca ti te te senti cossita? Alora te piaserà saver quel che ga giutà altri fradei a dàrghene fora con queste dificoltà.

13. Cossa pol giutarte a cantar de cuor nele riunion?

¹³ Canta de cuor. Noantri cantemo nele riunion par lodar a Geovà. Una sorela che la ga nome Sara la pensa che no la canta tanto ben. Ma ela la vol lodar a Geovà nei càntichi. Alora cossa la fà? La se parecia come la fà cole altre parte dela riunion. Ela la proa cantar i càntichi e veder come che lori i ze de acordo con quel che la ndarà imparar nela riunion. Sara la ga dito: “Cossita son bona de pensar de pi nele parole e nò tanto in come che canto.”

14. Se te fà fadiga comentar nele riunion, cossa te ghè de ricordarte?

¹⁴ Sfòrsate par far comentari nele riunion. Farlo l’è tanto fadiga par arquanti. Talia che ghemo parlà vanti la ga dito: “Come mi parlo de una maniera tranquila, tanti no i se nicorde che mi resto tanto ansiosa de parlar davanti dei altri. No l’è fàcile par mi far comentari nele riunion.” Anca cossita, Talia la seita a farlo. Cossa che l’è drio giutarghe? Quando la ze drio pareciarse par la riunion, la se ricorda che el primo comentàrio el ga de esser pìcolo e risponder pròpio la domanda. Ela la ga dito: “Questo vol dir che posso parlar poco e sol quel che l’è la roba pi importante del paràgrafo, anca parché el  fradel che l’è drio far la parte el speta che femo pròpio cossita.”

15. Cossa ghemo de ricordarse quando ne fà fadiga comentar?

¹⁵ Varda nantra roba che pol intrigarne de far comentari. Una sorela che la ga nome Juliet la ga dito: “Dele volte mi gnanca no fao comentari parché penso che i ze massa pìcoli e no i ze tanto boni.” Se anca ti te pensi cossita, ricordate che Geovà el resta contento con quel che te sì bon de far. e Sicuro che lu el resta tanto contento quando femo el nostro meio, anca cole nostre dificoltà.

16. Cossa che un servo de Geovà no’l ga de parlar?

¹⁶ No stà parlar robe che le va disgustar i altri. (Efe. 4:31) Noantri ghemo belche imparà che un servo de Geovà no’l pol mia parlar robe brute o sporche. Ma ghemo anca de star atenti par no parlar robe rugne de persone dele altre culture o de altri posti. Gnanca no volemo parlar robe par rider che le ndarà disgustar a qualchedun. Un fradel el ga dito: “Mi pensea che l’era bel parlar robe dei altri par rider, ma tante volte lori i restea disgustadi. Quando la me dona la vedea che mi fea cossita, la me disea che mi gavea disgustà i altri e dele volte anca ela.”

17. De acordo con Efesi 4:29, come che podemo incoraiar i altri?

¹⁷ Parla quel che ndarà incoraiar i altri. Invesse de parlar mal o sbrontolar, ghemo sempre de lodar i altri. (Ledi Efesi 4:29. f) Geovà el gavea dato ai israeliti tante robe bone. Ma invesse de ringrassiarlo, lori sempre catea fora qualcossa par sbrontolar. Par esémpio, lori i ga fato cossita quando i spioni i ze tornadi dela Tera Prometesta. Diese de lori i ga parlà robe rugne de quela tera, e par quela tuti i israeliti i ga scominsià a sbrontolar par Moisè. (Nùm. 13:31–14:4) Cossa che imparemo? Quando qualchedun el sbrontola, anca quei che i ze insieme i pol scominsiar a farlo. Invesse de sbrontolar, ghemo de lodar i altri. Par esémpio, sicuro che la fiola de Geftè la ze restada pi contenta de far el so laoro parché le so amighe la incoraiea. (Giuisi 11:40) Sara, che ghemo parlà prima, la ga dito: “Quando lodemo una persona, la assemo sicura che Geovà e  tuti noantri la amemo.” Alora, sfòrsate par sempre lodar i altri de cuor.

18. (a) De acordo con Salmo 15:1, 2, parché che ghemo de parlar la verità? (b) Cossa che ghemo de ricordarse quando ndemo contar una roba a una persona?

¹⁸ No stà contar busie. Ancoi tanti i pensa che no l’è sbalià contar busie e che l’è una roba che tuti i fà. Ma Geovà el òdia tute le busie. (Pro. 6:16, 17) E anca noantri pensemo cossita. (Ledi Salmo 15:1, 2. g) Alora sol ndaremo assar Geovà contento se sempre parlemo la verità. Quando semo drio contar una roba a una persona, ghemo anca de parlar tuto quel che la ga de bisogno par capirla de maniera giusta.

19. Cossa no ghemo de far quando semo drio ciacolar con qualchedun?

¹⁹ No stà mia parlar mal dei altri. (Pro. 25:23; 2 Tes. 3:11) Juliet, che ghemo parlà vanti, la ga dito come la se sente quando qualchedun el parla mal dei altri. Ela la ga dito: “Quando scolto qualchedun parlar mal de una persona, mi resto tanto disgustada e no son pi bona fidarme in lu. Mi me domando: ‘Come che posso esser sicura de che lu no’l ndarà parlar mal de mi ai altri?’.” Alora cossa te ghè de far se ti o nantra persona scomìnsia a parlar mal de qualchedun? Férmate e parla de una roba che la ndarà incoraiarve. — Col. 4:6.

20. Come te vol doperar el presente che Geovà el te ga dato?

²⁰ Ancoi cada volta de pi persone le parla robe brute. Par quela che ghemo de sforsarse tanto par sempre parlar quel che ghe piase a Geovà. Ghemo de ricordarse che Geovà el ne ga creà cola capassità de parlar e lu el se preocupa come che doperemo questo presente. Se noantri se sforsemo, Geovà el ndarà giutarne a parlar quel che l’è bon nela predicassion, nele riunion e quando ciacolemo coi altri. Sicuro che dopo che questo mondo rugno el sarà destruto, sarà tanto pi fàcile darghe onor a Geovà par meso de quel che parlemo. (Giuda 15) Ma par intanto, ghemo de far el nostro meio par contentar a Geovà par meso de quel che parlemo. — Sal. 19:14.