1. Taani onivanhe mukhalelo ahu woowuuluma?

 WUULUMA ti yoovaha yootepa oreera nivahinwaahu ni Yehova Muluku ahu oosivela. Adamu yoowo aari mutthu oopatxera opattuxiwa, annavarihela muteko eparakha eyo, weera uulumeke ni Tiithi awe a wiirimu. Owo-tho, aahaatxeerera masu manyowaani, nave-tho aavarela muteko osuwela aakhalannaawe weera akwanihere muteko aavahiwaawe ni Yehova woowaavaha masina asinama. (Eph. 2:19) Nave-tho, aahakalala vaavo aapatxenraawe wuuluma ekwaha yoopatxera ni mwaariye Heva, yoowo aamusivelaawe vantxipale!—Eph. 2:22, 23.

2. Ehuhu ya khalayi, nlumi naavarihelinwe hayi muteko moonanara, nave-tho moota heeni atthu envarelaaya muteko olelo va?

² Eparakha yoowuuluma, yaavareliwa muteko moohireerela. Satana Diabo aamoototha Heva, mwaha wa yeeyo, yoohaakumihera okhwa atthu ootheene akhumme wa Adamu. (Eph. 3:1-4) Adamu tho, khaavarenle muteko nnene nlumi nawe, vaavo aamoompaawe mulattu Heva—mpaka omoototha Yehova—mwaha wa soottheka sawe. (Eph. 3:12) Nave Kayini aamoototha Yehova amwiivakaru munnawe Habeli. (Eph. 4:9) Moottharelana, osuulu wa Kayini yoowo eeriwa Lameque, aahuuluma masu yaawo yaathoonyera oowali wa mahuku ale. (Eph. 4:23, 24) Neereke olelo va, itthu sootxentxeya? Hoye, hiyo ninnawoona ahooleli a epoliitika yuulumaka masu oonanara variyari waatthu. Nave-tho, tiwooxupa ophwanya iviidiyu sihinuuluma masu oonanara. Nave ale ari anaxikola, anniiwa masu oohuureya oxikola ni ale ari oowuunnuwela anniiwa masu mmapuroni anvaraayamu muteko. Mooripiha murima, atthu antxipale annavarela muteko  masu oonanara yuulumaka vale. Etthu eyo, ennoneya elapo yootheene ya vathi.

3. Itthu heeni siri soowoopiha seiyo nintthuneyaahu wiikosoopa ni itthu heeni ninkela ahu woona mpuwa mwa yoosomeene yeela?

³ Naahiikosoopa, pooti okhovelela wiiwa ni opatxera wuuluma masu oonanara. Mweekhaikhai, hiyo nri makristu nintthuneya omuhakalaliha Yehova, nihuulumaka masu oowuuliha muru. Mene nto, nintthuneya wuuluma masu oolipiha yaawo—aninvuwiha Muluku. Mpuwa mwa yoosomeene yeela, ninkela woona moota woopaka eyo (1) mmutekoni woolaleera, (2) mmithukumanoni sa mmulokoni ni (3) otthekula wahu mahuku ootheene. Mene vano, ninkela woona mwaha wa heeni masu ahu eraaya ootepa otthuneya wamaithoni va Yehova.

4. Moovarihana ni Malakhiya 3:16, mwaha wa heeni wuuluma wahu oraaya wootthuneya wamaithoni va Yehova?

⁴ Mmusome Malakhiya 3:16. Nyuwo munnawera wuupuwela etthu heeni yeera emweerihe Yehova woolepani ‘mbuukhuni mwawe yoowuupuxera,’ masina a yaale anoonihera weera annamoova ni amphimelela mwa nsina nawe? Masu ahu annoonihera etthu eri vamurimani vahu. Yesu enre: “Tthiri eyano enúluma sa yeyo esareñye mmurimani.” (Math. 12:34) Etthu nnuulumaahu ennoonihera waari weera ninnamusivela Yehova kapena hooye. Mene nto, Yehova ontthuna weera yaale ammusivela ekhaleke mahuku ootheene elapo enyowaani.

5. (a) Okokhorela wahu onvarihana hayi ni etthu nnuulumaahu? (b) Ntoko enooniheraaya efootu, eheeni nintthuneyaahu wiikosoopa nuulumaka vale?

⁵ Wakhala weera khannuuluma nnene, Yehova khankela waakhulela okokhorela wahu. (Yak. 1:26) Atthu ahimmusivela Muluku annuuluma moowali ni moowiisunuwiha. (2 Tim. 3:1-5) Mweekhaikhai hiyo khanintthuneya okhala ntoko yaawo. Nintthuna weera masu ahu emusiveliheke Yehova. Mene neereke Yehova onoohakalala waakhala weera nnuuluma masu oolipiha ni ooreera mmithukumanoni mwa ekristu naari mmutekoni moolaleera? Neereke Yehova onoohakalala waakhala weera khannuuluma moorerela ni muhooleli a etthoko naphwanya nsele niwaliwe?—1 Ped. 3:7.

6. Yaakhumelenle heeni mwaha wa Kimberly wuuluma nnene?

 ⁶ Nuulumaka nnene ninnoonihera weera nimmukokhorela Yehova Muluku eekhaikhai. Nave-tho, ninnaakhavihera atthu woona weera wookhala ovirikana eriyari ya “yole onamukokhorela Muluku ni ole ohinamukokhorela.” (Mal. 3:18) Moone moota etthu eyo yoonihereñyaaya ni murokora oneeriwa Kimberly. * Owo aathanliwe weera asomeke ni koleegaawe. Esomakaru wamoha, kolegaawe aahonelela weera Kimberly aari mutthu oovirikana ni anaxikola akina. Owo khaathoriha atthu akina, uuluma masu oolipiha ni khuuluma masu oonanara. Koleega aasomanaawe aatikiniheya mpaka waakhulela omusoma Biblya. Mweekhaikhai, Yehova onnahakalala vaavo nnuulumaahu masu anaalipiha atthu akina!

7. Munkela ovarela hayi muteko iparakha nvahiwaanyu ni Muluku?

⁷ Ootheene hiyo nintthuneya wuuluma masu aninvuwiha Yehova ni annaattameliha asinna. Vanonto, nnookela woona moota “nneerahu nivaheke ntakihero nuulumaka vale.”

8. Ntakihero heeni Yesu onivanhaawe woohima sa wuuluma nnene naalaleeraka?

⁸ Mwatthekeliwa vale muulumke ni nttittimiho. Mpuwa mwa muteko awe woolaleera, Yesu ooniwa okhala namatxa, namuhapaliwa, mutthu onkhuma wa Satana, mutthu ohinttittimiha Esaabado mpaka anneereliwa mutthu onveeha Muluku. (Math. 11:19; 26:65; Luka 11:15; Yoh. 9:16) Mene nto, itthu iyo ootheriwaawe khasaamweerinhe Yesu okhala mutthu oowali. Nimutakihaka Yesu, hiyo khanintthuneya ompakela mutthu ntoko onipakenlaawe naari omuulumela isampwa. (1 Ped. 2:21-23) Mene okhala mutthu oopixa murima khohiyono ti wookhweya. (Yak. 3:2) Eheeni enkela onikhavihera?

9. Eheeni eneera enikhavihere okhala oomaaleleya naalaleeraka vale?

⁹ Mweerere ohiya omunyemela mwaneene vaate. Munna mmoha oneeriwa Sam onhimme ha: “Kinneerera ovarexexa yootthuna ya mwaneene vaate weera iiwe ikhaikhai kinwehereraka weera owo onootxentxa vanihikuni.” Pooti weera ikwaha ikina mwaneene vaate onnanyema mwaha wooweera niphiñye ehuhu yoohimureerela. Vaavo ninkhalaahu oomaaleleya ewoora yeeyo mwaneene vaate onnyemaawe ninnahelela onamoona, nipakaka etthu aapankaawe murokora mmoha oneeriwa Lúcia. Pooti opaka nivekelo moowaakuveya ninvekelaka Yehova weera anikhavihere okhala oomaaleleya ni osempa okhala oonyoonyiwa ni ohoonihera nttittimiho.

10. Moovarihana ni 1 Timotheyo 4:13, eheeni ninkelaahu opaka?

¹⁰ Mulaleereke nnene mitthenka sooreera. Timotheyo aari mukristu mutokweene aakhalanne  sookumanano sintxipale. Nnaamweera vaari hiiho, owo annavirelela opaka itthu soomunepani. (Mmusome 1 Timotheyo 4:13.) Ninkela owera hayi olaleya nnene mitthenka sooreera? Niireherereke nnene nihinaakuveene opatxera olaleera. Moohakalaliha nookhalano ikaruma sintxipale sooreera seiyo sinkela onikhavihera olaleya nnene mitthenka sooreera. Nyuwo munoopaka etthu yooreera waakhala weera muwenhe miruku siri va ebroxura Mwiilipiheryeke Osoma ni Wiixuttiha empari “Aplique-se ao Ministério de Campo” ya Ekumi ni mutekwaahu wa makristau—Ekadernu ya vamweerini. Neereke nyuwo munnakhavihereya ni itthu sene seiyo? Niirehereraka nnene, nihinaakuve orowa wuulaleerani, khannyoonyiheyaka ni nneereke wuuluma ni ororomeleya.

11. Moota heeni makristu makina yaakhanlaaya anamaxuttiha a nnene?

¹¹ Hiyo pooti owera olaleera nnene niwoonelaka atthu akina mmulokoni ni ooxuttera ni yaawo. Sam, ohimmwale woopatxerani, onnaakoha anamalaleera akina ele enweeriha okhumelela nnene mmutekoni woolaleera. Nave, owo onneerera waatakiha. Murokora mmoha oneeriwa Talia onnavaha ephole vaavo asinna arinono sookumanano ampakaaya mwaha mmulokoni. Mwaha woopaka eyo, owo ooxuttera wuuluma ni wuupuwelela itthu sinkhumelela veeli-veeli mutekoni woolaleera.

12. Maxupo heeeni atthu akina anvirihaaya?

¹² Atthu ootheene pooti okhavihera ohakalala mmulokoni naakhulelaka itxipo siniipiwa ni nivahaka ikomentaariyu soorehereya. (Nsal. 22:22) Atthu akina onnaaxupa wiipa waatiwavo vale. Ankha nyuwo neereke onnooxupani? Wakhala weera onnooxupani, nyuwo mmweereke owera wiipa waakhala weera munimwaakoha atthu akina yaawo yaarino maxupo mamoharu, ni etthu eyo enimookhaviherani owina woova.

13. Eheeni enkela wookhaviherani woosivelani wiipa ni murima wootheene mmithukumanoni?

¹³ Mwiipeke ni murima wootheene. Vaavo nniipaahu itxipo sa omwene, yootthuna ahu ekhaleke yoovuwiha Yehova. Murokora mmoha oneeriwa Sara khiisoona oreera nsu. Nnaamweera vareene hiho, owo onnatthuna onvuwiha Yehova ni itxipo sawe. Mwa yeyo, owo onnoona okhala etthu yooreera orehera itxipo ntoko onrehereraawe impari ikina sa mmithukumanoni. Owo onnarehera itxipo iyo ni woona moota sinvarihanaaya ni mwaha. Owo onhimme há: “Eyo ennakikhavihera ovarexexa ohiya owera waka wiipa.”

14. Nyuwo mwaareene mutthu oowisuka, eheeni enkela wookhaviherani ovaha ikomentaariyu mmithukumanoni?

¹⁴ Nvaheke ikomentariyu. Mene opaka eyo khohiyono ti wookhweya wa atthu akina. Talia ohimme há: “Kinnatthuna wiipa, mene  nsu naka khanniiwanyeyaxa nnaamweera atthu akina ehisuwelaka eyo,” “mene nto, ovaha ikomentariyu ti wookixupa” nnaamweera vareene hiiho, Talia khanhiya ovaha ikomentaariyu. Arehereraka mithukumano onnahela mpuwa ekomentaariyu yoopatxera ya mwaha ni ophwanya waakhula mooluluwanya. Owo ohimme ha: “Eyo entaphulela weera waakhula waka okhaleke wookhuveya ni wooluluwanya, mwaha wooweera waakhula moota owo, tiwoovara murima.”

15. Nuupuweleke eheeni woohima sa ikomentaariyu?

¹⁵ Aani, makristu yaale oohisunka, naari owisuka pooti waaxupa ovaha ikomentaariyu. Mwaha wa heeni? Murokora oneeriwa Julieta ohimme ha: “Emaara ekina khonkisivela okomentari mwaha wooweera, kinnoona weera ekomentaariyu aka khahiyono tiyoolipiha.” Mene muupuwele weera, Yehova ontthuna weera nipakeke ele ninweraahu weera nivaheke ikomentaariyu. * Yehova ontthuna weera ninvuwiheke mmithukumanoni sa mmulokoni, nave nihaakhulele weera woova wahu onikhulumule.

16. Masu heeni oonanara nintthuneyaahu osempa?

¹⁶ Musempeke wuuluma ‘masu ooveeha.’ (Aef. 4:31) Ntoko ehimmwalaaya woopatxerani, masu oonanara khayaanono nipuro vayanoni va mukristu. Mene aakhala masu ooveeha yaawo nintthuneyaahu wiikosoopa. Mwa ntakihero, nintthuneya wiikosoopa weera nihiilikanxereke ni atthu a sookhovelela soovirikana, mahimo oovirikana naari ilapo. Ohiya eyo-tho, hiyo khanintthuneya waanyoonyiha atthu akina ni masu oothikila. Munna mmoha onnaakhulela: “Emaara ekina kinnuuluma masu yaawo kinoonaaka weera nkaaphwanela wuuluma ni muhoolo mwaya kinnamoonela ikharari mutthu kimuulumenlaaka. Iyaakha sa muttuli, amwaaraka yaakikhavihera weera kihuulumeke masu oonanara yaawo anaanyoonyiha atthu akina.”

17. Moovarihana ni Aefeso 4:29, moota heeni nneeraahu naalipiheke atthu akina?

¹⁷ Muulumeke masu enaalipiha atthu akina. Mweereke waattottopela atthu akina, ohiya waathoriha ni waakhupanya. (Mmusome Aefeso 4:29.) Ana a israyeli yaakhalano itthu sintxipale yaaphwanelaaya omuxukurela Yehova. Opwaha mwa yeeyo, yaamweera omukhupanya Yehova. Munepa wookhupanya pooti okhala woovalihaniwa. Nyuwo munnuupuwela moota awo yoonenlaaya yiiwakaru mitthenka soonanara ni anamahottela muloko “ana a Israyeli othene yapatxera omukhupanya Mose.” (Nam. 13:31–14:4) Opwaha mwa yeeyo, olipiha pooti ovara murima okumiheraka itthu sooreera. Nroromeleke weera, mwanawe Jefté mwaha woottottopeliwa ni asikhwaawe aalipa vantxipale weera aawera okwanihera muritti awe. (Aph.  11:40) Sara, ohimmwale woopatxerani, enre: “Vaavo nnaattottopelaahu atthu akina, ninnawoonihera weera Yehova onnaasivela ni awo annoona weera aakhalano nipuro mmarehereroni mwa Yehova.” Mwaasaasereke ehuhu yoowaattottopela atthu akina.

18. Movarihana ni Nsalmu 15:1, 2, mwaha wa heeni nitthuneyahu wuuluma ekhaikhai ni eyo enhela mpuwa eheeni?

¹⁸ Muulumeke ekhaikhai. Hiyo khaninwera omusiveliha Yehova wakhala weera nnimootha. Owo onniitta wootha wootheene. (Mir. 6:16, 17) Nnaamweera atthu antxipale olelo va yoonaka weera wootha kheiyono etthu yootthekeya, mene hiyo nri akristu ninnamuhela mpuwa Yehova woohima sa mwaheene yowo. (Mmusome Nsalmu 15:1, 2.) Mweekhaikhai hiyo ninnasempa wuuluma itthu soowootha, nave-tho, ninnasempa owuuluma atthu akina moohireerela.

19. Etthu eheeni nintthuneyaahu osepa?

¹⁹ Musempeke orakama nlumi. (Mir. 25:23; 2 Ates. 3:11) Julieta, yoole ohimmwale woopatxerani onnahima moota waapa oraaya woonanara. Owo onthaliha ha: “Kamwiiwaka mutthu amwaapaka mutthu mukina onnakikhulumula nave nroromelo naka ni mutthu owo nnamala. Mwaha wooweera, nkisuwela wakhala weera mutthu owo aakhalaka ni atthu akina khankaapa?” Wakhala weera nyuwo munimoonelela weera matthekulelo anyu toonanara, mutxentxeke mwaha owo ni muulumeke masu ooreera.—Akol. 4:6.

20. Eheeni mwithanlenlaanyu opaka ni masu anyu?

²⁰ Mwaha wookhala elapo ela enlamuleliwa ni Satana, atthu ahinoonaaya okhala yoottheka wuuluma moohirerela, nto hiyo nri makristu onnatthuneya wiilipihera weera nuulumeke masu ammuhakalaliha Yehova. Muupuweleke weera wuuluma yoovaha enkhuma wa Yehova, ni owo onnapwatthela moota nivarihelaahu muteko yoovaha eyo. Owo ononreeliha wiilipihera wahu wakhala weera nimmuuluma masu ooreera naalaleeraka, noonelaka mithukumano ni naatthekulaka mahuku ootheene. Wakhala weera elapo ela enilamuleliwa ni Satana enoophiya okhwipi, oneereke okhweya onvuwiha Yehova ni masu ahu. (Yuda 15) Mwa yeeyo, muthanleke omuhakalaliha Yehova ni “masu ankhuma mmwaanoni mwanyu.”—Nsal. 19:14.